Dis ’n verandering van leefstyl en dís nie iets wat die mens maklik doen nie. Daar is egter al gewaarsku dat as ons dit nie doen nie, ons kleinkinders net jellievisse gaan hê om as soesji te eet.

Dieselfde soort samewerking gaan vereis word om ons van erge klimaatsverandering te red wat waarskynlik reeds begin het.

Van die voorspellings vir klimaatsverandering aangedryf deur ’n warmer aarde is oorstromings, erger orkane en selfs die moontlikheid van ’n soort mini-yseeu in die Noordelike Halfrond.

Wetenskaplikes sê ons kan nie meer die skade ongedaan maak wat reeds aangerig is nie, maar ons kan erger skade keer.

Daarvoor sal lande ook moet begin saamwerk en sal ons as mense ook ons manier van leef moet verander.

Ons sal almal met minder tevrede moet wees; die rykes sal meer moet deel met die armes (ook in Suid-Afrika) en ons sal bronne spaarsamiger moet gebruik.

Ons sal meer moet herwin en minder moet weggooi.

In Suid-Afrika sal ons in die komende dekade heel waarskynlik meer elektrisiteit met die son en wind moet begin opwek en baie minder steenkool moet verbrand, of dit op nuwe maniere begin verbrand wat minder koolsuurgas vrystel. Daardie nuwe maniere sal nog ontwikkel moet word.

Ons sal ook beter na ons water moet begin kyk.

Ons sal minder water moet besoedel en ons sal suur mynwater moet begin suiwer. As ons dit nie begin doen nie, lyk dit al hoe meer of ons die een of ander tyd nie meer water gaan hê om kos mee te verbou of om te drink nie.

Dit gaan ’n ander manier van doen van ons, die gewone mense, vereis en dit gaan van ons regering vereis dat minder vriende van dié in magsposisies kitsrykdom met mynlisensies kry.

Gaan ons op dié vlakke kan verander bloot omdat die tekens daar is en die konsensus onder wetenskaplikes is dat ons anders moet begin leef?

Of gaan die konsensus van gierigheid en selftevredenheid wat ons almal met ons politici deel, die oorhand behou?

Die dekade wat kom, kan bepalend wees.

Dit kan egter ook slegter of beter word as bloot ’n lewensverandering wat van ons vereis word.

Daar is al moontlikhede genoem dat klimaatsverandering homself kan begin voed met dit wat hy verander en dat die gevolglike natuurrampe skielik en groot kan wees.

Daar is ook die moontlikheid dat die talle wetenskaplike deurbrake van die afgelope paar jaar skoon krag kan lewer – saam met maniere om skade ongedaan te maak.

Dan is daar natuurlik die politiek ook.

Gaan Afrika korrupsie en oorlog onder beheer kan kry en sy ontsaglike rykdom vir al sy mense kan aanwend?

Gaan die Midde-Ooste hierdie dekade ook deursien sonder dat kernbomme iewers ontplof?

Gaan China eenvoudig net aanhou groei – of gaan die Chinese trein in ’n stadium te vinnig begin ry en ontspoor?

Gaan die Weste sy finansiële krisis oorkom sonder dat studente en vakbonde iewers die laat 1960’s herhaal?

Ons is nog hier. Met ons atoombomme, ons paaie vol motors en bankiers met groot bonusse.

Wat gaan ons in die komende dekade alles sien ontvou?

Bron:  Die Burger