ngvishoek – Bladsy 107

Ek het my al in tye van groot krisis spesiaal afgesonder om te bid en die wysheid van die Here te soek en geweldige geloofversterking ontvang. Ek dink as mense meer bid, sal hulle beter die versoekings van die wêreld en die krisisse wat oor hul pad kom, kan hanteer. Gebed is ‘n lewenshouding van afhanklikheid van God. Gebed is om ons afhanklikheid aan Hom te erken. Hoe meer ons bid, hoe groter is ons erkenning dat ons nie self iets kan bereik nie, maar dat ons van God afhanklik is. As ons heeltyd in afhanklikheid van God leef en bewus is van sy teenwoordigheid, sal ons die versoekinge en krisisse wat oor ons lewenspad kom, dalk beter kan hanteer. Jesus waarborg nie dat ons vrygespreek sal word van al die hartseer en sonde van die wêreld nie, maar Hy gee aan ons die opdrag om te bid dat ons die versoekinge wat oor ons pad gaan kom en die hartseer en die vreugdes in afhanklikheid van God sal kan hanteer.

Gebed: Dankie, Here dat ons in hierdie tyd voor die kruisigings dág onsself kan verootmoedig in gebed sodat ons geestelik sterk kan wees om die aanslae van die lewe te hanteer.

Môre vier ons Goeie Vrydag – die dag waarop Jesus vir al ons sondes gekruisig is. Dit is ‘n dag van stilte en gebed. Dit is ‘n dag in die jaar waar ek en my gesin vir mekaar weer die verhaal van Jesus ons verlosser vertel. Jesus het drie dae daarna opgestaan en die bande van die dood finaal verbreek. Daarom vier ons Christene eerskomende Sondag, Opstandingsdag want dis die herdenking van ons nuwe lewe in Christus.

Bron: versndag.co.za

NGVishoek: Ds. ( dominee ) Martin Barnard.

Evolusie word vandag wêreldwyd as ’n feit aanvaar. Waarom bedryf sommige gelowiges volstruispolitiek en hang randeier-wetenskaplikes aan wat dit kamtig verkeerd bewys?

Besef die gelowiges nie dat hulle hulself belaglik in die oë van ingeligte mense maak nie?

Die nuutste argeologiese navorsing vind géén bewys van die bestaan van ’n Israelse volk in slawerny in Egipte nie.

Van die swerftog van meer as ’n miljoen mense 40 jaar deur die woestyn, waarvan 38 naby dieselfde oase, is daar ook geen teken nie.

Daar is wel bewyse dat groepies inwoners van Kanaän begin saamsmelt het en uiteindelik die Israeliete geword het.

Daar is boeke vol interessante navorsing oor die Bybeltydperk. Dit is nie navorsing deur “ateïste” wat die Christendom probeer ondergrawe nie.

Dis eerlike, bewysbare navorsing. Waarom dan telkens die histeriese uitbarsting van beledigings en verdoeming?

Moet ’n eerlike wetenskaplike sy ontdekkings en bevindings ontken bloot omdat dit nie met die Bybel ooreenstem nie?

Sou hierdie “gelowiges” werklik verkies dat daar nooit navorsing gedoen word nie?

Waarvoor is hulle bang? Stel hulle nie ook belang om die Christelike godsdiens beter te verstaan nie? Of voel hulle dalk bedreig dat hul vertolking van die Bybel toe nou nie so akkuraat was nie?

Bron: http://www.beeld.com/MyBeeld/Briewe/Histerie-as-navorsing-Bybel-weerle-20120330

In die boek beweer De Wesselow dat hy die opstanding kan verklaar sonder om na enige wonderwerke te verwys.

De Wesselow, wat lank ’n gesiene pos as kunshistorikus aan die Universiteit van Cambridge beklee het, grond sy verklaring op die Kleed van Turyn, ’n doek wat in die Middeleeue bekendheid verwerf het en steeds ’n groot aanhang het omdat baie mense glo dit is die kleed waarin Christus begrawe is.

Hoewel dié reliek, met die duidelike afdruk van ’n mansfiguur daarop, vir baie Katolieke eg is, maak talle wetenskaplikes dit as ’n namaaksel af omdat daar met koolstoftoetse bewys is dit kan nie ouer as omtrent 800 jaar wees nie.

De Wesselow meen egter hy kan bewys dié koolstoftoetse was verkeerd. In gedetailleerde hoofstukke verskaf hy heelwat bewyse van hoekom hy meen die kleed is eg, onder meer stuifmeelspore in die materiaal wat aandui dat dit wel in een of ander stadium in Palestina was en ’n ontleding van die figuur wat aandui dat dit ’n besonder akkurate afbeelding is van ’n man wat in die eerste eeu aan ’n kruis gesterf het.

Waarmee De Wesselow egter heelwat mense gaan omkrap, is sy bewering dat dié doek, indien dit eg is, ook ’n verklaring van Christus se opstanding kan bied.

Volgens hom sou die vroeë Christene dié kleed uit Jesus se graf verwyder het, en sou dié akkurate afbeelding van Jesus se lyk daarop mense sodanig beïndruk het dat hulle dit sou sien as ’n bewys dat Jesus se gees op die een of ander manier ná sy dood weer voortleef.

Die doek is volgens De Wesselow die “verheerlikte liggaam” van Jesus wat deur baie gelowiges ná Paasfees gesien is.

Christelike publikasies soos The Christian Post en ’n paar Katolieke webwerwe oorsee het reeds teen dié teorie kapsie gemaak en sê dit is onversoenbaar met die Christelike leer.

Wetenskaplikes sê op hul beurt dit is hoogs onwaarskynlik dat die kleed regtig so oud kan wees soos De Wesselow beweer en inderdaad uit Jesus se graf kom.

Maar De Wesselow self, wat ’n agnostikus is, is nie te veel gepla oor die geestelike implikasies van sy bewerings nie.

Hy gee wel in die boek toe dat die feit dat hy oor die Turynse kleed geskryf het (’n onderwerp wat meestal deur pseudohistorici en samesweringsteoretici opgehaal word) hom buite die “intellektuele hoofstroom” plaas en sal spreek tot die soort mense wat boeke soos Dan Brown se The Da Vinci Code ernstig opneem.

Bron: http://www.rapport.co.za/Wereld/Nuus/Boek-se-Turynse-kleed-eg-en-verklaar-glo-opstanding-20120331

In my kerk is dit beleid dat jy 10% van al jou inkomste na die Here sal bring soos Hy van jou vra. Dan gee ons offergawes ook. Al dié tiendes word na een sentrale punt vir elke gebied gekanaliseer en van daar word weer 10% na die volgende vlak gekanaliseer en so gaan dit voort tot op die laaste vlak.

Uit hierdie tiendes word alle kerkwerkers se salarisse betaal en, soos die briefskrywer voorstel, die predikant in Johannesburg kry dieselfde as die een in Pofadder. Daar is dus nie wedywering om die grootste gemeente te bedien omdat hy dan ’n groter salaris gaan verdien nie.

Ek is ’n pensioentrekker wat min kry om van te lewe. Te veel probeer dié verskoning opper: “Maar Here, as ek nog 10% aan U gee, waarvan gaan ek lewe?”

Ek het egter gevind my posisie word al hoe meer benard en het gesê: “Nou goed, kom ons probeer U manier.”

Nodeloos om te sê, die Here hou Sy woord. Ek het uitgevind dat ek in my omstandighede juis nie kan bekostig om die Here te beroof nie. Sedertdien kom ek baie verder met 90% as met 100%. Die Here maak deure oop om ekstra te verdien, en ek het in 15 jaar as pensioentrekker nog nie broodgebrek gely nie.

Ja, ek het dit nie breed nie, maar ek het genoeg en lewe beter as sommige wat heelwat meer as ek kry. Ek kan nog so ietsie afknyp vir mense wat honger ly.

Probeer dit gerus, dit werk. Ek kan baie stories vertel van mense wat hierdie resep probeer het, en vandag is hulle heelwat beter daaraan toe as voorheen.

Moenie die kerk dreig of dwing nie, die Here het ’n vrywillige gewer lief. Die gawe moet uit die hart kom!

Bron: http://www.rapport.co.za/MyRapport/Briewe/Gierige-kerklidmate-beroof-God-van-offers-20120330

Onder hulle is leiers in die Anglikaanse Kerk soos emeritus-aartsbiskop Desmond Tutu en aartsbiskop Thabo Makgoba; leiers in die VGK soos prof. Thias Kgatla en prof. Nico Koopman; die Katolieke kardinaal Wilfred Napier en ’n paar NG teoloë.

Die dokument, “Theological Reflections on the 2012 Centenary Celebrations of the ANC”, is op 8 Februarie aan die ANC oorhandig.

Einde verlede maand het Arrison en ander koördineerders van die projek weer met ANC-leiers vergader op die vooraand van ’n vergadering van dié party se nasionale uitvoerende komitee.

Volgens Arrison het hulle op die vergadering veral vier kwessies onder die ANC se aandag gebring:
* Die verval van waardes in die regerende party;
* Die wyse waarop onderwys afgeskeep word;
* Kommer oor die land se energiebeleid; en
* ’n Versoek dat die ANC aan sekere internasionale aangeleenthede, en spesifiek die Palestynse kwessie, aandag moet gee.

In die brief word ook talle ander klagtes onder die ANC se aandag gebring, waaronder die wyse waarop die ANC sekere kerke in hul verkiesingsveldtogte voortrek.

Hoewel dit nie uitdruklik gesê word nie, is dit skynbaar ’n verwysing na pres. Jacob Zuma wat in die aanloop tot die vorige verkiesing kerke soos Johannesburg se Rhema-kerk besoek het om steun te werf. Kort daarna is Rhema se leier, past. Ray McCauley, aangestel in ’n forum wat Zuma oor geloofsake moet adviseer.

“Dié onlangse verwikkeling oor belonings vir diegene wat die ANC ondersteun, veral tydens verkiesings, kom naby aan ’n soort staatsteologie waar kerkleiers ’n politieke party eerder as die mense dien. Die profetiese stem word op die altaar van die party geoffer en verander kerkleiers in onkritiese lofsangers van die party,” lui die brief.

Bron: http://afrikaans.news24.com/Suid-Afrika/Nuus/Kerkleiers-wil-ANC-leiding-gee-20120408

Ons Here het sy eie tydsberekening: duisend jaar is soos een dag en een dag soos duisend jaar – niemand kan die tyd van sy weer kom na die aarde bereken volgens tyd nie. Hy slaap nooit nie en neem nooit verlof nie. Hy maak altyd die goeie werk, wat Hy reeds met Jesus in ons deur sy Gees begin het, klaar – volgens sy volmaakte tydsberekening. Hy is 100% betrokke by die volmaakte uitkoms van elke saak wat sy koninkryk raak. Wat sal die voorwaarde wees dat jy ook volledig deel is van die volmaakte uitkoms vir sy koninkryk?
Wees ‘n Jesus-mens met hoop, dit wil sê, kry ‘n positiewe uitkyk op die lewe vandag by die Bron van hoop, en daar sal vir jou ‘n beter môre wees!

Hoe onrustig voel jy oor die lewe in die algemeen? Hoeveel dringendheid ervaar jy as Jesus-mens dat dinge moet regkom? Hoe ernstig neem jy jou roeping om ander van Jesus te vertel? Hoe baie lê jy wakker in die nag oor die moontlikheid dat iemand naby aan jou verlore sal gaan sonder Jesus? Hoe direk raak die stukkende wêreld waarin ons elke dag moet oorleef, vir jou?

Ons Jesus is onrustig oor die verlore wêreld waarin ons is. Hy is dringend, Hy is ernstig, Hy gee regtig om, die stukkende wêreld raak Hom direk. Hy is in jou deur sy Gees en wil in jou dieselfde erns laat groei om hoop te gee vir elke situasie waarin ons lewe.
Hoe gouer jy met sekerheid ware hoop deur jou laat bring, hoe gouer kom Hy weer!!!

Elke Jesus-mens is só reeds deel van die volmaakte voltooiing van God se koninkryk!!!

Bron: http://doomcharl.blogspot.com/ NGVishoek: Ds. ( dominee ) Martin Barnard.

NGVishoek: Ds. ( dominee ) Martin Barnard.

Dis niks nuut in die bestaan van die mensdom nie, en die skuld rus ewe swaar op die skouers van verskeie gelowe. Net binne die Christen geloof is die Europese Kruistogte na Palestina ’n goeie voorbeeld terwyl die aanhangers van Islam vandag onder die verleentheid steier van die misbruik van hulle geloof deur ekstrimistiese selfmoordaanvallers en veral die heer Osama bin Laden wat die teks van die Heilige Koran wild en wakker misbruik het om sy politieke magspel deur die voer van terrorisme te wil regverdig.

Vele Christene het hulself vrywillig as soldate by die kruistogte aangesluit om die sogenaamde “ongelowige“ Moslems vanuit Jerusalem te dryf. Maar die eintlike doelwit agter die kruistogte was alles behalwe die ongelowige Moslems. In die proses is die Jode wat ook in Jerusalem woonagtig was sommer ook onder die swaard gesteek! Hulle was net op die verkeerde plek op die verkeerde tyd! Die kruistogte het eintlik gegaan om die beheer van die strategiese karavaanhandelsroetes vanuit Persie, Asië en Sjina wat almal in die nabyheid van Jerusalem saamgekom het. Wie Palestina beheer het, het die handelsroetes beheer. Wie die handelsroetes het, het ryk geword, sommer baie ryk! Jerusalem was maar net die lokaas om die konings van Europa te oortuig om die oorlog namens die Europese handelaarshuise in Palestina te voer en so hul goddelike plig na te kom, minwetende …..

Net so het die Spaanse inval in Suid-Amerika begin onder die dekmantel van godsdiens. Die Jesuit-priesters het dit as hul roeping beskou om die Woord tot aan die uithoeke van die wêreld te bring.

Maar toe die Jesuit priesters eers die oorvloed Aztec goud waarneem het die fokus vinnig verander. Die heer Cortez is baie vinnig oortuig dis nou net die regte tyd om ’n paar van die Indiaanse barbare in die oerwoude van Suid-Amerika met soldate en kanonne te gaan bekeer – natuurlik veral die wat baie goud besit het. Dit was dan ook nie lank nie toe is bekering vergete en die plunder van die Indiaane se goud voer hooggety!

So kan ons voortgaan om nog vele voorbeelde uit die geskiedenis uit te lig, maar die eintlike vraag waarop ek ’n antwoord benodig is die volgende: “Wat is die waarskuwingstekens dat die godsdiens wat ek aanhang nou as ’n politieke of persoonlike magsbal misbruik word?“

My ouers het my gewaarsku dat alles wat ek doen wat te veel “te“ in het, sleg is – met ander woorde die natuurlike balans is versteur. Net so is dit met godsdiens.

Vir my is die volgende vyf waarskuwingstekens ‘n teken van die voer van ’n korrupte godsdiens.

1. Eise van Absolute Waarheid. Die dag as my leraar op die kansel staan en my vertel dat my kerk is die enigste wat die ware godsdiens en boodskap van God vertel. Ek kan net gered word as ek aan die spesifieke kerk behoort, die spesifieke doktrine en ritueele volg en my afsonder van ander invloede wat my denke kan beinvloed, en boonop is my leraar die enigste wat God se boodskap kan ontvang, verstaan en kan interpreteer.

Anti-vraag. Dan moet ek onmiddelik myself afvra: ”Maar waar in die Bybel sê God, Jesus of die Heilige Gees onomwonde vir my dat kerk X die enigste ware kerk is?”

2. Blinde Geloofsoortuigings. Die dag as my leraar op die kansel staan en my vertel dat ek hoef nie sy woorde te deurdink nie – ek moet net blindelings doen soos hy vir my beveel want hy alleen het God se magtiging om die Bybel uit te lê, en boodskappe en instruksies daaruit te formuleer.

Anti-vraag. Dan moet ek onmiddelik myself afvra: ”Waarom het Jesus dan aan Sy dissipels die opdrag gegee om uit te gaan en die Woord te verkondig sodat dit tot die uithoeke van die wêreld bekend sal word? Want Hy wou hê almal moet Sy Woord kan lees en verstaan!”

3. Die “Ideale” Tydsbepaling. Die dag as my leraar op die kansel staan en my vertel dat hy alleen het die ware tydsbepaling vir die koms van die Here. Geen ander kerk of godsdiens het die insig om die tyd en die plek te bepaal nie.

Anti-vraag. Dan moet ek onmiddelik myself afvra: ”Waarom het die Aartsengel Gabriel dan verkondig “Selfs die engele van die hemel weet nie die tyd [en die plek van die wederkoms] nie!”

4. Die Eindresultaat oorloof Enige Misdaad. Dit is seker die aspek van geloof wat die meeste misbruik word, en die nouste met magverkryging verband hou. Die dag as my leraar op die kansel staan en my vertel dat ek kan maar moor, plunder, steel, oorlog maak en ander wandade begaan, solank ek dit net ten doel het om die kerk se einddoelwit te bereik, dan is dit geregverdig.

Anti-vraag. Dan moet ek onmiddelik myself afvra: ”Waarom en waaroor gaan die spul werklik waarmee ek nou betrokke is dat van my verwag word om God se instruksies te veronagsaam?“

5. Die Voer van ’n Heilige Oorlog. Die dag as my leraar op die kansel staan en my vertel dat ek kan my gewete sus, ek voer ’n heilige oorlog.“ Dan moet ek onmiddelik weet dis nou tyd om katvoet te loop, hier broei iets onheilig. Geen oorlog is ’n heilige of regverdige oorlog nie. Clausewitz het dit mooi opgesom met sy meesterwerk “On War“: “Oorlog is die voortgesette voer van politiek deur ander middelle“.

Anti-vraag. Dan moet ek onmiddelik myself afvra: ”Waarom en waaroor gaan die spul werklik en hoekom probeer hy/hulle dit so desperaat regverdig“.

Hier volg ‘n greep uit die inleiding tot die boek:

WATTER WAARDE HET DIE VERBORGE BOEKE VIR ONS?

♦ ‘n Mens moet dit liewer glad nie lees as jy dit blindelings en onoordeelkundig gebruik om daarmee die Bybel se feite en waarhede as “onjuis” te bewys nie. Ons kan dit wat ons op grond van die Bybel glo, NOOIT op grond van wat in die apokriewe of pseudepigrafiese boeke staan, verander of verwerp nie, want dan sal ons op dwaalweë beland. Calvyn het, nes Luther, gemeen dat die Ou-Testamentiese apokriewe wel gelees kan word, maar nooit om enige leer van die kerk teen te staan of om die leer daarmee te onderskryf nie.

♦ Felix Mijnhardt is van mening dat die Ou-Testamentiese apokriewe uiters leersame boeke is wat die Bybelleser en -student kan prikkel om die Skrif noukeuriger te bestudeer en ook om vir ons lig te werp op die omstandighede gedurende die donker na-ballingskapsperiode (die tydperk tussen die Ou- en Nuwe Testament) waaroor die Bybel swyg.
♦ Adrio König noem daarby dat, omdat ons as Protestante nie die ruimer Ou Testament, (die Joodse kanon plus die groep betroubare Ou-Testamentiese apokriewe in die Septuagint) wat baie Jode in Jesus se tyd asook die vroeë Christelike Kerk gebruik het, ken nie, ons baie min kennis het van die apokaliptiese wêreldbeeld wat juis in die 400 jaar tussen die Ou- en Nuwe Testament ontwikkel het. Dit is juis dié wêreldbeeld waarby Jesus self direk aangesluit het. So, byvoorbeeld het ons in die Ou Testament net een duidelike verwysing na die opstanding (Dan.12:2) maar in die tyd van Jesus was dit ‘n algemene oortuiging van die man op straat dat daar ‘n opstanding is. Maar in die apokriewe boeke sien ‘n mens in besonderhede hoe hierdie oortuiging in die tyd tussen ons Ou Testament en Jesus se tyd ontwikkel het tot ‘n wesenlike deel van die geloof van groot dele van die Jodedom.

♦ Aansluitend hierby kan ook genoem word dat, as ‘n mens die apokriewe, maar ook die pseugepigrafiese boeke lees, verplaas dit jou terug na die denkwêreld en verwysingsraamwerk van die mense in die tyd van die Bybel. Jy sien die Bybelkarakters teen ‘n bepaalde kultuur-historiese en godsdienstige agtergrond en dan word sommige dinge wat jy vanuit ‘n moderne, Westerse wêreld nooit regtig kon verstaan nie, vir jou duidelik. As voorbeeld kan die grafiese uitbeelding van die doderyk, (Sjeool in Hebreeus en Hades in Grieks) in die apokriewe en pseudepigrafiese geskrifte geld. (Vgl. Die Evangelie van Nikodemus, hoofstukke 17-25)

Volgens hierdie ou wêreldbeeld is die doderyk ‘n plek van diep, stikdonker duisternis waarvandaan niemand kan terugkeer nie. Dis ‘n gebied diep onder die aarde (Num. 16:30, 1953-vertaling), of die see (Job 38:16-17) waar die dooies ‘n soort skadubestaan voer, sonder lig, sonder kontak met mense wat nog lewe, sonder gemeenskap met God (Job. 10:21-22, Ps. 88:6-7 en 115:17) en geen hoop op redding nie. Die dood (gepersonifiseer) en Satan heers daar. In die doderyk is die tyd vir keuses verby, daarom kan die Here daar ook nie aanbid of geloof word nie (Ps. 6:6 en 115:17). Die doderyk is, volgens dié wêreldbeeld, ook ‘n sterk vesting met poorte (Jes 38:10, Job 38:17, Matt. 16:18), ‘n gevangenis (1 Pet. 3:19) ‘n verslindende, bedreigende mag (Spr. 1:12, Jes. 5:14). As ‘n mens eers hierdie “kopskuif” kon maak wat jou terug verplaas na dié wêreldbeeld uit die oudheid, dan werp dit lig op talle teksverse soos almal hierbo aangedui, en dan kry Skrifgedeeltes soos Op. 20:1-3 en 12-15 asook 1 Kor. 15:55 waar Paulus uitroep: “O dood waar is jou angel? Doderyk, waar jou oorwinning?” sommer meer betekenis. Die dood en doderyk was vir die mense van die Bybeltye die allergrootste verskrikking en daarom is verlossing daaruit ‘n heerlike, bevrydende boodskap. Talle van hierdie vreemde wêreldbeelde waarmee ons in die Bybel kennis maak maar wat ons soms nie mooi verstaan nie, word vir ons duidelik wanneer ons hierdie “verborge boeke” lees.

♦ Van der Watt en Tolmie noem ook ‘n belangrike ander feit: Beide die kanonieke en apokriewe boeke vorm deel van die biblioteek van boeke wat die heel eerste Christene in die eerste eeue na Jesus se hemelvaart gelees het. Dit was boeke wat die Christendom deur al die eeue gevorm het. Daarom het Christene deur die eeue gesê dat, as jy die Christendom wil verstaan, moet jy nie net die Bybel lees nie, maar ook die boeke van die mense wat in dieselfde tyd as die Bybelskrywers geleef het. Daardie boeke sluit ook die geskrifte in van die vroeë kerkvaders, veral die “apostoliese vaders” wat die apostels nog persoonlik geken het, soos Polikarpus van Smirna, Ignatius, Papias en Justinus. Hulle het die ou apostels verstaan en so kom ons deur hulle oë agter die bedoeling van die Bybel.

♦ Alhoewel ons beslis nie inligting uit die apokriewe boeke nodig het om te kan glo nie, kan wankelmoediges se geloof tog versterk word deur ‘n studie van hierdie boeke. Die aanslag op die kerk en die gesag van die Bybel het wêreldwyd toegeneem. Veral die afgelope drie dekades in Suid-Afrika het uitsprake van sommige teoloë, Dan Brown se boeke en die Da Vinci-code film, asook sommige prominente figure wat nie teologies geskoold is nie, maar wat periodiek skielik as “teologiese kenners” ontpop en opruiende uitsprake teen Christene, die Bybel en die Kerk maak, baie mense hewig ontstel. Ander is deur hierdie tipe propaganda totaal van die kerk vervreem. Ook baie van die TV-uitsprake in sommige programme wat dikwels met behulp van “nuwe opgrawings/ontdekkings” die gesag van die Bybel ondermyn, verwar baie Christene. Die meeste van die mense wat wil “bewys” dat die Bybel nie betroubaar is nie, het na veral pseudepigrafiese boeke en Kodekse (Handskrifte) soos die Nag-Hammadi Handskrifte verwys en die Bybel dan ondergeskik gestel aan dié geskrifte. Vergelyk veral die opspraakwekkende “onthullings” rondom die sogenaamde Evangelie van Tomas (deel van die Nag-Hammadi Handskrifte) en die Evangelie van Judas, ‘n geskrif uit die derde eeu” na Christus. Ook Keiser Konstantyn se “aandeel” in die kanonisering van die Bybel, word gedurig opgehaal. Sommige mense het op grond hiervan begin twyfel oor die gesag en betroubaarheid van die Skrif.

Ander wat die gesag van die Bybel wil verdedig, beskik nie oor die nodige kennis van hierdie ou, “verborge boeke” en kerkgeskiedenis om hulle standpunt te kan verdedig nie. Daar is gevind dat wankelmoediges se geloof weer versterk is nadat hulle self kennis gemaak het met hierdie geskrifte en ou historiese bronne uit die tyd van die eerste paar eeue rondom die geboorte van Christus.

‘n Studie van sommige van die uitsprake (veral in die Nuwe-Testamentiese pseudepigrafiese geskrifte) het hulle laat besef dat dit niks anders as sensasiestories of “vroom fantasieë” is nie wat met bymotiewe geskryf is en dat ons nooit ons geloof daarop kan bou nie. Gewapen met kennis oor hierdie geskrifte en die vroeë kerkgeskiedenis, word gelowiges dus ook in staat gestel om standpunt te kan inneem teen al die afbrekende publikasies en uitsprake waarmee Christene deesdae onophoudelik gekonfronteer word.

♦ As ons die apokriewe boeke en ander oud-historiese geskrifte dus met ‘n kundige en oop gemoed bestudeer omdat ons ons kennis van die Bybelwêreld en ons insig in die Bybelwaarhede en Kerkgeskiedenis daarmee wil verruim, sal daar ‘n wêreld vir ons oopgaan waarvoor ons tot dusver “blind” was en ons sal met nuwe oë na al die “ou” Bybelfeite kyk.

DOEL MET HIERDIE BOEK

Die doel is NIE om volledige vertalings van die apokriewe boeke te gee, sodat die leser dit kan lees en bestudeer nie. Daarvoor is daar uitstekende bronne wat vryelik beskikbaar is, onder andere:

• APOKRIEWE – Ou- en Nuwe Testament. Verlore boeke uit die Bybelse tyd. Deur Jan van der Watt en Francois Tolmie.

• APOKRIEWE van die Ou Testament: Deur Felix Mijnhardt

• DIE BYBEL met DEUTERO-KANONIEKE BOEKE. Die Bybelgenootskap van Suid-Afrika [Kyk die Bronnelys]

• Op die INTERNET kan spesifieke apokriewe boeke ook maklik afgelaai word.

In hierdie studie sal vertel word wat in sommige van die “verborge boeke” en ander buite-Bybelse bronne staan en daar sal gewys word op hoe dit ons kennis van die Bybel en Bybeltyd en Bybelkarakters verruim en vir ons nuwe perspektiewe op ou Bybelfeite gee.

Dit dui ook aan watter inligting histories redelik betroubaar is, omdat dit ook in lyn met ou historiese bronne en die Bybel self is, en watter slegs sensasionele stories of “vroom fantasieë” is, geskryf deur onbetroubare persone wat bymotiewe gehad het.

As jy egter wyer wil lees as dit wat hier uiteengesit is, word jy aangeraai om beslis een of meer van die bronne oor die apokriewe boeke aan te skaf.

DIE DRIE AFDELINGS VAN HIERDIE BOEK

Afdeling A: Met verwysing na 1 en 2 Makkabeërs en ander buite-Bybelse bronne gaan die na-Ballingskapstydperk – veral die 350 jaar v.C. – bestudeer word en lyne na die Nuwe Testament gaan deurgetrek word, om te sien hoedat alles, selfs die aaklige dade en bose planne van slegte mense, meegewerk het om God se plan met die wêreld in “die volheid van die tyd” te laat realiseer.

Afdeling B: Met verwysing na Nuwe-Testamentiese apokriewe en pseudepigrafiese geskrifte gaan gesien word hoedat baie van hierdie “verborge boeke” oor die geboorte en kinderjare van Jesus, sy moeder, Maria, en gebeurtenisse in hulle lewens tot na Jesus se dood, lig werp op, onder andere, die Mariologie (die Rooms-Katolieke Kerk se siening van Maria) asook die lewe, lyding, dood en opstanding van Jesus, en dit gaan vergelyk word met dit wat die Bybel daaroor vir ons sê. .

Afdeling C: Inligting wat ons meer vertel oor wat na Jesus se hemelvaart van die apostels geword het, word hier gedek. Daar sal gesien word hoedat ‘n mens hier fyn moet trap om die koring van die kaf te skei, maar dat die waarheid tog soos ‘n goue draad sigbaar word wanneer jy moeite met so ‘n studie doen. Daar is gebruik gemaak van bevindings van kundiges wat deeglik navorsing oor hierdie onderwerp gedoen het. Ook hier word daar telkens gekyk na dit wat die Bybel en ander ou en betroubare historiese bronne vir ons oor hierdie persone en hulle omswerwings sê.

Die volledige boek kan deur Kindle gekoop word deur http://www.amazon.com/Apokriewe-Boeke-Feite-fantasie%C3%AB-ebook/dp/B007NVDORA/ref=sr_1_1?ie=UTF8&qid=1332701705&sr=8-1 te volg, of op u Kindle-vriendelike aparaat te soek vir: “Die Apokriewe Boeke (Feite of vroom fantasieë?)” Die boek kos slegs $7.99.

Het u geweet dat u enige Kindle boeke op u tuisrekenaar (pc) kan lees. Gaan na http://www.amazon.com/gp/kindle/pc/download en laai dit af. Dit is gratis. U moet dan ook net op Kindle registreer as ‘n gebruiker. Meer volledige instruksies is http://www.amazon.com/gp/help/customer/display.html?ie=UTF8&nodeId=200450200 beskikbaar.

Laastens kan u ook enige Kindle boeke op Iphone, Blackberry of Android aangedrewe selfoon lees deur slegs die Kindle leser te installeer. Gaan soek gerus op Google vir inligting oor hoe om dit te doen of lees http://appscout.pcmag.com/mobile-apps/273446-5-free-ways-to-kindle-your-smartphone .

Kindle boeke is baie goedkoper as gedrukte boeke en is regtig die moeite werd indien u baie lees.

NGVishoek: Ds. ( dominee ) Martin Barnard.

I—I am Jehovah, and besides me there is no savior.”(43:11)

I am Jehovah, and there is no one else. With the exception of me there is no God. I shall closely gird you, although you have not known me (45:5)

Goed nou Jesaja wat so duidelik sê dat daar net een God is, noem dan ook vir Jesus God, dus is daar dan nou ‘n Vader en ‘n Seen as God.

Want ‘n Kind is vir ons gebore, ‘n Seun is aan ons gegee; en die heerskappy is op sy skouer, en Hy word genoem: Wonderbaar, Raadsman, Sterke God, Ewige Vader, Vredevors —
Jes 9:5

Nou, kyk net wat staan in hulle NWT (in Jes 9 het hulle dit as vers 6)

For there has been a child born to us, there has been a son given to us; and the princely rule will come to be upon his shoulder. And his name will be called Wonderful Counselor, Mighty God, Eternal Father, Prince of Peace.

En dan oor die Heilige Gees

Gaan dan heen, maak dissipels van al die nasies, en doop hulle in die Naam van die Vader en die Seun en die Heilige Gees; en leer hulle om alles te onderhou wat Ek julle beveel het.
Matt 28:19

En weet julle wat, die vers is dieselfde in die NWT

In die begin was die Woord, en die Woord was by God, en die Woord was God.
Joh 1:1

Nou die NWT sê die Woord was ‘n god. Dit is vir my snaaks, hulle wil die vers verdraai om Jesus se Goddelikheid weg te vat, maar daardeur gaan hulle heeltemal teen die Skrif wat sê daar is geen ander behalwe God nie.

Dan laastens dat ons van hierdie punt kan afstap:

Glo jy nie dat Ek in die Vader is en die Vader in My nie? Die woorde wat Ek tot julle spreek, spreek Ek nie uit Myself nie; maar die Vader wat in My bly, Hy doen die werke.
Joh 14:10

Nou daardie vers het die NWT wel verdraai, julle kan dit maar gaan opsoek

2. Jesus as skepsel

Nou hulle glo ook dat Jesus die eerste skepsel was. Die Woord is duidelik dat dit nie die geval is nie.

Alle dinge het deur Hom ontstaan, en sonder Hom het nie een ding ontstaan wat ontstaan het nie.
Joh 1:3

Nou die NWT stem weer saam met die vers en het dit nie verdraai nie, so hulle vertaling erken ook dat alles deur Christus ontstaan het en nie dat hy geskep is nie, hoe kan Hy dan ontstaan het as hy ‘n skepsel is, maar alles het deur Hom ontstaan. As Hy nie daar was nie, sou Hy dan ook nie gewees het nie. Ek hoop ek maak sin, maar soos julle kan sien, hierdie ouens redeneer nie lekker nie

Ons kan aangaan:

wat Hy as erfgenaam van alles aangestel het, deur wie Hy ook die wêreld gemaak het.
Heb 1:2

NWT het die vers so effe verdraai, maar die idee is nog daar, alles het deur die Seun ontstaan.

want in Hom is alle dinge geskape wat in die hemele en op die aarde is, wat sienlik en onsienlik is, trone sowel as heerskappye en owerhede en magte — alle dinge is deur Hom en tot Hom geskape.
Kol 1:16

Die NWT sê: “through him and for him”

So, Jesus is die een deur Wie geskep is en is dus nie ‘n skepsel nie, dit kan jy ook vir hulle uit hulle eie vertaling gaan bewys.

3. Die Heilige Gees

Hulle sê die Heilige Gees is net ‘n werkende krag. Ek vra, hoe kan ‘n krag voorspel?

Broeders, hierdie Skrif moes vervul word wat die Heilige Gees voorspel het deur die mond van Dawid aangaande Judas wat die leier was van die wat Jesus gevange geneem het;
Hand 1:16

NWT sê die Heilige Gees het gepraat. Kan ‘n krag praat?

Kan jy vir ‘n krag lieg?

Toe sê Petrus: Ananías, waarom het die Satan jou hart vervul om vir die Heilige Gees te lieg en van die prys van die grond agter te hou?
Hand 5:3

NWT het hom amper ook so

Of praat?

En terwyl hulle besig was om die Here te dien en te vas, het die Heilige Gees gesê: Sonder nou Bárnabas en Saulus vir My af vir die werk waarvoor Ek hulle geroep het.
Hand 13:2

Of getuig?

behalwe dat die Heilige Gees in elke stad kragtig getuig en sê dat boeie en verdrukkinge my wag.
Hand 20:23

4. Die wederkoms

Die Jehova Getuienis reken Jesus het in 1914 teruggekom, maar niemand kon Hom sien nie en dat ons nou die heerlikheid op aarde gaan kry, want Hy gaan nie weer kom nie.

O, maar wat staan daar dan omtrent die wederkoms?

Kyk, Hy kom met die wolke, en elke oog sal Hom sien, ook hulle wat Hom deursteek het; en al die geslagte van die aarde sal oor Hom rou bedryf; ja, amen!
Op 1:7

In die NWT staan daar by Openbaring 1:

7 Look! He is coming with the clouds, and every eye will see him, and those who pierced him; and all the tribes of the earth will beat themselves in grief because of him. Yes, Amen.

Ek dog niemand het Hom gesien volgens hulle nie, maar hulle eie vertaling/verdraaiing weerspreek dit.

5. Die hel

Die Jehova Getuienis glo nie dat daar ‘n hel is soos ons dit ken nie, maar dat hel bloot ‘n rusplek is vir die dode, nie ‘n plek van straf nie.

Die Woord sê anders:

En baie van die wat in die stof van die aarde slaap, sal ontwaak, sommige tot die ewige lewe en sommige tot groot smaadheid, vir ewig afgryslik.
Daniel 12:2

Die NWT bevestig hierdie vers.

maar ‘n verskriklike verwagting van oordeel en ‘n vuurgloed wat die teëstanders sal verteer.
Heb 10:27

NWT bevestig hierdie vers.

En as dit bevind is dat iemand nie opgeskryf was in die boek van die lewe nie, is hy in die poel van vuur gewerp.
Op 20:15

NWT sê “hurled into the lake of fire.”

Dit is maar net so “vinnig” 5 punte wat ek wou aanraak. Jy sal sien dat seker 90% van die tyd weerspreek die Jehova Getuienis se eie vertaling hulle. Soos jy sal sien is kan jy vir ‘n Jehova Getuie uit sy eie New World Translation ook die waarheid openbaar, want dit staan daar, al wil hy stry met die ware Bybel.

Hier volg ook ‘n baie goeie skakel na die verskille in tabel vorm: http://www.godandscience.org/cults/jwdiff.html

Bron: http://bibleforums.org/showthread.php/100645-Antwoord-n-Jehova-Getuienis

Cookie	Duration	Description
cookielawinfo-checkbox-analytics	11 months	This cookie is set by GDPR Cookie Consent plugin. The cookie is used to store the user consent for the cookies in the category "Analytics".
cookielawinfo-checkbox-functional	11 months	The cookie is set by GDPR cookie consent to record the user consent for the cookies in the category "Functional".
cookielawinfo-checkbox-necessary	11 months	This cookie is set by GDPR Cookie Consent plugin. The cookies is used to store the user consent for the cookies in the category "Necessary".
cookielawinfo-checkbox-others	11 months	This cookie is set by GDPR Cookie Consent plugin. The cookie is used to store the user consent for the cookies in the category "Other.
cookielawinfo-checkbox-performance	11 months	This cookie is set by GDPR Cookie Consent plugin. The cookie is used to store the user consent for the cookies in the category "Performance".
viewed_cookie_policy	11 months	The cookie is set by the GDPR Cookie Consent plugin and is used to store whether or not user has consented to the use of cookies. It does not store any personal data.

NG Vishoek

NG Vishoek

Jesus in die tuin van Getsémané (#4)

Histerie as navorsing Bybel weerlê

Boek sê Turynse kleed eg en verklaar glo opstanding

Gierige kerklidmate beroof God van offers

Kerkleiers wil ANC leiding gee

Ek verwag Hom binnekort

Kerkdiens lewendige uitsending

Wanneer raak godsdiens ‘n euwel?

Die Apokriewe Boeke (Feite of vroom fantasieë?)

Antwoord ‘n Jehova Getuienis