Tema 3: “God skryf ‘n liefdesverhaal“
Ons leef in ’n tyd van geweldige rusteloosheid en onrustigheid. Mense is gefrustreerd met hulle omstandighede. En meer nog, mense is onseker oor die toekoms. Daarom soek baie mense naarstiglik na kalmte en sekuriteit en rus. Dit is waarvoor ons as Christene in hierdie wêreld is. Ons moet Christus se liefde so aan mekaar bewys dat mense by die Here rus kan vind.
LEES: RUT 3
In Rut 3 lees ons van Naomi wat by Rut so ’n gebrek aan rus opgemerk het. Naomi is aangesteek deur Rut se toewyding en waagmoed in die geloof. Nou is sy (Naomi) besorg oor Rut se toekoms, en sy is bereid om planne te maak. Net soos Rut planne gemaak het om te gaan are optel (Rut 2). Sy besef dat die Here besig is om dinge te laat gebeur. Rut het nie toevallig by Boas se land uitgekom nie. En, dit was nie toevallig dat Rut met 13 kg gars van Boas by die huis aangekom het nie. Daarom maak Naomi ook planne.
