Die gee van ‘n tiende (10%) van jou inkomste aan die kerk is ‘n algemene bespreking onder Christene. Is dit verpligtend? Hier is hoe Christene hierdie vraag eenvoudig benader:

🌟 Wat beteken ‘n tiende?

‘n Tiende beteken letterlik “tiende deel.” In die Ou Testament moes die Israeliete 10% van hulle oes, vee en inkomste gee as ‘n daad van aanbidding, dankbaarheid en ondersteuning vir die gemeenskap en tempel (Levitikus 27:30; Maleagi 3:10).

🌟 Moet Christene vandag nog ‘n tiende gee?

Christene verskil effens hieroor, maar hier is die algemene en gebalanseerde siening:

• Nie ‘n wetlike verpligting nie: Christene vandag is nie wetlik gebind aan Ou-Testamentiese wette nie. Die Nuwe Testament beklemtoon eerder vrygewigheid, blymoedigheid en opoffering, gemotiveer deur liefde eerder as verpligting (2 Korintiërs 9:6–7).
• ‘n Nuttige riglyn: Alhoewel nie wetlik verpligtend nie, beskou baie Christene die 10% tiende as ‘n goeie riglyn of beginpunt vir vrygewigheid. Dit word gesien as ‘n betekenisvolle geestelike dissipline wat vertroue in God se voorsiening wys.

🌟 Vrygewigheid is belangriker as persentasies

Die Nuwe Testament beklemtoon eerder die hart en houding agter gee as streng reëls of spesifieke persentasies. Christene word aangemoedig om te gee:

• Met blydskap: Met vreugde, nie onwillig of onder druk nie (2 Korintiërs 9:7).
• Vrygewig en opofferend: Gee op ‘n manier wat dankbaarheid wys vir God se goedheid en voorsiening (2 Korintiërs 8:1–4).
• Gereeld en bedagsaam: Beplan jou gee doelbewus, eerder as net sporadies of emosioneel (1 Korintiërs 16:2).

🌟 Die doel van gee

Om vir die kerk en ander te gee het belangrike doeleindes:

• Ondersteun die kerk se missie: Help met bediening, uitreikwerk, sending, onderrig en gemeenskapsorg.
• Wys vertroue in God: Gereelde gee wys jou vertroue en afhanklikheid van God se voorsiening.
• Kweek dankbaarheid en nederigheid: Gereelde gee help jou om materialisme en selfsugtigheid te vermy.

🌟 Vryheid en verantwoordelikheid

Christene het vryheid in hoeveel hulle gee, maar die Bybel moedig sterk aan om konsekwent vrygewig te wees as ‘n belangrike deel van Jesus volg. Alhoewel die 10% nie ‘n streng reël is nie, is dit ‘n goeie beginpunt vir doelbewuste vrygewigheid.

Kortom, Christene hoef nie streng ‘n tiende te gee nie, maar hulle word sterk aangemoedig om gereeld, vrygewig, blymoedig en opofferend te gee. Die hart en motief agter gee is belangriker as die spesifieke persentasie. Gee is ‘n daad van aanbidding, vertroue, dankbaarheid en deelname aan God se werk; nie bloot ‘n godsdienstige verpligting nie.

Kort Gebed:

“Gee met ‘n vreugdevolle hart”

Vrygewige God, Dankie dat U in al my behoeftes voorsien en my ryklik seën. Leer my om met ‘n blymoedige en dankbare hart te gee, nie uit plig nie, maar uit liefde vir U. Gebruik wat ek gee om U koninkryk te bou, ander te seën en U naam te verheerlik. Help my om U volledig te vertrou en om vrygewig te leef, soos U vrygewig teenoor my is.

Amen.

Hoe sou mens kwaliteit meet?
· Aan die prys?
· Aan die funksies van die artikel, bv. elektriese vensters, lugreëling, lugsakke, ens.
· Aan die duursaamheid?
· Aan die hoeveelheid plesier wat dit verskaf?

Waarin lê die kwaliteit van jou lewe? Dit kan dalk help om te vra: “Wat het gister in jou lewe gebeur?”:
· Het dit jou plesier verskaf?
· Het daar iets gebeur wat jy lank sal onthou?
· Was dit ‘n waardevolle dag?

Sou jy jou lewe as ‘n kwaliteit lewe beskou, of sou jy sê:
· Ek bestaan, en ek haal asem, maar ek lééf nie
· Die een dag is ‘n groter marteling as die ander

Pred 2:17-26 
Ek het die lewe gehaat, want alles wat in hierdie wêreld gebeur het, het vir my sleg afgeloop. Alles kom tot niks, dit is ‘n gejaag na wind. Ek het alles gehaat waarmee ek my in hierdie wêreld met soveel sorg besig gehou het, want ek moet dit nalaat aan dié een wat ná my kom, en wie weet of hy ‘n wyse of ‘n dwase mens sal wees? Tog sal hy beskik oor alles wat ek met sorg en oorleg in hierdie wêreld bymekaargemaak het. Dit kom dus ook tot niks. Wat het die mens nou eintlik aan alles waarmee hy hom met soveel sorg en ywer in hierdie wêreld besig hou? Elke dag bring vir hom pyn en elke onderneming ergernis; selfs snags kom hy nie tot rus nie. Ook dit kom tot niks. Dit is nie aan die mens self te danke dat hy kan eet en drink en onder al sy arbeid nog die goeie kan geniet nie. Ek het ingesien dat dit ‘n gawe uit die hand van God is. Wie kan eet, wie kan geniet as Hy dit nie moontlik maak nie? Vir die mens met wie se lewe God tevrede is, gee Hy wysheid, kennis en blydskap. Maar die een met wie Hy nie tevrede is nie, kry die taak om op te gaar en bymekaar te maak en dit dan te gee aan een met wie God tevrede is. Ook hier kom dit dus tot niks. Dit is ‘n gejaag na wind.

Die prediker het dieselfde gevoel. Maar …. vandag gaan ek en jy sin soek in die lewe.

Ek wil dit vir jou vergelyk met ‘n vendusie, veiling. Ek het lank gelede elke Saterdag by ‘n veiling gaan rondsnuffel, en eintlik net ‘n klomp stukkende goed gekoop. Mensig! Daar was gemors by die plek, wat geen mens wil hê nie. Ten spyte daarvan was daar ‘n klomp mense wat elke week daar was, en wat baie dikwels puik winskopies opgeraap het, nadat hulle gebie het dat die spoeg so spat! Jy sien, hierdie ouens het iets besef: as jy lank genoeg tussen die rommel grou, kom jy dalk op ‘n diamant af. Soms moet jy diep grou en hard werk om iets te kry, soms was daar teleurstelling, soms ‘n winskoop … maar hulle was elke week daar.

Só is die lewe. Soms is dit soos ‘n hoop vendusie-rommel, soms moet jy krap, diep krap om op iets sinvol af te kom. Soms is daar teleurstellings, maar grou diep genoeg en jy kry dalk ‘n diamant. Net dié wat die rommel wegwerk het ‘n kans. Het iemand al ‘n vendusie na jou huis toe gebring? Nee! Gaan die goeie van die lewe agter jou aanstap? Nee! Is die lewe nét rommel? Nee! Is daar genoeg diamante daarin vir almal? Ek dink so… vir dié wat die vendusie bywoon.

Verbeel jou jy is op die vendusie van die “lewe” :
Daar is een gebou, een spul rommel, ‘n afslaer, en baie, baie kopers. Ons is die kopers. Sommige kopers is opgewonde, ander nie. Party kom in, kyk so oor die rommel, en sê: “Nee wat, hier’s net ‘n klomp gemors”. So maak baie van ons vandag met die lewe: “Ag nee wat, dis alles tevergeefs. Daar is niks lekker in die lewe nie. Niks is meer die moeite werd nie.”

Iemand anders kom by dieselfde rommelhoop en sê: “Hier moet iets wees”. Dis die mense wat die diamante van die lewe onder die hoop rommel raaksien, want hulle fokus nie op die rommel nie. Hulle doen nog meer: hulle pak die rommel van bo af weg, soekend, gefokus, met ‘n verwagting op iets goed. Hierdie is die mense wat elke lewensdag met ‘n verwagting aanpak, wat die arms uit die moue steek, die sokkies optrek en aan die werk spring om die beste uit elke dag te haal.
Sommige mense bie op iets wat hulle nie eers seker is of dit nog werk nie, maar hulle vat ‘n kans, hulle probeer, weer en weer, oor en oor, tot hulle met ‘n diamant in die hand staan.

Langs hierdie persoon staan iemand anders wat sê: “Jy sal nooit iets kry nie”. Self probeer hierdie persoon nooit, hy staan net en kritiseer… en dan pak hy op en gaan soek na iets beter op ‘n ander rommelhoop, want die rommel is mos altyd mooier aan die anderkant van die draad …!

Om die lewe te geniet is ‘n kuns. Om voluit te lewe vra iets: geduld, vasbyt, uithou, deurdruk, ens. Kwaliteit van lewe lê in jou gesindheid, in hoe jy na die lewe kyk, en nie in jou beursie nie.

Hier is ’n paar oulike aanhalings, wat my nogal laat dink het:

· “I look to the future because that’s where I’m going to spend the rest of my life”
· “The world is like a mirror: if you face it smiling, it smiles right back”
· “Don’t count the days, make the days count”
· “Live each day in the present, and make it beautiful”
· “Don’t fear pressure, for pressure is what turns rough stones into diamonds”
· “Enjoy life, this is not a rehearsal”
· “Learn to listen. Opportunities sometimes knocks very softly”
· “Happiness is not having what you want. It’s wanting what you have”
· “Good times, become good memories. Bad times, become good lessons”

Drie vrae en my antwoorde daarop:
· Is daar kwaliteit lewe in Suid-Afrika? Ja! Ek is jammer as jy dit mis.
· Kan jy ‘n kwaliteit lewe hê sonder geld? Ja, dit kos niks.
· Kan ‘n mens se gesindheid verander? Ja, as jy WIL.

Dit is waar dat die rommelhoop dalk groter word, maar die diamante is dáár. Die kompetisie word groter, maar jy kan nog altyd bie!

Begin vandag om die kuns van lewe aan te leer. Jy kán. Hou jou oog gerig op Jesus.

Bron:heuning.co.za

Vir hierdie geheimenis het ek gaan kers opsteek by een van die grootste Christelike skrywers van alle tye, CS Lewis (1898-1963). In Mere Christianity skryf hy: “As ek koring wil produseer en nie gras nie, moet die verandering dieper gaan as die oppervlak. Ek moet omgeploeg en oorgesaai word.” Die nuwe lewe in Christus, is werklik ‘n totaal anderse manier van lewe. Ek kan nie maar net my ou gewoontes probeer afleer nie. Sekere dinge stop volledig. Ek kan nie dat die tydelike dinge van hierdie wêreld my lewe beheer en te gelyker tyd die ware innerlike geluk by God vind nie.

“Die Bybel sê dat alles vir Christus gemaak is en dat alles in Hom saamgevoeg gaan word.” (CS Lewis) Hiervoor vra Jesus volledige oorgawe, dat ek myself sal kruisig, my eie wil 100% ondergeskik aan sy wil sal maak. My “eie ding” word volledig vervang met “sy ding”.

Hierdie werking van die Heilige Gees in ons, is tegelyk baie eenvoudig én baie ingewikkeld: solank ek nog self probeer om te verbeter en nader aan volmaak te kom, sal dit onmoontlik en baie swaar wees vir my; MAAR as ek volledig oorgee en 100% geleentheid gee dat God se Gees in my, doen wat Hy graag doen, dan is ek verander en is dit baie maklik. Lewis haal Jesus so aan: “Gee jou gewone self vir My, met al jou begeertes – dié wat jy dink goed of onskuldig is, saam met dié wat jy as sondig beskou, die hele spul. Ek sal jou ‘n nuwe self gee. Om die waarheid te sê, gee Ek vir jou Myself. My eie wil sal nou jou wil word.”

Hiervoor staan ek en jy daagliks in ons gewone lewe voor baie keuses:

• Wie of wat beheer my tyd?
• Wie of wat is my dryfkrag?
• Wie of wat maak my gelukkig?
• Wie of wat beïnvloed my?

Wil jy ‘n “halwe Christen” wees, as daar so iets is? Of wil jy volledig aan Christus behoort?

Volledige oorgawe is die ENIGSTE manier!

Bron:  http://doomcharl.blogspot.co.za/

Miskien is die grootste “afkoeling” van Jesus se boodskap die terugdwing hiervan in stagnante godsdienstige sisteme. Dit het sedert die vierde eeu begin gebeur toe die Christendom die staatsgodsdiens geword het. Toe het kerkleiers verander in priesters; die Sondag het weer ‘n Sabbat geword; kerkgeboue het verander in heilige geboue, en die samelewing is afgegrens in terme van “ons” en “hulle” – kerklike terrein en die gewone wêreld.

Hoe anders was die nuwe werklikheid nie wat Jesus tot stand gebring het nie. Hy het God sesjalom uitgedeel aan sondaars, vreemdelinge, randfigure, vroue, kinders… Hierdie hemelse vrede het gerealiseer binne herstelde verhoudings met God en mekaar, en nie deur slaafse betrokkenheid binne ‘n formele godsdienstige kultus nie. Die nuwe verhaal wat Jesus voorgeleef het, ken geen aparte godsdienssisteem ver verwyderd die regte lewe met amptelike personeel en lewensvreemde gebruike nie.

Jesus het geweet dat God se nuwe koninkryk hier en nou in die regte lewe inbreek. Hierbinne ontplooi God ‘n nuwe beweging van voltydse navolgers van Jesus wat om elke hoek en draai tekens van hulle Vader se koninkryk oprig deur hulle wyse woorde, liefdevolle dade en lojale verhoudings. Binne die Jesusbeweging gaan dit oor onderlinge liefde en uitwaartse diens ter uitdrukking van God se missie in die wêreld. Hier seëvier momentum, nooit monumente nie!

Te veel menslike termostate peuter vandag met die Jesus verhaal en koel dit vanaf vuurwarm tot kamertemperatuur af. Dit gebeur wanneer “slim” godsdienstiges meen dat hulle met post-mortems op die Bybel as ‘n uitgediende dokument besig is, of wanneer mense leweloos voortstrompel van die een stagnante godsdienstige byeenkoms na die ander. Die evangelie funksioneer teen kamertemperatuur as dit geen helende effek meer op die omringende wêreld het nie.

Om Jesus reg na te volg, is om brandende én wyse harte te hê wat daagliks grond raak in ‘n wêreld in nood. Hoor net hoe stel Peter Rollins (How [not to] speak of God, 2006) dit: “Orthodoxy as right belief will cost us little; indeed, it will allow us to sit back with our Pharisaic doctrines, guarding the ‘truth’ with the purity of our interpretations. But orthodoxy, as believing the right way, as bringing love to the world around us… That will cost us everything.”

Bron:  ekerk.org

Terwyl eersgenoemdes ruim tyd spandeer op selfone en epos, spandeer die i-generasie meer tyd op SMS’e as aan telefoongesprekke. Ook verkies hulle Facebook bo epos.

Hoër lewensverwagtings lei ook tot splinternuwe generasiegapings tussen hoër ouderdomsgroepe. Beter mediese sorg is hier die rede. Nuwe tegnologie en kennis dryf verskuiwende generasiegapings. Beide se lewensduur is korter as ooit. Terwyl ‘n tipiese videospeletjie tans 60-70% van die totale verkope binne die eerste week na die bekendstelling verdien, is alle bestaande kennis in tegnologiese, mediese en meeste ander gebiede tans binne 4-8 jaar verouderd.

Hierdie vinnige veranderings en die gepaardgaande nuwe generasiegapings herinner my aan ‘n verlore generasie wat ontstaan het tussen Josua 24 en Rigters 2. Terwyl die ouer leiers van Israel plegtig vir Josua belowe het hulle sal die Here dien, vertel Rigters 2:10 dat die daaropvolgende generasie Godloos grootgeword het. Hulle het niks geweet van sy groot dade nie. Hoe keer ons ‘n herhaling van Rigters 2 in vandag se vloeibare wêreld? Wel, die Bybelse roete van die liefde is steeds tydloos en ook nie generasie-gebonde nie. Geen generasie is liefdesbestand nie. Of immuun teen respek nie. 1 Petrus 2:15-18 verduidelik hoe ‘n tydlose (en generasielose!) roete van goed doen in die Here se naam lyk. Dit sluit in respek vir ander; liefde vir medegelowiges; vrees vir God, en eerbied vir owerhede.

Interessant genoeg dink die Nuwe Testament nooit in terme van ouderdom wanneer die uitleef van geloof ter sprake is nie. Mense is nooit te jonk of te oud om die hartklop van die Bybel relevant agterna te leef nie. Petrus se woorde op Pinksterdag in Handelinge 2:17-18 verduidelik juis beeldryk dat die Gees met ouer mense in drome konnekteer, en met jonger mense in visioene.

Natuurlik moet ons nie blind wees vir groeiende generasiegapings nie. Verskillende ouderdomsgroepe moet mekaar daadwerklik dien met die Here se liefde en nie wag op betaalde geestelikes om dit namens hulle te doen nie. Eie-generasie bedienings is eietyds en noodsaaklik.

In dieselfde asem moet generasies ook vir ander generasies omgee as ons ‘n daadwerklike impak in die Here se Naam in Suid Afrika wil maak in die volgende jare. Die 2011 sensus bevind 29,2% van Suid Afrika se populasie is jonger as 14 jaar. Slegs 5,3% is ouer as 65, terwyl 49,2% Suid-Afrikaners jonger is as 24. Ouer persone moet dringend in hulle gemeenskappe aanmeld as mentors wat ander generasies kan dien en begelei. Jonger generasie kort dringend wyse mentors, terwyl ouer generasies weer by hulle moet kom leer hoe werk die nuwe tegnologiese wêreld!

Ons roeping is om generasiegapings tussen mense oor te steek in die Here se Naam. In Paulus se woorde in 1 Korintiërs 9 moet ons bereid wees om vir die Jode ‘n Jood te word en vir die Grieke ‘n Griek. Anders is nog verlore generasies ons voorland. Dalk is die huidige verlore generasie juis diegene wat in hul eie godsdienstige geriefsones verstik geraak het en niks meer omgee vir ander nie.

Bron:  ekerk.org

Soms doen die Here iets gróóts in ons lewe, ons getuig van ‘n bonatuurlike wonderwerk, ons is bly dat daar ‘n lewende God is, ons sê dankie, en getuig van verhoë af van hierdie wonderwerk en God se grootheid, en dan …. môre twyfel ons weer. Wanneer moeilikheid kom (dalk kleiner as ons vorige probleme) vergeet ons van die groot dinge wat God gedoen het, en ons vergeet van “dankie” … soos hierdie ouens van wie ons hier lees:

Luk 17:11-19
Op sy reis na Jerusalem toe het Jesus al met die grens tussen Samaria en Galilea langs gegaan. Net toe Hy ‘n sekere dorp wou binnegaan, kom tien melaatse mans Hom tegemoet, maar hulle bly op ‘n afstand staan en roep hard: “Jesus, Here, ontferm U oor ons!” Toe Hy hulle sien sê Hy: “Gaan wys julle vir die priesters.” Op pad daarheen het hulle gesond geword. En een van hulle het, toe hy sien dat hy genees is, omgedraai en God hard-op geprys, Hy het voor die voete van Jesus neergeval en Hom gedank. Hierdie man was ‘n Samaritaan. Toe sê Jesus: “Was daar nie tien wat gesond gemaak is nie” Waar is die ander nege dan? Is daar niemand anders wat omgedraai het om God die eer te gee behalwe hierdie man wat nie eers ‘n Jood is nie?” En vir hom sê Hy: “Staan op en gaan huis toe. Jou geloof het jou gered.”

Baie dankbaar – maar nie vir baie lank nie. Jy sien, hierdie 9 ouens se geloof was wat ons noem tydelike geloof, of dalk spaarwiel geloof, geloof wat vir Jesus misbruik het. Ek dink ons almal was al in hierdie misbruik-skoene, veral as jy kinders/tieners het. Hierdie ouens was deeglik bewus van Jesus se mag en wonderwerke. Hulle het verseker geglo in Jesus. Toe Jesus sê: gaan wys julle vir die priesters, het hulle dadelik geloop; hulle het gesond geword, en nege hou aan loop. Net een draai terug na die Bron van hulle genesing. Net een is bly genoeg dat hy genees is. Is hierdie 1 uit 10 verhouding dalk vandag van ons ook waar? Ek hoor nou die dag van ‘n persoon wat glad nie in die Here glo nie, want, sê sy: die Here het nog nooit iets vir haar gedoen nie…… wat van die suurstof wat jy elke dag gratis inasem?

Jy sien, ons sien graag die buitengewone wonderwerke raak, maar besef nie dat wonderwerke elke dag om ons is nie. Onthou jy toe ons nou die dag gepraat het oor mense met gestremdhede? Is jy dankbaar dat jy self toilet toe kan stap en die deksel kan oplig? Net dit! Of het jy ook (soos ek) nog nooit daaraan gedink dat dit ‘n voorreg is nie?

Hier in Lukas 17 is dié een, die werklike dankbare een. Ek dink egter hierdie ou het meer gekry as waarop hy ge-“bargain” het. Hy kry nie net fisiese gesondheid nie, hy kry ook ewige gesondheid. Jesus sê vir hom: jou geloof het jou gered. Nege ouens kry fisiese gesondheid, en dit lyk of Jesus hulle laat begaan maar kry (so lyk dit) nie ewige gesondheid nie. Hulle word nie gered nie. Vir hulle werk net een deel van hulle geloof, die geloof vir hier en nou. Hierdie nege ouens staar hulle blind teen hulle liggaamlike gesondheid, en besef nie dat hierdie nuwe, gesonde liggame hulle niks gaan help in die ewigheid nie. Hulle tydelike geloof se opbrengs is maar van korte duur.

Die dankbare persoon is eerstens nie ‘n Jood nie, maar ‘n Samaritaan – ouens wat tradisioneel as heidene beskou is. Hy doen ‘n paar goed:

1)     Hy draai om en gaan terug na Jesus toe

2)     Hy prys die Here hardop

3)     Hy val voor Sy voete neer

4)     Hy bedank Hom

En toe, op die koop toe, verkry hy sy saligheid. Ware geloof in aksie. Geloof wat ‘n groter opbrengs gee as hier en nou.

Dankbaarheid is dalk iets waarmee ek ook nie so goed is nie. Ek is baie bly as iets goed gebeur, en vergeet dit maar ook weer baie gou. Ons roep die Here aan in ons dag van benoudheid, en glo dan regtig opreg. Ek dink ons moet net bietjie verder gaan met dankbaarheid; laat dit oorgaan in geloof. Moenie dinge as vanselfsprekend vat nie.

Goeie gesondheid is iets waaraan baie mense “ly”. Maar ons vergeet van dankbaarheid solank daar goeie gesondheid is. Kyk hoe ironies hierdie hele situasie is. Ons sê nie sommer dankie as dit goed gaan en ons gesondheid goed is nie. Wanneer ons egter hierdie goeie gesondheid verloor, is ons vinnig om by die Here te pleit vir genesing. Dan kom die genesing, en ons sê so ’n vinnig dankie (of glad nie)… en dan vergeet ons maar weer.

In vers 12 lees ons: “… maar hulle bly op ‘n afstand staan en roep hard: Jesus, Here, ontferm U oor ons”. Ek dink nie die Here wil hê ons moet op ‘n afstand staan en uitroep vir gunsies nie. Ek dink Hy soek ons by Sy voete, in ‘n intieme verhouding. Verseker nie vir spaarwiel geloof nie, maar ‘n naby vriendskap. Ek dink die Here hoor nogal gereeld dankies vir die bonatuurlike, maar selde vir die alledaagse wonderwerke, soos asemhaal, soos om iets te ete te hê, soos liefde van vriende, soos gemak by die huis, ‘n motor, ondersteuningstelsels, ens.

“Hy het voor die voete van Jesus neergeval en Hom gedank” …. wees vandag dankbaar!

Bron:heuning.co.za

Dis baie makliker om ’n “groot Christen” op ’n afstand te bewonder vir sy/haar wandel met die Here. Die toets lê egter in die dag tot dag interaksie met my dierbares, daar waar ek my skanse laat sak en maklik my “sê” sê.

Dis so maklik om my te wip wanneer dit klink asof iemand onvriendelik teenoor my is. En net so maklik om terug te kap wanneer iemand ’n snedige opmerking maak of my te na kom.

Ek kan egter kies om met vriendelike woorde lewe te bring (Spreuke 15:4). Susan moes hierdie keuse maak toe sy hoor dat Marietjie baie ongelukkig is oor Susan wat die voorsitster van die gemeente se vrouediens is, nie meer kom help koeksisters bak nie omdat haar man in die hospitaal is. Susan het gekies om met ’n klein geskenkie en ’n kaartjie verskoning te gaan vra omdat sy vir Marietjie teleurgestel het. Dit was ’n baie kragtiger manier om die onmin op te klaar as om met konfrontasie en verduidelikings haar kant te probeer stel. Die Heilige Gees het Marietjie oortuig van haar eie onverdraagsaamheid en die verhouding is herstel en die Koninkryk het nie skade gely nie.

Selwyn Hughes het dit so mooi raakgevat toe hy gesê het: “Unconditional love is the most powerful force in the universe, because it creates its own response every time.” Wanneer ek daagliks kies om Geesbeheerd te lewe, stel dit my nie net in staat om my knorrige huweliksmaat of buierige tiener te vergewe nie, maar om met soveel opregte liefde en respek op te tree dat die ander persoon dit byna outomaties begin terugkaats na my toe. Ek sou egter ’n totaal ander resultaat gekry het as ek ewe hoogheilig kritiek begin uitdeel op my maat of kind se on–Christelike gedrag óf selfs vir hulle begin preek. My gedrag spreek baie harder en duideliker as my dade.

Ek moet net onthou dit gaan nie oor “my” regte nie, dat ek in onvoorwaardelike liefde kan bly uitreik al voel ek afgeskeep. Ek moet waak daarteen om sommer net voort te cruise — ek is in ’n geestelike oorlog en moet versigtig beweeg. Ek kan nie opmerkings links en regs rondgooi oor kwessies soos halwe werk, of seermaak–woorde uitblaker nie, al is dit in ’n grap gesê. Ek moet eerder erkenning aan die ander persoon se mens–wees, sy/haar persoonlike ruimte eerbiedig. So bou ek my medereisigers op, bou ek verhoudings en brûe vir die Koninkryk.

Is my woorde en my optrede ’n hindernis of ’n hulp in ander se lewe?

Bron:  ekerk.org

Wel, dit moet ons aanvaar: slegs die Gees van God in elke Jesus-mens kan ou bekende waarhede gebruik om ons lewens te verander – laat ons Hom dan presies daarvoor vertrou!

‘n Veranderde lewenswyse begin by ‘n veranderde hart. ‘n Nuwe lewenswyse kan slegs blywend en tot werklike voordeel van ander wees, waar die Heilige Gees in ons aktief werksaam is.

Binnekant, innerlik, wie jy werklik is as mens soos jy is, word gevorm en verander om millimeter vir millimeter meer te groei om met God se hart te lewe. Spontaan en vrywillig, maar ook soekend en met inspanning, kry elkeen van ons geleentheid om met ‘n sagte hart soos God se hart te lewe.
Die gevolg van ‘n meer en meer Gees-beheerde hart: hardheid word met sagtheid vervang; haat word met liefde vervang; selfgerigtheid word met selfloosheid vervang; jou ego maak plek vir God self in jou; jou eie belange skuif uit die pad om ruimte te gee vir ander; jou beheptheid met besittings word eerder ‘n gesindheid van weggee wat jy kan; jou blindheid vir ander se seer word genees en jy kry oë en hande wat ander se pyn sien en verlig; jou traagheid om te loop na ander se nood word met energie gevul om te hardloop om verligting te bring. Ja, ‘n totaal nuwe lewenswyse vol barmhartigheid!

Anders gesê: ‘n barmhartige lewenswyse is ‘n Goddelike werking met doelbewuste samewerking van elke Jesus-mens!
Wie van ons wil nie baie graag met sagte liefdevolle woorde en dade behandel word nie?Wie van ons wil nie graag in volkome vrede met ander lewe nie?
Wie van ons wil nie ontspan in al my verhoudinge sonder eise wat gestel word nie?

Soek dringend daarna om meer volledig van God afhanklik te wees.Soek met groter toewyding na opregte innerlike geluk by Hom.
Soek maniere om werklik te hoor en te doen wat vir Hom reg is.

Bron:  http://doomcharl.blogspot.com/

Die bekende skrywer Bob Goff vertel ’n vehaal van ’n baie duur skildery wat hy gekoop het. Die “painting” was so duur die kunsgallery noem dit nie ’n “painting” nie, maar ’n “piece”. Ja, dis ’n duursame meesterstuk. Toe hy dit uiteindelik koop, na maande se spaar, gee hulle vir hom twee van die skildery: die ware meesterstuk, enig in sy soort en ’n “fake” een om op te hang. Bob was baie ontsteld oor die feit dat hulle verwag hy moet die oorspronklike meesterstuk toesluit en die vals een ophang vir almal om te sien.

Hy het die oorspronklike meesterstuk opgehang en elke dag daarna gekyk. Dit het hom baie plesier gegee. Daar het eendag ’n rekkie tydens ’n rekkie–geveg met sy kinders die meesterstuk getref en ’n merkie gemaak. Bob was eers ontsteld, maar later ervaar die meesterstuk met die skade/merk is sommer nou nog meer werd vir hom. Uit dit alles leer ons dat God wil hê ons moet ons ware self wys en teen die “muur ophang”. Ja, jy gaan houe vat en jy gaan soms seerkry, maar dit verhoog jou waarde. Soveel mense is vals en leef “fake”. Die lewe word vir soveel ’n toneelspel en soveel leef skynheilig.

Lees gerus Matteus 23 waar Jesus in geen onduidelike taal die Fariseërs aanspreek oor hulle valsheid. Jesus spreek hulle aan as “huigelaars” en “blinde leiers”. Hy is prontuit kwaai met hulle en vermaan hulle omdat hulle so “fake” is.

God het jou ’n meesterstuk gemaak. Hy het jou duur gekoop deur die bloed van Jesus. Hy kom maak jou ’n nuwe mens en gee jou ’n nuwe identiteit. Jy het geen rede vir valsheid of skynheiligheid nie.

Al vat jy so nou en dan houe, wees en wys die ware jy. Dis wat God van jou vra.

Bron:  ekerk.org

NGVishoek: Ds. ( dominee ) Martin Barnard.