• Hulle was bekeer.

Paulus sukkel nou nie met woorde soos ‘nominale Christen’  of ‘’n goeie kind’ nie. Hy laat baie min beweegruimte as hy van bekering praat: Iemand wat aan Christus behoort is ‘n nuwe mens. Die oue is verby, die nuwe het gekom (2 Korintiërs 5:17). Ons moet ophou tevrede wees as jongmense jeuggroepe bywoon. Ons moet bid dat die Heilige Gees in hierdie jongmense se harte werk. Ons moet weer op bekering fokus. Dit is bekeerde jongmense wat aanhou om vir Jesus Christus lief te hê en die gemeente te dien.

• Hulle is toegerus, nie vermaak nie

Vermaak is nie verkeerd nie, maar mense wat met jongmense werk, moet gereeld die woorde van Efesiërs 4:11 – 12 herhaal. Daar sê Paulus hoekom die Here sekere werkers vir die kerk gegee het: Sy doel daarmee was om gelowiges toe te rus vir hulle diens en vir die opbou van die liggaam van Christus. Christus gee leermeesters vir die gemeente nie om jongmense te vermaak nie, maar om hulle toe te rus.

• Hulle ouers het die evangelie aan hulle verduidelik

Jeugleiers sukkel om jong mense toe te rus as hierdie toerusting nie in die jongmense se ouerhuis versterk word nie. Een ding wat jongmense wat nie die kerk verlaat nie, onderskei, is ‘n ouerhuis waar die evangelie sentraal gestaan het en nie op die periferie nie. Hulle moes eredienste bywoon; hulle is aanspreeklik gehou vir wat hulle doen; hulle ouers het huisgodsdiens gehou.

Hierdie is nie ‘n absolute formule nie. Kinders uit Godvresende gesinne verlaat die kerk; kinders uit gebroke gesinne vind Jesus Christus. Gee leiding aan ‘n jongmens oor hoe hy moet leef, en hy sal ook as hy al oud is nie daarvan afwyk nie (Spreuke 22:6). Dit werk nie 100% so nie, maar dit is ‘n beginsel wat deel is van God se plan vir ons.

Bron:  bybelkennis.co.za

NGVishoek: Ds. ( dominee ) Martin Barnard.

En dan nog al die wette wat in die Bybel vir ons die sonde deeglik uitspel. En Paulus wat sê hoe alle mense van nature is: “Hulle is een en al ongeregtigheid, slegtheid, hebsug en gemeenheid; hulle is vol jaloesie, moord, twis, bedrog en kwaadwilligheid. Hulle skinder en praat kwaad; hulle haat God, hulle is hooghartig, aanmatigend, verwaand; hulle is mense wat kwaad uitdink, ongehoorsaam aan hulle ouers; hulle is onverstandig, onbetroubaar, liefdeloos, hardvogtig.” (Romeine 1:29 tot 31)

Dis mos maklik: bly net weg van die sonde, breek met die sonde, draai jou rug op die sonde, moenie toegee aan versoekings nie, doen net wat reg is, leef ‘n rein lewe …

NEE! NEE! NEE! 1000 maal NEE!

As ek en jy sélf van die sonde kon wegbly, sélf met die sonde kon breek, sélf ons rug op die sonde kon draai, sélf nie toegegee het aan versoekings nie, sélf doen wat reg is, sélf rein kon lewe … dan het Jesus onnodig vir my en vir jou aan die kruis gesterwe! “As ’n mens vrygespreek kon word op grond daarvan dat hy die wet onderhou, sou dit immers beteken dat Christus verniet gesterwe het.” (Galasiërs 2:21b)

“Ons lewe deur die Gees; laat die Gees nou ook ons gedrag bepaal.” (Galasiërs 5:25) Hierdie is die antwoord tot ‘n radikale Jesus-mens-lewe. My gees en God se Gees werk saam aan my reinheid en gehoorsaamheid. Soos wat die Gees God se wet op my hart skrywe, gee ek spesifiek my spontane samewerking. So min mense hoor dit of verstaan dit. Solank my Jesus-lewe van my eie inspanning en eie pogings afhanklik is, sal ek ‘n mislukking voel en wees.

Só werk dit: ek is sondig, ek hoor die goeie nuus van Jesus, sy Gees praat met my hart, Hy werk herskeppend in my sondige hart, Hy vernuwe en reinig my van binne, Hy maak my aan Hom gehoorsaam met my gewillige samewerking, ek word al hoe meer Wie Hy in my is – dit is alles net God se onverdiende guns aan my!

Die sleutel tot ‘n rein lewe is 100% in God se Gees se hand en ek gee 100% my samewerking – Hy alleen laat jou rein lewe soos Hy wil en alleen kán, maar jy wíl rein lewe! Allegories toegepas op ons fokusteks: as jou eie pogings jou laat struikel, laat kap dit af!

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Sonder onvoorspelbaarheid, lukraakheid (randomness), raak die lewe dodelik. Die natuur floreer op ’n sekere mate van lukraakheid, wanneer ’n plant seerkry of selfs wanneer ’n woud afbrand, is dit die beste ding wat kan gebeur, die natuur pas aan en versterk. Wanneer jy die heeltyd dieselfde oefening by die gimnasium doen, sal jy vinnig soos ’n mutasie lyk. Ervare oefen-ers weet dat jy jou spiere moet verras. Boonop sal elke kwantumfisikus jou vertel dat sonder ’n mate van chaos, die heelal nie kan bestaan nie.

Hoekom dan wil ons, ons lewe saam met Jesus so voorspelbaar hê? So uitgewerk en beplan? Ons is so bang vir lukraakheid, dat ons onsself beskerm met roetine en polisse en as dit nie werk nie dan bedwelm ons die lukraakheid van die lewe weg en loop rond met ’n farmaseutiese glimlag.

So lank alles dieselfde bly.

Lees weer hierdie teks: “Daarom moet jy nie vol allerhande vraagtekens wees oor my woorde dat julle nog ’n keer gebore moet word nie. Leer uit die natuur. Hoewel jy die wind hoor waai, kan jy dit tog nie beheer of stuur nie. Dit waai waar dit wil. Jy weet nie eens presies waar dit vandaan kom of waarheen dit uiteindelik waai nie. Maar nogtans waai dit. Presies dit is waar van die manier waarop die Gees werk. Elke persoon wat uit die Gees gebore word, ervaar dit ook so.” — Johannes 3:7-8 DB

Kinders van Jesus is windverwaai, span jou seile en ry die golwe eerder as om in die swembad langs die strand te plas.

Bron:  ekerk.org

NGVishoek: Ds. ( dominee ) Martin Barnard.

Sê nou hulle het nie die evangelieboodskap gehoor nie? Sal mense ná die dood weer ’n kans kry om die keuse van geloof uit te oefen? Is die hel vir ewig? Of is dit slegs ’n tussentoestand op pad na die hemel?

Die twee skrywers, die een ’n internasionale spreker en skrywer van gewilde boeke en die ander ’n teoloog en kenner van die Nuwe Testament, beantwoord vrae soos: gaan almal hemel toe? Het die hel verander van Bybelse tye? Wat het Jesus regtig oor die hel gesê? Wat het sy volgelinge oor die hel gesê? En wat het dit met my te doen?

Die skrywers doen moeite met die Bybel. Dit is hulle vertrekpunt, waarvoor ’n mens groot waardering het, gegewe dat daar soveel verskillende opinies oor dié onderwerpe bestaan. Daarom raai die skrywers jou aan om hulle boek met ’n gebed te lees: Here, ek wil weer wat waar is. U het belowe dat u Gees ons in die waarheid sal lei. Leer U my sodat ek nie deur mense en hulle opinies verwar word nie. En gee vir my die moed om die waarheid uit te leef, ongeag wat dit kos.

Gaan lees gerus weer Lukas 13:25-28, om een voorbeeld te noem, en dink dan aan mense wie se lotsbestemming deur hulle besluit bepaal word: Ek weet nie waar julle vandaan kom nie. Niemand van julle het gedoen wat reg is nie. Maak dat julle van My af wegkom!

Dié mense sal dan huil en op hulle tande kners terwyl hulle sien hoe gelowiges in die heerlikheid van God deel.

Die boekie sluit met antwoorde op sewe vrae wat dikwels gevra word.

Ek beveel die boek aan vir enigiemand wat vrae oor die onderwerp gestel het, en na Bybelse antwoorde soek. Jy is veilig wanneer jy dié boekie lees omdat dit na die Bybelse boodskap luister.

Bron:  ekerkNGVishoek: Ds. ( dominee ) Martin Barnard.

Koers vir die lewe
Nie my pa of my oupa was manne met baie universiteitsgrade nie, maar hulle het geslag na geslag aan die genade van die Here geglo en daarvolgens geleef. Hulle het geglo in die God van die genadeverbond wat Homself uit genade aan ons en ons kinders verbind. Wat déúr ons, Sy koers vir die lewe aan ons kinders as Sy skepsels oordra. 

By pa en oupa geleer
Ek het nie net my naam van Oupa gekry nie. Ek het via Pa en Oupa ook die belang-rikste dinge van die lewe geleer. Van geloof as ’n geankerde vertroue in God, van integriteit wat van jou ’n staatmaker onder die mense maak, van standvastigheid in die Bybelse waarheid wat opgesom word met die woordjie ‘liefde’, van medemenslikheid, en die humor in elke saak.

Hanteer elke vrou met respek
Maar, ek het ook van Pa en Oupa geleer: Jy hanteer elke vrou – klein of groot, wit of swart, uitgesproke of inkennig – met respek. Nie omdat sy nie self die respek kan afdwing nie, maar omdat jy glo dat die beeld van God in haar vroulikheid herstel moet word, of reeds in beginsel herstel is. Dat Christus ook daarvoor gesterf en opgewek is. Dat Hy vroue ook geestelik opwek en nuutmaak om egte vroue te wees. 

Mans, julle moet julle vroue liefhê
Toe ek aanvanklik Paulus se opdrag aan die mans in die gemeentes van Efese en Kolosse lees: “Mans, julle moet julle vroue liefhê…” het ek gewonder waarom hy iets anders vir die vroue sê. Hy sê eenvoudig: “Vrouens, wees aan julle mans onderdanig…” Paulus het met hierdie stelling groot waarhede duidelik gemaak wat ook vandag van toepassing is, ongeag die feit dat die destydse vrou minder status in die gemeenskap gehad het.

Nie ’n besitting of slaaf nie
Wanneer ’n man sy vrou liefhet en met liefde hanteer, verontmenslik of verneder haar ‘onderdanigheid’ of respek vir sy emosies en oordeel haar nie. ’n Man se ware romantiese liefde vir sy huweliksmaat maak nie van haar ’n besitting of slaaf nie; nie wat haar geselskap, geestelike kameraadskap, werkvermoë óf seksualiteit betref nie. Haar behoeftes is net so ’n prioriteit as syne. 

’n Geskenk van die Here
Hy besit haar nie om sy eie ego te bou of sy selfsug of drange te bevredig nie. Sy word sy vrou om, soos sy kinders, ‘n geskenk van die Here te wees. En, ’n geskenk waarvoor jy omgee, pas jy op. Die kleinste merkie of teken van skade, kwel jou…
Die opdrag: “Mans, julle moet julle vroue liefhê,” sê eintlik: Die liefde alleen moet julle optrede begrens en bepaal. Enige optrede teenoor jou vrou wat buite hierdie raamwerk val, is ’n soort mishandeling. Liefdeloosheid en liefdelose handelinge is mishandeling.

Nie uitgesluit van God se norme nie
Selfs die feit dat die vrou destyds nie as die gelyke van haar man gesien is nie, het haar nie van huweliksliefde of romantiese, opbouende liefde uitgesluit nie. Liefde is steeds die Here se norm vir huweliksverhoudinge. Toe Paulus gesê het: “Mans julle moet julle vroue liefhê,” het hy vir die huwelike van destyds, maar ook vir die vandag, gesonde vore oopgebreek. Hy het die Bybelse norm vir die huwelik in waarlik onBybelse omstandighede bevorder.

Bron:  juig.co.za

NGVishoek: Ds. ( dominee ) Martin Barnard.

C.S. Lewis sê: “It would seem that our Lord finds our desires not to strong, but too weak. We are half-hearted creatures, fooling around about with drink and sex and ambition, when infinite joy is offered us. Like an arrogant child who wants to go on making mud pies in a slum because he cannot imagine what is meant by the offer of a holiday at the sea. We are far too easily pleased.”

Wanneer God ons seën, gaan dit oor meer as net meer persoonlike gemak en ’n kortstondige voorspoed. Dan gaan dit oor die uitleef van God se droom vir jou lewe. Dan glo jy dat die Here vir jou ’n geseënde lewe beplan het en dan sien, verwag, leef en werk jy asof daardie lewe reeds gebeur.

God het iets in jou begin wat Hy wil klaarmaak: ’n geseënde lewe van saam met Hom! Glo dit, hoop dit en leef daarvolgens.

Ek glo dat U net die beste vir my, u kind, wil hê, Vader-God.

Bron:  ekerk.org

NGVishoek: Ds. ( dominee ) Martin Barnard.

Vir die volgende nege weke gaan ons nege sleutels ontvang om ‘n lewe oop te sluit waartoe slegs die Gees van God Jesus-mense in staat stel. In nege uitsprake van Jesus gaan ons die geheim van ‘n betekenisvolle lewe en liefde-gevulde verhoudinge ontsluit. Wees egter voorbereid dat ons nie altyd gaan hoor wat ons die graagste wil hoor nie, dit is nie maklik om Jesus te volg nie!

Letterlik sê Jesus in die sogenaamde saligsprekinge “gelukkig is die armes in die gees want hulle is die koninkryk van die hemele” (Matteus 5:3). Die direkte vertaling hiervan is: “gelukkig is dié wat weet hoe nodig hulle God het, want die koninkryk van die hemele is hulle s’n”. Om Jesus te volg, om ‘n Jesus-mens te wees, om Gees-vervuld te lewe, is om deeglik te weet dat net God kan jou daarmee help. Jesus-mense is letterlik 100% uitgelewer aan God én natuurlik het dit direkte invloed op jou daaglikse lewenswyse. Jou gelukkig-wees in die lewe word dus alleen deur God bepaal.

Ongelukkig hoor ons die teenoorgestelde by die goddelose wêreld wat sonder God probeer lewe. Daar hoor ons iemand met ‘n goeie selfbeeld tree met selfvertroue op. Jý moet jouself laat geld. Baklei vir jou plekkie in die son waarop jý geregtig is. Trap op ander, anders gaan daar op jou getrap word. Diegene wat bo uitkom, is dié wat sterker, slimmer, mooier, ryker, skelmer is. Ons lewe in ‘n prestasie gedrewe samelewing. Jy en jou werk word gemeet aan kritiese prestasie-areas.

Die sleutel tot afhanklikheid van God sluit egter ‘n nuwe wêreld en ‘n nuwe lewenswyse oop. Waar jy die Heilige Gees die volledige geleentheid gee om ‘n nuwe gesindheid in jou te bewerk, begin jy eers werklik lewe. Juis omdat jy jouself al hoe meer oorgee aan Hom, beweeg jy dan in die kragveld van Gees. En daar kan geen beter plek in die lewe wees as juis dáár nie. Waar Hy oorneem in jou lewe, maak Hy van jou wat Hy wil hê jy moet wees. Soos wat Hy die ekkigheid in jou laat sterwe, staan die “nuwe jy” op, dan lewe jy eers werklik.

Een manier om hierdie wordende “nuwe jy” te beskrywe, is dat hoogmoed word vervang met nederigheid. En die nederigheid behels dat jy met Jesus se gesag in jou, jou plek in sy koninkryk volwaardig inneem. Jý word bemagtig, jý word toegerus, jý word geliefd, jý word bewonder, jý word opgeneem in God se plan en in sy span, jý ervaar vrede en blydskap … jy lewe betekenisvol, want jy lewe God-vervuld! 

God sluit die ware lewe vir jóú met sleutel EEN oop …

Bron:  http://doomcharl.blogspot.com/

NGVishoek: Ds. ( dominee ) Martin Barnard.

Hy is Vader in die volmaakste sin van die woord, vir elkeen wat in en deur Jesus Christus in Hom glo.

Daarom sê Christus in Johannes 15:9: “Wie My sien, sien die Vader.” Daarom leer Hy ons bid: “Ons Vader wat in die hemel is” (Matt. 6:9). Daarom is die gelowiges kinders van God (Joh. 1:12).

As jy God nie as jou Vader in Christus ken en bely nie, kan jy ook nie bely dat alles in jou lewe (reën en droogte, gesondheid en siekte, rykdom en armoede, ensovoorts) uit sy Vaderhand kom nie. God se teenwoordigheid in jou lewe kan nooit nader wees as wanneer jy Hom ken as jou Vader nie.

Ten slotte maak Jordaan die stelling dat álles wat ons oor God sê “voorlopig, spekulatief, onbepaald, ’n onvoltooide sin” is. Ook dit is nie korrek nie.

Wie erns maak met wat God oor Homself in sy Woord sê en deur sy Gees gelei word, kan soveel van God ken as wat nodig is om verlos te word en om Hom te eer.

Bron:  Beeld.com

NGVishoek: Ds. ( dominee ) Martin Barnard.

Die meeste mense maak egter nie voorsiening vir so ’n gebeurlikheid nie, en ons word daarmee gekonfronteer wanneer ’n ouma of oupa aan lewensondersteunende masjiene gekoppel lê, of ’n gesinslid in ’n ongeluk breinbeserings opdoen en in die intensiewe eenheid beland. JUIG! wou uitvind wat die geloofsimplikasies en Bybelse perspektief is wanneer daar besluit moet word om ’n lewensondersteunende ma-sjien af te skakel. 

Val Waldeck, advies-rubriekskrywer en Christen-outeur sê:
“Die beste advies is om te bid en God vir wysheid te vra. Die Bybel is duidelik dat God die outoriteit oor die lewens van mense het. Hy beveel dat niemand die reg het om ‘n medemens te vermoor nie. “Jy mag nie moordpleeg nie.” (Eks 20:13). Die Bybel veroorloof wel geregverdigde doodmaak van ander binne die konteks van oorlog, doodstraf, en selfverdediging. Met die afsit van lewensondersteunende masjiene moet die vraag gevra word: Word hierdie persoon kunsmatig aan die lewe gehou? Is daar hoop op herstel? Is hulle breindood verklaar? 
Elke vraag moet versigtig opgeweeg word aan die hand van deskundige mediese advies. Dit is ‘n netelige kwessie. Ons wil nie iemand anders se lewe in ons eie hande neem en dit voortydig beëindig nie, maar wanneer laat ons die persoon bloot toe om te sterf? As ‘n persoon slegs deur masjiene aan die lewe gehou word, is dit nie verkeerd om die masjiene af te sit nie. 
Sou God wel die persoon aan die lewe wil hou, is Hy heeltemal daartoe in staat om dit sonder die hulp van masjiene te doen. Niemand moet skuldig voel oor so ‘n moeilike en pynlike besluit nie.

Vir diegene wat reeds so ‘n besluit moes neem en met skuldgevoelens worstel, bied Bennie Mostert van ‘Jericho Walls’ hierdie advies:
“Dood is onvermydelik en daar is ‘n onvermydelike punt waar die masjiene afgeskakel moet word – iemand moet die onafwendbare besluit neem.” Sy raad vir diegene wat so ’n besluit moet neem, is om met familie, maar ook goeie vriende te praat. “Dit gee gewoonlik meer perspektief en help om rasionele besluite te neem. 
Die hele familie moet konsensus hê. Dit is gewoonlik goed om voor en na die tyd saam met iemand te bid – indien moontlik, nie ’n familielid nie.” Dit is hier waar geestelike leiding van ’n leraar benodig word.

Pastoor Jack Martin en hoof van Filadelfia Opleidingsentrum sê:
“Hierdie tipe oomblikke is waar ons tot stilstand geruk word en besin oor die waarde van die stoflike. Onderliggend aan hierdie emosionele krisis is die mens se inherente vrees vir skeiding en eensaamheid. Berading mag benodig word voordat die masjiene afgeskakel word asook daarna. Die verwer-king van die verlies en gepaardgaande skuld-emosies, is ’n proses waarvoor voldoende tyd gegun moet word.” Sy advies vir persone in die situasie wat so ’n besluit moet neem, is: 
• Draai na God, veral die Heilige Gees, as Berader en Trooster. ‘Godsdiens’ is in hierdie oomblikke meer as net ’n ritueel. Dit is tasbaar, konkreet, ’n anker van vrede te midde van ’n storm van emosies.
• Wees so rasioneel en objektief moontlik en vertou op God se ware hoop in die skynbare donker situasie
• Onthou hierdie is nie die einde nie, maar oorgang tot ’n nuwe begin, ’n ewige lewe. “En ek het ‘n nuwe hemel en ‘n nuwe aarde gesien…En God sal al die trane van hulle oë afvee, en daar sal geen dood meer wees nie; ook droefheid…sal daar nie meer wees nie, want die eerste dinge het verbygegaan. En Hy wat op die troon sit, het gesê: Kyk, Ek maak alles nuut.” Op 21:1-5

DIE ONDERSKEID TUSSEN AKTIEWE EN PASSIEWE GENADEDOOD
Aktiewe
• Doel van die dokter is om die pasiënt dood te maak
• Houding van die dokter is om beheer oor die situasie te neem en God te speel
• Die agent wat die dood veroorsaak  – die dokter

Passiewe
• Om die sterwensproses nie onnodig uit te rek nie, laat pasiënt toe om te sterf
• Die dokter staan in nederigheid en oorgawe terug en erken hy is nie God nie
• Die agent wat die dood veroorsaak  – die siekte

Bron:  juig.co.za

NGVishoek: Ds. ( dominee ) Martin Barnard.