“Afrikaanssprekendes is nog ietwat meer godsdienstig, maar daar is nie meer ’n beduidende verskil nie,” het prof. Lawrence Schlemmer, een van Suid-Afrika se mees gerespekteerde so­sioloë, die afgelope week gesê.

Rapport het Schlemmer om kommentaar genader nadat dié koerant die laaste ruk syfers gepubliseer het wat daarop dui dat die NG Kerk (die grootste van die Afrikaanse gereformeerde kerkverbande) se getal lidmate die laaste jare erg afgeneem het.

Volgens syfers van die NG Kerk se taakspan oor geld het dié kerk in die vorige boekjaar 10 558 lidmate verloor (genoeg om 21 middelslag-gemeentes van 500 lidmate elk vol te maak).

In sommige kerkkringe is bespiegel dat die getal dalk selfs meer kan wees, maar sekerheid sal eers verkry word wanneer die kerk se amptelike lidmaatpeiling, Kerkspieël, volgende jaar bekend gemaak word.

Volgens Schlemmer dui inligting wat die marknavorsingsfirma Markdata verlede maand ingesamel het daarop dat die gereformeerde kerkfamilie (wat die NG Kerk, Hervormde Kerk, Gereformeerde Kerke en Verenigende Gereformeerde Kerk insluit) nou net 46% van Afrikaanssprekendes onder hul lidmate tel.

“En die meerderheid van dié mense is nie gereelde kerkgangers nie. Hulle is net nominale lidmate.”
’n Groeiende 28% van Afrikaanssprekendes behoort aan evangeliese en Pinksterkerke (die sogenaamde charismatiese kerke), maar dit is die 6% van Afrikaanssprekendes wat aan geen kerk of geloof behoort nie, wat die vinnigste groei.
“Afrikaanse mense het oor die laaste jare baie meer sekulêr geraak.”
’n Verdere 8% van Afrikaanssprekendes behoort aan ander hoofstroom- Protestantse kerke (soos die Presbiteriane), 5% is Anglikaans, 4% Katoliek en 3% behoort aan nie-Christelike gelowe (Islam inkluis).

“As jy 20 jaar gelede gekyk het, sou jy gesien het veral drie dinge was vir die meeste Afrikaanse mense baie belangrik: godsdiens, kultuur en taal.

“Deesdae kan ons egter sê dat godsdiens nie meer ’n noodwendige kenmerk van Afrikaanse mense is nie, terwyl belangstelling in Afrikaanse kultuur ook beduidend verswak het.

“Daar is nog ’n toewyding aan die Afrikaanse taal onder so 55% van die mense en dit is al ding wat Afrikaanse mense nog van die kultuurprofiel van Engelssprekendes onderskei.”

Schlemmer se uitsprake is gegrond op die uitslae van ’n landwye steekproef wat Markdata onder meer as 2 000 Afrikaanse mense gedoen het om ’n verbruikersprofiel saam te stel.

Tydens die peiling is mense ook oor hul persoonlike voorkeure en oortuigings ondervra.

Die Stellenbosse godsdienssosioloog Rashid Begg het bygevoeg sekularisasie is waarskynlik maar een van die redes vir die afname in die gereformeerde kerke se lidmaattal.

Daar is ook onder sommige lidmate ’n ontnugtering met dié kerke se apartheidsverlede, terwyl heelwat oorloop na charismatiese Pinksterkerke wat nie net in Suid-Afrika groei nie, maar wêreldwyd ’n soortgelyke groei toon.

“Dit is egter duidelik dat die NG Kerk deesdae die hand uithou na mense van kleur in wat blykbaar meestal ’n eerlike gebaar is. Die kerk het sedert 1994 ’n transformasie ondergaan en gaan steeds deur politieke omwentelinge … Die volgende sensus sal aandui hoe suksesvol die kerk se pogings was om sy lidmate te behou.” 

Bron: Rapport (http://www.nuus24.com/Suid-Afrika/Nuus/Afrikaanses-is-glo-al-minder-gelowig-20101205)