Hoe om te vergewe

Wie is die belangrikste?
Jesus se dissipels het Hom gevra wie die belangrikste in die koninkryk van God is. Sy antwoord aan hulle was Matteus 18. Om die belangrikste te wees, moet ons soos kindertjies voor Hom wees, veral waar dit by konflik kom. Ons moet nederig soos kindertjies wees met hulle onuitputlike vermoë om vinnig te vergewe. 

As jou broer teen jou sondig
Dit gebeur met ons almal: iemand maak ons gevoelens seer of behandel ons onregverdig. Baie van ons dra hierdie grief met ons saam. Dit neem beslag van ons gedagtes en veroorsaak kwade gevoelens. 
Die wêreldse manier vir konflikhante-ring is om die ander persoon te beswadder, of selfs hof toe te sleep. Christus gee vir ons in Matteus 18:15-19 vier stappe om konflik tussen Christene op te los. Dit is ’n kragtige voorbeeld van hoe die lewe in die Gees verskil van die lewe buite die krag van Christus.

Stap 1
Eenkant alleen
“As jou broer verkeerd opgetree het teen jou, gaan wys hom tereg waar julle eenkant alleen is. As hy na jou luister, het jy jou broer teruggewen.” (Matt 18:15). In plaas daarvan om jou vriende te vertel hoe seergemaak jy voel, gaan jy na die persoon toe met wie jy ’n probleem het. Jy neem die inisiatief, jy wag nie vir hom om na jou toe te kom nie. Dit beteken nie jy handhaaf die houding dat jy hom gaan vertel hoe verkeerd hy opgetree en hoe seer hy jou gemaak het nie. 
Jy benader die saak met genade en ’n soeke na versoening sodat jy hulle kan ‘terugwen’. Dikwels is konflik bloot die gevolg van ’n misverstand en met hierdie stap kan die vertroue en harmonie in ’n verhouding herstel word. 

Hoe gouer hoe beter
Om die konflik vir maande lank uit te stel in die hoop dat dit vanself opgelos sal word, is nie ’n goeie opsie nie. Dit gaan net vererger en mettertyd kan bitterheid in jou gemoed wortelskiet. ’n Gebreekte been verg onmiddellike mediese aandag, ’n verbreekte verhouding verg ook onmiddellike geestelike aandag. Waarom is dit dat wanneer dit by vergifnis kom, ons dikwels ’n leeftyd neem om daarby uit te kom? 

STAP 2
Neem getuies saam
“Maar as hy nie luister nie, neem nog een of twee met jou saam, sodat alles wat gesê word, deur die woord van twee of drie getuies bevestig word.” (Matt 18:16). Jesus moedig ons aan versoening te probeer bewerkstellig. Hierdie getuies moet met sorg gekies word; dit help nie om iemand saam te neem wat jou ‘kant’ gaan kies nie. Dit moet mense wees wat jou daarvan kan weerhou om te oorreageer, wat begeer om versoening te bewerkstellig en nie kant te kies nie.

STAP 3
Betrek die Liggaam van Christus
“En as hy na hulle nie luister nie, sê dit vir die gemeente.” (Matt 18:17a). Wat nou gemaak as daar steeds nie versoening is nie? Die meeste van ons dink dat ons nou met groot genoeë die hele storie by die kerk op die lappe kan bring. Dit is egter nie wat Jesus bedoel het nie. Hy sê nie dat ons skinderstories soos ’n sak vere kan uitskud nie. Wat Jesus ons aanraai, is om na ’n groep gelowiges, soos ’n selgroep, of die pastoor en ouderlinge te gaan. 
Die bedoeling is om gelowiges wat eensgesind is en beide kante van die saak onpartydig sal aanhoor, byeen te bring om versoening te bewerk. Jesus gee die opdrag dat ons geskille binne die kring van gelowiges opgelos moet word en nie na die wêreld geneem moet word waar daar geen geestelike wysheid te vinde is nie.

STAP 4
Wanneer versoening nie plaasvind nie
“As hy ook na die gemeente nie luister nie, moet jy hom as ’n heiden en ’n tollenaar behandel.” Matt 18:17b. Ons leef in ’n gevalle wêreld waar sommige konflikte nie opgelos word nie. Soms is tydelike skeiding nodig. In die Joodse konteks beteken ‘om iemand as ’n heiden en ’n tollenaar te behandel’ dat innige verhoudinge met die persoon afgesny word. 
As al die korrekte stappe geneem is sonder dat daar versoening plaasgevind het, beteken dit dat die persoon teenoor God en Sy Woord rebelleer. Dit beteken ook dat daar steeds in liefde opgetree word, maar dat daar van die vriendskapsverhouding onttrek word. Dit mag tot die ander persoon se berou en inkeer lei. 

Gehoorsaam aan Jesus se lering
As gelowiges moet ons met hierdie lering saamstem. As ons nie daarvolgens leef nie, sê ons in werklikheid: “Ek sal lewe soos ek wil, Jesus het geen sê oor my nie”. Sal ons Hom gehoorsaam? Sal ons ons harte voor Hom verootmoedig? Ons moet in ooreenstemming met God se wil optree, doen soos Jesus gedoen het. Wanneer ons versoening najaag, doen ons wat God wil hê. 

Sewentig maal sewe
“Daarna het Petrus na Jesus toe gekom en gevra: ‘Here, hoeveel keer moet ek my broer vergewe as hy iets verkeerds teen my doen? Selfs sewe keer? Jesus antwoord hom: ‘Ek sê vir jou, nie sewe keer nie maar selfs sewentig maal sewe keer.” (Matt 18:21,22). 
Sewe is die volmaakte getal. Petrus het dus in werklikheid gesê: “Ek het alles volmaak gedoen, nou hoef ek seker nie meer te probeer vergewe nie.” Jesus beveel hom egter om oor en oor te vergewe, moenie eers tel hoeveel keer nie, want dit is ’n hartsingesteldheid van vergifnis: “Ek sal soveel keer vergewe as wat nodig is.” 
Hier spreek Jesus die kern van die pro-bleem aan – die probleem in jou hart. Die pyn, die kwadegevoelens, die wrokkigheid. Dit is maklik om te sê: “Ek vergewe,” maar die gevoel leef steeds voort in jou hart. Wanneer jy die persoon sien wat jy moet vergewe, is dit ’n geleentheid vir ‘sewentig maal sewe keer’. Bid: “Here help my om te vergewe, werk met my hartsingesteldheid, my houding teenoor hierdie persoon. Werk met jou Gees in my om liefde te bewys.”

Wortel van bitterheid
Ons mag deels vergewe het, maar die wortel van bitterheid kan diep lê en ons vergiftig. Hou aan met vergewe totdat dit seermaak. Vergewe – selfs al was wat gebeur het, onregverdig – want elke keer wat ons vergewe, neem die Heilige Gees ons harde hart en maak dit sag. Hy hou aan met Sy werk in ons totdat die bitterheid vrede word, totdat ons God in Gees en in waarheid aanbid.

Ondankbare dienskneg
Jesus eindig met die gelykenis van die koning wat ’n dienskneg van miljoene rande se skuld kwytskeld, net vir dieselfde dienskneg om iemand wat hom ’n paar rand skuld, te wurg vir sy geld. (Matt 18:22-35). Wat Jesus hiermee vir ons sê, is dat ons vergifnis van ’n ander persoon gesien moet word in die lig van die Kruis. Die klein bietjie wat ons ander moet vergewe, kan nie vergelyk word met die groot losprys wat Christus vir ons betaal het nie.

Sodat jou Vader jou kan vergewe
As ons nie kan vergewe nie, wys dit dat ons nie die heiligmakende genade van Christus toegelaat het om Sy vergifnis in ons harte uit te stort nie. “Alles wat julle in die gebed vra, glo dat julle dit al ontvang het, en dit sal vir julle so wees. En wanneer julle staan om te bid, en julle het iets teen iemand, vergewe hom; dan sal julle Vader wat in die Hemel is julle ook julle oortredinge vergewe.” Mark 11:24,25. Miskien sukkel jy om te vergewe. Jou Vader in die Hemel sê dat Hy jou nie kan vergewe voordat jy vergewe het nie. Ons is deel van ’n koninkryk wat op vergifnis gebou is. As jy ’n kind van daardie koninkryk is, is vergifnis deel van jou lewe.

GREG BLAIR  Is die medepastoor by Somerset-Wes Baptiste Kerk.

 

Bron:  juig

 

NGVishoek: Ds. ( dominee ) Martin Barnard.

Lees Meer >>

Die Woord van God in die skepping en die herskepping (Johannes 1:1-5)

 

Die Griekse begrip van die woord, logos, lei tot diewese van die Godheid en van die mens. Aan die Griekssprekende wêreld moes Johannes in Grieks verduidelik wie Jesus is, en gebruik hy die taal van die Grieke. Maar vir die Christene was die Woord gelaai met ‘n spesiale betekenis: die goeie nuus van God se openbaring en verlossing deur Christus. Die vier Evangelies bied dit aan as God se woord deur Christus gepraat, oor Christus. Jesus doen God se werk en praat oor God se werk en is self God in sy wese. Wat Hy is en sê en doen is God se woord. Toe Johannes se Evangelie begin praat van die Woord, was dit ‘n begrip wat gevul was met inhoud.

 

‘en die Woord was by (pros) God’ – in die teenwoordigheid van God en selfs één met God, soos die volgende sinsnede sê: ‘en die Woord was self God’ – God in sy wese – maar daarmee vervang Hy nie vir God nie (nie ‘en God was die Woord nie’), maar  God by God.

Die goddelike natuur van die Woord word gesien in sy werk: in die skepping 1:1-5; openbaring 1:5,9-12,18; en verlossing 1:12-14, 16-17. In al hierdie werke druk God Homself uit deur die Woord, as die God wat praat, wat Homself openbaar deur die Woord (1 Kor 8:5,6).

 

1:2 Die vers herhaal die begrippe van vers 1 om dit te beklemtoon en te verduidelik: (i) hierdie Woord was in die begin by God; (ii) Hy was by God voor alle tye, en het nie eers ‘in die begin’ begin bestaan nie; (iii) ‘n skynbare teenstrydigheid: die Woord was God en was tog in gemeenskap met God.

 

1:3 Positief en negatief word bevestig dat die Woord die middelaar van die skepping is: alles deur die Woord; niks sonder Hom nie. Maar Hy is nie ‘n soort tussengod wat doen wat God in sy heerlikheid nie sou doen nie. Die skeppingswerk van die Woord is die werk van God deur Hom wat self God is.

 

1:4 Die Woord is nie net die middelaar  in die skepping nie, maar ook in die voortgang van die skepping. Hy is die lig en die lewe in die skepping; ook die lewe in die geboorte van die mens, en in die nuwe lewe van die herskepping van die sondige gevalle mens. Die nuwe skepping wat Jesus bring, is die doel van die oorspronklike skepping deur die Woord.

 

1:5 Die lig is aan skyn in die duisternis, wat aan die begin oor die skepping geheers het, toe die Gees van God oor die watermassas gesweef het (Gen 1:2) en in die duisternis van die gevalle mensheid. Die Lig is die heerlikheid van die mensgeworde Woord toe Hy op aarde was. Die heerlikheid van Jesus is sy liefde wat Hy bewys het deur vir ons te sterf, en deur sy oorwinning oor die dood met sy opstanding. Die Lig skyn in die tyd van die Helper/Trooster wat Jesus gestuur het om ons te oortuig en te lei en te versterk tot vandag toe.

Die duisternis kon nie beheer oor die lig kry nie, kon dit nie begryp nie, kon dit nie oorval nie, almal betekenisse van die woord katalambanoo (NAV ‘uitdoof’). Dit verwys na die duisternis in die skeppingstyd wat nie beheer oor die Lig gekry het nie, ook in die tyd van Jesus, en gaan voort in die tyd van die kerk se getuienis oor die Woord wat mens geword het. In die verband van 1:10-12 verwys die lig eerstens na die aanvaarding en aanneem van die waarheid van die openbaring wat Jesus is en bring. En die duisternis van die wêreld kan dit nie oorwin of uitdoof nie; maar kyk na Jesus se waarskuwing in Johannes 12:35.

Die lewe van Jesus waarvan die Evangelie gaan vertel word in 1:1-5 geplaas teen die agtergrond van sy verhouding tot die ewige God, die Here oor al die eeue, die Skepper van alles, Onderhouer van alles, en Verlosser van alles. Die Woord wat mens geword het, is die bemiddelaar in al God se werke, in skepping en nuwe skepping, en in altwee is Hy die Middelaar van die openbaring van God aan die mens, in wat Hy is en doen.

In elkeen van die hoofstukke van Johannes word getuig oor die Godheid van Jesus.

 

Bron:  Bybelkennis.co.za

NGVishoek: Ds. ( dominee ) Martin Barnard.

Lees Meer >>

Uitreik – 25-26 Junie 2013

 


Die middag se sport moes afgestel word oor die weer en die kinders het weer die ouetehuis besoek, waar sommige gruwelik bederf is en selfs roomys ontvang het. Ons het ook koekies vir die minderbevoorregte inwoners van die ouetehuis geneem, waar een omie opgemerk her “dit kom reguit uit die hemel uit”. Suzie het die oudste oom ontmoet: ‘n op-en-wakker 107!


 

Die volwassebediening het voortgegaan om die kospakkies en linne uit ted eel deur middle van huisbesoek. Uit een van die huise het ‘n vrou gekom en gevra dat daar vir haar moeder gebid word. Sy het nie warm komberse of kospakkies gesoek nie, maar gebed. Die tannie Els is 66 jaar oud en ‘n parrapleeg. Haar dogter se geloof en liefde vir haar moeder het Corné-hulle diep geraak en hulle het ‘n wyle daar vertoef en klaar gerëel vir middele om dit vir haar net ‘n bietjie gemakliker te maak.

 

Winston, ‘n bedlêende seun vir wie ons verlede jaar ontmoet het, het ook 18 geword. Die dames het hom besoek met nuwe beddegoed en ‘n geskenk.

 

Die aand het ons talenkonsert gehou in die gemeenskapsaal.Die A2J –span bied dit aan en tree ook op as beoordeellaars. Hulle was briljant.  Daar was so 12 items, maar die ene wat my bybly was die item waar 9 17-jarige seuns ‘n liedjie gesing het wat een van hulle gedurende die week geskryf het en opgedra het aan ‘n vriend wat verlede Sondag sy eie lewe geneem het. Dit was hartroerend.  Meeste van die seuns woon ook dan bedags die lesse by wat deur A2J en tannie Petro van Pretoria aangebied word.

 

Woensdag

Woensdag was net so koud en ons het rerig gedink dit gaan sneeu.  Die hele dag gaan maar oor die uitdeel van die klere, wat ‘n groot voorreg is en baie vreugde verskaf. Dit verg nogals organisasie om al die klere uit te pak en seker te maak dit word redelik regverdig verdeel.  Oral in die dorp het mens die kinders sien stap met hul hopies klere onder die arm en groot glimlagte op die gesigte.

 

Woensdagaand was daar ‘n gesinsaand by die kerk waartydens ons eie Ds. Martin die woord gebring het en daarna was dit die volwassenes se beurt om klere te kry. Baie harte is baie bly gemaak en baie lyfies het verseker warmer gaan slap as gevolg van al die skenkings wat ons namens die Vishoekers kon uitdeel.

 

Van die A2J’ers

Wat vir my uitgestaan het is hoe opgewonde die kinders was om totale vreemdelinge te ontmoet en hoe gou hulle jou vas gryp as jy vir hulle ‘n bietjie liefde en vriendelikheid wys.  Ook hoe almal by A2J soos ‘n groot familie is. – Danial

Die is ‘n wonderlike geleentheid om saam met A2J na Sutherland te gaan. Dit is baie koud en dit is so mooi om te sien dat die kinders van binne af warm word as jy hulle van die Here vertel. – Elmarie

Ek het met groot verwagting die Vrydagoggend opgestaan en glad nie geweet wat om te verwag nie. Opgewonde, maar baie gespanne. Wat vir my rerig lekker was, was die aand van praise and worship. Ek het in my lewe nog nooit die Heilige Gees so ervaar en so aan dinge gedink soos ek nou doen nie.  Ek is so bevoorreg en baie bly ek het gekom. Die kerke hier is entoesiasties oor alles.  Hulle loof en prys die Here met hulle hele hart en siel.  Hier kan ‘n mens die Here voorsien en hulle gee om oor mekaar en hulle naastes! Die kinders hier is net so oulik. Hulle soek net liefde. As ‘n mens hulle hand vas hou is dit asof hulle nie wil los nie.  Die lekkerste – jy kan hulle liefde gee. – Stephanie

Almal van die kleintjies wat vanoggend in my groepie sop gekry het, is daar weg met ‘n, “Dankie, tannie”. – Riana

Hope klere vir oud en jonk. Daar is voorsien deur die gemeenskap van Vishoek, Constantia en Tokai tot in Valhalla. Drukkies van dankbaarheid is uitgedeel en A2J’ers het hulle goed van hul taak gekwyt om die volwassenes soos koninklikes te laat voel. Ons kon weereens jonk en oud help met ‘n paar nuwe items in hul klerekas en is opreg dankbaar vir elkeen se bydrae hieraan. – Annette

 

Allerlei

Die instandhoudingspan het ‘n ou wat pik slaan in skinny jeans laat cool lyk…!

Oom Moses vra die kleintjies (3-6 jaar) met Jona se verhaal, “Wie het vir God kwaad gemaak?”. Gou is die handjie op “Ekke!”

Mickey, ons fotograaf, het self ook ‘n verrassingsdrukkie gekry van een van die kleintjies wat kom dankie sê vir die klere.

Voorbidding

Bid saam met ons –

  1. Dat ons sal luister en doen wat God se wil is in ons verhoudinge: leiers en jeug, jeug en groepies, ons en Christus.
  2. Vir die gesondheid van die span.  Die koue weer en stof in die lug sorg vir ‘n verkoues of seer keel wat pla. Ook vir krag en ‘n goeie gesindheid waar die moegheid beslis begin deurslaan.
  3. Vir koue en warm weer op die regte tyd.  Ons kon die hele dag deur werk sonder probleme met reën, maar die koue kan moeilik wees.
  4. Dankie vir hoe die Heilige Gees A2J toerus om die werk te doen wat hulle doen met die kinders en volwassenes. Om eerlik te wees is ons opleiding ‘n druppel in die emmer; dit is alleen deur Sy leiding.
  5. Vir moed, hoop en liefde vir die werk en geleenthede wat die laaste paar dae van die uitreik voorlê.

 

 

 

 

 

 

Groete,

Sutherland span,

Johann en Heidi

 


NGVishoek: Ds. ( dominee ) Martin Barnard.

Lees Meer >>

Uitreik Sutherland – 29 Junie-30 Junie 2013

 

Saterdagmiddag begin die regpak en skoonmaak en word daar hard ge-oefen aan die aand se konsert, wat ‘n groot sukses was. Ons is vergas deur ‘n internasionale beoordeellaar, Gertjie Appelmoes (of was dit nou Appelkoos?) asook die beeldskone Sannie van Santon en oom Witbooi die derde. Die aand is afgesluit met terugvoer en daartydens almal kon opnoem wat vir hulle uitgestaan het van die week. Dankbaarheid vir dit wat ons het, is telkens genoem en Mariska het selfs voorgeneem om haar ertjies te eet. Tiaan, as een van die nuwelinge, noem hoe almal hom ingetrek het en hoe hy deel voel van die A2J familie. Vir sommige van ons het die eenvoudige dinge diep geraak, soos drukkies van die kinders en hul liefde. Die ouer (Sutherland) meisies noem dat as ons nie volgende jaar terugkom nie, dan sal hulle gaan waar ons ookal is.

 

Dit was “‘n fenomenale Uitreik” (Martin) wat aangepak is met die Koningkryksperspektief, almal het gehelp waar hul ookal benodig was. Daarna het ons saam nagmaal gebruik en dit was werklik baie spesiaal.

 

Sondag het ons maar met groot gesukkel opgestaan. Na stiltetyd is die inpak en skoonmaak voortgesit in alle ywer. Die saamwerk was, soos deurlopend deur die week, net fantasties. Martin het die erediens gelei en sy stem het net-net gehou. Baie het kom groet en hier en daar selfs ‘n geskenkie gebring, wat ongelooflik baie beteken.

 

Die reis terug het goed verloop, behalwe vir Marc se ratkas …

 

Die atmosfeer by die aankoms van die bus was een van gemengde gevoelens: vreugde om familie weer te sien, maar ook definitiewe hartseer oor die Pretorianers wat terug moet gaan en wat ‘n leemte gaan laat, aangesien hulle al so deel van die groep geword het.

 

Vanoggend lees ek dat daar min ervarings is wat meer bevredigend is as om ‘n Godgegewe taak na die beste van jou vermoë te voltooi. Die week maal maar deur ‘n ou se gedagtes – so baie om te verwerk. Daar is egter geen “aftreeplan in die arbeidsveld van God nie” en ons moet bewus bly van waar God aan die werk is sodat ons daar kan aansluit en aanmeld vir ons volgende Godopgelegde takie. Maar miskien nie hierdie week al nie … Heidi

 

Voorbidding

Bid saam met ons –

  1. Dankie aan die Here wat ons kon gebruik om ander te help; hul omstandighede te verander. En so ons verander het.
  2. Dankie vir die gesondheid van die span en bid dat die laaste goggas gou deel van die verlede sal wees.
  3. Bid dat ons, leiers en kinders, sal aanhou om in vertroue op en afhanklikheid van die Here ons beroepe en skoolwerk aan te pak. Om aan te hou om uit te reik na die mense om ons, vriende en vreemdelinge.
  4. Vir Ds. Billy en sy vrou.  Vir opregtigheid in geloof en toewyding in leiding.  Ook vir wysheid.
  5. Vir die gemeente self – dat Christus sal voor loop in die gemeente.  Die Here voeg juis nuwe leiers / mense toe tot die gemeente om dit op te bou.

 

‘n Stukkie wat sê wat ons graag wil sê aan elkeen van die uitreikers, elkeen van julle:

Fil. 1:3-6 “Ek dank my God elke keer as ek aan julle dink. … omdat julle van die eerste dag af tot nou toe saamgewerk het aan die verkondiging van die evangelie. Ek is veral ook daarvan oortuig dat God, wat die goeie werk in julle begin het, dit end-uit sal voer en dit sal voleindig op die dag wanneer Christus Jesus kom.”

 

Groete,

Sutherland span,

Johann en Heidi

 


NGVishoek: Ds. ( dominee ) Martin Barnard.

Lees Meer >>

Bybelse gesinne



Wag op God
Ons verwag dat ons lewens ook so vol wonderwerke moet wees soos dié van die manne en vroue waarvan ons in die Bybel lees, maar natuurlik lees ons nie van hulle alledaagse bestaan nie, want die Boek sou dan te oninteressant wees. Hulle het ook jare lank geleef, sonder dat iets noemenswaardig gebeur het. 
Moses het byvoorbeeld 40 jaar lank skape in die woestyn opgepas voordat die Here in ’n brandende doringbos met hom gepraat het. Die Apostel Paulus het 13 jaar in Arabië deurgebring voordat God hom gebruik het.

Verbrokkelende gesinne
Die moeilikste plek om ’n Christen te wees, is by die huis. Dit is hier waar die samelewing tans die grootste teenslae ervaar – in die huisgesin, waar egskeiding gesinne verbrokkel en waar mishandeling plaasvind. Dit is so ontmoedigend om aanhoudend in die nuus te hoor van bloedskande en verkragting wat tuis, agter geslote deure plaasvind. Ons moet daadwerklik begin bid oor die situasie in die huisgesin. Die enigste manier hoe dit reggestel kan word, is met ons terugkeer na die Woord van God.

Leef in onderdanigheid
Die Bybel is baie duidelik oor hoe ons die verwonde huisgesin moet benader. In Efesiërs 5:21 sê die Here: “Wees uit eerbied vir Christus aan mekaar onder-danig.” Ons het nodig om aan mekaar onderdanig te wees, omdat ons Jesus Christus eerbiedig en gehoorsaam. Daar is niks oor te redekawel nie. In vers 22 staan daar: “Vrouens, wees aan julle mans onderdanig, net soos julle aan die Here onderdanig is.” Dit is nie opsioneel nie, dit is ’n opdrag. Baie van die jong dames wat ek beraad voordat hulle gaan trou, sê dat hulle weier om onderda-nig te wees. As hulle weier om onderdanig te wees, kan God hulle huwelik nie seën nie. 
Ef 5:25 sê: “Mans, julle moet julle vrouens liefhê soos Christus die Kerk liefgehad en Sy lewe daarvoor afgelê het.” Christus het die Kerk so lief gehad dat Hy vir die Kerk gesterf het! As ons bereid is om vir ons vrouens te sterf, weet ek sal ons vrouens ons respekteer en met graagte aan ons onderdanig wees.

Bybelse riglyne
In vers 31 word ons daaraan herinner: “Daarom sal ’n man sy pa en ma verlaat en saam met sy vrou lewe, en hulle twee sal een wees.”Ouers meng te veel in by jong getroude paartjies. Ons moet verstaan dat hulle die probleme op hulle eie moet oplos. Ons moet vir hulle bid. Dit is al. 
Ons moet daar wees met raad as hulle dit nodig het, en slegs as hulle daarvoor vra. Die van ons met jonger kinders moet hulle dissiplineer. Die Woord van God sê wie sy seun nie tugtig nie, het hom nie lief nie; en hoe dikwels sien ek dit nie vandag nie. Ons moet ons kinders lief genoeg hê om hulle die nodige dissipline te gee. 

Wees betrokke
Dit is hartseer om so baie oumense te sien wat verstoot is. Hulle het niks meer om voor te leef nie en niks om voor op te staan nie. Aan die ander kant is dit so verkwikkend om ’n ouer egpaar te sien wat betrokke by familiebyeenkomste is, omring deur hulle kleinkinders. 
Die Bybel is baie duidelik daaroor dat vaders en moeders geëer moet word. Dit is die vyfde gebod, maar dit is die eerste gebod met ’n belofte daarby. Die Woord sê: “Eer jou vader en jou moeder, dan sal jy lank bly woon in die land wat die Here jou God vir jou gee.”

God se plan vir die huwelik
Ons moet terugkeer na die grondbeginsels. Egskeiding is nie iets wat ligtelik opgeneem moet word nie. As jy hierdie artikel lees en jy is reeds geskei, moet jy tot inkeer kom, jy moet dinge regmaak en aangaan met jou lewe. Jy hoef nie onder  ’n wolk van oordeel te leef nie. Onthou, die Here veroordeel nie Sy kinders nie – Hy oortuig jou van sonde. 
Die kortpad is nie die vinnigste pad huis toe nie en om ’n oorhaastige besluit te neem, soos om te skei, is nie altyd die regte uitweg nie. Ons moet deur ons probleme werk, gaan sit en met mekaar praat en die Here se aangesig soek, vergifnis vra en deurdruk.
Ons kan nie ons vrouens dwing om aan ons onderdanig te wees nie; ons kan nie mans dwing om hulle vrouens lief te hê nie – niks kan in die huwelik geforseer word nie. Die Here Jesus Christus is ons Middelaar, Hy is ons Tussenganger en die Bybel is die handboek vir  ’n suksesvolle huwe-
lik. Ons moet terugkeer na Christelike Goddelike waardes sodat ons huwelike  ’n voorbeeld van die manier waarop God wil hê ons moet leef vir die wêreld kan wees.

Die gesin kry voorkeur
Ons moet ons gesin voor enige iets anders plaas. Dit moet voor ons werk, voor ons sport en selfs voor ons bediening kom. Die Here seën jou terwyl jy in die bres tree vir huisgesinne. Laat ons hierin volhard tot Jesus se wederkoms.

 

Bron:  juig.co.za

NGVishoek: Ds. ( dominee ) Martin Barnard.

Lees Meer >>

Die Bybel in ‘n neutedop


’n Oorsig
Uittog (Eksodus 1-18) – Verlossing
Wet (19-24) – Gehoorsaamheid
Tabernakel (25-40) – Aanbidding

Christelike pelgrimstog
Ons sien deurgaans in die boek Eksodus ’n sinnebeeld van die Christelike lewe, uitgebeeld in die pelgrimstog van Israel:
• Die Egiptiese slawerny: slawerny van sonde
• Moses as verlosser: ’n tipe Christus
• Die uittog: verteenwoordigend van die 
afstanddoen van sonde
• Die Paaslam (1 Kor 5:7): ’n Christus-voorbeeld, die Lam van God
• Die oopgaan van die Rooisee: God skep ’n uitweg
• Farao se agternajaag van Israel: tekenend van die bose wat die gelowige najaag
• Die vuurpilaar en wolkpilaar: God se teenwoordigheid en leiding van gelowiges
• Mara: bitter ervarings
• Die boom wat Mara soet gemaak het: Die Kruis
• Elim: soet ervarings
• Die manna (1 Kor 10:3): die Brood van die lewe
• Die kwartels: God se voorsiening
• Die water uit die rots (1 Kor 10:4): die lewende water van Christus
• Moses se opgehefde hande: gebed
• Die reis uit Egipte na Kanaän: ons dissipelskapsreis van die vleeslike na die geestelike lewe
• Verlaat Egipte vir die Beloofde Land: verlaat die slawerny van sonde na vryheid
• Bevryding van slawerny: Bevryding van slawerny tot die sonde
• Loop deur die Rooisee: doping
• Moses as profeet, leier, gewer van die Wet: ’n skadubeeld van Jesus as Profeet, Priester en Koning
• Moses gee die Wet: Jesus die Nuwe Verbond
• Om die manna te kry, moes die gelowiges vroeg opstaan om dit bymekaar te maak (voordat dit bederf). Hulle moes op hulle knieë gaan om dit te ontvang. Hulle moes dit daagliks doen. Dus is die manna in die wildernis ’n simbool van ons godsdienstige lewe. 
• Moses en die Wet kon dit nie haal om die land in besit te neem nie. Jesus (Joshua) het oorwin en die Beloofde Land binnegegaan.

Die name van God in Eksodus
Jahweh SHALOM: die Here is vrede
Jahweh NISSI: Die Here my banier / vaandel
Jahweh JIREH: Die Here wat voorsien
Jahweh RAPHEKA: Die Here wat genees
Jahweh ZEBAOTH: Die Here van die Leërskare
Jahweh EOYAN: Die Here die almagtige 
Jahweh ROE: Die Here my herder
Jahweh ZIDKENU: Die Here ons geregtigheid
Jahweh MEHADDISHKEN: Die Here wat heilig maak
Jahweh SHAMMAH: Die Here wat daar is, God is teenwoordig
EL-SHADDAI: God almagtig
EL ELYON: Die allerhoogste God
EL OLAN: Die ewige God 
EL BETHEL: Die God van vrede 
EL ROI: Die God wat sien wat gebeur 
EL ELOHE YISAIEL: God, die God van Israel
YHWH: Jahweh – Jehova – die Here God “Ek is”

“Jy mag die Naam van die Here jou God nie misbruik nie, want die Here sal die een wat Sy naam misbruik, nie ongestraf laat bly nie.”Eks 20:7

Die 10 plae
’n Teken van oordeel
Die Tien Plae wat Farao gedwing het om Israel te laat gaan, was ’n oordeel oor die vals godsdienste en afgodery van Egipte 
(Eksodus 7:4-5). God beskryf die plae as ’n oordeel wat oor “al die Egiptiese gode” gevel is (Eksodus 12:12).
1.   Toe die Here die water van die Nyl in bloed verander het, was dit ’n oordeel oor die god van die Nyl, wat die Egiptenare aanbid het
2.   Die paddaplaag was ’n oordeel oor die paddagode: Hapi en Heket
3.   Die luisplaag was ’n oordeel oor Seb
4.   Die vlieëplaag was ’n oordeel oor Scaralaeus
5.   Die pes onder die vee was ’n oordeel oor Apis
6.   Die plaag van swere was ’n oordeel oor Typhon
7.   Die hael en vuur was ’n oordeel oor Shu
8.   Die sprinkaanplaag was ’n oordeel oor Serapis
9.   Die duisternis was ’n oordeel oor Ra, die Songod
10. Die dood van die eersgeborenes, insluitende die seun van Farao, was ’n oordeel oor Farao wat as ’n god aanbid is.

Die Tien Plae het die krag van die Here God oor al die kragte van die natuur, Farao, Egipte en al hulle vals gode, openbaar.

Die Wet
vers 1-4: Ons verantwoordelikheid teenoor God
vers 5: Ons verantwoordelikheid teenoor ons ouers
vers 6-10: Ons verantwoordelikheid teenoor ander mense
“Ons was dus onder die toesig van die wet totdat Christus sou kom sodat ons deur te glo, vrygespreek sou word.” Gal 3:24.

Dekaloog (Tien gebooie):
• Respek vir God
• Respek vir mense
• Respek vir eiendom
“Die Woord van die Here is volmaak: dit gee lewe.” Psalm 19:8.

Drie gedeeltes van die Wet:
1. Sedewet – Die Tien Gebooie (Eksodus 20)
2. Burgerlike wet – Sosiale verhoudings en regulasies (Eksodus 21-24)
3. Seremoniële wet – Voorskrifte vir aanbidding (Eksodus 25-40).

Volkome verlossing in Eksodus:
• God het die Hebreërs teen die oordeel van die plae beskerm
• God het Sy volk verlos van die dood deur die bloed van die Lam
• God het Sy volk uit slawerny bevry
• God het Israel van Farao en sy strydwaens gered
• God het die Israeliete van hongersnood gered deur manna, water en kwartels te voorsien
• God het Israel teen die vyandige leërmagte beskerm
• God het die Israeliete van hulle self verlos deur hulle te dissiplineer, reinig, suiwer en voor te berei vir aanbidding en diens

“Julle het gesien wat Ek aan Egipte gedoen het, en hoe Ek julle soos op arendsvlerke veilig gedra en na My toe gebring het. As julle My gehoorsaam en julle aan My verbond hou, sal julle uit al die volke My eiendom wees, ’n koninkryk wat My as priesters dien, en ’n gewyde nasie.”
Eksodus 19:4-6.

 

Bron:  juig.co.za

NGVishoek: Ds. ( dominee ) Martin Barnard.

Lees Meer >>

Hoe vergewe God my sondes?

2.   Tweedens hoe gou vergewe God ons sondes?

Jesus het vir die sondes van die hele wêreld oor alle tye gesterf en die straf op die sonde gedra (vgl. Joh 1:29; Rom.5:18-19). Dit kon Hy doen omdat Hy God is. ‘n Gewone mens kan nie ons straf op die sonde namens ons dra nie, dit kan God alleen doen. Joh 3:16 sê: God  het die wêreld so liefgehad dat Hy sy enigste Seun gegee het, sodat dié wat in Hom glo, nie verlore sal gaan  nie, maar die ewige lewe sal hê. Joh 3:36 verduidelik: Wie in die Seun glo, het die ewige lewe; wie egter aan die Seun ongehoorsaam is, sal die lewe nie sien nie, maar die straf van God bly op hom.

 

Hoe gou? Jesus het in die bergrede geleer om tot Ons Vader te bid: vergeef ons ons oortredings soos ons ook dié vergewe wat teen ons oortree….As julle ander mense hulle oortredings vergewe, sal julle hemelse Vader julle ook vergewe. Maar as julle ander mense nie vergewe nie, sal julle hemelse Vader julle ook nie julle oortredings vergewe nie (Mat. 6:12,14-15).

 

3.    My vrou glo vas dat jy ‘n sondaar gebore is en jy bly ‘n sondaar tot jy doodgaan.

Volgens Rom. 5:12-21 is die ganse menslike geslag saam met Adam sondaars (vgl. v19), en almal aan God se oordeel en straf van die dood onderworpe. Maar almal wat aan Christus behoort, deur in Hom te glo (vgl. Rom 4:23-25), word vrygespreek, hulle verhouding tot God word reggestel, en hulle word deel van die ewige lewe (vgl. 5:21). As kinders van Adam is ons sondaars. As volgelinge van Christus is ons vrygespreekte sondaars.

 

Maar dit vereis van ons om daagliks te reken dat ons aan Christus verbonde is, aan sy dood vir die sonde; daarom  moet ons ook vir die sonde dood wees, ‘nee’ sê vir versoekings en vir onsself. Jesus het opgestaan uit die dood en lewe vir God, so moet ons opstaan tot ‘n  nuwe lewe saam met Christus, om met sy liefde en sy krag, vir God en vir ander te lewe (vgl. Rom 6:1-14). Daarvoor het God self deur die Heilige Gees in ons kom woon, om ons daagliks te lei deur die woord van God, en vir ons te laat lewe uit die liefde van God vir ander (vgl. Rom 8:1-17).

 

1 Joh 1:8 sê ongeveer dieselfde: As ons beweer dat ons geen sonde het nie, bedrieg ons onsself en is die waarheid nie in ons nie. Vers 10 brei daarop uit: As ons beweer dat ons nie gesondig het nie, maak ons Hom tot leuenaar en is sy woord  nie in ons nie. Verse 7 en 9 het die goeie nuus: As ons in die lig lewe soos Hy(God) in die lig is, het ons met mekaar deel aan dieselfde gemeenskap en reinig die bloed van Jesus, sy Seun, ons van elke sonde… Maar as ons ons sondes bely – Hy is getrou en regverdig. Hy vergewe ons sondes en reinig ons van alle ongeregtigheid.

 

 

In Romeine 7 spook Paulus met dieselfde probleem: Die goeie wat ek wil doen, doen ek nie; maar die slegte wat ek nie wil doen nie, dit doen ek (v19)…. Ek, ellendige mens! Wie sal my van hierdie doodsbestaan verlos? Aan God die dank! Hy doen dit deur Jesus Christus ons Here (7:24-25). Ons grootste stryd is met onsself – ons lewe eintlik elkeen vir homself in plaas van vir God en vir ons medemens. In Filippense 2:3-11 sê Paulus: Moet niks uit selfsug of eersug doen nie, maar in nederigheid moet die een die ander hoër ag as homself. Julle moet nie net elkeen aan sy eie belange dink nie, maar ook aan dié van ander. Dieselfde gesindheid moet in julle wees wat daar ook in Christus was. Hy het die heerlikheid van God gehad, maar het homself verneder deur mens te word, en vir ons ons aan ‘n kruis te kom sterf het. 2 Kor 3:18 sê dat dit juis die werk van die Heilige Gees in ons is, om ons al meer te verander om soos Christus te word. Jesus het gesê ons, as kinders van God, moet volmaak wees soos God, ons Vader, deur ons vyande lief te hê (Matteus 5:43-48).

 

 

Terwyl ons reeds kinders van God is wat deel het aan die ewige lewe, bly ons sondige mense wat daagliks van God afhanklik is om deur sy genade al meer soos Christus te word, deur God lief te hê met ons hele lewe, en ons medemens soos ons self (Matt 22:37-40; Joh.13:33-34; 1 Kor 13; 1 Joh4:7-21). Hebreërs 5:8 sê dat Jesus, hoewel Hy die Seun van God was en sonder sonde (vgl. Hebr 4:15), het Hy deur alles wat Hy gely het, geleer wat gehoorsaamheid is. So moet ons, sondaars, gehoorsaamheid leer, en gewillig wees om saam met Jesus te ly en deel te wees van sy heerlikheid (Rom.8:17).

 

4.    Daar was net een Christen op die aarde en dit was Jesus

Christene is gelowige volgelinge van Christus (Hand 11:26), in wie die Gees van God kom woon het om ons te oortuig van ons sonde, ons te lei tot geloof in Christus om die verhouding tussen ons en God reg te maak, en van ons kinders van God te maak (Joh 16:8-9; Rom 8:15).

 

NGVishoek: Ds. ( dominee ) Martin Barnard.

Lees Meer >>