Mev. Rentia van der Berg, Ruan se ma, het gesê voor die begrafnis was sy “histeries”.

“Ek kon nie slaap nie, maar nadat ek dié foto gesien het, het ek soos ’n baba geslaap.
“Dit was vir my Ruantjie wat sê hy was deel van ons.”

Volgens haar het Ruan die dag van sy dood geweet hy gaan sterf. “Ek en G.J., Ruan se ouer boetie, het in die kombuis gesit. 

Ruan was in die sitkamer by die TV. Ek het uit die hoek van my oog gesien hy verdwyn na sy kamer met sy asmapompie.

“Toe hy ’n rukkie later in die kombuis kom, was sy ogies rooi gehuil. Hy het vir my gesê: ‘Mamma, ek gaan doodgaan’.”

Ruan het nie na asem gehyg soos met sy eerste aanval jare gelede nie – hy het aan asma gely vandat hy ’n jaar oud was – maar “toe hy weer vir my sê hy gaan doodgaan, dink ek, het hy gewéét”.

Mnr. Van der Berg sê hy was op die land op ’n trekker toe sy vrou hom bel. Hy het eers nie sy selfoon gehoor nie.

“Die trekker het skielik onverklaarbaar begin rook. Ek het dit afgeskakel en toe eers my selfoon hoor lui.”

Die foto met die vreemde beeld het die Van der Bergs se familie en vriende aan die praat. Baie meen dit is ’n engel.

Mnr. Peet Katzke, ’n vriend van die familie wat die foto gesien het, het gesê hy glo die beeld is “’n werklikheid”. “Niemand kan werklik dié visie verduidelik nie.” 

Charl Devenish, hooffotograaf van Beeld se susterkoerant Volksblad, meen die beeld kon ontstaan het toe die kamera se flits teen iets soos ’n mot weerkaats het.

Bron:  Beeld.com