Luk 16:10-13
“Wie in die kleinste dinge betroubaar is, is ook in die groot dinge betroubaar; en wie in die kleinste dinge oneerlik is, is ook in groot dinge oneerlik. As julle dan nie betroubaar is in die hantering van die oneerlike mammon nie, wie sal die ware rykdom aan julle toevertrou? As julle met ‘n ander man se goed nie betroubaar is nie, wie sal dan iets aan julle gee om as julle eie te besit? “Geen huisbediende kan vir twee base tegelyk werk nie, want hy sal óf die een minder ag en die ander een hoër, óf vir die een meer oorhê en die ander een afskeep. Julle kan nie God én Mammon dien nie.”
Kom ons praat oor geld, maar onthou: te veel geld, of ‘n gebrek aan geld kwalifiseer of diskwalifiseer geen mens van die hemel nie. Daar is niks fout met geld nie, daar is soms fout met ons en hoe ons met geld omgaan.
Ek ken ‘n man, as hy begin praat, dan gaan dit ALTYD oor geld. Sonder uitsondering. Hy het hierdie en daardie gekoop, soveel betaal, soveel ge-“score”, so ‘n wins afgedwing, soveel beding, ens. Boonop voel hy altyd so goed as hy die ander persoon as’t ware ingedoen het … dan is hy trots daarop en vertel dit met smaak oor. Altyd geld, geld, geld, tot vervelens toe. Dit laat my aan die volgende teks dink:
Spr 20:14
“Sleg! Sleg!” sê die koper, maar as hy weg is, spog hy met sy winskopie
Wanneer die Here in die Bybel oor geld praat, is dit hoofsaaklik negatief. Miskien is dit juis omdat dit vir so baie mense ‘n probleem is. Ek kom terug na my vrae van vroeër:
Gebed oor lotto:
Hoe sou dié gebed wees: Here, ek het tans ‘n groot geldnood. U weet dit. U is ook ‘n God wat wil hê dat dit moet goed gaan met U kinders. Here, ek gaan nou geld neem wat ek nie kan bekostig nie, en ‘n paar lotto kaartjies koop. Vader, U weet hoe werk die lotto, U weet dat ek net ‘n een uit 14 miljoen kans het om te wen. Gaan dus nou asb oor die hele land, en neem die geld wat duisende mense met ‘n valse hoop om die lotto spandeer het, geld wat dalk brood uit honderde kindertjies se monde gevat het. Neem nou daardie geld, koppel dit aan my nommer, en gee dit asb vir my, want ek wil graag ‘n lekker vakansie gaan hou.
Koop jy soms skelm? Gewoonlik is dit dan ook met geld wat jy nie het nie. Sit jy jou man, of jou huishouding, onder geweldige finansiële stres? Lê jou eggenoot wakker oor jou koopdrange? Pleeg jy dalk self-bedrog? Is jy altyd ontevrede en wil altyd meer en beter hê? Dryf ander mense se welvaart jou tot armoede? Sit jy dalk jou huwelik op die spel daarvoor?
Het jy dalk al sover gegaan en geld geneem by die werk? Oppas, jy gaan uitgevang word, en dan sal tronkstraf jou voorland word.
Kom ons kyk wat die Bybel oor die onderwerp sê; hier volg ‘n klompie toepaslike skrifgedeeltes:
Pred 5:9
Die mens vir wie geld alles is, het nooit genoeg geld nie; die mens vir wie rykdom alles is, kry nooit genoeg in nie.
1 Tim 6:10
Geldgierigheid is ‘n wortel van allerlei kwaad. Party het geld nagejaag en toe van die geloof afgedwaal; daardeur het hulle hulleself baie ellende op die hals gehaal.
Spr 17:16
Watter nut het dit as ‘n dwaas geld in die hand het om wysheid te koop en hy het nie verstand nie?
Pred 5:12
Ek het in hierdie wêreld ‘n bitter swaar ding gesien: dat ‘n man rykdom opgaar en dit vir hom ellende bring.
Spr 11:28
Wie op sy rykdom staatmaak, kom tot ‘n val; wie reg doen, floreer soos groen blare aan ‘n boom.
Spr 23:5
Jy het nog skaars die rykdom gesmaak of dit is weg; dit kry vlerke en vlieg die lug in soos ‘n arend.
Spr 27:24
Rykdom hou nie vir altyd nie; selfs koninklike mag is nie blywend nie.
Spr 28:8
Wie groot rykdom versamel deur mense uit te buit, versamel dit vir iemand wat hom oor arm mense sal ontferm.
Ek moet sê ek ken baie mense wat regtig welaf is, wat hulle geld en welvaart baie oordeelkundig aanwend, wat nie toelaat dat dit hulle lewe oorheers nie; hulle vertrou steeds altyd op die Here. Daar is ook wel mense wat optree asof die Here se versorging oorbodig raak omdat hulle geld alles vir hulle kan koop en doen. Ek het ook al welaf mense gesien wat in ‘n kort tydjie alles verloor.
Wat is die slotsom?
Diegene wat wysheid en nederigheid het, kan rykdom hanteer:
Spr 22:4
Wie nederig is, dien die Here en ontvang rykdom, eer en lewe.
Spr 15:6
In die huis van die regverdige is daar groot rykdom; die inkomste van die goddelose is vir hom tot nadeel.
Spr 3:16
Die wysheid gee met die een hand ‘n lang lewe en met die ander rykdom en eer.
Spr 10:22
Dit is die seën van die Here wat rykdom bring; jou geswoeg laat dit nie meer word nie.
Spr 14:24
Wyse mense word bekroon met rykdom; die dwaasheid van dwase mense lei na meer dwaasheid.
Spr 13:25
Die regverdige het meer as genoeg om te eet; goddelose mense bly honger.
Moenie bid om die lotto te wen nie – ek glo dit is verkeerd. Bid gereeld vir wysheid, oor hoe om oordeelkundig met geld te werk. Bid teen enige vorm van gierigheid of jaloesie op die besittings van ander. Bid dat die Here jou sal leer om tevrede te wees met wat jy het. Bid dat die Here jou nood sal verlig waar dit buite jou beheer is. En ja, dis sekerlik nie verkeerd om te vra vir bietjie “jam” op die brood nie. Bid vir perspektief op rykdom en besittings. Bid vir ietsie ekstra om vir ander uit te deel.
Bid Spr 30:7-9
Net twee dinge vra ek van U; moet my dit tog nie weier nie; daarna kan ek sterf: moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het, sodat ek nie te veel het en U verloën en sê: “Wie is die Here?” nie, en sodat ek nie arm word en steel en my God se Naam oneer aandoen nie.
Bron: heuning.co.za
Die verswakking van die Christendom in Europa en Noord-Amerika tel in die guns van Islam omdat daar in die tradisioneel Christelike wêreld feitlik geen weerstand teen hulle gebied word nie. Dit het trouens ‘n nuwe modegier by Westerlinge geword om tot die geledere van hierdie geloof toe te tree. Terwyl die Christendom as ‘n hol boomstam beskryf word wat besig om te verbrokkel en dood te gaan, word Islam as ‘n lewenskragtige, alternatiewe manier voorgehou om dieselfde Skeppergod te aanbid en die hele wêreld aan Hom dienstig te maak.
Baie mense voel tot Islam aangetrokke omdat dié geloof streng morele norme het – anders as vervallende Christelike kerke wat só permissief en beginselloos is dat hulle drankgebruik, buite-egtelike verhoudings, homoseksualisme en ander immorele dade oogluikend toelaat. Baie Westerse vroue is selfs bereid om die minderwaardige sosiale rol te aanvaar wat deur Islam aan hulle voorgeskryf word, net om weer geborgenheid en vaste riglyne in die lewe te hê.
Die saak is egter nie só eenvoudig nie, want daar is ‘n baie donker en onheilspellende einddoel met Islam se opmars na wêreldheerskappy. Met sy oorsprong en sterk ondersteuningsbasis in die Midde-Ooste is Islam goed geposisioneer om ‘n geweldige aanslag op die Christendom en Judaïsme te loods, wat ook hulle oorsprong in die Midde-Ooste het. Dit is juis Islam se doel om die Christendom en Judaïsme as verouderde, valse of uitgediende monoteïstiese gelowe te brandmerk en deur Islam en die Koran as “die finale openbaring van Allah” te vervang.
Leerstellings
Mohammed het gesê: “Daar is geen God behalwe Allah nie, en Mohammed is sy profeet.” Dit is die basiese Moslem geloofsbelydenis wat as die Kalima bekend staan en hardop uitgespreek moet word. Hierbenewens moet gebede vyf keer per dag gedoen word, bydraes moet vir die uitbreiding van Islam gemaak word, daar moet in die maand Ramadan gevas word en ‘n pelgrimstog na Mekka moet ten minste een keer in ‘n persoon se lewe onderneem word. In die verskillende Moslem sektes is daar ekstremistiese groepe wat baie sterk op die verbintenis tot ‘n heilige oorlog (jihad) staan as ‘n metode om alle mense aan die gesag van Allah te onderwerp.
Die begrip Allah wat in die Koran gebruik word, is ‘n generiese term wat God beteken. Volgens die Koran se eie beskrywing is dit nie die Drie-enige God van die Bybel nie, omdat die Moslems se Allah nie ‘n Seun het wat God die Seun genoem word, of ‘n Heilige Gees wat God die Heilige Geesgenoem word nie. Hulle ontken heftig die seunskap, messiasskap en godheid van Jesus Christus, asook die heilsbetekenis van sy kruisdood. Die Bybel sê: “Wie is die leuenaar, behalwe hy wat ontken dat Jesus die Christus is? Dit is die Antichris wat die Vader en die Seun loën. Elkeen wat die Seun loën, het ook nie die Vader nie” (1 Joh. 2:22-23).
Ideologiese dryfkrag vir radikalisme
Die ideologiese dryfkrag agter die terreurveldtog teen Israel, Amerika en hulle bondgenote is duidelik in die Moslem-geloof self geleë. Hierdie geloof genereer sterk revolusionêre, anti-kapitalistiese, anti-Christelike en veral anti-Joodse gesindhede. In sy boek, Muslim Society (1983) sê prof. E. Gellner: “Van al die wêreldgodsdienste blyk dit dat Islam die grootste politieke ondersteuning in die 20ste eeu geniet. Dit onderskraag ‘n aantal regerings wat geweldig tradisioneel en konserwatief is, maar is ook in staat om intense revolusionêre gesindhede op te wek en met uiterste radikalisme te verenig. As ‘n middel vir politieke mobilisasie het Islam Marxisme verbygesteek, asook alle ander godsdienste.”
In ‘n artikel “A religion that sanctions violence” sê Patric Sookhdeo, direkteur van die Londense Sentrum vir die Studie van Islam en die Christendom, die volgende in die “Daily Telegraph” van 17 September 2001, pas ná die verwoestende 9/11 aanvalle op Amerika:
“Die teenstrydige reaksies op die terroriste-aanvalle is ‘n aanduiding dat Islam nie altyd ‘n godsdiens van vrede is nie. Daar is so baie Moslems wat hulle in die tragiese verlies aan Amerikaanse lewens en in die vernedering van die Amerikaanse regering verbly, dat hulle nie bloot as ‘n klompie ekstremiste beskryf kan word nie. In Sura 9:5 van die Koran staan daar: ‘Beveg en verslaan die heidene waar julle hulle ook al kry. Neem hulle gevange, beleër hulle en lê hulle met enige vorm van krygslis voor.’
“In die Moslem-geloof word die Koran as die Woord van God beskou, wat op alle mense van alle tye en plekke van toepassing is. Moord word nie verbied nie. Dit was juis deur militêre verowering dat Islam uitgebrei is. Die ontwikkeling van Islam se sharia-wette het gemeenskappe tot gevolg waarin nie-Moslems as tweederangse burgers beskou word omdat hulle deur verskeie wette verneder word. Diegene wat hulleself uit Islam na ander gelowe bekeer, word doodgemaak. Dit is ‘n gebruik wat nou nog in lande soos Afghanistan, Iran, Saoedi-Arabië en Indonesië gevolg word. Sura 5:85 verwys na vyandskap tussen Moslems en nie-Moslems: ‘Die ergste vyandskap teen die [Moslem] gelowige kom van die Jode en die heidene af.’
“Die aanval op die Wêreldhandelsentrum kan nie as die werk van ‘n klein groep ekstremiste afgemaak word nie. Baie Moslems in die wêreld het hierdie ramp in Amerika gevier in die lig van die Koran se oproep: ‘Beveg ‘n magtige nasie; veg teen hulle totdat hulle die geloof van Islam aanneem.’ Hoewel daar gematigde elemente in Islam is, word die uitbreiding van hierdie godsdiens deur die ekstremiste bepaal – dikwels met tragiese gevolge. Vir hulle is daar geen vriendskap met nie-Moslems nie. In Sura 5:56 van die Koran staan daar: “o Gelowiges, moenie vriende maak met die Jode of Christene nie. Hulle is net vriende van mekaar. As enigeen van julle hulle vriende word, sal julle net soos hulle word! Allah sal nie boosdoeners lei nie.”
Valse fondament
In ‘n boek, Behind the Veil – Unmasking Islam, word die teenstrydighede in die Koran en die immorele lewens van Mohammed en sy metgeselle beskryf. Die boek is anoniem gepubliseer om die outeurs te beskerm. Hierdie boek word só bekendgestel: “Die tyd het gekom om die vinnig groeiende, wêreldwye godsdiens van Islam te ontmasker. Ons Moslem vriende moet van die misleiding daarvan verlos word en tot die kennis van ons Verlosser, Jesus Christus, en sy reddende genade kom. Baie mense is onbewus van wat Islam alles behels. Die boek is nie net aan Moslems opgedra om hulle tot ander insigte te bring nie, maar ook aan alle Europeërs en Amerikaners wat hulle tot Islam bekeer het, om Islam se oorsprong en wortels aan hulle te toon.”
Die boek bied dokumentêre feite oor gewelddadigheid en die ontkenning van menseregte deur Islam aan, en sê: “Alle Moslem kenners en historici stem saam dat mense wat die Moslem geloof laat vaar en hulle na ander gelowe bekeer, of na geen geloof nie, volgens Islamitiese wet tot die dood veroordeel moet word indien hulle nie binne ‘n paar dae na Islam terugkeer nie. So het Mohammed gesê, asook al sy opvolgers (die kalifs). Die eerste deel van die boek handel oor menseregte – regte wat nie in Islam bestaan nie. Ons sal duidelik sien hoedat Mohammed die Arabiere deur die swaard gedwing het om Islam te aanvaar, soos wat dit duidelik in die Koran beskryf word. Mohammed en sy opvolgers het aan die omringende nasies net drie opsies voorgehou: aanvaar Islam, betaal tribuut, of word doodgemaak.”
Die tweede afdeling van die boek toon aan dat Islam nie ‘n godsdiens van gelykheid en sosiale geregtigheid is nie. Dit is ‘n godsdiens van ongelykheid tussen mans en vroue, Moslems en nie-Moslems, en selfs tussen ‘n man en sy broer. Die status van vroue is baie laag. Islam glo ook in slawerny. Mohammed het dosyne slawe gehad. Hy was ‘n slawehandelaar wat slawe gekoop, verkoop en uitgehuur het, selfs nadat hy daarop aanspraak gemaak het om ‘n profeet te wees. Mohammed was ook baie wreed: hy het gevangenes met vuur gemartel voordat hy hulle doodgemaak en hulle vrouens as slavinne of vrouens vir homself en sy manskappe geneem het. Hy het ook geen kritiek verduur nie en sy kritici summier om die lewe laat bring.
Ná Mohammed se dood het sy opvolgers in bloedige, barbaarse oorloë om die posisie van leierskap teen mekaar geveg. Die profeet se intiemste vriende en familielede het mekaar gehaat en genadeloos om die lewe gebring. Geen wonder nie dat Moslems vandag nog mekaar haat en bloedige oorloë teen mekaar voer. Dié vyandigheid spruit uit die hart van Islam se leerstellings, aangesien dit bepaal dat alle verkeerde dade deur geweld beveg moet word, aldus Behind the Veil.
Interne verdeeldheid
Daar is groot interne verdeeldheid onder die Moslems. Die volgende is die belangrikste groepe:
Soenniete. Byna 90% van alle Moslems is Soenniete. Sunnah beteken Tradisie en verwys na die feit dat hierdie groep ‘n versameling tradisies (die hadiths) het wat volle erkenning op dieselfde vlak as die Koran geniet. Hulle erken al die kalifs wat as opvolgers van Mohammed heersers in die Moslem wêreld was, terwyl die Sjiïete die eerste drie kalifs as indringers beskou wat wederregtelik hulle posisies verkry het, en wie se leerstellings ook verwerp word. Daar is ‘n bitter stryd tussen verskillende faksies Moslems. Soms brand een groep selfs die moskees van ‘n ander groep af. Daar is ook verskillende subgroepe onder die Soenniete, soos die ekstatiese Soefies, die puritynse Wahabiete en die Salafias. Die Soefi Moslems het ‘n mistiese geloofsvorm ontwikkel, wat op ‘n persoonlike ervaring van Allah deur middel van meditasie gebaseer is. Die ander groepe Soennies is meer op die handhawing van Islamitiese beginsels in die samelewing gesteld. Die Wahabiete is ‘n fundamentalistiese beweging wat sterk op beginsels staan en teen sekulêre hervormings gekant is. ‘n Deel van Irak se inwoners – dié deel wat onder Saddam Hoesein se leiding die land beheer het, is Soenniete. As gevolg hiervan is die Sjiïete in Irak onderdruk, en het Saddam Hoesein ook vir agt jaar lank teen die Sjiïties-oorheerste Iran geveg. Osama bin Laden se Al-Qaida beweging assosieer sterk met die Soennie Moslems se interne magstryd teen die Sjiïete én teen Islam se eksterne vyande. Op 11 September vanjaar toe die 9/11 aanval op Amerika herdenk is, het die Al-Qaida leier in Irak, Al-Zarqawi, die jihad-vegters in Irak aangespoor om die stryd teen hulle drieledige vyand, Amerika, die Koerde en die Sjiïete, voort te sit. Hy het hierdie drie groepe ‘n sataniese bondgenootskap van goddeloosheid en misleiding genoem. Die Moslem Broederskap van Egipte het ‘n groot rol gespeel om Islamitiese ekstremisme te bevorder. Die Palestynse Hamas beweging wat in Gaza gestig is, is een van hulle uitlopers. Die onderleier van Al-Qaida, Ayman al-Zawahiri, was ook ‘n lid van die Moslem Broederskap voordat hy by die Egiptiese Islamitiese Jihad-beweging aangesluit het.
Sjiïete. Hulle verwerp die opvolgers van Mohammed en beweer dat Mohammed se neef, Shiat Ali, wat met die profeet se mees geliefde dogter, Fatima, getroud was en die vader van sy mees geliefde kleinseuns was, hom eintlik moes opgevolg het. Hulle het hoë agting vir afstammelinge van Ali, beskou hulle as belangrike geestelike leiers (imams) en besoek ook gereeld hulle grafte, soos bv. in Najaf in Irak. Iran het ‘n Sjiïtiese staatsgodsdiens.
Toenemende geweld
Moderne terrorisme het onder radikale Moslems ontstaan wat ‘n heilige oorlog (jihad) teen Israel en sy Christen bondgenote verklaar het. Sedert Israel se herstel as ‘n onafhanklike staat in 1948, het die Joodse staat se Arabiese Moslem bure verskeie kere probeer om Israel in konvensionele oorloë te oorwin, uit hulle land te verdryf en daarvan ‘n Palestynse Moslem staat te maak. Die laaste konvensionele oorlog teen Israel was in 1982. Sedertdien het hulle van strategie verander en na ‘n binnelandse terreurstryd, die sg. Intifada, oorgeskakel. Selfmoord-bomaanvalle is die belangrikste wapen wat teen Israel gebruik word. ‘n Jihad is ook teen Amerika verklaar omdat hulle Israel ondersteun en bewapen en dus vir sy voortgesette aggressie teen die Moslems verantwoordelik gehou word. Onder radikale Moslems staan Israel as die “Satan” en Amerika as die “groot Satan” bekend. Ná die Golf-oorlog in 1991 teen ‘n Moslem staat, Irak, het die jihadiste ook oorlog teen ander Westerse lande verklaar, maar veral ‘n verskerpte stryd teen Amerika.
Hierdie veldtog het na die groot terreuraanval van 11 September 2001 teen Amerika gelei. Hierna het die terreurstryd aansienlik verdiep. Amerika het eers Afghanistan ingeval in ‘n poging om Osama bin Laden se Al Qaida-netwerk uit te wis, en daarna teen Irak oorlog verklaar om wapens van massa-vernietiging op te spoor en te vernietig. Die vyandigheid en spanning tussen radikale Moslems en hulle vyande in Israel, Amerika en ander Westerse lande is hierdeur aansienlik verhoog. Selfs voormalige bondgenote van Amerika, soos Saoedi-Arabië, het nou ook teen Amerika begin draai.
Intussen eskaleer die jihad in die Midde-Ooste vinnig. Irak is ‘n kookpot van anti-Amerikaanse slagspreuke en terreur-aanvalle, terwyl godsdienstige sentimente in ander Arabiese lande sterk anti-Amerikaans is. Op 24 Mei vanjaar is die volgende vraag op kanaal 1 van die Saoedi TV aan sheik dr. Ahmad Abd Al-Latif, ‘n professor aan die Um Al-Qura Universiteit in dié land gestel: “Sekere imams (Moslem predikers) vra vir Allah om die Jode en hulle Christelike ondersteuners uit te wis. Is dit volgens Islamitiese wet toelaatbaar om so-iets te vra?” Die professor het geantwoord: “Die imams het die Jode vervloek omdat hulle onderdrukkers is. Dieselfde geld vir die Christene omdat hulle wrede aggressie teen Islamitiese lande pleeg, met die oog daarop om Islam skade aan te doen. Dit is waarom dit vir ‘n Moslem toelaatbaar is om die Joodse en Christelike onderdrukkers te vervloek en Allah te vra om hulle te verdelg.” In ‘n ander uitsending het Al-Munajid gesê: “Die Islamitiese volk word deur die dwase dade van die Jode en Christene gemobiliseer. Die groot ontploffing sal kom, en niks kan dit keer nie!”
Palestynse godsdiensleiers in Israel propageer ook hierdie militante strategie. In September vanjaar het twee van hulle oor die Palestynse Televisiediens gesê dat daar ‘n massaslagting van Jode moet plaasvind. Hulle het gesê dat dit ‘n noodsaaklike gebeurtenis in die geskiedenis is en dat dit vinnig uitgevoer moet word. Die twee geestelike leiers het dieselfde hadith (Islamitiese tradisie) wat na Mohammed herlei word, as regverdiging vir hulle voorstel aangehaal.
Daar is ook in Iran ‘n sterk versetaksie teen die Amerikaans-Britse oorheersing van die wêreld, asook teen hulle imperialistiese bondgenoot in die Midde-Ooste, nl. Israel. Verskeie hooggeplaaste persone in Iran is van mening dat Amerika of Israel ‘n aanval op Iran beplan, en stel nou voor dat Iran ‘n voorspring-aanval op Israel, Amerika en ander Westerse lande moet doen. Iran beskik oor gesofistikeerde ballistiese missiele wat ook met kernplofkoppe toegerus kan word. Kerntegnologie word met Noord-Korea en Sjina uitgeruil. Hulle groot militêre slaankrag maak die revolusionêre Iranse leiers baie uitdagend. Hulle leier, Ajatolla Ali Khamenei, is in Mei deur ‘n koerant in sy land aangehaal toe hy na die vernietiging van Amerika verwys het. Hy het gesê: “Die wêreld sal die verwoesting van hierdie arrogante moondheid aanskou.” ‘n Ander ajatolla, Ahmad Jannati, het op 4 Junie op Iranse televisie gesê: “Elke Moslem en elke eerbare nie-Moslem moet verenig staan in hulle stryd teen die Amerikaners, die Engelse en die Israeli’s, en hulle belange oral in gevaar stel.” In ‘n hoofartikel van ‘n regeringsgesinde koerant in Iran is op 6 Julie gesê daar is ‘n groot moontlikheid dat die Wit Huis se 80 jaar van eksklusiewe regering in 80 sekondes van hel tot ‘n ashoop kan verbrand.”
Die groot weerstand wat Amerika in Irak, die Moslem wêreld én uit baie ander lande ervaar, skep ‘n politieke onwilligheid by hulle om Iran, Sirië, Noord-Korea en ander lande in te val wat wapens van massa-vernietiging vervaardig en ook internasionale terrorisme aktief ondersteun. Dit spel die einde van die Amerikaanse oorheersing van die wêreld uit, en sal spoedig ‘n magsvakuum in die Midde-Ooste laat ontstaan wat net deur die Europese Unie en die Verenigde Nasies gevul kan word. Hierdie twee magsblokke is redelik negatief teenoor Israel, en sal die Joodse staat nie in ‘n toekomstige Arabiese oorlog teen hulle ondersteun nie. Oorloë en gerugte van oorloë gaan inderdaad skerp toeneem terwyl ons die einde van die kerkbedeling nader. Daarna sal die Antichris geopenbaar word en tydelik ‘n valse vrede skep voordat die grootste oorloë en natuurrampe van alle tye in die tweede helfte van sy sewe jaar lange bewind sal voorkom.
Joodse professor se beoordeling
Menahem Milson, emeritus professor in Arabiese Literatuur aan die Hebreeuse Universiteit in Jerusalem, het onlangs in ‘n lesing oor Islamisme die volgende oorsig aangebied:
Die terme ekstremistiese Islam, militante Islam, radikale Islam en Islamisme is sinonieme. Die persone wat hierby betrokke is, verwys egter slegs na hulleself as Moslems of, in sekere gevalle, as mujahidun (soldate van die jihad). Hulle noem hulle beweging die Islamitiese ontwaking of die Jihad-beweging. Islamisme, of radikale Islam, wy hulleself aan interne én eksterne doelstellings toe. Intern is hulle op die vestiging van suiwer Moslem gemeenskappe ingestel wat in ooreenstemming met Islamitiese wette (sharia) regeer word. Ekstern is dit hulle oortuiging dat elke ware Moslem daartoe verbind is om as eerste prioriteit ‘n jihad teen die ongelowiges en vyande van Islam te voer (Christene word as ongelowiges en heidene beskou).
Die interne wreedhede van Islamisme het wél negatiewe reaksies in die Westerse wêreld ontlok, maar word nie juis as ‘n bedreiging vir wêreldvrede gesien nie. Hieronder is die strawwe wat ooreenkomstig Islamitiese wette opgelê word, bv. die steniging van almal wat aan owerspel skuldig bevind word, lyfstraf vir diegene wat alkohol gebruik, en diewe se hande wat afgekap word. Terreurdade teen nie-Islamitiese lande, veral dié teen die VSA op 11 September 2001 (9/11), word egter deur die internasionale gemeenskap in ‘n baie ernstige lig beskou en maak van Islam ‘n wêreldprobleem.
Volgens Islam het Allah aan Moslems die oorwinning en oorheersing oor alle gelowe in die wêreld beloof. Hierdie belofte is vroeg reeds deur die veroweringstogte van Mohammed vervul, en dit het tot die vestiging van ‘n groot Moslem ryk gelei wat eeue lank voortbestaan het. Die sterk oortuiging oor Moslem oorheersing soos deur Allah beloof, het in die 19de eeu ‘n ernstige terugslag gekry toe die Ottoman ryk ‘n aantal neerlae gely het en verskeie Moslem lande onder die beheer van “ongelowiges” (nie-Moslemlande) geval het. In die Eerste Wêreldoorlog is die Ottoman ryk wat uit Turkye beheer is, finaal verslaan. Uit ‘n Moslem oogpunt het dit gelyk of die geskiedenis heeltemal van sy voorafbepaalde koers afgewyk het.
Moderne Moslems is gefrustreerd as gevolg van die groot kontras tussen die Islamitiese oortuiging oor hulle godgegewe oorheersing van die wêreld en die agterlikheid, armoede en magteloosheid van baie Moslem lande. Dit is vir verskeie van hulle ‘n ontstellende gedagte dat die mag van Islam ondergeskik aan dié van Amerika en Europa is, en hulle maak aktief planne oor hoe om hulle regmatige plek van leierskap in die wêreld terug te kry. Vir hierdie doel word die grootskaalse hervatting van ‘n jihad (konvensionele oorloë én terrorisme) as baie belangrik beskou.
Rusland se neerlaag en onttrekking uit Afghanistan in 1989 is as ‘n groot oorwinning vir Islamisme gesien. Vir die Islamiste was dit net ‘n enkele geveg in die wêreldwye drama waarin Islam uiteindelik oor alle lande sal oorwin – ook oor Amerika.
Die Islamitiese jihad het twee doelstellings. Die een is die omverwerping van “bose” regerings in Moslem state omdat die leiers net in naam Moslems is. Dit word as ‘n godsdienstige plig gesien om hulle tot ‘n val te bring en met fundamentele Islamitiese regerings te vervang. Die ander doel is om teen nie-Moslemstate te veg – veral Amerika en sy bondgenote. Israel word spesifiek as ‘n teiken genoem omdat dié land na bewering ‘n voorpos van Amerikaanse imperialisme in die middel van die Moslem wêreld is om daar verdeeldheid te skep.
Die idee van martelaarskap in die jihad wat namens Allah gevoer word, is ‘n wesenlike deel van die stryd. Dit word as die hoogste vorm van selfopoffering beskou om as ‘n martelaar (shahid) te sterf. Elkeen wat hom- of haarself bereid verklaar om in ‘n selfmoord-bomaanval as ‘n shahid te sterf, word geprys. In die Koran word daar aan elke martelaar loon in die paradys beloof. Dit is nie net direkte toegang tot die paradys sonder die foltering van die graf nie, maar ook die voorreg om aan 70 van jou vriende, vriendinne of familielede toegang tot die paradys te verleen.
Hierdie idee blyk duidelik uit die testament van ‘n Palestynse meisie, Hanadi Jaradat, wat in Oktober 2003 ‘n selfmoord-bomaanval op die Maxim-restaurant in Haifa gedoen het. In haar testament wat na ‘n webblad van die Palestynse Islamitiese Jihad gepos is, sê sy onder meer: “In the name of Allah, the Merciful and Compassionate, prayer and peace be upon the master of mankind, our master Muhammad, may Allah pray for him and give him peace. The Exalted One said in the Koran: ‘Do not consider those who died for the cause of Allah as dead, rather as alive, sustained at the presence of their Lord.’ Allah’s words are true. Dear family, whom the Lord of the world will reward as He promised us in all His Holy Book… Reckon my sacrifice in anticipation of the reward of Allah to you in the Hereafter. I should not be too valuable to sacrifice myself for the religion of Allah. I have always believed in what is said in the Holy Koran, and I have been yearning for the rivers of Paradise.” Ná die dood van ‘n shahid is daar feesviering in plaas van rou. Die moeder roep uit van blydskap, soos by ‘n troue, en lekkergoed word onder die gaste uitgedeel.
Osama bin Laden word deur dieselfde vooruitsig gemotiveer. Op 16 Februarie 2003 is ‘n godsdienstige boodskap wat hy gelewer het, na ‘n Islamitiese webblad gepos. Daarin het hy uit ‘n ou Arabiese gedig aangehaal: “O Allah, when death arrives, let it not be on a bier covered with green shrouds. Rather, let my grave be in the belly of an eagle, tranquil in the sky, among hovering eagles.” Verskeie persone in die Weste het gesê die arende verwys na die vliegtuigaanvalle op die tweetoring-gebou in New York, en ander weer dat die arende na Amerika self verwys. Nadat die hele boodskap vertaal is, was dit egter duidelik dat bin Laden daardeur net sy begeerte uitgespreek het om as ‘n held ‘n martelaarsdood te sterf. Hy wil as ‘n shahid op die slagveld sterf en deur ‘n arend gevreet word, wat hom dan hemelwaarts na die troon van Allah sal wegvoer. Die 8ste eeuse Arabier wat die gedig geskryf het, was lid van ‘n militante Moslem sekte.
Westerlinge is steeds nie in staat om die begrippe jihad (heilige oorlog) en istishhad (martelaarskap) reg te begryp nie. Verskeie kommentators meen verkeerdelik dat Islamitiese terreurdade in Europa toegeskryf kan word aan sosio-ekonomiese faktore soos frustrasie weens die armoede en werkloosheid wat deur tweede en derde geslag Moslem immigrante in Europa ervaar word. Dit is hoegenaamd nie waar nie, want dié dade spruit uit ‘n godsdienstige oortuiging oor die stryd teen die vyande van Allah voort.
As ons na die profiele van Moslem terroriste in Europa, Amerika en ander plekke kyk, is dit duidelik dat hulle nie uit die geledere van die armes en verontregtes kom nie. Neem as voorbeeld dié wat vir die Madrid-bomaanvalle op 11 Maart 2004 verantwoordelik was. Die leier wat homself ook opgeblaas het, was ‘n Tunisiese immigrant wat met behulp van ‘n ruim Spaanse beurs aan ‘n universiteit gestudeer het en ook die eienaar van ‘n eiendomsagentskap was. ‘n Ander lid van die groep was ‘n Marokkaanse immigrant wat ‘n selfoon-besigheid gehad het. ‘n Derde lid was ‘n Marokkaan wat ‘n graad in chemiese ingenieurswese gehad het, terwyl ‘n vierde lid ‘n student uit Bosnië was wat met behulp van ‘n beurs van die Spaanse regering daar gestudeer het.
Daar is geen sprake van gefrustreerde tweede geslag immigrante wat teen hulle omstandighede in opstand kom nie. Dieselfde geld vir al die ander terreurdade deur Moslems. Van die 19 terroriste wat vir die 9/11 aanvalle op Amerika verantwoordelik was, was nie een ‘n gefrustreerde tweede geslag immigrant nie. Almal van hulle was Arabiese studente of professionele lui – 15 uit Saoedi-Arabië, drie uit Egipte en een uit Libanon. Die enigste verklaring vir hulle optrede is die Islamitiese geloof wat van hulle verwag om ‘n jihad te voer teen lande wat dit durf waag om Moslem lande aan te val.
Moslem terroriste word wyd in die Moslem wêreld geëer. Ter wille van hulle selfbehoud veg baie regerings van Moslem lande egter teen die terroriste omdat radikale Islam op groter toewyding deur hulle eie regering aan Islamitiese wette aandring. Die feit is dat die vroeë vaders van Islam geloofwaardigheid aan die jihad verleen en ook groot sukses daarmee behaal het. Huidige Moslem regerings word deur ‘n ernstige ideologiese kontradiksie gekonfronteer: aan die een kant beveg hulle die jihadistiese organisasies in hulle lande, maar aan die ander kant gaan staatskole en moskees voort om die idee van ‘n jihad ter wille van Allah te bevorder.
Islam in Europa
Die Islamisering van Europa vind só vinnig plaas dat die befaamde historikus, Bernard Lewis, aan ‘n Duitse koerant, Die Welt, gesê het dat Europa voor die einde van hierdie eeu Islamities sal wees. Neem die volgende feite in ag:
- In ‘n onlangse voorblad-artikel, “Militantes in Europa dring openlik op ‘n jihad en die vestiging van Islamitiese beheer aan,” neem die New York Times die uitbreiding van Islam in Europa in oënskou. Dié geloof is reeds baie sterk in Brittanje, Frankryk en Duitsland gevestig, maar dring ook lande soos Nederland en Switserland binne. ‘n Moslem geestelike (imam) in Europa se oproep lui só: “Pas die wil van Islam op die goddelose samelewings van die Weste toe.”
- Swede se derde grootste stad, Malmo, word volgens die polisie effektief deur militante bendes van Moslem immigrante beheer. Sommige van hulle woon al vir 20 jaar in die stad en kan nou nog nie Sweeds lees of skryf nie. Ambulanse wat beseerdes wil help, word deur gewapende of klipgooiende bendes aangeval, en weier om sonder polisie-begeleiding na probleemgebiede te gaan. Die immigrante spoeg ook op die ambulanspersoneel. Soms bloei gewonde persone hulleself dood omdat die ambulanse op polisie-versterkings wag om hulle te begelei. Die polisie gaan ook nie sonder voldoende mannekrag en voertuie in sekere gebiede in nie.
- Denemarke word deur Moslem immigrante oorstroom en het al die eerste nie-Deense skool vir hulle geopen. In Denemarke is die Koran nou ‘n verpligte voorgeskrewe boek vir alle leerlinge in sekondêre skole. Só word die Moslem denkwyse onder Europeërs bevorder.
- Die Islamitiese Kultuursentrum in Oslo, Noorweë, het die Pakistanse geestelike leier, Qazi Hoessein Ahmed, as spreker na hulle land genooi. Hy is uitgenooi ten spyte van die feit dat hy al positiewe opmerkings oor Osama bin Laden gemaak het, deur hom en sy volgelinge helde te noem.
- In ander lande in Europa is jihadistiese bewegings besig om toe te neem. Die Nederlandse regering het reeds 15 Moslem terreurgroepe geïdentifiseer wat saamgesweer het om Nederland te straf oor dié land se vredesmag van 1300 troepe wat in Irak diens doen.
- In Spanje het Moslems uit Marokko, asook verskeie vermeende deelnemers aan die bomaanvalle van 11 Maart in Madrid, ‘n deel van ‘n Spaanse tronk oorgeneem. Hulle saai nou Moslem gebede teen ‘n hoë volume oor die luidsprekers uit, intimideer nie-Moslem gevangenes, vertoon foto’s van Osama bin Landen en spog openlik dat hulle die jihad gaan wen. Die bewaarders in die tronk doen niks hieraan nie en het gevangenes net gevra om die luidsprekers ‘n bietjie sagter te stel.
- Die International News Analysis Today sê die volgende oor Kosovo: “The uncompleted Christ the Saviour Cathedral in Pristina, Kosovo, stands as a shocking example of militant Islam’s intolerance towards Christianity, and warns of the dark future that lies ahead for Christian civilisation if Muslim fanaticism continues to gain influence in the West. The orthodox cathedral is now a public toilet in Muslim-dominated Pristina, the capital of the nominally Serb province.”
- Wat doen ander Europese regerings oor die Islamitiese gevaar? Hulle moedig Islam nog aan deur Israel in sy stryd teen die Palestyne te veroordeel en ‘n Palestynse solidariteitskonferensie te borg. Druk word ook op die EU uitgeoefen om Hamas van hulle lys van terroristegroepe te verwyder, ten spyte van Hamas se lang betrokkenheid by die moord op onskuldige burgerlikes deur middel van selfmoord-bomaanvalle.
Europa gaan nog maai wat hulle nou saai. ‘n Historikus, Bat Ye’or, sê in haar boek, Eurabia, dat die Christelike karakter van Europa heeltemal besig is om te verdwyn en vir ‘n Arabiese Moslemkultuur plek te maak – vandaar die verwysing na die Europa van die toekoms as Eurabië. Sy sê dat Europa 30 jaar gelede al ter wille van kortsigtige politieke en ekonomiese voordele met sy kulturele abdikasie en versoeningsbeleid teenoor Islam begin het. Sy sê in haar boek: “Europe has evolved from a Judeo-Christian civilisation with important secular elements, to Eurabia: a secular-Muslim transitional society with its traditional Judeo-Christian principles rapidly disappearing.”
Die voorgestelde grondwet van die Europese Unie (EU) is ‘n sekulêre dokument met geen verwysing na God of Europa se Christelike tradisie nie. Die Moslem staat, Turkye, is tans met samesprekings oor toelating tot die EU besig, en het sy ingenomenheid uitgespreek oor die feit dat die EU nie Christelike waardes in die grondwet nastreef nie. Dit open die weg vir Moslems om volle lede van die EU te word, omdat alle gelowe by implikasie gelykgestel word. Die EU oorweeg dit ernstig om ook olieproduserende Arabiese state in sy geledere op te neem ten einde sy ekonomiese belange te stabiliseer.
Aanslag op Afrika
Die Sentrum vir Strategiese en Internasionale Studies in Washington sê dat Afrika 300 miljoen Moslems het en besig is om in ’n sterk basis vir ekstremistiese groepe omskep te word. Afrika Noord van die Sahara is heeltemal Moslem oorheersd, en die bloedbad in Soedan is ’n bewys van hulle onverdraagsaamheid teenoor ander gelowe. Baie lande in swart Afrika is egter ook diep deur Moslems binnegdring, en Nigerië was al in ’n groot burgeroorlog tussen die Moslem en Christen sektore van die samelewing gedompel. Oos-Afrika is baie lank al onder sterk Arabiese beïnvloeding as gevolg van handelsbande met dié lande. Die Swahili taal wat deur meer as 100 miljoen mense gepraat word, veral in Kenia, Tanzanië, Uganda en Noord-Mosambiek, is ’n mengsel tussen Arabies en Afrika-tale.
Saoedi-Arabië en Libië bestee honderde miljoene rande aan die uitbreiding van Islam in Afrika. Suid-Afrika het sterk bande met Iran, Libië en die Palestynse Bevrydingsorganisasie van Jasser Arafat, en is besig om sy deure vir Moslem immigrante oop te gooi. Dit sluit selfs immigrasie uit Pakistan in.
Die Washington Post het berig dat die Pakistanse regering onder Amerikaanse druk op Al-Qaida ondersteuners in sy land toeslaan, asook op radikale Moslem skole (madrassas) waar jihadistiese sentimente by studente gekweek word. As gevolg hiervan het 500 van hulle al na Suid-Afrika verhuis, en meer is op pad – ook na ander Afrika-lande toe. Die Islamisering van hierdie vasteland het reeds ver gevorder!
Oorloë teen Moslem lande
Die vraag word steeds internasionaal ernstig gedebatteer of Amerika reg opgetree het deur Afghanistan en Irak militêr in te val. Hierdeur het die Islamitiese haatveldtog teen hulle en hulle bondgenote aansienlik toegeneem en die gevaar vir internasionale terrorisme die hoogte ingeskiet. Daar is kenners wat meen dat indien die VSA wél die broeiplekke van onheil wil uitwis, daar ander lande is wat veel eerder ingeval en oorgeneem moes gewees het.
Die 72 jaar oue Indiese skrywer en Nobelpryswenner, Vidia Naipaul, is van mening dat lande soos Saoedi-Arabië en Iran die belangrikste plekke is waar ‘n heilige oorlog aangeblaas word, en dat hulle eerder vernietig moet word. Hy sê dat hierdie gewetenlose vegters hulleself in die dood van ander mense verbly, en voeg by: “Dit word vertel dat die terroriste wat die kinders in Rusland vermoor het, geglimlag het toe hulle dit gedoen het.” Oor die stryd teen hierdie radikale groepe het hy gesê: “Die jihad is só dreigend vir die res van die wêreld dat ons nie hierdie oorlog kan ignoreer nie. Irak was egter nie die regte land om aan te val nie. Daar is sekere lande wat hierdie oorlog aanblaas, soos Saoedi-Arabië en Iran, en hulle behoort waarskynlik vernietig te word.”
Die groot moondhede sal dit nie maklik doen nie, want beide Amerika en Rusland het al bloedneus in Moslem lande gekry. Met hulle moderne wapens kan die sterk lande maklik konvensionele oorloë wen, maar terrorisme is ‘n heel ander saak!
Bron: www.bibleguidance.co.za
Almal van ons hou op een of ander manier van goeie nuus, in die slegte dinge wat ons hoor en belewe. In tye waarin ons oordonder word deur slegte berigte en baie negatiwiteit, smag ons na enige moontlike opbouende boodskap. En as Jesus-mense wil ons mekaar moed inpraat en wil ons die positiewe invloed wees, ja, die lig in ons donker wêreld wees.
Maar selfs in die gevestigde kerk, het ons nie oor die jare daarin geslaag om goeie nuus in slegte tye op die regte manier oor te dra nie. Daar is te veel verskille binne die kerk oor so baie standpunte. Daar is so min liefde tussen kerkmense self. Die kerk is so veroordelend in die boodskappe oor die sonde en die wandade van die mensdom. Daar is heeltemal te veel skuldgevoelens en te veel wette wat oortree word. So baie kere stel ons mekaar teleur en maak ons mekaar selfs seer deur ons woorde en dade. Iets kort steeds baie drasties vir ons as Jesus-mense!
Jesus-mense lief genade!!!
Ja, ons en alle ander mense, smag eintlik na genade! Maar wat is genade presies? Is dit nie net nog ‘n “kerk-woord” wat dogma en teorie bly nie? Hoekom ervaar ons so min genade, selfs binne die kerk, of selfs onderling tussen Jesus-mense?
Genade het volledig te doen met die goeie nuus, wat God aan ons bewys het met Jesus se volmaakte en liefdevolle verlossingsdaad aan die kruis. Hierdie goeie nuus van genade, het ‘n rykdom van fasette om raak te lewe. Die grootste en belangrikste waarheid rakende genade, is dat God die ware Gewer en Bewerker van suiwer en oorvloedige genade is! Hierdie God-gegewe-genade het geen grense in terme van hoeveelheid nie – daar is onberekenbaar baie by God self te kry. Hierdie God-gedrewe-genade is vir alle mense op aarde bedoel, ongeag wie of wat jy is, of hoe goed of sleg jy is!
Leef God se genade raak in jou lewe – dis grensloos!
Bron: http://doomcharl.blogspot.com/
Nou ja, ek het verseker ook nie die antwoord nie!! Maar ek dink tog dat kinders geweldig baie spanning by hulle ouers erf, en iewers het dit ‘n negatiewe impak. Daarom wil ek vandag vra: wat kan ons doen om stress by ons kinders te verminder? Of dalk uit ‘n ander hoek: wat doen ons as ouers om by te dra tot die feit dat ons kinders in hierdie mislike ding genaamd stress verval? Wat is ons bydrae? Hoeveel van hierdie goed wat kinders aanvang kon dalk voorkom gewees het? Ek sê verseker nie alles is die ouers se skuld nie, maar kan ons as ouers dalk iets hiermee te doen hê? Dis nou maar eenmaal so dat ons ons eie probleme op ons kinders projekteer. En dan natuurlik, is daar ouers wat eenvoudig roekeloos is in hulle optrede.
Bid jou dit aan: ‘n pa reël 3 ontkleedansers vir sy seun se 16de verjaardagpartytjie! Wat verwag hy? Waar gaan sy kind land? Het die anders kinders wat daar was se ouers geweet hoe dit daar lyk en wat sou gebeur? Dan is daar natuurlik ook die sogenaamde “ratrace”. Ons hardloop self soos afkophoenders rond, en verwag dat die kinders ‘n stil en besadigde lewe lei. Wel, net soveel as wat dié rondhardlopery stress by ons veroorsaak, sal dit stress by ons kinders veroorsaak. En nog meer … want hulle ly onder óns stress, EN hulle eie stress. Onthou jy die ou dae toe ons nog bus gery het? Jy was gewoond daaraan om te wag. Wag vir die bus, wag vir iemand om jou te kom haal .. wag, wag, wag …. Tyd was in ‘n ander lig gesien as vandag. Dit was niks om iewers vir ‘n uur te wag nie. Vandag is ons lewens egter in sulke klein tydsinkremente ingedeel, dat jy woedend raak as jou rekenaar ‘n dokument stadig oopmaak … Tyd word al tot op die sekonde beheer.
Met baie stress wat daardeur veroorsaak word. En ons leer dit vir ons kinders ook. Ons laai hulle 5 oor op by die een plek en 20 oor af by die volgende plek vir die volgende aktiwiteit. Kinders bly nie by nie. Selfs etenstyd word in so ‘n klein tydgleuf ingedruk dat jy nie eens jou kos kan fyn kou nie. Kinders word onder soveel druk geplaas dat daar geen tyd is om die lewe te geniet en lekker dinge te doen nie. Miskien klink dit vir jou absurd, maar ons leer ons kinders dat hulle lekker goed móét doen. Prestasie kom in ons huis nie eerste nie. Om die lekker van die lewe te ervaar, kom eerste. Wat laat ons alles in ons huise en lewens toe? Iemand sê anderdag ‘n skokkende, waar ding: dis ongelooflik hoe die mens genot vind in geweld. Klink dit vreemd? Weet jy dat by verre die meeste rekenaarspeletjies nét oor geweld gaan? Sommer klein-klein laat ons ons kinders toe om aan hierdie geweld deel te neem (en genot te vind daarin).
Onthou jy “Pacman”? Dit vreet ander karakters op! Hoe vinniger en hoe meer hy vreet, hoe beter is hy! In boks, wat ons ‘n sport noem, slaan die ouens mekaar pap, en dis aanvaarbaar…. Hoe harder jy slaan, hoe beter. Is jy ook verstom om te besef hoeveel plesier mense kry uit geweld? Meneer, maak jou rekenaar skoon. Verwyder daardie speletjies …. Jy maak jou kind groot met die idee dat geweld pret is. Maleagi 3:15-16 15 Die Here het man en vrou een gemaak, een in liggaam en gees. En waarom een? Omdat Hy wil hê dat daar ‘n nageslag moet wees, wat Hom eer. Beheers julle, moenie ontrou wees aan die vrou met wie jy van jou jeug af getroud is nie. 16 Die Here die God van Israel sê Hy haat egskeiding. Egskeiding is niks anders as geweld nie, sê die Here die Almagtige. Beheers julle, moenie ontrou wees nie. Stem jy saam dat egskeiding geweld is? Stem jy saam dat egskeiding totaal aanvaarbaar is in ons samelewing? …. Dit bring stress vir ons kinders. Dan is daar nog vele ander dinge wat ons toelaat, wat ons vir ons kinders koop, dinge wat ons self beoefen ….
Dan wonder ons hoekom ons kinders se deksels afspring. Gaan dink bietjie: hoeveel van hierdie stress-oplaaiers is in jou lewe en in jou huis teenwoordig? Breek die spanning vir jou kinders. Ek het ‘n waardevolle dokument op die internet raakgeloop met praktiese punte, geskryf deur ene Tienie Holtzhausen.
Ek haal so ‘n paar punte vir jou aan:
1) Werk daaraan om ‘n bron van vreugde, eerder as ‘n ongenaakbare klakous te wees.
2) Om altyd perfekte en foutlose gedrag van jou kinders te verwag kweek maklik ‘n gespanne en liefdelose atmosfeer.
3) ‘n Fanatiese strewe om jou huishouding soos ‘n geoliede masjien te laat werk, skep spanning. Het jy geweet dat dit 100% normaal is dat ‘n regterbrein dominante kind se kamer altyd deurmekaar sal wees? Dit skep vir hom ‘n “normale” atmosfeer.
4) Jou kind is net ‘n mens. Laat hom toe om uiting aan sy emosies te gee.
5) Laat jou kind toe om verantwoordelik dinge te ondersoek, om foute te maak in die leerproses; leer hom dat probeer nodig is vir sukses.
6) Laat jou kind toe om iemand anders as jy te word.
7) Vergewe hulle, soos jy van Jesus verwag om jou te vergewe.
8) Skep ‘n huislike atmosfeer, en nie ‘n oorlogsveld nie. Niks is meer spannend as ‘n huis waar ‘n kind nie WIL wees nie, en waarheen hy nie sy vriende kan bring nie.
9) Lag baie, skep elemente van pret, doen dinge saam.
10) Laat jou kind weet dat jy altyd, maar altyd daar is vir hom.
11) Jy mag “nee” sê vir jou kind – dit skep grense, en gee sekuriteit.
12) Sê elke dag vir jou kind dat jy hom liefhet.
Niks, maar niks, neem spanning en stress meer effektief van jou kind af weg nie. Breek die stress, skep ‘n gelukkige kind.
Bron: heuning.co.za
‘VERSTEEKTE GOD’
Die 17de Eeuse Franse wiskundige, Blaise Pascal, het geskryf dat wat op aarde sigbaar is, nie die totale afwesigheid of teenwoordigheid van God aantoon nie, maar veel eerder die teenwoordigheid van ‘n versteekte God weerspieël. “Enigiets is rein vir die wie se harte rein is. Maar niks is rein vir hulle wat korrup en ongelowig is nie, want hulle gedagtes en gewetens is besoedel.” Tit 1:15.
Vir die wat willens en wetens blind is, mag dit voorkom of God afwesig is, of erger nog, dat, indien Hy daar is, Hy besonder wreedaardig is. Maar vir diegene wie se oë reeds geopen is, is daar ‘n oormag bewyse dat God in die Skepping, in ons gewetes en in Jesus Christus teenwoordig is. Daar is nie ‘n enkele plek in die ganse heelal of hier op aarde waar Sy vingerafdrukke nie gesien kan word nie. Ons word egter deesdae met ‘n baie venyniger en aggressiewer vorm van ateïsme gekonfronteer. Tog ironies dat militante ateïste so baie tyd daaraan spandeer om te bewys dat God, aan wie hulle in elk geval nie glo nie, nie bestaan nie.
KONFRONTEER ATEÏSTE
Indien jy al die vele verskriklike aanvalle deur ateïste op God gelees het, sal jy dadelik agterkom hoe geneig hulle is om die onderskeid tussen die Christendom en Islam te verwar. Hulle noem verskriklike gruwels wat in die naam van godsdiens gepleeg is en kom dan met die argument dat dit God se skuld is! Dit is in die eerste plek onregverdig om die slagoffers te blameer vir dit wat deur hul vervolgers gedoen is. Tweedens is hierdie ateïste ook geneig om die talle erger gruweldade wat deur ateïste gepleeg is, te ignoreer. Sekulêre, humanistiese, ateïstiese en politiese staatbestelle het veroorsaak dat die 20ste Eeu een van die bloedigste in die hele geskiedenis was.
Die dodetal wat deur sekulêre, humanistiese en ateïstiese diktators soos Vladimir Lenin, Joseph Stalin, Mao Tse Tung, Pol Pot, Haile Mariam Mengistu, Samora Machel, Agestino Neto, Fidel Castro en ander kommuniste agtergelaat is, is meer as 160 000 000 slagoffers. En dit is nie soldate wat op die slagveld gesterf het nie, maar burgerlikes wat in vredestyd, deur die hand van hul eie regerings, gesterf het. En dit alles in die naam van wetenskaplike sosialisme.
IRRASIONELE REDENASIE
Ons wil beslis nie hê dat elke ateïs die skuldgevoel oor die slagting aan die hand van sommige van die wreedaardiges moet deel nie. Dit sal ook nie regverdig of rasioneel wees indien ateïste Protestante Christene blameer vir die onverdraagsames en ekstremiste wat wandade teen hul voorvaders gepleeg het nie. Die feit van die saak is: daar is ‘n God.
Hy het ons gemaak. Hy het Sy standaarde van reg en verkeerd in die Tien Gebooie bekendgemaak en ons is aan Hom verantwoording verskuldig. God is beslis nie versteek nie. Hy het Sy krag, majesteit en waarheid op vele maniere bekendgemaak en dit is baie duidelik in Sy Skepping te sien. Hy het ook deur Sy profete gepraat en deur Sy Seun, Jesus Christus.
GOD SE HANDEWERK
Indien jy al ooit die Drakensberge besoek het; dan het jy een van die groot waterskeidings van ons kontinent gesien. Jy kan jouself die reëndruppels indink wat van ‘n wolk kom, op die piek val en dan wegvloei na die Oranjerivier en uiteindelik in die Atlantiese Oseaan beland. ‘n Ander druppel vloei weg na die Tugelarivier en vloei na die Indiese Oseaan. Op een enkele punt is hierdie druppels water slegs ‘n meter geskei, dan honderde kilometer om dan uiteindelik duisende kilometer van mekaar geskei te wees. Dit neem een enkele druppel water meer as vier maande om die volle lengte van die Nylrivier te vloei tot in die Middellandse See. In Amerika is die Rockies die kontinentale skeiding en in Suid-Amerika is dit die Andesgebergte. Asië het die Himalajas en Europa weer die Alpe.
WATERSKEIDINGSVRAAGSTUK
Hierdie waterskeidings is baie belangrik in Geografie. Een ‘waterskeiding’ wat baie belangrik in Teologie is, en een van die ‘sleutelgeloofsoortuigings’ is, is die vraag: ‘Is daar ‘n God, of nie?’ Die Bybel begin immers met: “In die begin het God die ganse heelal gemaak, die hemel daarbo en die aarde hieronder.” Gen 1:1. Ateïsme is gebaseer op die veronderstelling dat daar geen God is nie. Jy glo òf die wêreld het homself geskep, òf jy glo in ‘n selfgenoegsame Opperwese wat altyd was, is en sal wees. Met ander woorde, die vraag is eintlik: Is God selfgenoegsaam en ewig? Of is die heelal selfgenoegsaam en selfonderhoudend? Die punt waar jy begin, is waar jy sal eindig. “Net die dwase sê vir hulleself: ‘Daar is geen God nie.’ ” Ps 14:1.
DIE GOD WAT ÍS
Elke stam en kultuur het ‘n idee oor God en ‘n naam vir God. Almal weet God bestaan, maar sommiges probeer die feit wegredeneer. Die hele rigting van die mens se bestaan word geaffekteer deur sy oortuiging dat hyself die opperwese van die heelal is, of hy erken die bestaan van ‘n Opperwese wat hy kan liefhê, vrees en as dié mag sien wat getart kan word, of as ‘n Heer wat gehoorsaam moet word. Die belangrikste is dat dít wat jy oor God glo, die verskil sal maak aan jou gedagtes, jou lewe en jou ewige eindbestemming.
FONDASIES VERKRUMMEL
Een van die redes waarom ons deesdae so ‘n militante en aggressiewe aanslag van ateïste ervaar, is juis omdat al die pilare van ateïsme besig is om te verkrummel. Eerstens omdat daar reuse vordering gemaak is om die Evangelie te verkondig en miljoene mense jaarliks tot die Christendom bekeer word en tweedens word daar al hoe meer op die hoogste intellektuele vlakke deur al hoe meer wetenskaplikes besef dat ateïsme onverdedigbaar is.
FEITE IS HARDKOPPIG
In ‘God, the Atom and the Universe’ het die wetenskaplike, Dr. James Reid, verklaar: “Science is preparing a surprise for mankind. At least it will be a surprise for those who have doubts about the Bible and its God. It will also come as a surprise for those who are labouring under the misapprehension that science undermines the Bible. It may even shock some scientists, who may be startled to find that their newly uncovered facts, or accepted theory, provide still another link in the chain of evidence that is showing that the facts of the universe support the Bible’s statements – including Creation.”
DOEL IN ONTWERP
Brandon Carter, hoogs gerespekteerde astro-fisikus van Oxford Universiteit het die hele akademiese wêreld verstom toe hy in 1973 uitgewys het dat Fisika en Astronomie albei aandui dat die heelal gekonstrueer is en onderhou word vir ‘n spesifieke doel. Die onderhouding daarvan kan nét wees vir die volhoubaarheid van intelligente lewe op hierdie planeet.
Professor Carter het dinge soos die konsekwente simmetrie van wiskundige vergelykings vir swaartekrag en die feit dat indien die massa van die proton ‘n fraksie groter of kleiner was, die ganse sonnestelsel ineen sou stort, as bewys genoem. Die heelal is ‘n bewys dat dit vir die mens ontwerp is. Dit noem hy die Antropiese Beginsel. Vir evolusioniste is ‘doel’ een van die mees weersinwekkende woorde wat daar is. Om te erken dat daar ‘n ‘doel’ met die Skepping is, is om te erken dat daar ‘n Skepper is.
DIE BEVOORREGTE PLANEET
Indien die aarde enigsins nader aan die son was, sou temperature te hoog vir enige vorm van lewe gewees het. Indien ons verder van die son sou wees, sou dit weer te laag vir enige vorm van lewe wees. Die atmosfeer om ons planeet is uniek om mens en dier te onderhou. So baie ander wetenskaplikes het soortgelyke ontdekkings en waarnemings gemaak dat ‘n mens dit met sneeuballe kan vergelyk wat in ‘n sneeustorting ontaard het wat die pilare van evolusie wegvee.
WISKUNDIGE GENIE
Een van die grootste sterrekundiges van alle tye, Sir James Jeans, het opgemerk dat hoe meer hy die heelal bestudeer, hoe meer blyk dit asof die heelal ‘n reusagtige idee van ‘n grootse wiskundige is. Wetenskaplikes wat die Intelligente Ontwerp van Lewe aanvaar, wys op vele sulke voorbeelde, soos bv. die maan. Indien daar geen maan was nie, sou daar geen lewe op aarde aarde wees nie.
Sonder die getye en sonder die maan, sou ons strande en baaie gevul wees met tonne en tonne gemors en oorblyfsels van een of ander aard. Die maan is verantwoordelik vir die vermenging van die atmosfeer.
Net soos wat swaartekrag van die maan die getye van die see beïnvloed, veroorsaak dit ook dat die regte hoeveelheid suurstof in die water teenwoordig is as golwe teen die rotse breek. Die gasgevulde water bepaal die lewe van plankton in die see en dit vorm weer die basis van die hele voedselketting en waarsonder ons almal sou sterf.
UITSPRAAK GEREGVERDIG
Vir iemand wat in evolusie glo, is dit onverklaarbaar dat die maan ‘bloot toevallig’ daar is en ‘bloot toevallig’ die regte grootte en afstand van die aarde is om al hierdie dinge só te laat plaasvind dat lewe op aarde volhoubaar is. Dink maar aan die stikstof in die atmosfeer – dit bestaan uit 78% stikstof, 21% suurstof en 1% ander komponente. Indien stikstof met feitlik enigiets anders vermeng word, word dit uiters giftig. Tog is dit nie die geval met die atmosfeer nie. Wat is dus die doel van stikstof in die atmosfeer? Daarsonder sou daar geen plante gewees het nie. Hoe het God dit bewerkstellig dat stikstof met die grond meng sodat plante kan groei, maar nie dat dit met die lug wat ons inasem, meng en veroorsaak dat ons sterf nie?
LEWENSBALANS
Wetenskaplikes is dit eens dat die honderde duisende weerligstrale daagliks regoor die wêreld noodsaaklik is om die molekulêre atmosferiese stikstof te verander in samestellings soos ammoniak en nitrate wat deur reën versprei word. Die stelsel produseer 100 000 000 ton stikstofplantvoedsel elke jaar en onderhou die wêreld. Telkens as ons donderweer hoor en weerlig sien, behoort ons stil te staan en net daaraan te dink dat indien dit nie vir die weerlig was nie, sou volhoubare lewe op aarde geensins moontlik gewees het nie.
DIE SKEPPING IS BEWYS VAN DIE ONTWERP DEUR ‘N SKEPPER
Wetenskaplikes wys ook op die intelligente ontwerp van stof. Vir so baie mense is stof bloot net onaangenaam, maar intelligente ontwerp wys egter daarop dat ons God baie dankbaar moet wees daarvoor. Een van die voordele daarvan is bloot kosmeties. Die lug is nie werklik blou nie, dit kom slegs so voor a.g.v. die effek van stof op lig. Indien jy 40 km reguit in die atmosfeer sou opgaan waar daar geen stof is nie, lyk die lug pikswart. Dink hier maar net aan die foto’s wat vanaf die maan geneem is en waar die lug pikswart vertoon.
DIE KOMPLEKSITEIT EN WONDER VAN GOD SE SKEPPING
Ons word ook deur kundiges ingelig dat stof iets baie belangriks doen: elke druppel reën bevat ongeveer agt miljoen druppeltjies wat om ‘n spikkeltjie stof gevorm is. Indien dit nie vir stof was nie, sou dit nooit gereën het nie en sonder reën sou die hele wêreld in iets soos die Sahara-woestyn verander en sou ons almal sterf. Alles spreek duidelik van ontwerp.
Indien ons die kompleksiteit en wonder van God se Skepping bedink, word dit baie duidelik dat Hy beslis nie ‘versteek’ is soos van die skeptici beweer nie. “Die hemele verkondig die heerlikheid van God. Die uitspansel getuig van die werk van Sy hande.” Ps 19:1.
Bron: juig.co.za
BELYDENIS: ”U wat onreg straf, verskyn tog!” – vers 1–7
Die Psalm begin met die belydenis oor en appèl op God: “Here, God wat onreg straf, U wat onreg straf, verskyn tog!” (vers 1). Daarin lê die boodskap en krag van die Psalm. Die 2014 vertaling vertaal “wat onreg straf” met “wat vergeld” wat heel korrek op die omkeer van die situasie dui, wat dié wat onreg pleeg hulle “verdiende loon” gee.
“Kom, Regter Van die aarde, reken af met die mense wat hulle teen U verhef.” (vers 2). Die Psalmis gebruik hier ’n baie belangrike titel vir God wat sy reg oor almal op die aarde beskryf: “Regter van die aarde.” Dit is omdat God die reg oor die hele aarde het as Skepper, dat Hy vir die handhawing van die reg oor die hele aarde gevra kan word. Dié gebed maak dus staat op die uitvoering van God se regsheerskappy oor alles wat leef en beef.
Die Psalm is daarom ook gemik téén dié mense wat God se reg dwarsboom, dié wat hulle teen Hom verhef (vers 2 – “hoogmoediges” – 2014 vertaling), dié wat hulle verlustig in die leed van ander mense (vers 3), dié wat oorkook van vermetelheid (“woorde onbeskaamd laat uitborrel” vertaal die 2014 vertaling!) deurdat hulle spog met die onreg wat hulle begaan (vers 4). En dan lys die Psalmis die mense wat daardeur getref word: die weduwees, vreemdelinge, en weeskinders (vers 6).
Let op dat dit die weerloses in die gemeenskap is wat genoem word, dié wat óf hulle versorgingsisteem verloor het – weduwees en weeskinders – óf dié wat inkommers is en sukkel om deel van die gemeenskap te word – vreemdelinge (weens politieke of ekonomiese redes – lees wat Lev. 19:34 daaroor te sê het). Let ook op die solidariteit na beide kante toe. Dié weerloses skaar hulle by die volk van God en die Psalmis reken hulle as deel van die volk van God, hulle is deel van God se “erfdeel” (2014 se vertaling van “wat aan U behoort”). Belangrik!
“Dan sê hulle nog: ‘Die Here sien dit nie, die God van Jakob merk dit nie op nie.’” (vers 7 – 2014 vertaling).
APPÈL: “Sien dit tog in, julle onverstandiges onder die volk!” – vers 8–11
Hier sien ons dat die goddeloses en onverstandiges deel van die Godsvolk is. Daarom kan dié Psalm ook aan hulle gerig word. Hulle word as onverstandig en dwaas uitgekryt, omdat hulle twee goed van God nie verstaan nie.
- God het hulle gemaak – ore, oë, gedagtes. Hy weet aan die eenkant daarom op intieme wyse presies hoe hulle is en wat hulle hoor, sien en dink. In ’n sekere sin beteken dié gedagtes nie veel nie, want die Here weet “dat dit nietigheid is” (vers 11 – 2014 vertaling – 1983 het: “dit beteken niks” wat miskien ‘n bietjie oordadig is!). Maar, dit beteken aan die ander kant ook dat God kan sien, hoor en dink, asof dit nodig is om dit te onderstreep!
- God is die hele tyd betrokke by mense, regoor die wêreld, in elke nasie. Hoe? Om mense op te voed, te onderrig en kennis mee te deel, sê Psalm 94. Ons hoor hier iets van Psalm 19 se onderrig wat vanuit die Skepping uitgaan. Ek het vroeër hieroor geskryf: Psalm 19 – God bestaan en God praat met ons.
BEMOEDIGING: “Hoe gelukkig is die mens vir wie U teregwys, Here” – vers 12–15
Die Psalmis rig hom vervolgens op diegene wat bereid is om te luister na wat hy te sê het, dié wat hulle deur God wil laat opvoed (“teregwys” – 2014 vertaling). Dié onderrig kom uit die “woord” (“wet” in die oorspronklike teks), waarin die ander deel van Psalm 19 in herinnering geroep word. Sulke mense sal nie net gelukkig wees nie, maar ook rus kry na tye van teëspoed (onheilsdae – 2014 vertaling) as die Here optree teen dié wat goddeloos opgetree het.
’n Wonderlike belofte van die Here om aan vas te hou in tye van teëspoed! Die Here sal sy volk nie in die steek laat nie, daarop kan die volk vertrou. “Sy erfdeel sal Hy nie laat vaar nie.” (vers 14 – 2014 vertaling). Die regspraak sal weer regverdig wees en “almal met opregte harte sal dit steun” (vers 15 – 2014 vertaling).
GEBED: Die Here ons God sal korrupte regters vernietig – vers 16–23
Ná die interne aanspreek van die onverstandiges en die bemoediging van die opregtes, wend die Psalmis hom teen dié plek waar onreg die meeste gedy, die korrupsie van dié wat verantwoordelik is vir die regspraak, die regters. Hy noem dit “die setel van vernietiging” (2014 vertaling – vgl. vers 15 waar dit reeds aangeraak is), mense wat God se duidelike uitsprake in sy wet skade aandoen.
Hy vra dus die retoriese vraag: “Wie sal vir my opstaan teen kwaaddoeners?” (vers 16 – 2014 vertaling). En antwoord dit met die getuienis dat dit uiteindelik net God self is wat kan en sal help. Anders was die stilte van die graf immers lankal reeds sy tuiste. Dit was juis toe hy gedink het dat sy voete gly (“gaan swik” – 2014 vertaling) dat die Here se troue liefde hom ondersteun het. Selfs wanneer hy baie onrus in sy binneste ervaar, ontstellende gedagtes wat vermeerder en hom sy rus ontneem, is dit God se ondersteunende vertroosting wat hom tot bedaring bring.
Laat my dink aan wat Paulus veel later sou skryf in Filippense 4:6–7. Ek het daaroor die volgende geskryf:
“Met hierdie gedagtes oor God se nabyheid as begronding vir hulle vreugde en inskiklikheid, is dit geen wonder dat Paulus daarvandaan beweeg na die gemeente se behoeftes en besorgdhede nie. Omdat God naby is, kan hulle oor alles en in alle omstandighede na Hom toe gaan in gebed.
Letterlik staan daar in vers 6: “maak in alles (alle situasies) julle versoeke (aitema) bekend aan God deur gebede (proseuche) en versoeke/petisies (deesis) met danksegging (eucharistie).”
Die verskillende woorde vir gebed in die vers moenie te veel onderskei word nie, omdat dit eintlik as sinonieme gelees kan word. Die punt van die vers is eintlik net om duidelik te sê: angstigheid oor allerlei word deur voortdurende veelvuldige versoeke verlig!
Die aanmoediging tot gebed word opgevolg met een van die mees ongelooflike beloftes wat Paulus gee, letterlik vertaal: “gevolglik sal die vrede (eirene) van God, wat alle begrip/denke (nous) te bowe gaan, oor julle harte en gedagtes die wag hou in Christus Jesus”.
Dit is die enigste plek in die NT waar só van “die vrede van God” gepraat word. Paulus bedoel hier nie die vrede met God nie, maar die vrede van God, die vrede wat Hy self het, die vrede wat Hy self is, die vermoë wat Hy het om nie angstig te raak oor allerlei nie, maar in beheer en veral getrou aan Homself te bly.
Dít is wat die harte en gedagtes van die gemeente sal bewaar. En dié vrede gaan alle denke te bowe – dit bedoel letterlik dat dit iets is wat beter is as die beste beplanning! Ons gedagtes en emosies is soos ‘n oorlogsterrein wat God sal beskerm teen angstigheid en chaos.”
Lees meer hier by my bydrae: Filippense 4:2-23 – Om saam in die Here te wees, bid en leef.
Terug by die Psalm – die Here duld nie korrupsie in die regspraak nie; Hy wil nie hê dat enigiemand ellende aangedoen word nie. Daarom is Hy self ’n toevlugsoord, ’n veilige vesting, ’n rots by wie gelowiges kan skuiling soek en vind. Hy is die een die onregverdiges sal laat boet vir hulle onregverdige dade, wat hulle sal verdelg oor hulle boosheid. Trouens: “met hulle kwaad sal Hy hulle vernietig,” (vers 23b – 2014 vertaling), d.w.s. hulle sal val deur hulle eie toedoen.
Die boodskap van die Psalm
Die Psalm bring groot rus in my gemoed. Net soos God die reg in die heelal handhaaf, só doen Hy dit op aarde. Ons mag dus die gebed in die Ons Vader bid: “Laat u wil geskied, soos in die hemel, so ook op die aarde.” (Matt. 6:10b). En ons mag God vertrou dat Hy dit in spesifieke sake sal doen, bv. in hoe regspraak uitgeoefen word.
Selfs as dinge op die korttermyn nie uitwerk nie, bly Hyself vir ons ’n toevlug – Fil. 4:6–7 bring my tot rus! – en gee Hy rus van die ontstellende gedagtes wat in ons binneste vermenigvuldig (vers 19), en beur ons op deur sy vertroosting, NT gesproke deur Die Vertrooster, die Heilige Gees. Die vrede van God sal oor ons gevoelens en gedagtes die wag hou, belowe Paulus ons.
Ek neem dié vers met my mee vandag: “Wanneer ontstellende gedagtes meer word in my binneste, dan beur u vertroosting my op.” (vers 19 – 2014 vertaling).
Bron: http://bybelskool.com/psalm-94-u-wat-onreg-straf-verskyn-tog/
NGVishoek: Ds. ( dominee ) Martin Barnard.
Ontvang die Heilige Gees: Jesus self doop met die Heilige Gees
Die Woord daaroor: … Hy wat na my (Johannes) kom, is my meerdere … Hy sal julle met die Heilige Gees en met vuur doop. (Matt.3:11).
Oorsig daaroor: Die Vader het die Heilige Gees gestuur (Joh.14:26) en Jesus is die Een wat ons met die Heilige Gees doop. Vuur het in Bybelse tye verskillende dinge gesimboliseer: Die heerlikheid van God (Dan.7:9); Sy heiligheid (Jes.6:4); Sy aandrang dat slegs Hy aanbid moet word (Heb.12:29); Sy regverdige oordeel en suiwering (1 Kor.3:13, 15); Sy toorn oor die sonde (Ps.18:8), en baie meer. Wanneer ons met die Heilige Gees en met vuur gedoop word, ontvang ons die volheid van wie God is. Dit vervul ons met heilige vrees vir God, want Hy is hoogheilig! Sy Gees word met ‘n doel uitgestort, sodat Sy Naam geëer kan word, nie slegs om ‘n aangename ervaring te hê of goed te voel oor onsself nie!
Oorgawe in gebed: Here Jesus, doop U Kerk met U Heilige Gees, sodat die Kerk U heerlikheid kan aanskou, heilig kan leef, weg kan draai van die boosheid, U Woord kan opsoek, bereid kan wees om vir u Naam te ly en eerbied vir U Naam kan hê.
Die werk van die Heilige Gees: Hy doen die bonatuurlike werk van God in ons
Die Woord daaroor: Die Gees van die Here het vir Simson sterk gemaak en hy het die leeu kaalhand uitmekaar geskeur (Rig.14:6). Dan sal die Gees van die Here kragtig in jou (Saul) werk. Jy sal saam met hulle as profeet optree en ‘n ander mens word (1 Sam.10:6). (Lees ook: Luk.1:35).
Oorsig daaroor: Wanneer die Heilige Gees besit neem van ons, doen Hy die menslik onmoontlike deur ons. Simson kon ‘n fisiese gevaarsituasie op bo-menslike wyse hanteer en Saul is letterlik in ‘n ander mens verander! Wanneer die Heilige Gees jou ten volle in besit neem, sal jou lewe merkbaar verander. Ons kan dalk baie dinge self vermag, maar wanneer ons deur die krag van die Heilige Gees mense bedien, is dit God wat die werk doen en is dit blywend van aard.
Oorgawe in gebed: Here, ek bid dat U Heilige Gees dag en nag op U Kerk sal rus. Verander my en laat U Gees so in my werk dat ek vreesloos en met my hele hart U koninkryk se doelstellings hier op aarde bevorder.
Wees bedag daarop: Eer die Heilige Gees
Die Woord daaroor: Ananias, hoekom het jy jou deur die Satan laat omhaal om vir die Heilige Gees te lieg? (Hand.5:3).
Oorsig daaroor: Die Heilige Gees is die Gees van alle waarheid. Daar is geen manier waarop ons die Heilige Gees met enige skelmstreek kan mislei nie. Die Heilige Gees sal ons te alle tye oortuig van enigiets wat nie die Vader behaag nie. As ons doelbewus probeer om die Heilige Gees voor mense te bedrieg, sal dit beslis ‘n impak op onsself hê. Dit is belangrik dat ons as Christene met vrees en eerbied sal leef en voortdurend bedag sal wees op die innerlike stem van die Heilige Gees wat ons in alle waarheid lei, in ons harte, ons verstand, ons denke, ons optrede en veral in ons verhoudings met ander mense.
Oorgawe in gebed: Heilige Gees, ek kies doelbewus om my hart en verstand, my verhoudings en alles wat ek doen, aan U leiding en rigtinggewing oor te gee. Help my asseblief om na U stem te luister en my daarna te skik, veral wanneer ek myself en my optrede wil verdedig. Vervul my met die volheid van die eerbied vir die Here en weerhou my daarvan om ooit téén U te praat. Dankie dat Uself die werk wat U in my begin het, sal klaarmaak.
Die werk van die Heilige Gees: Leer ons om volgens God se wil te bid
Die Woord daaroor: Julle, geliefdes, moet egter voortgaan om julle lewe te bou op julle allerheiligste geloof (Jud.1:20).
Oorsig daaroor: As ‘n mens lees oor die Heilige Gees se plek in intersesssiegebede, kan ons die Here se gebed tydens Sy laaste aand op aarde beter verstaan: Moet nogtans nie doen soos Ek wil nie, maar soos U wil (Matt.26:39). Ons weet nie wat of hoe ons behoort te bid nie (Rom.8:26). Baie mense is bekommerd dat hulle nie die wil van die Here bid nie. As ons met die Heilige Gees vervul is, kan ons soos Jesus met vrymoedigheid ons gebede voor die Here lê, en geduldig wag dat Hy dit op Sy tyd en Sy manier sal beantwoord. Verder kan ons ook bloot die Heilige Gees vra om namens ons in te tree en om ons te leer wat en hoe om te bid, en om Sy woorde in ons mond te lê as ons tot ons hemelse Vader bid.
Oorgawe in gebed: Vader, ons bid dat ons weer nederig en met kinderlike vertroue soos Jesus sal bid: nie soos Ek wil nie, maar soos U wil. Vergewe ons vir die kere wanneer ons met ‘n hoogmoedige gesindheid aan U bevele wou gee, en U wou verplig om te doen wat ons wou hê. Leer ons weer die eerbiedige vrees vir God en om werklik onder leiding van die Heilige Gees te bid.
Die werk van die Heilige Gees: Hy sal aan jou sê wat jy moet sê
Die Woord daaroor: want die Heilige Gees sal julle op daardie oomblik leer wat gesê moet word (Luk.12:12). Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as die hele Judea en in Samaria tot in die uithoeke van die wêreld (Hand.1:8).
Oorsig daaroor: Daar is absoluut geen waarborg dat ons as Christene slegs voorspoed in ons lewens sal ervaar nie. Inteendeel; ons lewe in ‘n gebroke wêreld en slegte dinge gebeur met slegte en goeie mense (Matt.5:45). Die duiwel is begerig om die werk van God in en deur ons lewens te beëindig. Maar daar ís die volle waarborg dat ons ons nie hoef te bekommer oor wat ons sal moet sê, hoe ons sal moet reageer of wat ons sal moet doen wanneer rampe of vervolging ons in die gesig staar nie. Die geheim is egter dat ons in moeilike tye doelbewus sal wag en na die stem van die Heilige Gees binne-in ons moet luister voor ons praat of iets doen. In sulke oomblikke is daar niemand anders as net jyself wat na die Woorde van God kan luister en dit hardop kan uitspreek nie. Ons word met hierdie doel deur die Heilige Gees bemagtig: om die getuies van Jesus Christus se evangelie te wees waar ons ook al is.
Oorgawe in gebed: Hemelse Vader, ek bid vir die goddelike leiding van U Heilige Gees in my lewe, om by elke geleentheid te kan getuig, maar veral in tye wanneer ek voor rampe of vervolging te staan kom. Help my om op U te wag en slegs te antwoord in ooreenstemming met U wil en plan, sodat ander duidelik sal kan sien dat dit U gesag is wat in sulke tye in en deur my werksaam is.
Die Persoon van die Heilige Gees: Hy is volledig God, nie slegs ‘n krag nie
Die Woord hieroor: Want daar is drie wat getuig in die hemel: die Vader, die Woord en die Heilige Gees, en hierdie drie is een (1 Joh.5:7 OAV).
Oorsig hieroor: Die Heilige Gees is een van die Persone in die Drie-eenheid, volledig God en in wese een met die Vader en die Seun; nie ‘n deel van die Drie-eenheid nie. Hy is een van die Drie-eenheid, en self volledig God. Dit is die Persoon van die Heilige Gees wat doop, salf en bemagtig. Die Heilige Gees is nie net ‘n krag nie, maar ‘n Persoon wat bemagtig. Partykeer kan ons dink dat die werk van die Heilige Gees, die salwing of die teenwoordigheid van die Here, iets anders is as die Persoon van die Heilige Gees. Daar is nie iets soos salwing vir diens of teenwoordigheid van die Here sonder die Heilige Gees nie. Die Heilige Gees oortuig ons van sonde, Hy werk in ons en woon in ons.
Oorgawe in gebed: Vader, openbaar die waarheid aangaande die Persoon en die krag van U Heilige Gees, U teenwoordigheid en salwing aan die Kerk. Help ons om die werklikheid van die Heilige Gees as ‘n Persoon en deel van die Drie-eenheid te verstaan.
Die ontvang van die Heilige Gees: Die stempel van God se genade
Die Woord daaroor: En die Heilige Gees (het) in sigbare gestalte soos ‘n duif op Hom neergedaal. Daar was ook ‘n stem uit die Hemel: “Jy is my geliefde Seun. Oor Jou verheug Ek My” (Luk.3:22).
Oorsig daaroor: Ons sien nie altyd die Heilige Gees fisies op ons neerdaal soos dit met Jesus die geval was nie. In die geestelike sfeer is dit nogtans baie duidelik wat gebeur. Wanneer God die Vader ons die gawe van die Heilige Gees in die Naam van Jesus Christus gee, is dit ‘n teken dat Hy by ons wil woon. Die Heilige Gees is die stempel van Sy genade wat op ons rus. Stel jou vir een oomblik voor dat Hy soos ‘n duif op jou skouer kom sit. Jou optrede sal bepaal of hy ‘veilig’ daar kan bly sit of nie! Net so is dit belangrik om só voor die Here te lewe dat ons die Heilige Gees nie sal te na kom, weerstaan, uitblus of bedroef met ons ongehoorsaamheid en ons sondes nie.
Oorgawe in gebed: Vader, dankie dat U U guns aan Gelowiges betoon deur U Heilige Gees aan ons te gee. Help ons as U Kerk om versigtig en met heilige eerbied vir U te lewe. Help U Kerk om die verantwoordelikheid te besef om U te verteenwoordig in ‘n wêreld wat sonder U lewe.
Die gawes van die Heilige Gees: Is dit sigbaar in die Kerk?
Die Woord daaroor: Daar is ‘n verskeidenheid van genadegawes, … ‘n verskeidenheid van bedieninge … ‘n verskeidenheid van kragtige werkinge, maar dit is dieselfde God wat alles in almal tot stand bring. Aan elkeen afsonderlik word ‘n werking van die Gees gegee tot voordeel van almal. Aan die een om ‘n woord van wysheid te praat … ‘n woord van kennis … geloof … genadegawes van gesondmaking … die krag om wonders te doen … om te profeteer … om tussen die geeste te onderskei … om ongewone tale of klanke te gebruik … om dit uit te lê. Maar al hierdie dinge is die werk van een en dieselfde Gees, wat aan elkeen afsonderlik ‘n gawe uitdeel soos Hy wil (1 Kor.12:4-11).
Oorsig daaroor: Die Heilige Gees gee verskillende gawes aan verskillende mense soos Hy wil. Almal het nie dieselfde gawes nie. Moenie jou gawe met dié van ander vergelyk nie. Moenie dit begeer wat die Heilige Gees aan ander gegee het of dink dat jy superieur is as gevolg van jou gawes nie. Laat ons nederig lewe in die Here se teenwoordigheid en ons gawes gebruik om die Liggaam van Christus te dien en vir die werk van die Here.
Oorgawe in gebed: Vader, help my om die gawes wat U my gegee het, te verstaan en ook hoe om hierdie gawes te gebruik tot voordeel van U Liggaam en tot die bevordering van U koninkryk. Help my om nie hoogmoedig te raak oor my gawes of om die gawes van ander te begeer nie, maar om tevrede te wees met wat ek van U ontvang het.
Om die Heilige Gees se leiding te volg: Leer volharding in tye van beproewing
Die Woord daaroor: Jesus het vol van die Heilige Gees van die Jordaan teruggekom, en deur die Gees is Hy na die woestyn toe gelei (Luk.4:1).
Oorsig daaroor: Dikwels nadat ons helderheid oor God se roeping en doel vir ons lewens gekry het, kan ons ook, soos Jesus, deur ‘n tydperk van stryd en beproewing gaan. Sulke tye kan ons maklik heeltemal ontnugter en wanhopig maak, indien ons nie in nederige gehoorsaamheid aan die altyd teenwoordige Heilige Gees in ons binneste lewe nie. Laat ons eerlik wees hieroor: feitlik niemand spring hierdie “woestynervaring” of “tyd van beproewing” vry nie. Dit is vandag nog net so deel van ons lewens as wat dit in die lewe van ons Here Jesus Christus was. Tog, deur die vervulling van die Heilige Gees wat Hy van Sy Hemelse Vader ontvang het, kon Hy Satan se pogings weerstaan om Sy Vader in die Hemel te betwyfel. Dit is meer as genoeg versekering om enigiets wat die lewe oor ons bring, te deurstaan.
Oorgawe in gebed: Vader, openbaar asseblief aan elkeen van ons hoe belangrik dit is om ons aan die Heilige Gees oor te gee, veral in tye van stryd en beproewing. Gee ons insig oor hoe om op al die lewe se uitdagings te reageer en met praktiese, Bybelse wysheid daarop te reageer.
Om die Heilige Gees te ontvang: Wag
Die Woord daaroor: Voordat Hy in die hemel opgeneem is, het Hy deur die Heilige Gees bevele gegee aan die manne wat Hy as apostels uitgekies het … Terwyl Hy ‘n keer saam met hulle aan tafel was, het Hy hulle beveel: “Moenie van Jerusalem af weggaan nie, maar bly wag op die gawe wat die Vader belowe het, soos julle van My gehoor het” (Hand.1:2, 4).
Oorsig daaroor: Jesus het nie gesê hoe lank hulle moes wag nie, of hoe die “koms van die Heilige Gees” sou wees nie. Hy het hulle slegs beveel om te wag. Na Pinkster is die Heilige Gees weer en weer uitgestort soos op die dag toe hulle dit in die bokamer waargeneem het (Hand.11:15). Deur die krag van die Heilige Gees het Jesus hulle hierdie opdragte gegee. Partykeer wil die Heilige Gees hê dat ons moet wag voordat ons iets doen of sê. As ons op Hom wag, sal ons nie oorhaastige foute maak en deur onwyse optrede skade aan die Here se koninkryk veroorsaak nie. Ons sal die krag van die Here ervaar wanneer Hy werk, eerder as die ramp, verwoesting en mislukking van wanneer ons op ons eie probeer werk.
Oorgawe in gebed: Vader, maak my asseblief bereid om te wag vir U perfekte tyd. Vergewe my vir kere dat ek buite U perfekte tydsberekening en op my eie gehandel het. Leer ons as U Kerk om meer en meer op U leiding te wag.
Die werk van die Heilige Gees: Om vrymoedig die Woord van die Here te verkondig
Die Woord daaroor: Nadat hulle gebid het, het die plek waar hulle bymekaar was, geskud. Hulle is almal met die Heilige Gees vervul en het met vrymoedigheid die woord van God verkondig (Hand.4:31).
Oorsig daaroor: Wanneer daar iets bonatuurliks gebeur, soos hier, is dit belangrik om presies vas te stel wat gebeur het. Toets alle dinge (1 Tess.5:21). As die Heilige Gees uitgestort word, is dit met een doel, en dit is om die Woord van God bekend te maak en om Christus aan die wêreld te openbaar. Die Heilige Gees sal altyd die Woord van God bevestig, getuienis lewer oor Jesus Christus en die Vader bekendmaak. En wanneer die Gees van God ons bekragtig, sal ons nie meer huiwerig of bang wees om onder alle omstandighede die waarheid met vrymoedigheid te praat nie.
Oorgawe in gebed: Vader, ek dank U dat U my so bemagtig het om met vrymoedigheid teenoor enigiemand oor U te praat, te getuig en te verklaar wie U is. Ek bid veral vir die Kerk vandag, dat sy suiwer sal wees in al haar weë, dat sy die waarheid met vrymoedigheid en soveel gesag sal kan onderskei, praat en verkondig dat U Naam te alle tye verheerlik sal word.
Die vrug van die Heilige Gees: Is dit sigbaar in my lewe?
Die Woord daaroor: Die vrug van die Gees, daarteenoor, is liefde, vreugde, vrede, geduld, vriendelikheid, goedhartigheid, getrouheid, nederigheid en selfbeheersing. Teen sulke dinge het die wet niks nie. Dié wat aan Christus Jesus behoort, het hulle sondige natuur met al sy hartstogte en begeertes gekruisig. Ons lewe deur die Gees; laat die Gees nou ook ons gedrag bepaal (Gal.5:22-25).
Oorsig daaroor: As ons met die Heilige Gees vervul is, moet die vrug van die Gees ook in ons gesien kan word. Die vrug van die Gees is net so belangrik as die gawes van die Gees. (Kyk by 14 Februarie 2010).
Oorgawe in gebed: Vader, Seun en Heilige Gees, ek begeer om die vrug van die Gees in my lewe te hê. Wys my asseblief hoe ek moet groei. My begeerte is om in gehoorsaamheid aan U Heilige Gees te lewe sodat ek die vrug van die Gees kan dra waardeur die wêreld kan sien dat die Here waarlik ‘n mens se lewe kan verander.
Die werk van die Heilige Gees in die Kerk: Leiers
Die Woord daaroor: Nou, broers, soek sewe mans onder julle uit wat daarvoor bekend is dat hulle vol van die Heilige Gees is en wysheid het, sodat ons hulle vir hierdie taak kan aanstel (Hand.6:3).
Oorsig daaroor: Dit is belangrik om nie net vakatures in die Kerk te vul nie, maar om persone met ‘n goeie reputasie en vol van die Heilige Gees en wysheid te soek. Hoe dikwels faal die Kerk nie in hierdie soeke nie en stel dan belangrike, welgestelde of invloedryke persone aan om die Kerk te lei. Is ons bereid om die werk met minder mense te doen maar met die versekering dat hulle ‘n intieme verhouding met die Here het?
Oorgawe in gebed: Vader, ons bid vir elke persoon in die kerklike leierskap landswyd, dat U hulle harte sal aanraak met die oortuiging om hulle lewens waar nodig te verander sodat hulle “‘’n goeie reputasie sal hê”, waarlik met die Heilige Gees vervul kan wees en wysheid kan hê omdat hulle U Woord ken en dit liefhet.
Die werk van die Heilige Gees: Die bevestiging van God se werk
Die Woord daaroor: Daarby het God ook saam getuig deur tekens en wonders en ook deur allerhande kragtige dade en gawes van die Heilige Gees, soos Hy dit toebedeel het volgens Sy wil (Heb.2:4). Toe Simon sien dat die mense die Gees ontvang as die apostels hulle die hande oplê, het hy hulle geld aangebied (Hand.8:18-19).
Oorsig daaroor: Hoe dikwels wil ons nie die tekens, wonders en gawes van die Heilige Gees hê nie, maar ons soek nie die Gees self nie. Soek ons waarlik na God in ons najaag van hierdie dinge? Geen wonder dat baie wegdwaal in die proses om vir ander te bewys hoe geestelik hulle is nie. Ons gee geboorte aan ‘n geslag wat ryk en beroemd wil wees eerder as mense wat bereid is om hulle lewens af te lê en Christus op so ‘n manier te verkondig dat niemand hulle onthou nie, maar wel die boodskap wat hulle van die Heilige Gees ontvang het.
Oorgawe in gebed: Vader, vergewe ons as U Kerk, dat ons eerder roem en rykdom najaag en nie ‘n suiwer en heilige begeerte het dat U koninkryk moet gedy nie, dat ons ons eie naam verdedig, eerder as U Naam. Vergewe ons, Heilige Gees, dat ons U nie soek vir wie U is nie, maar vir dit wat ons van U kan kry om sodoende mense daarmee te beïndruk. Vergewe ons, Here Jesus, dat ons nie die Vader liefhet soos U ons geleer het deur Sy koninkryk aan ‘n sterwende wêreld te verkondig nie.
Die werk van die Heilige Gees: Hy vermenigvuldig menslike pogings bonatuurlik
Die Woord daaroor: In die hele Judea, Galilea en Samaria het die kerk ‘n tyd van rus en vrede belewe. Dit het gevestig geraak en in gehoorsaamheid aan die Here gelewe (Hand.9:31).
Oorsig daaroor: Vermenigvuldiging en die vrugte op ons pogings gebeur nie as gevolg van ons eie inspanning nie. Hoeveel van die “programme” wat ons vir die jeug of die jong volwassenes van stapel stuur, dra werklik vrugte? As ons soos die vroeë Kerk in eerbiedige vrees vir die Here lewe, en ons aan die stem van die Heilige Gees onderwerp, sal ons die werk van God deur die krag van God kan doen. Dan sal “siele wen” en “koninkrykswerk” ons aanvuur om met onblusbare energie voort te gaan, en ander aan te trek tot dieselfde lewenskragtige toewyding aan God en Sy werk.
Oorgawe in gebed: Vader, vergewe ons as U Kerk dat ons nuwe idees op die proef stel in ons pogings om mense te oorreed om by kerklike aktiwiteite betrokke te raak sonder dat ons die leiding van die Heilige Gees vra. Vergewe ons dat ons dikwels eerder daarop fokus om mense te vermaak as om U bekend te stel as die Een wat lewens verander. Heilige Gees, ons vra U om ons te lei, sodat die Kerk in ons nasie, die Vader kan verheerlik deur die Seun.
Die Persoon van die Heilige Gees: Sewevoudige Gees van God
Die Woord daaroor: …vlak voor die troon het sewe fakkels helder gebrand. Dit is die sewe Geeste van God. (Op.4:5). Die Gees van die Here sal op Hom rus: die Gees wat wysheid en insig gee, die Gees wat raad en sterkte gee, die Gees wat kennis verleen en eerbied vir die Here (Jes.11:2).
Oorsig daaroor: Die Heilige Gees se teenwoordigheid voor die troon van God word gesimboliseer as sewe fakkels. Die kruisverwysing na hierdie vers word gevind in Jesaja 11:2. As ons met die Heilige Gees vervul is, ontvang ons die volheid van die Gees van God en sal Hy ons Sy wysheid, insig, raad, krag, kennis en eerbied vir die Here gee. As ons bid om met die Heilige Gees vervul te word, moet dit wees om God te eer en om Sy werk te doen. Die Persoon van die Heilige Gees (Jes.11:2) werk deur ons d.m.v. Sy gawes (2 Kor.1-11). Dit behoort in ons lewens sigbaar te wees deur die vrug van die Heilige Gees (Gal.5:22).
Oorgawe in gebed: Heilige Gees, ons bid dat U aan ons, die Kerk, sal openbaar wie U is en wat U deur en in ons wil doen.
Jou liggaam is die tempel van die Heilige Gees: Leef heilig
Die Woord daaroor: Of besef julle nie dat julle liggaam ‘n tempel van die Heilige Gees is nie? Julle het die Heilige Gees, wat in julle woon, van God ontvang, en julle behoort nie aan julle self nie (1 Kor.6:19).
Oorsig daaroor: Andrew Murray het geskryf: Dit is die liggaam wat die tempel van die Heilige Gees is (1 Kor.6:19). As ons met die Gees van God vervul is, sal dit ook in die liggaam na vore kom. As ons deur die Gees ‘n einde maak aan ons sondige praktyke, sal ons lewe (Rom.8:13). Die Gees word spesifiek gegee om ons toe te rus vir dienswerk. Dit is Sy inwoning in die liggaam wat dit lewend maak en laat deel in die opstandingslewe. Toon jou lewe die teenwoordigheid van die Heilige Gees?
Oorgawe in gebed: Vader, ons bely dat ons steeds die weë van die vlees navolg, of dit is om te ooreet of na gewelddadige, immorele films te kyk of twyfelagtige boeke te lees ensovoorts. Vergewe ons dat ons nie ons liggame met eerbied behandel as die tempel van die Heilige Gees nie.
Bron: http://www.jwipn.com/pdf/Persoon_en_werk_vd_Heilige_Gees.pdf
NGVishoek: Ds. ( dominee ) Martin Barnard.
Baie ongelowiges sukkel met die gedagte om in iets of Iemand te glo wat hulle nie kan sien nie. “Seeing is believing” sê hulle. Sulke mense verstaan nie hoe ons ’n pad saam met die Here kan loop nie, want hulle kan Hom nie sien nie. Ek dink egter ons as Christene ken en verstaan ’n dimensie wat vreemd en dwaas lyk vir ’n ongelowige.
Hoe gaan ek en jy vorentoe in die lewe? Waarnatoe kyk ons? Vorentoe of agtertoe? Nou kan ek vra: is dit anders vir ’n gesiggestremde persoon om vorentoe te kyk, of nie? Dink jy hy het ’n voordeel? Ek dink nogal so, want hulle maak nooit staat op sien nie. Hoe “sien” jy die toekoms? Het jou verlede (wat jy tog kan sien) ’n invloed op jou toekoms (wat jy nog nie kan sien nie)?
2 Kor. 4:18
Ons oog is nie op die sigbare dinge gerig nie, maar op die onsigbare; want die sigbare dinge is tydelik, maar die onsigbare ewig.
Die ongelowige glo nie in die hiernamaals nie, want dis onsigbaar. As gelowiges lei ons ons lewens gerig op hierdie onsigbare ewigheid. Die ongelowige glo jy gaan dood soos ’n hond en alles stop net daar. Vir ons egter, gaan die lewe nie net oor die hier en nou, oor die sigbare dinge nie. God, wat onsigbaar is, maak vir ons ’n belofte van ’n onsigbare plek waar ons vir ewig en ewig sal lewe, maar waar ons Hom sal sién! As ek dus nie my hoop kan plaas op iets meer as dit wat ek nou kan sien nie, het ek geen hoop nie. Ons saligheid berus op geloof in die onsigbare. Daardie geloof is gebaseer op die beloftes wat God aan ons gee. Dis geen kuns om in iets te glo wat jy kan sien nie. ’n Mens is net in staat tot geloof deur ’n Goddelike ingryping deur die Heilige Gees, want dit is Hý wat ons geestesoë open om die onsienlike te sien.
Terug na die warm stoofplaat. Ek kan hitte nie sien nie, maar ek kan die effek daarvan sien, bv. jou hand brand as jy daaraan vat, of die hitte maak kos gaar, of smelt ’n stukkie plastiek, ens. Ek glo dus nie in hitte omdat ek dit kan sien nie, maar omdat ek die effek daarvan kan sien.
Dis nou waar hoop inkom. Hoop op ’n toekoms, hoop vir môre, hoop op ’n ewige lewe. As ek een belofte van God kan glo, kan ek alles glo. Hy sê: Ek sal jou red, Ek is saam met jou al sien jy my nie, jy hoef geen onheil te vrees nie.
Rom 8:24-25
Ons is immers gered, en ons het nou hierdie hoop. Wat ‘n mens al sien, hoop jy tog nie meer nie. Wie hoop nog op wat hy reeds sien? Maar as ons hoop op wat ons nie sien nie, wag ons daarop met volharding.
’n Langafstandatleet hardloop na ’n onsigbare wenstreep toe en hy volhard, hy byt vas, hy beur vorentoe, want hy weet dit is daar, al kan hy dit nie sien nie. Ek en jy volhard, ons byt vas, ons beur vorentoe en ons hardloop na ’n wenstreep wat êrens onsigbaar voor ons lê. Die atleet hardloop op ’n pad wat uitgelê is met merkers en aanduidings, want hy weet die pad gaan wenstreep toe. So gee die Here vir ons riglyne en hy waarsku dat daardie pad nou en moeilik is, maar Hy verseker ons dat Hy daar wag met die checkered vlag. Hy is egter ook die helper en aanmoediger langs die pad, die noodhulpman, die sekuriteitsbeampte en die rigtingwyser. Al wat Hy vra is: glo in My, want Ek vat jou na die wenstreep toe, die onsigbare wenstreep. Dit vra onwrikbare geloof van ons kant af. Ware geloof.
Heb. 11:1 Om te glo, is om seker te wees van die dinge wat ons hoop, om oortuig te wees van die dinge wat ons nie sien nie. Om seker te wees van die dinge wat ons hoop. Dit klink soms vir my so na ’n teenstrydigheid. Hoe kan ek seker wees van dinge wat ek hoop? Ek kan sê: ek hoop die Bokke wen, maar hoe kan ek seker wees daarvan as die wedstryd nog nie plaasgevind het nie? Ek kán hoop op ’n ewige toekoms omdat ek seker is van die beloftes van die Een wat my toekoms in Sy hand hou. As ek dus moet “walk by sight”, is daar nêrens om heen te loop nie, niks om voor te hoop nie. Wat kan jy met jou fisiese oë sien wat jou hoop kan gee?
Ons kan God nie sien nie, maar ons kan die effek van God se teenwoordigheid in ons lewe sien. Wanneer jy jou hand op ’n warm plaat druk, dan is die blase die effek van die hitte. As ons soek na ’n effek van God se bestaan en van God se werke is dit maklik:
– Ons wonderlike skepping is “out of this word”. Die wonder van die heelal, die wetenskap, al die dinge wat lewe moontlik maak, die volmaaktheid van die natuur, die voëltjies wat versorg word… as ek hierna kyk, dan moet ek glo.
– Die manier wat ander Christene deur die lewe gaan, byna asof daar een of ander kode in hulle harte geskryf staan, laat my glo. Dis vreemd dat mense wat tot bekering kom, dieselfde geestelike taal praat. Dit móét wees, want die kode is Jesus… as ek dit sien, dan moet ek glo.
– Gebed. Die effek van gebed is alombekend. Het God al jou gebede verhoor? Gebed is eintlik ’n misterieuse iets, maar dit wérk… as ek dit beleef, dan moet ek glo.
– Die effek wat die Woord van God op mense het, is verstommend. Baie, baie mense het al tot bekering gekom deur net die Bybel te lees… as ek dit lees, dan moet ek glo.
So is daar baie dinge wat die gevolg is van die bestaan en werke van Iemand wat ons nie kan sien nie. En vandag vra Hy vir jou en my net om ons harte oop te maak, volgens Op 3:20 Kyk, Ek staan by die deur en Ek klop. As iemand my stem hoor en die deur oopmaak, sal Ek by hom ingaan en saam met hom die feesmaal hou, en hy saam met My.
Dit is ’n belofte. Onsienlik. Dis egter vas en niks kan dit verander nie. As jy jou skuld bely, sál Hy dit vergewe. As jy Hom aanneem, sál jy gered word. Joh. 6:47 Dit verseker Ek julle: Wie in My glo, het die ewige lewe.
Bron: Heuning.co.za
NGVishoek: Ds. ( dominee ) Martin Barnard.