DIE FEITE (aangehaal uit: JY KAN ’N VERSKIL MAAK: Stephan Joubert, CUM BOEKE, 2014):
Volgens ‘n artikel deur Paul Vitello in 2010 in The New York Times getiteld: “Taking a Break From the Lord’s Work” is uitbranding onder leraars tans aan die orde van die dag. Hy begin sy artikel met die woorde: “Members of the clergy now suffer from obesity, hypertension and depression at rates higher than most Americans. In the last decade, their use of antidepressants has risen, while their life expectancy has fallen. Many would change jobs if they could.”
Die Amerikaanse webblad PastorBurnout.com haal statistiek aan wat bevind 13% van aktiewe leraars is geskei; 33% leraars brand uit binne die eerste vyf jaar in die bediening en meen hulle bediening is ongesond vir hulle familieverhoudings; 40% van alle leraars, en 47% van hulle eggenotes ly aan uitbranding vanweë onrealistiese verwagtinge van hulle werk en oorlading; 50% leraars voel hulle is onbekwaam vir die eise van hulle werk; 56% leraars se vrouens sê hulle het geen goeie vriende nie; 57% leraars sou dadelik ‘n ander beroep beoefen indien hulle een kry; 75% beleef ernstige stres wat ly tot woede, angs, depressie en vervreemding.
DIE VRAAG:
Hoe is al hierdie dinge moontlik? Wel, dit gebeur omdat mense op soek is na “herders wat altyd vir en in die gemeente beskikbaar is en dien” soos wat ek onlangs in ‘n kerklike advertensie vir ‘n leraarspos raakgelees het. Mense soek leraars wat min of meer alles kan doen omdat hulle hiervoor betaal word. Hulle moet kan bid, preek, praat, troos, raas, bemoedig, vrede maak, probleme uitsorteer, sondaars bekeer, gelowiges opbou, huisbesoek doen, huwelike red, jongmense verstaan, oumense versorg, dooies begrawe, troues hou, vergaderings lei, kommissies bestuur… o ja, en dan moet hulle ook nog ure aan gebed en studie van die Woord wy.
Helaas maak onrealistiese verwagtings dat baie leraars in “geestelike skakelbeamptes” verander wat almal ter wille moet wees. Tog ken die Nuwe Testament nie “professionele geestelikes” wat alles vir almal moet wees nie. Die kerk is die lewende liggaam van Christus. Gelowiges vervul hier sekere funksies volgens die gawes wat die Here vir hulle elkeen gegee het. Geestelike leiers se rol is slegs om gelowiges toe te rus om hul plekke vol te staan vir die Here; nie om alles self te doen nie.
Kom ons staan elkeen ons plekkie in God se koninkryk en kerk vol. Dan verdwyn die rook van uitbranding soos mis voor die son!
Bron: ekerk.org
Ek het baie gewonder, hoe is dit dan dat ons dikwels (veral in die Ou Testament) rykdom as God se seën sien, maar Jesus spreek hom so uit teenoor rykdom. Ek glo nie per definisie dat dit vir Jesus gegaan het oor rykdom as sulks nie, maar materialisme en gierigheid. As ons in hierdie konteks daarna kyk, dan is daar skrikwekkend baie waarskuwings daarteen. Ons hoef nie net na die Bybel te kyk om die resultaat van materialisme te sien nie. Dit lê oral om ons. Hoekom waarsku Jesus so ernstig oor geld, goeters, besittings?
Hy gaan eintlik sovêr om dit af te speel teenoor die ewige lewe! Jak 4 : 1 – 3 Waar kom die stryd vandaan, waar kom die rusies onder julle vandaan? Kom dit nie van julle selfsugtige begeertes wat gedurig binne-in julle woed nie? 2 Julle wil dinge hê, maar kry dit nie en wil dan moord pleeg; julle is jaloers op ‘n ander man se goed en kan dit nie in die hande kry nie en dan maak julle rusie en baklei julle. Julle kry nie, omdat julle nie bid nie. 3 As julle bid, ontvang julle nie, omdat julle verkeerd bid: julle wil net julle selfsugtige begeertes bevredig. Ek dink Jakobus slaan die spyker op die kop. Julle wil dinge hê en kry dit nie, dan wil julle moord pleeg.
Ek wonder as ons statistiek sou sien oor die persentasie van misdade wat gepleeg word oor die materiële, wat dit sou wees. Diefstal, bedrog, witboordjie misdade, geldwassery – so kan ons opnoem. Dit is alles misdade wat spruit uit die mens se siek begeerte na meer en beter.
Dit lyk inderdaad of ons ‘n groot probleem in ons samelewing het hiermee. Wat is rykdom? Iemand sê: “dis dit wat jy het wat meer is as wat jy absoluut nodig het om van te lewe”. ‘n Ander som dit so op: “Die rykste persoon tussen enige twee mense, is die een wat die meeste gedoen kry met wat hy het”. Die meeste van ons is inderdaad (relatief gesproke) nogal redelik welaf, want daar is altyd iemand armer as jy. Hoekom is dit dan dat ons nooit genoeg kry nie? Ek lees ‘n boekie oor geld wat begin deur te sê: almal van ons het gemiddeld 10% te min. Iemand spog daarmee dat die eerste R74000 per maand net gate toestop – hy het ook te min. Ek het nou die dag ’n baie welaf persoon hoor sê: “Ek weet nie wat jy besit nie, of hoe dit met jou geldsake gaan nie, wees tevrede met wat jy het. Ek het gesien dat die rykstes nie een genoeg nie en jaag na nog meer”. Joh 10 : 10:- “Ek het gekom sodat hulle die lewe kan hê, en dit in oorvloed”. Hoekom koppel ons geld en goed aan die oorvloed wat in hierdie teks genoem word? Wat van oorvloed gesondheid, oorvloed wysheid, insig, liefde, vreugde, vrede, geluk, respek? Dis tog seker baie meer werd as besittings? Pred 5 : 9 waarsku:- “Die mens vir wie geld alles is, het nooit genoeg geld nie; die mens vir wie rykdom alles is, kry nooit genoeg nie”. Jy kan baie gou agterkom as ‘n persoon hieraan ly – dis al waaroor hy praat. Praat sommer maklik uit sy beursie uit. Wat is Jesus se teenvoeter?
Openb 3 : 17 – 19 Julle sê: Ons is ryk, skatryk, en ons het niks meer nodig nie, en julle weet nie dat julle ellendig en beklaenswaardig is nie, arm, blind en kaal. 18 Daarom raai Ek julle aan om by My goud te koop wat deur vuur gelouter is, sodat julle ryk kan word; en koop wit klere, sodat julle julle kan aantrek en julle skande, julle naaktheid, nie gesien word nie; en koop oogsalf om aan julle oë te smeer, sodat julle kan sien. 19 Ek bestraf en tug elkeen wat Ek liefhet. Laat dit dan vir julle erns wees en bekeer julle. Ons is ryk, skatryk. Matt 6 : 19 – 20 Moenie vir julle skatte op aarde bymekaarmaak waar mot en roes dit verniel en waar diewe inbreek en dit steel nie. 20 Maak vir julle skatte in die hemel bymekaar, waar mot en roes dit nie verniel nie en waar diewe nie inbreek en dit steel nie.
Vers 21: “Waar jou skat is, daar sal jou hart ook wees”. Hoe leef ons met wat ons het?
Leef só dat jy iets het om vir armes te gee. Mal 3: “Bring die volle tiende” – daar word gesê wat met 10% moet gebeur, maar nie met die ander 90% nie. Daarvoor vra die Here vir ons rentmeesterskap. Materialisme het ‘n prys, soms ‘n baie duur prys. Duur motors wat ons soms net ‘n half uur per dag gebruik, ‘n deftige huis, maar ons moet sulke lang ure werk om dit te betaal, dat daar geen tyd oor is om dit te geniet nie. Is dit nie maar deel van die probleem in ons samelewing vandag nie? Pa (en ma) werk so hard om bo uit te kom, dat ons ons gesinne vernietig, en nie ouers vir ons kinders is nie. Ons geniet nie ons kinders nie, gee geen tyd vir hulle nie. Wat doen ons dan? Ons “flood” hulle met geld, wat dan nog meer probleme bring en berei hulle voor vir ‘n volgende generasie met materialistiese probleme.
Wat is genoeg? Spr 30 : 8 – 9 moenie toelaat dat ek vals is en lieg nie; moet my nie arm maak of ryk nie, gee my net die kos wat ek nodig het, 9 sodat ek nie te veel het en U verloën en sê: Wie is die Here? nie, en sodat ek nie arm word en steel en my God se Naam oneer aandoen nie. Kom ons tel ons seëninge en ons bid dat die Here vir ons balans en tevredenheid sal leer.
Bron: heuning.co.za
- Ek leef egte genade alleen raak wanneer my alledaagse bestaan gelewe word in die permanente teenwoordigheid van God. Solank as wat ek net bid vir my eie behoeftes en wanneer my gebede meeste van die tyd net met alledaagse dinge te doen het, mis ek God se doel in my.
- Alle geestelike verryking wat ek kan bekom deur Bybel te lees, ander Gees-geïnspireerde literatuur deur te werk, aan opbouende geloofsgesprekke deel te neem en enige blootstelling aan “geestelike kos” – vir wie of wat doen ek dit? Vir myself? Of vir wie God in my is? Daar is ‘n lewensbelangrike verskil!
- Hoekom gaan ek kerk toe? Hoekom gee ek geld vir armes? Hoekom breek dit my hart as ander swaar kry? Hoekom wil ek vir ander raad gee wat uit my ervaringe baat kan vind? Is hierdie alles “goeie werke” wat ek onbewustelik nastreef om my posisie teenoor God te verbeter? Egte genade ontvang ek sonder enige bydrae of opoffering van my kant af!
- Egte genade het volgens bogenoemde definisie te doen met God se einddoel van my lewe – wat is God se droom met my lewe op aarde? Daarom het egte genade te doen met die manier waarop God met my op pad is na sy doel met my.
- Die “hoe ontvang ek”, het dus 100% te doen met wat God besig is om te doen op sý werkswyse en sý tyd en sý doel. Maar tog het ek ‘n keuse om saam te werk of nie, solank my vrywillige samewerking nie daarop neerkom dat ek dit vir my eie krediet neem nie.
- Eintlik ontvang ek egte genade onverwags, onverdiend en onvoorspelbaar.
- Egte genade ontvang ek in presies die regte “hoeveelheid’ wat ek kan hanteer op enige stadium van my lewe. Omdat dit God alleen is wat dit gee, gee Hy in volmaakte mates vir die groei na volmaaktheid.
Bron: http://doomcharl.blogspot.com/
Of dink jy jou siel sal ’n eentonige toneel wees waaroor ander so half verveeld tuur omdat die paar hooplose murasies die verhaal van selfbejammering en moedeloosheid vertel? Wens jy dalk heimlik dat die skilder oornag elke stukkie van jou lewe met sy helder paletkleure kan oorverf?
Die goeie nuus is dat ons wat kinders van God is, die volmaakte Skilder-van-Hoop aan ons kant het! Daarom maak dit nie saak hoe die skilderdoek van ons lewens gister en vandag lyk nie. Hy kán en wil dit in ’n vreugdetoneel verander. Hy wil elke deel van ons lewens elke dag met sy genade núút verf. Hy wil die hartseerprentjies in vreugdetonele omskep; die moedelose vlaktes in hoop; die dorre woestyndele van ons harte wil Hy met sy liefdesreën deurnat en aan die einde van ons lewe … wil Hy ’n multikleurige ewigheidsreënboog skilder. Al wat ek en jy moet doen, is om elke oggend die verfkwas van ons lewens vir God te gee.
Dit maak nie saak hoe jou sielsprentjie vandag lyk nie, jou Vader wil:
-
graag sy vrede soos sagte blou lug in jou hart verf;
-
sy vergifnis soos spierwit bol-wolke oor jou lewe vorm;
-
jou vrouwees met spatsels helder vreugde ophelder; en
-
lieflike skadukolle-van-rus in jou siel bring.
En dan — voordat Hy sy raam-van-genade om jou sit — wil Hy eers sý Naam onderaan aan jou lewe teken om daarmee te sê: Ek het jou gemaak. Jy is myne!
Vertrou God om jou wêreld in ’n kosbare kunswerk te omskep! En onthou, vertroue is, soos Richard Forster skryf, wanneer jy dit kan regkry om te sê: “Ek verstaan nie wat God doen nie, ek weet nie waar God is nie, maar ek weet dat Hy die beste vir my wil.“
Meesterskilder, dankie vir die prentjie van my lewe. Dankie vir elke onvergeetlike toneel- van- vreugde, elke vrede-vervullende oomblik en elke sonsopkoms-van-hoop. Neem my lewe, Heer en laat dit elke dag meer wees soos U vir my begeer.
Uit: Siel van ʼn Vrou, CUM
Bron: ekerk
Die Christelike lewe kan met ons wipplank ry wanneer ons hoop en geloof bots met die harde werklikheid. Wanneer ons gebede nie beantwoord word nie en dit waarop ons so gehoop het nie gebeur nie. Wanneer jy gepleit het vir jou huwelik, die herstel van ’n vriendskap, jou gebrek aan finansies en jou gebed nie beantwoord is nie.
Dis dan wanneer teleurstellings soms te swaar is om te hanteer en ons in moedeloosheid en wanhoop kan verval. Ons kan by vriende ons frustrasie en teleurstelling gaan aflaai en teenoor hulle ontlaai, Maar dit lei selde tot die volkome genesing en heling waarna ons op soek is.
Die Een wat werklik verstaan en wat regtig omgee en weet wat daaromtrent te doen, is God self. In plaas daarvan om snags rond te rol, kan ek eerder opstaan en op ’n stil plek gaan sit met die Bybel op my skoot en met ’n hart wat vra: “Here, ek weet nie meer nie – help asseblief!” Soos wat ek my hart voor Hom uitstort en in sy Woord na antwoorde soek, kom die indrukke van sy antwoord. ’n Goeie plek om te begin, is met Dawid se Psalms, waar hy sy hart voor die Here uitstort, sy klagtes uitspel en sy vertwyfeling openlik erken. Ons hoef God nie te probeer beïndruk met ons “goeie Christenskap” nie; Hy ken ons deur en deur. Hy vra dat ons Hom sal vertrou ten spyte van ons omstandighede en dat ons Sy oordeel sal vertrou al is dit pynlik.
Ons kan met vrymoedigheid ons laste, teleurstellings, emosies en hartseer in gebed na Hom toe neem. Hy luister, Hy verstaan. Hy het die mag om ons situasie te verander of om ons te verander in die situasie. Hy het al die feite voor Hom en ken volmaak. Wanneer ons dan na vriende gaan om te help dra aan ons las, is die sirkel van ondersteuning en heling voltooi.
Dan kan ek ’n wilsbesluit maak om te fokus op al die seëninge en voorregte in my lewe. Indien nodig, moet ek die persoon wat my teleurgestel het vergewe. Dit mag aanvanklik moeilik wees maar ek sal ’n voller lewe hê en sonder die las van swaar bagasie wat ek moet saamdra.
“Our heavenly Father understands our disappointment, suffering, pain, fear, and doubt. He is always there to encourage our hearts and help us understand that He’s sufficient for all of our needs. When I accepted this as an absolute truth in my life, I found that my worrying stopped.” — Charles Stanley
Bron: ekerk.org
Almal van ons hou op een of ander manier van goeie nuus, in die slegte dinge wat ons hoor en belewe. In tye waarin ons oordonder word deur slegte berigte en baie negatiwiteit, smag ons na enige moontlike opbouende boodskap. En as Jesus-mense wil ons mekaar moed inpraat en wil ons die positiewe invloed wees, ja, die lig in ons donker wêreld wees.
Maar selfs in die gevestigde kerk, het ons nie oor die jare daarin geslaag om goeie nuus in slegte tye op die regte manier oor te dra nie. Daar is te veel verskille binne die kerk oor so baie standpunte. Daar is so min liefde tussen kerkmense self. Die kerk is so veroordelend in die boodskappe oor die sonde en die wandade van die mensdom. Daar is heeltemal te veel skuldgevoelens en te veel wette wat oortree word. So baie kere stel ons mekaar teleur en maak ons mekaar selfs seer deur ons woorde en dade. Iets kort steeds baie drasties vir ons as Jesus-mense!
Jesus-mense lief genade!!!
Ja, ons en alle ander mense, smag eintlik na genade! Maar wat is genade presies? Is dit nie net nog ‘n “kerk-woord” wat dogma en teorie bly nie? Hoekom ervaar ons so min genade, selfs binne die kerk, of selfs onderling tussen Jesus-mense?
Genade het volledig te doen met die goeie nuus, wat God aan ons bewys het met Jesus se volmaakte en liefdevolle verlossingsdaad aan die kruis. Hierdie goeie nuus van genade, het ‘n rykdom van fasette om raak te lewe. Die grootste en belangrikste waarheid rakende genade, is dat God die ware Gewer en Bewerker van suiwer en oorvloedige genade is! Hierdie God-gegewe-genade het geen grense in terme van hoeveelheid nie – daar is onberekenbaar baie by God self te kry. Hierdie God-gedrewe-genade is vir alle mense op aarde bedoel, ongeag wie of wat jy is, of hoe goed of sleg jy is!
Leef God se genade raak in jou lewe – dis grensloos!
Bron: http://doomcharl.blogspot.com/
In die aanloop tot Valentynsdag is die winkels gewoonlik propvol I-love-you-kaartjies, hartjie-koffiebekers, rooi hartsjokolades en rakke vol teddiebere wat jou wil verseker “dat hulle lief is vir jou“. En ja, soms wil ons mos vir iemand tasbaar wys en sê dat hy of sy vir ons spesiaal is. Maar nou weet ons ook dat liefde allermins uit ’n eenmaal-per-jaar-pakkie opgemaak kan word. Goddelike liefde, lees ons in die Woord, is iets baie dieper, groter en heiliger as woorde: Dis om so naby aan God te leef dat daar iets van sy ontsagwekkende liefde deur jou lewe wys. Hoor hoe duidelik stel Johannes dit: God is liefde. As daar dus liefde uit jou lewe straal, vertel dit hoe naby jy aan God leef. (1 Johannes 4:16b)
Hoe kan ek en jy God se liefde in hierdie wêreld prakties en sigbaar leef?
-
Ons kan sorg dat die Gees ons elke dag van voor af met sy liefdevolle goedheid vul. Só sal ander iets van die liefde van Christus in ons lewens sien, hoor en voel.
-
Ons kan liefhê deur getrou vir ander te bid: In stilte of saam met ander. Die Gees het ’n manier om mense se harte deur gebed vir ewig te verander!
-
Ons kan “ek-het-jou-lief” sê deur eenvoudige woorde soos: “Kan ek jou help?”, “Dankie”, “Jy is vir my spesiaal” en “Ek waardeer jou”.
-
Ons kan ons liefde wys deur vir ander op te offer, ’n bederf-iets te doen, vriendelikheid en warmte uit te straal en ons deernis en omgee uit te deel.
-
Ons kan vir die wêreld vertel hoe groot ons God van liefde is en sy verlossingsliefde mildelik aan hulle uitdeel.
Phil Bosmans skryf: Moenie jou liefde in die weegskaal plaas nie. Moenie meet hoe breed en hoe lank dit is nie. Liefde wat geweeg en gemeet word, is nie liefde nie, maar berekening. Laat jou liefde spontaan wees, sonder enige bybedoelings, oorspronklik en eg, dan kom daar vreugde oor jou; dan word dit warm om jou hart; dan is jy gelukkig en kan jy sing en dans.
Leef elke dag God se liefde: Dié liefde wat onvoorwaardelik, vergewensgesind en oorvloedig is. Só deel jy heeljaar pakkies vol lewensvreugde aan ander uit.
Here, leer my om liefde te dink, te doen en te praat. Leer my om iets van u ontsagwekkende liefde op hierdie aarde uit te leef. Leer my om U só lief te hê dat ander U in my kan sien.
Uit: Siel van ’n Vrou, CUM
Bron:ekerk.org
“As jy vir my bid, sal ek opstaan en leef,” was Fred se antwoord hierop. En dit is presies wat gebeur het. Hy is onmiddellik genees en is van toe af met ’n lewenslange begeerte in sy hart vervul om God se genesing met die wêreld te deel. Hy het wêreldwyd getoer en vir die siekes gebid; honderdduisende mense is genees.
’n Bediening van genesing
Toe hy in Januarie 1958 diep in die tagtig oorlede is, was meer as 225 000 getuienisse sprekend van die doeltreffendheid van Bosworth se bediening. FF. Bosworth was oortuig dat die Kerk die genesende aspek van die Evangelie as ’n geskenk ontvang het as die belangrikste evangelisasie-hulpmiddel en hy het werk daarvan gemaak om met hierdie kragtige hulpmiddel duisende manne, vroue en kinders vir die koninkryk van God te wen. Hy het daarop aangedring dat die boek Handelinge nie net bloot ’n historiese verslag is nie en dat die boek sy regmatige plek as ’n model vir die moderne Kerk moet inneem.
Om te weet wat God se wil is
Bosworth het aan die siekes wat genees wou word, beklemtoon hoe belangrik dit is om te weet wat God se wil rakende genesing is. Jou toepassing van jou geloof sal nooit jou kennis van die geopenbaarde wil van God kan oortref nie en elke gelowige moet hom- of haarself voorneem om die Skrif in hierdie opsig te bestudeer. Bosworth het mense geleer dat dit die absolute wil van God is om die liggaam sowel as die siel te genees en dat die Versoening van Christus vir die ‘hele mens’ is.
Volgens Bosworth het Spreuke 4:20-22 die omvattendste voorskrifte hoe om genesing te ontvang: Eerstens moet daar ’n oor wees wat na God luister: “Luister goed na my woorde.” Daar moet ’n standvastige uitsig wees: “Laat hulle nie wyk uit jou oë nie,” en derdens moet daar ’n ontvanklike hart wees: “Bewaar hulle binne-in jou hart.”
Ons moet ons ore tot die geskrewe beloftes van God “neig” en ons moet die Skrif ywerig ondersoek vir God se geopenbaarde wil. Ons gedagtes moet onwrikbaar op hierdie beloftes gefokus wees en nooit op ons simptome nie. Wanneer ons die Woord ontvang en daarvolgens handel, lewer dit resultate op. Ons moet daarom ontvanklik vir God se beloftes wees en dit toe-eien. “Jou simptome mag op die dood dui,” skryf Bosworth, “maar God se Woord wys op die lewe, en jy kan nie terselfdertyd in twee teenoorgestelde rigtings kyk nie.”
Die bediening van Jesus
Romeine 5:12 sê “die sonde [het] in die wêreld gekom en deur die sonde die dood.” Aangesien siekte deur sonde toegang verkry het, moet die ware geneesmiddel in die verlossende werk van Christus gevind word.
Christus genees Petrus se skoonma en talle ander mense in vervulling van die profesie van Jesaja 53:3-6, wat dit duidelik stel dat Hy vir ons sondes en ons siektes gesterf het (Matteus 8:14-17). Daar bestaan geen twyfel dat Jesus se bediening een van genesing vir liggaam en siel is nie.
Nog ’n Ou Testamentiese beeld van Christus se verlossing, is die gebeurtenis met die koperslang in Numeri 21. Diegene wat eenvoudig God se belofte geglo en daarop gereageer het, is onmiddellik fisiek en geestelik van hulle rebellie genees.
Een van die verlossende Name van Jehova is ‘Jehova Rapha’ – “Ek is die Here jou Geneesheer” of “Ek is die Here wat genees“.
F.F. Bosworth benadruk dat nie een van die seëninge wat Sy verlossende Name openbaar, nie op ons era van toepassing is nie. Hy is steeds die Geneser. Jesus het vir ons siektes, pyn, oortredings, verderflikheid, ons vrede en ons genesing gesterf, want “deur Sý wonde het daar vir ons genesing gekom”.
Is genesing vir almal?
Is dit, net soos in die verlede, steeds die wil van God om almal te genees? Ons moet weet wat die wil van God is, die beloftes glo, dit in ons gees ontvang en deur die geloof toe-eien. Sy dood aan die Kruis is voldoende vir al die behoeftes en nood van die mens en daarom het Jesus alle siektes genees toe Hy op aarde was (Matteus 4:23-25).
’n Voorval in Kapernaum, Jesus se
tuisdorp, toon die belang daarvan om God se Woord te ken, te glo en in ons hart te ontvang. Jesus kon nie in Kapernaum wonderwerke doen nie omdat die mense nie God se Woord geglo het nie (Matteus 13:53-38).
Vir baie mense wat liggaamlike genesing wil ontvang, is die grootste struikelblok tot geloof, die onsekerheid in hulle gedagte dat genesing hoegenaamd God se wil vir hulle is. Daar is heelwat leringe in moderne teologie wat mense daarvan weerhou om te weet wat die Bybel duidelik leer – dat genesing vir almal is.
Dit is onmoontlik om deur die geloof vrymoedig op ’n seën aanspraak te maak, as ’n mens nie seker is of God dit werklik aanbied nie. Daar kan slegs aanspraak gemaak word op die krag van God, waar die wil van God bekend is. Bosworth wys daarop dat dit net so geldig is vir diegene wat genesing verlang, as vir diegene wat verlossing ontvang het.
Verheerlik ons siekte God?
Dissiplineer God nie soms Sy kinders deur siekte nie? Beslis, ja, sê F.F. Bosworth. Wanneer ons God nie gehoorsaam nie, kan die Vader deur liefdevolle dissiplinering siekte toelaat. Moderne teologie mag verkondig dat God verkies dat sommige mense tot Sy verheerliking siek moet bly, maar Jesus het dít nooit verkondig nie. Hy het ook nie gehuiwer om almal te genees wat in geloof na Hom toe gekom het nie.
F.F. Bosworth beklemtoon ’n belangrike waarheid – die belang van dít wat ons met ons mond bely. Ons kan nooit bo dit wat ons met ons mond bely, uitstyg nie. Wanneer ons ongeloof en twyfel uitspreek, word ons deur ons eie woorde gevange gehou. “As jy verstrik geraak het deur wat jy gesê het en vasgevang is deur jou eie woorde…” Spreuke 6:2. Die Heilige Gees sê in Spreuke 23:7: “…soos die mens in sy siel bereken, so is hy.” Wat ons in ons harte glo, sal in ons woorde uiting vind. Ons moet die Woord van God sy regmatige plek in ons denke en op ons lippe gee.
Die barmhartigheid van Christus
Die boek beklemtoon ook die barmhartigheid van Jesus. F.F. Bosworth vra die vraag: Het God se barmhartige aard dan verander? Jesus het die menigtes innig jammer gekry toe Hy die nood van die mense om Hom sien; Hy het nie ver-ander nie, Hy is steeds dieselfde. Hy reik steeds vandag na ons toe uit, maar ons moet dit glo en Sy Woord ontvang. Om die verlossende verbondseën van liggaamlike genesing vir jou toe te eien:
1. Weet wat die wil van God is deur Sy Woord te bestudeer, en nie die filosofie van die mens nie
2. Glo die Woord van God. Geloof is die verwagting dat God Sy wil sal uitvoer. Om bloot te hoop is nie geloof nie. Geloof is nie om eers te ‘sien’ voordat jy vertrou en glo nie
3. Maak seker jou verhouding met God is reg. God se beloftes geld slegs vir die gehoorsames
4. Ontvang jou genesing deur die geloof
Wat as die simptome voortduur?
Selfs wanneer ons in geloof reageer, verdwyn siektesimptome nie altyd dadelik nie. Nadat Hiskia genees is, het dit drie dae lank geneem voordat hy sterk genoeg was om na die Huis van die Here te gaan (2 Kon 20). Die koninklike beampte se seun het begin beter word toe die beampte geglo het wat Jesus vir hom gesê het (Joh 4:50-52).
Die voorbeeld van Abraham
Omdat genesing deur die geloof ontvang word, en geloof sonder werke dood is, is dit wanneer ons in geloof begin optree dat God begin genees. Geloof kom voor genesing. ‘In plaas daarvan om na die vader van leuens te luister, laat hom na jou lofprysing luister,’ is die uitdaging van hierdie boek. Kyk maar na Abraham se lewe:
• Hy het bloot die Woord van God geglo. Hy het geloof gehad dat God presies sal doen wat Hy belowe het
• Hy was slegs ten volle deur die Woord van God oortuig
• Hy het standvastig bly vertrou toe sy geloof getoets is
• Hy was op die Woord van God gefokus
• Hy het geweier om sy vertroue prys te gee toe God hom beveel om Isak te offer; ’n opdrag wat oënskynlik die tasbare aansporing tot sy geloof sou verwyder. Onder uiters hopelose omstandighede het hy in sy geloof volhard, deur op die beloftes van God te fokus. Hy kon dit doen omdat hy God wat dit beloof het, getrou geag het. Dieselfde geld ook vir Noag en moet vir ons ook waar wees.
Waarom word party mense nie genees nie
F.F. Bosworth bespreek ’n aantal moontlike redes waarom party mense nie genees word nie. Die algemeenste rede is ons vertroue op ons vyf sintuie, wat ons dubbelhartig maak (Jakobus 1:6,7). Vir die natuurlike mens geld, ‘sien is glo’, terwyl geloof sê, ‘glo is sien’. Niemand wat toelaat dat sy denke deur sy sintuie beheer word, kan oorwinnende geloof hê nie. Die denke wat deur die sinne beheer word, leef in die ryk van onsekerheid. Totdat God se Woord beheer oor ons denke het, sal ons emosies en die dinge wat ons sien en hoor ons beheer, in plaas van die Woord van God. Die regte denke is uiters belangrik.
Ons genesing word dikwels vertraag deur verkeerde lering en dit verg gedissiplineerde studie van die Woord sodat ons oortuig kan wees van wat die wil van God is. Wanneer ons Sy hart verstaan, sal ons die geloof kan beoefen wat die situasie verg.
Die 22 redes wat Bosworth noem, sluit in: onvoldoende lering, die gebrek aan verenigde gebed, gemeenskaplike ongeloof, die tradisies van die mens, verbreking van natuurlike wette, opsetlike sonde, gebrek aan ywer, ’n behoefte aan vergifnis, ongeloof, die nastreef van wonderwerke in plaas van genesing, of gebrek aan vertroue.
Die geheim van oorwinning
Sonder ‘Goddelike openbaring’ is dit onmoontlik om aan iemand te verduidelik waarom sy/ haar gebed vir genesing nie dadelik verhoor word nie. Wat die omstandighede egter ook al is, die goeie nuus is dat ons toegang het tot meer van God se lewe. God self word ons lewe, ons vreugde, ons regverdigheid, ons reinheid, ons krag en ons gesondheid deur ons met Sy eie lewe te vul.
Hoe jy jou geloof bou:
• Bely eers God se Woord in jou hart
• Bely dit hardop in jou binnekamer
• Herhaal dit aanhoudend
• Sê dit totdat jou gees en jou woorde in oor-eenstemming is
• Sê dit totdat jou hele wese in harmonie en in ooreenstemming met die Woord van God is
God sal nie ’n groter teenwoordigheid in ons wees as wat ons bely Hy is nie. F.F. Bosworth sluit af met die raad: wanneer jy met ’n behoef-te of nood in die oë staar, bely dat die Here jou Herder is en dat jy geen gebrek ly nie.
(Lees Psalm 103:1-3.) Jesus Christus genees steeds!
Bron:juig.co.za
Hierdie was en is nog steeds ʼn baie invloedryke werk in Vrymesselaar kringe en omskryf die organisasie se agenda en ent doel.
Dit is die raamwerk vir die daarstel van ʼn Een Wêreld Regering en is gebaseer op ʼn visie aan hom openbaar gemaak deur ʼn demoniese entiteit. Hierdie bloudruk vir wêreld oorheersing word vandag nog noukeurig nagevolg deur invloedryke mense agter die skerms. Vir die wat dink daar is nie so iets soos “conspiracy” nie dink weer en vir die wat dink Vrymesselary is ʼn oulike en skadelose organisasie julle maak ʼn groot fout. In lig van wêreld gebeure oor die laaste 100 jaar kom ons kyk na wat Pike geskryf het:
“Die Eerste Wêreld Oorlog moet veroorsaak word om sodoende die Illuminati toe te laat om die mag van die Tsaars van Rusland omver te werp en die land ʼn bastion van ateïstiese kommunisme te maak. Die verskille tussen die Britse en Germaanse (Duitse) ryke wat deur die “agentur” (agente) van die Illuminati veroorsaak is, sal gebruik word om hierdie oorlog te bevorder. Aan die einde van die oorlog sal Kommunisme gebou word en gebruik word om ander regerings te vernietig en godsdienste te verswak.
Die Tweede Wêreld Oorlog moet bevorder word deur die verskille tussen die Fasciste en Politieke Sioniste uit te byt. Hierdie oorlog moet veroorsaak word sodat Nazisme vernietig kan word en Politieke Sioniste sterk genoeg kan wees om ʼn soewereine staat van Israel in die land Palestina tot stand te bring. Gedurende die Tweede Wêreld Oorlog moet Kommunisme sterk genoeg word om die Christendom te balanseer, te bedwing en in toom te hou tot die tyd wanneer ons dit nodig sal hê vir die finale sosiale kataklisme.
Die Derde Wêreld Oorlog moet bevorder word deur munt te slaan uit die verskille wat deur die “agentur” (agente) van die Illuminati veroorsaak word tussen die Politieke Sioniste en die leiers van die Islamitiese wêreld. Die oorlog moet op so ʼn manier gevoer word dat Islam (Die Moslem Arabiese wêreld) en Politieke Sionisme (Die staat van Israel) mekaar heeltemal uitwis. In die tussentyd sal die ander nasies wat weereens verdeeld sal wees oor die vraagstuk verhoed word om te veg tot die punt van totale fisiese, morele, geestelike en ekonomiese uitputting… Ons sal die Nihiliste en Ateïste los laat, en ons sal ʼn formidabele sosiale kataklisme uitlok wat in al sy verskrikking aan die nasies die effek van absolute ateïsme, oorsprong van barbaarsheid en die mees bloeddorstige onrus duidelik sal wys. Dan oral heen, burgers, genoodsaak om hulle self te verdedig teen ʼn wêreld minderheid van revolusionêres, sal dan die verwoesters van die beskawing vernietig, en die menigte teleurgesteld in die Christendom, wie se goddelike gees vanaf daardie oomblik af sonder kompas of rigting sal wees, angstig vir ʼn ideaal, maar sonder om te weet waar om hul aanbidding te lewer, sal die ware lig ontvang deur die universele manifestasie van die suiwer doktrine van Lucifer, wat uiteindelik in die publiek openbaar gemaak sal word. Hierdie manifestasie sal voortvloei uit die algemene reaksionêre beweging wat tot gevolg sal hê die vernietiging van die Christendom en Ateïsme, beide oorwin en vernietig op die selfde tyd.”
Die laaste woord is, God is in beheer en ek weet hoe dit eindig!
Bronne: Global Watch Weekly 9 Jan 2015
Wikipedia
Morals and Dogma: Albert Pike