Gelykenis van die rooi Ferrari

 

Matt 13:34 Al hierdie dinge het Jesus vir die mense in gelykenisse geleer, en sonder ‘n gelykenis het Hy hulle niks geleer nie.

Vandag wil ek ook ‘n gelykenis vertel…. dié een van die rooi Ferrari: ‘n vergelyking met ons saligheid. Gratis, free en verniet.

Rom 6:23 Die loon wat die sonde gee, is die dood; die genadegawe wat God gee, is die ewige lewe in Christus Jesus ons Here.

Matt 13:44 Met die koninkryk van die hemel gaan dit soos met ‘n skat wat in ‘n saailand onder die grond lê. Wanneer iemand dit kry, maak hy dit weer toe; en omdat hy baie in sy skik is, gaan verkoop hy alles wat hy het, en hy koop daardie land.

Sal jy kan glo daardie Ferrari behoort aan jou? Of sal jy ook dink dis te goed om waar te wees? Soos wat ons dink oor ons Saligheid, wat gratis is… te goed om waar te wees? Dalk glo jy dat ‘n gratis Ferrari meer waarskynlik is as dat Jesus jou hemelse prys klaar betaal het? Wie sal tog vir Willempie ‘n Ferrari gee? Ek verdien dit tog nie. Hoekom sou Jesus vir my sterf? Ek verdien dit tog nie.

As kind het ek elke jaar met my verjaardag én vir Kersfees ‘n geskenk gekry. Ek het nooit vir my ma-hulle gevra hoeveel ek daarvoor moet betaal nie; ek het hulle integriteit genoeg vertrou om te weet dat hulle nie later van plan sou verander nie.

Joh 6:46 Dit verseker Ek julle, wie in My glo, het die ewige lewe.

PUNT. Die briefie op die rooi Ferrari: hierdie Italiaanse monster behoort nou aan my. Punt.

Baie belangrik is egter om te besef dat saam met die rooi Ferrari kom ‘n geweldige groot stuk verantwoordelikheid. Dis nie sommer vir: dé, kry vir jou nie. Om so ‘n motor, wat so geweldig kosbaar is, te besit en te onderhou vra baie. Bekering is die begin van ‘n ongelooflike journey, maar dit vra ook ‘n prys.

  1. Voordat jy die pad met jou rooi skip aandurf, haal jy eers daardie handleiding uit, wat vir jou presies vertel hoe alles werk. Al die moets en moenies, voorwaardes, verduidelikings, alles wat jy nodig het om die beste daarvan te kan geniet. So gee die Here vir ons die Bybel, sodat ons kan weet presies wat dit behels om die weg na Saligheid te bewandel.

  2. ‘n R4 miljoen Ferrari is baie gevaarlik in die hande van ‘n 18-jarige laaitie. Of liewer, dit kan wees. Jy weet mos hoe gevaarlik ‘n nuwe bekeerling kan wees, of hoe? Was jy ook daar? Raak dinge kwyt, wil die wêreld omkeer, wil net bestraf, uitdryf, bebid, bepreek…. maar weet self nog maar min. 1 Kor 3:2 Ek het julle met melk gevoed, nie met vaste kos nie, want julle kon dit nog nie verteer nie. Spring maar eerder stadig weg met daardie rooi Ferrari. ‘n Nuwe bekeerling weet nie skielik alles nie, inteendeel! Wees maar eers versigtig.

  3. Jy kry dalk ‘n lewenslange onderhoudsplan saam met jou Ferrari, maar as jy hom nie diens nie, gaan daai plan jou niks help nie. Die inisiatief lê by my en jou om ons Christen-lewenspad in stand te hou. Heb 10:25 Ons moenie van die samekomste van die gemeente af wegbly soos party se gewoonte is nie, maar mekaar eerder aanmoedig om daarheen te gaan, en dit des te meer namate julle die oordeelsdag sien nader kom. Dit behels meer as net kerk toe gaan. As ek en jy ons Ferrari afskeep, gaan jy hom nie lank ry nie. Hang van jou af…

  4. As jy die Ferrari se waarde besef, en dit nie sommer net so weer wil verloor nie, moet jy hom verseker. Jy sien, as iemand hom vir jou skenk, het iemand  daarvoor betaal. Met ‘n R4 miljoen pryskaartjie, het jy ‘n baie waardevolle item! Wat het jou Saligheid gekos? R4 miljoen is grondboontjies! Dit het ‘n léwe gekos. Bloed, duur, kosbare bloed. My en jou versekering is die inwoning van die Heilige Gees. 1 Kor 4:14 Die mens wat nie die Gees van God het nie, aanvaar nie die dinge van die Gees van God nie. Vir hom is dit onsin. Hy kan dit ook nie verstaan nie, omdat dit geestelik beoordeel moet word. Baie mense klink baie geestelik, maar dis soms leë doppe. Soos ‘n bloedrooi Ferrari sonder ‘n enjin. Mooi van buite, maar leeg binne.

  5. Daai rooi Ferrari gaan jy wraggies moet oppas, want ander gaan hom wil steel. Joh 10:10 ‘n Dief kom net steel en slag en uitroei; Ek het gekom sodat hulle die lewe kan hê, en dit in oorvloed. Boeta, stop met daai rooi vuurwa op die verkeerde plek, los sommer roekeloos die deur oop, en sommer so traak-my-nie-agtig die sleutel in hom, en hy is weg sodra jy jou rug draai. Die Here sê vir jou vandag: moenie ‘n opening in jou lewe los vir daardie dief nie, hy sal inkom en steel en verwoes. Staan die duiwel teë en hy sal van jou af wegvlug. (Jak 4:7)

  6. Die rooi kar het baie vermoëns. Hy is vinnig, en hy het pad hou vermoë, maar moenie hom op die verkeerde plek gebruik nie. ‘n Klein Toyota RAV 4X4 kan op plekke ry waar die Ferrari nie kan nie. Moenie in die gemors gaan ploeter nie. Luister maar vir sy ingeboude GPS. Ons GPS sê: Jes 30:21 Wanneer jy die regte koers verlaat, sal jy agter jou ‘n stem hoor sê: Hier is die pad, loop hierlangs.

  7. As jy die Ferrari op die regte plek gebruik, is hy tot baie in staat. Hy is veilig, is luuks, is kwaliteit. Fil 4:13 Ek is tot alles in staat deur Hom wat my krag gee.

As bevrydes, wedergeborenes kan ons baie meer vermag as ander mense. Ons het krag wat skrik vir niks. Geniet jou geskenk, maar weet dat dit groot verantwoordelikheid vra.


Bron:  heuning.co.za

Lees Meer >>

Jesus se Woorde vir Mans


Elke dagstukkie begin met woorde wat Jesus gesê het. “Moenie soos die heidene ’n stortvloed woorde gebruik wanneer julle bid nie.” Dan kom ’n kort oordenking hieroor: Gebed is nie ’n toorformule nie. Dat baie mense so dink, hoor jy uit die manier waarop hulle bid. Jy moet die regte woorde gebruik, of die regte woorde net genoeg herhaal, en hoe langer jou gebed is, hoe gunstiger gaan die antwoord wees! Of jou woorde moet in die korrekte volgorde wees, of jy moet die Ons Vader–gebed in die regte volgorde herhaal. Jesus se raad gaan egter direk hierteen in: Praat met julle Váder — moenie probeer toor nie. Praat met God uit verhouding uit — moenie iets aan Hom probeer verkoop nie. Praat uit jou hart uit sonder om aan te sit. Niemand hou van aansit nie — God ook nie.

Die dagstukkie sluit dan met iets om oor na te dink: Luister volgende keer na jou eie gebede. Praat jy normaal? Is jy opreg? Praat jy uit verhouding uit? Praat jy met jou Vader of met ’n onpersoonlike God êrens ver? Praat jy soos ’n kind of ’n vreemdeling?

Riekert Botha het bekend geword deur sy Pleisters vir die Siel–reeks op RSG en boeke wat daaruit gevloei het. Hy tree wyd op en bereik talle mense deur sosiale media.

Sy dagstukkieboek gaan ’n nuttige geskenk wees om vir ’n besige man te gee wat graag na Jesus self wil luister. Die grootte van die boek en die formaat maak dit veral gerieflik om saam te neem waneer ’n mens reis.

Die boekie is ook in Engels beskikbaar.

Lees Meer >>

Doen die Bybel in drie sinne


Kos speel ’n groot rol in God se roete met mense. Jesus het nie ’n kans laat verbygaan om saam met mense te eet nie. Jean LeClerc sê tereg: “Jesus ate good food with bad people!” Rondom etenstafels het Hy sondaars met oop arms ontvang en hulle in die koninkryk van God ingeëet. Vra maar vir Levi in Lukas 5, of vir daardie sondige vrou van Lukas 7. Jesus se vreemde eetgewoontes het die godsdienstiges gedurig ontstel. Hulle kon dit nie vat dat Hy saam met sulke onrein mense eet nie. In elk geval, etenstafels is kosbare plekke om koninkryksdiens te doen.

Jesus was bereid om saam met enigiemand te eet. Hoekom doen sy volgelinge dit dan nie meer nie? Hoekom volg ons nie Jesus se instruksies in Lukas 14 deur ’n slag die armes, kreupeles, lammes en blindes te bederf met koningskos nie? Of om gedurig saam met twyfelaars, nie–gelowiges en vergetenes brood te breek nie? Hoekom is kos en kuiers nie deel van ons planne om die wêreld met Christus se goeie nuus te deurtrek nie? Hy was bereid om ’n hele dag lank saam met die twyfelende egpaar na Emmaus toe terug te loop net om hulle oë rondom ’n eenvoudige ete oop te maak (Lukas 24:13–35). Hoekom volg ons nie gereeld in sy voetspore en stap, gesels en eet mense terug op God se pad nie? Kom ons leer by ons Heer dat Lewe gebeur rondom etenstafels ook. Maar dan moet Jesus elke keer ons Eregas en Gasheer wees. Dan moet Hy mense op sy eie maniere hier ontmoet en nader trek met sy genade.

Bron:  ekerk.org

Lees Meer >>

Oppad na die kruin


Klimmers gebruik draers (Sherpa’s) om hulle te help tot op ’n punt waarna hulle dan alleen verder klim. En dis hiér waar die manne van die seuns geskei word. Dis dán wanneer jy stoksiel alleen met jouself is, waar jou kragte tot die uiterste beproef word, waar jou stamina tot op die been getap word en waar oorwinning gepaard gaan met absolute hel vir jou liggaam. Daar het egter ook al meer as 230 mense op die berg gesterf en daar is meer as 200 liggame wat nooit van die berg verwyder sal word nie. Dié liggame het bykans glad nie vergaan nie a.g.v. die koue en ys. Dis ’n grusame gesig vir klimmers wat daar verbybeur.

 

En so is die lewe ook. ’n Ewigdurende stryd om die finale oorwinning te behaal en nie almal is ewe suksesvol nie. Min mense “finish strong”. Party haal skaars die laer basiskampe, soos op Everest waar daar etlike van hierdie basiskampe is waar jy jou kragte kan herwin sodat jy weer kan voortbeur tot by die volgende een. Die lewe word swaarder met die tyd. Dit is hoe dit is.

Ps. 90:3-13
U laat die mens sterwe: U sê net: “Word weer stof!” Duisend jaar is vir U soos gister as dit verby is, soos een enkele wagbeurt in die nag. U maak ‘n einde aan ‘n mens, hy gaan die doodslaap in. Hy is soos gras wat in die môre afgesny word: in die môre is dit nog groen, maar dit word afgesny en teen die aand is dit verlep en dit verdroog. Ons vergaan onder u toorn, ons gaan te gronde onder u gramskap. U sien ons oortredinge raak, U bring die sondes wat ons wou wegsteek, aan die lig. Onder u toorn vlieg ons dae en skiet ons jare verby soos ‘n gedagte. Ons lewe maar sewentig jaar, of, as ons baie sterk is, tagtig, en dié is vol swaarkry en leed. Dit is gou verby, ons vlieg na ons einde toe. Wie ken die krag van u toorn beter as u dienaars? Wie ken u gramskap beter? Leer ons ons dae so gebruik dat ons wysheid bekom. Hoe lank nog, Here, voordat U ons te hulp kom? Ontferm U tog oor ons.

Ons lewe is maar sewentig jaar, of as ons baie sterk is 80 en dié is vol swaarkry en leed. Dit sê eintlik: die lewe is nie vir sissies nie. Hierdie feit  is vir die meeste mense waar. Een ding wat ek graag vir die Here wil vra is hoekom die pad al swaarder en swaarder word soos wat mens ouer word en nie makliker en makliker nie.

Jy sien, om Mount Everest suksesvol te klim, begin nie by die voet van die berg nie. Iemand wat net lukraak daar opdaag sal verseker deel van die grusame statistiek word. So ’n persoon sal dalk by die eerste of tweede basiskamp uitkom, maar dan sal hy die aftog blaas. Die gemiddelde persoon wat by die voet van Mount Everest opdaag, is reeds baie vêr voor iemand soos ek, wat nie eens op ’n dak kan klim nie! So is dit ook in die lewe: om uiteindelik daardie laaste piek suksesvol aan te pak, was jare en jare se voorbereiding nodig.  In ons geestelike lewe is dit ook dieselfde: sommige mense is nog op pad berg toe, selfs nog in ’n ander land, op ’n ander kontinent, maar hulle is darem op pad. Sommige is al by die voet van die berg. Ander by een van die basiskampe en net ’n klein groepie is op pad na die piek toe. Party het halfpad omgedraai, ander het gesneuwel en sommige sit net en dink. Ek wonder waar is ek op my klimpad?

Pred. 9:11-12
Verder het ek in hierdie wêreld gesien: dit is nie die vinnigstes wat die reisies wen nie, nie die sterkstes wat die oorlog wen nie, nie dié met wysheid wat kos het nie, nie die verstandiges wat ryk word nie, nie dié met kennis met wie dit goed gaan nie. Alles word bepaal deur tyd en geleentheid. Die mens ken selfs nie die tyd van sy dood nie. Soos visse wat gevang word in ‘n net, soos voëls wat gevang word in ‘n wip, so word die mens gevang as die teëspoed kom, as dit hom skielik oorval.

Hierdie is vir my ’n vreemde teks. Dit lyk vir my mens moenie dink daar is universele reëls wat vir almal geld nie. Dit vra iets anders. As dinge bepaal word deur tyd en geleentheid, beteken dit egter nie dat die lewe soos ’n dobbelspel werk met die gooi van ’n dobbelsteen nie. Sommige mense kan dalk sê die lewe is “unfair” want nie almal kry dieselfde hand kaarte nie. Ek sien egter iets anders hierin en wil só vra: hoe hanteer jy die pakkie wat jy gekry het? Hier kom natuurlik die voordeel daarvan in om ’n pad met die Here te stap. Hoe swaar daardie laaste trek op pad na die kruin nou ook al mag wees, of hoe moeilik die voorbereiding was, sáám met die Here kan mens dit doen. Die Here sal dalk nie noodwendig al jou laste die hele pad dra, of jou selfs optel en dra nie. Dis egter meer draaglik as Hy saam met jou vorentoe beur en jou bemoedig as jy daardie steiltes aanpak, as Hy jou wys op die gapende skeure in die ys en jou waarsku dat jy nie jou eie sneeustortings moet veroorsaak nie. Hy moedig jou aan om nooit om te draai nie en voort te beur. Jy sien, Mount Everest se oorwinning word behaal as jy op die heel hoogste piek kom, dié plek wat die heel moeilikste is om te bereik. Wanneer dit op die heel moeilikste gaan, is jy bo! Van maklik, tot moeilik, tot bykans hel, tot byna dood en dán kom die oorwinning.

Pred. 12:1-7 (Die Boodskap)
Dink aan jou God wat jou geskep het terwyl jy nog jonk is. Voordat die swaar dae kom wanneer die son se strale vir jou dof begin word en jy die maan se lig en die sterre se geflikker saans skaars nog sien. Dit is wanneer jou hande begin bewe, die bene moeilik loop, die tande moeilik kou omdat hulle so min is en die oë sleg sien, die ore nie meer die straat se geraas hoor nie, die stem sagter en dowwer word. En as die voëls vroegoggend begin koer, staan jy op sonder dat jy hulle eens hoor. Dit is wanneer jy vir steil opdraandes en baie ander dinge bang word omdat jy te swak geword het. En terwyl die amandelboom bloei, die sprinkaan hom vol eet en die kapperkruid blom, sterf die mens. In die strate sal hulle die doodsberig vertel. Dan sal hulle saamkom om hom te begrawe. Dit is soos ’n silwertou wat afbreek by ’n put, soos die goue skepemmer wat breek, soos die drinkbeker wat stukkend breek en soos die wiel wat by die put inval. Dan word die mens weer stof soos vroeër en sy lewensasem gaan terug na God toe waar dit vandaan gekom het.

Hierdie deel beskryf daardie laaste stukkie pad van ’n mens se lewe ongelooflik akkuraat. Dink aan jou Skepper in jou jong dae. Dit is nóú, die voorbereidingstydperk, die tyd voor ons selfs by die voet van die berg kom, die tyd as ons vars en flink is, wanneer ons ons liggame kan oefen, geestelik fiks kan word. Dié tyd wat ons om ons mense sien wat reeds in daardie laaste pylvak is, waar die lewe op sy swaarste is en waar baie opgee en uitsak. Kyk daarna, leer daaruit en berei voor vir die laaste, moeilike pad na die kruin, want daardie tyd gaan beslis kom. In daardie laaste tyd gee baie dinge in: die oë, die bene, kragte, gehoor en arms en dan, wanneer dit op die swaarste is, breek die oorwinning aan, die einde kom. Vers 7(b): “Dan word die mens weer stof soos vroeër en sy lewensasem gaan terug na God toe waar dit vandaan gekom het.” Finale oorwinning, aankoms by die Here, oorwinnaarskroon wat wag!

Op 2:17 
Aan elkeen wat die oorwinning behaal, sal Ek van die verborge manna gee, en daarby sal Ek vir hom ‘n wit steentjie gee met ‘n nuwe naam daarop gegraveer, wat niemand anders ken nie, net hy wat dit kry.

bron:  heuning.co.za

Lees Meer >>

Die Nuwe Stand Van Sake


Toenemende geweld
Sedert die wisseling van die millennium het die aantal sterftes as gevolg van terreurdade vyfvoudig toegeneem; baie van die aanvalle gemotiveer deur politieke en djihadistiese agendas (hoewel die liberale media altyd traag is om te erken dat die meeste van hierdie dade deur Moslems gepleeg is).

 

Wêreldwyd, selfs in die Weste, was daar ’n skerp toename in die aantal terreuraanvalle, maar amper 50% van die aanvalle het geen lewens geëis nie, omdat dit deur die polisie gefnuik, of deur militêre personeel gestuit is. Sedert 2000 is die Taliban verantwoordelik vir die meeste terreursterftes, nl. 8 763, en kort op hulle hakke volg Al-Kaïda met 8 585 sterftes.

Godsdiensagenda
Die Islamitiese Staat (IS, voorheen bekend as ISIS/ISIL) en Boko Haram het al twee in 2009 meer aktief begin word en dit was die eerste jaar dat die groepe meer as 300 mense elk vermoor het. Gebaseer op data tot aan die einde van 2014, het hierdie twee ryk terreurgroepe binne vier jaar meer as 30 000 mense vermoor!
Terwyl die wêreld se aandag deur ISIS en hulle brutale en aanstootlike onthoofdings gekaap is, het Boko Haram ongehinderd in Nigerië onskuldiges vermoor, jong meisies ontvoer en Christene in Islamitiese slawerny en mensehandel gedwing.
“Daar is ongetwyfeld ’n toenemende probleem. Die oorsake is kompleks, maar die vier groepe wat verantwoordelik is vir die meeste van die sterftes, het almal hulle ontstaan in fundamentalistiese Islam,” merk die stigter van die Institue for Economic an Peace, Steve Killelea op. “ Hulle is veral ontstoke oor die uitbreiding van Westerse invloed. Dit bemoeilik veral po-
gings vir die mobilisasie van die samelewing, wat benodig word om hulle te stuit – dit kan hulle meer die harnas injaag,” het hy verduidelik.
Die verslag berig dat “die toename in terreurdade saamgeval het met die Amerikaanse besetting van Irak. Dit het ’n groot magsleemte in die land geskep wat verskillende faksies die geleentheid gegee het om hulle te vestig en gewelddadig te word.

Taktiek van die aanvallers
In Irak word bomaanvalle by voorkeur deur terroristegroepe gebruik. Hierdie taktiek is vir 87% van die sterftes, en 97% van die beserings verantwoordelik. Selfmoordaanvalle word ook steeds gebruik, met ’n baie groot verlies aan menselewens  – ’n gemiddeld van sewe sterftes per selfmoordaanval. Sedert 2000 het selfmoordaanvalle tot 5% van terreursterf-tes gelei, en hierdie modus operandi is die gekose aanvalsmetode van die militante groep Hamas. Hierdie Palestynse terroriste-organisasie het 195 aanvalle geloods waarvan 24% selfmoordsendings was.
Volgens gegewens het 60% aanvalle plofstof behels, 20% vuurwapens en 10% ander dade soos brandstigting of aanvalle met motorvoertuie.
Nogtans gaan die Amerikaanse regering, en baie van die Verenigde Nasies se lede, voort om die feite te ignoreer en Hamas en die Palestynse owerheid te steun in hulle bod om as ’n staat erken te word (en sodoende, die Palestynse owerheid se uitdruklike doelwit om ‘Israel van die aarde te vee’). Soos die spreekwoord sê, niemand is so blind as wie nie wil sien nie.
grotte tot internetkafees
Sedert die burgeroorlog in 2011 in Sirië uitgebreek het, is daar ’n geweldige toename in terreurdade. Hoewel politieke konflik ’n groot katalisator vir die snelle toename in terreur in hierdie oorloggeteisterde lande is, het beide Sirië en Irak ’n godsdiensstryd tussen die Soenni- en Sjiïet- Moslems beleef, wat tot uitgebreide geweld aanleiding gegee het. Godsdiens as ideologiese dryfveer vir terrorisme het sedert 2000 dramaties toegeneem; voor 2000 was nasionale separatistiese agendas die grootste dryfveer van terroriste-organisasies.
Meer as 24 nasies is deur wydverspreide terreurdade geskud, insluitend Israel, Irak, Sirië, Jemen, Egipte, Turkye, Amerika, Frankryk, Libië, Spanje, Nigerië, Kenia, Oekraïne en Engeland. Niemand is immuun daarteen nie – terrorisme is nie meer ’n Midde-Oosterse probleem nie en het nou versprei vanuit die grotte van Afganistan na die internetkafees van Parys.

Waarom so gewild?
Daar is talle faktore wat die toenemende gewildheid van terroristegroeperings beïnvloed; daarom is dit moeilik om presies net een of twee aan te stip. As Christene weet ons dat daar bose magte aan die werk is en dat wetteloosheid en sonde in die eindtye hoogty sal vier.
Die botsing tussen Islamitiese ideologie en die beginsels van demokrasie, vrye spraak, godsdiensvryheid en vreedsame naasbestaan het die middelpunt van belangstelling geword. Selfs binne Islam woed daar ’n stryd tussen ‘gematigdes’ en ekstremiste’. Die godsdiens beleef sy eie interne krisis terwyl die wêreld toekyk…maar, jy kan nie help om te vra waarom die ‘gematigdes’ nie ’n besliste standpunt teen die terreurdade ingeneem het nie. Hoekom het imams geswyg? Wanneer ’n sekulêre Arabiese staat soos Turkye, wat deur ’n Islamitiese leier regeer word, pogings om terrorisme hok te slaan aktief teenstaan, kan jy nie help om te wonder wat die onderliggende grondslag van ‘gematigde’ oortuiging werklik is nie…

Wat is ’n terroris?
Hoe verklaar ons egter die talle Westerse tieners wat aan djihadistiese aanvalle deelneem? Verveelde, gemarginaliseerde jeug-diges met beperkte werksgeleenthede, wat uit gebroke gesinne kom, blyk wêreldwyd die teiken van terroriste te wees. Baie van diegene in die Weste wat terroriste simpatiek gesind is, gee voor dat hulle teen politieke hegemonie gekant is, maar dit is dikwels net ’n rookskerm – omdat geen terreurdaad ooit die geloofwaardigheid van ’n veldtog kan bekragtig of die geldigheid van ’n saak kan staaf nie.
As Christene erken ons die rol van die kerngesin waar die vader ’n teenwoordige en liefdevolle leier is – ’n teenwoordigheid wat dikwels in die gesinne van potensiële terro-riste ontbreek. Begrip van die morele konsepte van reg en verkeerd, is dikwels verwronge of afwesig by djihadiste en natuurlik hou die opwinding van mag, onoorwinlikheid en wetteloosheid deur dekades heen ’n universele aantrekkingskrag vir die jeug in.

Hoe reageer die wêreld?
Ten spyte van Amerika en die Weste wat biljoene dollars aan kontraterrorisme-operasies bestee, dui statistiek daarop dat militêre optrede slegs 7% terroristegroepe in bedwang gebring het. Die meerderheid terroristegroepe het ontbind deur by die politieke proses aan te sluit, of is onskadelik gestel deur aktiewe polisiëring en inligtingsagentskappe wat sleutellede in hegtenis geneem, of tereggestel het. Volgens ’n verslag van die GTI is slegs militêre mag selde verantwoordelik vir die beëindiging van ’n terroristegroep se bestaan.
Terroristegroepe neem toe met behulp van tegnologie en dit is interessant om te merk dat die taktiek vir kontraterrorisme kuberaanvalle insluit wat die sluit van terroriste se twitter- en facebook-rekeninge en die infiltrasie van djihad-sosiale netwerke met swendelskemas behels. Hoewel hierdie strategie sekerlik ’n rol kan speel in die afname van terrorisme, is die enigste blywende manier vir die beëindiging van die geweld ’n geestelike aanvalsplan. 

Hoe moet ons reageer?
Verloste harte en gesuiwerde motiewe is die enigste onfeilbare manier om die toename in potensiële terroriste te stuit. Jy het ’n rol om te vervul in hierdie ‘oorlog teen terreur’. Jou oorlogswapens is geestelik: taktiese voortgesette gebed vir nasies en leiers is van kardinale be-lang. Herlewing onder die jeug en die gemarginaliseerdes is uiters noodsaaklik. 
Ondersteun sendelinge en evangeliste wat in hierdie lande werksaam is; dra by tot hulle bediening sodat die Evangelie verkondig kan word en elke grot, kafee en rusbank kan bereik.
Die skepping wag vir die openbaarmaking van die kinders van God (Rom 8:19) – as gelowiges moet ons beheer neem! God het ons nie ’n gees van vreesagtigheid gegee nie (2 Tim 1:7); wat vir die mens onmoontlik is, is vir God moontlik (Lukas 18:27); Hy wat in ons is, is groter as hy wat in die wêreld is (1 Johannes 4:4). Praat hieroor met jou gemeente en maak gereelde gebed vir terroriste ’n prioriteit!

Bron:  juig.co.za

Lees Meer >>

Beleef jy ‘n middeljarekrisis?



BINNE-OORLOG
Een van die faktore wat ‘n rol speel, is veroudering. Gewoonlik voel die persoon dat hy/sy op daardie ouderdom baie meer moes bereik het. Marc Gerzon het die volgende stelling oor die verstaan van Volwasse Verande­ring/Metamorfose gemaak:
“I had a war going on inside me between the voice that said, ‘You’re finished growing, you’re done, it’s a done deal’, and another voice that said, ‘You’ve only begun to explore what life is about!”

TEKENS VAN DIE MIDDELJARE­KRISIS
Wat verklap beslis dat ‘n persoon midde-in die MJK is? Hier is ‘n paar tekens dat jy/jou eggenoot/’n geliefde dié krisis beleef:

 

  • Hy/Sy dra ‘jonger’ klere
  • Hy/Sy kies ‘n jonger vriend/vriendin
  • Hy/Sy koop ‘n sportmotor
  • Hy/Sy streef na maniere om sy/haar jeug te behou

In ernstige gevalle kan dit selfs na selfmoord of middelmisbruik lei.

DIE SIMPTOME
Wat nou van die persoon wat nié ‘n sportmotor koop of anders aantrek nie? Mis­kien is dit nodig dat jy die volgende simptoom-oorsiglysie deurgaan om vas te stel of jy/jou eggenoot/ ‘n geliefde moontlik ‘n grensgeval is:

  • Verveeldheid, moegheid of oormatige energie
  • Selftwyfel
  • Dagdromery
  • Geïrriteerdheid
  • Onverwagte woede-aanvalle
  • Reaksie op alkohol, dwelms of kos
  • Verlaagde of verhoogde seksdrang
  • Verhoudings, veral met ‘n jonger persoon.

Indien jy ongeveer 70% van hierdie lysie kon afmerk, is jy/jou eggenoot/’n geliefde baie beslis in ‘n MJK vasgevang.

INVLOED OP GEVOELENS
Hoe sal ‘n MJK ‘n persoon se gevoelens beïnvloed?

  • Jy is ontevrede met die lewe/jou leefstyl
  • Verveeldheid met dinge/persone wat nog altyd deel van jou lewe was
  • Avontuurlustig en ‘n begeerte na iets heeltemal ‘anders’
  • Twyfel oor die betekenis van die lewe en die geldigheid van besluite wat vroeër geneem is
  • Verwarring oor wie jy is en waarheen jou lewe oppad is


VERSKILLENDE INVLOEDE
Jy word nie net eendag wakker en besluit dat dit nou die regte tyd vir ‘n MJK is nie. Daar is gewoonlik verskeie invloede wat tot die toestand aanleiding gee. Daar is menige omstandighede wat daartoe aanleiding kan gee:

  • Mans/vrouens wat jonk getroud is
  • ‘n Ongelukkige huwelik
  • Leënes-sindroom
  • Ontevredenheid by die werk
  • Ouer word
  • Rebelse kinders
  • Depressie
  • Angs en stres
  • Twyfel
  • Skuld
  • Aansienlike verlies of verandering
  • Dood van ‘n ouer
  • Afdanking by die werk
  • Egskeiding

Hierdie tydelike toestand kan intern sowel as ekstern manifesteer.

EKSTERNE GEVOELENS

  • Fisieke verwaarlosing
  • Finansiële wanbestuur
  • Sosiale disfunksie
  • Prestasiedruk
  • Korreksie word as kritiek ervaar
  • Stryd om gesag te aanvaar
  • Skeiding van die eie omgewing


INTERNE GEVOELENS
Mense wat die MJK ervaar, raak soms betrokke by drastiese leefstylveran­deringe wat langtermyneffekte kan hê. Indien jy byvoorbeeld dink dat alles jou maat se skuld is, kan jy moontlik betrokke raak by ‘n verhouding, selfs ‘n vinnige egskeiding verkry, net om later uit te vind die probleem was eintlik maar jyself. Die volgende gevoelens is bewys van die effek wat die MJK op jou het:

  • Emosionele seer
  • Geestelike nie-funksionering
  • Angs/bekommernis
  • Vrees vir verwerping
  • Onsekerheid
  • Trots/perfeksie
  • Swak selfbeeld

Daar is natuurlik leefstylveranderinge wat baie positief is – jy kan dalk beter begin eet, oefen, meer slaap kry of van klein, onnodige verpligtinge ontslae raak. Indien jy of jou maat deur die MJK gaan, is dit baie belangrik dat jy nader aan God beweeg en ook na ander sterk godvresende persone, wat jou gedurende hierdie uitdagende tyd kan bystaan, gaan vir hulp.

‘N FILOSOFIESE PERSPEKTIEF
Sommige mans raak heel filosofies oor ‘n MJK – maar nie noodwendig wys op ‘n Bybelse manier nie! Volgens een anonieme heer: “Mans spandeer hulle twintigs deur glad nie om te gee wie hulle is nie, hul dertigs deur te word wie hulle is, hul veertigs deur te probeer agterkom wie hulle eint­lik is en hul vyftigs deur te probeer ver­ander wie hulle werklik is…” Dit is seker waarom hierdie spesifieke meneer sy Mercedes SLK Sport gekoop het, na rap-musiek luister én goue kettings in sy vyftigs dra?

WAT KAN EK DOEN AS EK DIE KRISIS BELEEF?

  • Erken die waarheid omtrent die situasie
  • Identifiseer waar jy nie regtrap t.o.v. verhoudings nie. Besluit wat om te doen om dit reg te stel of dit te laat staan
  • Wees baie realisties oor jou werklading ten einde uitbranding te voorkom
  • Kyk baie krities na jou gesondheid en besluit hoe jy jou leefstyl gaan verander om balans te kry
  • Plaas jou huislike lewe onder die ver­grootglas en besluit op ‘n aksieplan om herstel te bring

Leer uit jou ervaring en wees ook baie oop vir raad van ander. Dit is baie minder skadelik om op eie koste te leer. Wees teenoor iemand verantwoordbaar en versoek gebed en berading by jou kerkleiers. Dit is baie belangrik om oor die onderwerp op te lees en nie toe te gee aan tipiese MJK-gedrag nie. Vra ook hulp t.o.v. nuwe doelstellings, nuwe groei-areas in jou lewe en om jou te help om wyse besluite toe te pas.

HOE VOORKOM EK ‘N KRISIS?
Jy kan ‘n MJK voorkom deur weer op vier groot areas in jou lewe te fokus en dan al jou bekommernisse, vrese, hoop en drome na God toe te bring. Die vier areas is:

WERK AAN JOU VERHOUDINGS
Teen die middeljare is die meeste huwelike op hul laagste punt ooit. Die huwelik is vervelig en afgesaag omdat daar nie te veel aandag aan spandeer word nie. Te veel druk by die werk en te veel aktiwiteite met die kinders kan gehaltetyd met mekaar, en om ‘n warm huweliksverhouding te bou, verminder. Werk daaraan! ‘n Sterk huwelik sal help om ‘n MJK te verhoed.

DINK WEER OOR JOU LOOPBAAN
Wie het God jou geskep om te wees? Wat is jou gawes en ta­lente? Word dit in jou loopbaan gebruik en het jou loopbaan ‘n dimensie wat ander mense se lewens ten goede impakteer? Om iets vir ander te doen, gaan al hoe belangriker word namate jy ouer word. Jy wil tog sekerlik ‘n nalatenskap agterlaat?

HERONDERSOEK JOU WAARDES
Jy het drie belangrike bronne: tyd, geld en energie. Vra jouself: “Spandeer ek my tyd, geld en energie op die regte manier? Is ek waar God my bedoel het om as spesiale en unieke persoon te wees?” Moontlik sal jou MJK jou die moed gee om wéér oor jou loopbaan te dink en miskien, net miskien, te doen wat jy nog altyd wou doen.

TYD SAAM MET GOD
Gedurende die MJK het jy stabiliteit nodig. As jy ‘n Christen is, volg Christus – selfs al voel Hy vir jou by tye baie ver. Dit voel maar net so omdat jy ‘n krisis beleef. Hou aan om met God te praat en Sy Woord te lees. Lees Psalms en laat toe dat God jou hart masseer. Raak by ‘n klein Bybelstudiegroep betrokke. Teen die middeljare het baie mense maar min ware vriende.

Gebruik hierdie tyd om die ware vriendskappe te bou en te verstewig en ook om nader aan jou eie familie en jou familie in Christus te kom. Onthou – God gee werklik vir jou om. Indien jy nog nooit jou lewe aan die Here gegee het nie: die Bybel sê baie duidelik dat, indien jy jou hart en jou lewe vir Jesus oopmaak, Hy sal inkom en gemeenskap saam met jou hê.

“Kyk, Ek staan by die deur en Ek klop. As jy My stem herken en die deur oopmaak, sal Ek na jou toe ingaan en ons sal die feesete saam geniet. Elkeen wat aanhou oorwin, sal ek toelaat om saam met My op die troon te sit, net soos Ek oorwin het en saam met My Vader op die troon sit.” Openb 3:20-21.

IETS OM TE HERKOU…
Die middeljare is dié tyd van herevaluering. Die jong volwassene vra: ‘Wat gaan ek doen?’ Die middeljarige volwassene behoort te vra: ‘Waarom doen ek wat ek doen?’

Bron: juig.co.za

Lees Meer >>

’n Onbreekbare verbond


In Genesis 15 lees ons van ’n kontrak wat gesluit word. Tussen Abram en God.

Die wonderlike van dié verbond is dat net een party — God — die risiko dra as die verbond nie nagekom word nie. Net God het deur die stukke vleis beweeg om die verbond te sluit. Dit was net nodig vir Abram om die offers daar neer te sit.

Dié verbond was die voorloper van die nuwe verbond wat Jesus aan die kruis kom sluit het met elkeen wat in Hom glo. God het met Jesus se kruisiging en opstanding Homself op ’n baie persoonlike, diep vlak aan mense kom verbind.

Ja, Hy wil ’n onbreekbare verbond met jou sluit. ’n Verbond waar God Homself as die verantwoordelike party aanstel. Hy neem al die risiko op Homself. Ons is, soos Abram, net daar om ’n offer te verskaf. Die offer is ons hart. Dis ons lewe.

Sal ons dan nie onsself daaraan wy om heilig en dankbaar voor so ’n genadige, liefdevolle God te leef nie?

Francine van Niekerk is redakteur van LiG-tydskrif.

Bron: ekerk.org

Lees Meer >>

Pak jou kaste reg

 

Eintlik is dit dieselfde in ons Geestelike lewens. Ek kan dink aan ‘n paar goed wat oud raak en plek opneem, waar ons denke vassteek en afgestomp word, of ons weier om nuut te dink, en ons hou vas aan ideologieë en konsepte en ons sê net eenvoudig: “Dis hoe my pa my geleer het en basta!” Maar ek het besef ons moet dalk ons Geestelike kaste ook so bietjie reg pak en dalk aanbeweeg. Jy sien, as jy ‘n kas reg pak, weet jy weer waar alles is, dinge word nuut ge-orden. ’n Paar ou goed word uitgegooi en daar is weer plek vir nuwe goed. Soms moet mens aanbeweeg in dinge waaraan jy vroeër vasgehou het, maar soms moet jy dalk weer terugkeer na wat werklik goed en waar en reg is.

Die kern van die Evangelie, die dinge wat gaan oor ons redding, sal altyd vas staan. Jesus se maagdelike geboorte, Sy kruisdood, Sy opstanding en Sy hemelvaart, ons redding deur geloof, staan altyd sentraal en vas. Maar ons Godsdiens beoefening is ‘n ander storie, want godsdiens kan nogal gevaarlik wees. En dis daardie kas wat ons dalk soms moet reg pak.

Rom.  12:2 Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.

Inderdaad ‘n hele mondvol! Jy sien, met tyd – dink ek – het die mens meer en meer van genade begin verstaan, die feit dat Jesus gesterf het vir ons sondes, juis omdat ons nie die vermoë het om om skoon te leef nie. Genade wat so onbeskryflik groot is, dat niks ons uit God se hand kan ruk nie, en dat die duiwel finaal oorwin en verslaan is. Dis natuurlik waar, 100% waar, maar dis nie al wat waar is nie. As ons hierdie kas van Rom. 12 bietjie uitpak en reg pak, sal ons agterkom dat genade nie God se wil vir ons vir ‘n skoon lewe oorskadu nie. In die eerste plek wil die Here steeds hê dat ons nie aan die sondige wêreld gelyk sal word nie, maar dat ons Hom sal toelaat om ons denke te vernuwe, sodat ons kan onderskei wat die wil van God is en dat ons sal doen wat vir Hom goed en aanneemlik en volmaak is.  In ons jong dae het ons ‘n dominee daar in die Moot gehad wat net verdoemenis gepreek het, en in die proses het hy dikwels die kansel kaalhand probeer vermorsel. Dit het in vandag se tyd plek gemaak van ‘n kansel wat drup van die stroop van genade. Punt is, albei kante is reg. Genade is verniet, maar verseker nie “cheap” nie!

Kom ons pak die kaste verder reg. Weet jy wat gebeur nog in ons Geestelike kaste? Ons laat toe dat ander mense goed in ons kaste kom inpak. Soms heeltemal ongevraag, soms word ons gestoomroller, soms heeltemal oordonder, en dan juis met woorde soos: “Dit staan alles in die Bybel!” Hierdie mense kom hamer op skuldgevoelens en vrees, en pak jou kaste vol goed wat jy nie daarin wil hê nie en gooi in die proses goeie goed uit. Dit sit ondraaglike laste op mense, saai verwarring en bring skeuring en konflik tussen mense.

Daar is bv. ‘n beweging wat sê jy mag nie ‘n kruis in jou huis of in jou kerk hê nie, want die kruis is ‘n vloekhout. Toe sien ek ‘n video op YouTube van Neville Norden (vir wie ek baie respek het) met die naam “Die duiwel in jou huis” en hy slaan hierdie ideologie summier plat in die grond in. Jy sien, ek besluit self wie goed in my Geestelike kas kom pak, ek vra vir die Here vir leiding daaroor, ek lees wat die Woord sê (in konteks natuurlik!) voordat ek net op ‘n wa spring. En ja, ek luister verseker na mentors, en ek maak graag vir my goeie mentors bymekaar, maar dis mentors wat ‘n lang en intieme verhouding met God het, wat vol wysheid en insig is en wat ‘n groot verskil in die wêreld gemaak het. Hulle kan maar kom pak en krap in my kaste. Maar nie sommer enigiemand wat kwansuis ‘n “nuwe” openbaring het wat g’n ander mens nog ooit van gehoor het nie. Ek hoor jy mag deesdae ook nie meer ‘n hartjie in jou huis hê nie. Goeiste!

Soos wat ek ouer geword het, het die impak wat my ouers op my lewe gehad het net meer en meer en dieper op my lewe ingewerk. As jy self ‘n ouer is, verstaan jy ook jou ouers se motiewe beter en wat hulle waardestelsel en geloofswortels gevorm het, en ook hoe hulle hulle godsdiens beoefen het. Met tyd moes ek egter ook van daardie goed uit my Geestelike kas pak en my gedagtes daaroor heroorweeg, daaroor besin en nuut daaroor dink. Eers toe ek sonder skuldgevoelens daaroor kon dink, het ek vrede gekry en kon ek met nuwe oë na alles kyk en aanbeweeg. Verandering en vernuwende denke kon dus plaasvind sonder om van die basiese fondasie af weg te beweeg. En my kinders? Hulle is klaar nie meer in dieselfde boksie as ek nie en hulle dink ook weer nuut en vars, want hulle hou nie noodwendig van die manier wat my Geestelike kas gepak is nie.

Ek het besef dat dit wat ek in my Geestelike kas toelaat, nie dieselfde is as ander nie, en dan begin ek mense veroordeel, beoordeel en sommer verdoem in die proses. Ek moes nuut leer dink oor baie dinge, soos die doop, die skeppings verhaal, watter Bybel vertaling die regte een is, hoe die Sabbat onderhou moet word, kerkbywoning en ‘n rits ander goed.

Maar, die basis van my geloof in Jesus Christus staan vas en dis nie debatteerbaar nie. Kom ons pak bietjie ons Geestelike kaste weer ‘n slag reg en aanvaar dat almal nie hulle kaste op dieselfde manier pak nie. Solank daardie kas net van kruishout gemaak is. Dis DIE belangrikste!

Bron:  heuning.co.za

Lees Meer >>

Om voor te gee is uitputtend!


Maar, om voor te gee is uitputtend. En dit is ook ’n leuen.

As ek myself met ander mense vergelyk en myself aan hulle standaarde meet, gaan ek altyd te kort skiet. Daar gaan altyd iemand wees wat ouliker en meer suksesvol is as ek. Ek is egter nie die somtotaal van my omstandighede, suksesse of mislukkings nie. Of die kar wat ek ry of die woonbuurt waarin ek bly nie. Ek word nie gedefinieer deur wat ander van my sê, die etikette wat hulle om my nek hang óf deur my gevoelens nie.

Dis baie meer waardevol om my identiteit in Christus te ontdek deur ’n studie te gaan maak van wat die Bybel oor my sê – en dit begin glo.

Ek is vir God so belangrik dat Hy sy Seun gegee het om vir my sonde te sterf, my vry te koop van die mag van sonde – sodat ek die ewige lewe kan hê. Wanneer ek Hom aanneem, gee Hy my sy Gees, wat soos strome lewende water uit my binneste sal vloei. Sy Gees leer my om te bid, lei my in die volle waarheid en vul my met krag en liefde en selfbeheersing. In Hom het ek alles wat nodig is om Sy wil te doen. Hy gee vir my wysheid en insig – selfs méér as wat geleerde mense het.

Wanneer ek weer in ’n geselskap is waar ek voel ek is nie goed genoeg nie, hoef ek God nie so ’n bietjie te help om my goed te laat lyk nie – ek kan met vertroue my plek in die samelewing inneem, want ek is ’n kind van die Koning van die konings.

“This “identity issue” is an important part of living the abundant life. Jesus was able to face the incredible demands of his mission because he knew exactly who he was. He knew that he mattered to God, and that gave him confidence to move purposefully in faith.” — Rick Warren

bron: ekerk.org

Lees Meer >>

Een Kleur Van Waarheid


‘Wie is ons om te oordeel’ – die slagspreuk van ons tyd
Die titel van die fliek kondig reeds die waarheid aan – grys – die kleur van kompromie.  Dit laat my dink aan wat die Woord ons oor  louheid leer – iets wat God uitspuug.  Die verstommendste was die mense se aggressiewe kommentaar: “Wie is jy om my te oordeel?”
Enige gesprek oor reg en verkeerd, sonde of nie, hetsy die geselsie by die werk, tussen vriende, of op sosiale media, bevat die woorde: Wie is ons om te oordeel…Elke mens maak sy eie keuses…Jy kan nie vir my besluit wat reg en verkeerd is nie.

Die Woord soos dit ons pas
Het ons as Christene in ons eiewaan van menseregte, dalk die punt bereik dat nóg mense nóg God ons mag oordeel?  Lees ons God se Woord soos dit ons pas?  Is daar iets in ons diepste wese wat voel: Wie is die Heilige Gees om ons te oordeel?  Wat wil redeneer dat elke mens God se Woord tog lees en interpreteer soos hy wil, of hoe?
Die hartseer saak is dat as iemand op sonde in sy lewe gewys word, almal na God se Woord gryp wat sê dat nie eers Jesus die prostituut veroordeel het nie; dat die een sonder sonde die eerste klip moet gooi – ’n lekker wegkruipvers om in sonde aan te karring.  Miskien moet ons onthou dat Jesus die prostituut vergewe het sonder oordeel, maar dat Hy haar ook gemaan het om dit nie weer te doen nie.

Die engel van die lig
As ons nie toelaat dat God se Woord ons gees, ons denke, keuses en leefstyl aanspreek en verander nie, sal die satan altyd tot ons manier van dink en leef toegang hê. 2 Tim 2:26 praat van die strik waarin ons trap – vir die satan om dan met ons te maak soos hy wil.  Hy kom in die gedaante van ’n liefdesverhaal van die onskuldige meisie wat weggevoer word deur ’n man in beheer.
Die sterk intrige verblind ons vir al die boosheid van die BDSM (Bondage Discipline Sadomasochism) wat plek-plek plaasvind en die buitehuwelikse seks, om maar ’n paar te noem. As Christene moet ons so geoefen wees in die Waarheid dat die leuen homself ontbloot.
As ons egter bereid is om so ’n bietjie van die leuen te verdra ter wille van die mooi storielyn, beweeg ons op die terrein waar die strik lê en wag.

Die spreekwoordelike padda in die warm water
Dit verg nie ’n Einstein om te sien hoe die wêreld die grense van wat reg en verkeerd is kort-kort verskuif nie.  Ons word omring deur sagte pornografie en kom dit nie eers meer agter nie.
Homoseksuele verhoudinge word in elke tweede sepie en rolprent aangeblaas.  Buite-egtelike seks is die norm en saambly voordat ons trou, word nie meer veroordeel nie.  Is ons so gekondisioneer dat ons al in kookwater swem?

Sondige leefstyl geregverdig
Is die ligte vermaak van BDSM in die boek en fliek die begin van gewelddadige seks wat geregverdig word en eersdaags deur meer paartjies getoets gaan word in ’n soeke na iets nuuts vir die slaapkamer? Ons het reeds bekendes in ons land wat openlik in koerante en tydskrifte van hulle BDSM-leefstyl praat.

Een kleur van waarheid teenoor skakerings van sonde
My hart huil oor ons verslapte grense, ons louheid, ons selfregverdiging.  Bowenal huil my hart oor die gees van wellus wat ons kinders verteer – ’n gees waarvoor ons as volwassenes die deur oopmaak in die naam van avontuur en romanse.  Here, help ons!  Gee ons ’n gees van onderskeiding.  Gee vir ons die moed om U Woord te volg, ’n soeke na reinheid wat U Woord sal toelaat om ons te louter en te vorm, ons te weeg en ons te laat weet as ons te lou of te grys is.  As kind van die Here kies ek nie enige van die 50 skakerings van leuens, sedeloosheid of rebelsheid nie. Ek kies een kleur van Waarheid!

GRETHA WIID is ’n verhoudingskenner, gasspreker en skrywer.  Volg haar op facebook of twitter

Bron:juig.co.za

Lees Meer >>