Vanuit so ’n geloofsraamwerk is Nelson Mandela God se groot geskenk aan Suid-Afrika en die wêreld.

Mandela het groot frustrasie in sy ywer vir geregtigheid in sy geboorteland be-leef. Hy is byvoorbeeld in 1960 nie eens geantwoord op ’n skriftelike pleidooi om ’n gesprek met dr. H.F. Verwoerd nie. Tog het hy bly verkondig onreg beroof nie net die verdruktes nie, maar ook die verdrukkers van hul menslikheid.

Ná 27 jaar in die tronk is hy nie bitter nie, maar dra die vaandel van versoening te midde van die mag en aansien wat hy as wêreldwye ikoon het.

In die week ná sy veelbesproke verskyning in ’n Springbok-rugbytrui wat hom die no. 1-nasiebouer gemaak het, verwoord hy sy houding in ’n toespraak aan Afrikaner-organisasies.

Hy toon begrip vir die Afrikaner se liefde vir sy taal en kultuur. Hy vind ooreenkomste in die vryheidstryd teen kolonialisme en die verbondenheid aan die grond. Hy huiwer nie om sy teleurstelling uit te spreek omdat Afrikaners wat self erg gely het, hul mede-Suid-Afrikaners soveel lyding kon aandoen nie. Hy benadruk dat die Christelike oortuiging oor die gelykheid van mense ons moet lei om die toekoms saam te bou.

Wanneer die Bybel ons deur groot leiers herinner aan God se genade, skep dit hoop: God kan weer én meer.

– André van Niekerk

Uit die Woord: “Mag die koning se naam altyd onthou word, mag sy roem duur so lank as die son daar is, sodat al die nasies hulle in sy regering verlustig en hom prys!” – Psalm 72:17

Bron:  beeld

NGVishoek: Ds. ( dominee ) Martin Barnard.