Enduit was hy getrou aan homself. Soos die hooffiguur in een van my voorgeskrewe boeke op skool, Bart Nel, het Madiba geloop by die lig wat hy sien!

Wat ’n keuse om te maak om te leef vir jou beginsels. Dis maklik om in jou vrye tyd ’n stukkie gemeenskapsdiens te doen. Of om as ’n vrywilliger nou en dan kospakkies uit te deel. Of om in kerstyd ’n paar ekstra sente weg te gee, maar wanneer jy die prys bereken om enduit te staan en te loop vir jou beginsels, verander al die spelreëls. Jesus het laasgenoemde bedoel toe Hy vir ons kom sê het: “Volg My!” Dit is maklik om daardie onskuldige kersfees-Jesus in die krip na te volg. Selfs die koeie en en die “little drummer boy” kry dit reg. Ons hou van “stille nagte, skoongeskeerde herders, barok-engeltjies, geparfumeerde besoekers by sy krip en feeskos vir Kersfees.” Maar dis nie wie Jesus eintlik is nie. Hy is ook die Here wat oppad is na die vervloekte hout van Golgota. Hy is onderweg vanaf die krip na die pad van vernedering en dood. Daarheen word ons geroep! Ook hier in Kerstyd!

Bron:  ekerk.org

NGVishoek: Ds. ( dominee ) Martin Barnard.

Meet jou geestelike groei
In Amerika is ’n ondersoek met 11 000 vraelyste aan sewe verskillende gemeentes geloods om te bepaal hoe ver gemeentelede geestelik gegroei het.  Hierdie ondersoek het baie interessante bevindings opgelewer.  Daar is bepaal dat daar vier groepe mense in die Kerk is:
• Soekend na God Eerstens, mense wat ge-reeld kerk toe gaan, maar nie ’n verhouding met God het nie.  Hulle lees soms Bybel en bid af en toe, maar is soekend.  Alhoewel godsdienstig, het hulle nog nie ’n lewende verhouding met God nie.
• Pasgebore kinders van God Die volgende groep is die soekendes wat by Christus uitgekom het en hulle lewe aan Hom oorgegee het.  Hulle het sekerheid van sondevergifnis en hulle kindskap van God.  Hulle skakel in by kerklike aktiwiteite en begin stiltetyd hou.  As pasgebore kinders van God is hulle grootste begeerte om geestelik te groei.
• Afhanklik van Christus ’n Derde groep is diegene wat al ’n geruime tyd Christene is en alles doen om naby aan Christus te lewe.  Hulle is van Christus afhanklik vir elke dag se lewe en besluite.  Hulle wil nie ’n oomblik van Christus verwyderd wees nie en vra Sy hulp en leiding in alles. As hulle by geestelike aktiwiteite en kleingroepe inskakel, is hulle grootste begeerte om steeds nader aan die Here te kom.
• Volwasse Christene Die ideaal van Christenskap word deur die vierde groep nagevolg deur daarna te strewe om Christus-gesentreerd te lewe.  Hulle verhouding met Christus is vir hulle die prioriteit in hulle lewe.  Hulle is volkome aan Christus oorgegee en is bereid om alles op te offer en te doen wat Christus van hulle vra.  Hulle hele lewe, hulle agenda en geldsake is onder die beheer van die Heilige Gees.  Hulle getuig elke dag en praat spontaan met ander oor Christus.  Hulle fokus is om ander te dien en te help.  Hierdie groep is die geestelike volwassenes in die gemeente.  Dit is hulle wat ’n impak maak en die gemeente help groei en uitbrei.

Leef jy selfgesentreerd?
God se begeerte en plan is vir elke gelowige om in gehoorsaamheid na die volgende stap van geestelike groei te beweeg.  Ons mag nie passief, lui of selftevrede raak en geestelik stagneer nie.  Ons moet God se skeppingsdoel en rede vir ons verlossing uitlewe. God se plan vir ons elkeen is om ’n kanaal van seën te wees en ’n bediening te hê wat mense aanraak en help.
Ons moet onsself afvra of ons ander mense beïnvloed.  Is ons ’n mentor vir iemand anders, of dalk iemand wat tydens ’n uitreik die leiding neem?  Waaroor bid ons?  Waarmee is ons elke dag besig? Waarop fokus ons elke dag?
Mag die Here ons inspireer om steeds te groei en al hoe meer mense geestelik te beïnvloed.  As ons gehoorsaam is aan die stem van die Heilige Gees en luister na dit wat die Gees op ons hart lê, sal ons geestelik groei en ’n groter bydrae tot die Koninkryk van God maak. Gehoorsaamheid is die sleutel tot geestelike groei!

DIRKIE VAN DER SPUY, leier van Moreletapark Assosiasie – die nasionale
en internasionale uitreikfokus van die NGK Moreletapark. 021 997 8066 of www.moreletapark.com NGVishoek: Ds. ( dominee ) Martin Barnard.

Augustinus moes vir ’n naweek Rome toe gaan, waar die Sabbat toe nog deur die kerk op Sondae gevier is, terwyl dit in Milaan steeds op Saterdae onderhou is. Augustinus wou by Ambrosius weet wat om te doen.

Dis toe dat Ambrosius hierdie bekende woorde sê. Paulus het op sy beurt in 1 Korintiërs 9 gesê vir die Jode moet jy ’n Jood word en vir die Grieke ’n Griek sodat sommiges gered kan word. Helaas het party kerklikes dit omgedraai. Dikwels probeer hulle om ander mense te verander om eerder soos hulle te lyk, dink, doen en praat. Is dit nie juis ons as gelowiges wat uit ons pad moet gaan om aan te pas en mense te dien met die evangelie van Christus nie? Moet ons nie diegene wees wat agteroor buig sodat ander Christus se goedheid kan ervaar nie?

Moet ons nie minder word sodat ander vir God kan raaksien nie?

Bron:  ekerk.org NGVishoek: Ds. ( dominee ) Martin Barnard.

• Tussen al die godsdienstige stemme onderskei die ware profeet God se “woord”. Tegelyk is die profeet ook deegliker as ander bewus van die internasionale politieke en ekonomiese magte se bewegings;

• Die fokus van die profeet se waarneming is op sy hier en nou. Maar dit geskied vanuit ’n deeglike kennis oor die goeie en die kwaad in die verlede en ’n pligsbesef vir die toekoms;

• ’n Profeet roep mense om net na God se Woord te luister. Dit gaan gepaard met simboliese dade as ’n soort versetkuns waarin die profeet self as lewende teken van die boodskap swaarkry;

• Die profeet se skerp woorde sny skuldiges soos ’n swaard, maar agter die woorde is ’n hart van bewoëndheid oor mense se omstandighede en afvalligheid; en

• Die profeet is enersyds so vol geloofsvertroue dat hy die ontmoeting met God as “die Here se woord” beskryf. Andersyds is die profeet so nederig oor sy verstaan van God en homself dat hy nie geskik voel om die profeet te wees nie. Met sulke moed én nederigheid kan ons ons land in hierdie tyd die beste dien.

Uit die Woord: “Die woord van die Here het tot my gekom: Gaan roep hierdie woorde uit sodat elkeen in Jerusalem dit kan hoor.” – Jeremia 2:1

Bron:  beeld.com

NGVishoek: Ds. ( dominee ) Martin Barnard.

’n Mens sien nou dinge gebeur wat jy nie ’n geslag gelede sou gedink moontlik is nie, het Burger gesê.

Verdraagsaamheid en politieke korrektheid het die belangrikste woorde geword.

Burger het verwys na Openbaring 2, waarin gelowiges geprys word omdat hulle nie slegte mense kan verdra nie, en bygevoeg daar word vandag van mense verwag om aanhoudend tegemoetkomend en verdraagsaam te wees.

In ’n mate moet dit so wees, maar daar kom ook ’n punt waar ’n mens moet vasstaan en moet verdedig wat God vir jou gee.

Hy het gesê die land is besig om te beweeg in ’n rigting waarop konflik tussen die staat en die kerk, tussen die Grondwet en die Bybel, onvermydelik is.

Hy het egter nie daaroor uitgewei nie.

Hy het die byna 3 000 mans wat die konferensie bygewoon het onder meer gemaan teen hebsug, geldgierigheid en verbruikersdruk, wat mense laat wegdryf van God af.

Hy het gesê dit gaan sleg met huwelike.

In die huidige era is dit makliker om iets te vervang as om dit reg te maak. Mense doen dit met hul huwelike ook.

Hy het die mans na aanleiding van die voorbeeld van Eleasar, wat volgens 1 Kronieke 11 manalleen ’n garsland teen die Filistyne verdedig het, aangemoedig om hul garslande ook te verdedig.

“Hulle moet sê: ‘Here, ek gaan nie my garsland vir die Filistyne gee nie. Ek gaan terug na my vrou toe’.”

Burger het mense aangemoedig om vas te staan by hul beginsels. Hy het die hamergooier Chris Harmse, wat nie op Sondae aan kompetisies deelneem nie, en die krieketspeler Hashim Amla, wat nie bieradvertensies op sy klere dra nie, voorgehou as voorbeelde van mense wat by hul beginsels bly.

Honderde mans het vorentoe gegaan om hulle tot die stryd vir goddelike waardes te verbind.

Bron:  beeld.com

NGVishoek: Ds. ( dominee ) Martin Barnard.

Die waarheid
Jong mense word nie oor die waarheid van baie hedendaagse sensitiewe kwessies ingelig nie. Hulle weet nie wat God se Woord daaroor sê nie. Die hedendaag-se verval in ons samelewing, aangevuur deur die media, is kommerwekkend. Kwessies soos die soewereiniteit van die huwelik en egskeiding word ligtelik opgeneem.
Die neem van menselewens (in besonder aborsie), homoseksualiteit, pornografie, die gebrek aan respek van kinders teenoor hulle ouers, die gebrekkige voorbeeld van ouerlike leierskap in die ouerhuis en die tekort aan rolmodelle, neem net toe.

Wat is reg en wat is verkeerd
Ek is van nature optimisties, maar die werklikheid moet in die oë gestaar word. Ek het onlangs op televisie gesien dat die top toekennings van die nuutste Europese rolprente toegeken is aan rolprente wat lesbiese liefde veredel, en niemand sê iets daaromtrent nie.
Ons kan nie aanhou toelaat dat hierdie dinge by die agterdeur van ons huise inglip sonder om dit aan te spreek nie. Ons kinders moet weet wat reg en wat verkeerd is. Die waarheid moet seëvier.

Die Kerk moet standpunt inneem
God roep die Kerk op om standpunt in te neem. ’n Prominente nasionale politikus het onlangs ’n pleidooi gelewer dat die verkragting en mishandeling van kinders en vroue tot ’n einde moet kom. Hy het gesê dat dit die verantwoordelikheid van die Kerk is – ek en jy  – om hierdie slagting stop te sit!

Spreek die waarheid
Mense is op soek na antwoorde. Ons hét die antwoorde. Ons moet ons stem laat hoor en reguit praat. Ja, die antwoord is liefde en wanneer jy iemand liefhet, spreek jy die waarheid. Die waarheid is wat ons sal vrymaak. Johannes 8:36 sê: “Eers as die Seun julle vrymaak, sal julle werklik vry wees.” Jesus is die waarheid en ek en jy het ’n verpligting om na te kom, ons moet die basuin blaas.
Ons kan nie sê dat dit iemand anders se verantwoordelikheid is nie. Wanneer ons eendag voor die Here staan, sal ons almal rekenskap moet gee. Hy gaan my en jou doodeenvoudig vra: “Wat het jy met die waarheid gedoen wat Ek aan jou gegee het?”

Swem stroomop
Christenskap is beslis nie vir sissies nie. Dit is soveel makliker om maar net die stroom te volg. Ek onthou Gypsy Smith, ’n Britse evangelis van 19de eeu, het gesê: “Dit verg ’n lewende vis om teen die stroom op te swem, ’n dooie een om saam met die stroom te dryf.”

Beskerm so ’n nasie
Ek laat julle met hierdie gedagte: “Vir boosheid om te gedy, is al wat goeie mense hoef te doen… niks nie.” Dit is beter dat ons nooit die waarheid geken het, as om die waarheid te ken en nie ons stem te laat hoor nie. My vriende, ons moet moedig wees, ons moet begin om standpunt in te neem, ons moet terugkeer na die grondbeginsels, ons moet ons gesinne beskut en sodoende ons nasie beskerm.

Bron:  juig.co.za NGVishoek: Ds. ( dominee ) Martin Barnard.

Sonder motors wat breek en kollegas wat ons in die rug steek, sonder hartseer, probleme en gekompliseerde verhoudings. Ons wil graag sorgvry leef en ons lewe en vriendskappe geniet sonder vol programme — ons lewe moet sinvol wees en betekenis hê. Tog werk dit nie altyd so nie. Daar is oomblikke in ons lewens wat ons by onsself dink: “Dit is nie hoe ek dit beplan het nie; dis nie wat ek verwag het nie”. Dit is wanneer jy die nuus kry dat die werk waarin jy so goed gedoen het, jou gaan afbetaal, die onverwagte nuus dat jou mediese uitslae dui op kwaadaardigheid, dat jou man ’n buite egtelike verhouding het. Die lewe verloop nie altyd soos ons daarvoor hoop of wat ons verwag nie. Wat ons hiermee doen gaan bepaal of ons vasval in onvergifnis en bitterheid en of ons in Sy arms gaan val en deel in Sy vrede.

Hierdie vrede is nie net die lekker gevoel wat mens kry wanneer jy gekuier het saam met vriende of net ontspanne voel nie. Of as jou dag sonder frustrasies was en jy buite sit terwyl die son sak en jy voel ontspanne en rustig nie. Nee hierdie vrede is ’n innerlike tevredenheid en rustigheid, ongeag jou omstandighede. Dit is die teenwoordigheid van vreugde te midde van swaarkry, beproewings en probleme. Goddelike vrede is die vermoë om kalmte te handhaaf te midde daarvan. Vrede beteken nie die afwesigheid van konflik nie, maar ’n bepaalde manier om mekaar te hanteer te midde van die konflik. Vrede is nie die afwesigheid van swaarkry nie, maar kalmte te midde daarvan.

’n Persoon wie se vrede in Christus is kan baie swaarkry en probleme hanteer en nog steeds innerlike vrede hê. Hierdie vrede is gebaseer daarop dat die Gees van God in hom woon, dat Sy teenwoordigheid en vrede volkome en voldoende is om enige storm te kan hanteer.

Hy kan vredevol aangaan te midde van probleme omdat sy vrede nie gebaseer is op lekker omstandighede nie. Hy kan rustig na nuwe werk soek in ’n wete dat God vir hom sorg en dat hy op Hom kan vertrou. Hy / sy kan soos Paulus en Silas liedere in die tronk sing en God se Naam groot maak.

Dan kan hy, omdat hy geanker is in Christus soos Horatio Spafford, God verheerlik te midde van ’n familie tragedie. Horatio, ’n welgestelde prokureur in Chicago, se 4 dogters is in 1873 dood nadat die passasierskip waarop hulle oppad na England was, gesink het. Sy vrou is bewusteloos uit die water gered. Hy skryf die aangrypende lied, “It Is Well with My Soul”, na hierdie ongelooflike hartseer.

“When peace, like a river, attendeth my way,
When sorrows like sea billows roll;
Whatever my lot, Thou has taught me to say,
It is well, it is well, with my soul.

Refrain: It is well, with my soul, It is well, it is well, with my soul.”

Bron:  ekerk.org

NGVishoek: Ds. ( dominee ) Martin Barnard.

In Engelse is daar die mooi woord: Contentment. In Afrikaans vertaal, kan ons sê dat die beteken om vervuld te voel, tevredenheid te beleef en ’n diep gevoel van vrede te ervaar. Dis ook om tevrede te wees met die lewe: met dié dinge wat ons het of nié het nie en met dit wat ons kan doen of nie kan doen nie. Navorsers skryf die laaste paar jare baie oor die belangrikheid van waardering. Dat ons dankbaarheid oor die lewe eintlik ons geluk en tevredenheid bepaal. Wanneer ons fokus op die lys van dinge waarvoor ons “dankie” kan sê, vergeet ons van die dinge wat ons nie het nie. En dan … kruip tevredenheid, vrede en uiteindelik geluk stilweg in ons hart in.

Kom ons stel onsself vanjaar oop vir die sagte vrede wat ons alleen maar van die Gees kan ontvang. Kom ons vra Hom om van ons sielstevrede mense te maak: mense wie se oë oop is vir dit wat ons hét.

Ek is stil en rustig. Want ek het die grootste gawe van alle tye: ek het U by my, Here.

Bron:  ekerk.org

NGVishoek: Ds. ( dominee ) Martin Barnard.