Ons is ’n minderheid

 

’n Mens bereken eers min of meer wat die inwonertal van die omgewing is. Dan tel jy die aantal sitplekke in al die kerke in daardie omgewing. Op baie plekke is daardie aantal sitplekke – wat nie eens elke Sondag vol is nie – ’n klein fraksie van die aantal inwoners van die omgewing.

Wat net nog ’n manier is om te sê dat die aantal gelowiges wat regtig meelewe eintlik ’n klein minderheid is. Selfs ons makrogemeentes lyk klein op dié manier.

Dit is glad nie ’n slegte ding om te besef nie, want die indruk dat Christene ’n groot meerderheid is, bring allerlei verleidings met hom mee. Soos die indruk dat die kerk ’n organisasie met mag en invloed is. En as ’n kerk so oor homself dink, dan begin hy die spel van mag en invloed speel.

Jesus het ’n ander pad aangedui. Hy het afstand gedoen van alle mag en kom dien, selfopofferend kom dien. Waar die kerk daardie boodskap snap en vir Jesus op daardie patroon volg, is hy op sy beste.

Gelowiges wat gestroop is van illusies van mag en in­vloed, besef al wat hulle oor het is die vermoë om lief te hê en te dien. En die paradoks is dat dit die grootste krag is wat God vir sy mense gegee het. Dit is ’n krag wat lewens kan verander, wat die wêreld kan verander.

Bron:  http://kerkbode.co.za/ons-is-n-minderheid/

NGVishoek: Ds. ( dominee ) Martin Barnard.

Lees Meer >>

Verwoestende woorde vloei soms vanuit goeie intensies



Die prentjie wat by ’n mens opkom wanneer mens hiervan in die Bybel lees is gewoonlik ’n dié van ’n persoon met ’n kwaadwillige doel voor oë.

Die prentjie van die persoon met die goeie intensies en ondeurdagte woorde kom nie so gereedelik by ’n mens op nie.

“Hoekom het jy dit gedoen? Jy is mos ’n kind van die Here en kinders van die Here doen mos nie sulke goed nie,” het ’n vriend uit haar gemeente vir my geliefde familielid gevra. Die vraag het gekom nadat sy haar lewe probeer neem het omdat sy worstel met depressie.

’n Nuwe kennis vertel met seerkry en teleurstelling van woorde wat haar geoffer is nadat sy erken het dat sy bang en vol vrees is nadat haar huis beroof was terwyl sy alleen tuis was: “As Christen behoort ons nooit vrees in ons hart te dra nie, vrees kom nie van die Here af nie en ons weet mos dat Hy ons oppas.”

Hierdie woorde het in beide gevalle gelei tot ’n gevoel van veroordeling, wanhoop en selfverwyt.

Ons staan dikwels gereed met raad en “oplossings” om die splinters uit mekaar se oё te probeer uithaal. Dit is dan wanneer ons met ons goeie intensies die risiko loop om te breek eerder as te bou met ons “wyse raad”. Ons verruil die stilswye en verstaan van ’n liefdevolle oor wat hoor en luister en woordeloos ondersteun vir kritiek en veroordeling.

In Kolossense 3:13 lees ons die volgende: “Gee mekaar ’n kans sonder om mekaar met kritiek uitmekaar te skeur. Kyk ook by mekaar se foute verby. Die Here het immers by al julle foute verby gekyk. Daarom word niks minder van julle verwag nie.”

Bron:ekerk.org NGVishoek: Ds. ( dominee ) Martin Barnard.

Lees Meer >>

Jy kan ’n verskil maak deur Stephan Joubert [resensie]


Die geheim is om op te hou om ’n “groot storie” vir die Here te leef, om “iets beters” vir Hom te doen. Jy moet eerder jou gewone lewe voluit vir Hom lewe. Gewone verhoudings en onbelangrike dade op aarde vind weerklank in die hemel. Doodgewone mense op soek na ’n opregte, eenvoudige roete saam met Jesus maak AL die verskil in die wêreld!

Dié boek wil die las van ons skouers aflig en ons toestemming gee om ons gewone lewens tot eer van die Here te leef. Omdat dít buitengewoon is.

Die agt hoofstukke kyk elk na ’n bepaalde faset van dissipelskap, elke keer vanuit ’n nuwe hoek. En die impak daarvan word vergroot deur die tweets van gewone mense, mense wat hulle insigte in een lyn met jou deel oor wat dit in hulle lewe en wêreld beteken om ’n dissipel van Jesus te wees. Daarmee saam kry jy die verhale van “geloofshelde,” gewone mense wat die geheim ontdek het om kerk verby Sondag se diens te neem na waar hulle lewe en werk en speel.

Van die insigte oor dissipelskap wat jy hier kry, sluit in: Ek het gehoor jy moet iets vir die Here doen maar nou het ek geleer die belangrikste is om aan Jesus se voete tot rus te kom. Frustration equals a busy life headed in the wrong direction. Of: ek het gehoor jy moet jou lewe uitsorteer maar nou ervaar ek: Gód maak my nuut. En: ek het gehoor jy moet mense bekeer maar nou besef ek dat ek net oor die straat moet stap en Jesus moet toelaat om mense aan te raak. En elke beginsel word toegelig met dissipelskap-stories.

Ek koop uit beginsel enige boek wat Stephan Joubert publiseer en het nog nie een keer my geld gemors nie. En jy gaan ook nie met dié boek nie.

Weet egter net: die boek gaan met jou kop smokkel. Jy gaan anders begin dink terwyl jy dit lees. En jy gaan anders lyk wanneer jy klaar is. Jou lewe gaan ’n verskil maak!

bron:ekerk.org NGVishoek: Ds. ( dominee ) Martin Barnard.

Lees Meer >>

Van Swaard na Ploegskaar

 

Nou wat is die teenpool van hierdie aggressie en gevegte? Bloot vrede? Is dit genoeg? Nee, daar is iets beters. Lees nou eers saam wat in Miga geskryf staan:

Miga 4:1-5
Daar kom ‘n tyd dat die berg waarop die huis van die Here is, ‘n blywende plek sal hê bokant die bergtoppe en sal uitstaan bo die heuwels. Die volke sal daarheen stroom, baie nasies sal daarnatoe gaan en sê: “Kom, laat ons optrek na die berg van die Here toe, na die huis van die God van Jakob sodat Hy ons sy wil kan leer en ons daarvolgens kan lewe, want uit Sion kom die openbaring, uit Jerusalem die woord van die Here.” Hy sal oordeel tussen baie volke, regspreek oor sterk nasies wat ver weg woon. Hulle sal van hulle swaarde ploegskare smee en van hulle spiese snoeiskêre. Die een nasie sal nie meer die swaard teen die ander opneem nie, en hulle sal nie meer leer om oorlog te maak nie. Elke man sal onder sy eie wingerd sit, ongesteurd onder sy vyeboom. Die Here die Almagtige het dit gesê. Elke nasie kan maar lewe in die naam van sy god, ons sal vir altyd in die Naam van die Here ons God lewe.

Kragtige woorde wat ek nog nooit regtig raakgelees het nie, en toe hoor ek dit Sondagaand in die kerk: “hulle sal van hulle swaarde ploegskare smee, en van hulle spiese werktuie”. Hoe hou jy daarvan? Dit sê nie hulle sal hulle swaarde net wegbêre en dit nie meer vir veg gebruik nie, of dit selfs vernietig nie. Dit sal getransformeer word in werktuie. Dus, in plaas van ‘n skietstilstand, word dit samewerking. Die Here se oplossing is dus WERK vir oplossings. Is jy bereid om so ‘n “mind-shift” te maak?

Gevegte in die huwelik: ai, wat het gebeur met daardie heerlike, kinderlike verliefdheid? Daardie tyd toe jy jou geliefde sou beskerm met ‘n swaard teen enige aanslae van buite. Vat aan my meisie, dan vat jy aan my. Kyk skeef na haar dan wiks ek jou. En daardie swaard waarmee jy haar ten alle koste sou beskerm, draai jy teen haar (…. of hom, natuurlik werk dit anderkant toe ook). Dan kom daardie swaard uit in venynige woorde, in ontrouheid, leuens en allerlei diep vorme van seermaak.  “Die Here, die God van Israel, sê Hy haat egskeiding. Egskeiding is niks anders as geweld nie, sê die Here die Almagtige.” (Mal 2:16)

Na die egskeiding word die swaard net groter en groter. Die Here se oplossing in Miga 4:4 werk anders. Hy sê smelt daardie swaard en verander hom in ‘n ploegskaar, die spies in ‘n snoeiskêr, en wérk aan die probleem. Moenie na mekaar kyk en sê: jy is die probleem nie. Nee, identifiseer die probleem, bv. drank of ontrouheid en gaan staan langs mekaar en werk sáám aan die probleem. In plaas daarvan om soos Samurai’s te veg teen mekaar, werk saam om dinge te verbeter. Weet jy wat is “killed in cross-fire”? Dit is wanneer ‘n onskuldige persoon getref word as mense op mekaar skiet. Jy weet mos, soos kinders in ‘n huwelik. Weet jy wat is die ergste? Die kinders word sommer partykeer die swaarde, en word misbruik in die gevegte. Maar die Here sê vandag vir ons: verander julle swaarde in ploegskare en die spiese in snoeiskêre.

Hoe voel jy oor ons land? Jy weet, ek aanvaar 100% dat mense die land verlaat, en ek respekteer dit. Maar vir ons wat besluit om te bly, hoe gaan ons dinge laat werk? Boeta, ek kyk nie sommer nuus nie, en ek lees nie koerant nie, want dan wil ek net die swaard opneem. As ek daardie knaap wat ons gewapend beroof het, in die hande moet kry, verander ek daardie snoeiskêr en ploegskaar in ‘n spies. Die vraag is, tot in watter mate is ek en jy bereid om te werk vir oplossings? Ons boerevolk (waarvan ek die titel trots dra) het in die verlede deur baie krisisse gewerk, om te kom waar ons is, en dis sekerlik nie nodig om nou daarmee om te hou nie. Ongeregtigheid, onregverdigheid, korrupsie, ens. ten spyt. Jy ken die spreekwoord: “die pen is magtiger as die swaard”. Vandag wil ek byvoeg: “die ploegskaar is sterker as die swaard”, en: “die snoeiskêr is magtiger as die spies”.

Ek het besluit dat ten spyte van hoe ek soms voel, sal ek werk om ‘n verskil te maak, om ‘n bydrae te maak, en om die beste wat ek kan vir my kinders na te laat. Dis ‘n keuse.

Weet jy waar raak baie van ons oorloglustig? In ons geloofslewe. Iemand sê eendag: die Christene is die weermag wat die maklikste hulle eie soldate skiet. Hartseer, maar só waar. Weet jy dat baie mense eerder teen mede-Christene veg, as teen ongeloof. Mense spandeer meer tyd om mekaar te aan te val oor geloofsverskille, as om saam te werk om God se Koninkryk uit te bou. Jy sal nie glo watse SMS’e ons partykeer in Rippel se ateljee kry van mense wat ons aanval oor ons geestelike programme nie; en dit van mede-Christene af – sjoe, wat ‘n dolksteek. Ons het eerder gebed nodig, weet jy? Smee ‘n ploegskaar van daardie swaard, en ‘n snoeiskêr van jou spies. Laat ons eerder saamwerk, hou op om jou kerk en jou pastoor of dominee af te breek en met hulle te veg. Werk eerder saam teen die werklike vyand. Ons kan verskil van mekaar en steeds wonderlik saamwerk. Jy kan nie jou mede-soldaat vermink en dink jy sal die duiwel oorwin nie. Ek wonder partykeer wat dink die Here van ons pogings.

Is jy bereid om al daardie swaarde, mortiere, grofgeskut, spiese, vegvliegtuie, kanonne van hierdie lewe op te smelt en in werktuie te verander – in alle fasette van die lewe? Kom ons hou op om deur die skietgate te skiet, en trek liewer die oorpak aan en werk vir oplossings. Dit voel in elk geval meer eerbaar. Dis God se plan.

Bron:  heuning.co.za

NGVishoek: Ds. ( dominee ) Martin Barnard.

Lees Meer >>

God was hier


Wanneer ek God se storie lees, lees ek iets anders. Ek sien dat God na ons toe kom in Jesus, dat hy saam met ons loop. Dat hy nie ons uitnooi en wag tot ons opdaag nie, maar dat hy tussen ons kom staan.

Ek lees van Jakob wat wakker word na sy droom van ’n leer wat uit die hemel kom en sê, ‘God was hier op hierdie plek en ek was nie bewus daarvan nie.’

God bly nie in ’n huis nie.

God bly nie in jou 5 minute stiltetyd nie.

Die huis is in God.

Die 5 minute stilte is in God.

Jou slaap is in God, jou eet, en jou TV kyk.

God is naby, maar Hy is nie in hierdie plek nie… eerder hierdie plek, alles, is in God.

Bron:  ekerk.org NGVishoek: Ds. ( dominee ) Martin Barnard.

Lees Meer >>

Ons is nie veronderstel om die eind–verbruikers van God se krag te wees nie

Maar, ongetwyfeld was die lokvalle van krag altyd ’n groot bedreiging in sy omgewing. Toe het Paulus ’n onverwagte rusie met ’n plaaslike kerkleier in Korinte. Die gevolg: hy het vernederd die stad verlaat, met ’n gekneusde ego (2 Kor 2, 7).

Om sout in sy wonde te vryf kom daar toe ook kort daarna ’n klomp flambojante predikers na die kerk in Korinte. Hierdie ‘show stoppers’ het al die nodige wonderwerke en geestelike truuks in hul moue gehad om plaaslike gelowiges uit hul swaarverdiende geld te beïndruk (2 Kor 10-13). Geen wonder dat hulle grappies gemaak het dat wanneer Paulus by hulle is, is “hy mak en beteken sy woorde niks” nie (2 Kor 10:10).

Paulus het God drie keer in gebed genader, en gevra dat Hy hierdie swakhede en ander lyding wat hy moes verdra ter wille van Christus verwyder, soos hy ons vertel in 2 Korintiërs 12. Hy wou dringend sy Simson-agtige geestelike krag terug. En toe antwoord God en leer vir Paulus dat dit nie meer gaan oor krag nie, maar oor die paradoks van Goddelike krag in menslike swakheid! Hierdie openbaring verander toe die hele verloop van Paulus se bediening. Hy het ’n paar waardevolle lesse geleer wat ons almal ernstig moet opneem:

Les een: God is die enigste Kragbron in die kerk. Dit gaan nooit oor ons nie! Ons is net die krag–kabels, beslis nie die bronne van krag nie.

Les twee: Ons hoef nie die krag van God te ervaar voordat Hy kan werk nie. Die meeste van die tyd werk God ten spyte van wat ons sien, voel of ervaar. Die feit is, ons sal altyd ’n gebrek aan geestelike krag ervaar, want ons is net die krag–kabels en nie die bron van krag nie. Paulus het hierdie les op die harde manier geleer. In vandag se magshonger kerk–omgewing, belaai met kompetisie vir meer lidmate, met die beste eredienste in die stad, en groter geboue, meer geld, ensovoorts, moet ons ook hierdie les ernstig opneem, anders sal ons blind wees vir die lokvalle van oppervlakkige geestelike krag.

Les drie: Gelowiges is verspreiders van die grootste krag in die heelal. Ons dra ongelooflike hoeveelhede krag vanaf God in sy gebroke wêreld in. In Efesiërs 1:18-20 bid Paulus dat God ons oë sal oopmaak om te besef dat dieselfde krag aan die werk is in ons, as wat Jesus Christus uit die dood opgewek het. Praat van geweldige krag wat voortdurend aan die werk is in en deur ons!

Les vier: Die klem is nooit op die krag–kabels nie, maar op die ontvangers aan die ander kant. Wanneer God se krag vloei deur ons, word die resultate uiteindelik duidelik in die lewens van diegene vir wie God wil hê ons moet dien en versorg. Ons is God se lewende geskenke aan sy stukkende wêreld en sy kerk. As ons getrou is aan ons roeping, sal ander sy oorvloed en seëninge ervaar. Ons is swak dienaars van Christus wat genoeg moet omgee vir ander om sy krag van Goddelike genesing na hulle te laat vloei.

Les vyf: Ons moet verbind bly tot die Goddelike kragtoevoer te alle tye. Alle krag kom van God (2 Kor 4:07). Sy krag kan nie vervals word nie. Solank as wat ons geanker bly in Christus, sal God strome van lewende water deur ons laat vloei (Johannes 7:38). Die feit is, ons is nie die eind–verbruikers van sy krag nie, maar wel die voltydse verspreiders daarvan.

Bron:ekerk.orgNGVishoek: Ds. ( dominee ) Martin Barnard.

Lees Meer >>

Is Vladimir Putin n Christen


Die Weste se agteruitgang
In Desember het Putin verklaar: “Baie Euro-Atlantiese lande het van sowel hulle wortels as hulle Christelike waardes af wegbeweeg. Dit is die weg na agteruitgang.”
Putin het heftige afkeer uitgespreek van die hedonistiese sosiale rewolusie wat die Weste besoedel. Hy het die Weste se oorgawe aan die seksuele rewolusie van losbandigheid, pornografie, aborsie, gay-huwelike en genadedood veroordeel en keur die Weste se “agteruitgang en afwenteling in chaotiese duisternis en terugkeer na ’n primitiewe toestand” af.
In baie van sy toesprake en geïmplementeerde beleid, is Vladimir Putin besig om Rusland se vlag stewig aan die kant van tradisionele Christenskap te plant. Verlede jaar het die Kremlin ’n verbod geplaas op homoseksuele propaganda, aborsie-advertensies en aborsie ná 12 weke, sowel as ’n baie kontroversiële verbod op ‘onheilige gedrag’ en godslastering.

Het ateïsme verwerp
Dit is verwarrend vir mense wat steeds by die terminologie van die Koue-oorlog vasgesteek het. Baie predikers verwys steeds na Rusland as ’n kommunistiese en ateïstiese land, tog is daar tans meer Evangeliese, wedergebore Christene in Rusland as in enige ander land in Europa. Die tweede grootste groep Evangeliese Christene in Europa word in die Oekraïne aangetref, gevolg deur Roemenië met die derde grootste groep.

Het kommunisme verwerp
Soos ’n Rus verklaar het: “Daar is tans meer kommuniste in die fakulteite van Amerikaanse universiteite as wat daar in die hele Rusland en Oos-Europa is!” Nadat Russe vir 70 jaar lank onder ateïstiese propaganda en wrede kommunistiese verdrukking en vervolging geleef het, is hulle vandag van die mees anti-kommunistiese mense op aarde. Sedert Vladimir Putin die president van Rusland geword het, het die Russiese bruto nasionale produk (BNP) verdubbel. Vandag word Rusland as die sesde grootste ekonomie in die wêreld gereken. 

Groeiende Russiese ekonomie
Nywerhede in Rusland het in die afgelope agt jaar met meer as 75% gegroei. Beleggings het met 125% toegeneem. Die gemiddelde salaris in Rusland het met meer as 800% toegeneem. Die middelklas het van 8 miljoen tot 55 miljoen gegroei. Mense wat onder die broodlyn leef, het nou van 30% in 2000, tot minder as 14% afgeneem.
Waar Amerika ’n handelstekort van meer as 500 biljoen Amerikaanse dollar per jaar het, toon Rusland konsekwent ’n groot handels-oorskot. Waar Amerika ’n amptelike werkloosheidsyfer van 7,4% het, is Rusland se werkloosheidsyfer 5,4%. Rusland produseer tans meer olie en aardgas as enige ander land ter wêreld. 
Amerika se skuldlas is groter as sy BNP (meer as 110%), teenoor Rusland met ’n skuldlas van slegs 8% van sy BNP. Rusland het ook oor die afgelope dekade meer as 570 metrieke ton goud by sy reserwes gevoeg.

Die bordjies verhang
Dit is redelik ernstig wanneer Rusland Amerikaners oor die gevare van sosialisme en goddeloosheid waarsku. Russiese Christene het hulle skok teenoor my uitgespreek oor hoe Amerika die nuwe ‘Bose Ryk’ geword het. Xavier Lerma van Pravda in Moskou het geskryf dat Ronald Reagan korrek was om die Sowjetunie ‘Die Bose Ryk’ te noem. 
Nou het Amerika egter die Bose Ryk geword met ’n aggressiewe pro-homoseksuele huweliksagenda; hulle boelie Afrika-regerings om aborsie en ontaarding te wettig; en stuur oorvloedige hulpbystand aan radikale Midde-Oosterse regerings wat die Christelike Kerk swaar vervolg.

Rolle word omgekeer
Die meeste Amerikaners blyk onbewus te wees van die verwoestende gevolge van hulle staatsdepartement se buitelandse beleid: die afbrand en bombardering van kerke kort op die hakke van die Arabiese Lente in die Midde-Ooste is in so baie opsigte befonds en aangeblaas deur die beleid van die Amerikaanse staatsdepartement. 
Terwyl die Amerikaanse regering Al-Kaïda geaffilieerde djihadiste in die Siriese oorlog ondersteun het, was die Russiese regering besig om vir Christene in te tree en het opgetree om Christen-teikens in die Midde-Ooste te beskerm.
Soos ’n media-kommentator skryf: “21ste eeuse Rusland is ’n bewys dat Christendom teen duisternis en verwarring kan seëvier. Deesdae vrees die liberales, wat die Weste beheer, vir Putin…dit is nie ’n kernbedreiging nie, maar eerder ’n geestelik vernuwing wat vir hulle ’n bedreiging is. Dit is nie Putin nie, maar Rusland se Christelikheid wat hulle vrees. 
Of liewer, hulle vrees en haat vir Christus…toegewyde Russiese Christene is aan die opmars…hierdie Russe is soos dissipels van Christus wat liefdevol na hulle broers en susters uitreik, hulle help manne en vroue in duisternis, wat deur ’n materialistiese samelewing verkneg word, wat werklik Christus nodig het.”

Stryd vir die gesin
Lerma skryf dat die rede waarom die Wes-terse media Vladimir Putin en Rusland vir die bose uitmaak, nie is omdat hy in die KGB was nie, maar omdat hy die agenda van radikale homoseksueles teenstaan. Dit is ironies dat godsdiensvryheid in Amerika onder aanslag is, met militêre kapelane wat voor ’n krygs-raad gedaag word omdat hulle in die Naam van Jesus Christus bid. 
Daarenteen word soldate in Rusland aangemoedig om kerkdienste by te woon en stel hulle millitêre kapelane aan om te verseker dat “die hande wat die wapens hanteer, beheer word deur ’n verstand en gees wat deur die genade van Christus gereinig is!”

Is hy ’n Christen?
Vladimir Putin getuig dat hy ’n Christen is. In sy getuienis praat hy van sy moeder se geloof en hoe sy hom in die geheim laat doop het omdat sy vader ’n toegewyde lid van die Kommunisteparty was en dit nie sou toelaat nie. 
Putin dra altyd ’n kruis wat sy moeder aan hom gegee het om sy nek. Hy win gereeld Christelike advies in en word gesien waar hy bid en gereeld kerk bywoon. Die Russiese patriarg, Kirill, erken Vladimir Putin as ’n getroue lid van die Russies-Ortodokse Kerk. Putin vertoon ’n groot ikoon van Christus opvallend in sy kantoor teen die muur agter sy lessenaar.

Is Putin wedergebore?
Slegs God ken Vladimir Putin se hart. Dit is ook duidelik dat die Russiese regering vandag meer Christelik is as wat dit vir dekades was. Waar anders in die wêreld is ’n regering wat meer as 100 miljoen dollar in die bou van kerke belê?
Erken die werklikheid
Dit is ’n ongelooflike ommeswaai van omstandighede dat lande wat agter die Ystergordyn was, nou van die mees dinamiese Christen-kerke en die hoogste persentasie kerkbywoning in Europa het. 
Dit blyk dat Westerse dekadensie, onsedelikheid, materialisme, kompromie en oppervlakkigheid in kerke, en vlak sensasionele vermaak dodeliker vir die Kerk is as ateïstiese propaganda en wrede kommunistiese vervolging in die Ooste. As Russe meer openbare godsdiensvryheid as baie Westerse burgers geniet, is daar groot fout. As Russe hulle kommer oor die gebrek aan vryheid en geestelike onderskeiding in die Weste uitspreek, moet ons baie bekommerd wees.

 

Besoek www.frontline.org.za vir meer artikels oor verwikkelinge in Rusland.

Bron: juig.co.za

NGVishoek: Ds. ( dominee ) Martin Barnard.

Lees Meer >>

A2J Uitreik: Loeriesfontein, Deel 3 3-4 Julie 2014

 

Aandete was heerlike potjiekos, plaasbrood en tuisgemaakte konfyt wat deur die NGK se mense geskenk en gemaak is vir ons. Dis nie aldag dat jy ‘n dominee met ‘n voorskoot sien werk nie!

Laataand is dit ‘n geestelike waar ons ook net besef dat ons alles ons gemors by God kan los en deur Sy Gees kan vrug dra.

Vrydag is die laaste lessies. Deur die week raak die gesiggies moeër (A2J s’n), maar die opgewonderheid bly daar (Loeries se gesiggies). Die laaste dag gee ons kos vir ongeveer 250 kinders. Die behoefte aan kos lyk nie so erg soos wat ons al gesien het nie, maar daar is steeds kinders wat uit moeilike omstandigehede.

Die instandhoudingspan is steeds besig teen ‘n woeste pas: die VGK se saal is oorgeverf nadat die barste gister oopgekap en gepleister is. Kassies is ingesit by die Sonneblom klub (ouetehuis) en hakke waaraan die kinders se klere kan hang by die kleuterskool. Die ouetehuis se dak is geseël, deure herstel en gemaak pas. By ‘n paar plekke het hulle ook diefwering opgesit.

Vanaand het die meisies ‘n rustige aand terwyl die seuns ‘n DVD aand hou en ook sop uitdeel vir almal wat kom.

Marc het ook vandag sy getuienis gedeel met die ouer kinders voordat ons vir hulle Gideon Bybels gegee het. Die mooiste mooi: twee seuns wat nie kan wag om die Bybel te lees nie. “Is dit nou weer vroeër of later in die Bybel” terwyl daar naarstiglik in die naslaan indeks rondgesoek word. En dan lees die twee stukke vir almal om hulle.

Van A2J:

Ek moet sê daar was BAIE klere. Ek wil dankie sê van A2J af vir almal wat klere geskenk het. Die A2J meisies het ook hulle eie “fashion show” gehad … dit was snaaks! Tannie Elogia het gepraat oor dwelms en wat gebeur as jy dwelms misbruik. Dit was scary. Loeries was geskok. Ek dink hulle het wakker geskrik na hulle die foto’s gesien het. “Ons is uiters dankbaar dat die Here julle vir ons gestuur het,” van een van die ooms. – Jono

Om na Loeriesfontein te kom was vir ons as gesin iets waaroor ons mooi moes nadink. Ons was nie seker hoe en waar ons van diens kon wees nie, maar het dit opgedra in gebed aangesien ons gevoel het dat die Here ons geroep het.

Ek het ingeval by die mediese span wat siftingstoetse gedoen. Die oumense wat ons pasiënte geword het, het vinnig in ons harte ingekruip en het sommer ‘n páár keer teruggekom om hul bloeddruk te laat meet en te kuier. ‘n Geskenkie, ‘n drukkie en ‘n oor om na hulle stories te luister, was vir hulle so ‘n groot seën.

Die belangrikste les wat ons hier geleer het, is dat mens nooit ‘n kind te vroeg kan blootstel aan ‘n lewe van diens nie:

Migael (6) het land en sand gesels met ‘n ou oom in die ouetehuis. Sy vrou sê hy is doof en kan nie ‘n woord hoor wat sy sê nie, maar tog het hulle ‘n volwaardige gesprek gehad!

Nina (5) was heeltyd aan my sy. Haar grootste vreugde was om haar babakombersies aan kindertjies uit te deel en om haar ou klere aan ‘n kleintjie te sien ‘n dag nadat dit uitgedeel is.

Francois het ingeval by die onderhoudspan. Hulle was doodmoeg, maar het net nog en nog projekte aangepak. Hulle het elke dag met nuwe ywer hul dagtaak aangepak, sonder om ooit te kla.

Maar die belangrikste hier in Loeries is wat ons ontvang het. Al het ons gekom om te gee, is ons ryker en nog nader as gesin.

Ons is waarlik geseënd, om nie eens van die goeie voorbeeld van A2J te praat nie. Hulle het aan my kinders gewys hoe ‘n jongmens sy lewe moet inrig in diens van God.

Geen mens kan uit eie krag so ‘n enorme taak vir Sy koninkryk aandurf nie. Alle eer aan God!  – Evette

Allerlei:

Wanneer is jy regtig moeg? Wanneer jy deur ‘n potjiekos aandete slaap en daarna so bly is jy het nog nie jou boeliebeef proviant geëet nie…. en nóg blyer om te hoor daar is oorskiet! 🙂

‘n Goeie geluid – die ge-“kwetter” van A2J’ers wat in die aand saam lesse voorberei, terwyl hulle besig is om verhoudinge met mekaar te bou, so tussen die lag, stories oorvertel en saam wees.

Maandag het ‘n dogtertjie hare klere geruil sodat sy “anders” lyk om weer en weer en weer in die ry te kon staan vir sop. – Daar ís honger, fisies en emosioneel.

Voorbidding

  1. Vir hulp om altyd die Here en Sy wil eerste te stel in wat ons doen. Ook wanneer ons huis toe gaan.
  2. Baie dankie vir die spesiale bande na die week saam.
  3. Vir die gesondheid van die span.  Drie was vandag in die bed en daar is ‘n hele paar seer kele.
  4. ‘n Groot dankie vir goeie weer.  Bid ook dat die voorspelde reën sal val, maar dat dit ook sal inpas wanneer dit moet droog wees en wanneer nat.
  5. Bid dat ons huis toe sal gaan en met ander oë rondom ons sal kyk. Bid dat die uitreik nie net ‘n “kop” ervaring is / was nie, maar ‘n hartservaring.
  6. Vir seën vir die laaste twee dae: die vroue tee en dat almal sy veilig sal tuis kom.


Dankie vir julle gebede.

Johann

NGVishoek: Ds. ( dominee ) Martin Barnard.

Lees Meer >>

A2J Uitreik: Loeriesfontein Deel 2 1-2 Julie 2014

 

Die middag se sport loop goed af. Baie van die vriendskappe word juis hier gebou rondom ‘n bal / springtou. Loeries se kinders moet soms ons gebrek aan “ball skills” oorsien, maar steeds lekker saam :-).

Die aand is tyd vir gesinsaand waar Evette en Eulogia die maatskaplike, maar ook die fisiese effekte van dwelms deel. Die idee is om gesinne wat probleme het raad te gee en ook die wat nie het, voor te berei om dinge beter aan te pak as dit oor hulle pad kom. Deel van die aand is om die gesinne te toets om te sien hoe goed hulle mekaar ken. Die jaar was daar reuse pryse – twee eetkamerstelle en ‘n lazy-boy.

Hierna is dit tyd om klere uit te deel vir die volwassenes. Skoene bly maar altyd moeilik met die mansskoene wat gewoonlik nie groter as ‘n nommer 6 hoef te wees nie. Ons kon wel vir die meeste ‘n paar stukkies klere of skoene gee.

Woensdag

Die volwassebediening is ‘n ander been van die uitreik. Deur die oggend word koffie gedrink, saam gekuier en saam gebid waar baie van die huise weduwees is wat alleen bly. In die middae besoek ons ook mense van deur tot deur om kospakkies uit te deel waar ons kan sien daar nood is. Sover kon ons van die beddegoed uitdeel en 50 sakkies kos aflewer. Die oorskiet sop van die Dinsdag (nadat ons te min gevat het die Maandag), kon ook ‘n paar huisgesinne help.

Die ouetehuisbediening is vanjaar verdeel tussen die ouetehuis net agter die koshuis asook ‘n winkeltjie waar ‘n “bejaardes klub” bymekaar kom. Marthie doen oefening met die mense en probeer ook help / hulle omstandighede beter maak waar ons kan. Die mediese span was ook hoogs in aanvraag, net om seker te maak “alles is nog reg”.

Die kinders kry vandag die geleentheid om klere te kry. Die een meisie wat regtig gebrek lei, was so opgewonde en het elke 5 minute gevra, “Gaan ons nou klere kry?”. Later die dag het sy en haar ma kom dankie sê. Van die A2J’ers kon vanaand ook sien hoe hul pajamas ‘n nuwe tuiste gevind het :-).

Woensdae het ons ‘n afmiddag met geen sport nie. Ons het wel ‘n uitstappie. Dié keer vinger trek, wat – nadat van die seuns letterlik teen mekaar geoefen het – ‘n geleentheid was om teiken te skiet met ‘n 308 en ‘n geweer uit die 2de wêrelde oorlog. “Aaah – vinger trek…!”

Die aand se “Loeries’ got Talent” loop goed af met van die oulikste gediggie voordragte tot rap en riel.

Laataand is dit terugvoer tyd sodat ons kan hoor wat ander die dag ervaar het en te hoor van stukkies waar God werk in ons en in Loeries se mense.

Van die A2J’ers

Ek het op die uitreik gekom met ‘n verwagting en glad nie geweet wat om te om te verwag nie. Dis verseker ‘n groot aanpassing om na mense uit te reik en my liefde wat ek van die Here ervaar te deel met my medemens.

By die kerkdiensaand wat A2J aangebied het, was dit vir my ‘n belewenis om te sien hoe jong tieners vir ouer mense bid.

Die eerste dag wat ons lesse aangebied het, het ons deur die huise geloop en die kindertjies geroep. Van die kleinste kindertjies het aangehardloop gekom en dit was so lekker om te sien hoe opgewonde hulle was om van ons Pappa te hoor.

Om die geskenkpakkies en die sop vir die kinders uit te deel, kon ek sien wat dit vir hulle baie beteken en het dit vir my net nog meer vreugde gegee.

By die geestelikeaand het ek weereens besef dat elke mens pyn het en dat God saam met ons is en ons help met alles. – Celine

Allerlei

“Ma, ek het dit vir jou gewen”, seun in trane aan sy ma nadat hulle die derde prys gewen het met die gesinsaand. Dit was ‘n lazy-boy / gemakstoel wat sy juis graag wou gehad het.

Met die klere uitdeel, soek die een tannie op en af, maar kon niks kry nie. Sy is al op pad uit toe sit iemand anders skoene terug wat te klein is. Die regte grootte, die regte snit (vir winter). Presies reg bestem.

Voorbidding

Bid saam met ons –

  1. Dankie vir die besondere jongmense wat God besig is om te vorm. Vandag weer skroom hulle nie om in te spring in ‘n nuwe stituasie of sommer ‘n maat wat siek is se groep aan te neem vir die dag nie. Bid dat Hy die goeie werk “ent-uit sal volhou”.
  2. Vir die gesondheid van die span. Ons is steeds geseënd met net nog tweede seun wat vandag olik gevoel het. Na ‘n goeie dag rus was sy oë ook sommer helderder. Bid ook vir krag en ‘n goeie gesindheid waar die moegheid begin deurslaan.
  3. Die weer hou nog baie goed. Bid dat dit steeds so sal wees ons die meeste gebruik sal maak van elke geleentheid.
  4. Vir die “badkamerbediening”. Die storte werk so dat die meeste deur die aand kan stort, solank hulle kans gee dat die water weer warm word. Bid dat ons sal aanhou getuig in Loeriesfontein se mense se huise – en aanhou afhanklik wees van Hom, selfs vir ‘n warm bad.

Vir krag, moed, hoop en liefde vir die werk en geleenthede wat die laaste paar dae van die uitreik voorlê.





Groete,

Johann

NGVishoek: Ds. ( dominee ) Martin Barnard.

Lees Meer >>

As ek klaar vertel het van Jesus …


God verwag niks van Jesus-mense nie, Hy het absoluut niks nodig van ons af nie. Indien Hy wel iets nodig het vir sy koninkryk, dan gee Hy dit – Hy gee en doen alles wat Hy nodig vind, in en deur elke Jesus-mens. Dit is sy hoofaktiwiteit dag en nag! Jy kan as Jesus-mens nooit weer in die moeilikheid kom by Hom vir iets wat jy doen of nie gedoen het nie. Hierdie is die kern-leefwyse wat nuwe en ou Jesus-mense nodig het om raak te lewe met Hom in jou!

Om werklik vry te wees as Jesus-mens, beteken dat Hy ryk is. Ja, skatryk in alles wat goed is en Hy deel dit so graag uit en Hy doen dit in ons. Soos jy jou hart oopmaak dat Hy in jou woon en beheer neem in jou, net so gaan dit elke dag voort. Maak jou hart elke dag (eintlik elke sekonde) oop vir sy goeie alles in jou spesifiek ter wille van wie Hy vir jou wil wees. Hy maak jou wat Hy wil hê jy veronderstel is om te wees in sy oë: mededeelsaam, goedhartig, vergewensgesind …

… dit is ware genot vir Jesus-mense!

Genot is nie jy wat oulik is deur beter te wees as ander, meer pligsgetrou, ryker, slimmer, mooier – dis alles nie-Jesus-mense se idee van genot. Vir elke Jesus-mens is genot Jesus in jou – Hy is en word jou grootste geluk en geniet en lag!

Gaan vertel van die korrekte prentjie van wie God is, maar veral dan wat elke Jesus-mens van Hom in jou kan verwag. Swaarkry, probleme, spanning, krisis, seerkry … dit is alles deel van elke mens op aarde se lewe, ook vir Jesus-mense. Vertel dit ook vir nie-Jesus-mense, vir nuwe en ou Jesus-mense!

Bron:  http://doomcharl.blogspot.com/ NGVishoek: Ds. ( dominee ) Martin Barnard.

Lees Meer >>