Versorgingsbediening
Die Versorgingsbediening se taak is om deur middel van verskillende maniere by die lewens van lidmate betrokke te raak . Ons sien om na ons mense, besoek siekes en eensames en versorg ons Senior lidmate en hulpbehoeftigdes waar nodig.
Die Voorsitter en Kerraadslid wat hierdie bediening bestuur is Sarie Naudé.
Siekesorg
Daar is gereeld akute sowel as kronies en terminaal siek lidmate wat baie staat maak op n ondersteuningsnetwerk Ook hier word die lidmate deur n groep gewillige mede lidmate besoek om hulle gereeld te bemoedig en waar nodig te help om sekere take te verrig.
Armsorg
Die Gemeente is baie dankbaar dat dit relatief goed gaan met ons lidmate en dat daar nie baie is wat hulp nodig het nie Hulp word hier hoofsaaklik verleen deur kospakkies wat een of twee maal per maand voorsien word en finansiële ondersteuning op n ad hoc basis Lidmate kan ook by hierdie bediening betrokke raak deur nie bederfbare produkte by die kerkkantoor af te lewer om ons sodoende instaat te stel om wanneer nodig kospakkies te verskaf.
Bejaardesorg
Gereelde besoeke word aan Senior lidmate gemaak wat eensaam is en nie naby familie in die omgewing het nie.
‘n Jaarlikse ete word vir ons senior lidmate gereel wat befonds word deur die Wintermark.
Vrouediens
Die Vrouediens bestaan uit ‘n groepie entoesiastiese dames wat hul talente en tyd opoffer om die gemeente by te staan met verskeie aktiwiteite.
Die afgelope jaar was weer bedrywig met oud en jonk, ouers en kinders, plaaslike en verafgeleë mense wat op ‘n manier ‘n ietse ontvang het.
Vir Moedersdag is al die moeders bederf met n pragtige grasangeliertjie in ‘n kleurvolle potjie en ‘n spesiale versie. Die ektra plantjies is geskenk aan die moeders by Nerina Tuine. Vir Vadersdag het elke vader ‘n pakkie droë wors ontvang. Daar is ongeveer 200 pakkies gemaak en die orige droëwors is saam uitreik toe. Selfs op Loeriesfontein en op pad terug is ‘n paar mans met dié geskenkies bederf.
Met die aanmoediging en ondersteuning van die Vrouediens, het die gemeente blokkies gebrei, gehekel en gelap vir ‘n honderd kniekombersies. Die kombersies is verpak en toe aan die dorpsinwoners in Loeriesfontein se ouetehuis, bejaarde dienssentrum, koshuis- en kleuterskoolpersoneel en die sangers geskenk. Die vrouens van die dorp is ook almal getrakkteer tydens ‘n oggendtee, waartydens hulle bederf is met handeversorging en grimering.
Die kinders wat saam op die Uitreik gegaan het, het elkeen ‘n boontjie-warmsak ontvang, wat die kinders op hul beurt agtergelaat het as dank vir die koshuiskind in wie se bed hulle geslaap het. Die Vrouediens het ’n koffiebeker met elke spanlid se naam daarop geskenk; sodoende het elke beker telkens sy eienaar gevind!
Die Omgee-ete by Laerskool Paul Greyling word gereël deur die Omgeekomissie met die hulp van die Vrouediens. Die ete en bediening daarvan word deur die vrouens behartig. Dit het so gegroei dat 186 mense dit bygewoon het. Die saal het gegons met al die Omgeegroepe en die VisVoete wat almal saam gekuier het oor ‘n bord smullekker kos by pragtige tafels wat elk ‘n Bybelvers uitgebeeld het. Die pragtige stemme van Louis Look en Andre het die mense ook vermaak met sangitems.
Die Vrouediens reël jaarliks die Wintermark en Kersmark met die heerlikste tuisgebak, handwerk en snuisterye. Dit het weereens genoeg fondse gegenereer om vir die smaaklike driegangete vir die Seniorete te betaal asook vir die ander Vrouediensprojekte.
Met hierdie fondse, sowel as ander inkomste, word ‘n spesiale projek jaarliks aangepak. Hierdie projek sal oor twee jaar onderneem word en beloof om ‘n groot verskil te maak aan die gemeente se samesyn! Ons het ook nuwe tafeldoeke en ekstra koffiebekers aangekoop – almal wil deesdae na kerk uit die koffiebekers drink!
Die Vrouediens se Kersprojek was die opmaak van spesiale pakkies met basiese benodigdhede en ‘n paar bederfitems vir die Masipumelele matrieks, wie se lewens deur die verskriklike vure graak is so in die middel van hul eindeksamens.
Ons predikantspare word ook tydens hul verjaarsdae bederf en die gemeente word genooi na ‘n tee en koekie na die erediens naaste aan die predikant se verjaarsdag.
Hoevel ons Vrouediens uit ʼn klein groepe vroue bestaan, is vrywilligers baie welkom. Belangstellendes kan Sarie Naudé of Wilma Havenga kontak vir meer besonderhede.