Raakvat woorde uit Spreuke


Ek glo enige mens wat Spreuke lees sal saamstem dat jy al hierdie waarhede vandag net so kan toepas soos in die tyd wat dit geskryf is.

Hier volg so ’n klompie van die raakvat woorde uit Spreuke:

 


Spr. 6:12-15
Dit is ‘n nikswerd mens, ‘n mens vol onreg, wat altyd reg is om te lieg, om te bedrieg deur met die oog te knik, met die voet te beduie, met die vingers tekens te gee, wat altyd met ‘n skelmstreek kom en voortdurend op kwaad uit is. Hy maak moeilikheid waar hy gaan. So ‘n mens se ondergang kom skielik; hy stort ineen, en daar is nie herstel nie.

Spr. 16:30
Wie met sy oog knik, wil die waarheid verdraai; wie sy lippe saampers, is vasbeslote oor ‘n boosheid.

Klink dit nie bekend nie? Het jy ook  so ‘n wit leuentjie vertel, maar “orrels op die maan” gehou? Hoe waar is dit nie dat daar soveel mense is wat altyd daarop uit is om kwaad te doen.

Spr. 6:24-27
My onderrig sal jou beskerm teen die slegte vrou van ‘n ander wat jou met haar gladde tong wil verlei. Moenie dat haar skoonheid jou begeerte wek nie, moenie dat sy jou vang met haar oë nie. Jy kan ‘n prostituut kry vir ‘n stuk brood, maar owerspel kan jou lewe kos. Kan jy kole vuur in die vou van jou klere inhark sonder dat jou klere aan die brand raak?

Spr. 6:32-35
Maar ‘n man wat owerspel pleeg, moet van sy verstand af wees, iemand wat dit doen, verwoes sy lewe. Hy sal slae op die lyf loop en verneder word, sy skande sal nooit uitgewis word nie. Die woede van die vrou se man is ‘n gloeiende vuur, sy wraak ken nie perke nie; hy laat hom nie afkoop nie, geen betaling is vir hom genoeg nie.

Salomo spreek hom dikwels uit teen die ontugtige vrou en oor owerspel, en hy waarsku sy “seun” deurentyd daarteen. Hy reken selfs dat die ou wat met ‘n ander man se vrou lol, ‘n stewige pak slae op die lyf sal loop.

Spr. 9 :13-18
Dwaasheid is soos ‘n vrou wat luidrugtig bly klets, stadig van begrip en sonder kennis van sake. Sy sit by haar voordeur, haar stoel staan op die hoogste plek in die stad, en sy roep na dié wat verbykom, elkeen besig om sy gang te gaan: “Draai af hiernatoe, almal wat nog onervare is!” Sy sê vir dié wat kennis kortkom: “Gesteelde water is soet, kos wat stilletjies geëet word, is lekker!” Dié wat na haar luister, besef nie dat die dood self daar wag nie, dat dié wat hulle deur haar laat nooi het, klaar diep in die doderyk is nie.

Spr. 10:26
Soos asyn teen die tande, soos rook in die oë, so is ‘n lui mens vir iemand wat hom ‘n opdrag gee.

Spr. 19:15
Luiheid laat ‘n mens diep slaap; ‘n lui mens ly honger

Spr. 20:13
As jy nie wil arm word nie, moenie lief wees vir slaap nie; staan vroeg op, en jy sal oorgenoeg hê om te eet.

Spr. 22:13
Die lui mens sê: “Daar is ‘n leeu daarbuite! Ek kan doodgemaak word as ek dit buite waag!”

Spr. 24:30-34
Ek het by ‘n lui mens se land verbygestap, by ‘n onverstandige mens se wingerd: dit was heeltemal oortrek van die onkruid, toegegroei onder die bossies, en die klipmuur was omgeval. Toe ek dit sien, het ek daaroor nagedink en daar iets uit geleer: nog ‘n bietjie slaap, nog ‘n bietjie sluimer, nog ‘n bietjie handevou om te slaap, en daar kom jou armoede aangestap, daar oorval die gebrek jou soos ‘n inbreker, sonder dat jy dit kan keer.

‘n Ander doodsteek vir Salomo is luiheid en hy kan dit verseker nie verdra nie. Miskien is Salomo se rykdom ook toe te skryf aan harde werk en vindingrykheid en daarom maan hy jou deurentyd om hard te werk as jy nie arm wil wees en swaar wil kry nie.

Spr. 11:22
Die skoonheid van ‘n vrou sonder oordeel is soos ‘n goue ring aan ‘n vark se snoet.

Kostelik! Laat mens nogal dink. Ons weet mos dat iemand eerder mooi van binne moet wees as mooi van buite.

Spr. 12:18
Praat sonder om te dink kan soos dolksteke wees; wyse mense bring genesing met wat hulle sê.

Woorde.  Seker die gevaarlikste wapen wat jy kan kry. Wanneer iemand met ‘n dolk gesteek word bly die letsel vir ewig sit, net soos met woorde. Wat gesê is is gesê. Maar aan die ander kant is mooi woorde opbouend en genesend.

Spr. 13:7
Party mense hou hulle ryk maar het niks nie; party doen hulle arm voor maar besit baie.

Is dit nie baie waar nie? Mense wat hulleself die heel tyd met die Jones’e langsaan vergelyk, het nogal hierdie probleem. Hou van ryk lyk, maar betaal nie hulle rekeninge nie. Aan die ander kant is daar baie mense wat hulle welvaart in stilte geniet.

Spr. 14:12
Daar is ‘n lewenswyse wat vir ‘n mens reg kan lyk, maar die uiteinde daarvan is die dood.

Hierdie teks hou ‘n baie groot waarskuwing in. Mens kan maklik so rasionaliseer in die lewe dat jy glo jy kan maar maak wat jy wil, maar jy kan letterlik jou dood tegemoet gaan. Nie net jou aardse dood nie, maar ook jou lewe hierna kan in gedrang kom.

Spr. 15:16-17
Liewer min hê en die Here dien as groot rykdom en bekommernis daaroor.  Liewer net ‘n bietjie groente en liefde daarby as ‘n vetgemaakte os en haat daarby.

Spr. 17:1
Liewer ‘n stukkie droë brood met vrede daarby as ‘n huis vol kos met ‘n getwis daarby.

Mense wat konstant agter rykdom aanhardloop het die probleem dat dit lewensgeluk steel, want die bekommernis waarvan hier gepraat word, is dat jy jou rykdom gaan verloor. Om agter rykdom aan te hardloop beteken noodwendig ook onnodige stres.

Spr. 16:13
Eerlike mense geniet die koning se goedgesindheid; hy hou van mense wat die waarheid praat.

Spr. 17:22
‘n Vrolike mens is ‘n gesonde mens, ‘n neerslagtige mens raak uitgeput.

Kyk vir oomblik weg van die Bybel af en toets hierdie teks aan die hand van die lewe, en jy sal sien dat dit baie waar is. Vrolike mense geniet oor die algemeen beter gesondheid. Neerslagtige mense lei meer aan depressie en hartsiektes. Die Bybel kom bevestig eintlik die lewe op ‘n sigbare en tasbare manier.

Spr. 18:8
Skinderstories word gretig verslind; mense sluk dit so maklik.

Is dit nodig om iets meer hieroor te sê? Skinderbekke veroorsaak  geweldig baie pyn en ellende, sonder om te dink aan hulle woorde. Skinder is mos lekker, vernaam as jy so paar stertjies aanlas!

Spr. 18:13
Wie antwoord voor hy die vraag gehoor het, is dwaas en kom in die skande.

Al gehoor van die ou wat vir sy vrou gesê het: As ek jou mening wou hê, het ek dit vir jou gegee? Die Bybel noem so iemand tereg ‘n dwaas.

Spr. 18:24
Maats kan jou breek, maar daar kan ook ‘n vriend wees wat nader is as ‘n broer.

Spr. 27:10
Moenie by ‘n vriend wat al jou pa se vriend was, verbygaan na jou broer se huis toe as jy moeilikheid het nie: ‘n buurman wat naby is, is meer werd as ‘n broer wat ver is.

Spr. 27:17
Yster slyp yster, vriende vorm mekaar

Hoewel daar baie slegte maats is, is daar ander wat werklik nader is as ‘n bloed broer. Ek glo elke mens het sulke vriende nodig, op wie hulle altyd kan steun.

Spr. 20:1
Wyn maak jou ligsinnig, drank laat jou lawaai maak; niemand wat van dronkenskap slinger, is verstandig nie.

Spr. 23:29-35
Wie is dit wat sug en steun, wat rusie maak en kla, onnodig seerkry en bloedbelope oë het? Dit is dié wat tot laat sit en drink, dié wat aanhou proe aan drank. Moenie dat die wyn jou verlei as dit so rooi is, so vonkel in die beker, so lekker smaak nie. Agterna pik hy soos ‘n slang, spoeg hy gif soos ‘n kobra. Dan sien jy vreemde dinge en praat jy verkeerde dinge; dit voel of jy op die oop see lê, of jy bo-op ‘n seilskip se touwerk lê, en jy dink: ek het dan nie seergekry toe hulle my geslaan het nie; ek het nie gevoel toe hulle my aangeval het nie! Wanneer word ek wakker? Ek wil maar weer iets gaan soek om te drink.

Drank maak van die dronkaard ‘n walglike mens saam met wie niemand kan lewe nie.  Dit laat jou ‘n geraas maak, dit maak aggressief en jy verloor jou waardigheid.

Spr. 20:14
“Sleg! Sleg!” sê die koper, maar as hy weg is, spog hy met sy winskopie.

In die besigheids wêreld gebeur hierdie ding daagliks. Die rykste mense kla die meeste oor prys, maar spog graag met hulle winskopies, sonder om te dink dat hulle die handelaar te na kom. Dit maak in elk geval nie vir hulle saak nie, want hulle word verblind deur hulle inhaligheid.

Spr. 20:30
‘n Pak slae laat ‘n mens ophou kwaaddoen; dit laat jou selfs ophou dink aan kwaad.

Spr. 21:9
Liewer bo-op ‘n dak woon as saam met ‘n twisgierige vrou onder een dak.

Spr. 21:19
Liewer in ‘n woestyn woon as by ‘n twisgierige vrou wat aanhou neul.

Spr. 27:15-16
Die gedrup uit ‘n dak wat lek op ‘n reëndag, so is ‘n vrou wat aanhou kyf. Wie haar probeer keer, kan net so wel die wind probeer keer of olie met sy hand probeer vashou.

Met sy 300 vroue en menige byvroue kan Salomo seker praat van ondervinding. Nie eers te praat van sy 300 skoonma’s nie! Ons moet egter nie hierdie teks misbruik teen die vroulike geslag nie, want dis net so waar vir mans.

Spr. 23:6-7
Moenie by ‘n suinige mens gaan eet nie, moenie sy lekker kos begeer nie, want hy bly uitreken hoeveel dit hom kos. Dit is hoe hy is. Hy moedig jou aan om te eet en te drink, maar hy bedoel dit nie. Jy sal naar word van wat jy eet en jou komplimente sal verkwis wees.

Spr. 24:19-20
Moet jou nie ontstel oor skelms, jou kwel oor goddelose mense nie, want ‘n slegte mens het nie ‘n toekoms nie; die lewenslig van die goddeloses word uitgedoof.

Ons  almal sukkel maar met hierdie een. Ons vra dikwels hoekom dit so goed gaan met die skelm mens en sleg gaan met die eerlikes. Die Here gee egter hier die antwoord. Hulle het geen toekoms nie. Gaan toets dit maar in die lewe, mense wat hierdie lewe kies, eindig altyd miserabel of selfs dood.

Spr. 24:26
Iemand wat eerlik antwoord, is ‘n ware vriend.

‘n Goeie vriend sal altyd sy eerlike mening gee en nie net sê wat die ander een graag wil hoor nie., want dan help jy hom van die wal af in die sloot. ‘n Goeie vriend is juis ‘n klankbord waarop jy kan staatmaak.


Spr. 25:16
As jy op heuning afkom, eet net tot jy genoeg het; as jy te veel eet, word jy naar.

Dit geld ook vir sjokolade!

Spr. 25:17
Wees spaarsaam met jou kuiers by jou buurman; as hy jou te veel sien, hou hy naderhand nie meer van jou nie.

Spr. 25:20
Iemand wat jou klere van jou afvat op ‘n koue dag, of asyn op bytsoda, so is iemand wat vir jou liedjies sing as jy treurig voel.

Mens dink maklik dat jy iemand opbeur met vrolikheid, maar dit het soms die teenoorgestelde uitwerking. Partymaal is ‘n drukkie meer werd as om te maak of daar niks fout is nie.

Spr. 26:3
‘n Sweep vir ‘n perd, ‘n toom vir ‘n donkie, en ‘n lat vir ‘n dwaas.

Spr. 26:4-5
Moenie ‘n dwaas se vraag op net so ‘n dwase manier beantwoord nie; hy sal dink jy is soos hy. Beantwoord ‘n dwaas se vraag op net so ‘n dwase manier, anders dink hy hy het wysheid.

Dwaasheid staan teenoor wysheid. Mense wat hulle met dwaasheid ophou, stoot mense van hulle af weg, en wys op die koop toe dat hulle nie goeie oordeel het nie.

Spr. 30:20
Die ontroue vrou het haar eie manier: sy eet en vee haar mond af en sê: “Ek het niks verkeerds gedoen nie.”

Spr. 26:18-19
Soos ‘n mal mens wat dodelike pyle rondskiet, so is iemand wat ‘n ander bedrieg en sê: “Ek speel sommer.”

As kinders het ons hierdie woorde graag gebruik, maar dit maak soms baie skade.

Spr. 27:14
As iemand sy buurman vroegdag met ‘n geskreeu môre-sê, kan mense dink hy is besig om hom te vervloek.

Spr. 30:7-9
Net twee dinge vra ek van U; moet my dit tog nie weier nie; daarna kan ek sterf: moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het, sodat ek nie te veel het en U verloën en sê: “Wie is die Here?” nie, en sodat ek nie arm word en steel en my God se Naam oneer aandoen nie.

Genoeg is genoeg. Weet jy hoeveel genoeg is?

Bron:  heuning.co.zaNGVishoek: Ds. ( dominee ) Martin Barnard.

Lees Meer >>

Resensie: Is die Bybel betroubaar? deur Adrio König


 

Dit het prof Adrio König, gesaghebbende sistematiese teoloog en vir veertig jaar dosent by Unisa, genoodsaak om dié boek te skryf. Is die Bybel dan enigsins betroubaar as daar verskille voorkom tussen onderskeie gedeeltes in die Bybel wat dieselfde gebeure beskryf? En as die Bybel skynbaar die ontstaan van die heelal en lewe op aarde anders beskryf as wat die gangbare teorie onder wetenskaplikes is?

Ja, daar is kritiek op, en probleme met die Bybel. Selfs van sommige teoloë wat koerante en tydskrifte met hulle standpunte haal dat die geskiedskrywing in die Bybel, sowel as die wêreldbeeld waarop die Bybel gebasseer is, premodern en onhaalbaar vir moderne mense is.

Adrio vra: waaroor gaan die Bybel eintlik? Die vraag is belangrik as jy nie in allerlei bysake wil verval en die doel van die Bybel mis nie: dat dit om God en mense gaan, en mense wat voor en met God leef. Die boodskap van die Bybel handel oor die heil van die mens, hoe die mens in die regte verhouding met God kan kom en dan daaruit leef. Die weg terug na God is die Persoon, Jesus Christus, en in Hom het die gelowige die verwagting van die ewige lewe.

Die boek vertel jou hoe die Bybel tot stand gekom het, waaruit dit sy gesag put, hoe die kerk deur die eeue die Bybel hanteer en beskou het en waarin die betroubaarheid van die Skrif lê. Jy leer ook die basiese van hoe die mens verstaan en waarvoor om op te let wanneer jy aan die verstaanproses deelneem, asook wat belangrik is om die Skrif uit te lê: dat die Skrif die geleentheid gegee moet word om homself uit te lê, dat jy die Skrif lees terwyl jy onthou waaroor die sentrum van die Skrif gaan, en hoe belangrik dit is om die hele Skrif te lees.

Dié boek gaan nuttig vir alle gelowiges wees. Selherders en predikante gaan in besonder ook daarby baat vind. Hóé ons die Bybel sien, bepaal wat ons daarin lees. En daarom kan Adrio jou help om nuwe waarde by jou Bybelbeskouing te voeg.

Bron:  ekerk.org NGVishoek: Ds. ( dominee ) Martin Barnard.

Lees Meer >>

Rituele wassing/Reiniging (deel 2 van 2)


 

Massa Doop op Pinksterdag

Die Heilige Gees is uitgestort op Pinkster Dag soos beskryf in Handelinge 2. 3000 Jode het tot bekering gekom as gevolg van Petrus se kragtige boodskap en almal is dadelik gedoop in die naam van Jesus Christus. (Act 2:38  En Petrus sê vir hulle: Bekeer julle, en laat elkeen van julle gedoop word in die Naam van Jesus Christus tot vergewing van sondes, en julle sal die gawe van die Heilige Gees ontvang. Act 2:41  Die wat toe sy woord met blydskap aangeneem het, is gedoop; en daar is op dié dag omtrent drie duisend siele toegebring.)

Somtyds word die vraag gevra, waar was die massa mense gedoop? Daar is geen rivier of meer in Jerusalem nie, maar daar was tallose rituele baddens of Mikvah’s in die hele Jerusalem soos opgrawings sedert 1967 tot die huidige reeds bevestig het. Verder moet die volgende in ag geneem word: Petrus het sy prediking begin ongeveer 09:00 in die oggend. (Act 2:15  Hierdie mense is tog nie dronk soos julle dink nie, want dit is nog maar die derde uur in die môre.) Rondom hierdie tyd in die oggend sou die wierook offer reeds voltooi wees en die daaglikse oggend brandoffer sou toe op die vuur altaar geplaas word.

Op daardie oomblik sou die mense versamel in die voorhowe van die Tempel vir gebed en om die priesters se seën te ontvang. (Num 6:22  En die HERE het met Moses gespreek en gesê: Num 6:23  Spreek met Aäron en sy seuns en sê: So moet julle die kinders van Israel seën deur vir hulle te sê:

Num 6:24  Die HERE sal jou seën en jou behoed;

Num 6:25  die HERE sal sy aangesig oor jou laat skyn en jou genadig wees;

Num 6:26  die HERE sal sy aangesig oor jou verhef en aan jou vrede gee.

Num 6:27  So moet hulle dan my Naam op die kinders van Israel lê; en Ék sal hulle seën.

Die Goddelike tydsberekening op die dag van Pinkster was perfek, presies op die tyd toe die groot massa mense op pad was na die Skone Poort (Beautyful Gate) om deel te neem aan die oggend gebede, is hulle gekonfronteer met die wonderwerk van die spreek van tale en met Petrus se Messiaanse boodskap.

Op die Ophel, i.e. aan die suidelike kant van die Tempel Berg voor die Skone Poort waar hierdie gebeurtenis plaasgevind het, is dosyne rituele baddens of Mikvah’s wat dateer uit daardie tyd opgegrawe en in die omliggende area is daar nog baddens. Mens kan dus sien dat die moontlikheid van ʼn massa doop vir 3000 mense op Pinkster dag glad nie ʼn probleem was nie.

Die Betekenis van Pinkster

Pinkster het 50 dae na die Fees van Eerste Vrugte of die Fees na Weke in Hebreeus “Shavu’oth”, plaasgevind. (Lev 23:16  tot die dag ná die sewende sabbat moet julle vyftig dae tel; dan moet julle ‘n nuwe spysoffer aan die HERE bring. Deu 16:10 Dan moet jy die fees van die weke hou vir die HERE jou God ooreenkomstig die vrywillige offer van jou hand wat jy sal gee, namate die HERE jou God jou sal seën.) Pinkster was een van die drie groot Tempel feeste wat elke Joodse man verplig was om by te woon. (Deu 16:16  Drie maal in die jaar moet al jou manne voor die aangesig van die HERE jou God verskyn op die plek wat Hy sal uitkies; op die fees van die ongesuurde brode en op die fees van die weke en op die huttefees; en hulle mag nie met leë hande voor die aangesig van die HERE verskyn nie;)

Die Eerste Vrugte van die Graan Oes

Op hierdie dag het die volk van Israel, verteenwoordig deur ʼn afvaardiging, twee gesuurde brode, gebak van die eerste vrugte van die graan oes, as graan offer na die Tempel gebring. (Lev 23:16  tot die dag ná die sewende sabbat moet julle vyftig dae tel; dan moet julle ‘n nuwe spysoffer aan die HERE bring. Lev 23:17  Julle moet uit jul woonplekke twee beweegbrode bring; dit moet van twee tiendes van ‘n efa fynmeel wees; gesuurd moet dit gebak word as eerstelinge aan die HERE.) Hierdie was ʼn uitsondering, aangesien graan offers normaalweg geen suurdeeg mag  bevat het nie. (Lev 2:11  Geen spysoffer wat julle aan die HERE bring, mag van iets wat ingesuur is, berei word nie; want van géén suurdeeg of heuning mag julle vir die HERE ‘n vuuroffer aan die brand steek nie. Lev 2:12  As ‘n offer van eerstelinge mag julle dit aan die HERE bring, maar op die altaar mag dit nie as lieflike geur kom nie.) Waarom sou dit wees? In die Bybel is suurdeeg ʼn beeld van die sonde. (Mat 16:6 Daarop sê Jesus vir hulle: Pas op en wees op julle hoede vir die suurdeeg van die Fariseërs en Sadduseërs. Mat 16:12  Toe het hulle begryp dat Hy nie gesê het dat hulle moes oppas vir die suurdeeg van die brood nie, maar vir die leer van die Fariseërs en Sadduseërs. 1Co 5:8  Laat ons dan feesvier, nie met die ou suurdeeg of met die suurdeeg van ondeug en boosheid nie, maar met die ongesuurde brode van reinheid en waarheid.) Deur die brood te bak is die uitwerking van die suurdeeg in die brood geneutraliseer. Hierdie offer is ʼn wonderlike beeld van die Christen kerk wat bestaan uit verloste sondaars. By Pinkster is die gelowiges deur die Heilige Gees verenig in een liggaam, die “liggaam van Christus”. (1Co 12:13  Want ons is almal ook deur een Gees gedoop tot een liggaam, of ons Jode of Grieke is, slawe of vrymanne; en ons is almal van een Gees deurdronge.) Daarom kan dus gesê word: (1Co 10:17 Omdat dit een brood is, is ons almal een liggaam, want ons het almal deel aan die een brood.)

Wanneer Paulus sê dat hy aan God aanbied mense wat tot geloof gekom het deur sy diens as ʼn offer, dan verwys hy direk na die graan offer by Pinkster. (Rom 15:15  Tog het ek ten dele taamlik gewaag om aan julle te skrywe, broeders, as een wat julle herinner, kragtens die genade wat my deur God gegee is Rom 15:16  om ‘n dienaar van Jesus Christus onder die heidene te wees, ‘n dienaar van die evangelie van God, sodat die offer van die heidene welgevallig kan wees, geheilig deur die Heilige Gees.)

Offering van die Eerste Vrugte

Vanaf die tyd van Pinkster is daar begin om die eerste vrugte na die Tempel te bring. (Exo 23:19  Die beste van die eerstelinge van jou grond moet jy in die huis van die HERE jou God bring. Jy mag die bokkie nie kook in sy moeder se melk nie.  Deu 26:1 En as jy in die land kom wat die HERE jou God jou as erfenis sal gee en jy dit in besit neem en daarin woon, Lev 23:10  Spreek met die kinders van Israel en sê aan hulle: As julle in die land kom wat Ek julle gee en sy opbrings oes, moet julle die eerstelingsgerf van julle oes na die priester bring.  Deu 26:2  dan moet jy neem uit die eerstelinge van al die vrugte van die land wat jy inbring uit jou land wat die HERE jou God jou sal gee, en dit in ‘n mandjie sit; en jy moet gaan na die plek wat die HERE jou God sal uitkies om sy Naam daar te laat woon,) Die offers moes geskied tussen die Pinkster Fees en die Hutte Fees. Volgens tradisie was dit verstaan dat die 7 getuienisse van die Beloofde Land volgens Deuteronomium 8:8 gebring moes word. (Deu 8:8  ‘n land van (1) koring en (2)gars en (3) wingerdstokke en (4) vyebome en (5) granate; ‘n land van (6) olieryke olyfbome en (7) heuning;) Die eienaar moes deur die landerye stap en n stukkie riet of tou om sekere van die vrugte wat vroeg ryp word bind en dan vrywillig uitroep:

“ Kyk, dit is die Eerste Vrugte”.

Die aanbieding van hierdie offerhande het plaasgevind soos voorgeskryf in Deuteronomium 26:1-11. Dit is interessant in hierdie verband dat die gelowiges in die kerk wat deur God ingestel is op die dag van Pinkster, “Eerste Vrugte” in die Nuwe Testament genoem word. (Jas 1:18  Volgens sy wil het Hy ons voortgebring deur die woord van die waarheid, sodat ons as eerstelinge van sy skepsele kan wees.)

In Romeine 8 word die resultate van verlossing wat ons al reeds vandag besit “Eerste Vrugte”, genoem want dit is die voorhoede van algehele, toekomstige verlossing. Die verlossing van die liggaam gaan slegs gebeur by die koms van Christus by die wegraping en opstanding. (Rom 8:23  En nie alleen dit nie, maar ons self ook wat die eerstelinge van die Gees het, ons sug ook in onsself in afwagting van die aanneming tot kinders, naamlik die verlossing van ons liggaam.) Die eerste gelowiges van ʼn sekere streek word ook as “Eerste Vrugte” beskryf. (Rom 16:5  Groet ook die gemeente by hulle aan huis. Groet Epénetus, my geliefde, wat die eersteling van Acháje is vir Christus. 1Co 16:15  En ek versoek julle, broeders—julle weet dat die huisgesin van Stéfanas die eersteling van Acháje is en dat hulle hul tot diens van die heiliges gestel het—) Soortgelyk word die voorhoede van die  gelowige oorblyfsel van Israel in Openbaring 14 ook “Eerste Vrugte” genoem. (Rev 14:4  Dit is hulle wat hulself met vroue nie besoedel het nie, want hulle is maagdelik rein; dit is hulle wat die Lam volg waar Hy ook heengaan; dit is hulle wat gekoop is uit die mense as eerstelinge vir God en die Lam.)

NGVishoek: Ds. ( dominee ) Martin Barnard.

Lees Meer >>

Leer ken ons vry God

Maar dit is dan juis so fantasties van Hom:
En hier is my punt oor God se vrymag: niemand van ons kan aan Hom voorskryf wie Hy vir ons moet wees nie. Ongelukkig is ons daartoe geneig. Ons “ontwerp” ons eie godjie (met respek) volgens ons eie unieke behoeftes en raak baie veeleisend teenoor Hom (praat ek dalk nou net vir myself, dan is ek jammer). Elkeen beleef sy krisis of probleem of situasie as so groot en ernstig, dat ons graag al God se aandag en hulp net vir onsself volgens ons eie-uitgedinkte-goed-deurdagte planne wil hê.

Ek is weer terug by ‘n baie ou redenasie van my oor ons elkeen se prentjie in ons koppe van wie God werklik is. Ons het elkeen 100% ons eie unieke ervaringe in die lewe wat ons elkeen uniek maak. En so word daar in ons elkeen ‘n 100% unieke prentjie gevorm van wie God is. Nie twee mense op aarde dink presies dieselfde oor God nie. Tog kan elke individuele Jesus-mens met oortuiging sê dat ons dink aan presies dieselfde God, net die een ware en lewende God, wat Homself in Jesus Christus aan ons kom openbaar het. Maar ons dink verskillend oor Hom en loop ‘n unieke pad deur die lewe saam met Hom en so verwag ons elkeen verskillende goete van Hom. Ons het elkeen ons eie unieke behoefte aan wie God vir ons moet wees.

Jesus-mense is eintlik voltyds besig om God beter te leer ken, al dink ons nie aldag heeldag daaraan nie. Deur goete wat in ons elkeen se lewe gebeur, mense wat ons paaie kruis, alles wat ons hoor en lees, en sommer die hele kaboedel (ja, daar is so ‘n woord wat sommer na alles verwys), kan ons klein bietjie beter met God self te doen kry.

Vandag wil ek fokus op ‘n baie diep, maar belangrike kant van ons God: sy vrymag! Kom ek verduidelik so eenvoudig moontlik:

“Wie bewys Hom ‘n guns, sodat Hy verplig is om iets terug te doen?” (Romeine 11:35) 

Bron: http://doomcharl.blogspot.com/
NGVishoek: Ds. ( dominee ) Martin Barnard.

Lees Meer >>

Nie goed genoeg nie? Dink weer…


Koning Dawid onthou ons vir sy oorwinning oor Goliat en vir sy vele veldslae waar hy as oorwinnaar vandaan gekom het. Ons is vinnig om te vergeet dat hy owerspel gepleeg het met Batseba, ’n getroude vrou en die hoof-organiseerder was dat haar man in ’n veldslag omkom. Ja, aandadig aan moord. Tog gebruik God hom groot.

 


Petrus is die grootmond wat belowe dat Hy Jesus nooit sal verloën nie. Jy ken die verhaal en drie keer wat hy Jesus verloën voordat die haan kraai. In Johannes 21 reik Jesus ’n hand na Petrus uit — ’n hand van herstel — “laat my skape wei”.


Paulus aan die anderkant keur die wrede stenigings-moord op Stefanus goed en wens die manne wat die doodskote met klippe gegooi het, geluk. Tog, ontmoet God hom oppad na Damaskus en Paulus word ’n kragtige instrument in God se hand.


Wat van jou? Wat is jou storie wat jou volgens menslike standaarde diskwalifiseer? Dink weer, dink aan Moses, Dawid, Petrus en Paulus. Maak reg met God en sien sy liefdevolle arms om jou. Hy is ’n God van herstel, vergifnis, genesing en ’n nuwe begin.


Bron:  ekerk.org NGVishoek: Ds. ( dominee ) Martin Barnard.

Lees Meer >>

Woorde is dikwels onnodig

Die hertog het dadelik die boodskap gekry en hulle vakansieverlof toegestaan. Dit klink vir my al te veel na Spreuke se soort wysheid. Soms is daar ’n beter manier as woorde om iets gedoen te kry. Stilbly is beter. Wegstap ook, selfs al weet jy dat jy reg is.

Die grootste oorwinnings wat die Here se kinders behaal is juis om ’n ander wang te draai en ’n tweede myl te loop, soos wat Jesus ons in Matteus 5 leer. Vra die Here om jou met sy soort wysheid te oorlaai sodat jy sal weet hoe om in elke situasie reg op te tree. Dan gebeur jou grootste oorwinnings in Jesus se Naam woordloos, mooi en sag!

Bron:  ekerk.org

NGVishoek: Ds. ( dominee ) Martin Barnard.

Lees Meer >>

Klim in die kruiwa

 

Voorts het die Here ons tog toegerus met Woord en kennis om ook Sy stem te wees wanneer Sy kinders dit nodig het. Ek en jy het inderdaad ‘n verantwoordelikheid om mekaar te bemoedig en aan te por om die wenstreep te behaal, maar ek glo dat die Here ons ook wil waarsku teen goedkoop en oppervlakkige “spiritual talk”, wat meer verwarring kan bring as enigiets anders. Ek het al vele kere in my lewe ‘n woord van bemoediging gekry op tye wat dit werklik nodig was, maar daar was ook al dinge gesê wat eerder kon gebly het. Die lewe is nou maar eenmaal vol stampe en stote en ons almal loop ons een of ander in ‘n situasie vas waar ons nie weet of ons moet vorentoe of agtertoe nie. Dan is die woorde van bemoediging regtig welkom.

Ek wil graag twee “maniere” van bemoediging hier hanteer.

Die eerste manier.

GALASIËRS 6:2
“Dra mekaar se laste, en gee op dié manier uitvoering aan die wet van Christus.”

Hierdie opdrag is goud werd, want hierdeur gee die Here vir ons die opdrag om vir mekaar lief te wees, mekaar te bemoedig en mekaar te help in moeilike tye. Na my mening beteken hierdie teks nie noodwendig dat jy die ander persoon se laste van hom moet afneem, totaal joune maak en dan self met die mees ongeloof like smart en swaarkry sit nie. Ek en jy kan dit in elk geval nie doen nie. Die kruks van hierdie gedeelte is dat ons daar moet wees vir iemand in nood. ‘n Oor om te luister, ‘n skouer om op te huil, iemand wat daar is as jy voel jy breek en jy kan net nie meer nie. Iemand wat vir jou bid as daar tye kom wat jy nie eers meer vir jouself kan bid nie.

Wanneer sulke tye kom besef jy wie regtig vriende is, mense wat baie dinge sal prysgee om jou deur hierdie woestyn te help. Ek is seker jy was ook al in ‘n situasie waar jy ‘n foon kon optel en vra vir gebed, of ‘n oor om te luister. Die een ding wat jy in daardie tye nie wil hoor nie, is dat jou geloof te swak is en jy te maklik twyfel. Of dat jy nie deur hierdie ding kan kom nie omdat jy nie die Here vertrou nie. Of nog meer, dat daar sondes en dinge is wat nog nooit bely is nie en nou bring dit vir jou swaarkry. Of selfs NOG meer, dat dit dinge is wat jou ouers aangevang het waarvoor jy nou gestraf word. Indien hierdie dinge waar sou wees, sal ek van voor af moet gaan uitvind wat genade beteken, en wat Jesus se verlossingsbloed vir my as persoon beteken, en dat ek in ‘n persoonlike verhoudinge met Jesus kan staan.

Dit lyk my dat hierdie dinge nou maar eenmaal oor ons almal se pad kom en ons moet op een of ander manier daarmee werk, so moeilik as wat dit mag wees. Dit maak dit net makliker as daar iemand is wat saam met my dra aan daardie laste wanneer ek net nie meer kan nie. Ek is ‘n groot voorstander daarvoor dat ons mentors moet hê na wie ons kan opkyk en vir wie ons raad kan vra.  Dit moet mense wees wat al ‘n lang pad met God stap wat werklik kennis en insig in Sy Woord het, sodat ek daardie persoon se woorde kan vertrou, asof dit God self is wat dit gesê het.

Toe ek so klompie jare deur ‘n Geestelike verdieping gegaan het, was ek baie uitgesproke oor baie dinge en wou graag vir elke Jan Rap en sy maat aanvat, want ek is mos nou vol van die Heilige Gees. Min het ek geweet hoe ‘n gevaarlike Christen ek op daardie stadium was, want ek het geglo dat my “Geesvervuldheid” menige geharde, hardebaard gelowiges kan oorheers. Iemand het eendag tereg gesê dat ‘n nuwe Christen gevaarlik kan wees. Ek dink egter mense moet maar net met baie liefde gelei word.

Nou waar pas die kruiwa in die prentjie?

Die tweede manier

Wel, dis ‘n baie oulike storie wat ek eendag gelees het wat groot lewenswaarhede bevat.

Daar was ‘n waaghals wat oor ‘n kabel wou loop tussen twee baie hoë geboue en hy het vir baie lank geoefen om sy droom waar te maak. Uiteindelik het die dag aangebreek en hy het begin om die kabel tussen die twee geboue te span. Soos wat hy besig was het mense uit nuuskierigheid saam gedrom bo-op die gebou en kon nie wag om die man in aksie te sien nie. Toe hy klaar was vra sy helper vir die mense of hulle glo dat hy oor die kabel kan stap na die ander kant toe. Uit volle bors het hulle hom aangemoedig en geskree “JA!!!”.

Die man het toe sy balanseerstok geneem en heen en weer oor die kabel gestap, onder luide toejuiging van die skare. Die helper vra toe weer vir die mense of hulle glo hy kan oorstap sonder die balanseerstok. Uit een mond het hulle hom aangemoedig en geskree “JA!!!”. Hy het dit toe gedoen en heen en weer oorgestap. Die helper vra toe of hulle dink hy kan met ‘n kruiwa oor die kabel stap en uit een mond het hulle geskree “JA!!!”. Hy het toe die kruiwa heen en weer oor die kabel gestoot. Die helper vra toe of hulle dink hy kan iemand in die kruiwa stoot en weereens het die mense geskree “JAAAAA!!!!”. En toe vra die helper of daar iemand is wat graag in die kruiwa wil kom sit om oorgestoot te word. Mmm… en natuurlik was daar nie een wat dapper genoeg was nie.

So vind ons ook in ons daaglikse lewe dat mense ons wil aanmoedig om dinge te doen, waarvoor hulle nie die moed het om dit self te doen nie. Daardie mense is volop, en ek weet ek is een van hulle. Ek bemoedig ook graag mense met die mooiste teksies en Geestelike verhaaltjies, terwyl ek weet dat ek nie die pad self sal kan stap as dinge oor my pad kom nie. Dis tye wat ek myself so skuldig maak aan “cheap spiritual talk”, want dit klink so mooi en Geestelik, maar intussen sit mens net ondraaglike laste op ander. En dit geld nie net in moeilik tye nie, dis soms sommer waar as jy mense wil vertel hoe hulle hulle Geestelike lewens moet lei.

Jesus het baie gesukkel met die Fariseërs in hierdie verband. 
MATTEUS 23:4”Hulle bind swaar en ondraaglike laste saam en sit dit op die mense se skouers, maar self wil hulle nie ‘n vinger verroer om dit te dra nie.”

Jy sien, die Fariseërs het gedink hulle is vreeslik hoog-heilig as hulle hierdie “perfekte” wettiese lewens vir die mense aanbeveel, en hulle het die mense mooi laat verstaan dat God hulle verskriklik sal straf as hulle nie alles stiptelik gaan nakom nie. Intussen het hulle net gestaan en preek op die straathoeke, maar self het hulle nie die belangrikste wette, nl. liefde vir God, en gelyk daaraan, liefde vir hulle medemens nagejaag nie. Hierdie dade wat hulle van ander verwag het, het die mense net meer minderwaardig laat voel en het hulle geglo dat God hulle net wil straf.

Ons maak vandag ook so. In ons poging om ander te help groei, doen ons maar dieselfde as die Fariseërs en dryf mense eerder weg van God af. Ons kry self nie ons sit in daai kruiwa nie.

Daar is egter nog iets waaraan ons onsself skuldig maak, vernaam as dit swaar gaan met iemand anders. Soms verwag ons van mense om dinge te glo wat ons sê, maar ons is self nie bereid om in daai kruiwa  te klim nie. Dink net so bietjie hoe dit is as mense hoor dat hulle ongeneeslik siek is.

Mense sê so maklik: Jy moet net aanhou glo en jy sal genees word. Dit klink reg, maar is dit wat jý  sal doen as jy hoor dat jy self ongeneeslik siek is en sterwend is? Sal jy nie ook gryp na elke strooihalmpie denkbaar nie? Sal jy self jou eie woorde gelate aanvaar en vir God sê dat Hy maar sy planne moet deurvoer?

Ek beland in die hospitaal met ‘n niersteen en glo dat ek verseker gaan afsterf van die pyn. Tipies man, kan mos niks vat nie. Op daardie stadium het ek nie eers krag gehad om vir myself te bid nie, ek het net angstig gewag dat die dokter die pyn sal wegvat, wat hy toe gedoen het. Ek twyfel of daar een mens is wat in daardie situasie sal sê: Los my uit, ek wil nie behandel word nie, die Here sal op Sy tyd die pyn wegvat en die niersteen laat verdwyn. Of as iemand met fase 4 kanker gediagnoseer word, glo ek nie daar is baie mense wat sal sê dat die pad maar moet loop soos hy loop nie.

So is daar mense wat graag vir ander hierdie tipe van “vertroosting” voorhou, terwyl hulle nie self in die kruiwa sal klim nie. Mens hoor dikwels dat sulke mense vir jou sal sê dat jy nie gesond word nie omdat jy nie diep genoeg glo nie. Dis maklik om sulke roekelose woorde te uiter, maar as dit met jouself gebeur sal jy dalk ‘n ander deuntjie sing. Ek is jammer, maar sulke “vertroosting” beteken absoluut niks.

Ek hoor ‘n praatjie oor die radio waar hulle praat oor Goddelike genesing (iets waarin ek met my hele wese glo) en vele mense het mooi verhale, maar ander het, soos Paulus, nie genesing gekry nie. Soos wat daar ook derduisende wonderlike wedergebore Christene is wat nooit genesing gekry het nie. Een persoon bel egter in en sê: “Julle almal verstaan verkeerd. As daar enige vorm van kwaal of siekte op jou pad kom, bid jy tot die Here, gee dit vir Hom en jy sal genees word. Dis so eenvoudig soos dit en jy het geen dokter of hospitaal nodig nie”. Ek het net by myself gedink:  Vriend, sal jy nog dieselfde dink as jou kindjie met leukemia gediagnoseer word? Of wat van as jou kind na ‘n motorbotsing kritiek in die hospitaal lê? Sal jy die dokters oortuig om liewer jou kind huis toe te neem? Wat van as ‘n ma in kraam is en die dokters besef dat die baba nie normaal gebore kan word nie, sal jy maar liewer die ma huis toe neem? Is daar nie mense wat sterf weens onnatuurlik oorsake nie? Of selfs natuurlike oorsake. Ek het gewonder of hierdie persoon in die kruiwa sou klim.

Iemand verval in woeste finansiële nood en iemand anders sê: Vriend, jy moet vasbyt, die Here het ‘n plan met jou en wil Sy doel deur hierdie ding met jou lewe bereik. Wel, ons almal wil mos maar die Here se doel met ons lewens verstaan, of hoe? Is jy bereid om elke enkele ding in jou lewe weg te gee, sodat jy ook kan uitvind wat die Here se doel met jou lewe is? Dis so maklik om sulke dinge vir mense as trooswoorde voor te hou, maar die meeste mense vind weinig of geen troos in sulke woorde. Inteendeel.

Ek dink ons probeer mense vertroos met roekelose woorde, wat maak dat ons onsself eintlik net so bietjie meerderwaardig voorhou. So asof ons wil sê: Vriend, klim in die kruiwa, ek hoef dit egter nie te doen nie. En ja vriend, jy sal dit nie nou verstaan nie, maar eendag sal jy wel. Klim net in die kruiwa.

Ek dink die Here wil ons gebruik om daar te wees vir ander, om te vertroos en te bemoedig, om ’n skouer of oor te wees, maar ek dink die Here verwag van ons om verantwoordelik te wees met ons woorde.

Wie van ons kan sê dat ons die Here en Sy werke volledig en ten volle verstaan? Wie van ons kan daarop roem dat ons woord vir woord namens die Here kan praat? Wie ken al Sy weë en alles waarmee HY besig is? Wie is dapper genoeg om alles wat ons vir ander voorhou, self uit te leef? Wie van ons sal in daai kruiwa klim? Waar pas God se soewereine wil in? Hy besluit soms om nie gebede te verhoor soos wat ons dit wil hê nie, omdat Hy beter weet. Dit gebeur eenvoudig elke dag dat mense “verkeerdelik” sterf, of mense baie siek word, of in ongelukke sleg beseer raak, of alles in hulle lewens verloor.

Wie van ons kan net eenvoudig sê:-

JOB 1:21 “Sonder iets het ek in die wêreld gekom en sonder iets gaan ek daaruit. Die Here het gegee en die Here het geneem. Prys die Naam van die Here.”

Bron:  heuning.co.za NGVishoek: Ds. ( dominee ) Martin Barnard.

Lees Meer >>

Hoekom lewe ek?


 

• “Die Gees is die waarborg van ons erfdeel… “ Die antwoord van die ware lewe lê volledig buite onsself. Die lewe is slegs in God te vind, geensins in onsself sonder God nie. Ja, met God se Gees wat net in my inkom, begin ek eers waarlik lewe, dan is Hy die volledige lewe in my. En met Hom in my, is Hy vir altyd verseker in my. Die vastigheid en die sekuriteit dat Hy in my is, is in Hom alleen en van Hom alleen afhanklik. Hy besluit hoe Hy in my is, hoe Hy die lewe in my is, Hy is die ware sin van die lewe in my.

• “… vir die bevryding van God se eiendomsvolk …” God is besig met sý doel met elkeen van ons op aarde. En dit doen Hy op sy manier, op sy tyd … en teen hemelse spoed en op onverklaarbare Goddelike werkswyses, maak Hy sy kinders bymekaar. En slegs sy kinders ontdek ware vryheid en is die enigstes wat betekenis in die lewe vind. Want om ‘n Jesus-mens te wees wat waarlik sinvol lewe, is jy vrygemaak van al die inspanning om heilig te lewe. Die ware vryheid is slegs te vind in die Heilige Een in jou as Jesus-mens.

• “… tot lof van sy heerlikheid.” Ons het ‘n uiters jaloerse God, Hy soek geen kompetisie nie. Hy soek al sy eer vir Homself. En daarom kom lewe Hy slegs in Jesus-mense, in wie Hy al die lof vir die lewe vir Homself vat. Hy sorg self vir die resultaat van sy kragtige Gees-werking in sy ewige erfgename. En die enigste resultaat van ‘n sinvolle en betekenisvolle lewe, is die heerlikheid van die enigste ware lewende God self!

Hoekom lewe ek? Dat God self alleen volledig in en deur my alle eer ontvang!

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Lees Meer >>

“Ek vergewe jou!”


 

• Help met my grootste probleem: sonde.

• Eerste prys vir elkeen van ons: gratis verlossing.

• Redding op slegs EEN manier: Jesus.

• Oorwinning behels die volgende: lewe.

My Superhero kom HELP my met my grootste probleem. Elkeen van ons was dood as gevolg van ons sonde, maar die sondelose Lam van God, Jesus self, die enigste Seun van God, betaal die volledige prys vir alle sonde aan die kruis.

My Superhero kom gee heeltemal gratis vir ons elkeen wat kies ‘n Jesus-mens te wees, die EERSTE prys, naamlik om verlos te wees van sonde, die oordeel en die ewige hel. Jesus-mense is reeds verlos, en dit alles alleen op grond van Jesus se verlossingswerk wat Hy deur sy Gees in elkeen van ons voortsit.

My Superhero is die enigste Redder wat daar ooit was in die verlede, en vandag is, en sal wees in die toekoms. Hy is nie net God se plan A nie, Hy is God se enigste plan vir REDDING. En hierdie redding het reeds vir elke Jesus-mens begin en sal voltooi word in die hemel waar ons vir altyd in God se volmaakte teenwoordigheid sal wees.

My Superhero bewerk en gee en is die OORWINNING. En hierdie oorwinning is vir hierdie lewe en vir die lewe hierna. In hierdie lewe beteken die oorwinning die sonde en die Satan beheer nie meer ons lewe nie – die Heilige Gees beheer my lewe. In die lewe hierna beteken die oorwinning dat ons in die fees van die ewige heerlikheid by God sal wees.

Al hierdie “hero”-woorde het een oorsprong: die kruis. Aan die kruis is ons sondeskuld vasgespyker en vir altyd vergewe, sodat ons eie Superhero vir elkeen persoonlik elke dag wil sê: “Ek vergewe jou!”

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Lees Meer >>

YOM KIPPUR – Die Tempel Deure en die Sondebok

 

Lev 16:4  Hy moet ‘n heilige linnerok aantrek en ‘n linnebroek moet oor sy vlees wees en met ‘n linnegordel moet hy hom gord en ‘n linnetulband moet op sy hoof wees. Dit is heilige klere; en hy moet sy liggaam in die water bad en dit aantrek.

Lev 16:5  En van die vergadering van die kinders van Israel moet hy twee bokramme as sondoffer en een ram as brandoffer neem.

Lev 16:6  Dan moet Aäron die sondofferbul wat vir hom bedoel is, aanbring en vir hom en sy huis versoening doen.

Lev 16:7  Hy moet ook die twee bokke neem en hulle voor die aangesig van die HERE stel by die ingang van die tent van samekoms.

Lev 16:8  En Aäron moet oor die twee bokke die lot werp, een lot vir die HERE en een lot vir Asásel.

Lev 16:9  Dan moet Aäron die bok aanbring waar die lot vir die HERE op gekom het en hom as sondoffer berei;

Lev 16:10  maar die bok waar die lot vir Asásel op gekom het, moet lewendig voor die aangesig van die HERE gestel word, om oor hom versoening te bewerk deur hom vir Asásel in die woestyn te stuur.

Daar is ʼn merkwaardige verwysing in die Talmud aangaande die deure van die Tweede Tempel:

“Veertig jaar voor die vernietiging van die Tempel (i.e. 30 AD) het die lot nie weer in die regterhand geval nie, die rooi lint (om die Asésel of sondebok se nek) het nie weer wit geword nie, die westelike lig (die ewige lig) het nie meer gebrand nie en die deure van die heikhal (of heiligdom) het vanself oop gegaan, totdat Rabbi Yochanaon ben Zakkai dit bestraf het.” Hy het die volgende gesê: (aan die Tempel)

“O heikhal, heikhal waarom onstel jy jouself. Ek weet baie goed dat jy bestem is om vernietig te word, want Zechariah ben Iddo het reeds aangaande jou geprofeteer “Zec 11:1 Open jou deure, o Líbanon, sodat vuur jou sederbome verteer!

 

(Talmud Bavli, Yoma 39b)

Dit is belangrik om daarop te wys dat die Talmudiese verwysing 40 jaar voor die vernietiging van die Tweede Tempel gemaak is. Die Tweede Tempel is vernietig in 70 AD. Die datum toe hierdie merkwaardige gebeurtenis plaasgevind het, was presies dieselfde jaar toe Christus aan die kruis gesterf het.

Die buitengewone swaar deure van die Tempel het vanself oop gegaan. Daar is ook ander sekulêre Joodse bronne wat hierdie gebeurtenis bevestig:

“By dieselfde Fees (Pasga) …het die Oos hek van die binne hof van die Tempel, wat van brons gemaak was en verskriklik swaar was en met groot moeite met die hulp van twintig man gesluit moes word, wat gerus het op ʼn basis wat met yster versterk is en met yster penne vasgehou was diep in die sterk vloer gemaak van een groot soliede klip, is gesien om teen die sesde uur van die nag vanself oop te gaan.”

(Josephus; The Wars of the Jews 6.5.3)

Die Nuwe Testament vertel vir ons dat die Voorhangsel van die Tempel van bo tot onder in die middel deur geskeur het.

Mat 27:50  Daarop het Jesus weer met ‘n groot stem geroep en die gees gegee.

Mat 27:51  En kyk, die voorhangsel van die tempel het in twee geskeur, van bo tot onder, en die aarde het gebewe en die rotse het geskeur;

Mat 27:52  en die grafte het oopgegaan en baie liggame van die ontslape heiliges het opgestaan.

Mat 27:53  En ná sy opstanding het hulle uit die grafte uitgegaan en in die heilige stad ingekom en aan baie verskyn.

Mat 27:54  En toe die hoofman oor honderd en die wat saam met hom Jesus bewaak het, die aardbewing sien en die dinge wat daar gebeur, het hulle baie bevrees geword en gesê: Waarlik, Hy was die Seun van God.

n Wonderbaarlike gebeurtenis wat 40 jaar voor die vernietiging van die Tempel in 70 AD gebeur het. Die Talmudiese gedeelte hier bo bevestig ook twee ander merkwaardige gebeurtenisse wat gebeur het. Na die dood en opstanding van die Messias, het die westelike lig opgehou brand. Die ewige lig “Ner Tamid” wou nie meer brand in die Aller Heiligste nie. Die lot vir die Azazel gedurende Yom Kippur het ook nie meer in die regter hand geval nie en die rooi lint wat om die sondebok se nek vasgemaak was en aangedui het of die volk se sonde vergewe was, het nooit weer wit verkleur nie i.e. daar was nooit weer versoening/vergifnis van sonde vir die volk van Israel deur die bring van offerhande na die dood en opstanding van Christus nie, die lint het rooi gebly.

Die lot is gegooi vir die Azazel of sondebok op Yom Kippur. Twee bokke was gekies en die lot het altyd op die bok aan die regterkant geval. Na die dood en opstanding van Christus is die lot gegooi en die bok aan die linkerhand is gekies om die volk se sonde die wildernis in te dra. Daar was ʼn rooi lint om die sondebok se nek vasgemaak.

Die lint het altyd wit verkleur om aan te dui dat die volk se sonde vergewe was.

Isa 1:18  Kom nou en laat ons die saak uitmaak, sê die HERE: al was julle sondes soos skarlaken, dit sal wit word soos sneeu; al was dit rooi soos purper, dit sal word soos wol.

Vanaf 40 jaar voor die vernietiging van die Tempel, die jaar toe die Messias gesterf het aan die kruis en uit die dood opgestaan het, het die lint nooit weer wit verkleur nie.

 

NGVishoek: Ds. ( dominee ) Martin Barnard.

Lees Meer >>