Laksman


Voorts glo ek dat die toestand in ons land tans uitroep na ‘n effektiewe strafstelsel om dinge net weer onder beheer te bring, maar die meeste van ons glo dat die regering dit gestop het omdat ons voel hulle sou self daaronder moes deurloop. Die punt is, dit gaan sleg met ons strafstelsel en iets moet daadwerklik gedoen word, en vinnig ook.

 

Meer as 4200 mense het tussen 1910 en 1989 aan die galg gesterf, waarvan die helfte tussen 1978 en 1988 gesterf het, toe apartheid op sy felste was. Die gevalle wat die meeste opspraak verwek het was Daisy de Melker en Maria Lee, twee berugte gifmoordenaars. Daisy de Melker is die oggend van 30 Desember 1932 tereggestel.

Daar is baie te sê oor die doodstraf en daar sal altyd twee pole wees, sommige daarvoor en sommige daarteen. Ek weet self nie aldag waar ek staan nie. So paar jaar gelede was daar ‘n gewapende roof by ons huis en dit vang mens nogal onkant. Saam met kinders was ons 20 mense in ons huis en twee rampokkers kom op ‘n redelik moeilike manier in ons huis in, skiet ‘n skoot met ‘n pistool, neem ‘n klomp goed, dryf die kinders tot absolute histerie en vlug absoluut lafhartig uit die huis uit met hulle buit. Gelukkig het niemand seergekry nie, en ek en vroulief het agterna gevoel dat ons nie regtig getraumatiseer was nie, omdat ons self bykans niks verloor het nie.

Tot ‘n paar dae later, toe ‘n vreemde gevoel oor my kom van: As ek jou in die hande kan kry, sal ek jou wreedaardig om die lewe bring en jou liggaam iewers langs die pad gaan los. En ek sal daarmee wegkom want die regstelsels is te lamsakkig om my te vang. Om een of ander vreemde rede het ek heel gemaklik met die gedagte gevoel, ‘n klomp mooi maniere bedink om dit op ‘n manier te doen wat die booswig heel gemaklik sal laat voel dat ek sommer privatiseer wanneer ek hom die “doodstraf” gee.

Ook maar lekker stupid! Sou ek lekker slaap agterna? Sou ek nooit bekommerd wees dat dit my gaan inhaal nie? Sou ek kon oudword met die gedagte dat ek iemand se lewe geneem het wat slegs ‘n kamera, ring en horlosie van my geneem het? Of sou dit my dalk noop om sommer ‘n selfaangestelde laksman  te word en dan sommer as voorsorgmaatreël ‘n paar ouens regsien, aangesien ek nou die metodes mooi onder die knie gekry het? En voorts sou ek dan die redder van society word! Die messias wat seker maak dat ander nie leed aangedoen word nie.

En hier kom my vriend Jan met een enkele vraag en hy skud my tot in my fondament, nadat ek  my planne aan hom bekend maak (ek het geglo hy sal nie split op my nie). Toe ek vir hom sê hoe ek voel, vra hy ongeërg vir my:  “Wat het dit aan jou manly hood gedoen?”Jy sien, Jan het besef dat ek so voel omdat ek magteloos gevoel het as beskermer en versorger van my gesin. Nou ja, ek het toe maar my virtuele galgkamer gaan afbreek, die toue gaan oprol en aangegaan met my lewe. Die oordeel en die straf kom my nie toe nie!

Daar kom toe mettertyd by my ‘n vraag op: Sê nou maar die doodstraf kom terug, sou ek graag die laksman wou wees? Die persoon wat bo in die galgkamer staan, die tou om die skuldige se kop sit, die sloop oor die kop trek, en dan die daad voltrek. NEE! Duisend maal NEE!

Eks 21:14-17
“Wie aan sy pa of ma slaan, moet doodgemaak word. “Wie ‘n ander ontvoer om hom te verkoop of om hom in sy besit te hou, moet doodgemaak word. “Wie sy pa of ma vloek, moet doodgemaak word”..

Wel meneer die laksman, hierdie was wet! As jou kind jou sou vloek, sou jy met ‘n grynslag langs die galg staan en kyk hoe die wet uitgevoer word? Of dit self uitvoer? Totsiens Jannie, jy wou mos nie gras sny nie! En daai lelike woorde wat jy by die skool geleer het en hier kom rondslinger het! Eish!

Matt 5:38-48
“Julle het gehoor dat daar gesê is: ‘’n Oog vir ‘n oog en ‘n tand vir ‘n tand.’ Maar Ek sê vir julle: Julle moet julle nie teen ‘n kwaadwillige mens verset nie. As iemand jou op die regterwang slaan, draai ook die ander wang na hom toe. As iemand jou hof toe wil vat om jou onderklere te eis, gee hom ook jou boklere. As iemand jou dwing om sy goed een kilometer ver te dra, dra dit vir hom twee kilometer. Gee aan hom wat iets van jou vra, en moet hom wat van jou wil leen, nie afwys nie.” “Julle het gehoor dat daar gesê is: ‘Jou naaste moet jy liefhê en jou vyand moet jy haat.’ Maar Ek sê vir julle: Julle moet julle vyande liefhê , en julle moet bid vir dié wat vir julle vervolg sodat julle kinders kan wees van julle Vader in die hemel. Hy laat immers sy son opkom oor slegtes en goeies, en Hy laat reën oor dié wat reg doen en oor dié wat verkeerd doen. As julle net dié liefhet wat vir julle liefhet, watter loon kan julle dan nog verwag? Maak die tollenaars nie ook maar net so nie? En as julle net julle broers groet, wat doen julle meer as ander? Maak die heidene nie ook maar net so nie? “Wees julle dan volmaak soos julle hemelse Vader volmaak is.”

En …

Joh 8:3-73            
Die skrifgeleerdes en die Fariseërs bring toe ‘n vrou wat op owerspel betrap is, en laat haar in die middel van die kring mense staan. Hulle het vir Hom gesê: “Meneer, hierdie vrou is op heter daad betrap waar sy owerspel gepleeg het. Moses het ons in die wet beveel om sulke vrouens te stenig, maar u, wat sê u?” Dit het hulle gevra om Hom uit te lok, sodat hulle iets kon kry waaroor hulle Hom kon aankla. Maar Jesus het gebuk en met sy vinger op die grond geskrywe. Toe hulle aanhou om Hom te vra, het Hy regop gekom en vir hulle gesê: “Laat die een van julle wat ‘n skoon gewete het, eerste ‘n klip op haar gooi.”

Jitte, hierdie stukkie is vir my moeilik, want waar kom reg en geregtigheid dan in? As ek hierdie lees kan enigiemand mos maar spreekwoordelik met moord wegkom. Of selfs tronkstraf vryspring. Eintlik sommer alles vryspring. Jy sien, alles klink reg, totdat ons self die doodstraf moet voltrek. Dit sal nogal nice wees as iemand anders dit doen, of hoe? Ek lees van ‘n man wat vir jare ‘n laksman was in Amerika. Die doodstraf was vir hom normaal, hy het maar net elke dag gewoon werk toe gegaan, deur die “motions” gegaan, alles op die wetlike manier gedoen, gesorg dat reg en geregtigheid geskied, sy werk na die beste van sy vermoë gedoen en as hy ‘n dag afgehad het en gou ingery het werk toe het hy soms selfs gou sy vrou saamgeneem. Sy het in die motor gewag, hy het gou die ding gedoen en huis toe gegaan. As die kinders saans vra: “Pappa. Hoe was jou dag?”, sou hy sê: ”Business as usual”, en dalk by homself gedink: “Goeie dag gewees, alles suksesvol afgehandel”. Later jare het hy ineengestort en dit het sy lewe verwoes.

Tweeduisend jaar gelede was daar ook laksmanne, hulle was soldate en hulle het net hulle werk gedoen. Daar was ‘n Man na hulle toe gebring wat onskuldig bevind was, hy het eintlik so ‘n mooi lewe gelei en Hy het wonderlike dinge gedoen. Dit was maklik om die saak af te handel daardie dag. Hy het niks teëgestribbel nie, hy was so mak soos ‘n lam, want Hy was die Lam van God. Vir hulle was dit “business as usual”, hulle het dit gereeld gedoen. Daar was geen emosie daarby nie en dit was immers hulle opdrag , vir hulle was dit reg want Hy het die owerhede bedreig. Dit was eintlik ‘n eer om die volk te verlos en Hy is toe sommer saam met twee boewe reggesien. Wie was hierdie laksmanne? Hoe het hulle gevoel? Was die dood vir hulle sommer net normaal? Het bloed hulle nog laat gril? Het hulle koud en afsydig geword en net nie meer gepla gewees nie? Emosieloos? As dit nou 2000 jaar gelede was, sou ek of jy dalk een van die laksmanne wees? 

Hierdie vraag moet ek en jy vir onsself afvra as ons sien dat iemand verlore gaan en ons niks daaraan doen nie, want dan voltrek ons die doodstraf vir daardie persoon. Koud, emosieloos, afsydig, onbetrokke. So iets van, jy wou mos. Vriend, die doodstraf is uitgevoer op die Een persoon wat maak dat Geestelike doodstraf nie meer nodig is nie. As ons nie iets daaraan probeer doen nie, is ons steeds laksmanne! Koud, afsydig, onbetrokke, on-emosioneel.

Bron:  heuning.co.za

Lees Meer >>

Kyk op na die berge

 

Ek kyk op na die berge, waarvandaan sal daar vir my hulp kom?

Dit is einde van die jaar – hoe voel jy? As ek vir jou sou vra: “is jy moeg”?, is ek amper doodseker jy sal ja sê. Ek praat nie van bergklim-moeg, of marathon-moeg nie, ek praat van “op”. Is jy “op”? Jy weet nie meer waarheen nie?

Die Psalmskrywer begin hierdie Psalm met: “ek kyk op na die berge, waarvandaan sal daar vir my hulp kom?” Ons ken die res van die Psalm, ons ken die einde wat sê dat die Here jou sal beskerm waar jy ookal gaan. Ons ken ook Job se einde. Terwyl ons lees van al sy swaarkry en ellende, verlies en pyn, verwerping en alleenheid weet ons alreeds wat die uiteinde gaan wees: daar wag herstel en voorspoed vir hom. As ek vandag vir jou sou vra of Ps 121:1 op jou van toepassing is, steek jy dalk net by vers 1 vas.

Voel jy dalk vandag moedeloos, hopeloos, hooploos, toekomsloos, visieloos, leweloos? As jy so voel, is jy een van biljoene in die wêreld. Onthou egter dat as jy die res van Psalm 121 lees en glo, dan het jy ‘n groot voorsprong bo baie… want daar is ‘n goeie einde.

Vers 1 maak voorsiening vir die feit dat daar slegte tye in ons lewens sál wees. Punt. Die hele Psalm 121 maak voorsiening vir die feit dat kinders van die Here een of ander tyd hooploos of hopeloos sal voel, en Hom sal gaan soek in die berge; dat hulle een of ander tyd moedeloos sal voel, en selfs sal begin twyfel of God ooit hulle uitroep hoor. Daar staan glad nie in hierdie Psalm dat jy ongelowig is as jy swaarkry en soekend is nie. Inteendeel, hierdie is ‘n belofte Psalm: wanneer daar dae kom dat jy opkyk na die berge en uitroep vir hulp, is Hy daar. Daar kán gevare wees, maar die Psalm belowe dat Hy jou lewe sal beskerm (vers 7). Wow!

Dit sê nie:

–          jou finansies sal eensklaps regkom nie

–          jou motor gaan homself regmaak nie

–          jy sal more dadelik by ‘n nuwe werk instap nie

–          jou kinders sal nie jou hart breek nie

–          jou huwelik gaan sommer dadelik regkom nie

Dit sê wel dat wanneer hierdie goed gebeur, jy seker kan wees daarvan dat die Here dáár sal wees.

Ons woon in ‘n gebroke wêreld, weet jy? Onvolmaak, vol slaggate, vol moeilikheid en teleurstellings – en kinders van die Here is nie uitgesluit hiervan nie. Ons is deel van ‘n onvolmaakte bestel. Ons neem deel aan ‘n on-lekker lewe. Maar wat is ons voordeel dan? Hét ons ‘n voordeel?

Weet jy watse woorde maak my vies? “Christene het my seergemaak”. Ek wil sê: siestog, shame, kom oor dit, get a life. Weet jy hoekom gebeur dit? Dit gebeur omdat mense opkyk na ander mense, na sisteme en mensgemaakte stelsels. Weet jy wat sê die Bybel daaroor? Jes 2:22 “Moenie op mense staatmaak nie, hulle blaas so maklik die laaste asem uit. Hulle is min werd”. Dis hoekom hulle jou seermaak, en dis ook hoekom jy een of ander tyd iemand seergemaak het, of nog sal seermaak.

Hier is, na my mening, die gemiddelde volgorde van die lewe:

–          dit gaan goed met jou

–          dan vlieg die volstruis in die windpomp in (dit is mos die Afrikaanse uitdrukking vir die pawpaw strike die fan)

–          dan begin jy skarrel, jy maak planne, jy probeer dinge regkry, jy sukkel

–          dan gaan soek jy hulp by mense – en word dikwels teleurgestel

–          dan gaan jy na God toe en probeer met hom ‘n “deal” aangaan (jy weet, Here as U my help dan sal ek dit of dat doen, of prysgee, ens)

–          dan gee jy Hom ‘n bietjie raad en ‘n paar voorstelle en tydskedules van hoe Hy jou probleem kan oplos

–          dan eers begin jy opkyk na die berge – oorgegee aan Iemand groter as jy

–          dan, uiteindelik, iewers, vertrou jy net op Hom

…eers as niks anders werk nie, soek ons na Hom. Hoekom begin ons nie by die laaste punt nie?

“Ek kyk op na die berge” spreek vir my van vertroue, en van aanvaarding en van oorgee.

‘n Paar jaar gelede het dit sleg gegaan in my besigheid. Ek gaan toe bank toe vir ‘n leninkie, maar hulle sê toe nee. Ek was eers lekker vies vir hulle, maar toe sê ek vir die Here dat ek al my eie planne sal los, en Hom vertrou as die bank dan nie wil help nie. Binne ‘n maand was my probleme opgelos, sonder die bank! In dieselfde tydperk sit ek een aand in my motor buite die gym en vra die Here vir uitkoms – en dit hét gekom. Nie deurdat geld net in my skoot geval het, of iemand ‘n erfporsie aan my bemaak het nie, maar deurdat ek buitengewone goeie bestellings van kliënte af gekry het …. ek moes wérk! My probleem was dat ek gedink het dinge gaan nooit weer verander nie; ek was verkeerd, want ek het vasgehaak by vers 1 van Ps 121. Kan jy die Here genoeg vertrou dat die uitkoms wat Hy gaan bring die beste is, al sal dit dalk nie pynloos wees nie, of nie volgens jou tydskale wees nie?

Hoe moet ons dan optree in moeilike tye?

–          aanvaar dat slegte tye so normaal is soos ontbyt eet

–          aanvaar dat dit menslik is om bekommerd te wees

–          weet dat God nêrens heen is nie, Hy IS daar

–          glo dat Hy ook jou slegte omstandighede kan gebruik

–          aanvaar dat jou eie planne kan misluk

–          aanvaar dat Hy vir jou “nee” kan sê vir dit waarvoor jy bid – Hy weet beter

–          aanvaar dat dit dalk nóg slegter kan gaan

–          glo dat dit weer beter sal gaan

–          moenie jou toevlug by mense gaan soek nie

–          wag op die Here! Wag en vertrou.

Bron:  heuning.co.za

Lees Meer >>

Jy kan Jesus nooit anoniem navolg nie

Dikwels is ek ook agter die skerms ingelig oor mense wat huweliksprobleme het, of wat in sonde geval het, maar dan met die woorde: “Ons wil assebief nie persoonlik betrokke raak nie.” En tog sê die Here dat onsself altyd die eerste linie van hulp is as Hy iemand oor ons pad stuur. Ons word dan daardie naaste van wie Jesus in Lukas 10 vertel wat moet help. Ja, ons mag wel vir ander mense vra om ons hierin by te staan, maar om die bal net aan te gee en onbetrokke aan te gaan met ons eie lewe, is om die evangelie volspoed te systap.

Dit is om God se wil en sy seën mis te loop.

Bron:  ekerk.org

Lees Meer >>

Stiltetyd / gebed — ’n Nommer 1 Nuwejaarsvoorneme

As mamma–by–die–huis kon ek ’n uur lank stiltetyd hou nadat man en ouer kinders weg is werk en skool toe. ’n Baie besige sakeman het weer ’n staande afspraak in sy dagboek gehad: FS HS — Father, Son and Holy Spirit. In Londen het menige jongmens al soggens die uur in die moltrein op pad werk toe gebruik om heerlik in sy/haar sak–Bybeltjie te soek vir die dag se geestelike kos.

Dit ís belangrik om heeldag lank in ’n gebedstemming te wees, om sommer so tussen my gewone aktiwiteite deur te kan bid, maar daar gebeur iets heeltemal anders wanneer ek stil word op ’n stil plek en luister totdat ek die Here met my hoor praat deur die Bybel en deur die indrukke wat die Heilige Gees in my hart kom lê.

Dis baie sinvol om ’n leesplan vir my persoonlike Bybelstudie te hê. Daar is van my vriende wat studies gemaak het van verskillende Bybelse karakters, of ’n tema soos bv. vergifnis. Brink en ek gebruik graag die Eenjaarbybel omdat dit ’n mens help om die hele Bybel deur te lees — óf Ou Testament een jaar en Nuwe Testament die volgende jaar, of sommer albei gelyk. En is dit nie ’n heerlikheid as ’n mens die tyd het om bietjie ’n verklarende Bybel of kommentaar/kommentare nader te sleep nie! Die belangrikste is om met ’n soekende, leerbare hart te lees en die Here te vertrou om vir my antwoorde te gee op die dinge waarmee ek probleme het.

En wanneer dit by gebed kom, het ek waardevolle lesse al moes leer:

1. Vra vir die Here om vir jou te leer. Ek het bv. eenkeer vir Hom gevra om my te wys wie om aan te spreek wanneer ek bid: die Vader of Jesus. En Hy het my gewys dat ek asof ek Jesus se hand vashou na die Vader toe gaan. Maar ek mag tot Jesus ook bid. Dit maak nie saak nie — Hulle is Een.

2. Onthou jy hoef Hom nie te beïndruk nie (jy kan ook nie — Hy ken jou mos in elk geval deur en deur). Dit maak nie saak of jy oor jou woorde struikel, en of jy soms nie lus voel om te bid nie. Sê vir Hom sommer reguit — Hy verstaan.

3. Romeine 8:26–27 leer dat jy selfs sonder woorde kan bid.

4. Dit help my dikwels om my gebed soos ’n brief te skryf of sommer net puntsgewys n.a.v. ’n versie wat ek lees.

5. Dit help ook soms om hardop te bid.

6. Onthou net, Hy sien in elk geval jou hart en weet al wat jou behoefte is voordat jy vra. Hy verstaan jou hart nog beter as wat jy dit self verstaan.

Bron:ekerk.org

Lees Meer >>

‘n Aangrypende gebed vir reen

 

Om die mooi van hierdie boerdery te beleef het u ‘n besonderse liefde vir die diere en die boerdery in my hart gesit en daarvoor is ek U baie dankbaar. Maar liewe Heer dit is as gevolg van hierdie liefde, en my tekort aan insig, wat maak dat ek U weë nie verstaan nie.
…Ek verstaan nie wanneer die lammerooi aan die voet van die duin omval as gevolg van swakheid, en nog steeds net oor haar lam se welstand bekommerd is nie.
…Ek verstaan nie as die koei met ‘n sug  gaan sit en ons altwee weet sy sal nooit weer opstaan nie.
…Ek verstaan nie as ek in die onskuldige bruin oë van die verswakte koedoekoei, wie se voet in die draad gehaak het, kyk en sien sy wag op die verlossing van die dood, wat uiteindelik deur dors en hitte-uitputting onder die skroeiende woestyn son veroorsaak sal word.
…Ek verstaan nie as ek my hart-se-punt koeie by die slagpale moet aflaai, en nog onthou hoe hulle kalwers gelyk het, en selfs hoe ek sommige van hulle as klein kalwertjies onthoring het.
…Ek verstaan nie as jong eerstelam ooitjies net ribbes en gekoekte wol is en ek onthou vaagweg hoe ‘n glad verhaarde ooi lank gelede vir haar vet lammetjie geblêr het terwyl die komkommersap teen haar wang afloop.
…Ek verstaan nie as my ryperd een oggend stok styf is as gevolg van elke aand se kragvoer, omdat daar niks meer hooi in die veld is wat hy bedags kan vreet nie
…Ek verstaan nie as ek die donkie langs die pad sien lê wat in die tuig gesterf het en ek weet sy eienaar het ook maar nie n plan gehad nie.
…Ek verstaan nie as die groot springbokram struikel struikel voort sukkel nie.
Ek verstaan nie as die erdvark, wat ‘n nagdier is, in die middel van die dag, vermaer en verdonker, op die warm rooi sand rond ploeter op soek na iets om te eet.
…Ek verstaan nie dat die graspolle, die bron van kos, in klein swart knoetsies verander het sodat die wind hulle wortels oop kalwe en die woestyn son dit verdroog en verdood.
…Ek verstaan nie as die winpomp net wind blaas omdat die boorgat opgedroog het, terwyl my verstand verdof is deur ‘n wolk stof en ‘n gebulk en geblêr wat deur my bene en murg sny.

Here ek verstaan nie hoekom U dit oor hierdie onskuldige diere laat kom, terwyl U vir my, sondaar, net goedheid en guns gee nie. Here ek verstaan dit nie, maar ek weet wel dat ek nooit die straf wat ek verdien, sal kan dra nie. Daarom, voor ek vir reën vra, smeek ek om U genade en vergifnis. Ek bid ook vir wysheid om tussen goed en sleg te kan onderskei. Ek bid veral Here dat ek nooit arrogant sal word nie, want alle eer kom U toe. Ek bid ook vir wysheid en krag vir die hele gemeenskap om op die regte manier deur hierdie droogte te kom. Ek verstaan nog steeds nie hoe die gemsbok in hierdie tyd so sterk kan bly nie, maar ek bid dat u ons almal die gemsbokke van hierdie droogte sal maak.

Here nou dat U my hart ken, smeek ek by U:  “GEE ASSEBLIEF VIR ONS ALMAL REËN EN GEE ASB VIR ONS ALMAL GENOEG REEN!!”

Amen

Lees Meer >>

Goeie maniere begin by my

Toe glip my herinneringe vir ’n oomblik selfs by tant Emsie verby tot by Aristofanes doer in die 4de eeu voor Christus. In die Grieks 3 klas moes ons juis deur sy een drama getiteld Wolke stoei. Skielik het Aristofanes se klagtes oor dieselfde tipe dinge by my opgekom, soos jongmense wat nie meer opstaan vir ouer mense nie, en wat ongevraagd gesprekke oorneem. Lyk my, niks het verander nie.

In elk geval, respekvolle optrede teenoor mekaar is altyd ’n Bybelse moet! Miskien is dit die internet aangedrewe realiteite van ons dag wat maak dat die grense van respek en privaatheid tussen mense verkrummel. Of sommer net ’n algemene kultuur van “entitlement.” Wat ook al die redes, ons kort nuwe maniere van omgang met mekaar. En dit begin altyd en orals by onsself. Dink net hoe anders sal die wêreld wees as onsself die volgende Bybelse beginsels daagliks toepas:

a. Alle mense het regte name en unieke persoonlikhede.
b. Mense se waarde word nie bepaal deur hulle besittings of status nie.
c. Mense se waarde neem nie af namate hulle ouer word nie.
d. Die woord “askies” is ’n lewenslange belangrike brug tussen mense.
e. Asseblief en dankie is steeds nie uit die mode nie.
f. Woorde is belangrik, maar dade van omgee wen loshande.

Bron:ekerk.org

Lees Meer >>

Die nuwe mens in wording

Hierdie geestelike groei en heiligmaking, wat deur die Heilige Gees in ons aan die gang is, is baie ingewikkeld maar tegelyk baie eenvoudig. Dit is ingewikkeld omdat ons van nature makliker terug neig na ons ou lewenswyse voor ons bekering. Dit kom meer outomaties om net vir jouself te lewe, in plaas daarvan om selfloos God en ander eerste te stel. Dit voel aanvanklik net baie lekkerder om eerste vir jouself te sorg, voordat jy vir ander iets hoef te doen.

Tog is dit tegelyk ook baie eenvoudig. Die beste Spesialis in vernuwing, is binne in elke Jesus-mens. Niks is vir Hom ‘n probleem nie. Niks staan in sy pad nie. Niemand kan sy werk keer of ongedaan maak nie. Geen struikelblok of hardkoppigheid of verharde hart, kan Hom keer nie. Elke bekeerde kind van God het geleentheid om net eenvoudig en met erns, sonder skuldgevoelens of enige verdienste, oor te gee aan Hom.

Maar hoe? Soos Paulus vir Titus sê: “… God (dit is die Gees in ons) … voed ons op om die goddelose leefwyse en wêreldse begeerlikhede te laat vaar en met selfbeheersing, opregtheid en godsvrug in die teenswoordige wêreld te lewe …” (Titus 2:12)
Alle mense kan nou reeds voorberei word vir die hemel, maar sonder rede stel almal nie belang nie.

Vrywillig, sonder dwang, openhartig, opreg, eerlik, liefdevol, soekend, sonder skuldgevoel, toegewyd, gefokus … almal woorde wat iets beskryf van elke Jesus-mens se daaglikse geleentheid om meer en meer die nuwe mens in wording te wees. Hierdie nuwe mens in wording, is 100% God se Gees se verantwoordelikheid in ons. Ons kan self niks doen om “… met selfbeheersing, opregtheid en godsvrug … te lewe” nie. Moenie eers probeer nie. Elke probeerslag, vertraag God se genadewerk in jou. 

Gee God se genadewerk ‘n volledige kans in jou lewe …

Bron:  http://doomcharl.blogspot.co.za/

Lees Meer >>

Hoe lyk jy?

Dalk is jy die vreugde wat soos ’n vaas ongekunstelde papawers ’n vaal vertrek opvrolik. Miskien is jou wese dié van ’n houtseilboot wat rustig oor die lewenswaters seil en vrede aan ander bring. Dit mag wees dat jy ’n antieke stukkie oudheid is wat ander met jou wyshede verryk. Of miskien is jy eerder ’n kontemporêre kunswerk met ’n interessante moderne streep wat altyd gereed is vir nuwe dinge.

Wanneer die lig van Christus se liefde in ons harte is, maak dit nie saak van watter stoffasie ons gemaak is, hoe ons aanmekaar geweef is waar ons is nie, ons maak ’n verskil. Want ons is anders. Ja, ’n geesvervulde vrou straal skoonheid uit:

 

  • Mense geniet die skoonheid van haar hart omdat daar iets van die liefde van God in haar menswees gestalte kry.

  • Jy hou van haar omdat sy in vrede met haarself, ander en haar God leef.

  • Sy straal — ongeag die omstandighede — kalmte en rustigheid uit omdat sy weet wie haar Redder en Leidsman is.


Hoe lyk jy? Dink jy ander sien iets van die groot liefde van God in jou lewe? Beleef mense sy vergifnis, deernis en toegeneentheid deur jou? Is jou voorbeeld so aantreklik dat ander jou God wil ontmoet?

Bid elke dag dat die Gees jou so sal vul dat sy liefde jou lewe onderskryf sodat ander Christus deur jou sal sien leef. En deur jou sal leer ken.

Skepper-Vader, U wat elke deel van my gevorm het, U weet ook van al die verbleikte kolle in my lewe en die beskadigde dele van my hart. Maak my elke dag oor. Nuut! Sodat ek u beeld — u groot liefde — aan hierdie wêreld sal vertoon.


Uit: Siel van ’n Vrou, CUM

Bron:ekerk.org

Lees Meer >>

God se oop koninkryk


By ons klein kindertjies kan ons baie leer oor hoe hulle onvoorwaardelik maats maak. Hulle speel so maklik met mekaar oor grense heen. Ons sal almal kan vertel van hoe ons tot ‘n sekere ouderdom meer vriende gehad het en sonder enige vooroordele goed met ander oor die weg gekom het. Ja, ons sou wel een dag met mekaar baklei oor onbenullighede en net die volgende dag is ons weer die grootste maatjies.

In die koninkryk van die hemel waar Jesus se reëls geld, kan ons net van dag tot dag groei in die wyse waarop Hy almal as sy vriende sien. Hy kan nie kwaad bly vir sy vriende nie. Hy hou nie boek van die kwaad nie. Hy het nie witbroodjies of swartskape nie. Hy beloon nie sommiges met groter geskenke as vir ander nie. Hy het een prys, sy eie lewe, vir almal betaal. Die resultaat van hierdie liefde van Hom aan sy vriende, is die werk van sy Gees in elkeen van sy vriende.

En waar die Gees werk, word grense afgebreek en vooroordele teenoor ander mense verdwyn. Met ‘n Jesus-hart is almal altyd welkom binne die koninkryk van God. Hoe meer intens ons die Gees toelaat om ons lewens van binne nuut te maak, hoe meer ontdek ons iets van die misterie van die koninkryk van die hemel. En daar geld totaal ander norme en reëls as in ons alledaagse lewe. Hoe langer hoe meer word dit duidelik dat ons nie al die antwoorde het en alles kan verklaar nie.

Bron:  http://doomcharl.blogspot.co.za/

Lees Meer >>

40 Wonderwerke van Jesus

1. Gebore uit ’n maagd (Matt 1:18-25)

2. Verander water in wyn (Joh 2:1-11)

3. Genesing van die regeringsamptenaar se seun (Joh 4:43-54)

4. Genesing van ’n besetene in Kapernaum (Mark 1:21-27)

5. Genees Petrus se skoonma (Luk 4:38-39)

6. Genees die siekes in die aand (Matt 8:16)

7. Eerste wonderbaarlike visvangs (Luk 5:1-11)

8. Jesus genees ’n melaatse man (Matt 8:1-4, Mark 1:40-45, Luk 5:12-14)

9. Jesus genees ’n offisier se slaaf (Matt 8:5-13, Luk 7:1-10)

10. Jesus genees ’n verlamde man (Matt 9:1-8, Mark 2:1-12)

11. Jesus genees ’n man met ’n verdorde hand
(Matt 12:9-14, Mark 3:1-6, Luk 6:6-11)

12. Jesus wek ‘n weduwee se seun uit die dood uit op (Luk 7:11-17)

13. Jesus maak die storm stil (Matt 8:23-27, Mark 4:35-41)

14. Jesus dryf demone uit ‘n man in ’n varktrop in (Mark 5:1-20)

15. Jesus genees ’n vrou in die skare (Mark 5:25-34)

16. Jesus wek Jaïrus se dogtertjie uit die dood op (Matt 5:25-34)

17. Jesus genees twee blindes (Matt 9:27-31)

18. Jesus genees ’n stom man (Matt 9:32-34)

19. Jesus genees ’n invalide by Betesda (Joh 5:1-15)

20. Jesus voed 5 000 mense (Matt 14:13-21)

21. Jesus loop op die see (Joh 6:16-21)

22. Jesus genees baie mense in Gennesaret (Matt 14:34)

23. Jesus genees ‘n heidense vrou se besete dogter (Mark 7:24-30)

24. Jesus genees ’n doofstom man (Mark 7:31-37)

25. Jesus voed 4 000 mense (Matt 15:32-39) “Toe het Jesus Sy dissipels na Hom geroep en gesê: Ek voel innig jammer vir die skare, omdat hulle al drie dae by My bly en niks het om te eet nie; en Ek wil h ulle nie graag honger wegstuur nie…En Sy dissipels sê vir Hom: Waar sal ons in die woestyn soveel brode vandaan kry om so ‘n groot skare te versadig? Toe sê Jesus vir hulle: Hoeveel brode het julle? En hulle antwoord: Sewe, en ’n paar vissies. En Hy het bevel gegee aan die skare om op die grond te gaan sit. Toe neem Hy die sewe brode en die visse, en nadat Hy gedank het, breek Hy dit en gee dit aan Sy dissipels, en die dissipels aan die skare. En hulle het almal geëet en versadig geword; en hulle het die oorskot van die brokstukke opgetel, sewe mandjies vol.”

26. Jesus genees ’n blinde man by Betsaida (Mark 8:22-26)

27. Jesus genees ’n man wat blindgebore is (Joh 9)

28. Jesus genees ’n seuntjie wat duiwelbesete is (Matt 17:14-20)

29. Die wonderbaarlike vis met ’n muntstuk in sy bek (Matt 17:24-27)

30. Jesus genees ’n besetene wat blind en stom is (Matt 12:22-23)

31. Jesus genees ’n vrou wat 18 jaar lank kranklik was (Luk 13:10-17)

32. Jesus genees ’n man wat aan edeem ly (Luk 14:1-6)

33. Jesus genees 10 melaatses (Luk 17:11-19)

34. Jesus wek Lasarus uit die dood op (Joh 11:1-45)

35. Genesing van Bartimeus (Markus 10:46-52) “En hulle het in Jerigo gekom. En toe Hy en Sy dissipels en ’n aansienlike skare uit Jerigo uitgaan, sit die blinde man, Bartimeus, die seun van Timeus, langs die pad en bedel. En toe hy hoor dat dit Jesus die Nasarener was, begin hy om uit te roep en te sê: Seun van Dawid, Jesus, wees my barm-hartig…Toe gaan Jesus staan en sê dat hy geroep moes word; en hulle roep die blinde man en sê vir hom: Hou goeie moed, staan op! Hy roep jou. En hy gooi sy oorkleed af, staan op en kom na Jesus toe. En Jesus antwoord en sê vir hom: Wat wil jy hê moet Ek vir jou doen? En die blinde man sê vir Hom: Rabboni, dat ek mag sien. En Jesus sê vir hom: Gaan, jou geloof het jou gered.
En dadelik het hy gesien en Jesus op die pad gevolg.”
36. Die verdroogde vyeboom sonder vrugte (Matt21:18-22)
37. Die genesing van die soldaat met die afgekapte oor in Getsemane
(Luk 22:50-57)
38. Die opwekking van Christus (Joh 20:1-10)
39. Die vangs van 153 visse (Joh 21)
40. Die Hemelvaart van Jesus Christus (Mark 16:19-20)
Hy het soos ons geword sodat ons soos Hy kon word.
Hy is verwerp sodat ons aanvaar kon word.
Hy is veroordeel sodat ons vergifnis kon ontvang.
Hy is gestraf sodat ons begenadig kon word.
Hy het gely sodat ons versterk kon word.
Hy is gegésel sodat ons genees kon word.
Hy is gehaat sodat ons liefgehê kon word.
Hy is gekruisig sodat ons regverdig gemaak kon word.
Hy is gemartel sodat ons vertroos kon word.
Hy het gesterf, sodat ons mag lewe.
Hy het na die hel afgedaal – sodat ons Hemel toe kan gaan.
Hy het verduur wat ons verdien – sodat ons kan geniet wat slegs Hy verdien.


Bron: juig.co.za

Lees Meer >>