In die ou Suid-Afrika het jy mos saam met jou matrieksertifikaat en getuigskrif van die skoolhoof ook een van die dominee benodig as jy om werk of ’n beurs by ’n staatsinstelling of selfs private maatskappy aansoek wou doen. Dié praktyk het dominees met mag en status beklee, kerklidmaatskap en -bywoning verseker met gevolglike sekerheid van werk en inkomste.

Die teenprestasie van die dominees was om die lyn tussen kerk en volk en dié tussen godsdiens en burgerskap te help vervaag. Eersgenoemde vra kinderlike geloof en laasgenoemde, wat politiek betref, kritiese denke. Die mengsel het wrang vrugte gedra waarvoor die kerk verskoning moes vra.

Nou, in ’n vrye samelewing, kan dié wat die kerk verlaat het ook maar vrede maak dat as jy kerkloos lewe, jy ook sonder die kerk bruilof of begrafnis kan hou. Die kerke moet tog nie so desperaat wees vir besigheid dat hulle inwillig om verlooptes te trou of te begrawe nie. Só kan ons baie skynheiligheid gespaar bly.

As ons dan met eerlikheid voortgaan, sal ons in die toekoms weet: As politikus en prediker te naby aan mekaar staan, wantrou albei.

Bron:  Rapport.co.za

NGVishoek: Ds. ( dominee ) Martin Barnard.

• Hoekom? Want God is besig om sy hemelse koninkryk uit te brei, op te bou en te vestig omdat Hy is Wie Hy is! Hy is die volle rede hoekom Jesus-mense in Christus leef, daar is geen ander rede hiervoor nie.
• Hoe? Op ‘n misterieuse manier wat ons nietige skepselle nie volledig kan verstaan of dit verklaar nie, word Jesus se verlossingswerk in Jesus-mense voortgesit deur die Heilige Gees se werking. Hierdie Gees-werking kan ons nie beheer, of eis, of verdien nie – God doen dit net omdat Hy kan en wil!
• Wanneer? Van altyd af is God al hiermee besig: Hy het geen begin of geen einde nie: Hy is nog altyd, Hy is vandag, Hy sal ook altyd wees. Maar nou maak Hy Jesus-mense deel van sy tydloosheid: elke bekeerde sondaar het reeds die ewige lewe en word daarmee ook soos Hy tydloos!
• Waar? In die Gees- en geesdimensie wat vanuit die innerlike mens sigbaar word oral en altyd waar Jesus-mense is. Dit word en is ‘n permanente bestaanswyse wat nie aan- en afgeskakel kan word nie.

Kom ons vind motivering vir hierdie grootse uitsprake. Jesus se Hoëpriesterskap volgens die orde van Melgisedek beteken, opgesom en eenvoudig verklaar:
1. Die enigste Seun van God het selfloos, dit is liefdevol, aan die kruis gesterf as die volmaakte offer vir alle mense van alle tye se volledige sondigheid.
2. Ons Vader in die hemel het hierdie Jesus van ons moeiteloos uit die dood opgewek, om daardeur vir ons die hemelpoorte vir altyd oop te sluit.
3. Nóú tree ons Here Jesus Christus vir ons in by die Vader sodat ons tydloos soos Hy deel is van sy verheerlikte koninkryk.

Bron: http://doomcharl.blogspot.com/

NGVishoek: Ds. ( dominee ) Martin Barnard.

Matt 7:8-9 
Want elkeen wat vra, ontvang, en elkeen wat soek, kry, en vir elkeen wat klop, sal oopgemaak word. Watter mens onder julle sal vir sy seun ‘n klip gee as hy brood vra, of ‘n slang as hy  vis vra?”

Die Here sê dus: vra en jy sal kry. Ek lei hieruit af:

1)     Hy gee ons wat ons nodig het

2)     Hy wil hê ons moet op ons knieë bly

3)     Hy wil hê ons moet Hom vra

4)     Hy wil hê ons moet vertrou

Wat is hierdie gebed van jou wat jy aanmekaar bid? Waarvoor vertrou jy tans die Here met jou hele hart? Ek dink elke mens het op enige gegewe tyd “iets’ wat jou gebedstye oorheers.

Ek glo met my hele hart dat elke gebed wat die mens bid verhoor word, of miskien moet ek eerder sê GE-hoor word. Ek dink net nie dis altyd so maklik om God se antwoord te aanvaar nie. Ek dink die Here antwoord op een van drie maniere: ja, nee, wag.

Ja – Ek sal jou gee wat jy vra.

Nee – Jy dink jy vra brood maar jy vra ‘n slang.

Wag – Nog nie nou nie, of dalk kan die Here ook sy “nee” uitstel.

Kom ons veronderstel die Here sê vir jou “nee”, of “wag”, sal jy Hom steeds onvoorwaardelik vertrou? Steeds vir Hom lief wees? Steeds aanvaar dat Hy soewerein is?

Sal jy bereid wees om te sê “Here, ek gaan ophou neul, ophou my eie planne maak, ophou spartel, en aanvaar dat U besluit staande en bindend is”. Nog meer, as God “nee” sê, hoe ver sal jy gaan om Sy arm te draai om jou “ja” af te dwing? Bedrog, diefstal, so baie ander dinge doen mense om net hulle sin te kry. Soms maak die Here net  deure toe, en dan is dit Sy antwoord. Partykeer skop ons die deur self weer oop, want ons wil hê dat ons wil moet geld.

Sê nou God sê vir jou “nee” – hoe dan? Ek glo dalk sal jy een van twee reaksies hê: veg rebels voort, of sit terug en los alles in die Here se hand.

Ek, jou Here, hoor jou gebed…..óf ja, óf nee, óf wag.

As Hy JA sê: dalk voel Hy jou vraag is verdienstelik, en dis binne Sy wil. Of jy het lank genoeg gewag, dis nou tyd vir ‘n “ja” Miskien “verdien” jy ‘n onvoorwaardelike ja. Dis lekker as God ja sê. Dit voel of Hy jou bevoordeel, of Sy guns oor jou is. Mens voel nogal soos ‘n witbroodjie, of hoe?

As Hy NEE sê: dis moeilik. Dalk sê die Here nee omdat jy ‘n slang vra, maar dink jy vra vir ‘n brood. Miskien moet ‘n klomp ander goed eers gebeur. Dis dalk gevaarlik, of sal op die langduur  vir jou nadelig wees. Miskien is jy besig om ander te benadeel, en daarom is dit nee. Miskien is die Here nog besig met jou oor iets, is jy op ‘n leerpad. Dalk is Hy nog besig met ander mense – jy beïnvloed in elk geval altyd baie om jou, selfs al besef jy dit nie.

As Hy WAG sê: Jy sien, jy kan dalk “wag” verwar met “nee”. Dalk gaan jy verwerping voel, of dalk dat God nie omgee nie, of vir jou lief is nie. Of dalk dink jy die Here verstaan nie wat die konsekwensies van sy besluit vir jou inhou nie.

Matt 26:36-45

Daarna kom Jesus met sy dissipels by ‘n plek met die naam Getsemane, en Hy sê vir hulle: “Sit hier terwyl Ek daar gaan bid.” Hy het vir Petrus en die twee seuns van Sebedeus saamgeneem. Toe het Hy bedroef en beangs geword  en vir hulle gesê: “Ek voel doodsbenoud. Bly hier en waak saam met My.” Hy het ‘n entjie verder gegaan en daar gekniel met die gesig teen die grond en gebid: “My Vader, as dit moontlik is, laat hierdie lydensbeker by My verbygaan. Moet nogtans nie doen soos Ek wil nie, maar soos U wil.” Daarna kom Hy na die dissipels toe terug en kry hulle aan die slaap. Hy sê toe vir Petrus: “Kon julle nie eens een uur lank saam met My waak nie? Waak en bid, sodat julle nie in versoeking kom nie. Die gees is gewillig, maar die vlees is swak.” ‘n Tweede keer het Hy gaan bid en gesê: “My Vader, as hierdie lydensbeker nie by My kan verbygaan sonder dat Ek dit drink nie, laat u wil geskied.” Toe Hy terugkom, kry Hy hulle weer aan die slaap, want van die vaak kon hulle nie hulle oë oophou nie. Hy het hulle weer alleen laat bly en ‘n derde keer gaan bid en dieselfde woorde gesê. Toe kom Hy na die dissipels toe terug en sê vir hulle: “Slaap en rus julle nog? Die uur het gekom. Die Seun van die mens word in die hande van sondaars oorgegee.

Jesus in Getsemané. Ek sien hier desperaatheid. Sy lewe was op die spel; Hy was beangs en bevrees, Hy neem ander saam met Hom om te bid. Hy het aangehou bid. Maar, Sy gebed het gelui: “moet nogtans nie doen soos Ek wil nie, maar soos U wil”. Bid ek en jy régtig daardie woorde “soos U wil”? En dan nog met die idee dat God enigiets kan antwoord, net soos Hy wil.

Wat moet ons doen as God nee sê?

• Bid totdat jy weet wat God se finale antwoord is.

• Doen eers alles wat jy moet en kan doen. Mense raak soms passief terwyl hulle vir God wag om te antwoord.

• Gebruik die wagtyd om te leer. Dra vrug, gaan aan met jou lewe, fokus op goeie goed, hou aan om te getuig.

• Prys die Here ten spyte van Sy nee.

• Verander wat jy kan, en aanvaar Sy besluit.

• Aanvaar Sy soewereiniteit – Hy weet die beste.

• Aanvaar dat die Here nie noodwendig gaan verduidelik hoekom sy antwoord nee was nie.

   

Jak 4:3 As julle bid, ontvang julle nie, omdat julle verkeerd bid: julle wil net julle selfsugtige begeertes bevredig.

Harde woorde, maar waar.

Ja, nee, wag – die Here antwoord altyd ‘n gebed. Vertrou Hom genoeg om te aanvaar dat Hy weet wat Hy doen.

Bron:  heuning.co.za

NGVishoek: Ds. ( dominee ) Martin Barnard.

Die seën aan die einde van die diens: Soos die diens begin met God en sy werking, word die diens afgesluit met God en sy werksame woord. Daarin word al die woorde wat in die erediens gespreek is en handelinge wat verrig is, saamgevat, en laat die gemeente as geseëndes ingaan in elke dag se lewe, met ‘n nuwe opdrag as draers van God se seën. Dit is ‘n gawe van die Here wat in sy naam aan die gemeente toegesê word. In Numeri 6:24-26 is die seën van die Here deur die priesters aan die gemeente opgeteken, en dikwels word die seën aan die einde van die Nuwe Testamentiese briewe gebruik, vgl. 2 Kor 13:13: Die genade van die Here Jesus Christus en die liefde van God en die gemeenskap van die Heilige Gees sal by julle wees.

Die tafelgebed word ook ‘’n seën’ genoem waarin die Here se guns gevra word in gebed, of waarin die Here gedank word vir ons daaglikse brood, soos Jesus ons in die Onse Vader geleer het (Mat 6:11;1 Kor 10:30) en self gedoen het (Mat 14:19; 15:36).

Seën beteken dat die Here self by jou sal wees om jou op die regte pad te lei en vir jou die beste te gee (vgl. bv. Rom 8:31-39 dat niks ons van God se liefde kan skei nie, en dat Hy vír ons is). So het die Here die einde van Job meer geseën (NAV voorspoediger gemaak) as sy begin. Vgl. ook die reeks seëninge en strawwe van die Here in Deutr. 28.

Salf (die naam Christus is die Griekse woord vir ‘gesalfde’, in Hebreeus ‘Messias’).

Om olie op iemand se kop te gooi was ‘n teken van gasvryheid (Lk 7:46; Jn 11:20 ook die salf van voete (Jn 12:3). Siekes was ook gesalf (Jak 5:14), die vroue het gegaan om die lyk van Jesus te salf (Mk 16:1).

Konings is gesalf as teken dat hulle deur die Here aangestel is (Rigt. 9:8; 1 Sam 9:16; 10:1; 16::13; 2 Sam 2:4; 5:3; 19:10, ens.) en word die gesalfde van die Here genoem (1 Sam 24:11; 26:16 Ps 20:7, ens.). Die olie was die simbool van goddelike aanstelling en toerusting met die Gees van God (1 Sam 10:1; 16:13).

Ook die hoëpriester is gesalf (Eks 29:7; Lev 8:12; 21:10), en die priesters (Lev 4:3,5,16).

Die profeet is ook gesalf (1 Kon 19:16) en profete word ook gesalfdes van die Here genoem (Ps 109:15).

Jesus word Christus, die Gesalfde genoem, omdat Hy met die Heilige Gees gesalf is (Jes 61:1; Luk 4:18; Hand 4:27; 10:38; Heb 1:9). Hy is met die Heilige Gees gesalf (Hand 11:26) tot ons hoogste Profeet en Leraar (wat aan ons die verborge raad en wil van God aangaande ons verlossing ten volle bekend gemaak het en ons die weg van die lewe kom leer het (1 Kor 6:15; 1 Joh 2:27;  Hand 2:17), ons enigste Hoëpriester wat vir Homself vir ons geoffer het, ons met God versoen het, en vir ons by God intree (Mat 10:32; Rom 6:12,13; 10:10; 12:1; Hebr 4:14-5:10; 1 Petr 2:5,9,11; ), en ons Koning vir ewig (wat ons met sy Woord en Gees  en ons, by die verlossing wat Hy vir ons verwerf het, ook beskerm en bewaar (2 Tim 2:12; Mat 25:34).

In die Nuwe Testament het die doop eintlik die Ou Testamentiese salwing vervang as die teken dat God die Heilige Gees in ons kom woon en werk om ons tot geloof in Jesus te lei, en ons daagliks te lei en te versterk in die geloof (Mat 28:19-20; Rom 6:3-11; 8:9-17).

Bron:  Bybelkennis.co.za

NGVishoek: Ds. ( dominee ) Martin Barnard.

Ek teruggaan. Maar julle weet nie waar Ek vandaan kom of waarheen Ek gaan nie. Julle oordeel oor iemand volgens sy uiterlike; Ek oordeel oor niemand nie. En as Ek oor iemand oordeel, is my oordeel reg, omdat dit nie Ek alleen is nie, maar Ek en die Vader wat My gestuur het.  In julle wet staan daar geskrywe dat die getuienis van twee persone geldig is. Nou ja, oor My getuig Ek self én die Vader wat My gestuur het.”  Toe vra hulle vir Hom: “En waar is die vader van jou?” Jesus het geantwoord: “Julle ken My nie en ook nie my Vader nie. As julle My geken het, sou julle my Vader ook geken het.” Hierdie dinge het Hy gesê in die vertrek waar die offergawekiste gestaan het. Hy was toe besig om die mense in die tempel te leer. En tog het niemand Hom gevange geneem nie, omdat sy tyd nog nie gekom het nie.

“Julle ken My nie en ook nie My Vader nie. As julle My geken het, sou julle ook my Vader geken het”

Inderdaad, as jy ‘n persoon se pa ook nog ken, is daar sommer ekstra gesag by. Daar is waarde daarin om iemand te ken, veral as jy op voornaam-termes is met die persoon…. “to know people in high places”, jy weet? Ek is seker jy ken ook ‘n paar ouens wat invloed het. Ja-nee ons kan maar lekker spog as ons so terloops noem dat iemand belangrik vir jou iets gesê het by een of ander uitgesoekte byeenkoms.

Maar, om Jesus te ken oortref alles:

1)     Jy ken Iemand wat alles wat is, was en wat kom geskep het. Elke ding, elke mens, elke stukkie materie het Hy geskep. Omdat die mens se totale denke en verwysingsraamwerk gekoppel is aan wat jy kan sien, of ervaar,  of voel, of van weet, moet Hy groter wees as dit! Die Skepper is altyd groter as die skepsel. As jy Hom ken, dan weet jy dat niks vir Hom onmoontlik is nie, daar is niks wat Hom oortref nie, niks wat Hom kan onderkry nie! Spog gerus daarmee dat jy HOM ken.

2)     Jy ken Iemand wat twee keer brood vermeerder het. Vyf brode en twee vissies gee toe 5000 mans kos, dit sluit nie eens die vroue en kinders in nie. Dit wat Hy toe kon doen, kan Hy vandag ook nog doen. Net so kan Hy jou brode vermeerder. Is jy bekommerd oor goeters? oor geld miskien? oor die kos op die tafel? Jy hoef nie, jy ken mos Iemand wat ‘n plan kan maak. Dalk kan jy daarvan getuig dat Hy dit al in jou lewe gedoen het. Ek kan definitief daarvan getuig. Hy het al menigmaal dinge gedoen wat my verstom laat staan het. Miskien het jou somme ook al telkemale nie op papier geklop nie, maar jy het dit gemaak! Spog gerus daarmee dat jy HOM ken.

3)     Jy ken Iemand wat op water kan loop. Hy is so magtig dat Hy by tye Sy eie natuurwette kan ophef. So kom Hy aangestap op die water en nooi sommer vir Petrus om dit ook te doen. Hy kry dit sowaar reg! Jy kan ook spreekwoordelik op die water loop, weet jy? Oorwinning oor goed, oor omstandighede, om beter te doen as die gewone, om nie toe te laat dat die harde golwe van die lewe jou onderkry nie. Hy wil hê jy moet ook waterloop, in oorwinning. Oorwinning oor sonde, oor omstandighede, oor goed wat jou afrem. Spog gerus daarmee dat jy HOM ken.

4)     Jy ken Iemand wat mense wonderbaarlik kan genees. Blindes kon sien, kreupeles kon loop, dowes kon hoor – hulle is almal genees deur hierdie Persoon wat jy ken. Een en dieselfde Een, Jesus Christus. Net so kan Hy jou ook genees – Hy is tot alles in staat. Hy kon selfs Sy vriend, Lasarus, uit die dood opwek, en ‘n klein dogtertjie weer lewend maak. Hy kan regtig alles doen. Lewensveranderend as jy Hom ken! Spog gerus daarmee dat jy HOM ken.

5)  Ek ken Iemand en jy ken Iemand wat bo elke mens op aarde uittroon, wie se grootheid geen einde ken nie, wat deur niemand oorwin kan word nie, wat nie uitgewis kan word deur die grootste militêre offensief nie. Nie die hele wêreld se weermagte, met die beste toerusting kan iets aan Hom doen nie! En tog gaan Hy en Hy was sy dissipels se voete. Hy gee soveel om dat Hy die werk van ‘n slaaf aanpak en voete was. Hierdie Een wie jy ken, dien jou ook. Jy ken Iemand wat die enigste ander mag in hierdie wêreld (die Satan) verslaan het. En daarom hoef jy nie meer voor die duiwel te buig nie. Jy hoef nie eers van hierdie kalant te praat nie. Jy hoef hom nie te bestraf nie, of hom te vervloek nie. Want jy ken Iemand wat groter is as hy.

6)  Nou ja, die heel beste is dat jy dié Iemand ken wat dag en nag voor die Vader staan en die doodspyle vir jou afweer. Gratis, free en verniet. Hy ken jou, en jy ken Hom. Die beste vriendskap denkbaar, die beste Persoon in hierdie heelal om te ken – op voornaam-terme: Jesus Christus.

Die geskeurde voorhangsel maak dat ons nou vrye toegang tot Hom het. Spog maar gerus met Hom!

Bron:  Heuning.co.za