Lewis maak ook ‘n treffende onderskeid tussen God se goedheid (“kindness”) en God se liefde. Hy sê solank ons hierdie twee begrippe verwar, verwag ons eintlik net van God om goed of “kind’ te wees deur slegte dinge en lyding van ons af weg te hou. Dan maak dit nie eintlik saak of ons tot sy eer verander, al dan nie.
God se liefde is egter iets heeltemal anders. God definieer sy liefde en sy almag op sy eie terme, nie volgens ons idees daarvan nie. Sy almag word dus nie ingeperk of bepaal deur die feit dat ons gebede soms nie beantwoord word soos wat ons dit graag wil hê hier aan ons kant van die draad nie.
Aan die ander kant is ons beantwoorde gebede ook nie die vernaamste bewyse dat Hy almagtig is nie! God is wie Hy is, ten spyte van ons voorspoed en teenspoed. Ons omstandighede definieer Hom nie, of perk Hom nie in nie. God is die Here. Ons dien Hom op sy terme.
Die almagtige God nooi ons uit om tot Hom te nader. Hy vra egter dat ons onsself onderwerp aan Sy wil. Daarom is ‘n groot deel van ons gebedslewe gewoonweg daarop ingestel om te leer om ons eie wil te buig en te belyn met ons Hemelse Vader S’n. Ja,
God kan doen wat Hy wil, maar hoe meer ons Hom leer ken, hoe meer gaan dit in ons gebede en in die res van ons lewe oor die ver-Heer-liking van Sy Naam en sy eer, nie oor al ons behoeftes wat Hy moet vervul nie. Daarom wag ons op Hom in goeie dae en in donker tye. In alles is sy genade meer as genoeg!
Bron: ekerk
NGVishoek: Ds. ( dominee ) Martin Barnard.
Gewoonlik wanneer jy jouself betrap dat jy iets doen wat jy nie gewoonlik doen nie, en jy wonder wat jou besiel het om iets te doen of iets te sê, het jy heel moontlik te make met ’n morele virus. Soms kan jy dit self hanteer, maar meestal het mens hulp nodig van vriende of selfs professionele mense om dit aan te spreek. En net soos rekenaar virusse of biologiese virusse, is die manier van besmetting gewoonlik slegs deur direkte konneksie of kontak. Moet dus nie verbaas wees as jy agterkom jy word besmet met sekere gedagtes of gedrag, terwyl jy jou omring binne so omgewing van gedrag, denkpatroon of gesprekke nie! Iets wat ek eerstehands in 2012 geleer het, is dat jou direkte omgewing se invloed baie sterker is op jou as wat jy dalk besef… en kan weerstaan.
Ek het self agtergekom dat geen program, godsdiens, kerk of reëls ’n betroubare antivirus is vir morele virusse nie. Dit help dalk net om dit uit te wys, maar dis nie standhoudend in die aanspreek daarvan nie. Daar is net een betroubare en standhoudende antivirus wat nie op vrees gegrond is nie: Jesus Christus. Hou Hom midde in alles wat jy doen, dink en leef, en jy sal vind dat jy oorwinning kry oor enige virus wat jou sisteem besmet. En die praktyk daarvan is die “executable” program wat jy moet “run” om Hom deel te maak van jou programmering: verhoudinge. Met Hom (natuurlik), maar daar is geen beter “backup” as verhoudinge en vriendskappe met mense wat die regte gedagtegang, insigte en gewoontes in jou sisteem “download” nie. Deur kontak, vriendskap, gesprek en saamwees.
Voor jy jou jaar of dag behoorlik aanskakel, dink vinnig bietjie met wie jy vandag in direkte kontak gaan wees. Besluit dan of jy daardie konneksie gaan “run”, of dalk soms ‘n “firewall” oprig. Beide is nodig, daagliks. By die huis en by die werk.
Bron: ekerk.org
NGVishoek: Ds. ( dominee ) Martin Barnard.