Kuier saam
Kommetjie Hoenderbraai
Daar word sommer vroeg in die jaar, Februarie, reeds met ‘n Hoenderbraai afgeskop. Wat begin het as ‘n beskeie huispiekniek in Kommetjie in die 1980’s met ‘n handjievol plaaslike lidmate, is deesdae ‘n allemintige Gemeente geselligheid.
Dit is die Kommetjie lidmate se bydrae om die Gemeentefondse te styf. Dit vind plaas by die Kommetjie Laerskool. Die vure word op die regte tyd aangesteek, die tafels gedek en om 18:00 daag die Gemeente en vriende van buite in hulle hordes op.
Dan word die smaaklike ete, wat vleis, slaaie, broodjie en nagereg met ‘n tee/koffie om mee af te sluit, saam geniet. Daar heers ‘n heerlike, gesellige atmosfeer wat ‘n Kommetjie-gees van Christen- omgee weerspieël.
Kom geniet ‘n slag die heerlike samesyn.
Visfees/Basaar
Hierdie is gewoonlik een van ons jaarlikse hoogtepunte op ons Gemeente kalender. Daar word reeds maande voor die tyd begin om te beplan om alles betyds gereed te kry. Dit is verstommend maar ook verblydend om te sien hoeveel lidmate by hierdie dag betrokke is. Daar is stalletjies vir alles en nog wat. Vars en gebraaide visgeregte, ontbyt rolletjies, Kerrie en rys, Poedings, pannekoeke, vetkoeke, tee tuin, gebak(koeke, beskuit ens.), plante en Wit Olifant tafel.
Daar word ook karre gewas deur ons Jeug (A2J) om fondse vir hulle uitreik in te samel. Daar is ook genoeg vermaak soos ‘n spring kasteel en waterglybaan vir die kinders om hulle besig te hou sodat die ouers ongestoord hulle inkopies kan doen en ‘n rustige koppie tee. ens kan geniet.
Dit is ook ‘n ideale geleentheid waartydens die breër Vishoek Gemeenskap die gesellige atmosfeer wat daar heers kan kom geniet. Dit word gewoonlik gedurende die eerste naweek van Maart by Paul Greyling Laerskool aangebied.
Teebediening
Daar word Sondag oggende direk na die erediens gesellig saam tee gedrink in die Media-sentrum wat in die dubbel motorhuis reg langs die kerk is. Hier kan ouers, wat vir hulle katkisasie-kinders wag, en nuwe Intrekkers mekaar ontmoet en lekker ontspan. Dit is heerlik om daar verby te loop en die geskerts en gelag te hoor.
Dankie aan ons vrouediens wat hierdie bediening bedryf. Moet nie droë mond eenkant staan nie. Hier is ‘n geleentheid om nuwe mense/lidmate te leer ken.