Kuier saam
Basaar
By ons jaarlikse Basaar is dit ʼn geleentheid om saam te kuier en jouself te verlustig aan al die smaakvolle geregte. Al die byvoeglike naamwoorde soos hemels, delikaat, voortreflik, gesellig, verkwikkend beskryf al die geregte. Jy kan weglê aan pannekoek, poedings, kerrie en rys, gebak, spek en eiers, vis en skyfies, boereworsrolle en hamburgers. Daarmee saam kuier ons by die teetuin, dankbaarheidstafel, handwerktafel en kan jy jouself verder bederf met sjokolade en roomys asook koeldranke. Informeel word hier gesellig saam gekuier. Een van die hoogtepunte van die jaar.
Kommetjie Hoenderbraai
Vroeg in die jaar kuier ons saam by die Kommetjie hoenderbraai. Vroegdag word die vure aangesteek, die tafels word gedek by Kommetjie Laerskool en 18:00 daag die gemeente op en kuier hul tot laat aand. Hier smul ons aan hoendervleis, slaaie, broodjie en nagereg met ʼn tee/koffie om mee af te sluit. Daar heers ‘n ontspanne, opgeruimde atmosfeer wat ‘n Kommetjie-gees van Christen omgee weerspieël.
Wintermark
By die Wintermark skep ons geleentheid vir gemeentelede en ander entrepreneurs om tuisgemaakte handgemaakte artikels teen bekostigbare pryse te verkoop. Die tafels kreun onder die interessantste items en daarmee saam is daar ook ʼn spyskaart en teetuin beskikbaar waar daar luilekker saam gekuier kan word.
Kersmark
3 dae van koop en geniet. Top kwaliteit items word hier te koop aangebied by ons jaarlike Kersmark. Kom koop jou familie se kersgeskenke teen bekostigbare pryse. ʼn Wye verskeidenheid gebak, spesiaal vir al die kuier gaste tydens die Kersvakansie, word hier aangebied asook heelwat ander items. Pannekoek asook etes word saam met koffie en tee aangebied.
Teedrink
Sondag oggende direk na die erediens word daar gesellig saam tee gedrink in die Mediasentrum wat in die dubbel motorhuis reg langs die kerk is. Hier kan die gemeente saam ʼn koppie tee of koffie geniet en deur die boeke van die mediasentrum blaai. Hier kuier ons as gemeenskap van gelowiges saam. Dit is heerlik om daar verby te stap en die geskerts en gelag te hoor. Hier is ‘n ideale geleentheid om nuwe mense/lidmate te leer ken.