Voordat ons voortgaan, is daar twee kwessies wat aangeraak moet word.
Eerstens, opsie een en twee hier bo is natuurlik van aard (slegs verduidelikings van die opstanding) en dus verskil die definisie van ’n wonderwerk in hulle geval (’n hoogs onwaarskynlike, maar steeds natuurlike gebeurtenis) met die definisie daarvan in die derde opsie – waar die Bybelse definisie toepaslik is.
Tweedens, dit is belangrik om te onthou dat geen historiese geleerde, Christen, of ongelowige die kernfeite rondom die opstanding betwyfel nie.
Dit is:
• Jesus is gekruisig en begrawe
• Drie dae na Sy dood het Sy Liggaam verdwyn
• Daar was verslae van verskynings van Jesus aan gelowiges en ongelowiges tydens die verloop van 40 dae
• Die verskynings het die individue ver-ander en hulle het begin om Christus
se opstanding te verkondig, selfs al moes hulle ’n marteldood vir hulle getuienis sterf

Hierdie is die kernfeite van Jesus se opstanding en word nie deur enige ingeligte historikus, hetsy sekulêr of godsdienstig, betwis nie. As dit dan die geval is, kom ons ondersoek elk van die moontlike verduidelikings vir die opstanding.

Die opstanding van Jesus – ’n biologiese wonderwerk
Die opsie van ’n biologiese wonderwerk beweer dat Jesus nie werklik gesterf het nie, maar dat diegene wat Sy teregstelling uitgevoer het, slegs geglo het dat Hy dood is. Later, nadat Hy in die graf geplaas is, en teen alle biologiese en mediese waarskynlikheid in, het Hy weer bygekom, uitgekom, en asof Hy uit die dood opgestaan het, aan Sy dissipels verskyn.
Skeptici stel selde, indien ooit, hierdie opsie as ’n alternatief tot die Bybelse opstandingsverhaal voor. Om die waarheid te sê, ’n paar dekades gelede het ’n artikel in die ‘Journal of the American Medical Association gesê: “Gevolglik blyk verkla-rings wat op die aanname gebaseer is dat Jesus nie aan die kruis gesterf het nie, nie te strook met moderne mediese kennis nie.”
Die gebrek aan entoesiasme vir hierdie teorie is te wyte aan ’n paar sterk argumente daarteen.
• Die Nuwe Testament vermeld spesifiek dat Jesus voor Sy kruisiging geslaan en gegésel is. Geskiedenis wys dat géseling die dood van baie van die veroordeeldes veroorsaak het voordat hulle nog hulle aangewese kruis gehaal het. Die historiese Evangelies vermeld ook dat Jesus so verswak was weens Sy géseling dat Hy nie Sy kruis na Golgota kon dra nie (Matt 27:32); ’n duidelike aanduiding dat Sy kragte ingegee het
• Die Romeine was deskundiges van kruisigings. Hulle het geweet hoe om dood te maak; inderdaad, as ’n slagoffer wat tot die dood veroordeel is, oorleef het, is die soldate vir hulle agtelosigheid verantwoordelik gehou
• Johannes 19:34 sê dat ’n soldaat ’n spies in Jesus se sy gesteek het om seker te maak dat Hy dood is. Die beskrywing van bloed en water dui duidelik aan dat die pericardium(hartsak) geskeur het. Onmiddellike dood sou die gevolg gewees het as Jesus nie reeds weens die kruisiging gesterf het nie
• Jesus se dood is vlakby deur ooggetui-es, vriend sowel as vyand, waargeneem
• Nadat Hy van die kruis afgehaal is, is Jesus met skerp speserye afgespoel en in doeke toegedraai deur liefdevolle vriende wat sekerlik sou opmerk as Hy nog gelewe het
• Om hierdie oëverblindery uit te voer, sou Jesus in die graf moes bykom,
’n massiewe klip wegrol, die Romeinse wagte oorrompel (Matt 27:62-66) en dan aan Sy volgelinge en skeptici
verskyn
• Die dissipels se reaksie op ’n verminkte Jesus, vol skeurwonde ná Sy kruisiging, sou baie anders gewees het as wat die vier Evangelies vermeld. Niemand is ontbied om noodmediese behandeling te gee nie; in plaas daarvan het hulle Hom as die Here aanbid
Laastens, die opsie van ’n biologiese wonderwerk skep ’n baie ongunstige prentjie van Jesus se morele karakter. Dit beteken dat Jesus nie net ’n leuenaar was nie, maar veel erger.
As hy nie werklik gesterf en opgestaan het nie, moes Jesus Sy dissipels doelbewus mislei en jare lank weggekruip het, terwyl Sy dissipels aangehou, gemartel en vermoor is omdat hulle Sy vals opstanding verkondig het.
Om hierdie redes en ander, is die opsie van ’n biologiese wonderwerk ’n hoogs onwaarskynlike verduideliking vir die opstanding van Jesus.

Die opstanding van Jesus – ’n sielkundige wonderwerk
Die gewildste argument onder skeptici, soos Richard Carrier, is dat Jesus se volgelinge ’n sielkundige wonderwerk beleef het. Carrier skryf: “Ek glo dat die beste verduideliking, verenigbaar met beide wetenskaplike bevindinge en die oorblywende bewyse, is dat die eerste Christene hallusinasies van die opgestane Christus in die een of ander vorm beleef het. In die antieke wêreld was ervarings van ’n bonatuurlike aard, soos om geeste, gode en wonders te sien, nie alleen aanvaar nie, maar ook aangemoedig.”
Wanneer ’n mens egter die opsie van ’n sielkundige wonderwerk van naderby ondersoek, verkrummel dit onder die gewig van talle strydige argumente:
• Om enige geloofwaardigheid te hê, vereis die sielkundige wonderwerk ’n leë graf. En, as die dissipels hallusinasies beleef het en bloot mislei is om te glo dat Christus leef, wie het dan die liggaam gesteel? Sekerlik sou Jesus se vyande dit nie gesteel het nie. Wie bly dus dan oor? Wie sou so ’n risiko neem om die lyk te steel?
• Die opsie van die sielkundige wonderwerk bly ook in gebreke om verantwoording te doen vir die feite agter Jesus se verskynings ná Sy opstan-
ding. Is hallusinasies ’n geloofwaardige verduideliking? Jesus het nie net een keer nie, maar talle kere verskyn; nie net aan een persoon nie, maar verskillende persone; nie net aan individue nie, maar ook aan groepe; nie net op een plek nie, maar op verskeie plekke; nie net onder een omstandigheid nie, maar onder verskeie omstandighede; nie net aan gelowiges nie, maar ook aan ongelowiges, skeptici en selfs vyande
• Die Evangelie se verslae beklemtoon die feit dat die dissipels geensins verwag het dat Jesus uit die dood gaan opstaan nie; trouens die dissipels het gedink dat hulle Jesus nooit weer sou sien nie. Hulle het nie enige oortuiging gekoester dat hulle vermoorde leier lewend aan hulle sou verskyn nie. Daar word duidelik uitgebeeld dat die dissipels nie Jesus se voorspellings oor Sy opstanding begryp het nie. (Lukas 18:31-34). Hulle was self skepties. Hierdie mentaliteit is veelseggend omdat dit daarop dui dat hulle hulleself nie tot ’n mistiese toestand opgesweep het nie
• Die Joodse geloof het uitgesien na ’n opstanding aan die einde van die wêreld, maar niemand het nog ’n ewige opstand voor daardie aangewese tyd verkondig nie (Daniel 12:2 en Johannes 11:24). Hierdie feit versterk verder die argument dat die dissipels nie die
opstanding van Jesus enigsins verwag het nie
• Dit is die moeite werd om uit te wys dat skeptici en vyande van Jesus, insluitend ongelowige lede van sy eie familie, daarop aanspraak gemaak het dat hulle hom ná Sy kruisiging in lewende lywe gesien het. Vanuit ’n sielkundige oogpunt beskou, het hierdie mense geen rede gehad om ’n verskyning te versin van iemand waarin hulle in die eerste plek nie geglo het nie

Laastens, skeptici bied ook kognitiewe dissonansie as ’n verweer aan vir die sielkundige wonderwerkopsie. Kognitiewe dissonansie impliseer dat mense gemotiveerd is om die psigiese ‘spanning’ tussen die werklikheid, en wat hulle wil hê die werklikheid moet wees, te verminder. Hulle verander dus hulle houding, oortuiging en optrede sodat hulle kan ‘kry wat hulle wil hê’. Byvoorbeeld, die jakkals in die fabel wil druiwe hê, maar die werklikheid is dat hy die druiwe nie in die hande kan kry nie, daarom verander hy sy houding: die druiwe is suur en nie die moeite werd nie. Dié wat sinies is, sê dat die dissipels so graag wou hê dat Jesus hulle Messias moes wees dat, toe hulle met die realiteit van sy teregstelling gekonfronteer is, hulle psigiese aanpas-sings gemaak het om vir hulle verdriet te vergoed. Skielik het Jesus uit die dood teruggekeer – of so het die dissipels hulleself wysgemaak.
Enige argument wat op kognitiewe dissonansie gebaseer is, misluk daarin om twee kernfeite van die opstanding te verduidelik: die liggaam wat verdwyn het en die verskyning van Jesus aan Sy vyande en diegene wat getwyfel het. Bowendien kan ’n argument aangevoer word dat dit die skeptici van die opstanding is wat aan kognitiewe dissonansie ly. Hulle wil so graag hê dat Jesus dood moet wees, dat hulle die psigiese aanpassings maak wat nodig is om die bewyse te ignoreer of verkeerd uit te lê.
Hoewel gewild, het die opsie van die sielkundige wonderwerk baie gebreke en kan dit nie ernstig oorweeg word as ’n verduideliking vir die opstanding nie.

Die opstanding van Jesus – ’n teologiese wonderwerk
Die opsie van die teologiese wonderwerk beweer dat God Jesus uit die dood opgewek het. In teenstelling met die eerste twee opsies, wat suiwer natura-listiese verduidelikings is, sluit die teo-logiese wonderwerk nie die bonatuurlike uit nie. Dit betrek ’n ‘bo’-natuurlike Skepper en outomaties laat dit dus ware wonderwerke toe. Die outeur, C.S. Lewis sê: “As ons God erken, moet ons wonderwerke erken? Inderdaad, inderdaad, jy het geen verweer daarteen nie. Dit is die ooreenkoms.”
Die opsie van die teologiese wonderwerk maak aanspraak daarop dat die Nuwe Testament betroubaar van Jesus se opstanding verslag lewer. Dit bevestig ook die geskrifte van die vroeë kerkvaders aangaande die opstanding, soos hierdie aanhaling van Polikarp (’n dissipel van Johannes): “Want hulle het nie die teenswoordige eeu liefgehad nie, maar Hóm wat tot ons voordeel gesterf het en ter wille van ons deur God opgewek is.”
Die hoofrede waarom kritici hierdie opsie verwerp, is dat hulle, in navolging van hulle anti-bonatuurlike vooroordeel, God as ’n moontlikheid reeds vooraf uitgeskakel het. Dit is nie ’n oorsig van die bewyse nie, maar ’n verbintenis tot naturalisme wat veroorsaak dat skeptici die opstanding, die teologiese wonderwerk, as ’n moontlikheid uitsluit.
Wanneer ’n denkende persoon egter die universeelaanvaarde historiografiese (geskiedskryfkundige) maatstawwe nagaan wat gebruik word om enige geskied-
kundige verslag te ondersoek (bv. verklarende gesag, verklarende omvang, aanneembaarheid, en sy teenteorieë ver verbysteek), verskyn die opsie van die teologiese wonderwerk as die beste moontlike verduideliking vir Jesus se opstanding.
As dit die geval is, kan die rasionele persoon beswaarlik beskuldig word as hy/sy, op grond van die bewyse en ’n toewyding tot onbevooroordeelde histiografiese ondersoek, tot die gevolg-trekking kom dat ’n Goddelike wonderwerk daardie eerste Paasoggend geskied het.
In opsomming van hierdie standpunt, het dr. Thomas Arnold, die voormalige voorsitter van moderne geskie-denis aan Oxford en outeur van die gerespekteerde drie volumes ‘History of Rome’ gesê: “Ek is daaraan gewoond om baie jare lank al die geskiedenis van ander tydperke te bestudeer en om die bewyse van diegene wat daaroor geskryf het te ondersoek en op te weeg. Ek is nie bewus van enige gebeurtenis in die geskiedenis van die mensdom wat deur vollediger bewyse van enige aard bevestig word, as die Godgegewe teken – dat Christus gesterf het en weer uit die dood opgestaan het nie.

bron:  juig.co.za NGVishoek: Ds. ( dominee ) Martin Barnard.

Dink maar aan Johannes 10 waar Jesus in beelde of metafore met sy gehoor praat. Jesus sê dat hy die goeie herder is, en die ingang van die kraal. Niemand kan na die Vader gaan as dit nie in en deur Jesus gebeur nie.Tog staan daar in die teks dat al het Jesus in beelde en metafore met hulle gepraat, het die wat na hom geluister het nie verstaan nie. Hulle kon nie die spoor lees nie. Hulle het nie die semiotiek of tekens van die tyd reg gelees nie. Dieselfde gebeur met Thomas in Johannes 20. Nadat Jesus uit die dood opgestaan het, het Jesus aan ʼn paar van sy volgelinge verskyn. Hulle het vir die res vertel dat hulle vir Jesus gesien het. Thomas het nie geglo nie. Hy het gesê dat hy definitief nie sal glo nie, alvorens hy fisies sy hande in Jesus se wonde steek. Ongelowige Thomas kon aanvanklik nie die geestelike spore sny nie. Hy kon nie die boodskap kodeer nie. Dieselfde gebeur met die Emmaus-gangers. Hulle wandel saam met Jesus op die pad, maar kon nie die geestelike spore sny nie. Die ryk jongman slaag ook nie daarin om die spoor te sny of die tekens van die tyd reg te lees of raak te sien nie.

Tog is dit telkens die blindes en die onrein siekes wat wel raaksien en die tekens reg lees. In Johannes 10 is daar ʼn duidelike boodskap. Die wat die stem van die Herder hoor en die tekens reg lees, is die wat na groen weivelde geneem word en lewe in oorvloed kan beleef (Joh 10:10). Diegene wat by die hek ingaan, is die wat geslaag het om reg te onderskei.

Nelus Niemandt vertel van die bekende Karl Barth wat eendag in ʼn tram in Basel ry. Langs hom was daar ʼn student. Barth het die student vriendelik gegroet en agter gekom dat die persoon ʼn besoeker in Basel was. Barth vra toe vir hom wat hy in Basel doen. Die jong man sê toe dat hy en sy vriendin die bekende Karl Barth se Universiteit wil besoek. “Ken u vir Karl Barth?”, vra die student. “Ja”, sê Barth, “Ek het vanoggend sy hare geskeer en gekam”, sê Barth. By die busstop by die Universiteit klim hulle uit, en die jong student se vriendin wag toe ook by die busstop. Die jong man stel toe sy vriendin voor aan die ouer man wat hy pas ontmoet het. “Jy sal nie glo wie dit is nie!” Hierdie man is Karl Barth se barbier!”.

Dit is die gevaar as mens die tekens van die tyd of die semiotiek verkeerd lees. My en jou uitdaging is dat ons opgeskerp moet word om die geestelike tekens van die tyd reg te lees en die semiotiek te dekodeer.

bron:  bybelkennis.co.za NGVishoek: Ds. ( dominee ) Martin Barnard.

Hy het in ons buurt — hier langs ons — kom intrek en in alle fasette soos ons geword. Dit het Hy gedoen omdat net ’n méns vir ons sondes kon betaal. Hoe aangrypend is hierdie waarheid nie! En hoe uniek maak dit ons Christengeloof nie: dis immers net ons God wat uit die hemel neergedaal en tussen ons kom bly het.

Wanneer ons weer met nuwe oё na hierdie waarheid kyk, besef ons maar net weer hoe oneindig lief ons God ons het. Dat Hy bereid was om aarde toe te kom en deur die mensdom verwerp, gegesel en gekruisig te word … sodat ons kan leef, is soms vir ons te groot om werklik te verstaan.

Miskien is dit juis waarop Martin Luther hieroor gesê het: “Dis een van die dinge waaroor mens eerder minder wil sê en maar net op jou knieё wil neerval en uitroep: ‘Dankie Here!’”

Dankie Heer vir wat U is. U is mý Here en mý God.

Bron:  ekerk.orf

NGVishoek: Ds. ( dominee ) Martin Barnard.

• Gee Jesus die volle kans om jou vol te maak met sy waarheid: Hy hét mens geword; Hy ís jou unieke Redder; Hy wíl jou laat lewe vol van sý Gees; Hy wíl Geluk ín jou wees; Hý is jou enigste troos in lewe en in sterwe; Hý maak van jou ‘n nuwe mens; Hý IS Jesus-mens ín jou!
• Gee Jesus die volle kans om jou vol te maak met sy genade: sonder verdienste ís jy sy kind; sonder inspanning kán jy waarlik lewe; gratis ontvang jy ál die rykdom van sy koninkryk; jy ís reeds vir al jou sonde vergewe; Jesus ís besig om Homself meer sigbaar in jou te maak;

Hý IS Jesus-mens ín jou!

In Johannes 1 word na twee uitsonderlike sigbare Jesus-waarhede ín ons verwys. Ín hierdie waarhede sien ons “sy heerlikheid”, sien ons wie Jesus in ons is en word. Én Hy maak ons “vol” van sy heerlikheid, tot oorlopens toe vol van Homself. Hy maak ons “vol van God”, want Jesus is ons enigste toegang tot wie God sigbaar is. Gee Hom net die volle kans …

Intussen is dit glad nie so sleg nie, daarom het Hy juis destyds mens geword: dat ons God reeds vandag kan síén! Én die ongelooflike waarheid is dat Hy in elke Jesus-mens gesien kan word. Ons moet net mooi kyk in onsself en in die Jesus-mense rondom ons. Niemand van ons kan en sal ooit soos Hy lyk nie, maar Hy kom gee deur sy Gees sý karaktereienskappe ín ons. 

Feitlik elke Kersfees dink ek hoe gelukkig was al die mense wat Jesus persoonlik gesien het terwyl Hy fisies hier op aarde was. Gewone mense soos ek en jy: Maria, Josef, sy dissipels, almal wat Hom hoor praat het by die Bergpredikasie, die geestelike leiers van daardie tyd, die politieke leier Pilatus, en nog honderde ander mense by verskeie geleenthede. Ja, Jesus wás ‘n gewone mens wat tussen die mense rondbeweeg het. En ongelukkig dink die meerderheid mense dat ons Hom eers in die hemel weer sal sien, en intussen …

“Ons het sy heerlikheid gesien … vol genade en waarheid.” (Johannes 1:14)

Bron:  http://doomcharl.blogspot.com/l

NGVishoek: Ds. ( dominee ) Martin Barnard.

Toe is die dame daar weg met ’n gratis, peperduur stoof. Asof uit die bloute het die Here se vreemde genade daardie oggend haar lewe met nuwe hoop gevul. “Nou lag ek weer,” sê sy.

Soms is die lewe so hard soos klip. Dan maak niks meer sin nie. Tog vergeet die Here nooit sy aardse eiendom nie. Hy ken ons diepste seer en grootste alleenheid. Dan stuur Hy sy genade in verskillende vorms en verpakkings na ons toe. Dikwels is ander mense die sigbare uitdrukkings hiervan. Wil jy nie ook toelaat dat die Here jou as sy lewende noodhulp gebruik nie. Hy wil graag iemand anders deur jou seën.

Bron:  ekerk.org NGVishoek: Ds. ( dominee ) Martin Barnard.

Was Jesus te besig?
Markus 10 vertel van ’n besige dag vir Jesus en sy dissipels toe mense probeer het om ’n paar kindertjies na Jesus toe te bring sodat Hy hulle kon seën. Die dissipels het ’n vol program gehad. Hulle het nie tyd vir hierdie lastige kindertjies gehad nie, en het die ouers ook so ingelig.
Die dissipels het diegene wat kindertjies na Jesus toe gebring het, berispe! Hulle het gedink dat Jesus te belangrik is om hom met kindertjies op te hou. Hulle het gedink dat die kinders ’n oorlas en ’n onnodige steurnis is. “Kan julle nie sien dat Jesus met belangriker sake as kinders besig is nie? Hy het werk om te doen! Laat staan Hom! Hy is besig om ons te onderrig. Hy het nie tyd om met kindertjies te mors nie!”
Volgens Markus 10:14-16 het Jesus, toe Hy sien wat gebeur, vir Sy dissipels kwaad geword. Hy het vir hulle gesê: “Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle. Dit verseker Ek julle: Wie die koninkryk van God nie soos ’n kindjie ontvang nie, sal daar nooit ingaan nie.“ Toe het Hy Sy arms om die kindertjies gesit, Sy hande op hulle koppe gelê en hulle geseën.
Jesus het nie dikwels kwaad geword nie, maar toe Sy dissipels probeer het om die kinders weg te wys, het Jesus kwaad geword! Hy het nie die kindertjies as ’n mors van Sy kosbare tyd beskou nie. Jesus het waarde aan kinders geheg. En, Hy het seker gemaak dat Sy dissipels daardie boodskap duidelik verstaan.


Die vernaamste in die koninkryk
Kan jy jou voorstel hoe dit vir daardie kindertjies moes wees om Jesus se Hand op hulle te voel en geseën te word? Jesus het daardie kindertjies innig liefgehad.
Matteus 18 vermeld ’n geleentheid toe Jesus se dissipels Hom gevra het: “Wie gaan die belangrikste in die koninkryk van die Hemel wees?” Jesus het ’n kindjie nader geroep. Hy het aan Sy volgelinge gesê: “As julle nie verander en soos kindertjies word nie, sal julle beslis nie in die koninkryk van die Hemel kom nie.” Matt 18:3.

Waarna het Jesus verwys? Wat het kinders wat volwassenes kortkom? Natuurlik het Hy nie van volwassenheid of intellek gepraat nie. Ek dink ook nie Hy het oor onskuld of gehoorsaamheid gepraat nie. Dit neem kindertjies nie lank om allerhande maniere uit te dink om ongehoorsaam te wees nie.
Die kwaliteit waarvan Jesus gepraat het, is vertroue. Kinders vertrou van nature baie maklik. As volwassenes wil ons op ons eie
prestasies staatmaak. Hoe langer ons weg van God af leef, hoe moeiliker is dit om te erken dat ons God se genade nodig het. Aan die ander kant is daardie soort absolute vertroue heel natuurlik by kindertjies.
Die regte tyd om te besluit
Onlangse statistieke bewys dat meer as 83% Christene die besluit om Christus te volg, voor die ouderdom van 18 gemaak het. Slegs 17% word ná die ouderdom van 18 gered. Kinders en jongmense is ’n prioriteit vir Jesus en hulle moet ’n prioriteit vir ons wees!
Jesus het voortgegaan deur aan Sy dissipels te sê: “En wie so ’n kindjie in My Naam ontvang, ontvang My. Elkeen wat een van hierdie kleintjies wat in My glo, van My afvallig maak, vir hom is dit beter as hy met ’n groot meulsteen aan sy nek in die diep see verdrink.” Matt 18:5-6.
Histories het die Russiese Ortodokse Kerk daarin misluk om onderrig aan die kinders en jeug van die kerk te bied. Hulle mislukking het ’n lugleegte in die denke van die Russiese jeug gelaat en kommunisme het gepoog om daardie gaping te vul. Daarom is die kerk van Rusland deels verantwoordelik vir 70 jaar van verdrukking onder ateïstiese kommunisme.
Weliswaar verg dit energie en geduld om kinders te leer. Dit verg tyd en geld om aan die behoeftes van jongmense te voorsien. Maar dit is die moeite werd!
Wanneer jy kindertjies by die kerk sien rondhardloop, sien jy hulle wat die vernaamste in die koninkryk van die Hemel is. Kinderbediening is waarskynlik die belangrikste bediening in jou plaaslike kerk.


Geestelike leiding
Daar is ouers wat nie die belang verstaan om hulle kinders geestelike leiding te gee nie. Hulle wil wag tot hulle kinders oud genoeg is om self oor geestelike dinge en kerk-toe-gaan te kan besluit. Tog laat hierdie ouers nie hulle kinders toe om te wag tot hulle oud genoeg is om self te besluit of hulle skool toe moet gaan, die tandarts moet besoek, of hulle kamer moet skoonmaak nie.
Daar is die staaltjie van ’n dominee wat sy tuin aan ’n man wou wys wat nie sy kinders toegelaat het om kerk toe te kom nie. Hy wou hê dat sy kinders moes wag totdat hulle oud genoeg is om vir hulself te besluit. Toe die dominee en die man die tuin instap, was dit vol onkruid wat die lemoenpampoentjies, boontjies en tamaties toegegroei het. Die man het gesê: “Maar, dit is ’n jammerlike verskoning van ’n tuin!” Waarop die dominee geantwoord het: “Ek wil wag totdat die groente ’n kans gehad het om self te besluit in watter rigting dit wil groei!”
Die kindertjies is na Jesus toe gebring. Dit is wat Jesus wil hê jy moet doen. Hy wil hê dat jy die kindertjies na Hom toe bring. As jy hulle nie bring nie, mag hulle dalk nooit kom nie.


NICO BOUGAS is die internationale koördineerder van Hellenic Ministries. E-pos: nico@bougas.info of www.hellenicministries.com

Bron:  juig.co.za NGVishoek: Ds. ( dominee ) Martin Barnard.

• Die tweede evangeliese waarheid oor die “lewe” het te doen met sterwe: sonder Jesus is alle sondaars verdoem tot die ewige dood, waar daar geen Lewe (geen God), sal wees nie. Nadat die mens van nature, dit is uit eie vrye wil waarmee elke mens gebore word, van die boom van die lewe in die tuin van Eden geëet het, sal elke mens fisies sterwe: “Stof is jy, en jy sal weer stof word.” (Genesis 3:19c) Om hierdie gegewe waarheid wat vir alle mense van alle tye op aarde geld, om te keer, was dit nodig dat ons Jesus eers ter wille van ons Lewe, sterwe aan die kruis: Hy IS daarom weer en enigste Lewe/lewe.

• Jesus het nodig gehad om die hemelse heerlikheid as ware God te verlaat, steeds volledig God te wees en ter wille van ons sonde-verdoemenheid op aarde mens te word vir ons, sodat Hy die Lewe/lewe vir ons kan wees: Hy IS Lewe, ter wille van óns! Hierdie eerste waarheid oor “lewe” het vir my met tyd te doen: Jesus lewe as Beginlose van ewigheid af; as Lewende Een kom Hy as mens aarde toe vir die dood-veroordeelde mens; SLEGS deur Jesus se sterwe aan die kruis én direk gekoppelde opstaan uit die dood, IS Hy Lewe in elke Jesus-mens vandag; én Hy sál alleen Lewe bly tot in ewigheid!

Jesus lewe vandag hier op aarde waar Hy mens geword het en gesterwe het; Jesus lewe vandag deur sy Gees in elke Jesus-mens vir wie Hy aan die kruis gesterwe het; Jesus IS LEWE vir jou en vir my!

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Die hertog het dadelik die boodskap gekry en hulle vakansieverlof toegestaan. Dit klink vir my al te veel na Spreuke se soort wysheid. Soms is daar ’n beter manier as woorde om iets gedoen te kry. Stilbly is beter. Wegstap ook, selfs al weet jy dat jy reg is.

Die grootste oorwinnings wat die Here se kinders behaal is juis om ’n ander wang te draai en ’n tweede myl te loop, soos wat Jesus ons in Matteus 5 leer. Vra die Here om jou met sy soort wysheid te oorlaai sodat jy sal weet hoe om in elke situasie reg op te tree. Dan gebeur jou grootste oorwinnings in Jesus se Naam woordloos, mooi en sag!

Bron:  ekerk.org

NGVishoek: Ds. ( dominee ) Martin Barnard.

Dit is só “yesterday” – die era is verby. En so, op 28 November 1981 kom daar ‘n einde van ‘n era vir Willempie toe hy vrou vat. Weg is die ge-jollery, net vir jouself leef, spandeer jou geld op motors, hoëtroustelle, loop rond soos jy wil, doen verantwoording aan geen mens nie. Die era was verby. Vir altyd – till death do us part. ‘n Nuwe era breek aan, nuwe verantwoordelikheid, nuwe reëls, ‘n nuwe lewe. En dit was goed! Of liewer, IS goed.

Die kruisiging van Jesus kondig die einde van ‘n era aan, en die begin van ‘n nuwe era, een met nuwe reëls, nuwe waarhede, nuwe uitkoms, nuwe hoop, nuwe verhoudinge, ‘n nuwe uitkyk op die lewe, en ook nuwe voorwaardes.

Nou wonder ek by myself: wanneer het hierdie ou era tot stilstand gekom, en wanneer het die nuwe een aangebreek? Was dit met die skepping van die mens, of dalk die sondeval, was dit met Jesus se geboorte, of met sy sterwe, of met sy opstanding? Dalk met sy hemelvaart? Wel, ek glo die volgende:

Joh 19:28-30
Hierna het Jesus, met die wete dat alles klaar volbring is en sodat die Skrif vervul kan word, gesê: “Ek is dors.” Daar het ‘n kan vol suur wyn gestaan. Die soldate het toe ‘n spons vol suur wyn op ‘n hisoptakkie gesit en dit teen sy mond gehou. Nadat Jesus die suur wyn gekry het, het Hy gesê: “Dit is volbring!” Toe het Hy sy kop vooroor laat sak en die laaste asem uitgeblaas.

‘n Aangrypende oomblik toe Hy sê: “Dit is volbring”. Tetelestai. Finish en klaar. Die einde van ‘n era. Die begin van ‘n nuwe. Wat interessant is, is dat die meeste mense op daardie oomblik nie besef het wat gebeur het nie. Al die dissipels het weggehol, behalwe Johannes. Waarskynlik het hulle wel geglo dat daar ‘n einde aan ‘n era was; hulle het vir drie jaar saam met Jesus gewandel, wonderwerke gesien, self wonderwerke gedoen; hulle het gelewe in die hoop dat hulle ‘n nuwe Koning en leier het; hulle het uitgesien na ‘n nuwe lewe, en toe woep, weg is dit. Maar… hulle het nie rekening gehou met Jesus se beloftes nie. Die belofte dat Hy sou opstaan, die tempel afbreek en opbou in drie dae, die belofte van ‘n ereplek in die Koninkryk. Hulle het selfs gestry oor wie aan Sy linker en wie aan sy regterkant sou sit. Vir hulle was ‘n era van hoop aan skerwe toe Jesus sterf. Terug na die viswaters, hulle moes die mense weer in die oë kyk en druipstert weer teruggaan na hulle mense en in die gemeenskap opgeneem word. Maar intussen tyd, hét daar ‘n nuwe era aangebreek. Hulle sou so drie dae moes wag om dinge te sien wat hulle nie kon glo nie! ‘n Nuwe era – opwindend!

Man, nie lank na die hemelvaart nie, gebeur dinge in hierdie nuwe era wat skrik vir niks: duisende kom tot bekering onder hulle prediking, die Evangelie versprei soos ‘n veldbrand, tot aan die uithoeke van die wêreld, ja selfs tot aan die Suidpunt van Suid-Afrika! Die verlossing is hier. WOW! Wat ‘n era.

Toe hierdie nuwe era aanbreek, begin ‘n nuwe stel reëls in werking kom. Die oue is verby, die nuwe het gekom. Weg is die vloek van die sondeval, weg is verlossing deur die hoëpriesters wat namens die volk moes kom boete doen voor God, weg is die tyd waar die profete moes gaan hoor wat die Here vir die volk wil sê. Weg is die rol van die Fariseërs wat die wet in die mense se koppe moes kom indril. Weg is rituele en godsdiensbeoefening. En bo alles, weg is die vloek van die sonde. Weg is die slaafse navolging van die wet, en ander wat namens jou sondevergifnis by die Vader moes kom afpleit.

Matt 27:51
Op daardie oomblik het die voorhangsel van die tempel van bo tot onder middeldeur geskeur.

Wat ‘n wonderlike ding gebeur – die voorhangsel is weg, die allerheiligste is oop vir almal; ons het nou vrye toegang tot die Vader deur Jesus. ‘n Era van gebondenheid en afhanklikheid kom in ‘n oogwink tot ‘n einde, en ‘n nuwe era van vryheid en genade breek aan vir my en vir jou.

Wat beteken die nuwe era vir jou en my? Moenie jouself in die ou era gevange hou nie. As die deur van jou hart nog toe is, is jy in die ou era vasgevang, maar boeta, as jy hom oopmaak….

–  dan skop die volle omvang van genade in. Dan kom hierdie ding in werking wat baie min van ons werklik verstaan. Hierdie toestand waar God sê: My genade is vir jou genoeg. Waar “hard probeer” nie meer die gewenste uitwerking het nie. Saam met God se genade en vergifnis kom egter ook ‘n opdrag, want as jy in die volle omvang van Sy vergifnis wil leef, moet jy ook gou wees om te vergewe. Vir wie moet jy dalk in hierdie Paastyd gaan vergewe? Komaan, begin jy ook ‘n nuwe era.

– sonde lei nie meer tot die dood nie. Wanneer sonde teen genade probeer opweeg, dan wen genade loshande. (dit staan in Romeine 5:20, kyk hoe sê die Message bybel dit:  All that passing laws against sin did was produce more lawbreakers. But sin didn’t, and doesn’t, have a chance in competition with the aggressive forgiveness we call grace. When it’s sin versus grace, grace wins hands down.) Hier is daar egter ook ‘n opdrag: die Bybel sê by monde van Paulus ons moenie hierdie vryheid misbruik om sonde te doen nie.

– daar breek ‘n era van nuwe hoop aan. Dis nie meer nodig om hooploos en hopeloos in ‘n bondel te sit nie. Saam met Jesus kan jy enige bende stormloop, is geen muur vir jou te hoog nie en kan jy enige situasie hanteer. In hierdie nuwe era is Jesus direk daar as jou Vertrooster, Hy huil saam met jou langs ‘n graf, Hy hou jou vas as jy bang is, en Hy gee jou ‘n toekomsvisie as die tonnel donker lyk. Al wat Hy vra is: almal wat moeg en oorlaai is, kom na My toe.

– in hierdie nuwe era het jou saligheid reeds aangebreek. Dit gebeur nie eers wanneer jy eendag sterf nie. Joh 6:47 Dit verseker Ek julle, wie in My glo, HET die ewige lewe.

In watter era leef jy? Dis net een van die twee – voor, of na Jesus. Vier hierdie Paasfees in dankbaarheid jou nuwe era.

Bron:  heuning.co.za NGVishoek: Ds. ( dominee ) Martin Barnard.

Ek verkies om daarna te verwys as die grondvlak waarop dit staan. In Jesaja 7:10-13 het ons ‘n duidelike gesprek tussen Jesaja en koning Agas waarin die Here vir Agas opdrag gee en as’t ware uitdaag om ‘n teken te vra wat die oorwinning oor die Arameërs sou bevestig. God het dit immers belowe! Wanneer Agas nie die moed het om ‘n teken te vra nie, gee die Here self aan hom ‘n teken, in vers 14-16. Die teken is dat ‘n jong vrou wat nog nooit gebaar het nie, haar eerste seuntjie sal hê. Die profesie was dat Aram en Efraim vernietig sou word nog voordat hierdie seuntjie groot genoeg is om tussen goed en kwaad te onderskei. Wie presies hierdie seuntjie was, weet ons nie met sekerheid nie, maar dit was ‘n werklike gewone seuntjie wat gebore is, groot geword het en gesterwe het. Voordat hy so vyf of ses was, het die Here die Arameërs verslaan en is hierdie belofte vervul. As dit nie destyds gebeur het nie, het die Here mos deur Jesaja aan Agas ‘n valse belofte gegee.

Vanuit die Nuwe Testament kom iets anders na vore. Matteus haal hierdie selfde teken aan as ‘n profesie wat hy op Jesus se geboorte toepas. Dit is die dieper vlak van die oorspronklike profesie wat aan Agas gegee is. Matteus wys daarop dat ‘n jongvrou wat nog nooit omgang met ‘n man gehad het nie, ‘n kind sal hê. Die lewe wat in haar verwek word, is uit die Heilige Gees. Hy is ons Verlosser, Jesus die Seun van God.

Die vraag is nou hoe ons die Ou Testament moet sien en vertaal. Hierdie profesie is immers op ‘n dieper vlak in Jesus vervul. Moet ons dit nét as ‘n profesie oor Jesus sien? Of moet die profesie in Jesaja steeds sy oorspronklike historiese betekenis behou? Dit was tog ‘n direkte belofte wat werklik in Agas se tyd vervul is. Indien ons die woorde wat na die seuntjie verwys, in Jesaja met hoofletters skryf, skakel ons óf daardie seuntjie en belofte uit, óf maak ons van hóm een of ander Goddelike wese, wat tog nie kan nie.

Moet ons alle verwysings in die Ou Testament wat óók na Jesus verwys, of profesieë wat op ‘n dieper vlak óók in Jesus vervul word, met hoofletters skryf?

Wat sou jy doen as dit jou taak was om die nuwe Bybel te vertaal?

Bron:  bybelkennis

NGVishoek: Ds. ( dominee ) Martin Barnard.