Glo jy dat Jesus die lewe is?


Byvoorbeeld die Rooms Katolieke Kerk het sewe sakramente, onder andere die laaste oliesel, wat deur die priester by ‘n sterfbed bedien moet word. In die Katolieke Ensiklopedie word hierdie “extreme unction” beskryf as die geestelike hulp en gemak en volmaakte gesondheid, insluitend kwytskelding van sonde en voorwaardelike herstel van liggaamlike gesondheid, aan Christene wat ernstig siek is (vry vertaal). Die priester plaas olie (wat deur die biskop geseën is) op sewe liggaamsdele, met die woorde: “Through this holy unction and His own most tender mercy, may the Lord pardon thee whatever sins or faults thou hast committed by sight, by hearing, smell, taste, touch, walking, carnal delectation”. Soms kry ek die aanvoeling dat sommige van ons kerkmense iets soortgelyk verwag as die dominee dringend ontbied word na ‘n siekbed.

Die wyse waarop mense optree by ‘n begrafnis, maak my ook erg bekommerd. Ook die manier waarop mense oor die dood praat, maak my erg bekommerd. Dit voel vir my asof dit algemene kennis behoort te wees dat as ‘n bejaarde persoon, wat ‘n goeie lewe gehad het, te sterwe kom, dit beter is. Net so as ‘n baie siek persoon se lyding beëindig word deur die dood, dit beter is. Moet my nie verkeerd verstaan nie, die hartseer oor ‘n leë plek in die familie, is verstaanbaar. Self Jesus het gehuil by Lasarus se sterfbed voordat Hy hom uit die dood opgewek het. MAAR …

• Is ek gereed? JA! Jesus ís mý volledige gereed wees.
• Is diegene naby aan my gereed? Vra hulle, maak seker, praat met mekaar oor Jesus, dit ís die belangrikste vraag om oor seker te maak.
• Hoe kan ek weet dat ek gereed is vir die dood? Die werking van die Heilige Gees maak my gereed.
• Wat gebeur na die dood? Elke Jesus-mens wat te sterwe kom, ís bý God! (UITROEPTEKEN, niks meer of niks minder nie).

Glo jý dit?

 

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Lees Meer >>

Uitreik Sutherland – 29 Junie-30 Junie 2013

 

Saterdagmiddag begin die regpak en skoonmaak en word daar hard ge-oefen aan die aand se konsert, wat ‘n groot sukses was. Ons is vergas deur ‘n internasionale beoordeellaar, Gertjie Appelmoes (of was dit nou Appelkoos?) asook die beeldskone Sannie van Santon en oom Witbooi die derde. Die aand is afgesluit met terugvoer en daartydens almal kon opnoem wat vir hulle uitgestaan het van die week. Dankbaarheid vir dit wat ons het, is telkens genoem en Mariska het selfs voorgeneem om haar ertjies te eet. Tiaan, as een van die nuwelinge, noem hoe almal hom ingetrek het en hoe hy deel voel van die A2J familie. Vir sommige van ons het die eenvoudige dinge diep geraak, soos drukkies van die kinders en hul liefde. Die ouer (Sutherland) meisies noem dat as ons nie volgende jaar terugkom nie, dan sal hulle gaan waar ons ookal is.

 

Dit was “‘n fenomenale Uitreik” (Martin) wat aangepak is met die Koningkryksperspektief, almal het gehelp waar hul ookal benodig was. Daarna het ons saam nagmaal gebruik en dit was werklik baie spesiaal.

 

Sondag het ons maar met groot gesukkel opgestaan. Na stiltetyd is die inpak en skoonmaak voortgesit in alle ywer. Die saamwerk was, soos deurlopend deur die week, net fantasties. Martin het die erediens gelei en sy stem het net-net gehou. Baie het kom groet en hier en daar selfs ‘n geskenkie gebring, wat ongelooflik baie beteken.

 

Die reis terug het goed verloop, behalwe vir Marc se ratkas …

 

Die atmosfeer by die aankoms van die bus was een van gemengde gevoelens: vreugde om familie weer te sien, maar ook definitiewe hartseer oor die Pretorianers wat terug moet gaan en wat ‘n leemte gaan laat, aangesien hulle al so deel van die groep geword het.

 

Vanoggend lees ek dat daar min ervarings is wat meer bevredigend is as om ‘n Godgegewe taak na die beste van jou vermoë te voltooi. Die week maal maar deur ‘n ou se gedagtes – so baie om te verwerk. Daar is egter geen “aftreeplan in die arbeidsveld van God nie” en ons moet bewus bly van waar God aan die werk is sodat ons daar kan aansluit en aanmeld vir ons volgende Godopgelegde takie. Maar miskien nie hierdie week al nie … Heidi

 

Voorbidding

Bid saam met ons –

  1. Dankie aan die Here wat ons kon gebruik om ander te help; hul omstandighede te verander. En so ons verander het.
  2. Dankie vir die gesondheid van die span en bid dat die laaste goggas gou deel van die verlede sal wees.
  3. Bid dat ons, leiers en kinders, sal aanhou om in vertroue op en afhanklikheid van die Here ons beroepe en skoolwerk aan te pak. Om aan te hou om uit te reik na die mense om ons, vriende en vreemdelinge.
  4. Vir Ds. Billy en sy vrou.  Vir opregtigheid in geloof en toewyding in leiding.  Ook vir wysheid.
  5. Vir die gemeente self – dat Christus sal voor loop in die gemeente.  Die Here voeg juis nuwe leiers / mense toe tot die gemeente om dit op te bou.

 

‘n Stukkie wat sê wat ons graag wil sê aan elkeen van die uitreikers, elkeen van julle:

Fil. 1:3-6 “Ek dank my God elke keer as ek aan julle dink. … omdat julle van die eerste dag af tot nou toe saamgewerk het aan die verkondiging van die evangelie. Ek is veral ook daarvan oortuig dat God, wat die goeie werk in julle begin het, dit end-uit sal voer en dit sal voleindig op die dag wanneer Christus Jesus kom.”

 

Groete,

Sutherland span,

Johann en Heidi

 


NGVishoek: Ds. ( dominee ) Martin Barnard.

Lees Meer >>

Hoe om te vergewe

Wie is die belangrikste?
Jesus se dissipels het Hom gevra wie die belangrikste in die koninkryk van God is. Sy antwoord aan hulle was Matteus 18. Om die belangrikste te wees, moet ons soos kindertjies voor Hom wees, veral waar dit by konflik kom. Ons moet nederig soos kindertjies wees met hulle onuitputlike vermoë om vinnig te vergewe. 

As jou broer teen jou sondig
Dit gebeur met ons almal: iemand maak ons gevoelens seer of behandel ons onregverdig. Baie van ons dra hierdie grief met ons saam. Dit neem beslag van ons gedagtes en veroorsaak kwade gevoelens. 
Die wêreldse manier vir konflikhante-ring is om die ander persoon te beswadder, of selfs hof toe te sleep. Christus gee vir ons in Matteus 18:15-19 vier stappe om konflik tussen Christene op te los. Dit is ’n kragtige voorbeeld van hoe die lewe in die Gees verskil van die lewe buite die krag van Christus.

Stap 1
Eenkant alleen
“As jou broer verkeerd opgetree het teen jou, gaan wys hom tereg waar julle eenkant alleen is. As hy na jou luister, het jy jou broer teruggewen.” (Matt 18:15). In plaas daarvan om jou vriende te vertel hoe seergemaak jy voel, gaan jy na die persoon toe met wie jy ’n probleem het. Jy neem die inisiatief, jy wag nie vir hom om na jou toe te kom nie. Dit beteken nie jy handhaaf die houding dat jy hom gaan vertel hoe verkeerd hy opgetree en hoe seer hy jou gemaak het nie. 
Jy benader die saak met genade en ’n soeke na versoening sodat jy hulle kan ‘terugwen’. Dikwels is konflik bloot die gevolg van ’n misverstand en met hierdie stap kan die vertroue en harmonie in ’n verhouding herstel word. 

Hoe gouer hoe beter
Om die konflik vir maande lank uit te stel in die hoop dat dit vanself opgelos sal word, is nie ’n goeie opsie nie. Dit gaan net vererger en mettertyd kan bitterheid in jou gemoed wortelskiet. ’n Gebreekte been verg onmiddellike mediese aandag, ’n verbreekte verhouding verg ook onmiddellike geestelike aandag. Waarom is dit dat wanneer dit by vergifnis kom, ons dikwels ’n leeftyd neem om daarby uit te kom? 

STAP 2
Neem getuies saam
“Maar as hy nie luister nie, neem nog een of twee met jou saam, sodat alles wat gesê word, deur die woord van twee of drie getuies bevestig word.” (Matt 18:16). Jesus moedig ons aan versoening te probeer bewerkstellig. Hierdie getuies moet met sorg gekies word; dit help nie om iemand saam te neem wat jou ‘kant’ gaan kies nie. Dit moet mense wees wat jou daarvan kan weerhou om te oorreageer, wat begeer om versoening te bewerkstellig en nie kant te kies nie.

STAP 3
Betrek die Liggaam van Christus
“En as hy na hulle nie luister nie, sê dit vir die gemeente.” (Matt 18:17a). Wat nou gemaak as daar steeds nie versoening is nie? Die meeste van ons dink dat ons nou met groot genoeë die hele storie by die kerk op die lappe kan bring. Dit is egter nie wat Jesus bedoel het nie. Hy sê nie dat ons skinderstories soos ’n sak vere kan uitskud nie. Wat Jesus ons aanraai, is om na ’n groep gelowiges, soos ’n selgroep, of die pastoor en ouderlinge te gaan. 
Die bedoeling is om gelowiges wat eensgesind is en beide kante van die saak onpartydig sal aanhoor, byeen te bring om versoening te bewerk. Jesus gee die opdrag dat ons geskille binne die kring van gelowiges opgelos moet word en nie na die wêreld geneem moet word waar daar geen geestelike wysheid te vinde is nie.

STAP 4
Wanneer versoening nie plaasvind nie
“As hy ook na die gemeente nie luister nie, moet jy hom as ’n heiden en ’n tollenaar behandel.” Matt 18:17b. Ons leef in ’n gevalle wêreld waar sommige konflikte nie opgelos word nie. Soms is tydelike skeiding nodig. In die Joodse konteks beteken ‘om iemand as ’n heiden en ’n tollenaar te behandel’ dat innige verhoudinge met die persoon afgesny word. 
As al die korrekte stappe geneem is sonder dat daar versoening plaasgevind het, beteken dit dat die persoon teenoor God en Sy Woord rebelleer. Dit beteken ook dat daar steeds in liefde opgetree word, maar dat daar van die vriendskapsverhouding onttrek word. Dit mag tot die ander persoon se berou en inkeer lei. 

Gehoorsaam aan Jesus se lering
As gelowiges moet ons met hierdie lering saamstem. As ons nie daarvolgens leef nie, sê ons in werklikheid: “Ek sal lewe soos ek wil, Jesus het geen sê oor my nie”. Sal ons Hom gehoorsaam? Sal ons ons harte voor Hom verootmoedig? Ons moet in ooreenstemming met God se wil optree, doen soos Jesus gedoen het. Wanneer ons versoening najaag, doen ons wat God wil hê. 

Sewentig maal sewe
“Daarna het Petrus na Jesus toe gekom en gevra: ‘Here, hoeveel keer moet ek my broer vergewe as hy iets verkeerds teen my doen? Selfs sewe keer? Jesus antwoord hom: ‘Ek sê vir jou, nie sewe keer nie maar selfs sewentig maal sewe keer.” (Matt 18:21,22). 
Sewe is die volmaakte getal. Petrus het dus in werklikheid gesê: “Ek het alles volmaak gedoen, nou hoef ek seker nie meer te probeer vergewe nie.” Jesus beveel hom egter om oor en oor te vergewe, moenie eers tel hoeveel keer nie, want dit is ’n hartsingesteldheid van vergifnis: “Ek sal soveel keer vergewe as wat nodig is.” 
Hier spreek Jesus die kern van die pro-bleem aan – die probleem in jou hart. Die pyn, die kwadegevoelens, die wrokkigheid. Dit is maklik om te sê: “Ek vergewe,” maar die gevoel leef steeds voort in jou hart. Wanneer jy die persoon sien wat jy moet vergewe, is dit ’n geleentheid vir ‘sewentig maal sewe keer’. Bid: “Here help my om te vergewe, werk met my hartsingesteldheid, my houding teenoor hierdie persoon. Werk met jou Gees in my om liefde te bewys.”

Wortel van bitterheid
Ons mag deels vergewe het, maar die wortel van bitterheid kan diep lê en ons vergiftig. Hou aan met vergewe totdat dit seermaak. Vergewe – selfs al was wat gebeur het, onregverdig – want elke keer wat ons vergewe, neem die Heilige Gees ons harde hart en maak dit sag. Hy hou aan met Sy werk in ons totdat die bitterheid vrede word, totdat ons God in Gees en in waarheid aanbid.

Ondankbare dienskneg
Jesus eindig met die gelykenis van die koning wat ’n dienskneg van miljoene rande se skuld kwytskeld, net vir dieselfde dienskneg om iemand wat hom ’n paar rand skuld, te wurg vir sy geld. (Matt 18:22-35). Wat Jesus hiermee vir ons sê, is dat ons vergifnis van ’n ander persoon gesien moet word in die lig van die Kruis. Die klein bietjie wat ons ander moet vergewe, kan nie vergelyk word met die groot losprys wat Christus vir ons betaal het nie.

Sodat jou Vader jou kan vergewe
As ons nie kan vergewe nie, wys dit dat ons nie die heiligmakende genade van Christus toegelaat het om Sy vergifnis in ons harte uit te stort nie. “Alles wat julle in die gebed vra, glo dat julle dit al ontvang het, en dit sal vir julle so wees. En wanneer julle staan om te bid, en julle het iets teen iemand, vergewe hom; dan sal julle Vader wat in die Hemel is julle ook julle oortredinge vergewe.” Mark 11:24,25. Miskien sukkel jy om te vergewe. Jou Vader in die Hemel sê dat Hy jou nie kan vergewe voordat jy vergewe het nie. Ons is deel van ’n koninkryk wat op vergifnis gebou is. As jy ’n kind van daardie koninkryk is, is vergifnis deel van jou lewe.

GREG BLAIR  Is die medepastoor by Somerset-Wes Baptiste Kerk.

 

Bron:  juig

 

NGVishoek: Ds. ( dominee ) Martin Barnard.

Lees Meer >>

Die Woord van God in die skepping en die herskepping (Johannes 1:1-5)

 

Die Griekse begrip van die woord, logos, lei tot diewese van die Godheid en van die mens. Aan die Griekssprekende wêreld moes Johannes in Grieks verduidelik wie Jesus is, en gebruik hy die taal van die Grieke. Maar vir die Christene was die Woord gelaai met ‘n spesiale betekenis: die goeie nuus van God se openbaring en verlossing deur Christus. Die vier Evangelies bied dit aan as God se woord deur Christus gepraat, oor Christus. Jesus doen God se werk en praat oor God se werk en is self God in sy wese. Wat Hy is en sê en doen is God se woord. Toe Johannes se Evangelie begin praat van die Woord, was dit ‘n begrip wat gevul was met inhoud.

 

‘en die Woord was by (pros) God’ – in die teenwoordigheid van God en selfs één met God, soos die volgende sinsnede sê: ‘en die Woord was self God’ – God in sy wese – maar daarmee vervang Hy nie vir God nie (nie ‘en God was die Woord nie’), maar  God by God.

Die goddelike natuur van die Woord word gesien in sy werk: in die skepping 1:1-5; openbaring 1:5,9-12,18; en verlossing 1:12-14, 16-17. In al hierdie werke druk God Homself uit deur die Woord, as die God wat praat, wat Homself openbaar deur die Woord (1 Kor 8:5,6).

 

1:2 Die vers herhaal die begrippe van vers 1 om dit te beklemtoon en te verduidelik: (i) hierdie Woord was in die begin by God; (ii) Hy was by God voor alle tye, en het nie eers ‘in die begin’ begin bestaan nie; (iii) ‘n skynbare teenstrydigheid: die Woord was God en was tog in gemeenskap met God.

 

1:3 Positief en negatief word bevestig dat die Woord die middelaar van die skepping is: alles deur die Woord; niks sonder Hom nie. Maar Hy is nie ‘n soort tussengod wat doen wat God in sy heerlikheid nie sou doen nie. Die skeppingswerk van die Woord is die werk van God deur Hom wat self God is.

 

1:4 Die Woord is nie net die middelaar  in die skepping nie, maar ook in die voortgang van die skepping. Hy is die lig en die lewe in die skepping; ook die lewe in die geboorte van die mens, en in die nuwe lewe van die herskepping van die sondige gevalle mens. Die nuwe skepping wat Jesus bring, is die doel van die oorspronklike skepping deur die Woord.

 

1:5 Die lig is aan skyn in die duisternis, wat aan die begin oor die skepping geheers het, toe die Gees van God oor die watermassas gesweef het (Gen 1:2) en in die duisternis van die gevalle mensheid. Die Lig is die heerlikheid van die mensgeworde Woord toe Hy op aarde was. Die heerlikheid van Jesus is sy liefde wat Hy bewys het deur vir ons te sterf, en deur sy oorwinning oor die dood met sy opstanding. Die Lig skyn in die tyd van die Helper/Trooster wat Jesus gestuur het om ons te oortuig en te lei en te versterk tot vandag toe.

Die duisternis kon nie beheer oor die lig kry nie, kon dit nie begryp nie, kon dit nie oorval nie, almal betekenisse van die woord katalambanoo (NAV ‘uitdoof’). Dit verwys na die duisternis in die skeppingstyd wat nie beheer oor die Lig gekry het nie, ook in die tyd van Jesus, en gaan voort in die tyd van die kerk se getuienis oor die Woord wat mens geword het. In die verband van 1:10-12 verwys die lig eerstens na die aanvaarding en aanneem van die waarheid van die openbaring wat Jesus is en bring. En die duisternis van die wêreld kan dit nie oorwin of uitdoof nie; maar kyk na Jesus se waarskuwing in Johannes 12:35.

Die lewe van Jesus waarvan die Evangelie gaan vertel word in 1:1-5 geplaas teen die agtergrond van sy verhouding tot die ewige God, die Here oor al die eeue, die Skepper van alles, Onderhouer van alles, en Verlosser van alles. Die Woord wat mens geword het, is die bemiddelaar in al God se werke, in skepping en nuwe skepping, en in altwee is Hy die Middelaar van die openbaring van God aan die mens, in wat Hy is en doen.

In elkeen van die hoofstukke van Johannes word getuig oor die Godheid van Jesus.

 

Bron:  Bybelkennis.co.za

NGVishoek: Ds. ( dominee ) Martin Barnard.

Lees Meer >>

Maak spasie!

i. Kolossense 3:17: Laat elke woord wat jy praat tot God se eer strek. Hy wil nie net jou tong hê as jy oor “geestelike” dinge praat nie. Jou tong is die Here se voltydse spasie. Stel dit tot sy beskikking; dan verander jou woorde in ’n seën vir ander.

ii. Kolossense 3:23: Doen alles wat jy doen eksklusief vir die Here. Verrig jou dagtaak vir Hom. Jy leef of werk nie net na-ure vir God nie. Jy is 24/7 in sy voltydse diens. Hy is die Heer in wie se spasie jy leef en werk.

iii. 1 Korintiërs 10:31: Of jy eet en of jy drink, doen dit vir God. Verander elke maaltyd in ’n God-spasie. Te veel mense rammel net ’n vinnige gebedjie af aan die begin van etes; daarna is die eetspasie weer hulle s’n. Nee! Die Here wil by die res van die ete ook die Eregas en die Gasheer wees. Laat Hy die spasies van jou werk, woorde en mond bestuur.

Bron:  ekerkNGVishoek: Ds. ( dominee ) Martin Barnard.

Lees Meer >>

Uitreik – 24 Junie 2013

 

Saam op die bus is weer van Valhallapark se mense wat soos lang verlore familie voel met die weersiens.

Laat middag kom ons veilig in Sutherland aan. Af dra en nes skrop!

 

Die aand kry elkeen sy top, serp en mus vir die uitreik.

 

Sondag

Dit is nie so koud soos verlede jaar nie, maar die sneeu wat steeds teen die koppe lê bly ‘n waarskuwing.

 

Die oggend woon ons die NG en VGK dienste by. ‘n Besliste “vereiste” vir die VGK kerkraad– jy moet kan sing J.

 

Die middag besoek ons die ouetehuis waar die kniekombersies wat met soveel liefde deur die gemeente gebrei is, uitgedeel is. Ons het elkeen persoonlik oorhandig en bietjie gesels. Die kinders het menige ou oog laat blink. Dit was rerig baie kosbaar en ek wens almal kon die vreugde wat die handewerk veroorsaak, beleef.

 

Die laatmiddag is ‘n lofprysingmiddag / aand saam met die VGK. Die VGK se band speel nie net musiek nie, hulle MAAK musiek uit hul hart uit. Ons het saam gebid, saam gesing (en nog ‘n bietjie saam gesing) en sommige het selfs saamgehuil.  “‘n Mens het nie woorde vir hulle omstandighede nie, jy kan hulle net aan Jesus op dra.”

Sondagaand het die span lesse voorberei; die tannies het kospakkies gepak en geskenke uitsorteer.  Dit het maar laat geraak, maar die moraal / gees (of was dit Gees?) was hoog, want daar was ‘n opgewondenheid in die lug.

Maandag

7 uur kom ons bymekaar vir Bybelstudie en beplanning vir die dag en na ontbyt verkas elkeen in sy eie rigting. Die Maintenance Manne verf en tokkel, die volwasse bediening deel kospakkies uit en die A2J span hou die sowat 330 kinders wat by die saal opgedaag het, besig. Die kleintjies hang aan oom Moses (aka Marc) en oom Goliat (aka ds Martin) se lippe.

 

Vanjaar is daar báie meer kinders. Gelukkig het ons meer as 300 x 2l bakke sop (ja, dis reg!) ontvang vir die uitreik, so elkeen kon kry.

 

Die middag is poppekas en sport, maar môre meer daaroor.

Deur die dag deel die volwasse span linne en kospakkies uit aan behoeftiges, maar meer nog deel ons Jesus se liefde, wat vir ons almal bestem is. So sit ons by ‘n oom en hy haal sy Bybel uit. Dis maar redelik klein gedruk en aangesien die oom redelik oud is vra ons toe of hy darem nog mooi kan sien, waarop hy reageer, “Ek sien net so nou en dan,” maar hy verseker ons daarvan dat hy gereeld met God in sy gedagtes praat, veral as hy alleen voel, wat ongelukkig redelik gereeld is..

 

Die aand is pizza kompetisie gehou en is afgesluit met ‘n geestelike aand.

Voorbidding

Bid saam met ons –

  1. Verhoudings – tussen die volwassenes en A2J en ook A2J onder mekaar. Vir die groepies wat saam met Sutherland se kinders werk.
  2. Bid dat ons in diepte sal groei in ons vertroue op die Here, sodat ons nie in eie krag nie, maar in Sy genade sal werk.  Vir Hom die eer.
  3. Vir wysheid vir die leierspan in die span en met die reëlings self.
  4. Vir gesondheid – daar is op die oomblik net ‘n paar kuggies.  Bid dat hulle gou gesond sal word en dat ons almal sterk en gesond sal bly vir die res van die week.
  5. Sover is ons werklik geseën met die weer, buiten vir die wind wat smiddae se sport moeilik maak. Bid dat die weer sal goed bly vir die tye wat ons buite moet werk.
  6. Vir elkeen op die uitreik: dat ons verhouding met die Here meer persoonlik sal word en sal aanhou groei.
  7. Dankie vir hoe die Here die kinders gebruik om ook mekaar te ondersteun en te dra, hetsy ‘n nuweling, iemand wat siek is of iemand wat net hartseer is.
  8. Vir môreaand se “Sutherland Talentaand” – dat dit vlot sal verloop.

Baie dankie vir julle wat ons hande omhoog hou deur die week met jul gebede en ondersteuning.

Groete,

Sutherland span,

Johann en Heidi

 

NGVishoek: Ds. ( dominee ) Martin Barnard.

Lees Meer >>

Wyse mense maak so

Egte wysheid begin met eerbied vir die Here en met respek vir mense. So vertel Spreuke oor en oor. Wysheid laat jou teen die regte spoed leef — daardie soort spoed wat tyd het vir God en ander mense in jou lewe. So nie, leef jy jouself stukkend.

  • Wyse mense maak tyd vir dit wat saakmaak. Hulle vind elke dag ’n rusplek aan God se voete, soos wat Dawid ons leer in Psalm 131.
  • Wyse mense ruim elke week genoeg tyd in vir hulle vriende en familie.
  • Wyse mense maak elke dag tyd vir hulleself. Hulle strompel nie soos lewelose masjiene voort van een dag na die ander nie.
  • Wyse mense maak altyd tyd vir diegene wat deur die lewe getrap en rondgestamp is.

Bron:  ekerk.org

NGVishoek: Ds. ( dominee ) Martin Barnard.

Lees Meer >>

Ons siening van die heil

Maar Jesus herstel nie net wat verbreek is nie. Hy doen meer. Hy verryk ook ons siening van die heil. Hy plaas ons toekoms op ’n ander vlak as die oorspronklike. Daar was altyd mense wat net aan ons redding gedink het as ’n herstel van wat ons verloor het, as “paradise lost, paradise regained”. Maar die begrip “verheerliking” bring ’n nuwe dimensie van die heil na vore. Jesus is nie net ’n herhaling van die eerste Adam nie, Hy is ’n verheerlikte mens. Die eerste Adam was ’n “lewende wese”, maar die tweede Adam is ’n “lewendmakende Gees” (1 Kor 15:45). Dis nogal moeilik om ’n goeie vertaling te kry vir die Grieks, maar wat dit ook al presies beteken, dit is veel meer as net ’n lewende wese.

 

En ons deel in hierdie plus. Ons word ook verheerlik (Rom 8:30). Ons sterf as ’n “natuurlike liggaam”, maar ons sal opstaan as ’n “geestelike liggaam” (1 Kor 15:44). In 2.3.3 het ons na die betekenis van “geestelike liggaam” gekyk. Die “ewige lewe” hou dieselfde gedagte in (2.3.4). Ons kry nie net die lewe van die eerste Adam terug nie, ons kry ’n aandeel in Jesus se lewe, sy opstandingslewe wat die dood finaal agter Hom het. Dit beteken dat “ewige lewe” nie net ons gewone lewe is wat ewig sal aanhou nie, maar lewe op ’n ander vlak, ’n ander kwaliteit lewe. Dit kom mooi na vore in Openbaring 21, 22 waar ons inderdaad iets kry van ’n herhaling van die tuin in Genesis 2 (Op 22:1-3), maar óók ’n radikale oortreffing daarvan met die veilige en heerlike stad en God en die Lam wat Self die lig is sodat die son nie eens meer nodig is nie.

 

Dit is teen hierdie tyd seker eintlik meer as net duidelik dat Jesus dus nie die passiewe eindpunt is waarheen elke groot tema in die Bybel ons lei nie. Hy is die groot “Veranderaar, Vernuwer, Verheerliker”.

  • Hy beëindig en vervang wat nie regtig werk nie.
  • Hy bereik God se doel met die dinge wat langs die pad vasgeloop het.
  • Hy verryk ons siening van sentrale sake in die Bybel oneindig.

 

Dit beteken die titel van hierdie boek sou ook iets soos die volgende kon gewees het:

Jesus lei alle temas in die Bybel na die punt waar God hulle wil hê.

 

Bron:  byblekennis.co.za

Mense wonder dikwels oor verskeie aspekte van die Christelike geloof. Alle Paaie lei na Jesus (2010) deur prof Adrio König is ʼn baie nuttige naslaanwerk wat ʼn betrokke en uitdagende verduideliking bied van die die middelpunt van ons geloof: Jesus Christus.  Ons dank aan prof König en CUM vir hierdie vergunning.

Vir meer inligting oor CUM, besoek gerus hulle webblad by www.cumuitgewers.co.za


 

NGVishoek: Ds. ( dominee ) Martin Barnard.

Lees Meer >>

Kop & Hart: Superman, Jesus, mitologie en jy


Hierdie vergelyking illustreer die invloed van mitologie baie goed. Kom ek verduidelik.

Clark Kent is ‘n gewone nuusman. Ja, toegegee, Superman se hart klop warm binne hom, maar hy bly net ‘n gewone sterfling soos die res van ons. Dan verf die mitologie-kwas oor hom en ewe skielik is hy die seun van ‘n ander wêreld se heerser, met bonatuurlike kragte en hy is selfs onsterflik.

Moses is ‘n Israeliet, ‘n vername profeet wat die Israeliete uit Egipte help lei. ‘n Besonderse leier maar ‘n gewone sterfling soos die res van ons. Dan verf die mitologie-kwas oor hom en ewe skielik word hy iemand met bonatuurlike kragte wat volgens sy wil natuurkragte kan beheer. Van die verskillende plae, die Rooi See wat oopgaan en weer toe, kos wat uit die hemele val om die honger Israeliete te voed, water uit ‘n rots, tot en met sy vermoë om direk met God – in die vorm van ‘n brandende braambos – te kan praat. (Terloops, die skeppers van Superman het juis sy karakter gegrond op die mitologiese Moses.)

So kan ek voortgaan om te illustreer hoe gewone, alhoewel besondere karakters, deur mitologie heeltemal getransformeer word na bonatuurlike wesens. Boeddha, ‘n Indiese prins word ‘n god wat op water kan loop en onsterflik is; Jesus, ‘n Joodse Rabbi word ‘n god wat wonderwerke kan doen en ook onsterflik is.

Daarom is dit vir seker nie verregaande om Jesus en Superman te vergelyk nie. Want albei verhale is mitologiese verhale. Ek moet darem hier sê dat Jesus, Moses en Boeddha wel historiese wortels het, terwyl Superman ‘n moderne fiktiewe skepping is. Nietemin, die historiese Jesus en die Christus Jesus, word ook deur mitologie maar net ‘n fiktiewe skepping.

Nou voor ons verder gaan, kom ek verduidelik net weer vinnig wat ek met ‘n mite bedoel.

Wel, per definisie is ‘n mite ‘n storie wat vertel is om te probeer verduidelik hoe die wêreld werk en hoe mense, binne ‘n sekere tyd, hulleself daarbinne probeer verstaan het. Mitologie is dus ‘n storie vol simbole en metafore. Maar soos met enige simboliese en metaforiese uitbeelding van die werklikheid, kan dit nooit letterlik verstaan word nie.

Byvoorbeeld, in antieke tye was gode en bonatuurlike wesens maklik deel gemaak van verklarings van dinge en gebeure. Dink maar aan die Griekse god, Poseidon (Romeinse naam: Neptunus), wat gesien is as die heerser van die see – god van die oseane, verantwoordelik vir aardbewings (en o ja, die skepper van perde).

Nou as daar byvoorbeeld in die antieke tye oor ‘n aardbewing verslag gelewer moes word, sou die vertellers van die storie sommer maklik Poseidon ingebring het as die oorsaak van die aardbewing. Dus: met mites word gebeure, geheue en verbeelding vrylik saamgevleg om ‘n storie te vertel.

Mites is wel stories met betekenisvolle boodskappe, maar is en was nooit bedoel om letterlike verklarings vir die werklikheid aan te bied nie. Net so onlogies sou dit wees om die Superman storie as werklikheid te verstaan. Net so is ‘n mite se bonatuurlike verklarings nooit bedoel as werklikheid nie.

Nee, veel eerder gaan dit oor die verteller(s) se verwondering oor die skoonheid, heiligheid en misterie van ‘n wêreld wat buite hulle bereik lê. Mitologie is dus ‘n manier om oor gewone gebeure op ‘n simboliese, metaforiese en poëtiese wyse te praat.

Vat nou maar net die Superman-storie. Tydens die Groot Depressie in Amerika was daar naarstigtelik gesoek na hoop. Die skeppers van Superman skep dan juis ‘n karakter wat die rol van ‘n sosiale aktivis en vegter vir die regte van die gewone mense word. Hy beveg korrupte ekonomiese en politieke sisteme, in die vorm van korrupte sakemanne en politici. Sy groot aartsvyand is die verpersoonliking daarvan, naamlik Lex Luthor.

So kom Sigmund Freud en sê ‘n mite is ‘n verhaal wat die waarheid in simboliese vorm vertel. Of soos Joseph Campbell in sy boek The Power of Myth, dit stel: “Mythology is not a lie, mythology is poetry, it is metaphorical. It has been well said that mythology is the penultimate truth – penultimate because the ultimate cannot be put into words. It is beyond words…”

Mites is dus wonderlike rigtingwysers op die pad van selfontdekking en die spirituele reis waarop ons elkeen ons bevind. En net soos ons nooit stilstaan nie so is mites ook nie staties nie, maar word dit oorvertel van geslag tot geslag en selfs van een volk na ‘n ander. En soos mites oorgedra word, verander dit gedurig en pas by nuwe omstandighede aan.

Hiervan is Superman ‘n wonderlike voorbeeld. Dit is ‘n ou storie van hoop, ‘n storie van elke mens se reis na self ontdekking en oorwinning. Presies soos die Boeddha, Jesus, Dionisus en Hercules se stories. Superman is nou net in ‘n moderne vorm herkenbaar. Hy loop ook op water, kan bonatuurlike dinge doen en is natuurlik die redder van die mensdom.

Joseph Campbell sê juis dat mites wonderlike stories van innerlike ontdekkings kan wees, selfs rigtingwysers vir elkeen van ons op ons lewensreis. Maar dat ons moet oppas om dit te wil vertaal in feitelike gebeure. “Every religion is true one way or another. It is true when understood metaphorically. But when it gets stuck in its own metaphors, interpreting them as facts, then you are in trouble.”

Dit is tog duidelik dat wanneer ons oor iets abstrak soos God wil praat, ons dit slegs kan doen aan die hand van dinge wat wel aan ons bekend is. Daarom die vergelykings van God met iets soos ‘n Vader of ‘n goeie Herder.

Natuurlik bly dit beperkte begrippe wat God nooit in essensie kan vasvat nie. Dit bly maar net simboliese en metaforiese maniere om oor God te praat. Ons kan sê dit is die mens se selfgeskepte prentjies van God.

Meestal het mense glad nie ‘n probleem hiermee nie. As ek sien hoe Superman bonatuurlike kragte het, hoe hy kan vlieg en selfs onsterflik is, pla dit nie, want ek weet dit is slegs ‘n storie wat geklee is in mitiese taal. Dit wys na wonderlike temas wat ek binne myself ook kan vind. Temas waarvan Joseph Campbell in sy boek, The Hero with a Thousand Faces (1949) praat.

Hierin bespreek Campbell sy teorie van die mens se reis en hoe hierdie reis in vele van die wêreld mitologieë gevind kan word. Ook in die Superman verhaal. “A hero ventures forth from the world of common day into a region of supernatural wonder: fabulous forces are there encountered and a decisive victory is won: the hero comes back from this mysterious adventure with the power to bestow on his fellow man.”

‘n Patroon wat Campbell sê deel is van ons elkeen se storie. Ons word gebore en soos ons opgroei word ons bewus van ‘n dieper roeping. En dié van ons wat ja sê vir hierdie roeping, gaan dan op ‘n avontuur.

Campbell praat dan van stadiums of patrone wat herhaal en in alle verhale voorkom. Hy verwys na die patron wat oor en oor herhaal soos ook by Osiris, Prometheus, Gautama Boeddha, Moses en Jesus, en Homeros se Odusseia. En natuurlik ook in nuwe vorme, dink maar net aan Star Wars en die held daarin, Luke Skywalker se avonture van self ontdekking.

En natuurlik Superman. Maar ook in verhale soos The Matrix, met Neo wat duidelik ‘n held is wat op sy eie reis, soos ook Jesus, ontdek hy is die redder van die mensdom. 

Selfde met Harry Potter and the Philosopher’s Stone, The Lord of the Rings se Frodo en die parapleeg soldaat Jake Sully in Avatar.

Hierdie patrone of stadiums kan in hooftrekke opgesom word as: Roeping (soms genoem die vertrek of skeiding), Bekendstelling of Inisiasie, en Terugkoms.

Die Roeping handel oor die held se oproep tot die avontuur. Die Inisiasie handel weer oor die held se vele avonture op die reis, en die Terugkoms gaan oor die held se terugkeer huis toe met kennis en magte wat hy/sy verkry het op die reis – nou ‘n meester van twee wêrelde (binne wêreld en buite wêreld).

Want dit is nogal interessant om te sien dat in mitologie as daar gepraat word van “ander wêrelde” of bonatuurlike domeine, dit eintlik verwys na die mens se binne-wêreld. Die Heldereis is dus ook die verwysing na die innerlike reis. Campbell verduidelik dit so: “…where we had thought to travel outward, we shall come to the center of our own existence; where we had thought to be alone, we shall be with all the world.”

Daarom is dit so nodig om mites nie weg te gooi nie. Dit is wonderlike rigtingwysers vir elkeen wat op sy eie spirituele avontuur is. Deur mites letterlik te probeer maak, verloor jy die boodskap en die wysheid van die storie. Maar wanneer ons mites lees vir wat dit is, word dit wonderlike tekste vol wysheid. En dan kan ons die dieper boodskap daarin vind. Daarom dat Campbell ons die heeltyd waarsku: “Wherever the poetry of myth is interpreted as biography, history, or science, it is killed.”

Saam met Campbell wil ek elkeen aanmoedig om mites te bestudeer, of dit in die vorm van ou heilige geskrifte is of in moderne vorm soos die van Man of Steel. Laat jou betower deur die mitologiese wêreld. Laat die simbole en metafore jou ook weer wakker maak vir jou eie reis. Want wat jy sal ontdek is dat jy ook ‘n Superman/-vrou is.

Jy het nodig om betekenis in jou lewe te vind. Campbell verduidelik dit so: “Life has no meaning. Each of us has meaning and we bring it to life. It is a waste to be asking the question when you are the answer.”

Ek wil afsluit met die vraag van Clark Kent/Superman/Kal-El se biologiese pa, Jor-El (van die planeet Krypton). “What if a child dreamed of becoming something other than what society had intended? What if a child aspired to something greater?”

Waarop Joseph Campbell sou antwoord: “If you do follow your bliss you put yourself on a kind of track that has been there all the while, waiting for you, and the life that you ought to be living is the one you are living. Follow your bliss and don’t be afraid, and doors will open where you didn’t know they were going to be.”

 

Bron: rapport.co.za

NGVishoek: Ds. ( dominee ) Martin Barnard.

Lees Meer >>

Uitreik – 25-26 Junie 2013

 


Die middag se sport moes afgestel word oor die weer en die kinders het weer die ouetehuis besoek, waar sommige gruwelik bederf is en selfs roomys ontvang het. Ons het ook koekies vir die minderbevoorregte inwoners van die ouetehuis geneem, waar een omie opgemerk her “dit kom reguit uit die hemel uit”. Suzie het die oudste oom ontmoet: ‘n op-en-wakker 107!


 

Die volwassebediening het voortgegaan om die kospakkies en linne uit ted eel deur middle van huisbesoek. Uit een van die huise het ‘n vrou gekom en gevra dat daar vir haar moeder gebid word. Sy het nie warm komberse of kospakkies gesoek nie, maar gebed. Die tannie Els is 66 jaar oud en ‘n parrapleeg. Haar dogter se geloof en liefde vir haar moeder het Corné-hulle diep geraak en hulle het ‘n wyle daar vertoef en klaar gerëel vir middele om dit vir haar net ‘n bietjie gemakliker te maak.

 

Winston, ‘n bedlêende seun vir wie ons verlede jaar ontmoet het, het ook 18 geword. Die dames het hom besoek met nuwe beddegoed en ‘n geskenk.

 

Die aand het ons talenkonsert gehou in die gemeenskapsaal.Die A2J –span bied dit aan en tree ook op as beoordeellaars. Hulle was briljant.  Daar was so 12 items, maar die ene wat my bybly was die item waar 9 17-jarige seuns ‘n liedjie gesing het wat een van hulle gedurende die week geskryf het en opgedra het aan ‘n vriend wat verlede Sondag sy eie lewe geneem het. Dit was hartroerend.  Meeste van die seuns woon ook dan bedags die lesse by wat deur A2J en tannie Petro van Pretoria aangebied word.

 

Woensdag

Woensdag was net so koud en ons het rerig gedink dit gaan sneeu.  Die hele dag gaan maar oor die uitdeel van die klere, wat ‘n groot voorreg is en baie vreugde verskaf. Dit verg nogals organisasie om al die klere uit te pak en seker te maak dit word redelik regverdig verdeel.  Oral in die dorp het mens die kinders sien stap met hul hopies klere onder die arm en groot glimlagte op die gesigte.

 

Woensdagaand was daar ‘n gesinsaand by die kerk waartydens ons eie Ds. Martin die woord gebring het en daarna was dit die volwassenes se beurt om klere te kry. Baie harte is baie bly gemaak en baie lyfies het verseker warmer gaan slap as gevolg van al die skenkings wat ons namens die Vishoekers kon uitdeel.

 

Van die A2J’ers

Wat vir my uitgestaan het is hoe opgewonde die kinders was om totale vreemdelinge te ontmoet en hoe gou hulle jou vas gryp as jy vir hulle ‘n bietjie liefde en vriendelikheid wys.  Ook hoe almal by A2J soos ‘n groot familie is. – Danial

Die is ‘n wonderlike geleentheid om saam met A2J na Sutherland te gaan. Dit is baie koud en dit is so mooi om te sien dat die kinders van binne af warm word as jy hulle van die Here vertel. – Elmarie

Ek het met groot verwagting die Vrydagoggend opgestaan en glad nie geweet wat om te verwag nie. Opgewonde, maar baie gespanne. Wat vir my rerig lekker was, was die aand van praise and worship. Ek het in my lewe nog nooit die Heilige Gees so ervaar en so aan dinge gedink soos ek nou doen nie.  Ek is so bevoorreg en baie bly ek het gekom. Die kerke hier is entoesiasties oor alles.  Hulle loof en prys die Here met hulle hele hart en siel.  Hier kan ‘n mens die Here voorsien en hulle gee om oor mekaar en hulle naastes! Die kinders hier is net so oulik. Hulle soek net liefde. As ‘n mens hulle hand vas hou is dit asof hulle nie wil los nie.  Die lekkerste – jy kan hulle liefde gee. – Stephanie

Almal van die kleintjies wat vanoggend in my groepie sop gekry het, is daar weg met ‘n, “Dankie, tannie”. – Riana

Hope klere vir oud en jonk. Daar is voorsien deur die gemeenskap van Vishoek, Constantia en Tokai tot in Valhalla. Drukkies van dankbaarheid is uitgedeel en A2J’ers het hulle goed van hul taak gekwyt om die volwassenes soos koninklikes te laat voel. Ons kon weereens jonk en oud help met ‘n paar nuwe items in hul klerekas en is opreg dankbaar vir elkeen se bydrae hieraan. – Annette

 

Allerlei

Die instandhoudingspan het ‘n ou wat pik slaan in skinny jeans laat cool lyk…!

Oom Moses vra die kleintjies (3-6 jaar) met Jona se verhaal, “Wie het vir God kwaad gemaak?”. Gou is die handjie op “Ekke!”

Mickey, ons fotograaf, het self ook ‘n verrassingsdrukkie gekry van een van die kleintjies wat kom dankie sê vir die klere.

Voorbidding

Bid saam met ons –

  1. Dat ons sal luister en doen wat God se wil is in ons verhoudinge: leiers en jeug, jeug en groepies, ons en Christus.
  2. Vir die gesondheid van die span.  Die koue weer en stof in die lug sorg vir ‘n verkoues of seer keel wat pla. Ook vir krag en ‘n goeie gesindheid waar die moegheid beslis begin deurslaan.
  3. Vir koue en warm weer op die regte tyd.  Ons kon die hele dag deur werk sonder probleme met reën, maar die koue kan moeilik wees.
  4. Dankie vir hoe die Heilige Gees A2J toerus om die werk te doen wat hulle doen met die kinders en volwassenes. Om eerlik te wees is ons opleiding ‘n druppel in die emmer; dit is alleen deur Sy leiding.
  5. Vir moed, hoop en liefde vir die werk en geleenthede wat die laaste paar dae van die uitreik voorlê.

 

 

 

 

 

 

Groete,

Sutherland span,

Johann en Heidi

 


NGVishoek: Ds. ( dominee ) Martin Barnard.

Lees Meer >>