Jesus, wat gekom het om te dien, is gekruisig deur mense vir Hy kom dien het, en Hy het vir hulle aan die kruis gebid: Vader vergeef hulle, want hulle weet nie wat hulle doen nie (Lk 23:34). Jesus vermaan sy dissipels om nie die eerstes of die grootstes te wil wees nie, maar dat ‘n volgeling van Jesus ‘n dienaar van almal moet wees, want die Seun van die mens het ook nie gekom om gedien te word nie, maar om te dien en sy lewe as losprys te gee vir baie mense (Markus 10:43-45). Hy is ons voorbeeld en ons Here.

Hy het gesê: Julle moet julle vyande liefhê, en julle moet bid vir dié wat julle vervolg (Mat.5:44). In Lukas 6:35-6 sê Hy: sonder om iets terug te verwag, moet julle julle vyande liefhê en goed doen en uitleen. Dan sal daar vir julle ‘n groot beloning wees: julle sal kinders van die Allerhoogste wees, omdat Hy self goed is vir die ondankbares en slegtes. Wees barmhartig soos julle Vader barmhartig is.

Paulus vertel van al sy ontberinge en lyding in 2 Kor 11 & 12 en sê in 12:9,10 dat die krag van Christus sy beskutting is in al sy ontbering. Daarom is hy bly oor swakhede, beledigings, ontberings, vervolging en moeilikhede ter wille van Christus, want as ek swak is, is ek sterk.

In 2 Tessalonisense 3:13 sê hy: Moenie moeg word om goed te doen nie. In Romeine 12:19 sê Paulus: moenie self wraak neem, geliefdes, maar laat dit oor aan die oordeel van God.

Daar is seker ‘n perk tot waar jou vermoë strek, maar die Here moet vir ons oortuig waar jy moet begin nee sê.

Bron:  Bybelkennis.co.za

NGVishoek: Ds. ( dominee ) Martin Barnard.

2 Tim 3 : 1 – 9
1 Dít moet jy weet: in die laaste dae sal daar swaar tye kom.
2 Die mense sal selfsugtig wees, geldgierig, grootpraterig en verwaand, beledigend teenoor hulle medemense en ongehoorsaam aan hulle ouers, ondankbaar en ongodsdienstig;
3 hulle sal liefdeloos en onversoenlik wees, kwaadpraters, bandeloos en wreed, sonder liefde vir die goeie;
4 hulle sal verraaiers wees, roekeloos en hooghartig. Hulle sal eerder liefde vir genot hê as liefde vir God.
5 Hulle sal nog die uiterlike skyn van die godsdiens hê, maar die krag van die godsdiens sal hulle nie ken nie. Bly weg van sulke mense af.
6 Party van hulle dring in die huise in en kry liggelowige vroue wat met sonde belaai is en deur allerlei sinlike begeertes gedryf word, in hulle mag,
7 vroue wat altyd iets wil leer, maar tog nooit tot die kennis van die waarheid kan kom nie.
8 Net soos Jannes en Jambres hulle teen Moses verset het, so verset hierdie mense hulle teen die waarheid, mense wat in die verstand verward is en in die geloof ‘n mislukking.
9 Maar hulle sal nie ver kom nie, omdat hulle dwaasheid vir almal duidelik sal wees, net soos dit die geval was met Jannes en Jambres.

Klink bekend, nè? Slegte ou wêreld. Nou ja, hierdie dinge oorheers maar daagliks ons gesprekke en eintlik neem dit maar ons hoop weg, en ons sien nie regtig kans vir die volgende klomp jare wat voorlê nie. Dan hoor ek ook soggens met die inbelprogram dat mense oor die algemeen maar negatief voel oor die wêreld om ons. In 2 Tim 3 lees ons dat ons dit te wagte moet wees in die laaste dae. Die tekens van die tye wat op baie plekke in die Bybel beskryf word. Die vraag is net, wat maak ons met hierdie inligting. As ons dit dan nou reg kan voorspel, dan moet ons maar net terugsit vir die laaste oordeel. Die feit van die saak is egter dat Klaagliedere 5 wys dat dit al lankal so sleg was. Dink maar aan Sodom en Gomorra. Dit lyk vir my ons moet ons hoop op iets anders sit.

Die laaste dae sal sleg wees. Ps 12 : 1 “Help tog, Here, want daar is geen vrome meer nie, daar is geen betroubare mens meer oor nie. Die mense bedrieg mekaar, hulle mislei mekaar met vleitaal.”

Inderdaad. Dit klink of die skrywer (Dawid) die afgelope paar weke nuus gekyk het. Nou ja, hoekom ken ons soveel slegte verhale wat om ons gebeur en hoor ons so min van goeie goed wat gebeur? Wat maak dat die wêreld (wie dit ook al mag wees), ons so bombardeer met negatiewe inligting? Wel, ek dink die antwoord is redelik voor die hand liggend. Dis omdat die mens so behep is met negatiewe sensasie. Hoe gereeld sien jy stories met goeie uiteindes op die TV? Wanneer word ons aan die goeie sy van die lewe blootgestel, en hoekom sien ons niks goeds nie? Eenvoudig, sensasie gaan so maklik af, en so lekker, en dit maak so ‘n goeie skinderstorie. Gou ‘n moedswillige vraag: Het jy al ooit gehuil oor iets baie sleg of negatief wat jy op die nuus gesien het, of oor die radio gehoor het? Nie maklik nie. Ons word so gebombardeer met hierdie dinge, dat ons bitter min besef dat dit ware verhale is, dat mense seerkry, en dit word maar net nog ‘n stukkie “useless information”. Maar, dit is niks nuut nie.

Die probleem is, goeie nuus haal net eenvoudig nie sommer die voorblad nie. Goeie nuus wek nie sensasie nie en maak selde ‘n goeie storie uit. Dit bind nie mense vas voor die TV nie, daar is sekerlik nie plek daarvoor op die TV, of in die koerant nie. ‘n Skinderstorie gaan so lekker af.

Habakuk 3 : 17 – 19
17 Al sou die vyeboom nie bot nie en daar geen druiwe aan die wingerde wees nie, al sou die olyfoes misluk en die lande geen oes lewer nie, al sou daar geen kleinvee in die kampe meer wees nie en die beeskrale sonder beeste wees,
18 nogtans sal ek in die Here jubel, sal ek juig in God, my Redder.

19 Die Here my God gee vir my krag. Hy maak my voete soos dié van ‘n ribbok, op hoë plekke laat Hy my veilig loop.

Hier is ‘n beter kant. Die feit dat ons nie goeie nuus sien nie, beteken nie dat dit nie gebeur nie. Daar is soveel positiewe dinge wat gebeur, maar niemand berig daaroor nie. Kom ek vertel vir jou goeie goed. Die naweek het ons mannekamp gehou en ‘n klomp manne het dramatiese veranderinge ondergaan en groot besluite geneem. ‘n Hele paar gaan ook nie meer hel toe as hulle nou sou sterf nie. ‘n Vriend het wonderbaarlik herstel na ‘n groot operasie, dis niks anders as ‘n wonderwerk nie, selfs die dokters is absoluut verstom. En weet jy, daar is in die afgelope jaar duisende gevalle wêreldwyd van huwelike wat op die rotse was wat wonderbaarlik herstel het. En ja, elke Sondagaand sit daar in die jeugdiens by die kerk ongeveer 2000 kinders (jeug) in die erediens. Daar vind daagliks miljoene eerlike transaksies plaas, mense behandel mekaar so dikwels met respek en doen dinge vir mekaar. Dis ook nie vreemd om te hoor dat mense mekaar in nood bystaan as hulle hulle werk verloor het nie. Weet jy hoeveel Bybelstudiegroepe ontstaan daagliks oor die wêreld? Daar is jaarliks ‘n gebedsdag op sportstadions oor die hele wêreld, en mense pak dit vol om te bid vir ons land. En glo dit of nie, maar mense kry daagliks werk wat lank gesukkel het. Hierdie een gaan jy moeilik glo. Daar is selfs taxis wat vir mens kans gee om eerste te ry. Genuine!! Dit het gister met my gebeur. En ja, daar is mense in die gevangenis wat werklik verander en as nuwe mense uitkom. Daar is pragtige jongmense wat hulle weerhou van voorhuwelikse seks en kies teen dwelms. Daar is Anton Ruperts wat so goed was vir so baie mense, en daar is mense wat verstaan hoe dit voel om ander te seën. Sien jy dit raak?

‘n Negatiewe lewensuitkyk vermoor jou siel. Dit maak dat ons net reageer op slegte goed, en verblind raak vir goeie nuus. Miskien weet jy dit nie, maar daar is besig om ‘n geestelike herlewing uit te breek. Gaan kerk toe, gaan luister wat sê mense wat besig is met sendingwerk. Stel jouself bloot aan positiewe materiaal, en sit soms die nuus af. Probeer onderskeid tref tussen goeie en slegte beriggewing, en vermy gemors in die media. Soos by die nuwe koerantjie wat een keer in die week uitkom, wat so swak is. Regte egte gemors, behoort eintlik op toiletpapier gedruk te word. Maar mense slurp dit op. Ek lees vreeslik graag motiverings boeke, en luister graag na die getuienis van mense.

En laastens, as jy rondom jou kyk, sal jy die Here aan die werk sien. Op meer plekke as wat jy in jou grootste drome kan glo. Kom ons kies waaraan ons onsself blootstel, en leef in hoop. Ek lees die volgende stelling:

“Die Here soek mense wie se harte brand van Sy liefde, om ‘n kersie van geloof en hoop in ander se harte aan die brand te steek.” Gaan dit dalk jy wees vandag?

Bron:  heuning.co.za

NGVishoek: Ds. ( dominee ) Martin Barnard.

• Beter vaderland, want Hy maak God se teenwoordigheid toeganklik vir ons;
• Beter uitkoms, want Hy waarborg ons ewige bestemming; en
• Beter geloof, want Hy is die kern van wat ons glo.

Maak asseblief jou hart en jou hele lewe oop vir hierdie “iets beter wat God vir ons beoog” deur:
• Meer tyd in sy teenwoordigheid te spandeer;
• Meer moeite te doen om sy Woord in te neem;
• Meer gesprekke met mede-gelowiges oor Hom te voer; en
• Meer te doen vir Hom in hierdie stukkende wêreld.

Dan sal:
• Jou lewe meer sin kry;
• Jy vir meer mense iets beteken;
• Jy meer deel word van wat God reeds doen;
• Jy meer bewus wees van sy teenwoordigheid in en om jou; en
• Jy reg wees as Hy weer kom.

Want:
• Ons glo in ons enigste liefdevolle Vader;
• Ons glo in ons enigste Verlosser;
• Ons glo dat sy Gees ons gedurig vernuwe;
• Ons glo in EEN WARE GOD!

Ons God is nie net die Enigste nie, Hy is dié Beste, ja, Hy is dié Allerbeste!

NGVishoek: Ds. ( dominee ) Martin Barnard.

Die regering se agterdog
“Moet my nie verkeerd verstaan nie,” sê Da Wei, ’n pastoor in Beijing, “Die regering sien die Kerk steeds as ’n politiese beweging en wil weet waarmee Christene besig is. Maar hulle metodes het verander. Die polisie gooi ons nie meer in die tronk nie. Hulle nooi ons vir tee, gereeld – soms elke paar dae, ver-al wanneer ons uitgesproke is oor iets waarvan die regering nie hou nie. Die ontmoetings is onaangenaam omdat daar altyd ’n verskuilde agenda is.”

Bekend met vervolging
Die 66-jarige pastoor Chen is ook vertroud met vervolging. Sy ouers het tydens die Kulturele Revolusie ’n huis-kerk gelei. “Ek onthou ’n dag, toe ek nog ’n tiener was, wat my ouers vir my ons Bybels en gesangeboeke gegee het en vir my gesê het om dit te begrawe. Die polisie het kort daarna opgedaag om almal se huise te deursoek. Ek sal nooit die brandende hoop Bybels, wat hulle in Christene se huise gevind het, vergeet nie – ’n afgryslike gesig.”
Vandag is dit heel anders, sê Chen. Hy word ook ‘uitgenooi vir tee’ en toe hy ’n uitnodiging na die Lausanne Konferensie in Suid-Afrika ontvang het, het die plaaslike polisie hom selfs gearresteer. “Hulle wou verhoed dat ek oor die Chinese huiskerke praat. Ek het aan hulle verduidelik dat ek nie van plan was om te gaan nie. Die plaaslike amptenaar het baie verlig gelyk.”

Geld is die nuwe god
“Die aangesig van vervolging het verander,” sê pastoor Chen. “Materialisme is nou ons nommer een vyand.” Met ander woorde: geld is nou China se nuwe Mao en skryf elke aspek van die lewe in so ’n mate voor dat Chinese Christene dit met vervolging vergelyk. Die Kerk worstel met die nuwe situasie. Ouer kerkleiers, dikwels vanuit plattelandse areas, sukkel om aanklank te vind by die jong stedelike Christene, wat gefokus is op die ‘Chinese droom’: ’n goeie werk, ’n wonderlike eggenoot en ’n mooi woonstel in die stad. 
Die nuwe generasie is onbewus van vervolging van hulself, en ook vervolging van ander. “Ek stap ’n pad met ’n 30-jarige stadspastoor,” vertel ’n Geopende Deure medewerker. “Hy het nie besef dat daar vandag steeds baie vervolgde Christene is nie. Ek het stories met hom gedeel vanuit Noord-Korea en die Moslem-wêreld en hy was diep geraak. Die pastoor het gesê dat wanneer sy kerk in die toekoms sterker is, hulle aktief betrokke wil raak by die vervolg-de Kerk en sal wil help waar hul kan.”

Vervolging onder minderhede
Die hoofrede waarom China steeds op die Wêreldwaarnemingslys is, is omdat dit steeds amptelik onwettig is om jou geloof buitekant kerkgeboue te beoefen, maar ook as gevolg van die somtyds wrede vervolging van Christene onder die minderheidsgroepe. In die Moslem-oorheersde Xinjiang, word Uyghur-Christene steeds gedwing om geheime huiskerkbyeenkomste te hou.
Die uitdagings vir die paar honderd Christene in Tibet is soortgelyk. Hulle loop ’n hoë risiko om uit hul huise gegooi te word, fisiek deur hul families mishandel, of deur regeringsamptenare gearresteer te word. Soos die Uyghurs moet hulle in die geheim ontmoet en is hulle grootliks van buitelanders afhanklik om die Evangelie met hulle te deel, hulle te vertel hoe om Christus aan te neem, as Christene te lewe, en as ’n kerk te funksioneer. Om die 2013 wêreldwaarnemingslys te besigtig, besoek: www.opendoors.org.za

Bron:  juig.co.za

NGVishoek: Ds. ( dominee ) Martin Barnard.

NG Kerk Moreletapark is ’n makrogemeente, goed en mooi so, maar hoekom maak gemeentes toe en ander vergroot? Want die kerk is net so goed soos die leiers in daardie gemeentes.

Die leiers maak die verskil. Die Heilige Gees gee die krag, maar hulle voer dit uit.

NG Kerk, lei jou leiers op in die volle waarheid en nie in die tradisies van die mensgemaakte kerk nie.

Bron:  beeld.com

NGVishoek: Ds. ( dominee ) Martin Barnard.

Om te verseker dat hulle niks uitgelaat of bygevoeg het nie, moes hulle die woorde en letters aan die einde van elke sin tel. Elke keer as ’n skrywer by een van God se Name kom – soos Elohim of El-Shaddai – het hulle eers ophou skryf en hulle penne neergesit. Dan het hulle ’n nuwe pen gevat en daardie Naam baie versigtig geskryf. 

Om God se Naam te skryf
Wanneer hulle egter die Naam Jaweh moes skryf – die Naam waarmee God Hom in die brandende bos aan Moses bekend gemaak het – het hulle opgestaan, hulleself gaan was, en nuwe skoon klere aangetrek – klere wat spesiaal vir hierdie doel opsy gesit is. Dan moes hulle bid en hulle sondes bely, en daardie Naam met ’n nuwe pen skryf. 
Dit word nie meer vandag gedoen nie. (Ons publikasie se missieverklaring verseker egter dat elke woord wat na God verwys met ’n hoofletter begin, insluitende die persoonlike voornaamwoord wat na Hom verwys, of wanneer ons na die Here, Verlosser, Evangelie, Bybel of Sy Woord verwys.) 

Die vrees van die Here
Die Bybel leer ons dat   Psalm 111:10. Oënskynlik is daar vandag ’n groot tekort aan wysheid. Wat in die verlede onwettig en ondenkbaar was, word nou op TV, oor die radio, in rolprente, in die media en in tydskrifte aan die groot klok gehang. Ons word met godslastering oordonder. “…die Here sal die een wat Sy Naam misbruik, nie ongestraf laat bly nie.” Eks 20:7.

Pasop Godslasteraars
Ek was tydens my verpligte militêre diens geskok oor die argwaan waarmee soldate die Here se Naam ydellik gebruik. Dit was nogtans opvallend hoe ongemaklik sommige geraak het wanneer hulle dit in die teenwoordigheid van ’n Christen doen. 
Hulle het om verskoning gevra, omdat dit Christene kwets wanneer God se Naam ydellik gebruik word. Maar ek het hulle daarop gewys dat hulle mý nie om verskoning moet vra nie, maar die Almagtige God en Regter, voor Wie hulle verantwoording oor elke ydele woord sal moet doen. Ek was só ontsteld oor die misbruik van God se Naam, dat ek gevra het om die bevelvoerder te sien. In sy kantoor vra hy my toe: “Nou ja, skutter, wat pla jou?” 
Ek vra toe: “Is dit teen die wet om die Naam van die Here te misbruik?” 
Hy het geantwoord: “Ja, jong man, hoekom vra jy? Word die Here se Naam dan in hierdie eenheid misbruik?“ 
“Ja, Meneer. Ek is jammer om dit te sê, maar baie korporaals en sersante laster daagliks die Naam van die Here.” 
Sy gesig het verdonker. “Ek is jammer om dit te hoor, jong man. Ek sal dadelik werk daarvan maak.” Daarmee is ons gesprek beëindig. Tydens die Vrydag se bataljonparade, het die kommandant die eenheid soos volg aangespreek: “Die Here Jesus Christus is die Opperbevelhebber van hierdie weermag. Hy is die Een wat besluit of ons sal lewe of sterwe. Oorwinning of neerlaag is in Sy hande. Julle lewens is in Sy hande. Enige manskap wat die Here se Naam ydellik gebruik, is ’n verraaier en hy sal dienoor-eenkomstig behandel word. Ek sal geen godslastering in hierdie eenheid duld nie!”
En hy het ook nie. Sommige offisiere is van godslastering aangekla, en party is van hulle range onthef. Ons het ook gesien hoe God met godslasteraars in ons geledere werk. By een geleentheid het ’n jong bekeerling ’n berugte lasteraar bestraf omdat hy weer die Here se Naam ydel gebruik het: “Die Here sal jou straf!” het hy gewaarsku. 

Sprakeloos
Die lasteraar het wéér gevloek, sy Coke-blikkie opgetel, en is deur ’n by, wat hy nie gesien het nie, op die tong gesteek. Sy tong het begin opswel, en die res van die peloton kon hulle lag nie bedwing nie. Hy kon dae lank nie praat nie. 
’n Ander vuilprater in ons eenheid is deur een van ons Bybelstudie-groep gewaarsku: “God sal die hardnekkige oordeel!” Kort daarna is dié onderkorporaal se nek so ernstig op ’n hindernisbaan beseer, dat hy weke lank daarna nog ’n nekstut moes dra. 
Hy is behoorlik bespot deur ander ongelowiges wat hom voortdurend aan sy hardnekkigheid herinner het deur na hom te wys en uit te roep: “Hardnekkige!” In Handelinge lees ons hoe God Ananias en Saffira met die dood gestraf het omdat hulle vir die Heilige Gees gelieg en God daardeur oneer aangedoen het. “Die hele gemeente en al die ander mense wat hiervan gehoor het, het baie bang geword.” Hand 5:1-11. 

God se afvalhoop
Die Westminster Kategismus leer ons dat die mens se vernaamste roeping is om God te verheerlik. As ons Sy Naam belaster, is ons besig om die hele doel van ons bestaan te negeer. As ’n elektroniese item nie meer werk nie, beland dit op die ashoop. Die Here Jesus het die ewige verdoemenis as ‘Gehenna’ beskryf, die smeulende afvalhoop van Jerusalem. 
Net soos die rook van dié hoop afval voortdurend opgestyg het, so het die Here die ewige oordeel as God se afvalhoop beskryf. Diegene wat God nie verheerlik nie, sal Sy teenwoordigheid in alle ewigheid nooit geniet nie; hulle sal vir ewig van Hom verwyder wees, op die brandende afvalhoop van die hel. Wanneer die bestaan van die Lewe-Gewer gering geskat word, word ook die lewens van mense geminag. As God gehoon word, word Sy skepsels waardeloos.

Aanbid by jou werksplek
Toe die bekende argitek, sir Christopher Wren, besig was met die bou van St. Paul Katedraal in Londen, het hy opdrag gegee dat die volgende kennisgewing oral op die bouterrein aangebring moes word: “As gevolg van die verfoeilike wyse waarop arbeiders gewoonlik die Naam van die Here misbruik, word almal hiermee in kennis gestel dat misbruik van die Here se Naam in hierdie plek voldoende rede vir onmiddellike afdanking sal wees.” 

Tevergeefse gebede en sang
Miskien sal jy nooit so ver gaan as om die Derde Gebod doelbewus te verbreek nie, maar ’n mens kan die Here se Naam ook ydel gebruik as jy op ’n onnadenkende of meganiese manier bid of lofliedere sing. Om op ’n koue en ongeraakte manier te aanbid, is ook ’n verbreking van die Derde Gebod. In die Here se Naam nader ons tot God deur aanbidding, liefde en gebed. Ons mag so ’n groot Naam nie ligtelik gebruik nie. Bid en loof ons God op só ’n wyse dat Sy Naam nie in ons siele weerklank vind nie? Ons moet in al ons liedere, gebede en prediking opreg, heelhartig en entoesiasties wees. 

Wêreldse aanbidding
Betekenislose aanbidding is die onvermydelike gevolg van ’n wêreldse gesindheid. In baie kerke kan mense gesien word wat rondloer, mekaar opsom, vir mekaar fluister, en wat oënskynlik geen poging aanwend om met hart en verstand op die aanbidding van God te fokus nie. Sommige probeer nie eers om die liedere saam te sing nie. 
En baie bedienaars moedig ’n vermaaklikheidsmentaliteit aan met hulle klem op gemaklike kleredrag en hulle gebruik van ligsinnige, vlak taalgebruik en onbehoorlike grappe. Dit help nou nie juis om respek en eerbied in ons aanbidding van die Heilige God te kweek nie.
“…Hulle kom na jou toe asof dit ’n volks-optog is, hulle gaan sit voor jou, hierdie volk van My, en hulle hoor wat jy sê, maar hulle doen nie wat jy sê nie. Al wat hulle doen, is om aan die begeertes toe te gee waaroor hulle gedurig praat; hulle is net uit op wins vir hulleself. Jy is vir hulle maar net soos iemand wat met ’n mooi stem liedjies vol begeerte sing en die lier goed speel; hulle hoor wat jy sê, maar hulle doen niks van wat jy sê nie.” Eseg 33:31-32. Skynheilige aanbidding is dikwels die gevolg van die weiering om te doen wat die Here beveel. “Watter sin het dit dat julle My aanspreek met ‘Here, Here!’ en nie doen wat Ek sê nie?” Luk 6:46.

Heelhartige aanbidding
Om die Here se Naam opreg en betekenisvol te gebruik, verg heelhartige liefde en gehoorsaamheid. Mense wat die Bybel geringskat en die grondliggende leerstellings van die Christendom verwerp, kan onmoontlik nie ernstig wees wanneer hulle die Here se Naam gebruik nie – want hulle het geen respek vir God se Oppermag nie. Sulke mense is vir hulleself ’n wet; hulle kies watter dele van God se Woord vir hulle aanvaarbaar is, en vertroebel dit dan met hulle filosofieë en mense se politiek. “Tevergeefs aanbid hulle My…” Die Derde Gebod verbied alle onopregtheid, onnadenkendheid, en oppervlakkige aanbidding. Dit verbied valsheid, opstandigheid en ongehoorsaamheid – by almal wat sê dat hulle die Here aanbid. 
Die positiewe deugde wat deur die Derde Gebod vereis word, is deurdagt-heid, opregtheid en heelhartige toewyding aan ons Here en Verlosser. Die vernaamste doel van die mens is om God te verheerlik en vir ewig te geniet. “Waar die hart van vol is, loop die mond van oor.” Matt 12:34. Ons moet onthou “Ons Vader, wat in die hemel is, laat U Naam geheilig word…”

Bron:  juig.co.za

NGVishoek: Ds. ( dominee ) Martin Barnard.

38 Daar was ook ‘n opskrif bokant Hom: “Dit is die koning van die Jode.”
39 Een van die misdadigers wat daar gehang het, het Hom gelaster deur te sê: “Is jy dan nie die Christus nie? Red jouself en ons ook!”
40 Maar die ander een het hom tereggewys en gesê: “Is jy nie bang vir God nie? Jy ondergaan tog dieselfde straf as hierdie man!
41 In ons geval is dit regverdig, want ons ontvang die verdiende straf vir ons dade. Maar hierdie man het niks verkeerds gedoen nie.”
42 Verder sê hy: “Jesus, dink aan my wanneer U in u koninkryk kom.”
43 Jesus antwoord hom: “Ek verseker jou: Vandag sal jy saam met My in die paradys wees.”
44 Dit was al omtrent twaalfuur, toe kom daar duisternis oor die hele land, en dit het tot drie-uur geduur;
45 die son het opgehou om te skyn. Die voorhangsel in die tempel het middeldeur geskeur.
46 Jesus het hard uitgeroep: “Vader, in u hande gee Ek my gees oor. “Na hierdie woorde het Hy die laaste asem uitgeblaas.
47 Toe die offisier sien wat gebeur het, het hy God geprys en gesê: “Hierdie man was werklik onskuldig.”

Jesus word gekruisig en sterf ‘n ongelooflike wrede dood. Waaraan sou Hy dink die laaste paar ure? Wat sien Hy van die kruis af?

In die paar ure wat Jesus aan die kruis hang, praat Hy ‘n paar keer – sewe keer. Die meeste van die kere wat Hy gepraat het, was ‘n bewys van Sy liefde vir ander en van Sy omgee vir mense. Hoe goed sou ek en jy vaar wanneer ons in die ergste pyn denkbaar is, stoksiel alleen. Ons weet nie regtig wat die volgorde van Sy woorde was nie. Dalk iets soos volg:

1. Luk 23 : 33 – 34 “Toe hulle by die plek kom wat Kopbeen genoem word, het hulle Hom daar saam met die misdadigers gekruisig, die een aan Sy linker- en die een aan Sy regterkant. Toe sê Jesus “Vader, vergeef hulle, want hulle weet nie wat hulle doen nie.”
2. Joh 19 : 26 – 27 “Toe Jesus Sy moeder sien en die dissipel vir wie Hy baie lief was, wat by haar staan, sê Hy vir haar, “daar is U seun.” Daarna sê Hy vir die dissipel, “daar is jou moeder”.
3. Joh 19 : 28 “Ek is dors”.
4. Luk 23 : 43 – 43 “Die moordenaar langs Hom sê “Jesus, dink aan my wanneer U in U Koninkryk kom.” Jesus antwoord hom, “Ek verseker jou, vandag sal jy saam met my in die paradys wees.”
5. Mark 15 : 34 “Om drie-uur het Jesus hard uitgeroep: “Eloi, Eloi, lema sabagtani”. My God, My God, waarom het U My verlaat”.
6. Luk 23 : 46 “Jesus het hard uitgeroep, “Vader, in U hande gee Ek My gees oor.”
7. Joh 19 : 30 “Nadat Jesus die suur wyn gekry het, het Hy gesê, “Dit is volbring”.

Jesus praat sewe keer aan die kruis. Met die meeste van hierdie woorde wys Hy Sy hart van liefde.

· “Vader, vergeef hulle, want hulle weet nie wat hulle doen nie”. Ongelooflik! Sal ek en jy dit kan doen? Om vir vergifnis vir ander te pleit wat besig is om jou dood te maak. Sê dit nie iets van hoe vergifnis werk nie? Dink jy nie ook soms jou sondes is net te groot om vergewe te word nie. Genade, hierdie mense vra nie eers vergifnis vir hulleself nie! Jesus doen dit namens hulle. Ek glo met my hele hart dat God die Vader hulle vergewe het, want Sy Seun het daarvoor gepleit! Jesus tree in by sy Vader vir mense wat dit nie verdien nie, wat nie berou het nie, wat nie daarvoor vra nie, wat ook nie eers op daardie stadium glo nie! Hoeveel te meer is daar vergifnis vir ons wat glo, wat berou het, en daarvoor vra. Hierdie mense is eintlik so tipies van ons dag. Hulle kruisig vir Jesus terwyl hulle Sy wonderwerke gesien het, Hom hoor praat het en baie getuienis oor Hom gehoor het. Net so kruisig dié wat nie in Hom glo nie, Hom waarskynlik keer op keer, terwyl ons die Bybel het, steeds wonderwerke sien, Hom hoor praat deur ander, en baie getuienis oor Hom hoor. Steeds tree Hy by die Vader in om nog steeds vir elkeen ‘n kans te gee. Maar jy en ek moet self besluit of ons dit aanvaar of nie. Genade onbeskryflik groot.

· Aan die kruis, vir oulaas, dink Jesus net aan ander. Hy sê vir Sy ma “Daar is jou seun”, en vir die dissipel, “daar is jou moeder”. Jesus sterf nie voordat Hy ‘n baie belangrike taak afhandel nie. Hy maak klaar wat Hy begin het. Jesus demonstreer ‘n hart van omgee. Hy sorg dat Sy ma ‘n heenkome het. Ek wonder nogal wat tot op daardie stadium in Maria se gemoed aan die gang was. Maar Jesus was nie te laat nie, net soos ons ook vandag dikwels dink die Here wag so bietjie lank voor Hy ingryp in ‘n moeilike situasie. Jesus sien selfs in Sy sterwensuur die nood van ander raak, en bring ‘n oplossing, terwyl Hy self oënskynlik nie vir Sy eie lewe ‘n oplossing het nie.

· En dan, die moordenaar aan die kruis langs Hom. Een uitroep. Net een. “Dink aan my wanneer U in U Koninkryk kom”. En Jesus gee Hom die versekering, “Vandag sal jy saam met My in die paradys wees”. Jesus is besig met verlossingswerk aan die kruis. Nie die begin van Sy verlossingswerk nie. Hy het toe reeds baie mense gered. Ook nie die einde daarvan nie, want Hy doen dit vandag nog. Maar aan die kruis, verlos Hy die moordenaar wat daarvoor vra. Terwyl Hy stoksiel alleen is. “My God, My God, waarom het U My verlaat”.

Dan kom Jesus se laaste woorde. “Dit is volbring”. Tetelestai. Toe dink Hy aan my en jou. Glo jy dat Jesus toe reeds jou naam geken het en dat dit in Sy handpalms gegraveer was? Dat Hy daar dalk ook jou naam voor die Vader genoem het, en gesê het, “Vader, vergeef hom?”. Met Tetelestai kyk Jesus van die kruis af na die ganse mensdom as Sy laaste daad van liefde en verklaar dat wat Hy gedoen het op aarde, nou afgehandel is. Soos wat Hy afkyk na die wat Hom gekruisig het en gevra het: “Vader, vergeef hulle” en vir Sy ma ‘n nuwe tuiste gee met “Daar is jou seun” en met die moordenaar “vandag sal jy saam met My in die paradys wees”, kyk Hy af na jou en my en sê: “Ek het nou genoeg verlossingswerk gedoen”.

Daar skuif die verantwoordelikheid van Sy skouers af na my en jou toe. In my menslikheid sou ek dink Hy sou kon vra: “wat moet Ek meer doen, mens”. As dit nie vir jou genoeg is nie, kan niks meer genoeg wees nie. Vat dit net. Die mense wat Hom gekruisig het, het niks eers gevra nie, maar Jesus het vir hulle genade bepleit. Die moordenaar het gevra, en gekry. Wat doen ek en jy? Ons hoef dit net te aanvaar. Want Jesus het ál die verlossingswerk gedoen wat nodig was.

En ek en jy? Ons het ’n keuse of ons dit aanvaar of verwerp. Vat jy dit, of los jy dit?

Bron:  heuning.co.za

NGVishoek: Ds. ( dominee ) Martin Barnard.

• Die twee howe – Joods en Romeins: Die Romeine was die politieke heersers van die Joodse gebied. Hulle het die Jode onder leiding van die hoëpriester toegelaat om oor hulle eie sosiale en godsdienstige sake besluite te neem. Daarvoor het hulle ‘n spesiale raad gehad, naamlik, die Sanhedrin. Die Jode wou van Jesus ontslae raak, omdat hulle gedink het Hy is ‘n lasteraar en moeilikheidmaker. Daarom verhoor hulle hom eers (Mk 14:53-65). Volgens Johannes het hulle egter nie die reg gehad om iemand ter dood te veroordeel nie (Joh 18:31). Daarom het hulle hom na die politieke leier gestuur – hy kon Jesus ter dood veroordeel en het dit ook onder druk van die Jode gedoen.
• Die verraad van Judas: Judas het Jesus verraai, maar waarom was dit nodig (Markus 14:10-11)? Jesus hulle het in die tuin van Getsemane tussen baie ander mense die nag gaan deurbring. Jesus was ook nie van Jerusalem self nie. Hy het uit die noorde, uit Galilea, gekom en was dus nie so bekend nie. Paulus, wat toe ook ‘n jong Fariseër in Jerusalem was, het Jesus glad nie ontmoet nie. Aangesien daar ook nie ligte en sulke dinge in die tuin was nie, sou die soldate maklik ‘n fout kon maak en die verkeerde persoon kon vang. Daarom het hulle iemand saamgevat wat presies geweet het waar om Jesus te kry en toe hulle daar kom, moes hy Jesus spesifiek identifiseer, in sy geval deur Jesus te soengroet (Mk 14:45).
• Die instelling van die nagmaal: Dit is nie maar per toeval dat Jesus by sy laaste ete die nagmaal ingestel het nie. Etes in die destydse wêreld was eintlik sosiale gebeure. Jy het net saam met jou beste vriende geëet en familie en vriende het dit ook gereeld gedoen. Deur nou vir die dissipels te vra om by die etes elke keer aan Jesus terug te dink, het beteken dat hulle gereeld aan Hom bly dink as hulle vriend. Die gedagtes moet hulle dan telkens herinner aan wie hulle is en wat Jesus vir hulle gedoen het. Deur dit aan ‘n ete te bind beteken dat hulle nooit sal vergeet om dit te doen nie, want hulle moet altyd eet.
• Petrus verloën Jesus: Petrus het sulke goeie bedoelings gehad. Hy het vir Jesus gesê dat hy Hom nooit in die steek sal laat nie en toe die toets kom dop hy dit… sommer ‘n paar maal. Hy verloën Jesus. Hy was bang hy sou saam met Jesus gekruisig word – later is hy wel vir Jesus gekruisig. Die rede waarom hy dit nie die eerste keer kon doen nie, is omdat die werklike kruisweg van redding kan net eenmaal en deur een Persoon gestap word – Jesus. Geen mens nie, nie eers Petrus nie, kon dit doen nie. Daarom hardloop Jesus se dissipels sommer al in die tuin van Getsemane al almal weg (Mk 14:50).
• Jesus se gebed: Jesus bid dat die lydensbeker van Hom weggeneem moet word… (Mark 14:32-41). Tog moet sy wil nie seëvier nie, maar die van sy Vader. Hiermee word die menslikheid van Jesus beklemtoon. Hy het nie sommer maar net in die dood ingestap nie, maar het ook die normale menslike vrese gehad. Ons dink dikwels dat dit nie moeilik vir Jesus was om kruis toe te gaan nie, maar die Hebreërskrywer noem Jesus die begin en voleinder van die geloof (Heb 12:2). Hiermee bedoel hy dat toe Jesus voor die kruis gestaan het, het iets heeltemal nuuts op Hom gewag – niemand het na die dood nog vir ewig weer opgestaan nie. Jesus kon dus net in God glo wat Hom sou opwek. Nogtans was sy geloof sterk genoeg om die heilspad enduit te loop.
• Jesus was eintlik onskuldig: Dat Pilatus nie gedink het Jesus is skuldig of dat Hy die dood verdien nie, word in die Evangelies beklemtoon. Pilatus was selfs sy hande in onskuld. Dit maak die skuld van die mense wat Hom wou kruisig nog groter.

Bron:  bybelkennis.co.za

NGVishoek: Ds. ( dominee ) Martin Barnard.

In die Grieks het die woord πίστις (foneties “pistis”) die betekenis om te glo in die goeie nuus aangaande Jesus Christus en om ‘n volgeling van Hom te wees. Maar dit val ook in dieselfde semantiese veld as “vertrou, om staat te maak op, betroubaar”. Meer spesifiek dui dit op ‘n vaste stel oortuigings wat slegs moontlik is in ‘n spesiale interpersoonlike verhouding met God of Christus.

Prakties is geloof nie bedoel om iets bonatuurliks en onbereikbaar te wees nie. Net so vanselfsprekend as wat asem en suurstof is waardeur elke mens lewe, net so natuurlik is geloof in ons as Jesus-mense. Deur geloof word ons in aanraking gebring met die onsigbare wêreld rondom ons. In hierdie nog onbekende wêreld vir ons, bestaan God. So omring die ewigheid waarin die lewende God bestaan, ons.

Hoe kan ons seker wees hiervan? Slegs as ons die sekerheid buite onsself in God ontdek en dan dáárop bou. Geloof word Jesus-mense se oë om God raak te sien. Die wêreld wat sonder God lewe, gaan blind deur die lewe en sien God nie raak nie en gaan so verlore. Jesus-mense sien met geloof vir God en sy goedheid raak. Alleen deur geloof is God alomteenwoordig en liefdevol handelend in ons alledaagse lewe. Maar juis in die asem-wegslaan-wonder van die skepping, sien ons die handtekening van God op elke stukkie detail in die skepping. God het die onmoontlike duplisering van sy sigbare skepping vir ons gegee as sekerheid dat Hy ook in die onsigbare teenwoordig is.

Hoe kan ek iets verduidelik wat ons nie kan sien nie? Hoe oortuig ek ander van iets wat ons as abstrak beskou? Hoe kan ek geloof in God aan ander gee?

Ek kan nie! Net Hy kan!

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Die Hemelvaart van Jesus Christus as Seun van God is een van die groot gebeurtenisse wat nie altyd na waarde geskat word nie. Dit is een van die grootste gebedsverhorings in die Bybel. Jesus het sy hele lewe as gebed vir God gegee, sodat die mensdom se sondes vergewe kon word. Die feit dat God Jesus opneem na die hemel is ‘n bewys dat God Jesus se offer vir die mensdom se sonde aanvaar het. God het hiermee aangekondig dat die aardse sending van Jesus voltooi is. Nou is Jesus saam met God op die troon en regeer Hy saam met God die volgelinge van Christus (die Kerk). Hemelvaart dui die begin van ‘n nuwe tyd vir Christene aan.

Nou moet hulle Christus se getuies wees en die evangelie aan alle mense gaan verkondig. Christene moet nou die gebed van Christus gaan uitvoer. Een manier hoe om dit te doen, is om God se Woord in alle tale te vertaal en versprei sodat elke mens sy eie Bybel op ‘n bekostigbare manier kan besit. Die vertaling en verspreiding van God se Woord is die sendingopdrag wat die Bybelgenootskap onderneem het om uit te voer.

 Die Bybelgenootskap is ‘n Hemelvaart-organisasie, wat onder die opdrag van Handelinge 1:8 en 9 staan. Baie onbaatsugtige ure gaan in die groot opdrag in. Jy kan deel word daarvan deur elke dag te bid vir die vertaling van die Bybel.

Bid ook dat die Bybel toegang sal kry tot mense se huise en harte, sodat hulle Jesus as die Here wat opgevaar het na die hemel, sal erken. Jy kan ook deel word van hierdie groot taak deur die Bybelgenootskap finansieel te ondersteun deur self maandeliks ‘n Bybel te borg. Kyk gerus op die webwerf van die Bybelgenootskap – www.bybelgenootskap.co.za. 

Gebed: Here help my om die groot sendingopdrag van u hemelvaart uit te voer deur u evangelie te verkondig.

Amen

Bron:  versndag

NGVishoek: Ds. ( dominee ) Martin Barnard.