Jy mag nie valse getuienis gee nie.


Soos Mark Twain tereg opgemerk het: “’n Leuen kan al halfpad om die aarde wees, terwyl die waarheid nog sy skoene aantrek!” En dit was vóór e-pos en die internet. Nou trek ’n leuen baie vinniger en verder as ooit tevore. 
“Die tong is ook ’n vuur, ’n wêreld vol ongeregtigheid, dié deel van die liggaam wat die hele mens besmet. Dit steek die hele lewe aan die brand…en word…uit die hel aan die brand gesteek.” Jak 3:6.

Skinder en kwaadpraat
Ons het ons almal al een of ander tyd aan skinder skuldig gemaak en dit is ’n sonde. Vir God is dit ’n ernstige saak. Die Bybel stel dit só: “…wie skinderstories versprei, is ’n dwaas…” Spr 10:18. Die opdrag is duidelik: “Moenie van mekaar kwaad praat nie, broers…” Jak 4:11.

Hoogmoed en kwaadwilligheid
Die skinderbedryf word dikwels deur hoogmoed aangedryf. Dit is die behoefte om mense wat beter as ons is, in ’n slegte lig te stel, om so onsself te verhoog deur ander af te trek. “Hou dan op met elke vorm van kwaad, met alle bedrog, huigelary, jaloesie en kwaadpratery.” 1 Pet 2:1. Kwaadpratery is onlosmaaklik aan kwaadwilligheid, bedrog, valsheid en jaloesie gekoppel.
Die Bybel waarsku ons teen mense wat “leer…om hulle tyd te verkwis deur net van een huis na die ander rond te kuier. Hulle is nie net ledig nie, maar ook bemoeisiek en praatsiek, en hulle praat oor dinge waaroor nie gepraat moet word nie.” 1 Tim 5:13.

Karaktermoordenaars
Die Here se Wet is duidelik: “Jy mag nie loop en skinder nie, jy mag nie jou medemens se lewe in gevaar stel nie. Ek is die Here.” Lev 19:16.
Skinder kan ’n ander mens se lewe in gevaar stel. “’n Knopkierie, ’n swaard, ’n skerp pyl, so is ’n man wat vals teen sy naaste getuig.”
Spr 25:18.
’n Paar jaar gelede het ons gesien hoe onvergenoegde uitgetrede lede van ’n uitmuntende sending in Afrika ’n verbete veldtog van haat en kwaadstokery geloods het. Webtuistes is geskep om die sending te beskinder, en elke denkbare wraaksugtige verguising is ingespan teen hierdie uitnemende Christelike gemeenskap.

Sondige laster
Ek was heeltemal verstom deur die volgehoue, obsessiewe en afbrekende kwaadwilligheid van die kwaad-stokers. ‘Sending van haat’; ‘Sending van vrees’; ‘Ek het uit die Sending van die hel ontsnap!’ – het opskrifte van koerante en tydskrifte dit uitbasuin.
Ek het ook ontdek dat baie oorsese bedienings die slagoffers geword het van soortgelyke patologiese teenpartye.
Soos dr. James Kennedy in ‘Delighting God’ skryf: “As jy net ’n bietjie bokant die gewone kudde uitstyg, as jy ’n greintjie meer sukses as jou naaste behaal, sal die pyle van kritiek verseker na jou geskiet word…” Kennedy haal ’n ou wysgeer aan: “As ek al die kritiek teen my moes lees, wat nog te beantwoord, saam met al die aanvalle teen my, sal hierdie kantoor vir sake moet sluit. Ek verrig alles so goed ek kan, na die beste van my vermoë, en ek is van voornemens om so voort te gaan – tot die einde toe. As ek dan op die ou end verkeerd bewys word – sal tien engele wat getuig dat ek reg was, geen verskil maak nie. As ek op laas reg bewys word, sal alles wat nou teen my gesê word, in elk geval niks beteken nie.”

Spurgeon se raad
Die grootste Baptiste prediker van alle tye, C.H. Spurgeon, het gewaarsku: “Moet die helfte van wat jy hoor, nie glo nie; moenie die helfte wat jy glo, herhaal nie. As jy ’n kwade gerug hoor, halveer dit, halveer dit weer, en bly stil oor die res. ”

Kwaadwilligheid teenoor ander
Spurgeon skryf: “Hoe meer prominent jy in diens van Christus is, hoe meer kan jy daarvan seker wees dat jy aan die ontvangkant van skindertonge sal wees. Ek het lank gelede al van my karakter afskeid geneem. Ek het dit al vroeg in my bediening verloor, deur net ’n bietjie yweriger te wees as waarmee ons sluimerende eeu gemaklik is.
En ek kon dit nog nooit weer herwin nie, behalwe in die oë van Hom wat die aarde sal oordeel, en in die harte van diegene wat my vir my werk waardeer.”
Tydens my navorsing vir ‘The Greatest Century of Missions’, was ek verstom oor hoe elkeen van die groot sendelinge van die verlede deur hulle tydgenote met die venynigste laster en verguising geteiken is. William Carey, Samuel Marsden, Hudson Taylor, David Livingstone en vele ander het die wreedste en kwaadwilligste aanvalle verduur – deur mense wat voorgee dat hulle Christene is.
George Whitfield, een van die grootste evangeliste van alle tye, en ’n sleutelfiguur in die Groot Evangeliese Ontwaking, is selfs uit die Church of England geskop – die kerk wat hy so getrou gedien het. Desnieteenstaande het dié kerk in Suid-Afrika sy kollege na George Whitfield vernoem.
Toe ek vir ‘The Greatest Century of Reformation’ navorsing gedoen het, was ek opnuut geskok deur die vyandigheid – nie slegs in die verlede nie, maar selfs tot op hede – teen sommige van die grootste Christelike hervormers wat deur God gebruik is om die kragtigste geestelike herlewing in die geskiedenis te bewerk. Een historikus het oor Johannes Calvyn opgemerk: “Oor geen beter man is daar ooit slegter berig nie; geen Christelike teoloog is só dikwels geminag, só gereeld aangeval nie.”

Teoloë geteiken
Selfs Amerika se grootste teoloog, Jonathan Edwards, die man wat die nouste met die Groot Evangeliese Ontwaking geassosieer word, is deur sy eie kerk ontslaan op grond van skinderstories – wat later bely is deur die een wat valslik teen hom getuig het.
In sy afskeidstoespraak het Edwards hierdie raad gegee: “…vermy twis. Twisgieriges sal altyd ongelukkig wees…kwaadpraters en dergelike dinge… [druis] lynreg teen die Christelike gesindheid in…” Die Skrif vermaan ons: “Moenie van mekaar kwaad praat nie, broers. Hy wat van sy broer kwaad praat of sy broer veroordeel, praat kwaad van die wet en veroordeel die wet.” Jak 4:11.
Charles Spurgeon was die teiken van venynige en beswadderende aanvalle deur die destydse Baptiste Unie. Nou is sy boeke die studieboeke van Baptistekolleges, en staan sy standbeeld voor die hoofkwartier van die Baptiste Unie.

Waarskuwing uit die Woord
Die Bybel waarsku ons “…hartstog vreet ’n mens op.” Spr 14:30. “Selfverheffing lei altyd tot twis.” Spr 13:10. Die Apostel Paulus waarsku teen “’n sieklike beheptheid met twisvrae en met stryery oor woorde. Daaruit ontstaan afguns, twis, beledigings, gemene verdagmakery, voortdurende rusie…” 1 Tim 6:4.
Die Woord van God is uitgesproke teen “ligsinniges, elkeen wat altyd gereed was om onreg te doen…ook dié wat sommer mense tot oortreders verklaar het, strikke gespan het vir dié wat reg wou laat geskied, en onskuldige mense hulle reg ontneem het deur vals getuienis.” Jes 29:20-21.
In die laaste boek van die Bybel is daar ’n lys van agt kategorieë van mense wat nie in die Hemel sal kom nie: “Maar dié wat bang en ontrou geword het, die losbandiges, moordenaars en onsedelikes, bedrieërs, en afgodsdienaars en al die leuenaars, hulle lot is die poel wat met vuur en swael brand, dit is die tweede dood.” Op 21:8.

Die sonde van swyg
’n Mens kan ’n ander ewe veel te na kom deur te swyg as deur te skinder – deur nie vir hom op te kom nie al weet jy goed dat hy vals beskuldig is.
“Jy mag nie vals getuienis gee nie,” beteken dat ons nie mag toesien, dit oorweeg, aandag gee aan, of luister na vals getuienis nie. Dit kan egter ook beteken dat jy moet praat wanneer jy moet. Hierdie gebod verbied nie slegs die aanhoor van vals getuienis nie, dit verbied ons ook om enigiets met vals getuienis te doen te hê. Jy mag nie iets versin, of aandag gee aan, of tob oor, of vals getuienis versprei nie. Ons mag nie vals getuienis gee óf ontvang nie.

Foutvindery
Die Negende Gebod verbied ons om vals getuienis in ons gedagtes, of hart, of op ons lippe te hê. Dit is ’n oortreding van die gebod om ons denke met oordrewe-, of vermeende idees van ’n ander se foute te besoedel.
Vals getuienis is enige oneerlike weergawe van gebeure, of enige vals stelling. Dit mag skinderstories wees, of kwaadpraat, of dit mag oneerlike inligting oor onsself wees, met die doel om ander te beïndruk. Dit sluit oneerlike of verdraaide verskonings in wat saamgeflans word om ons uit die moeilikheid uit te hou, of om skande te ontwyk.

Die sonde van vleiery
Onrealistiese vleiery is ook ’n leuen en is skadelik, omdat dit die ander persoon ’n valse siening van homself kan gee en hoogmoed tot gevolg kan hê. Baie ouers benadeel hulle kinders met ongegronde vleiery. Leuens bedroef die Heilige Gees. Dit vernietig ook vertroue. Die persoon aan wie ’n leuen vertel word, voel verraai omdat die een wat hy as betroubaar beskou en gerespekteer het, hom nou in sy vertroue geskok het. Oneerlike stellings is ook ’n vyandige daad. Elke leuen is ’n afbrekende aanslag op iemand se karakter. Leuens verstomp die gewete tot ongevoeligheid, en beskadig en vernietig uiteindelik persoonlike integriteit.

Wat motiveer vals getuienis?
Elke leuen behels sondes, en veroorsaak ook ander. Daar is gewoonlik ’n sondige dryfveer vir leuens. Hoogmoed en arrogansie is die onderbou van grootpraterige leuens. Lafhartigheid lê agter oneerlike verskonings. Haat, kwaadwilligheid en afguns lê agter wraakgierige geskinder. ’n Leuenaar wat probeer voorgee dat hy ’n Christen is wat met die Here wandel, is ook aan skynheiligheid skuldig. Sommige mense lieg en oordryf vir die vertoon, en om aandag te trek. Ander lieg om argumente te wen en guns te bekom.
Een van die algemeenste leuens waaraan jy dalk skuldig mag wees, sluit kreatiewe verskonings in. Wanneer ons ’n baie dom ding aangevang het, is die versoeking daar om die waarheid net so ’n bietjie aan te pas, of om na te laat om te doen wat nodig is.

Geestelike bedrog
’n Ander baie algemene en ernstige wyse waarop Christene dikwels leuens vertel, is deur geestelike leiding en seëninge te oordryf en voor te gee dat hulle ’n dieper wandel met God het as wat wel die geval is. Dit sluit die ydele gebruik van God se Naam in. Christene sal dikwels sê: “Die Here het vir my gesê…” en “Die Here het vir my gesê om vir jou te sê…” of “Ek bid nog daaroor…”.
Baie wat in byeenkomste as getuienisse, aanbidding en voorbidding deurgaan, is eintlik maar ’n oortreding van die Derde en Negende Gebooie.

Ananias en Saffira
’n Uitstekende voorbeeld hiervan in die vroeë Kerk, is die verhaal van Ananias en Saffira: “Maar daar was ook ’n sekere man, Ananias, en sy vrou, Saffira, wat ’n eiendom verkoop het. Met die medewete van sy vrou het hy van die verkoopprys vir hulleself agtergehou en net ’n gedeelte daarvan gebring en vir die apostels gegee. Petrus sê toe vir hom: ‘Ananias, hoekom het jy jou deur die Satan laat omhaal om vir die Heilige Gees te lieg en van die verkoopprys van die grond vir jouself agter te hou? Die grond was mos joune, en toe dit verkoop is, kon jy met die geld gemaak het wat jy wou. Wat het jou besiel om dit te doen? Jy het nie vir mense gelieg nie maar vir God.’ Toe Ananias dit hoor, het hy dood neergeval; en al die ander wat dit gehoor het, het baie bang geword.” Hand 5:1-5.

Om die Skrif te verdraai
Hierdie gedeelte is ’n duidelike waarskuwing oor die gevolge daarvan om vir God te jok. Soos die Apostel Petrus gesê het: Dit was hulle grond, en nadat dit verkoop is, was dit hulle geld. Dit gaan nie oor die grond of die geld nie. Dit gaan oor Ananias en Saffira se bedrog en oneerlikheid, oor die feit dat hulle voorgegee het dat hulle méér gedoen het as wat hulle werklik gedoen het.
Ter wille van die lof van mense, het hulle openlik voorgegee dat hulle die volle som geld vir die Here gegee het. Dit benadruk net hoe belangrik integriteit en eerlikheid is.

Die vernietiging van reputasies
Laster is die kwaadwilligste manier waarop die Negende Gebod oortree word. Om iemand kwaadwillig te beskuldig, is vernietigend. Om opsetlik oor iemand anders leuens te versprei, is om sy hele reputasie te vernietig – in die gemeenskap, in sy werkplek, of in die kerk.
Om voort te borduur oor iets van ’n ander waarvan jy nie hou nie, of deur ’n tekortkoming van sy karakter aan die groot klok te hang, kan jy sy vriende en kollegas maklik van hom vervreem. “ ’n Leuenaar haat dié wat hy seermaak; ’n vleier bewerk ’n ander se ondergang.”Spr 26:28.

Kan jy die ander kant insien?
Elke keer wanneer tsaar Petrus die Grote van Rusland iemand gehoor het wat ’n ander swartgesmeer het, het hy só daarop reageer: “O ja, maar is daar dan niks goeds aan hom nie?” Die stigter van Campus Crusade for Christ, Bill Bright, het gesê: “Mense stort nie rommel op groen grasperke nie”. Vullis word gewoonlik op leë erwe vol klippe en gemors, sand en onkruid gestort.
Die vraag is: Is jy ontvanklik vir die storting van skinderstories? “Moeilikheidmakers luister graag na kwaadwillige woorde. Leuenaars gee aandag aan bedrieglike idees.” Spr 17:4. “Iemand wat loop en skinder, lap geheime uit; ’n betroubare mens bewaar ’n geheim.” Spr 11:13.

Kan jy vertrou word?
Die vraag is, kan jy met vertroulike inligting vertrou word en ’n geheim bewaar? Een goeie reël is om nooit iets oor iemand te sê, tensy jy dit nie eers self met hom bespreek het nie. As ons nie kan bewys dat iets gebeur het nie, het ons nie die reg op ’n mening oor die saak nie, en mag ons verseker nie vals daaroor getuig nie. Moet nooit onderskat tot watter uiterstes sondige mense kan gaan om ander se reputa-sies te vernietig nie – net sodat hulle in die proses be-
langrik kan voel nie.
“’n Nikswerd mens stook kwaad, wat hy sê, is soos ’n vernietigende vuur. Iemand wat leuens verkoop, sit rusie aan die gang. Iemand wat skinder, bring verwydering tussen vriende.” Spr 16:27-28.

Harte sonder berou
Diegene wat skinder, ander belaster en geen berou toon nie, wys daarmee dat hulle ’n bose en onwedergebore hart het. Mense met só ’n hart, sal hulle ook nie bekeer wanneer hulle sondig nie. Mense wat herhaaldelik, opsetlik en moedswillig laster en skinder, en dan geen berou het nie, bewys daarmee dat vrot vrugte uit ’n vrot hart kom. “’n Dwaas se mond is sy ondergang. Met sy woorde stel hy vir homself ’n noodlottige strik.” Spr 18:7.
Een van die maniere waarop ’n mens tussen ’n dwaas en ’n wyse man kan onderskei, is die manier waarop hulle praat. ’n Godvresende man sal sy broer probeer oorhaal en opbou deur hom met sy sonde te konfronteer. Die sondige man, daarenteen, sal poog om sy slagoffer te vernietig, deur afbrekend oor hom met ander te praat. “Wyse mense versamel kennis. Dwase se gebabbel bring spoedig teëspoed.” Spr 10:14

Help dit of maak dit seer?
Die vraag wat ons moet vra om te kan onderskei tussen ’n Godgegewe begeerte om te help en ’n Godsonterende begeerte om seer te maak, is: Help die negatiewe inligting die een wat beskuldig word, of berokken dit hom skade?
As mense met ’n skinderstorie na jou toe kom, moet jy hulle vra: “Het jy met die betrokke individu persoonlik gepraat? Indien nie, wil ek dit nie hoor nie. Dit het niks met my te make nie. Ek beveel aan dat jy direk met hierdie persoon gaan praat.”

Verbreek die kringloop
As ons weier om na skinderstories te luister, of dit verder te versprei, sal die vernietigende afwaartse spiraal verbreek word. “Die woorde van die regverdige is soos ’n fontein van lewe” Spr 10:11.

Bron:  juig.co.za NGVishoek: Ds. ( dominee ) Martin Barnard.

Lees Meer >>

Krisis kom vir leë kerke



Maar volgens die jongste statistieke in die 2014-jaarboek van die Nederduitse Gereformeerde Kerke het die NG Kerk verlede jaar meer lidmate verloor as ooit tevore in sy geskiedenis.

In 2010 het Rapport in ’n hoofopskrif uitbasuin: “NG Kerk verloor 10 588 in ’n jaar.”

Twee jaar later – in 2012 – het die getal weglooplidmate in één jaar meer as verdubbel.

Verlede jaar was die afname drie maal groter as in 2010 – die meeste tot nog toe in ’n ­enkele jaar.

Altesame 36?606 doop- en ­belydende lidmate wat ’n jaar gelede nog op die NG Kerk se boeke was, het intussen verdwyn.

Dié syfers is bereken op grond van ’n opname wat in die tien sinodale gebiede gemaak is en waarin gemeentes gevra is om die getal belydende en dooplidmate in hul onderskeie kuddes te vermeld.

Kyk mens so ’n bietjie verder ­terug in die geskiedenis het die NG Kerk sedert 1985 byna ’n halfmiljoen (461?089) lidmate verloor – genoeg om 900 gemeentes van 500 lidmate elk vol te maak.

Die verlies aan NG lidmate ­alleen is meer as twee keer ­soveel as wat die ander twee Afrikaanse susterkerke saam het.

Die verlies aan lidmate is ’n wêreldwye tendens in Westerse lande en nie net ’n NG probleem nie.

Sommige voer aan dat politiek ’n rede is vir die NG Kerk se dalende lidmaatgetalle. Hulle sê dinge soos die kerk se verwerping van apartheid en die debat rondom die Belhar-belydenis het baie lidmate so die josie in dat hulle die kerk verlaat.

As dit waar was, sou ’n mens verwag dat die Afrikaanse Protestantse Kerk (APK), wat slegs wit lidmate toelaat, moes groei. Maar dit het nie gebeur nie. Die APK krimp ook. Ook die ander twee susterkerke, die Hervormde Kerk en die Gereformeerde Kerk, word al hoe kleiner.

Dit kan ook nie wees omdat lidmate glo die NG Kerk is teologies te liberaal nie. Dan sou konserwatiewe gemeentes en splintergroepe soos die Steedshervormers, wat van die ewe krimpende Hervormde Kerk ­afgesplinter het, ook sterker groei. Daar is geen aanduiding dat dit die geval is nie.
Wat het dan geword van die sowat 86 000 lidmate wat die NG Kerk die afgelope drie jaar verlaat het?

Al die verlore lidmate is beslis nie dood of landuit nie. Sommige het waarskynlik hul heenkome by charismatiese kerke gevind, maar die meeste van hulle kry mens waarskynlik Sondae in winkelsentrums of besig om saam met hul familie en vriende te kuier.

Dit beteken nie hulle het almal ateïste geword of teen God gekies nie. Hulle stel net nie meer belang in kerklike struk­ture nie.

Christelike kerke slaag al hoe moeiliker daarin om die Christelike boodskap van die Bybel se premoderne teks en konteks in ’n postmoderne (sekulêre) konteks te vertolk.

Die gesloer oor goed soos ­Belhar en gays is vir die meeste mense nie belangrik nie en hulle verloor belangstelling.

Henry van Blerk is een van die lidmate wat al meer as 15 jaar gelede weg is uit die NG Kerk. Hy en sy gesin het hulle by ’n Engelse charismatiese kerk aangesluit wat volgens hom deur die jare meer as drievoudig toegeneem het in getalle.

Hy sê mense vind aanklank by die eenvoud en ­informele karakter daarvan en die sterk leierskap – maar een wat nie verdoemend is nie.

Hoewel die voertaal Engels is, is meer as 70% van die lidmate in Henry se kerk Afrikaanssprekend.

Hettie Beyer, nog ’n voormalige NG lidmaat, meen die kerk het al lankal sy tyd verspeel. “Ek het ook in my dae in komitees en in die kerkraad gedien. Daardie tyd al was my versoek dat die kerk meer na die jong mense moet luister. Daar is nooit geluister nie.

“Sandra, my dogter, het voorstelle aan die dominee voorgelê hoe hulle die bediening aan jong mense kan verander. Daar is nooit verder gegaan daarmee nie. Vandag is ons almal nie meer deel van die NG Kerk nie.”

Dr. Johan van der Merwe, leraar van die NG Moedergemeente op Stellenbosch, meen nuansering is nodig.

“Mens verlaat en sluit aan by ’n gemeente in die eerste plek. Hoewel die denominasie of geloofstradisie, soos die charismatiese kerk of die NG Kerk, sekere gemeenskaplike kenmerke openbaar, is die verskille tussen gemeentes, selfs binne kerkverband, so wyd soos die Heer se genade.”

Dr. Gerhard Bothma van die NG gemeente Bendorpark in ­Polokwane sê in 1992, toe hy as predikant begin het, het hy elke jaar meer as 70 getuigskrifte geskryf. Ná 1994 het dit begin afneem en ná 2002 het dit baie skerp afgeneem.

“Verlede jaar was dit maar vyf, waarvan drie vir bona fide-jaglisensies was.”

Nie almal wat die kerk verlaat, is negatief teenoor die kerk nie, sê ds. Henk Gous van die NG gemeente Quellerina aan die Wes-Rand.

In ’n navorsingsprojek onder 50 “losgeraakte” lidmate – lidmate wat nog steeds op die kerk se “boeke” is, maar nie meer eredienste bywoon nie – in dié gemeente is onder meer bevind die rede vir nie-bywoning en nie-betrokkenheid was nie die toedoen van die gemeente nie.

“Leefstyle is die groot sondaar wat maak dat lidmate nie op Sondag by ’n erediens uitkom nie.

“Die oorgrote getal lidmate toon steeds ’n positiewe assosiasie met NG kerk Quellerina. Hoewel hulle nie aktiewe kerkgangers is nie, bly die gemeentelike assosiasie positief.”

Etienne van Zyl, steeds ’n meelewende lidmaat van die NG Kerk, som dit goed op. Hy sê hoewel getalle nie alles is nie, durf die kerk nie sy oë sluit vir die feit dat die NG Kerk in ’n tydperk van 25 tot 30 jaar ’n derde van sy lidmate verloor het nie.

Veral nie as ’n mens die syfers na die toekoms projekteer nie. “Want of dit gebeur omdat lidmate vinniger afsterwe as wat hulle vermenigvuldig, of omdat jong mense die kerk verlaat, of om watter ander rede ook al, indien die kerk voortgaan om jaarliks 25 000 lidmate en meer te verloor, sal daar van die huidige bykans miljoen lidmate ná 25 jaar net 375 000 oor wees.”

Uit watter hoek mens ook al daarna kyk, diegene wat die kerk se voortbestaan ernstig bejeën, gaan moeilik ontsnap aan die gevolgtrekking dat dit ’n enorme krisis vir die kerk inhou.

Bron:  Rapport.co.za  (12 Januarie 2014)NGVishoek: Ds. ( dominee ) Martin Barnard.

Lees Meer >>

Debat: Ontevrede lidmate is nie ‘n probleem



Die groot (teologiese) fout wat vroeg in die artikel begaan word, is om die kerk kwantitatief te evalueer, oftewel om getalle die groot norm vir ’n moontlike “krisis” te maak. ’n Frase soos “baklei om markaandeel te behou” val vreemd op die ore van diegene wat met ’n kerklike bril onderskeidend na die kerk probeer kyk.

Ondersoeke wat reeds tien jaar gelede deur die sinode se diensgroep vir gemeente-ontwikkeling gedoen is, het getoon as die kerk se getalle en groei bloot afhanklik is van nuwe dopelinge van bestaande lidmate, die kerk oor die volgende dekades dramaties kan verklein. So byvoorbeeld het die getal dooplidmate van 1986 tot 2004 van 460 000 tot 280 000 gedaal. Dit verteenwoordig ’n daling van 180 000 in dooplidmate en dui op die dramatiese daling in geboortesyfers.

As daar dus nie ander mense by die kerk aansluit nie en mense gaan dood, is die som eenvoudig. Voeg hierby die duisende lidmate wat geëmigreer het en dit blyk dat die NGK in werklikheid veel beter gevaar het as wat hierdie demografiese syfers voorspel het.

As daar dus wel ’n krisis in die kerk is, is dit omdat die kerk nie sy missionêre verantwoordelikheid nagekom het nie. Maar ook hier is dinge nie so eenvoudig soos dit lyk nie.

Die sensitiewe fase waarin kerkeenheidsgesprekke met die VGK en Wêreldbond van Gereformeerde Kerke is, het dit ook duidelik gemaak dat dit uiters moeilik vir die NGK is om nou aktief kerkplantings in sogenaamde “bruin” en “swart” gebiede te begin. Ek het begrip vir ons hartseerverlede, maar dit plaas die NGK eintlik in ’n onhoudbare situasie.

In antwoord op die vraag waar die 86 000 (8%) mense van die meer as ’n miljoen heen is, dus die volgende: Hulle is dood of oorsee.

Natuurlik is daar ook ontevrede mense. Verder het sommige die “volkskerk” verlaat omdat hulle besef het jy hoef nie ’n bepaalde koerant te lees, by ’n bepaalde bank te bank of aan ’n party of kerk te behoort nie.

Dit is nie ’n krisis nie. Dit is ’n bevryding en gebeur oral.

Die groter vraag is egter wat kwalitatief met die kerk gebeur het. ’n Kerk se krisis word nie veroorsaak deur hulle wat nie in die kerk is nie, maar wanneer hulle wat wel in die kerk is, nie God se roeping uitleef nie.

By die afgelope sinode is ons kerkorde so verander dat die wesenstaak van die kerk in missionale taal verwoord word. In gewone taal: Die NGK beskryf sy bestaan nou as ’n bestaan ter wille van God en die wêreld. Ek wonder of mense verstaan hoe ingrypend hierdie verandering was. Op voetsoolvlak kry dit reeds gestalte.

Op welsynsvlak het net die sinodale begroting in 2013 amper R1 miljard beloop. Badisa, een van ons grootste welsynsorganisasies, het in 2013 dienste aan 750 000 mense verskaf. Dit sluit die duisende stories van hoop wat in plaaslike gemeentes geskryf word uit.

Die NGK het die laaste dekade op ekumeniese vlak teruggekeer na die Suid-Afrikaanse Raad van Kerke, die Wêreldraad van Kerke en die All ­African Conference of Churches. Ons is deel van die National Church Leaders’ Forum en het ekumeniese vennote oor die wêreld heen en in besonder regdeur Afrika.

Oral word die kerk hartlik ontvang en kan ons deel in gesprekke oor van die belangrikste uitdagings in die land. Dit sluit landbou, grondhervorming, welsyn, onderwys en gesondheidsorg in.

Die vraag is dus nie net hoeveel mense daar is nie, maar belangriker nog watter verskil die mense maak wat daar wel in die gemeenskap is. As ons geen verskil maak nie, het ons geen bestaansreg nie en mag ons maar verdwyn.

Natuurlik is ons hartseer oor elke lidmaat wat die kerk verlaat. As mense die kerk verlaat omdat hulle elders ’n geestelike tuiste gevind het waar hulle voel dat hulle God beter kan dien en aanbid, is ons dankbaar daaroor. As dit egter is omdat mense voel dat hulle verwerp of uitgesluit word, soos in die geval van gay lidmate en hul families, is ons hartseer daaroor. Ons innige dank aan die groeiende getal bruin en swart lidmate wat wel deel van die NG Kerk geword het.

Intussen hoor ek mense sê die kerk gaan binnekort nie meer bestaan nie. Die laaste maande het ek talle energieke gemeentes in die stad en op die platteland besoek en het met oortuiging besef: Ten spyte van wat mense ook al dalk oor die kerk sê, hierdie gemeentes gaan nog lank bly lewe.

Dr. Braam Hanekom is ondervoorsitter van die NGK se algemene sinode.

Bron:  rapport.co.za NGVishoek: Ds. ( dominee ) Martin Barnard.

Lees Meer >>

Wat maak jou gelukkig? deur Henk Gous [resensie]

 

 

Wat belangrik is, is dat jy besef: met jou redenasie oor watter voorwaardes moet geld voor jy geluk gaan vind, ontsê jy jouself die geleentheid om vandag geluk te beleef.

 

Jou geluk hang nie af van iets buite jou nie. As jy gelukkig getroud is, of in ’n vervullende verhouding met jou ouers of kinders staan, of bevoorreg is dat jy jouself in jou werk of stokperdjie kan uitleef (of so gelukkig is dat jou stokperdjie jou werk is!), skep dit omstandighede waarbinne jy makliker gelukkig kan wees. Maar jy gaan nie noodwendig, of outomaties gelukkig wees nie. Want geluk lê BINNE jou, dit is jou eie keuse en besluit.

 

Daarom skryf Henk oor ’n gebalanseerde perspektief op lewensvreugde en geluk. Wanneer jy genoeg geld het, of getroud is, of kinders het, of gesond is, kan jy makliker kies om gelukkig te wees. Maar wanneer jy chronies siek is, of ’n enkelouer is, of diskriminasie by jou werk beleef, kan jy steeds kies om gelukkig te wees.

 

Depressie, angs, dwase besluite, bekommernis en woede steel jou lewensvreugde maar jy kan daarteen veg — deur te onthou dat sekere skadelike optredes en emosies nie kwaadwillig is nie, dat jy soms ’n diagnose deur ’n professionele persoon benodig voor jy jou siektetoestand (depressie of angs) effektief kan beveg, dat medikasie vir gemoedsteurings beskikbaar is en werk, deur gereeld matig te oefen, verkeerde denkwyses te beveg en obsessies en kompulsies te bestry.

 

’n Boek wat maklik lees maar groot lewenswaarhede bevat, wat dit ook ’n goeie geskenk maak vir iemand vir wie jy omgee.

Bron:  ekerk.org

NGVishoek: Ds. ( dominee ) Martin Barnard.

Lees Meer >>

Geliefd in God se oë

Dit ís net so! Dit staan vas! Niemand kan dit verander nie! Dit ís die waarheid!

4. Óns IS liefde in sy se oë … Hy spesialiseer by uitnemendheid presies hierin!
3. God gee sy liefde in ons;
2. God gee sy geliefde Gees om ons te beheer;
1. God gee sy geliefde Seun om ons te verlos;

Só gebeur dit:
Die kern van ons bestaan is in Hom, wat in jou is, en God is voldoende en volledig en volmaak volgens wie Hy wil wees, in jou.

Hy kyk nie heeldag teen jou foute en sonde vas nie. Hy is nie heeldag besig om die lewe vir jou moeilik te maak, net omdat jy nie gehoorsaam genoeg is nie. Hy skryf nie nuwe wette om ‘n lewe wat reeds ingewikkeld is, nog strenger te maak nie.
Hy sien jou waar jy nou is, want Hy is in jou … wat ook al?Hy sien jou seer … Hy sien jou kommer … Hy sien jou hart … 

… én Jesus is “ok”, wat beteken jý is “ok”. Só …

Elke keer, elke sekonde, as God na jou kyk, sien Hy eerste vir Jesus: Jesus in jou en jy in Hom …

Wie is hierdie Jesus in jou? God self in jou … Liefde in jou … Sagtheid in jou … Goedheid in jou … Blydskap in jou … Geesvervuldheid in jou … Egte lewe in jou …

Hier is die sleutel om 2014 mee te leef, te oorleef en te groei: God sien sy geliefde Seun as Hy na jou kyk. Hy sien Jesus in jou.Kom ons lê ? fondament om 2014 op te bou: Sien raak wie jy in God se oë is. Kyk na jouself deur sy oë: Wat sien Hy as Hy na jou kyk? Wie sien Hy as Hy na jou kyk?

“Jy is my geliefde Seun. Oor Jou verheug Ek My.” (Markus 1:11b)

Geliefd in God se oë

Bron:  http://doomcharl.blogspot.com/ NGVishoek: Ds. ( dominee ) Martin Barnard.

Lees Meer >>

Die Lewe “IS”!

• Die tweede evangeliese waarheid oor die “lewe” het te doen met sterwe: sonder Jesus is alle sondaars verdoem tot die ewige dood, waar daar geen Lewe (geen God), sal wees nie. Nadat die mens van nature, dit is uit eie vrye wil waarmee elke mens gebore word, van die boom van die lewe in die tuin van Eden geëet het, sal elke mens fisies sterwe: “Stof is jy, en jy sal weer stof word.” (Genesis 3:19c) Om hierdie gegewe waarheid wat vir alle mense van alle tye op aarde geld, om te keer, was dit nodig dat ons Jesus eers ter wille van ons Lewe, sterwe aan die kruis: Hy IS daarom weer en enigste Lewe/lewe.

• Jesus het nodig gehad om die hemelse heerlikheid as ware God te verlaat, steeds volledig God te wees en ter wille van ons sonde-verdoemenheid op aarde mens te word vir ons, sodat Hy die Lewe/lewe vir ons kan wees: Hy IS Lewe, ter wille van óns! Hierdie eerste waarheid oor “lewe” het vir my met tyd te doen: Jesus lewe as Beginlose van ewigheid af; as Lewende Een kom Hy as mens aarde toe vir die dood-veroordeelde mens; SLEGS deur Jesus se sterwe aan die kruis én direk gekoppelde opstaan uit die dood, IS Hy Lewe in elke Jesus-mens vandag; én Hy sál alleen Lewe bly tot in ewigheid!

Jesus lewe vandag hier op aarde waar Hy mens geword het en gesterwe het; Jesus lewe vandag deur sy Gees in elke Jesus-mens vir wie Hy aan die kruis gesterwe het; Jesus IS LEWE vir jou en vir my!

Bron:  http://doomcharl.blogspot.com/


NGVishoek: Ds. ( dominee ) Martin Barnard.

Lees Meer >>

Jesus: Laat Die Kindertjies na My toe kom


Was Jesus te besig?
Markus 10 vertel van ’n besige dag vir Jesus en sy dissipels toe mense probeer het om ’n paar kindertjies na Jesus toe te bring sodat Hy hulle kon seën. Die dissipels het ’n vol program gehad. Hulle het nie tyd vir hierdie lastige kindertjies gehad nie, en het die ouers ook so ingelig.
Die dissipels het diegene wat kindertjies na Jesus toe gebring het, berispe! Hulle het gedink dat Jesus te belangrik is om hom met kindertjies op te hou. Hulle het gedink dat die kinders ’n oorlas en ’n onnodige steurnis is. “Kan julle nie sien dat Jesus met belangriker sake as kinders besig is nie? Hy het werk om te doen! Laat staan Hom! Hy is besig om ons te onderrig. Hy het nie tyd om met kindertjies te mors nie!”
Volgens Markus 10:14-16 het Jesus, toe Hy sien wat gebeur, vir Sy dissipels kwaad geword. Hy het vir hulle gesê: “Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle. Dit verseker Ek julle: Wie die koninkryk van God nie soos ’n kindjie ontvang nie, sal daar nooit ingaan nie.“ Toe het Hy Sy arms om die kindertjies gesit, Sy hande op hulle koppe gelê en hulle geseën.
Jesus het nie dikwels kwaad geword nie, maar toe Sy dissipels probeer het om die kinders weg te wys, het Jesus kwaad geword! Hy het nie die kindertjies as ’n mors van Sy kosbare tyd beskou nie. Jesus het waarde aan kinders geheg. En, Hy het seker gemaak dat Sy dissipels daardie boodskap duidelik verstaan.


Die vernaamste in die koninkryk
Kan jy jou voorstel hoe dit vir daardie kindertjies moes wees om Jesus se Hand op hulle te voel en geseën te word? Jesus het daardie kindertjies innig liefgehad.
Matteus 18 vermeld ’n geleentheid toe Jesus se dissipels Hom gevra het: “Wie gaan die belangrikste in die koninkryk van die Hemel wees?” Jesus het ’n kindjie nader geroep. Hy het aan Sy volgelinge gesê: “As julle nie verander en soos kindertjies word nie, sal julle beslis nie in die koninkryk van die Hemel kom nie.” Matt 18:3.

Waarna het Jesus verwys? Wat het kinders wat volwassenes kortkom? Natuurlik het Hy nie van volwassenheid of intellek gepraat nie. Ek dink ook nie Hy het oor onskuld of gehoorsaamheid gepraat nie. Dit neem kindertjies nie lank om allerhande maniere uit te dink om ongehoorsaam te wees nie.
Die kwaliteit waarvan Jesus gepraat het, is vertroue. Kinders vertrou van nature baie maklik. As volwassenes wil ons op ons eie
prestasies staatmaak. Hoe langer ons weg van God af leef, hoe moeiliker is dit om te erken dat ons God se genade nodig het. Aan die ander kant is daardie soort absolute vertroue heel natuurlik by kindertjies.
Die regte tyd om te besluit
Onlangse statistieke bewys dat meer as 83% Christene die besluit om Christus te volg, voor die ouderdom van 18 gemaak het. Slegs 17% word ná die ouderdom van 18 gered. Kinders en jongmense is ’n prioriteit vir Jesus en hulle moet ’n prioriteit vir ons wees!
Jesus het voortgegaan deur aan Sy dissipels te sê: “En wie so ’n kindjie in My Naam ontvang, ontvang My. Elkeen wat een van hierdie kleintjies wat in My glo, van My afvallig maak, vir hom is dit beter as hy met ’n groot meulsteen aan sy nek in die diep see verdrink.” Matt 18:5-6.
Histories het die Russiese Ortodokse Kerk daarin misluk om onderrig aan die kinders en jeug van die kerk te bied. Hulle mislukking het ’n lugleegte in die denke van die Russiese jeug gelaat en kommunisme het gepoog om daardie gaping te vul. Daarom is die kerk van Rusland deels verantwoordelik vir 70 jaar van verdrukking onder ateïstiese kommunisme.
Weliswaar verg dit energie en geduld om kinders te leer. Dit verg tyd en geld om aan die behoeftes van jongmense te voorsien. Maar dit is die moeite werd!
Wanneer jy kindertjies by die kerk sien rondhardloop, sien jy hulle wat die vernaamste in die koninkryk van die Hemel is. Kinderbediening is waarskynlik die belangrikste bediening in jou plaaslike kerk.


Geestelike leiding
Daar is ouers wat nie die belang verstaan om hulle kinders geestelike leiding te gee nie. Hulle wil wag tot hulle kinders oud genoeg is om self oor geestelike dinge en kerk-toe-gaan te kan besluit. Tog laat hierdie ouers nie hulle kinders toe om te wag tot hulle oud genoeg is om self te besluit of hulle skool toe moet gaan, die tandarts moet besoek, of hulle kamer moet skoonmaak nie.
Daar is die staaltjie van ’n dominee wat sy tuin aan ’n man wou wys wat nie sy kinders toegelaat het om kerk toe te kom nie. Hy wou hê dat sy kinders moes wag totdat hulle oud genoeg is om vir hulself te besluit. Toe die dominee en die man die tuin instap, was dit vol onkruid wat die lemoenpampoentjies, boontjies en tamaties toegegroei het. Die man het gesê: “Maar, dit is ’n jammerlike verskoning van ’n tuin!” Waarop die dominee geantwoord het: “Ek wil wag totdat die groente ’n kans gehad het om self te besluit in watter rigting dit wil groei!”
Die kindertjies is na Jesus toe gebring. Dit is wat Jesus wil hê jy moet doen. Hy wil hê dat jy die kindertjies na Hom toe bring. As jy hulle nie bring nie, mag hulle dalk nooit kom nie.


NICO BOUGAS is die internationale koördineerder van Hellenic Ministries. E-pos: nico@bougas.info of www.hellenicministries.com

Bron:  juig.co.za NGVishoek: Ds. ( dominee ) Martin Barnard.

Lees Meer >>

Die Here se seëninge het ook hande en voete

 


Toe is die dame daar weg met ’n gratis, peperduur stoof. Asof uit die bloute het die Here se vreemde genade daardie oggend haar lewe met nuwe hoop gevul. “Nou lag ek weer,” sê sy.


Soms is die lewe so hard soos klip. Dan maak niks meer sin nie. Tog vergeet die Here nooit sy aardse eiendom nie. Hy ken ons diepste seer en grootste alleenheid. Dan stuur Hy sy genade in verskillende vorms en verpakkings na ons toe. Dikwels is ander mense die sigbare uitdrukkings hiervan. Wil jy nie ook toelaat dat die Here jou as sy lewende noodhulp gebruik nie. Hy wil graag iemand anders deur jou seën.


Bron:  ekerk.org NGVishoek: Ds. ( dominee ) Martin Barnard.

Lees Meer >>

Sy heerlikheid “IS”!


• Gee Jesus die volle kans om jou vol te maak met sy waarheid: Hy hét mens geword; Hy ís jou unieke Redder; Hy wíl jou laat lewe vol van sý Gees; Hy wíl Geluk ín jou wees; Hý is jou enigste troos in lewe en in sterwe; Hý maak van jou ‘n nuwe mens; Hý IS Jesus-mens ín jou!
• Gee Jesus die volle kans om jou vol te maak met sy genade: sonder verdienste ís jy sy kind; sonder inspanning kán jy waarlik lewe; gratis ontvang jy ál die rykdom van sy koninkryk; jy ís reeds vir al jou sonde vergewe; Jesus ís besig om Homself meer sigbaar in jou te maak;

Hý IS Jesus-mens ín jou!

In Johannes 1 word na twee uitsonderlike sigbare Jesus-waarhede ín ons verwys. Ín hierdie waarhede sien ons “sy heerlikheid”, sien ons wie Jesus in ons is en word. Én Hy maak ons “vol” van sy heerlikheid, tot oorlopens toe vol van Homself. Hy maak ons “vol van God”, want Jesus is ons enigste toegang tot wie God sigbaar is. Gee Hom net die volle kans …

Intussen is dit glad nie so sleg nie, daarom het Hy juis destyds mens geword: dat ons God reeds vandag kan síén! Én die ongelooflike waarheid is dat Hy in elke Jesus-mens gesien kan word. Ons moet net mooi kyk in onsself en in die Jesus-mense rondom ons. Niemand van ons kan en sal ooit soos Hy lyk nie, maar Hy kom gee deur sy Gees sý karaktereienskappe ín ons. 

Feitlik elke Kersfees dink ek hoe gelukkig was al die mense wat Jesus persoonlik gesien het terwyl Hy fisies hier op aarde was. Gewone mense soos ek en jy: Maria, Josef, sy dissipels, almal wat Hom hoor praat het by die Bergpredikasie, die geestelike leiers van daardie tyd, die politieke leier Pilatus, en nog honderde ander mense by verskeie geleenthede. Ja, Jesus wás ‘n gewone mens wat tussen die mense rondbeweeg het. En ongelukkig dink die meerderheid mense dat ons Hom eers in die hemel weer sal sien, en intussen …

“Ons het sy heerlikheid gesien … vol genade en waarheid.” (Johannes 1:14)

Bron:  http://doomcharl.blogspot.com/l

NGVishoek: Ds. ( dominee ) Martin Barnard.

Lees Meer >>

Die houvas van jou verlede op jou toekoms


In hierdie proses word kinders groot wat dikwels nooit ooit weer hierdie juk van hulle verlede afgooi nie, want die letsels wat die verlede laat maak dat mense nooit tot hulle volle potensiaal ontwikkel nie. Dit lei tot ‘n swak selfbeeld, ‘n minderwaardigheidskompleks en dan die hartseerste deel is dat die geskiedenis homself dan begin herhaal. Want wat met my gebeur het, laat ek dan met my kinders gebeur. Want jy sien, wat agter my lê, laat ek dan toe om te dikteer wat voor my gebeur. Die meeste mense kry nie sommer dit reg om uit hulleself hierdie bande te verbreek nie. Maar Goddank, met die hulp van die Here, is dit moontlik.

Ek wil sover gaan om te sê, ek het nog nooit ooit iemand ontmoet wat die juk van die verlede kon afgooi sonder die Here nie, maar al baie mense gesien wat deur die werk van Jesus in hulle lewe dit kon regkry. Hoekom word ons so vasgehou daardeur, en hoe hanteer ek dit? Ek het ‘n beeld gehoor op ‘n tyd wat vir my verskriklik baie beteken het. Die persoon het gepraat van ‘n motor se voorruit. ‘n Groot stuk glas maak dat ek ‘n baie goeie uitsig het van wat voor my gebeur. Dis nodig om voor jou te kan sien, want dit is wat ek nodig het om veilig vooruit te beweeg. Maar voor my is ook ‘n spieëltjie, ‘n truspieëltjie om te sien wat agter my is. Hierdie truspieëltjie is baie belangrik, maar die voorruit is baie belangriker. Want dis al waaraan ek iets kan doen. Daarom moet die voorruit groot wees en die truspieëltjie klein. Die groot voorruit is nodig om betyds ‘n handeling te kan neem, maar die truspieëltjie is klein, want dit is net ter inligting van wat agter my is. Dit bepaal nie waarheen ek gaan nie, dit wys net waar ek was. En so is dit ook in ons lewens. Die voorruit is groot in ons lewens, want dit gee ‘n visie op die toekoms. Maar steeds beperk, want die Here gee vir ons net genoeg visie om ver genoeg te sien om ‘n rigting te kry en te hou. Om te fokus. Die truspieëltjie in ons lewens hoef nie groot te wees nie, want dit lê agter ons. Fil 3 : 13 en14 Broers, ek verbeel my nie dat ek dit alles al het nie.

Maar een ding doen ek: ek maak my los van wat agter is en strek my uit na wat voor is. 14 Ek span my in om by die wenstreep te kom, sodat ek die hemelse prys kan behaal waartoe God my geroep het in Christus Jesus. Met Christus kan ek my losmaak van wat agter is. Jy sien, die satan het net op een manier ‘n houvas op ons, en dis ons verlede. Want as ek en jy vrygemaak is deur Jesus Christus, is die mag van die verlede gebreek. Dan is ‘n baie klein spieëltjie nodig. Wat gebeur as die truspieëltjie in ons lewens te groot is? 1. Die verlede hou ons vas in slawerny. Slawerny beteken dat ons nie self beheer het oor ons toekoms, of ons denke, of ons optrede nie. 2. Wat agter lê, rem ons. Toe ek baie klein was in die laerskool, het ek so paar keer probeer resies hardloop in atletiek. Maar omdat ek gewoonlik amper laaste was, het ek heeltyd oor my skouer gekyk of die outjie agter my nie dalk gaan verbykom nie. En dit het gemaak dat ek soveel spoed verloor het, dat ek nie kon probeer om die outjies voor my verby te gaan nie. 3. Die verlede maak dat ons net ou koeie raaksien en dit kom dan in ons dag tot dag lewe na die oppervlak toe, ook in ons gedrag. 4. Dit maak dat ons alle hoop vir die toekoms verloor. Dat die lewe nie meer die moeite werd raak nie.

So asof ons dan sê dat niks in die toekoms beter kan wees as die verlede nie. So asof daar nie ‘n Jesus staan en wink nie. Watse houvas het jou verlede op jou toekoms? 1. Moet ons enigsins ‘n truspieëltjie hê? Verseker, solank hy klein is. Deur terug te kyk, kan ons sien hoe ons gegroei het, as ons dit agterlaat. Jy sien, as jy die verlede agter jou laat, beweeg jy weg van die probleme af. Dan sal jy in die truspieëltjie sien hoe dit geleidelik in die niet verdwyn. Maar as jy dit saamsleep soos ‘n sleepwa, dan bly dit by jou. Ons noem dit bagasie. Dan kyk jy heeltyd agter jou omdat jy hierdie ding vrees. Want hy kom en kom. 2. ‘n Ander rede vir terugkyk, is om te leer uit die foute van die verlede. Om te kan sien wat ek nie in my eie huis moet doen nie. Sodat ek nie die sleepwa, wat nou nog swaarder gelaai is, aangee na my kinders nie. 3. Om in oorwinning en dankbaarheid te kan leef. Ek het al vertel van my suster wat regtig kan sê “been there, done that”, wat vir dekades gestoei het en deur alles denkbaar gegaan het. Sy het eendag gesê, “Ek sal weer deur elke enkele ding gaan, van voor af, as ek net weet ek sal vir Jesus ontmoet.” Sy het totale oorwinning gekry. Nou hoe lyk die voorruit?

Hoekom is hy nodig? Wel, die Here is soos my en jou voorruit. Hy gee vir ons visie vir die toekoms. Hy gee genoeg visie dat ons in vertroue, voluit, vooruit kan beweeg. Die voorruit neem nie die spieëltjie in ag nie. Die voorruit het nie die spieël nodig nie. Jy sien, die voorruit is deursigtig, hy wys toekoms, maar die spieëltjie kan net reflekteer wat was, wat reeds gebeur het. Die voorruit is van dik sterk glas gemaak, om ons te beskerm, die spieëltjie van dun glas wat maklik breek Want die spieëltjie is nie veronderstel om ‘n gevaar in te hou nie. Deur deur die voorruit te kyk, kan ek sê, “Met die oog gerig op Jesus, kan ek vorentoe gaan”.

Jesus staan voor ons en wink en sê: “Kom, almal wat vermoeid en belas is”. Jy sien Hom nie in die spieël en wuif nie. So asof Hy sou sê: “Gaan, en o ja, good luck”. Ps 119 : 105 U Woord is die lamp wat my die weg wys, die lig op my pad. My vriend, al die antwoorde vir probleme van die toekoms, is in die Woord van God. ‘n Toekoms saam met die Here, gee hoop. Verander jou toekoms deur gebed. Gaan pleit by die Here vir oorwinning oor die verlede, gaan gryp Hom vas. Hy is 100% getrou. Gaan maak klaar met wat agter is. Haak daardie waentjie wat net swaarder en swaarder word, los, moenie daardie bagasie saam met jou neem nie. Kry ‘n vriend, ‘n vertroueling om jou te help.

Iemand wat saam met jou kan bid en jou bemoedig. En as die satan jou herinner aan jou verlede, herinner hom aan sy toekoms. Kom ons leef in oorwinning.

Bron:  heuning.co.za NGVishoek: Ds. ( dominee ) Martin Barnard.

Lees Meer >>