Is jou woorde salf of suur?

“Maar,” sê sommige, “ek vloek nie rêrig nie. Ek gebruik onskuldige woorde soos ‘Flip it!’ of ‘Daai vrekken ou’, of ‘Jou idioot!’ of dalk ‘Jou onnosele skepsel’”. Noem maar op. Dit maak nie eintlik saak nie. Dis die bedoeling agter die woorde wat saakmaak. Meestal word die woorde gebruik om jou uiterse afkeur van iets of iemand in die sterktste moontlike terme uit te druk. Ons dink dis net woorde, maar woorde het die mag om te vernietig. Woorde vernietig mense se eietrots en selfbeeld. Boonop sê die manier waarop jy praat iets van jou, of jy nou daarvan hou of nie. Dalk is dit beter om net stil te bly.

In die vroeë Christelike kerk was stilte onder sekere omstandighede die reël. Pous Sextus het mense gemaan tot stilte eerder as om onverantwoordelike uitsprake oor God te maak. Een vroeë Christenpriester het selfs voorgestel dat ʼn mens jou hand voor jou mond moet hou om te keer dat jy onsin praat oor ʼn onderwerp waarvan jy niks weet nie: “Wees versigtig met wat jy sê en pasop dat jy nie praat voordat jy jou woorde vooraf opgeweeg en oordink het nie,” was sy raad.

Wanneer kan ʼn mens dan met vrymoedigheid praat? Wanneer dit verkeerd sou wees om stil te bly.

Wat sê Jesus oor hoe ʼn mens moet praat:

“Seën die mense deur wie julle vervloek word.” Lukas 6:28a

Hy sê egter ook:

Julle slange! Hoe kan julle wat sleg is, iets goeds sê? Waar die hart van vol is, loop die mond van oor. Die goeie mens bring die goeie te voorskyn uit die oorvloed goeie dinge in sy hart; die slegte mens bring die slegte te voorskyn uit die oorvloed slegte dinge in sy hart.

“Dit sê Ek vir julle: Van elke ligsinnige woord wat die mense sê, sal hulle rekenskap moet gee op die oordeelsdag. Op grond van jou eie woorde sal jy vrygespreek of veroordeel word.” Matteus 12:34-37

En wat het Jesus onder die ergste provokasie gesê?

Jesus het egter niks meer gesê nie. Markus 15:5
 

Gebed: Here, ons dink woorde behoort aan ons om te maak en te breek soos ons wil terwyl ons vergeet dat ons elke woord wat uit ons mond kom in u teenwoordigheid uiter. Help my om ʼn wag voor my mond te plaas. 

Bron:  versndag.co.za 

NGVishoek: Ds. ( dominee ) Martin Barnard.