1. Luk 23 : 33 – 34 “Toe hulle by die plek kom wat Kopbeen genoem word, het hulle Hom daar saam met die misdadigers gekruisig, die een aan Sy linker- en die een aan Sy regterkant. Toe sê Jesus “Vader, vergeef hulle, want hulle weet nie wat hulle doen nie.”
2. Joh 19 : 26 – 27 “Toe Jesus Sy moeder sien en die dissipel vir wie Hy baie lief was, wat by haar staan, sê Hy vir haar, “daar is U seun.” Daarna sê Hy vir die dissipel, “daar is jou moeder”.
3. Joh 19 : 28 “Ek is dors”.
4. Luk 23 : 43 – 43 “Die moordenaar langs Hom sê “Jesus, dink aan my wanneer U in U Koninkryk kom.” Jesus antwoord hom, “Ek verseker jou, vandag sal jy saam met my in die paradys wees.”
5. Mark 15 : 34 “Om drie-uur het Jesus hard uitgeroep: “Eloi, Eloi, lema sabagtani”. My God, My God, waarom het U My verlaat”.
6. Luk 23 : 46 “Jesus het hard uitgeroep, “Vader, in U hande gee Ek My gees oor.”
7. Joh 19 : 30 “Nadat Jesus die suur wyn gekry het, het Hy gesê, “Dit is volbring”.

Jesus praat sewe keer aan die kruis. Met die meeste van hierdie woorde wys Hy Sy hart van liefde.

· “Vader, vergeef hulle, want hulle weet nie wat hulle doen nie”. Ongelooflik! Sal ek en jy dit kan doen? Om vir vergifnis vir ander te pleit wat besig is om jou dood te maak. Sê dit nie iets van hoe vergifnis werk nie? Dink jy nie ook soms jou sondes is net te groot om vergewe te word nie. Genade, hierdie mense vra nie eers vergifnis vir hulleself nie! Jesus doen dit namens hulle. Ek glo met my hele hart dat God die Vader hulle vergewe het, want Sy Seun het daarvoor gepleit! Jesus tree in by sy Vader vir mense wat dit nie verdien nie, wat nie berou het nie, wat nie daarvoor vra nie, wat ook nie eers op daardie stadium glo nie! Hoeveel te meer is daar vergifnis vir ons wat glo, wat berou het, en daarvoor vra. Hierdie mense is eintlik so tipies van ons dag. Hulle kruisig vir Jesus terwyl hulle Sy wonderwerke gesien het, Hom hoor praat het en baie getuienis oor Hom gehoor het. Net so kruisig dié wat nie in Hom glo nie, Hom waarskynlik keer op keer, terwyl ons die Bybel het, steeds wonderwerke sien, Hom hoor praat deur ander, en baie getuienis oor Hom hoor. Steeds tree Hy by die Vader in om nog steeds vir elkeen ‘n kans te gee. Maar jy en ek moet self besluit of ons dit aanvaar of nie. Genade onbeskryflik groot.

· Aan die kruis, vir oulaas, dink Jesus net aan ander. Hy sê vir Sy ma “Daar is jou seun”, en vir die dissipel, “daar is jou moeder”. Jesus sterf nie voordat Hy ‘n baie belangrike taak afhandel nie. Hy maak klaar wat Hy begin het. Jesus demonstreer ‘n hart van omgee. Hy sorg dat Sy ma ‘n heenkome het. Ek wonder nogal wat tot op daardie stadium in Maria se gemoed aan die gang was. Maar Jesus was nie te laat nie, net soos ons ook vandag dikwels dink die Here wag so bietjie lank voor Hy ingryp in ‘n moeilike situasie. Jesus sien selfs in Sy sterwensuur die nood van ander raak, en bring ‘n oplossing, terwyl Hy self oënskynlik nie vir Sy eie lewe ‘n oplossing het nie.

· En dan, die moordenaar aan die kruis langs Hom. Een uitroep. Net een. “Dink aan my wanneer U in U Koninkryk kom”. En Jesus gee Hom die versekering, “Vandag sal jy saam met My in die paradys wees”. Jesus is besig met verlossingswerk aan die kruis. Nie die begin van Sy verlossingswerk nie. Hy het toe reeds baie mense gered. Ook nie die einde daarvan nie, want Hy doen dit vandag nog. Maar aan die kruis, verlos Hy die moordenaar wat daarvoor vra. Terwyl Hy stoksiel alleen is. “My God, My God, waarom het U My verlaat”.

Dan kom Jesus se laaste woorde. “Dit is volbring”. Tetelestai. Toe dink Hy aan my en jou. Glo jy dat Jesus toe reeds jou naam geken het en dat dit in Sy handpalms gegraveer was? Dat Hy daar dalk ook jou naam voor die Vader genoem het, en gesê het, “Vader, vergeef hom?”. Met Tetelestai kyk Jesus van die kruis af na die ganse mensdom as Sy laaste daad van liefde en verklaar dat wat Hy gedoen het op aarde, nou afgehandel is. Soos wat Hy afkyk na die wat Hom gekruisig het en gevra het: “Vader, vergeef hulle” en vir Sy ma ‘n nuwe tuiste gee met “Daar is jou seun” en met die moordenaar “vandag sal jy saam met My in die paradys wees”, kyk Hy af na jou en my en sê: “Ek het nou genoeg verlossingswerk gedoen”.

Daar skuif die verantwoordelikheid van Sy skouers af na my en jou toe. In my menslikheid sou ek dink Hy sou kon vra: “wat moet Ek meer doen, mens”. As dit nie vir jou genoeg is nie, kan niks meer genoeg wees nie. Vat dit net. Die mense wat Hom gekruisig het, het niks eers gevra nie, maar Jesus het vir hulle genade bepleit. Die moordenaar het gevra, en gekry. Wat doen ek en jy? Ons hoef dit net te aanvaar. Want Jesus het ál die verlossingswerk gedoen wat nodig was.

En ek en jy? Ons het ’n keuse of ons dit aanvaar of verwerp. Vat jy dit, of los jy dit?

Bron: http://www.heuning.co.za/rippel%20wat%20sien%20jesus%20van%20die%20kruis%20af.htm

Paastyd is paaseier–tyd. Regoor die wêreld koop miljoene mense elke jaar met die aanloop tot Paasfees blink–mooi en spesiaal–verpakte paaseiers. Ongeag land, kultuur, geloof of lewenstyl is dit asof die paashaas–eiers vir ’n vlietende oomblik ’n stukkie vreugde behoort te gee: so asof die mens hoop dat die hol sjokolades tóg ’n bietjie vervulling vir hul leë siele sal bring.

Maar: wat beteken Paasfees werklik vir die wêreld? Is dit bloot ’n tyd vir tradisionele wegsteek–lekkergoed en ’n paar dae se rus? Gryp die wonder van Christus se koms, kruisiging en opstanding nog enigsins ons aan–alles–gewoond–wees–verbeeldings aan? Belangriker nog: Wat beteken Paastyd vir jóú? Besef en herdenk jy elke jaar hierdie betekenisvolle tydperk met die hernieude vreugde dat die Seun van God ook jóú lewe vir altyd kom verander het?

Ons is totale sondaars: mense vol foute en gebreke wat nie in staat is om onsself te red nie. Met Christus se koms en sy sterwe het God as’t ware sélf die offer vir ons sondes gestuur — Homself gegee — sodat ons as verloste kinders kan leef! Wat ’n groot God het ons nie! ’n God wat sélf vir ons sonde kom betaal het, ons uit die kettings van sonde kom verlos het … sodat ons elke dag as vry mense kan leef! Want óns God het vir ons sondes gesterf en daardeur die bose magte oorwin sodat ek en jy in ’n nuwe wêreldorde kan leef. Met sy daad is ons deur ons doop en geloof verenigde kinders van Hom. Hoor jy: jy is, danksy Jesus, deel van die rykdom van God — nou en altyd!

Kom ons, kinders van die Lam, bid dat Paasfees elke jaar vir ons almal sielsverrykend sal wees omdat:

• ons opnuut gló dat die Jesus van die leë graf dié Here en dié God is;

• ons werklik sonde– en skuldbevryding aan die voet van die kruis ervaar;

• ons toelaat dat die Gees ons harte soos paaseiers oopbreek sodat ons sy genade–liefde sal indrink en;

• die wonder van die verlossingboodskap ons met ewigheidshoop vul.

Daar is selfs nog meer rede om fees te vier: ons kan nou al dag vir dag in blydskap voor God leef. Dit is net aan ons Here Jesus te danke. Deur sy dood het Hy gesorg dat ons saak met God reg is. Romeine 5:11 Mag die ware betekenis van die Pase elke dag vir jou reënboog–vreugde bring.

Here, die lewe het ons geleer om blink papiertjie–mense te wees terwyl ons eintlik hol van binne is. Kom woon by ons, lééf in ons harte en vul ons leë bestaanslewens met die oorvloed van u genade en die heerlikheid van u seën!

Bron:ekerk.org

Berug vir skielike storms
Die See van Galilea is onder seevlak, in die skeurvallei van die Jordaanrivier geleë, waar dit deur bergreekse omring word. Hierdie see is berug vir storms wat vinnig opsteek, dit kan die een oomblik kalm, en die volgende oomblik stormagtig wees.
Die See van Galilea is amper soos ons lewens vandag, maar kom ons fokus liewers op die gebeure wat ervare vissermanne op hul knieë gedwing het.

Besorg oor ander
Dit moes vir Jesus ’n dag vol uitdagings gewees het. ’n Dag waarop nie net Sy genade aan omstanders betoon is nie, maar ook die krag wat in Sy woorde opgesluit is. Jesus het die heeldag in die son gepreek – van ’n skommelende boot af.  Ten spyte van Sy uitputting was Jesus besorg oor die honger skare. Ná die voeding van die menigte, het Hy die dissipels opdrag gegee om na die oorkant van die see te vaar.

Gee U dan nie om nie!
Eers was dit net ’n vars briesie, maar hulle is onkant betrap toe ’n storm skielik losbars. Dit is interessant dat Jesus volgens die Bybel agter in die skuit gelê en slaap het. Hy was baie moeg ná die dag se werk; die storm het nie eers Sy aandag getrek nie. Die storm moes selfs die mees ervare vissermanne vir hul lewens laat vrees het. Stormsterk winde het gewoed en dit het hard gereën. Moontlik het die manne op mekaar geskreeu, die sig was swak en selfs die braafstes het seker aan hul veiligheid begin twyfel. Iemand het dalk voorgestel dat hulle Jesus moet wakker maak, waarop hulle die Meester toe gaan wakker skud het. Hulle het Hom waarskynlik senuweeagtig met vrae gepeper en hard uitgeroep: “Meester, gee U dan nie om nie!”

Almal ervaar stormagtige tye
Vriend, het ons nie al almal daardie vraag gevra nie? Ek is seker as ons eerlik is, sou baie van ons Jesus ook senuweeagtig en vreesbevange wakkerskud. Moontlik kan ons nie die dissipels veroordeel nie, want ons almal ervaar donker nagte waar ons wonder of alles nie oorboord gegooi moet word nie. Kom ons erken dat terwyl ons op die see van die lewe vaar, daar storms sal opsteek, wat ons klein bootjie heen en weer slinger en ons laat wonder of ons nie in die storm sal vergaan nie.

Die Meester is altyd by ons
Hierdie verhaal gee ons egter die versekering dat die Meester altyd by ons is tydens die donker nag op die see. Die ervaring van die manne wat daardie aand saam met Jesus was, skenk ons vandag hoop en inspirasie.
Dit is nie net die dissipels wat gevra het dat die see kalm moet word nie, ook die Psalmdigter het hierdie versoek gerig. In Psalm 107:28-29 lees ons: “Toe het hulle tot Hom uitgeroep in hul moeilikheid en Hy het hulle uit hul benoudheid verlos. Hy maak van die storm ’n stilte sodat sy golwe stil is.”

Hy bring die storms tot bedaring
’n Les wat ons moet leer, is dat God altyd gewillig is en dat dit vir Hom moontlik is om die storms in ons lewens tot bedaring te bring. Ons moet egter bereid wees om Hom wakker te maak met ons uitroepe. Vriend van God, ons God was reeds van die begin af die Almagtige wat met Sy woorde see en land regeer. Psalm 65:8: sê “…wat die gebruis van die see stilmaak, die gebruis van hulle golwe en die rumoer van die volke.” Die grootste storm daardie aand was nie die See van Galilea se storm nie, maar die een in die hart van die dissipels. Hulle het hulle einde gevrees, maar met genade ’n oorwinning beleef.

“Daar was ook nog ander skuite by”

Bogenoemde beteken doodeenvoudig dat Jesus en Sy dissipels nie alleen in die storm was nie. Ander was moontlik so gretig om saam met Hom te gaan, dat hulle gekies het om saam oor te vaar. Min het hul geweet dat hulle hulle in ’n storm sou bevind. Hoeveel keer sien ons nie mense wat in geloof saam met Hom seil, maar steeds in onvoorsiene storms beland nie? Dit was vir my ’n ‘aha’-oomblik toe ek besef dat as ek Jesus wakker hou in my boot, ek dalk ander se storms kan verkort of voorkom. As ek getrou genoeg is en God my gebede verhoor, kan ek dalk my kinders teen onnodige storms beskerm? As ek Jesus sou ‘wakker maak’ sou God dan nie net genade aan my bewys nie, maar ook aan andere rondom my?

Maak Jesus wakker
Verder het Jesus rustig agter in die boot gelê en slaap. Dit is vertroostend om te weet dat Jesus, wat oor die vermoë beskik om storms stil te maak, saam met my in my boot is. Bid ons dan nie dat God deur ons gebede ander mense se bote kan beïnvloed nie? Dink aan al die nasies en die gebeure wat die Liggaam van Christus wêreldwyd beïnvloed. Is dit moontlik dat ons hier aan die Suidpunt van Afrika as Kerk en individue, Jesus te midde van die storms moet ‘wakker maak’?

Waardevolle lesse
Gedurende daardie donker nag, het die dissipels ’n paar waardevolle lesse geleer. Eers-tens, dat God van die land ook God van die see is. Hulle het geleer dat storms, onverwags en ongeleë is. Die dissipels het ook geleer dat jou reis binne ’n oogwink van vreedsaam na stormagtig kan verander. Die belangrikste is egter dat hulle geleer het dat wanneer hulle Jesus wakker maak en om Sy hulp vra, Hy magtig is om binne ’n oomblik Sy stem te verhef en vrede oor enige storm uit te spreek.

Bron: juig.co.za

·         Leef God raak!
Elke Jesus-mens tel onder die gelukkigste bewoners van hierdie aarde, omdat ons die voorreg het om vir ewig en altyd aan God te behoort. Daarvoor het Hy sy enigste Seun vir ons gegee as volmaakte Verlosser. Die allerbeste Gees van God kom doen in elkeen van ons sy volledige herstelwerk, sodat ons hoe langer hoe meer raak leef wie Hy in elkeen van ons is. Ek en jy, leef en bestaan om God te ken, Hom bo alles lief te hê, en te groei in Godskennis!

·         Leef mede-Jesus-mense raak.
Met die groeiende bewuswording van Hom in my en in jou, kyk ons met ‘n radikale positiewe gesindheid na mekaar. In ons alledaagse lewe, bid ons vir mekaar, help mekaar waar nodig en is daarop ingestel om mekaar se lewe makliker te maak. Met egte God-liefde in elkeen van ons, leef ons spontaan en vrywillig en sonder vooroordele in liefde teenoor mekaar. Ons bestaan om te kan liefhê!

·         Leef nie-Jesus-mense raak.
Maar die goeie nuus dat God werklik met sy opregte liefde in elkeen van ons is, kan ons onmoontlik vir onsself hou. Daagliks het elkeen van ons op een of ander manier te doen met die seerkry in ander se lewens, ja, die geestelike en fisiese honger van ‘n verlore wêreld waarin ons lewe. Vandag is dit ons grootste voorreg om die honger van ander te verlig – ons het die Antwoord vir die wêreld se grootste nood: Jesus-liefde!

Hierdie is die allerhoogste rede waarom ons in 2015 hier op aarde is!

Bron: http://doomcharl.blogspot.com/

BELYDENIS: ”U wat onreg straf, verskyn tog!” – vers 1–7

Die Psalm begin met die belydenis oor en appèl op God: “Here, God wat onreg straf, U wat onreg straf, verskyn tog!”  (vers 1).  Daarin lê die boodskap en krag van die Psalm.  Die 2014 vertaling vertaal “wat onreg straf” met “wat vergeld” wat heel korrek op die omkeer van die situasie dui, wat dié wat onreg pleeg hulle “verdiende loon” gee.

“Kom, Regter Van die aarde, reken af met die mense wat hulle teen U verhef.” (vers 2).  Die Psalmis gebruik hier ’n baie belangrike titel vir God wat sy reg oor almal op die aarde beskryf: “Regter van die aarde.”  Dit is omdat God die reg oor die hele aarde het as Skepper, dat Hy vir die handhawing van die reg oor die hele aarde gevra kan word.  Dié gebed maak dus staat op die uitvoering van God se regsheerskappy oor alles wat leef en beef.

Die Psalm is daarom ook gemik téén dié mense wat God se reg dwarsboom, dié wat hulle teen Hom verhef (vers 2 – “hoogmoediges” – 2014 vertaling), dié wat hulle verlustig in die leed van ander mense (vers 3), dié wat oorkook van vermetelheid (“woorde onbeskaamd laat uitborrel” vertaal die 2014 vertaling!) deurdat hulle spog met die onreg wat hulle begaan (vers 4).  En dan lys die Psalmis die mense wat daardeur getref word: die weduwees, vreemdelinge, en weeskinders (vers 6).

Let op dat dit die weerloses in die gemeenskap is wat genoem word, dié wat óf hulle versorgingsisteem verloor het – weduwees en weeskinders – óf dié wat inkommers is en sukkel om deel van die gemeenskap te word – vreemdelinge (weens politieke of ekonomiese redes – lees wat Lev. 19:34 daaroor te sê het).  Let ook op die solidariteit na beide kante toe.  Dié weerloses skaar hulle by die volk van God en die Psalmis reken hulle as deel van die volk van God, hulle is deel van God se “erfdeel” (2014 se vertaling van “wat aan U behoort”).  Belangrik!

“Dan sê hulle nog: ‘Die Here sien dit nie, die God van Jakob merk dit nie op nie.’” (vers 7 – 2014 vertaling).

APPÈL: “Sien dit tog in, julle onverstandiges onder die volk!” – vers 8–11

Hier sien ons dat die goddeloses en onverstandiges deel van die Godsvolk is.  Daarom kan dié Psalm ook aan hulle gerig word.  Hulle word as onverstandig en dwaas uitgekryt, omdat hulle twee goed van God nie verstaan nie.

1. God het hulle gemaak – ore, oë, gedagtes.  Hy weet aan die eenkant daarom op intieme wyse presies hoe hulle is en wat hulle hoor, sien en dink.  In ’n sekere sin beteken dié gedagtes nie veel nie, want die Here weet “dat dit nietigheid is” (vers 11 – 2014 vertaling – 1983 het: “dit beteken niks” wat miskien ‘n bietjie oordadig is!).  Maar, dit beteken aan die ander kant ook dat God kan sien, hoor en dink, asof dit nodig is om dit te onderstreep!
2. God is die hele tyd betrokke by mense, regoor die wêreld, in elke nasie.  Hoe?  Om mense op te voed, te onderrig en kennis mee te deel, sê Psalm 94.  Ons hoor hier iets van Psalm 19 se onderrig wat vanuit die Skepping uitgaan.  Ek het vroeër hieroor geskryf: Psalm 19 – God bestaan en God praat met ons.

BEMOEDIGING: “Hoe gelukkig is die mens vir wie U teregwys, Here” – vers 12–15

Die Psalmis rig hom vervolgens op diegene wat bereid is om te luister na wat hy te sê het, dié wat hulle deur God wil laat opvoed (“teregwys” – 2014 vertaling). Dié onderrig kom uit die “woord” (“wet” in die oorspronklike teks), waarin die ander deel van Psalm 19 in herinnering geroep word.  Sulke mense sal nie net gelukkig wees nie, maar ook rus kry na tye van teëspoed (onheilsdae – 2014 vertaling) as die Here optree teen dié wat goddeloos opgetree het.

’n Wonderlike belofte van die Here om aan vas te hou in tye van teëspoed!  Die Here sal sy volk nie in die steek laat nie, daarop kan die volk vertrou.  “Sy erfdeel sal Hy nie laat vaar nie.” (vers 14 – 2014 vertaling). Die regspraak sal weer regverdig wees en “almal met opregte harte sal dit steun” (vers 15 – 2014 vertaling).

GEBED: Die Here ons God sal korrupte regters vernietig – vers 16–23

Ná die interne aanspreek van die onverstandiges en die bemoediging van die opregtes, wend die Psalmis hom teen dié plek waar onreg die meeste gedy, die korrupsie van dié wat verantwoordelik is vir die regspraak, die regters.  Hy noem dit “die setel van vernietiging” (2014 vertaling – vgl. vers 15 waar dit reeds aangeraak is), mense wat God se duidelike uitsprake in sy wet skade aandoen.

Hy vra dus die retoriese vraag: “Wie sal vir my opstaan teen kwaaddoeners?” (vers 16 – 2014 vertaling).  En antwoord dit met die getuienis dat dit uiteindelik net God self is wat kan en sal help.  Anders was die stilte van die graf immers lankal reeds sy tuiste.  Dit was juis toe hy gedink het dat sy voete gly (“gaan swik” – 2014 vertaling) dat die Here se troue liefde hom ondersteun het.  Selfs wanneer hy baie onrus in sy binneste ervaar, ontstellende gedagtes  wat vermeerder en hom sy rus ontneem, is dit God se ondersteunende vertroosting wat hom tot bedaring bring.

Laat my dink aan wat Paulus veel later sou skryf in Filippense 4:6–7.  Ek het daaroor die volgende geskryf:

“Met hierdie gedagtes oor God se nabyheid as begronding vir hulle vreugde en inskiklikheid, is dit geen wonder dat Paulus daarvandaan beweeg na die gemeente se behoeftes en besorgdhede nie.  Omdat God naby is, kan hulle oor alles en in alle omstandighede na Hom toe gaan in gebed.

Letterlik staan daar in vers 6: “maak in alles (alle situasies) julle versoeke (aitema) bekend aan God deur gebede (proseuche) en versoeke/petisies (deesis) met danksegging (eucharistie).”

Die verskillende woorde vir gebed in die vers moenie te veel onderskei word nie, omdat dit eintlik as sinonieme gelees kan word.  Die punt van die vers is eintlik net om duidelik te sê: angstigheid oor allerlei word deur voortdurende veelvuldige versoeke verlig!

Die aanmoediging tot gebed word opgevolg met een van die mees ongelooflike beloftes wat Paulus gee, letterlik vertaal: “gevolglik sal die vrede (eirene) van God, wat alle begrip/denke (nous) te bowe gaan, oor julle harte en gedagtes die wag hou in Christus Jesus”.

Dit is die enigste plek in die NT waar só van “die vrede van God” gepraat word.  Paulus bedoel hier nie die vrede met God nie, maar die vrede van God, die vrede wat Hy self het, die vrede wat Hy self is, die vermoë wat Hy het om nie angstig te raak oor allerlei nie, maar in beheer en veral getrou aan Homself te bly.

Dít is wat die harte en gedagtes van die gemeente sal bewaar.  En dié vrede gaan alle denke te bowe – dit bedoel letterlik dat dit iets is wat beter is as die beste beplanning!  Ons gedagtes en emosies is soos ‘n oorlogsterrein wat God sal beskerm teen angstigheid en chaos.”

Lees meer hier by my bydrae: Filippense 4:2-23 – Om saam in die Here te wees, bid en leef.

Terug by die Psalm – die Here duld nie korrupsie in die regspraak nie; Hy wil nie hê dat enigiemand ellende aangedoen word nie.  Daarom is Hy self ’n toevlugsoord, ’n veilige vesting, ’n rots by wie gelowiges kan skuiling soek en vind.  Hy is die een die onregverdiges sal laat boet vir hulle onregverdige dade, wat hulle sal verdelg oor hulle boosheid. Trouens: “met hulle kwaad sal Hy hulle vernietig,” (vers 23b – 2014 vertaling), d.w.s. hulle sal val deur hulle eie toedoen.

Die boodskap van die Psalm

Die Psalm bring groot rus in my gemoed.  Net soos God die reg in die heelal handhaaf, só doen Hy dit op aarde.  Ons mag dus die gebed in die Ons Vader bid: “Laat u wil geskied, soos in die hemel, so ook op die aarde.” (Matt. 6:10b).  En ons mag God vertrou dat Hy dit in spesifieke sake sal doen, bv. in hoe regspraak uitgeoefen word.

Selfs as dinge op die korttermyn nie uitwerk nie, bly Hyself vir ons ’n toevlug – Fil. 4:6–7 bring my tot rus! – en gee Hy rus van die ontstellende gedagtes wat in ons binneste vermenigvuldig (vers 19), en beur ons op deur sy vertroosting, NT gesproke deur Die Vertrooster, die Heilige Gees.  Die vrede van God sal oor ons gevoelens en gedagtes die wag hou, belowe Paulus ons.

Ek neem dié vers met my mee vandag: “Wanneer ontstellende gedagtes meer word in my binneste, dan beur u vertroosting my op.” (vers 19 – 2014 vertaling).

Bron: http://bybelskool.com/psalm-94-u-wat-onreg-straf-verskyn-tog/

NGVishoek: Ds. ( dominee ) Martin Barnard.

Brak water is nie goed vir ankers nie.

Sy is ’n spreekwoordelike skip wat swaar trek aan ’n anker met onewe oppervlak. Roes, mengelmoes van kleur. Grof en lelik.

Beskadigde goods.

Sy is blootgestel aan die ontnugtering van teleurgestelde hoop. Maar sy kies wéér om hoop in te asem, die verbintenis met suurstof uit te daag.

Die Anker wat lewe gee sal gemaklik opsetlik, vaslê in ’n hawe vol uitdagings – polish van Gees as salf.

Die groot Geneesheer. Hy glimlag in die blik van dreigende diep waters. Hy anker weer haar siel. Korrosie en roes sal nie verniel.

Dis Hy alleen wat op die water kan vasstrap en uitlig tot die storm bedaar.NGVishoek: Ds. ( dominee ) Martin Barnard.

God verwag niks van Jesus-mense nie, Hy het absoluut niks nodig van ons af nie. Indien Hy wel iets nodig het vir sy koninkryk, dan gee Hy dit – Hy gee en doen alles wat Hy nodig vind, in en deur elke Jesus-mens. Dit is sy hoofaktiwiteit dag en nag! Jy kan as Jesus-mens nooit weer in die moeilikheid kom by Hom vir iets wat jy doen of nie gedoen het nie. Hierdie is die kern-leefwyse wat nuwe en ou Jesus-mense nodig het om raak te lewe met Hom in jou!

Om werklik vry te wees as Jesus-mens, beteken dat Hy ryk is. Ja, skatryk in alles wat goed is en Hy deel dit so graag uit en Hy doen dit in ons. Soos jy jou hart oopmaak dat Hy in jou woon en beheer neem in jou, net so gaan dit elke dag voort. Maak jou hart elke dag (eintlik elke sekonde) oop vir sy goeie alles in jou spesifiek ter wille van wie Hy vir jou wil wees. Hy maak jou wat Hy wil hê jy veronderstel is om te wees in sy oë: mededeelsaam, goedhartig, vergewensgesind …

… dit is ware genot vir Jesus-mense!

Genot is nie jy wat oulik is deur beter te wees as ander, meer pligsgetrou, ryker, slimmer, mooier – dis alles nie-Jesus-mense se idee van genot. Vir elke Jesus-mens is genot Jesus in jou – Hy is en word jou grootste geluk en geniet en lag!

Gaan vertel van die korrekte prentjie van wie God is, maar veral dan wat elke Jesus-mens van Hom in jou kan verwag. Swaarkry, probleme, spanning, krisis, seerkry … dit is alles deel van elke mens op aarde se lewe, ook vir Jesus-mense. Vertel dit ook vir nie-Jesus-mense, vir nuwe en ou Jesus-mense!

Bron:  http://doomcharl.blogspot.com/ NGVishoek: Ds. ( dominee ) Martin Barnard.

• Jesus in ’n tyd geleef het toe daar ook maar strominge in die wêreld, die politiek en in sy eie land was. Net soos vandag was daar maar altyd heersers wat Hom nie geken het nie en glad nie goeie leiers was nie … tog het dit Hom nie verhoed om voluit die evangelie aan álle mense te verkondig nie. Sy liefde het alle mense omarm.

• Jesus het nie sonder gesins- en verhoudingsprobleme geleef nie. Sy ma moes maar dwarsdeur haar lewe die smaad van ’n ongehude moeder dra, sy pa het in ’n skrynwerker-winkel kop bo water probeer hou, sy eie broers het Hom soms nie verstaan nie en in sy eie geledere was daar iemand wat Hom aan die dood sou uitlewer.

Ons Jesus was ook hier tussen ons om vir ons te wys hoe om te leef.

Jesus, sal U my help om elke dag meer soos U te wees, meer soos U te leef?

Bron:  ekerk.org

NGVishoek: Ds. ( dominee ) Martin Barnard.

2.       “… Jesus Christus … het vir altyd aan die regterhand van God gaan sit.” (Hebreërs 10:12b)Met die finale afhandeling van die verlossing van alle sondaars, neem Jesus vir ewig die heerskappyposisie oor die hele mensdom en die ganse skepping in … JA, DIT IS WAAR!!!
3.       “Nou wag Hy daar totdat sy vyande aan Hom onderwerp is.” (Hebreërs 10:13) Met die kruisiging is die satan finaal oorwin deur Jesus vir elkeen wat glo in Jesus, maar die satan en sy medewerkers het beperkte mag op aarde totdat die wederkoms van Jesus plaasvind … JA, DIT IS WAAR!!!
4.       “… het Hy dié wat vir God afgesonder word, vir altyd volkome van sonde vry gemaak.” (Hebreërs 10:14) Elkeen wat glo in Jesus se sterwe en opstanding se geloofswaarheid, dit is elke Jesus-mens, leef nie meer onder die las van die sonde nie … JA, DIT IS WAAR!!!
5.       “Ook die Heilige Gees betuig dit aan ons.” (Hebreërs 10:15) Die Gees van God in elke Jesus-mens maak die verlossingswerk van Jesus ‘n groeiende werklikheid in elkeen … JA, DIT IS WAAR!!!
6.       “Aan hulle sondes … sal Ek nooit meer dink nie.” (Hebreërs 10:17) God hou geen rekord van sonde in Jesus-mense se lewens nie … JA, DIT IS WAAR!!!
7.       “Waar die sondes vergewe is, is geen offer daarvoor meer nodig nie.” (Hebreërs 10:18)Jesus-mense het glad nie nodig om enige bydrae te lewer of enige opoffering te maak om vergifnis vir enige sonde te ontvang nie … JA, DIT IS WAAR!!!

Glo jy dat Jesus finaal vir al jou sondes gesterwe het? Hy hét! JA, DIT IS WAAR!!!

Bron:  http://doomcharl.blogspot.com/ NGVishoek: Ds. ( dominee ) Martin Barnard.