Stephan Joubert

“Comfortably numb.” Hierdie titel van ’n bekende rock-liedjie uit die vorige eeu bly my by. Dit gebeur met baie van ons. Ons raak gerieflik afgestomp. Die lewe slyp ons skerpkante algaande stomp. Ons raak gewoond aan alles- misdaad, geweld, vermaak, sport, mekaar, kerk, die Here…!

Niks hou ons aandag vir lank nie. Ons is verveeld. Ons verwondering is weg. Dit is hoekom Jesus in Matteus 18 gesê het dat as ons nie verander en weer kinders word nie, sal ons nooit in die koninkryk van God ingaan nie. Kinderlike geloof, naïwiteit en verbeeldingrykheid is broodnodig. Ons moet deur Jesus se oë leer kyk na die lewe en na ander mense rondom ons. Dan sal die verwondering weer terugkeer.

Dan sal ons weer tussen die lyne en agter die skerms in eenvoud vreugde vind. Dan sal dade van omgee ons eie roete word. Nie net die Here Self nie, maar ook ander mense sal skielik weer groter as onsself raak. Ook sal ons hulle weer met die nodige respek begin behandel. Want dit is wat mense doen wat in verwondering voor God en tussen ander leef.

Hulle is opgeskerp, nie afgestomp nie.

Bron:ekerk.org

deur Milanie Vosloo

Toe die farao sien dat die storm oor is, het hy maar net voortgegaan met sy sonde … Eksodus 9:34

Vanjaar gaan ek gewig verloor en gesond leef”, is blykbaar die mees populêre nuwejaarsvoorneme. En waarskynlik ook die een enkele voorneme wat die gouste gebreek word. Want ai!, dit bly maar moeilik om die eet-reg-oefen-baie-ding te doen!

Die waarheid is dat voornemens nie jou eindbestemming bepaal nie. Jou rigting bepaal waar jy gaan uitkom. As jy wel by die voorneme van gesond-leef hou, sál jy gewig verloor en wel ‘n beter kwaliteit lewe kan hê. Want die regte rigting bring jou by die regte plek in jou lewe.

Watter rigting loop jy op die oomblik in terme van jou gesondheid, jou verhoudingslewe, jou huwelik en verhouding met jou kinders, jou finansies en jou werk. Dink jy jy beweeg op al hierdie terreine in die regte rigting, die een wat God vir jou beplan het … die een wat jou by die ideale eindbestemming gaan uitbring? Of het dit dalk tyd geword om op een van hierdie terreine ernstig van rigting te verander? Het dit dalk tyd geword om radikale veranderinge in jou lewe aan te bring of dalk net ietwat van koers te verander?

Wanneer jy besef dat jy iewers in jou lewe van koers af is, is dit dalk die Gees wat jou onrustig maak juis omdat God vir jou iets beters beplan. Wil jy Hom nie maar volg nie?

Gees van God, ek wil hoor wat U sê en volg waar U lei. Help my asseblief.

Net soos jy is – uitgegee deur CUM

Bron:ekerk.org

Die algemeenste vraag op almal se lippe is deesdae sekerlik: “Is daar ’n toekoms in Suid-Afrika?” Elke Suid-Afrikaner, ongeag ras of geloof, voel dieselfde. Gaan dinge ooit weer herstel in hierdie land van “melk en heuning”?

Wat is jou toekomsverwagting?

In hierdie onseker tye waar ons meer as ooit bewus is van die daaglikse bombardering met negatiewe media-inligting, wat stadig maar seker beslis ’n uitwerking op die pu-bliek se denkwyse en toekomsverwagting het, ervaar ons dat die opsies vir ons kinders stadig maar seker al hoe minder word.

Suid-Afrika, die land waarop elke jong mens trots was, die land waar ons ons kinders ’n erfenis en nalatenskap wil agterlaat, word meteens ’n vaal woestyn, waar elke inwoner deesdae op oorlewing fokus en daar eerder na oorsese lande gekyk word om jou kleinkinders ’n “veilige” toekoms te waarborg. 

Is daar ’n toekoms in die land?

My antwoord: Ja! Die rede daarvoor, omdat niks vir God onmoontlik is nie. Ek glo in die land se mense, en baie persepsies en negatiewe gesprekke is besig om die beloofde land in ’n woestyn te verander.

Op hulle knieë voor God

Ek het op die platteland grootgeword waar my ouers sendelinge was. Daar het ek te doen gekry met ander kultuurgroepe, met hulle eie wêreldbeskouings en gewoontes. Daar het ek ook die mees opregte, toegewyde kinders van God aangetref – arm mense wat met dankbaarheid daagliks vir skoene en brood gebid het. Mense wat op hulle knieë God ge-smeek het vir geregtigheid en regverdigheid in die land. God het hulle gebede gehoor en aan hulle vryheid en vrede gegee.

Waar het die droom skeefgeloop?

Ons land is daarna deur die wêreld geloof en geprys as die toonbeeld van sukses en dat God met Suid-Afrika se wonderwerk die “onmoontlike” kan doen; skielik het die kinders in ons land weer gedroom van ’n toekoms in die reënboognasie! Waar het die reënboog-droom dan skeefgeloop?

My ouers het my geleer dat alles geestelik is en dat God ’n plan met Sy kinders het, maar dat die mens se keuses sy eie ondergang kan wees. As jy God langs die pad vergeet, gaan jou pad sonder God steil en klipperig word. Jy gee satan dan die wettige reg om jou van al God se beloftes oor jou te beroof; die uiteinde van jou keuses sal jou lewe droewig maak.

God kan nie lieg nie; Hy verbind tot Sy Woord. Hy het nét goeie planne vir al Sy kinders wat Hom met oorgawe en in waarheid dien (Jer 29:11). Telkemale sien ons in Sy Woord dat wanneer Sy kinders ongehoorsaam is, dit ly tot die mens se eie ondergang. Ons is dus die produk van ons eie keuses.

Waar begin jou keuses?

Dit begin by jou gedagtes, dit wat jy dink. Jou gedagtes is jou eie vleeswêreld wat om jou sweef en soos ’n mot om ’n kers heeltyd om jou draai. My ma het altyd gesê: “Jy kan nie help dat ’n voël oor jou kop verbyvlieg nie, maar jy kan verseker keer dat hy nie op jou kop nesmaak nie!”

Wat het in ons koppe kom nesmaak?

Rassisme? Haatspraak? ’n Oog vir ’n oog? Ongeregtigheid? Moord? Dit begin altyd by ’n voël wat wil kom nesmaak…ons laat toe dat hierdie gedagtes deur sosiale gesprekke, vrees en ongeloof in ons denke bring, wat dan ons vrede en blydskap steel!

Die Woord leer ons dat vrees nie ’n “gawe” van die Vader is nie, trouens, 2 Timoteus 1:7 leer ons dat “God ons nie ’n gees van vreesagtigheid gegee het nie, maar van krag, liefde en selfbeheersing”.

Krag, liefde en selfbeheersing

Ons is dus in die Gees voorsien van hierdie gawes: krag, liefde en selfbeheersing. Met ander woorde, ons het krág; ons het liéfde; ons is voorsien van sélfbeheersing! 

As ons dan hierdie eienskappe besit, waarom laat ons toe dat braaivleisgesprekke en Facebook-uitlatings op ons koppe nesmaak? ’n Voël wat nesmaak, wil eiers uitbroei en kleintjies grootmaak!

Wat bepaal ons toekoms?

Ons toekoms word nie in parlementsgeboue en deur politici bepaal nie, ons toekoms word deur ons binnekamergebede bepaal. Dit is daar waar God ons in ons opregtheid raaksien en ons gebede verhoor.

Afhanklikheid van God

God het Dawid gesien, waar hy as kind die skape opgepas het en dikwels sy afhanklikheid daar aan God verklaar het. God het Dawid se opregtheid raakgesien en sy profeet Samuel na Dawid se ouerhuis gestuur om hom te beloon en te bevorder vir die afhanklikheid wat hy op sy eie voor God geopenbaar het!

Dawid het die man na God se hart geword, omdat hy nie toegelaat het dat voëls in sy hare nesmaak nie. Hy het as skaapwagter in sy totale afhanklikheid God se vermoëns en krag leer ken. Daarom kon God hom gebruik om Israel van ’n Goliat te verlos wat Sy volk wou vernietig, nadat die Israeliese weermag lam van vrees was omdat hulle toegelaat het dat voëls van ongeloof in hulle koppe kom nesmaak het. Vrees lei tot gedagtes dat God nie oor die vermoë beskik om in te gryp in ’n situasie nie. 

Geloof in aksie

Ek glo dat dit God groot plesier verskaf wanneer ons soos sy geliefde Dawid outoriteit neem, en in die naam van die Here die magtige Goliat verslaan! God wag dat ons beweeg. Om te beweeg in Sy naam, is geloof in aksie. Dit gaan dan oor Hom, dit is Hy wat die oorwinning en eer sal kry, want Hy is teen ongeregtigheid.

Ek glo dat God besig is om vir ons ’n tafel voor ons teenstanders voor te berei. Hy wag net om te sien wie die moed en durf sal hê om hierdie geveg in Sy naam te verklaar, en die res gaan geskiedenis wees. Is daar ’n toekoms in Suid-Afrika?

Ja, verseker! Want Jesus het klaar die oorwinning op die Kruis behaal. Dit is volbring… vir jou en vir my.

Viva Suid-Afrika, Viva Jesus Christus!

Bron:juig.co.za

Ek het in hierdie tyd ontdek dat beproewing ’n seën kan wees. Hoe absurd dit ookal mag klink!

Niemand hou tog van pyn nie.

Maar, dink ’n bietjie hieroor: Om jou liggaam en spiere in ’n goeie fisieke toestand te kry, moet jy oefen en soms is die oefeninge maar pynlik. Hoe meer jy jou spiere oefen, hoe sterker word hulle. Dit is ook hoe jou geloof groei. As jy met pyn en lyding te doen kry, kan jou geloof groei en sterker word. In moeilike tye leer ’n mens om op God staat te maak en op Hom te vertrou. Alleen kan jy nie deur moeilike tye kom nie.

Met jou hand styf in God s’n, kan jy selfs in moeilike tye ’n loflied sing, soos Habbakuk: “Tog, ten spyte van alles, sal ek my verbly in die Here… Hy maak my voete soos die van ’n ribbok, op hoë plekke laat hy my veilig loop.”

Bron:  ekerk.org
NGVishoek: Ds. ( dominee ) Martin Barnard.

Die siek humor is onstellend
Die grappe en siek humor wat oor hierdie saak vertel word, ontstel my. Ons praat van iemand se lewe wat kortgeknip is, van twee families wat verwoes is. Hoe kan enigeen hierdie tragiese situasie snaaks vind? Dit is nie skynlewens in ’n TV-vervolgverhaal nie. Dit behels ware, lewende mense wat die diepste skok en droefheid beleef. 
Ek dink dit getuig van die uiterste gevoelloosheid om hiermee die gek te skeer en die aangeklaagde oor so ’n hartverskeurende voorval te bespot. Ek glo dat Oscar die waarheid praat, nietemin is elkeen geregtig op sy opinie.

Bewyse ter verdediging
Ek glo dat die atleet hom werklik ernstig oor sy eie veiligheid bekommer het. Dit verbaas glad nie, gegewe Suid-Afrika se skrikwekkende misdaad- en geweldstatistieke. Hy het snags met ’n pistool langs sy bed gaan slaap; ’n masjiengeweer teen die muur en ’n krieketkolf byderhand. Daar bestaan geen twyfel dat hy in ’n groot mate besorg oor veiligheid en sekuriteit was nie…
Dit is nie ’n onredelike vermoede dat Oscar se eie agtergrond en gestremdheid as ’n seuntjie sonder bene hom vatbaar gemaak het vir beduidende gevoelens van minderwaardigheid nie. Kinders kan uiters ongevoelig wees met hulle opmerkings en houding teenoor kinders met gestremdhede. Gestroop van sy kunsbene voel Oscar waarskynlik geheel en al kwesbaar. Toe hy dus in die middel van die nag wakker skrik en geluide hoor, was sy eerste reaksie om homself te verdedig. Hy het sy geweer, wat hom gelykwaardig laat voel aan diegene sonder gebreke, gegryp. 
Ek dink dat die aanklaer die perke oorskry het met sy hardhandige kruisverhoor van Oscar. Hy mag dalk hiermee gepoog het om Oscar te breek en sodoende ’n bekentenis te verkry, maar met die hardhandige ondervraging kon die aanklaer juis simpatie van die regter ontlok eerder as om sy saak vir skuldigbevinding te bevorder.
Wat van die skynbare teenstrydighede in Oscar se getuienis? Ek is seker dat dit moeilik vir Oscar was om helder te dink en ’n presiese weergawe van die gebeure te gee, gegewe die spanning en uiterste emosie van die situasie.

Buite gegronde twyfel?
Is daar genoegsame bewyse om ‘buite gegronde twyfel’ te toon dat Oscar ’n moordenaar is? Ek dink nie so nie. Daar is slegs een ooggetuie. Net Oscar weet of daar in der waarheid ’n argument plaasgevind het en of hy Reeva Steenkamp opsetlik geskiet het of nie.
Is Oscar dus ’n moordenaar? As dit voorbedagte moord was, sou dit sekerlik meer subtiel beplan en uitgevoer gewees het. As dit ’n geval van ’n argument tussen minnaars met ’n gepaardgaande woede-uitbarsting was, sou geen nugterdenkende mens wat by sy volle verstand is, sy hele lewe, loopbaan en reputasie met een sinnelose daad oorboord gooi nie.
Ek glo dat Oscar die waarheid praat; maar selfs al word die paralimpiese kampioen geheel en al onskuldig bevind, is sy lewe verwoes. Sy reputasie is heeltemal daarmee heen. Hy kan nooit weer ’n ikoon van deursettingsvermoë en persoonlike vasberadenheid en sukses wees nie. Hy het die geleentheid vir winsgewende borgskappe verloor. Geen belangrike borge sal hulle met so ’n gevalle ikoon wil assosieer nie.

Ons houding teenoor die saak
Wat moet die Christen se houding teenoor Oscar wees? Of hy skuldig of onskuldig bevind word, sal hy ’n toestorting van gebede vir innerlike vrede en krag benodig. Hy sal waarskynlik toenemend ’n geïsoleerde persoon word.
Is daar enige toekoms vir Oscar? Kan ons enige woorde van hoop uit die Woord of die Christen-geskiedenis vind? Is daar enige voorbeelde van diegene wat uit die dieptes van vernedering en wanhoop geklim het tot by ’n plek van seën voorspoed?
Die vanselfsprekende voorbeeld [van ’n lewe wat oënskynlik verwoes was en toe tog gered is] is Josef, wat deur sy hartelose broers in slawerny verkoop is en toe as ’n onskuldige slagoffer in die tronk gegooi is. God het Josef se lewe omgekeer en hom een van die invloed-rykste manne in Egipte gemaak. 

’n Bybelse perspektief
Die Skrif verseker ons dat niemand buite die God se genade geval het nie, omdat “Hy ook volkome red …” Heb 7:25. 
As inderdaad bewys word dat Oscar werklik ’n moordenaar is, moet ons onthou dat God se dienskneg, koning Dawid, ’n moordenaar was en tog beskryf die Bybel hom as ’n “man na [God se] hart “. Omdat Dawid werklik berou gehad het, kon hy steeds die vriendskap en guns van God geniet. 
Die Apostel Paulus het die vervolging en moord van Christene goedgevind voordat hy sy Damaskuspad-ervaring gehad het.
Oscar bely dat hy ’n Christen is; hy het in ’n Christen-huis grootgeword en het Christus as sy Verlosser aangeneem “min of meer voor ek nog kon onthou.” Oscar word ook bygestaan deur ’n hele paar Christene wat volwasse in hulle geloof is; ek is dus seker dat Hy die waarheid van die Woord van God gereeld hoor. 
As hy skuldig bevind word, kan God Oscar steeds in die gevangenis gebruik. Daar is wonderlike verhale hoe God oral in die wêreld in gevangenisse en deur tronkbedienings gewerk het. Daar was al verbasende verhale van ’n ommekeer in die lewens van langtermyngevangenes en mense wat die ergste kriminele dade gepleeg het. Baie van hulle dien Jesus nou en leef lewens wat van die vrug van die Gees getuig. Die Bybel sê: “As ons ons sondes bely – Hy is getrou en regverdig, Hy vergewe ons ons sondes en reinig ons van alles ongeregtigheid.” 1 Joh 1:9.

Reg moet geskied
Daar is vergifnis vir die ergste sondes. As Oscar skuldig is, kan God hom vergewe. Reg moet geskied en die wet moet sy gang gaan. As hy egter onskuldig is en ’n eerlike, tragiese fout begaan het, kan God dit ook in iets positiefs verander en kan Oscar sterker in sy geloof en met ’n baie dieper verhouding met God bo alles uitrys.
Laat ons daarom vir almal wat by hierdie tragedie betrokke is, bid; eerder as om kwaadwillige skinderpraatjies te help versprei. Gebed kan lewe uit die dood voortbring en hoop uit wanhoop. Vanuit ’n menslike oogpunt is die uitvloeisel uiters droewig, wat die hof ook al besluit. Vanuit God se oogpunt is daar hoop en  ’n toekoms, maar God se kinders moet hulle deel doen en bid.

Bron:juig.co.za

NGVishoek: Ds. ( dominee ) Martin Barnard.

Die groot jammerte is dat fisiese honger nie dieselfde is as geestelike honger nie. En die werklikheid is dat ons daagliks met meer geestelik honger mense te doen kry en nie noodwendig dieselfde dringendheid beleef om hulle te help nie. En egte geestelike honger is baie erger as fisiese honger, want dit kan in die uiterste vorm, neerkom om volledig sonder God te lewe. En om sonder God te lewe, is om eintlik “dood’ te wees. Slegs met God is jou lewe, lewe jy werklik.

Maar naas geestelik “dood”-wees, is daar ook ander grade of toestande van geestelike honger: soos om God mis te lewe, veral as daar krisisse in jou lewe is; of om ‘n dieper behoefte aan God te ervaar in jou gewone lewe; of om valslik tevrede te wees met wie God in jou lewe is, dit beteken jy is met minder van Hom in jou tevrede as wat vir jou bedoel is. En so leef baie van ons al te maklik met ‘n geestelike honger wat onnodig is.

Met Jesus in jou hart en in jou lewe, het elke Jesus-mens dan die Lewe – dit is Lewe wat slegs deur Jesus se sterwe en opstanding vir ons moontlik gemaak is. En elkeen wat op hierdie wyse geestelike kos ontvang en so versadig word, kan dit nie vir homself of vir haarself hou nie. Ware Lewe in Christus, is selfloos en wil spontaan en vrywillig gedeel en uitgedeel word.

Jesus het die uitnodiging gerig “Wie na My toe kom, sal nooit weer honger kry nie”. Met Hom in jou as Jesus-mens, word jy self die uitnodiging aan elke geestelik honger mens. Laat jou lewe die brood word wat Lewe beteken vir ander …

Bron:  http://doomcharl.blogspot.com/ NGVishoek: Ds. ( dominee ) Martin Barnard.

Jy hoef NIE God se guns te soek NIE, Hy bederf jou met al sy goedheid onvoorwaardelik, omdat Hy is wie Hy is.

Hoor hoe mooi het Jesus dit self gesê toe Hy nog as mens hier op aarde was: “Strome lewende water sal uit sy binneste vloei. … na die Gees verwys.” (Johannes 7:38-39) Ons as Jesus-mense word vol gemaak met die Gees van God, sodat Hy ons kan gebruik as kanale van oorvloed lewe, die lewe waarna die verlorenes smag. Ons is God se antwoord op elke tekort, elke pyn, elke hartseer – so het Hy besluit om te wys wie Hy regtig is. Hy is besig om die wêreld ‘n beter plek te maak vir elkeen wat vir Hom plek in sy lewe maak. Dit alles gebeur in die Godstad: in ons bekeerde verhouding met Hom, in ons band met die geloofsgemeenskap waarin ons Hom aanbid.

As inwoners van die Godstad deel ons gesamentlik in al die voordele wat dit vir ons bied, want“… dit stroom uit die troon van God en van die Lam uit.” (Openbaring 22:1) Alles wat mooi is, alles wat goed is, alles wat met liefde te doen het, alles wat opbouend en vernuwend is, kom van ons Inwonende-Skepper-Gees-God!

Dit is die maklikste en allerbeste om ‘n inwoner van die Godstad te wees! Geen druk, geen tekort, geen prestasie, geen boosheid, geen ekkigheid vir elke geliefde en elke soekende een van ons.

Kom ons sê net opreg: “1000 dankies, Oorvloed-gewer, vir die verniet-lewe!”

Bron:  http://doomcharl.blogspot.com/ NGVishoek: Ds. ( dominee ) Martin Barnard.

Vestig sekulêre kultuur
Natuurlik is daar niks fout daarmee om te sê: “Gelukkige feesseisoen,” of “feestelike wense” nie. As iemand egter “gelukkige feesseisoen” gebruik omdat hy nie “geseënde Kersfees” wil sê nie, kan ons dit bevraag-teken. “Waarom word die woord Kersfees gesensor?” Een rede aangevoer deur diegene wat die gebruik van die woord wil vermy, is dat dit nie-Christene sal aanstoot gee. Die uitsluiting van Kersfees gaan dan nie werklik daaroor om by ’n meer diverse kultuur aan te pas nie, maar is ’n manier om ’n meer sekulêre kultuur te vestig. 

’n Geestelike stryd
Dikwels word die argumente teen Kersfeesprogramme en -uitstallings in politieke terme geklee, maar die partydigheid teen-oor Kersfees gaan veel dieper. Dit is hoofsaaklik ’n geestelike stryd, nie ’n politieke een nie. Hoe moet Christene reageer op die alomteenwoordige gebruik van “Gelukkige Feesseisoen” en die uitsluiting van Kersfees? Hier is ’n paar voorstelle:

Christelike reaksie
1 Vier Kersfees! Laat die vreugde van die seisoen in jou lewe sigbaar wees. Leer jou gesin wat die betekenis van Jesus se geboorte behels en maak die Kerstradisies betekenisvol in jou huis. 
2 Wens ander ’n geseënde Kersfees toe. Wanneer jy te kampe het met ’n “gelukkige feesseisoen’, wens die persoon ’n geseënde Kersfees toe! Jy sal verbaas wees hoeveel mense soortgelyk antwoord. Selfs as jy weerstand teëkom, moenie toelaat dat dit jou vreugde demp nie.
3 Spreek die waarheid in liefde (Ef 4:15). Die Kersseisoen is ’n wonderlike geleent-heid om Christus se liefde en die Evangelieboodskap te verkondig. 
4 Bid vir diegene in outoritêre posisies 
(1 Tim 2:1-3). Bid vir wysheid. Bid vir herlewing sodat Kersfees deur almal geëer sal word in plaas daarvan om aanstoot te gee. 

Ontneem die gee van geskenke Kersfees van ware betekenis?

Baie mense neem die idee om geskenke tydens Kersfees te gee, terug na die vers in Matteus 2:10-11 wat handel oor die wyse manne wat geskenke aan Jesus gee: “Toe hulle die ster sien, was hulle baie bly. Hulle het in die huis ingegaan en die Kindjie saam met Maria, Sy moeder, gesien en hulle het gekniel en aan Hom hulde bewys. Daarna het hulle hulle reissakke oopgemaak en vir Hom geskenke uitgehaal: goud, wierook en mirre.”

Geleentheid vir die Evangelie
Die Bybel vertel ’n wonderlike verhaal oor die Gawe wat God ons gegee het, Jesus Christus, en ons kan dit as ’n geleentheid gebruik om die Evangelie te verkondig en liefde te bewys. Die gee en ontvang van geskenke kan deel daarvan wees om te vervul wat Paulus oor die gee van gawes te sê gehad het in 2 Korintiërs 8:7-8: “Aangesien julle alles in oorvloed het: geloof, die gawe om julle woord te doen, kennis van God, onbeperkte ywer en ons liefde vir julle, wees dan ook in hierdie liefdeswerk oorvloedig. Ek gee nie ’n opdrag nie, maar ek wys julle op die ywer van ander om daardeur die opregtheid van julle liefde te toets.”

Gee aan ander
Paulus het met die kerke gepraat wat finansiële gawes aan hom gegee het sodat hy met die bediening kon voortgaan. Ons kan dit op ons eie lewens toepas deur aan ander te gee, nie net tydens Kersfees nie, maar deur die hele jaar!

Waarop fokus jy?
Kan die gee van geskenke die fokus van Kersfees word, in plaas van dankbaarheid teenoor die Here vir die gawe van sy Seun (Joh 3:16)? Natuurlik! Beteken dit dat die gee van geskenke noodwendig die ware betekenis van Kersfees sal wegneem? Nee. Nie as ons op die wonderlike gawe van verlossing wat die Here aan ons geskenk het, fokus nie (Jes 9:6). Om aan ander te gee, is ’n natuurlike uitdrukking van daardie dankbaarheid. Die sleutel lê by ons fokus. Is jou fokus op die geskenk, of op die skenker van gawes, ons genadige Hemelse Vader? “Elke goeie gawe en elke volmaakte geskenk kom van Bo.” Jak 1:17.

Is Kersbome en -versierings heidense rituele?

Die moderne gebruik om ’n Kersboom te versier, kom nie van enige heidense gewoonte nie. Daar is geen bewyse van enige heidense godsdiens wat ’n spesiale denneboom vir hulle mid-winterfeeste versier het nie, hoewel die Romeine die wintersonnestilstand met ’n fees, Saturnalia, ter ere van Saturnus, die god van landbou gevier het. 
Hulle het hulle huise met groenigheid en ligte versier en geskenke uitgeruil. In die laat Middeleeue het Duitsers en Skandinawiërs immergroen bome in hulle huise of net buite hulle voordeur geplaas om hulle hoop in die komende lente te toon. 

Eerste Kersboom
Die eerste Kersboom is in die 16de eeuse Duitsland deur Protestante Christene versier. Ons moderne Kersboom het uit hierdie vroeë Duitse tradisies ontwikkel. 

Wat sê die Bybel?
Daar is niks in die Bybel wat Kersbome gebied of verbied nie. Daar word verkeerdelik deur sommige verklaar dat Jeremia 10:1-16 die afkap en versier van bome op dieselfde manier as wat ons dit gedurende Kersfees doen, verbied. Selfs met ’n vlugtige deurlees van die teks is dit egter duidelik dat Jeremia in dié gedeelte die verbod op die maak van vergulde of versilwerde houtafgode uitlê. 
’n Soortgelyke teks verskyn in Jesaja 44 waar Jesaja praat oor die dwaasheid van die afgodedienaars wat ’n boom afkap, ’n gedeelte daarvan verbrand om hulleself warm te hou en die ander deel gebruik om ’n afgod te maak waarvoor hulle dan neerbuig en dit aanbid. 

Behaag die Here
Tensy ons dus voor ons Kersboom neerbuig, ’n afgod daaruit kerf en dit aanbid, is hierdie teksgedeeltes nie van toepassing op Kersbome nie.
Daar is geen geestelike betekenis daarin om ’n Kersboom te hê of nie. Watter keuse ons ook al maak, die motivering, soos in alle gewetensake, moet wees om die Here te behaag. Romeine 14:5-6 spel die beginsel uit in ’n teksgedeelte oor vryheid: “Vir die een is een dag belangriker as ander dae; vir ’n ander is alle dae ewe belangrik. Elkeen moet net in sy eie gemoed oortuig wees van sy opvatting. Die een wat ’n bepaalde dag op ’n besondere wyse hou, doen dit tot eer van die Here.” 

Geestelike hoogmoed
Die Here is bedroef wanneer Christene op mekaar neersien oor die viering of nie van Kersfees. Dit is geestelike hoogmoed. Wanneer ons voel dat ons ’n hoër geestelikheid bereik het deur iets te doen of nie te doen waaroor die Bybel niks sê nie, misbruik ons ons vryheid in Christus, skep verdeeldheid in Sy Liggaam en doen Hom oneer aan. “Of julle eet en of julle drink of wat julle ook al doen, doen alles tot eer van God.” 1 Kor 10:31.

Wat van Vader Kersfees?
Hoewel Vader Kersfees ’n fiktiewe karakter is, is sy ontstaan deels gebaseer op ’n beroemde Christen-man, Sint Nikolaas van Myra wat in die vierde eeu geleef het. Nikolaas se ouers was Christene wat ’n erflating aan hom nagelaat het. Hy het dit aan die armes uitgedeel. Hy het op ’n jong ouderdom ’n priester geword en was bekend vir sy medelye en vrygewigheid. Hy het ’n reputasie daarvoor gehad om anoniem geskenke te gee en hy sou in die nag geldsakke by mense se vensters ingooi, soms deur hulle skoorstene, sodat hy nie gesien sou word nie.

Legende van Sint Nikolaas
Nikolaas het op 6 Desember ongeveer 340 of 350 n. C. gesterf en die dag van sy dood het ’n jaarlikse fees geword waar kinders kos vir Nikolaas en strooi vir sy donkie kon uitsit. Daar word gesê dat die heilige gedurende die nag uit die Hemel sou neerdaal en die geskenkies met speelgoed en geskenke sal vervang – maar net vir die soet seuntjies en dogtertjies. Daar is verskillende variasies van die legende van Sint Nikolaas, maar almal is geïnspireer deur die jolige gewer van geskenke in ’n rooi uitrusting wat ons nou as Vader Kersfees ken.

Onskuldige speletjie?
Baie Christen-ouers wonder of hulle die Kersvaderspeletjie met hulle kinders moet speel. Aan die een kant maak hy Kersfees pret en betowerend, met wonderlike vakansieherinneringe. Aan die ander kant moet die fokus van Kersfees op Jesus Christus wees en hoeveel Hy reeds vir ons gegee het. Dus, is die storie van Kersvader ’n onskuldige byvoegsel tot Kersfees, of is hy ’n onderwerp wat liefs vermy moet word?

Materialisme kan oorskadu
Ouers moet hulle eie oordeel gebruik wanneer hulle besluit of hulle Kersvader by hierdie fees insluit of nie, maar daar is ’n paar dinge om te oorweeg: Kinders wat glo dat die geskenke wat hulle op Kerfees van ’n toweragtige man met onuitputbare bronne ontvang, is minder geneig om wat hulle ontvang het en die opoffering wat hulle ouers moes maak om die geskenke te verskaf, te waardeer. Begerigheid en materialisme kan die feesseisoen, wat oor gee, liefde en aanbidding van God behoort te gaan, oorskadu.  Kinders van ouers wie se finansies knyp, mag voel dat hulle deur Kersvader geïgnoreer word.

Weerhou lippe van leuens
Wat selfs meer kommerwekkend is, is die leuen wat vertel word van Kersvader wat elke jaar deur die skoorsteen kom om hulle geskenke te bring. Ons leef in ’n samele-wing wat glo dat ’n leuen vir die ‘regte’ rede aanvaarbaar is. So lank as dit niemand skade berokken nie, is dit nie ’n probleem nie. Dit is in teenstelling met wat die Bybel sê. “Daar staan geskrywe: ‘As iemand die lewe liefhet en ’n lang lewe begeer om die goeie te geniet, moet hy sy tong weerhou van kwaadpraat en sy lippe van leuens.” 1 Pet 3:10.

Kinders se vertroue
Sommige kinders voel werklik verraai deur hulle ouers wanneer hulle uitvind dat Kersvader nie werklik bestaan nie. Kinders vertrou hulle ouers om die waarheid aan hulle te vertel, en dit is ons verantwoordelikheid om nie hulle vertroue te verbreek nie. As ons dit doen, sal hulle nie die belangriker dinge wat ons hulle vertel, glo nie, soos die waarheid oor Christus vir wie hulle ook nie fisiek kan sien nie.
Dit beteken nie dat ons Kersvader geheel en al uit Kersfees weglaat nie. Kinders kan steeds die Kersvaderspeletjie speel, selfs al weet hulle dit is alles speel-speel. Dit sal hulle nie van die vreugde van die seisoen beroof nie en gee ouers die geleentheid om hulle kinders van die goddelike kwaliteite van die ware Sint Nikolaas te vertel wat sy lewe daaraan gewy het om ander te dien en self ’n lewende voorbeeld van Jesus Christus was.

Is die woord ‘Xmas’ deel van die aanslag op Kersfees?

Daar is baie mense wat die woord ‘Xmas’ as deel van die ‘aanslag op Kersfees’ beskou. Hulle sien dit as ’n openlike poging om Christus uit ‘Christmas’ te neem. Hoewel dit onteenseglik so is dat sommige mense ‘Xmas’ op daardie manier gebruik, het die werklike oorsprong van die woord ‘Xmas’ niks daarmee te make nie.
In Grieks, die oorspronklike taal van die Nuwe Testament, is die woord vir Christus, Χριστός, wat met die Griekse letter begin wat wesenlik dieselfde letter as die Engelse letter X is. ‘Xmas’ was dus oorspronklik bloot ’n afkorting van ‘Christmas’. Dit is nie ’n sameswering om Christus uit ‘Christmas’ te verwyder nie, dit is net ’n afkorting.

Leef liefde van Christus uit
Daar kan egter nie ontken word dat daar ’n neiging is om Christus op ’n manier tog uit Kersfees te verwyder nie. In die nastrewing van verdraagsaamheid, insluiting en politieke korrektheid, poog sommige mense om die Christelike oorsprong van Kersfees te verdoesel – asof ons samelewing se materialisme nie alreeds die betekenis van Kersfees vertroebel nie. Of hulle nou na ‘Xmas’ of die ‘feesseisoen’ verwys, sal sommige nie tevrede wees voordat die feesviering geheel en al sekulêr is nie. In reaksie hierop moet ons die liefde van Christus in woord en daad uitleef eerder as om kwaad te word of oor die gebruik van ‘Xmas’ te kla. 

Die ware betekenis van Kersfees
Die ware betekenis van Kersfees is liefde. Johannes 3:16-17 lui: “God het die wêreld so lief gehad dat Hy Sy enigste Seun gegee het, sodat dié wat in Hom glo, nie verlore sal gaan nie, maar die ewige lewe sal hê. God het nie Sy Seun na die wêreld gestuur om die wêreld te veroordeel nie, maar sodat die wêreld deur Hom gered kan word. “ Die ware betekenis van Kersfees is die viering van hierdie ongelooflike daad van liefde.

Die ware Kersverhaal
Die ware Kersverhaal is die verhaal van God wat ’n mens geword het in die gestalte van Jesus Christus. Hoekom het God dit gedoen? Omdat Hy ons liefhet! Hoekom was Kersfees nodig? Omdat ons ’n Verlosser nodig gehad het! Hoekom het God ons so lief? Omdat Hy liefde is (1 Joh 4:8). Hoekom vier ons elke jaar Kersfees? Uit dankbaarheid vir wat God vir ons gedoen het, ons herdenk Sy geboorte deur geskenke vir mekaar te gee, Hom te aanbid en veral bewus te wees van die armes en behoeftiges.

Vrye Gawe van Liefde
Die ware betekenis van Kersfees is liefde. God het wat Sy eie is, liefgehad en het ’n Weg voorsien – die enigste Weg – sodat ons die ewigheid saam met Hom kan wees. Hy het Sy enigste Seun gegee om ons straf vir ons sondes te dra. Hy het die prys ten volle betaal, en ons is vry van oordeel wanneer ons die vrye Gawe van liefde aanvaar. “Maar God bewys Sy liefde vir ons juis hierin dat Christus vir ons gesterf het toe ons nog sondaars was.” Rom 5:8.

GOTQUESTIONS.ORG is ’n webwerf wat die Liggaam van Christus bedien deur interessante artikels en Bybelse antwoorde op uitdagende vrae te verskaf. Vir meer inligting, besoek www.gotquestions.org

Bron:  heuning.co.za

NGVishoek: Ds. ( dominee ) Martin Barnard.

1. Vind jou roeping
Om jou ‘roeping te vind’ beteken nie om die suksesleer te klim nie. Dit behels om uit te vind wat die unieke bydrae is wat jy kan maak om ander se lewens te verbeter. Dit beteken om te snap hoe jou be-kwaamhede aangewend kan word om jou barmhartigheid op die beste wyse te rig. Hoe ontdek ’n mens jou roeping? Die be-langrikste is om die hart en gedagtes van ’n voorsienige God te soek. Hy is die Een wat die sleutel tot die doel en betekenis van jou lewe het. 
Vra Hom daagliks om Sy hulp om jou weg na sinvolheid te vind. Hiersonder sou die vind van ’n betekenisvolle doel vir my lewe onmoontlik wees. Jy moet jouself toelaat om ’n verreikende visie te hê. 
Moenie beskroomd wees oor die moontlike sin van jou lewe nie: ’n tuis-teskepper behoort nie te dink dat sy maar net ’n tuisteskepper is nie…sy moet haarself beskou as die karaktervormer, opvoeder en versorger in ’n wêreld wat neem sonder om te gee, en ’n voorbeeld van sorg wat verder as net die grense van die gesin strek. 
In jou soeke na jou roeping moet jy seker maak dat dit by jou talente en belangstellings aansluit. Waarom sou God iemand ’n passie vir iets gee waarvoor hy geen vermoë of aanleg het nie? Volg jou belangstelling geesdriftig, ken en ontwikkel jou talente en jy sal jou roeping ontdek.

2. Leer uit jou ondervindings
Ervaring is die beste leermeester. Dit geld vir positiewe sowel as die pynlike ervarings. Die ervarings wat jou geleer het hoe om sukses ten spyte van verskillende uitdagings te behaal, is ’n waardevolle skatkis. Wees ontvanklik vir waardevolle lewenslesse, selfs vanaf onwaarskynlike bronne. In die loop van die jare is ek telkens verras deur wat ek by mense kon leer wat ek onderskat het. Toe ek ’n kind was, het ek praktiese kennis geleer van die mees onopgeleide boswerkers wat in ons gemeenskap gewoon het.

Waardevolle lesse
Om waardevolle lewenslesse te leer, benodig jy goeie mentors. Mentors is daardie mense wie se lewens voorbeelde is hoe om ’n lewensdoel te bereik. My mentors het my onderrig op ’n wyse wat geen boek of klaskamer ooit kon doen nie. Hierdie leerproses verg van jou om die versteekte geleenthede in probleme raak te sien: menslike vooruitgang is die uitvloeisel van struikelblokke wat oorkom is. Die probleme wat jou pad kruis, bring ervarings mee wat jou die nodige lesse en vaardighede leer om ’n betekenisvolle lewensdoel te verwesenlik. Waar het jy jou teen ’n probleem vasgeloop en het jy ’n oplossing daarvoor gevind? Wat het jy geleer en hoe kan jy dit op ’n huidige probleem toepas?
Mislukkings kan ook wonderlike leermeesters wees. Aanvaar mislukkings, maar moet nooit toelaat dat mislukkings ’n pessimis van jou maak nie – as jy glo dat jy gaan misluk voordat jy begin, sál jy heel waarskynlik misluk. Onthou ook om ’n oorspronklike aanslag of nuwe perspektief te gebruik wanneer jy probeer om probleme op te los: sien struikelblokke as ’n geleentheid om kreatiewe oplossings te vind!

3. Kweek gewoontes wat karakter bou
Daar is sekere karaktereienskappe wat noodsaaklik is om ’n ware roeping uit te leef. Ek noem hulle kortliks: Jy moet jou gereeld afsonder en stil wees, want bedrywighede wat jou aandag aflei, sal veroorsaak dat jy jou fokus verloor (Bedaar en erken dat Ek God is. Ps 46:11). Jy moet ook ’n gees van verdraagsaamheid aankweek wat jou in staat sal stel om met ’n wye verskeidenheid mense te kan saamwerk sonder enige polarisasie of om kant te kies. “Die liefde is geduldig, die liefde is vriendelik…is nie liggeraak nie…” 1 Kor 13).

Sien jouself deur God se oë
Dit is ook belangrik dat jy selfvertroue opbou. Selfvertroue wat op rykdom of sosiale status gebaseer is, is ’n wankelrige struktuur wat onverwags inmekaar kan tuimel. Ware selfvertroue word deur iets baie dieper gebou: leer om jouself deur God se oë te sien – as iemand wat vir ’n sinvolle lewe gebore is. Jou lewe is waardevol, want God “[Het] ons as Sy eiendom beseël en die Heilige Gees in ons harte gegee…” 2 Kor 1:22. Nog ’n karaktereienskap wat jy moet aankweek, is integriteit; iemand wie se woord en bedoelings altyd vertrou kan word. Die Deense filosoof, Kierkegaard, het ‘reinheid van hart’ beskryf as: “om na [slegs] een ding te streef”. Integriteit is dus die teenoorgestelde van dubbelhartigheid. Vir ’n mens om te sê dat die doel van sy lewe een ding is en dan vir ander minderwaardige doelstellings te werk, is dubbelhartigheid.
Kweek ’n positiewe gees. Jy moet glo dat jy ’n betekenisvolle verskil deur jou betrokkenheid by ’n verdienstelike saak kan maak. Oorwinning sal kom met ’n nuwe benadering – die houding dat wat onmoontlik blyk te wees, moontlik is! “Alle dinge is moontlik vir die een wat glo.” Mark 9:23. 
Laastens: om die uitsonderlike te vermag, moet jy gewillig wees om meer te doen as wat verwag word. Met ‘uitsonderlik’ bedoel ek nie skitterende prestasies soos om die president van die grootste bank te wees nie. ‘Uitsonderlik’ beteken dat ’n mens verwagtinge oortref deur uit jou pad te gaan om ander te help, toe te rus en raad te gee. Om betekenisvol te leef is nie om skitterend te wees nie: dit behels die raaksien en benutting van geleenthede om medelye te betoon bo en behalwe dit wat verwag word.

4. Ontdek die vreugde van vrygewigheid
Het jy ’n vrygewige gees? Vrygewigheid spruit uit ons dankbaarheid vir die onverdiende goeie wat ons ontvang het. Ek het gevind dat die volgende vyf stappe ’n vrygewige gees aankweek: 
Eerstens: gee terug aan diegene van wie jy ontvang het. Wie is diegene wat oor jou pad gekom het? Hoe gee jy nou aan hulle terug? Soveel vreugde spruit uit vrygewigheid!

Om goeie gewoontes aan te kweek
Tweedens moet jy die gewoonte van vrygewigheid aankweek. ’n Groot deel van jou lewe word deur gewoontes beheer. Gewoontes is herhaalde gedragspatrone – dit is innerlik geprogrammeerde handelinge. Vrygewigheid is ’n karaktereienskap wat deur gewoonte versterk word. Hoe meer dikwels ons vrygewig is, hoe dieper word die eienskap in ons vasgelê. Welwillendheid is ’n gewoonte wat onmeetlik tot die lewens van ander kan bydra.
Derdens moet jy seker maak dat jy jou sukses in ’n wyer wêreld van behoefte deel. Ek is daarvan oortuig dat die kennis en vaardighede wat God aan my geskenk het, beskikbaar gestel moet word aan ander wat ’n behoefte het. Die betekenis van jou lewe word verhoog wanneer ’n groter verskeidenheid mense uit jou sukses voordeel trek. Waarin jy ook al goed doen, deel dit met ’n wyer wêreld en leer ander om dieselfde te doen.
Die vierde stap om ’n vrygewige gees aan te kweek, behels die ontwikkeling van blywende vennootskappe met diegene wat jou visie deel. Die effek binne ’n ware vennootskap is kragtig. Vennootskappe wat vrygewigheid uitbou, is ’n sterk dryfveer vir dit wat goed in die wêreld is. Neem in ag hoe jou bydrae tot die lewens van ander vermenigvuldig kan word deur jou vennootskappe met ander mense. 
Gaan ’n vennootskap aan met diegene wat jou respekteer en saam met wie jou lewensdoelwitte die beste verwesenlik sal word. Maak seker vennootskappe is op gedeelde waardes en waardige doelwitte gegrond.
Laastens moet jy vergifnis beoefen – die vrygewigheid wat genees. Vergifnis is waarskynlik die vrygewigste daad. Ek glo in ’n God wat vergewe en ek is aan die ontvangkant van daardie vergifnis. Dit is vir my moontlik om te vergewe omdat ek bevoorreg is om dit self ook te ontvang. Vra God om jou ’n vergewensgesinde gees te gee.

5. Bou blywende verhoudinge
Die lewe gaan oor verhoudinge. Ons is ’n gemeenskap en ons het mekaar nodig. Ons nabye verhoudings bemoedig en versterk ons. Om blywende verhoudings te bou, moet jy seker maak ’n vriendskap is eg en op beproefde vertroue, respek en integriteit gegrond. 
Maak ook seker dat die vennootskappe wat jy vorm, ’n barmhartige doelwit voor oë het. My medewerkers met betrekking tot sake wat dieper betekenis aan ander mense se lewens gegee het, het beide my leermeesters en vriende geword.
As jy getroud is, koester wie en wat jy het. Belê daarin om jou verhouding intiem en interessant te hou. ’n Huwelik kan so ryk en vervullend wees wanneer ons ten volle daarin belê. As jy nie ’n lewensmaat het nie en jy wil graag een hê, bid ernstig, wag geduldig en wanneer jy tot aksie oorgaan, doen dit beslissend. “Is daar ’n pa onder julle wat as sy seun vir hom ’n vis vra, vir hom ’n slang sal gee in plaas van die vis?“ Luk 11:11.

6. Moenie aftree nie!
’n Betekenisvolle lewe sluit ook die soge-naamde aftreejare in. ’n Beroep eindig, maar ’n roeping nooit nie. Maak die aftreejare die grootste belegging in sinvolheid! Beskou daardie jare as ’n seën met ryke geleent-hede om jou blywendste bydrae te maak.
Dit sal vir jou moontlik wees om jou lewe met ander te deel en om jou bemoediging, wysheid en vrygewigheid sal van onskatbare waarde vir ander wees. Dit maak nie saak hoe oud jy is nie, besluit elke oggend dat jou roeping jou vir die res van jou lewe gaan lei. Sien uit na die res van jou lewe met groot verwagting. 
Glo dat die God wat vir jou voorsien het en jou ’n wonderlike gawe van lewe gegee het, sal voortgaan om jou ’n toekoms binne te lei wat waardig van jou hoogste verwagtinge en hoop is. Vra Hom elke dag om jou te help om ’n betekenis-volle doel vir jou lewe te vind.
Daar is inderdaad meer aan die lewe as net om ’n bestaan te maak. Laat hierdie gebed jou konstant deur die seisoene van die lewe bybly: “ Liewe Vader, help my om te alle tye die beste wat ek kan te doen, met dit wat ek het, waar ek is. Amen.”

JACK C.MCDOWELL het 38 jaar in die Heilsleer diens gedoen. Sedert sy aftrede het hy hom daaraan toegewei om mense te mentor. Hierdie artikel kom uit sy boek, ‘There’s more to Life Than Making a Living’.

BronL  juig.co.za

NGVishoek: Ds. ( dominee ) Martin Barnard.

Dis daardie gebreide blokkie wat my bybly.  Aanvanklik het ons gebid vir 33 komberse sodat elke behoeftige bejaarde in die ouetehuis een kon kry. Ons het die voorreg gehad om ‘n totaal van 124 komberse uit te deel. Dis ‘n somtotaal van 5 208 blokkies! Blokkies wat met liefde aanmekaar gewerk is en so mooi omgehekel is. Maar dit het oor meer gegaan as om net knieë warm te maak. Die boodskap van die kombersies was soveel groter. God het elkeen wat so ‘n kombersie ontvang het so lief, dat Hy mense van reg oor die hele land laat blokkies brei het, vir mense wat hulle nie ken nie en nooit sal ontmoet nie. Dis iets tasbaars wat ons saambind as broers en susters in Christus.

Die 5 208 blokkies wat deur honderde mense gebrei is en in sommige gevalle deur ander mense vasgewerk is en deur nogmals ander omgehekel is, is deur die span (wat nie almal veel weet van brei en hekel nie) uitgegee. En dit laat my dink aan Romeine 12: 4-6 “Ons het baie lede in een liggaam, en die lede het nie almal dieselfde funksie nie. Net so is ons, al is ons baie, in Christus een liggaam, en almal afsonderlik lede van mekaar. Ons het genadegawes wat van mekaar verskil volgens die genade wat God aan elkeen van ons gegee het.”

Dit is egter ons verantwoordelikheid om die genadegawes wat ons uit Sy hand ontvang het, aan te wend om ook so ander te help en dus tot verheerliking van God se koningkryk. God het defnitief nie aan ons talente gegee sodat ons dit kan ignoreer nie. Of om Xanthe Galanis se woorde aan te haal: “Jesus het nie opgestaan sodat ons ondergronds moet gaan nie” Nee, ons moet ons liggie laat skyn in hierdie plek-plek donker wêreld.

Daar is min ervarings wat meer bevredigend is as om ‘n Godgegewe taak na die beste van jou vermoë te voltooi en volgens oom Solly Ozrovech is daar geen “aftreeplan in die arbeidsveld van God nie”.  Ons moet bewus bly van waar God aan die werk is sodat ons daar kan aansluit en aanmeld vir ons volgende Godopgelegde takie.

Kom, gemeente van Christus, laat ons nie net een keer ‘n jaar Uitreik nie, maar sommer elke dag.

Baie seën vir die maand wat voorlê.

Laat dit Juig,

Heidi NGVishoek: Ds. ( dominee ) Martin Barnard.