BY WYSE VAN SPREKE

Toe ek weer bykom is ek in my kombuis. En nou, wat nou? My half-vol waentjie staan iewers in die winkel en daar is nog steeds geen geskenke onder die boom of kos op die stoof nie. Ek sluk bewerig soet tee…bedaar en bedink ‘n kalm Kersfees. Ek tel my Bybel op en begin geskenkies uitdeel:

 

Die eerste geskenk is vir my man: Wie die Here dien, het daarin ‘n veilige toevlug, en ook sy kinders vind daar skuiling (Spr 14:26).

 

Spreuke 17:27 in die ’53 vertaling klink so: Wie sy woorde inhou, besit kennis; en hy wat kalm is van gees, is ‘n man van verstand. Hierdie woorde beskryf my seun!

 

Vir my meisiekind: …as jy jou vertroue in die Here stel, is jy veilig (Spr 29:25b).

 

Die pasgetroude niggie kry twee geskenkies: Stralende oë bring blydskap (Spr 15:30a). ‘n Knap vrou gee haar man hoë aansien (Spr 12:4a).

 

Vir al die tieners: ’n Kalm gemoed hou die liggaam gesond (Spr 14:30a).

 

Spreuke 14:6b is vir al die studente: ‘n Verstandige mens doen maklik kennis op.

 

Die volgende raad gaan aan ‘n neef wat hopeloos te hard werk: Probeer liewer wysheid bekom as goud, liewer insig as silwer (Spr 16:16).

 

Daar is selfs ‘n geskenkie vir die geduldige huishulp: Die Here laat die mens wat reg doen, nie honger ly nie (Spr 10:3a).

 

Oupa: Ouderdom is ‘n sierlike kroon; dit word bereik deur dié wat reg lewe (Spr 16:31).

 

Spreuke 31:10-31 word met groot dank aan ouma gegee.

 

En vir myself: Liewer ‘n stukkie droë brood met vrede daarby… (Spr 17:1a).

 

 

Hoor jy hoe sag die klokke beier

in eeue-oue taal.

Kyk, selfs die nagtelike swye

vertel die ou verhaal.

Kersfees kom, Kersfees kom –

gee aan God die eer.

Skenk ons ‘n helder Somerkersfees

In hierdie land, o Heer.

(Lied 358:2)

 

 

NGVishoek: Ds. ( dominee ) Martin Barnard.