Hoe verskil ons van ape?

Dít is ook nie uit sommer enige bron aangehaal nie, maar uit ‘Science’, wat deur die ‘American Association for the Advancement of Science’ uitgegee word. ‘Science’ word as een van die top wetenskapjoernale ter wêreld beskou (die ander een is ‘Nature’, van Engeland). 

 

Die oorspronklike 1%-aanspraak dateer uit 1975. Dit was lank voordat ’n lynregte vergelyking van individuele ‘letters’ (basispare) van die genetiese kode van die mens en die sjimpansee se DNS moontlik was – die eerste konsepontwerp van die mens-DNS is nie voor 2001 gepubliseer nie en die van die sjimpansee-DNS eers in 2005. 

Die 1%-aanspraak van 1975 het gespruit uit die (nou verouderde) vergelyking van slegs bepaalde segmente van mens- en sjimpansee-DNS wat vooraf vir gelyksoortigheid afgesonder is. Die sjimpansee- en mens-DNS-stringe is toe noukeurig ondersoek vir die mate waarin hulle aan mekaar heg – ook bekend as DNS-hibridisering.

Sou ’n 1%-verskil ‘feitlik identies’ wees?
Die mensgenoom het ongeveer 3 000 miljoen ‘letters’. As die 1%-syfer korrek was, sou dit ’n verskil van 30 miljoen ‘letters’ beteken. As al die ‘letters’ gedruk word, sou dit gelykstaande wees aan tien Bybelgrootte boeke. Dit behels 50 keer die hoeveelheid DNS in die eenvoudigste bakterie. Dit is dus eintlik ’n baie groot verskil; een wat die vermoë van selfs die mees optimistiese evolusionêre scenario ver oorskry, selfs gegewe die aansprake van miljoene jare. 

Wat is die werklike verskil?
Danksy verskeie navorsingspublikasies kan die mens- en sjimpansee-DNS tans met mekaar vergelyk word. Selfs dít is egter problematies omdat die sjimpansee-genoom nie vanuit niks saamgestel is nie. Segmente van die sjimpansee-DNS is eers gekodeer, dit wil sê, die volgorde van die ‘letters’ is chemies in ’n laboratorium bepaal. Deur van rekenaars gebruik te maak wat segmente vergelyk, is die stringetjies ‘letters’ toe teenoor die menslike genoom opgestel. Die menslike genoom is toe verwyder, wat ’n pseudo-sjimpansee-genoom agtergelaat het, met uiteindelike aannames oor gemeenskaplike afkoms (evolusie). Dit het ’n ‘basterkode’ geskep, wat in werklikheid nie bestaan nie. Die aanname dat evolusie wel plaasgevind het, het neerslag gevind in die samestelling van die sjimpansee-genoom wat dit meer na ’n menslike genoom laat lyk het as wat werklik die geval was. Selfs met hierdie aannames, is die werklike verskil heelwat groter as 1%. 
In 2007 is ’n artikel in ‘Science’ gepubliseer oor die eendersheid van die mens- en sjimpansee-DNS getitel, ‘Relative differences: the myth of 1%’. Die outeur, John Cohen, het die voortgesette gebruik van die 1%-syfer bevraagteken. Hy het na latere navorsing verwys wat op ’n verskil van nagenoeg 5% dui. En tog bestaan die 1%-mite steeds voort in dieselfde joernaal in 2012.
Om te illustreer hoe onjuis dit is, let op die volgende: In 2012 hersien drs. Jeffrey Tomkins en Jerry Bergman gepubliseerde studies wat die mens- en sjimpansee-DNS vergelyk. Met ál die DNS in ag genome, en nie net vooraf gekose segmente nie, was hulle bevinding: “ ’n Mens kan met redelike sekerheid bepaal dat die mens- en sjimpansee-genoom nie meer as 87% identies is nie, selfs nie eens hoër as 81% nie.”
Met ander woorde, aansienlike verskille is betrokke, moontlik selfs groter as 19%. Tomkins het inderdaad sy eie deeglike vergelyking gemaak en bevind dat die verskil 30% is. Ook dat die manlike Y-chromosoom [van die mens en sjimpansee] radikaal verskil van evolusioniste se verwagtinge. Om twee komplekse genome te vergelyk is inderdaad ’n moeilike taak. Daar moet aannames gemaak word oor die belang van verskillende gedeeltes van die DNS, asook die verskille in onderskeie tipes. Byvoorbeeld, hoe moet menslike gene wat nie in sjimpansees aanwesig is nie, benader word en ook andersom? Die neiging is om dit te ignoreer en net gene wat ooreenstem te vergelyk.
Heelwat van die vergelykings het slegs proteïenkoderende gene behels (slegs 1,2% van die DNS, en verskeie proteïenkoderende gene wat gedeel word, stem inderdaad baie ooreen) met die aanname dat die res van die DNS nie ‘belangrik’, of selfs ’n tipe ‘rommel’ is. Hierdie uitgangspunt is egter nie meer houdbaar nie; trouens bykans al die DNS het waarskynlik ’n funksie, weer eens in teenstelling met die verwagtinge van evolusioniste. Selfs al sou ‘rommel’-DNS nie ’n funksie verrig nie, is die verskille hier baie groter as dié in die proteïenkoderende gedeeltes, en moet dit ingesluit word wanneer verskille bepaal word. Ons is dus níé 99% identies nie; nie naastenby nie!

Wat sou enige persentasie ooreenstemming bewys?
Nòg evolusioniste nòg kreasioniste kon voorspellings waag oor die persentasie ooreenkomste alvorens dit bereken is. Met ander woorde, of dit 99%, 95%, 70%, of wat ook al was, evolusioniste sou steeds op ’n gemeenskaplike afkoms aanspraak maak terwyl kreasioniste gemeenskaplike ontwerp sou voorhou. Om die implikasie van hierdie data te verstaan, moet in gedagte gehou word dat eksperimentele wetenskap nie hier betrokke is nie; almal maak afleidings oor die betekenis van die data, gebaseer op persoonlike wêreldbeskouings.Hoe groter die verskille tussen aap en mens is, hoe groter die probleem om dit binne die evolusionêre tydsraamwerk te probeer verklaar; gevolglik poog evolusioniste voortdurend om die verskille as onbelangrik op die agtergrond te skuif.

Die mite duur voort!
’n Vergelyking van heel genome het baie groter verskille as 1% onthul, en tog duur die mite van 1% voort. Hoekom onderskryf ‘Science’ in 2012 steeds die mite? In 2007 het Cohen vir Svante Pääbo, ’n genetikus en lid van die ‘Max Planck Institute for Evolutionary Anthropology’ se sjimpansee-konsortium, so aangehaal: ‘Op die ou end, is dit ’n politieke, sosiale en kulturele kwessie oor hoe ons onderlinge verskille benader.’
Miskien weier evolusioniste om die 1%-mite te laat vaar, juis omdat dit ’n politieke, sosiale en kulturele doel dien. Wat sou daardie doel wees, buiten om die duidelike implikasie van DNS-vergelykings – dat ons baie anders as sjimpansees is – te ontken? Die mite van eendersheid is gebruik om die aanspraak te steun dat die mens op geen spesiale plek in die wêreld kan aanspraak maak nie, en dat selfs sjimpansees menseregte gegun sal moet word.
Die groot verskille klop gewis nie met evolusionêre verwagtinge nie. Dit strook wel met die mens wat uniek, afsonderlik van diere geskape is. God het die eerste Adam uit stof gemaak (Genesis 2:7) en die eerste vrou uit die man se ribbebeen (Genesis 2:22), nie uit aapmense nie. En mense, anders as ander skepsels, is na die beeld van God geskape (Genesis 1:26,27); ’n spesiale skepping. Hierdie beeld het nie verlore gegaan nie, maar is deur die sondeval geskend. God het die mens met ’n spesiale doel geskape—vir die hede sowel as die Ewigheid.

 

DR. DON BATTEN B.Ag.Sc. (Hons.), Ph.D. is die hoof-uitvoerende beampte van Creation Ministries International (CMI) in Australië. Dr. Johan Kruger 
van CMI SA is beskikbaar vir aanbiedings: krugerjo@mweb.co.za of 021 979 0107

Bron:juig.co.za

Lees Meer >>

Beleef jy ‘n middeljarekrisis?



BINNE-OORLOG
Een van die faktore wat ‘n rol speel, is veroudering. Gewoonlik voel die persoon dat hy/sy op daardie ouderdom baie meer moes bereik het. Marc Gerzon het die volgende stelling oor die verstaan van Volwasse Verande­ring/Metamorfose gemaak:
“I had a war going on inside me between the voice that said, ‘You’re finished growing, you’re done, it’s a done deal’, and another voice that said, ‘You’ve only begun to explore what life is about!”

TEKENS VAN DIE MIDDELJARE­KRISIS
Wat verklap beslis dat ‘n persoon midde-in die MJK is? Hier is ‘n paar tekens dat jy/jou eggenoot/’n geliefde dié krisis beleef:

 

  • Hy/Sy dra ‘jonger’ klere
  • Hy/Sy kies ‘n jonger vriend/vriendin
  • Hy/Sy koop ‘n sportmotor
  • Hy/Sy streef na maniere om sy/haar jeug te behou

In ernstige gevalle kan dit selfs na selfmoord of middelmisbruik lei.

DIE SIMPTOME
Wat nou van die persoon wat nié ‘n sportmotor koop of anders aantrek nie? Mis­kien is dit nodig dat jy die volgende simptoom-oorsiglysie deurgaan om vas te stel of jy/jou eggenoot/ ‘n geliefde moontlik ‘n grensgeval is:

  • Verveeldheid, moegheid of oormatige energie
  • Selftwyfel
  • Dagdromery
  • Geïrriteerdheid
  • Onverwagte woede-aanvalle
  • Reaksie op alkohol, dwelms of kos
  • Verlaagde of verhoogde seksdrang
  • Verhoudings, veral met ‘n jonger persoon.

Indien jy ongeveer 70% van hierdie lysie kon afmerk, is jy/jou eggenoot/’n geliefde baie beslis in ‘n MJK vasgevang.

INVLOED OP GEVOELENS
Hoe sal ‘n MJK ‘n persoon se gevoelens beïnvloed?

  • Jy is ontevrede met die lewe/jou leefstyl
  • Verveeldheid met dinge/persone wat nog altyd deel van jou lewe was
  • Avontuurlustig en ‘n begeerte na iets heeltemal ‘anders’
  • Twyfel oor die betekenis van die lewe en die geldigheid van besluite wat vroeër geneem is
  • Verwarring oor wie jy is en waarheen jou lewe oppad is


VERSKILLENDE INVLOEDE
Jy word nie net eendag wakker en besluit dat dit nou die regte tyd vir ‘n MJK is nie. Daar is gewoonlik verskeie invloede wat tot die toestand aanleiding gee. Daar is menige omstandighede wat daartoe aanleiding kan gee:

  • Mans/vrouens wat jonk getroud is
  • ‘n Ongelukkige huwelik
  • Leënes-sindroom
  • Ontevredenheid by die werk
  • Ouer word
  • Rebelse kinders
  • Depressie
  • Angs en stres
  • Twyfel
  • Skuld
  • Aansienlike verlies of verandering
  • Dood van ‘n ouer
  • Afdanking by die werk
  • Egskeiding

Hierdie tydelike toestand kan intern sowel as ekstern manifesteer.

EKSTERNE GEVOELENS

  • Fisieke verwaarlosing
  • Finansiële wanbestuur
  • Sosiale disfunksie
  • Prestasiedruk
  • Korreksie word as kritiek ervaar
  • Stryd om gesag te aanvaar
  • Skeiding van die eie omgewing


INTERNE GEVOELENS
Mense wat die MJK ervaar, raak soms betrokke by drastiese leefstylveran­deringe wat langtermyneffekte kan hê. Indien jy byvoorbeeld dink dat alles jou maat se skuld is, kan jy moontlik betrokke raak by ‘n verhouding, selfs ‘n vinnige egskeiding verkry, net om later uit te vind die probleem was eintlik maar jyself. Die volgende gevoelens is bewys van die effek wat die MJK op jou het:

  • Emosionele seer
  • Geestelike nie-funksionering
  • Angs/bekommernis
  • Vrees vir verwerping
  • Onsekerheid
  • Trots/perfeksie
  • Swak selfbeeld

Daar is natuurlik leefstylveranderinge wat baie positief is – jy kan dalk beter begin eet, oefen, meer slaap kry of van klein, onnodige verpligtinge ontslae raak. Indien jy of jou maat deur die MJK gaan, is dit baie belangrik dat jy nader aan God beweeg en ook na ander sterk godvresende persone, wat jou gedurende hierdie uitdagende tyd kan bystaan, gaan vir hulp.

‘N FILOSOFIESE PERSPEKTIEF
Sommige mans raak heel filosofies oor ‘n MJK – maar nie noodwendig wys op ‘n Bybelse manier nie! Volgens een anonieme heer: “Mans spandeer hulle twintigs deur glad nie om te gee wie hulle is nie, hul dertigs deur te word wie hulle is, hul veertigs deur te probeer agterkom wie hulle eint­lik is en hul vyftigs deur te probeer ver­ander wie hulle werklik is…” Dit is seker waarom hierdie spesifieke meneer sy Mercedes SLK Sport gekoop het, na rap-musiek luister én goue kettings in sy vyftigs dra?

WAT KAN EK DOEN AS EK DIE KRISIS BELEEF?

  • Erken die waarheid omtrent die situasie
  • Identifiseer waar jy nie regtrap t.o.v. verhoudings nie. Besluit wat om te doen om dit reg te stel of dit te laat staan
  • Wees baie realisties oor jou werklading ten einde uitbranding te voorkom
  • Kyk baie krities na jou gesondheid en besluit hoe jy jou leefstyl gaan verander om balans te kry
  • Plaas jou huislike lewe onder die ver­grootglas en besluit op ‘n aksieplan om herstel te bring

Leer uit jou ervaring en wees ook baie oop vir raad van ander. Dit is baie minder skadelik om op eie koste te leer. Wees teenoor iemand verantwoordbaar en versoek gebed en berading by jou kerkleiers. Dit is baie belangrik om oor die onderwerp op te lees en nie toe te gee aan tipiese MJK-gedrag nie. Vra ook hulp t.o.v. nuwe doelstellings, nuwe groei-areas in jou lewe en om jou te help om wyse besluite toe te pas.

HOE VOORKOM EK ‘N KRISIS?
Jy kan ‘n MJK voorkom deur weer op vier groot areas in jou lewe te fokus en dan al jou bekommernisse, vrese, hoop en drome na God toe te bring. Die vier areas is:

WERK AAN JOU VERHOUDINGS
Teen die middeljare is die meeste huwelike op hul laagste punt ooit. Die huwelik is vervelig en afgesaag omdat daar nie te veel aandag aan spandeer word nie. Te veel druk by die werk en te veel aktiwiteite met die kinders kan gehaltetyd met mekaar, en om ‘n warm huweliksverhouding te bou, verminder. Werk daaraan! ‘n Sterk huwelik sal help om ‘n MJK te verhoed.

DINK WEER OOR JOU LOOPBAAN
Wie het God jou geskep om te wees? Wat is jou gawes en ta­lente? Word dit in jou loopbaan gebruik en het jou loopbaan ‘n dimensie wat ander mense se lewens ten goede impakteer? Om iets vir ander te doen, gaan al hoe belangriker word namate jy ouer word. Jy wil tog sekerlik ‘n nalatenskap agterlaat?

HERONDERSOEK JOU WAARDES
Jy het drie belangrike bronne: tyd, geld en energie. Vra jouself: “Spandeer ek my tyd, geld en energie op die regte manier? Is ek waar God my bedoel het om as spesiale en unieke persoon te wees?” Moontlik sal jou MJK jou die moed gee om wéér oor jou loopbaan te dink en miskien, net miskien, te doen wat jy nog altyd wou doen.

TYD SAAM MET GOD
Gedurende die MJK het jy stabiliteit nodig. As jy ‘n Christen is, volg Christus – selfs al voel Hy vir jou by tye baie ver. Dit voel maar net so omdat jy ‘n krisis beleef. Hou aan om met God te praat en Sy Woord te lees. Lees Psalms en laat toe dat God jou hart masseer. Raak by ‘n klein Bybelstudiegroep betrokke. Teen die middeljare het baie mense maar min ware vriende.

Gebruik hierdie tyd om die ware vriendskappe te bou en te verstewig en ook om nader aan jou eie familie en jou familie in Christus te kom. Onthou – God gee werklik vir jou om. Indien jy nog nooit jou lewe aan die Here gegee het nie: die Bybel sê baie duidelik dat, indien jy jou hart en jou lewe vir Jesus oopmaak, Hy sal inkom en gemeenskap saam met jou hê.

“Kyk, Ek staan by die deur en Ek klop. As jy My stem herken en die deur oopmaak, sal Ek na jou toe ingaan en ons sal die feesete saam geniet. Elkeen wat aanhou oorwin, sal ek toelaat om saam met My op die troon te sit, net soos Ek oorwin het en saam met My Vader op die troon sit.” Openb 3:20-21.

IETS OM TE HERKOU…
Die middeljare is dié tyd van herevaluering. Die jong volwassene vra: ‘Wat gaan ek doen?’ Die middeljarige volwassene behoort te vra: ‘Waarom doen ek wat ek doen?’

Bron: juig.co.za

Lees Meer >>

Oppad na die kruin


Klimmers gebruik draers (Sherpa’s) om hulle te help tot op ’n punt waarna hulle dan alleen verder klim. En dis hiér waar die manne van die seuns geskei word. Dis dán wanneer jy stoksiel alleen met jouself is, waar jou kragte tot die uiterste beproef word, waar jou stamina tot op die been getap word en waar oorwinning gepaard gaan met absolute hel vir jou liggaam. Daar het egter ook al meer as 230 mense op die berg gesterf en daar is meer as 200 liggame wat nooit van die berg verwyder sal word nie. Dié liggame het bykans glad nie vergaan nie a.g.v. die koue en ys. Dis ’n grusame gesig vir klimmers wat daar verbybeur.

 

En so is die lewe ook. ’n Ewigdurende stryd om die finale oorwinning te behaal en nie almal is ewe suksesvol nie. Min mense “finish strong”. Party haal skaars die laer basiskampe, soos op Everest waar daar etlike van hierdie basiskampe is waar jy jou kragte kan herwin sodat jy weer kan voortbeur tot by die volgende een. Die lewe word swaarder met die tyd. Dit is hoe dit is.

Ps. 90:3-13
U laat die mens sterwe: U sê net: “Word weer stof!” Duisend jaar is vir U soos gister as dit verby is, soos een enkele wagbeurt in die nag. U maak ‘n einde aan ‘n mens, hy gaan die doodslaap in. Hy is soos gras wat in die môre afgesny word: in die môre is dit nog groen, maar dit word afgesny en teen die aand is dit verlep en dit verdroog. Ons vergaan onder u toorn, ons gaan te gronde onder u gramskap. U sien ons oortredinge raak, U bring die sondes wat ons wou wegsteek, aan die lig. Onder u toorn vlieg ons dae en skiet ons jare verby soos ‘n gedagte. Ons lewe maar sewentig jaar, of, as ons baie sterk is, tagtig, en dié is vol swaarkry en leed. Dit is gou verby, ons vlieg na ons einde toe. Wie ken die krag van u toorn beter as u dienaars? Wie ken u gramskap beter? Leer ons ons dae so gebruik dat ons wysheid bekom. Hoe lank nog, Here, voordat U ons te hulp kom? Ontferm U tog oor ons.

Ons lewe is maar sewentig jaar, of as ons baie sterk is 80 en dié is vol swaarkry en leed. Dit sê eintlik: die lewe is nie vir sissies nie. Hierdie feit  is vir die meeste mense waar. Een ding wat ek graag vir die Here wil vra is hoekom die pad al swaarder en swaarder word soos wat mens ouer word en nie makliker en makliker nie.

Jy sien, om Mount Everest suksesvol te klim, begin nie by die voet van die berg nie. Iemand wat net lukraak daar opdaag sal verseker deel van die grusame statistiek word. So ’n persoon sal dalk by die eerste of tweede basiskamp uitkom, maar dan sal hy die aftog blaas. Die gemiddelde persoon wat by die voet van Mount Everest opdaag, is reeds baie vêr voor iemand soos ek, wat nie eens op ’n dak kan klim nie! So is dit ook in die lewe: om uiteindelik daardie laaste piek suksesvol aan te pak, was jare en jare se voorbereiding nodig.  In ons geestelike lewe is dit ook dieselfde: sommige mense is nog op pad berg toe, selfs nog in ’n ander land, op ’n ander kontinent, maar hulle is darem op pad. Sommige is al by die voet van die berg. Ander by een van die basiskampe en net ’n klein groepie is op pad na die piek toe. Party het halfpad omgedraai, ander het gesneuwel en sommige sit net en dink. Ek wonder waar is ek op my klimpad?

Pred. 9:11-12
Verder het ek in hierdie wêreld gesien: dit is nie die vinnigstes wat die reisies wen nie, nie die sterkstes wat die oorlog wen nie, nie dié met wysheid wat kos het nie, nie die verstandiges wat ryk word nie, nie dié met kennis met wie dit goed gaan nie. Alles word bepaal deur tyd en geleentheid. Die mens ken selfs nie die tyd van sy dood nie. Soos visse wat gevang word in ‘n net, soos voëls wat gevang word in ‘n wip, so word die mens gevang as die teëspoed kom, as dit hom skielik oorval.

Hierdie is vir my ’n vreemde teks. Dit lyk vir my mens moenie dink daar is universele reëls wat vir almal geld nie. Dit vra iets anders. As dinge bepaal word deur tyd en geleentheid, beteken dit egter nie dat die lewe soos ’n dobbelspel werk met die gooi van ’n dobbelsteen nie. Sommige mense kan dalk sê die lewe is “unfair” want nie almal kry dieselfde hand kaarte nie. Ek sien egter iets anders hierin en wil só vra: hoe hanteer jy die pakkie wat jy gekry het? Hier kom natuurlik die voordeel daarvan in om ’n pad met die Here te stap. Hoe swaar daardie laaste trek op pad na die kruin nou ook al mag wees, of hoe moeilik die voorbereiding was, sáám met die Here kan mens dit doen. Die Here sal dalk nie noodwendig al jou laste die hele pad dra, of jou selfs optel en dra nie. Dis egter meer draaglik as Hy saam met jou vorentoe beur en jou bemoedig as jy daardie steiltes aanpak, as Hy jou wys op die gapende skeure in die ys en jou waarsku dat jy nie jou eie sneeustortings moet veroorsaak nie. Hy moedig jou aan om nooit om te draai nie en voort te beur. Jy sien, Mount Everest se oorwinning word behaal as jy op die heel hoogste piek kom, dié plek wat die heel moeilikste is om te bereik. Wanneer dit op die heel moeilikste gaan, is jy bo! Van maklik, tot moeilik, tot bykans hel, tot byna dood en dán kom die oorwinning.

Pred. 12:1-7 (Die Boodskap)
Dink aan jou God wat jou geskep het terwyl jy nog jonk is. Voordat die swaar dae kom wanneer die son se strale vir jou dof begin word en jy die maan se lig en die sterre se geflikker saans skaars nog sien. Dit is wanneer jou hande begin bewe, die bene moeilik loop, die tande moeilik kou omdat hulle so min is en die oë sleg sien, die ore nie meer die straat se geraas hoor nie, die stem sagter en dowwer word. En as die voëls vroegoggend begin koer, staan jy op sonder dat jy hulle eens hoor. Dit is wanneer jy vir steil opdraandes en baie ander dinge bang word omdat jy te swak geword het. En terwyl die amandelboom bloei, die sprinkaan hom vol eet en die kapperkruid blom, sterf die mens. In die strate sal hulle die doodsberig vertel. Dan sal hulle saamkom om hom te begrawe. Dit is soos ’n silwertou wat afbreek by ’n put, soos die goue skepemmer wat breek, soos die drinkbeker wat stukkend breek en soos die wiel wat by die put inval. Dan word die mens weer stof soos vroeër en sy lewensasem gaan terug na God toe waar dit vandaan gekom het.

Hierdie deel beskryf daardie laaste stukkie pad van ’n mens se lewe ongelooflik akkuraat. Dink aan jou Skepper in jou jong dae. Dit is nóú, die voorbereidingstydperk, die tyd voor ons selfs by die voet van die berg kom, die tyd as ons vars en flink is, wanneer ons ons liggame kan oefen, geestelik fiks kan word. Dié tyd wat ons om ons mense sien wat reeds in daardie laaste pylvak is, waar die lewe op sy swaarste is en waar baie opgee en uitsak. Kyk daarna, leer daaruit en berei voor vir die laaste, moeilike pad na die kruin, want daardie tyd gaan beslis kom. In daardie laaste tyd gee baie dinge in: die oë, die bene, kragte, gehoor en arms en dan, wanneer dit op die swaarste is, breek die oorwinning aan, die einde kom. Vers 7(b): “Dan word die mens weer stof soos vroeër en sy lewensasem gaan terug na God toe waar dit vandaan gekom het.” Finale oorwinning, aankoms by die Here, oorwinnaarskroon wat wag!

Op 2:17 
Aan elkeen wat die oorwinning behaal, sal Ek van die verborge manna gee, en daarby sal Ek vir hom ‘n wit steentjie gee met ‘n nuwe naam daarop gegraveer, wat niemand anders ken nie, net hy wat dit kry.

bron:  heuning.co.za

Lees Meer >>

Wees daar vir mekaar!


Nog baie langer gelede, in die eerste gemeentes waarvan ons in Handelinge lees, was daar uitdagings en geleenthede dat die werk in gemeentes tussen almal verdeel word. Die eerste dissipels kom agter dat hulle roeping om vir soveel as moontlik mense van Jesus te vertel skade ly, omdat daar ook van hulle verwag word om mense wat swaarkry, te help. So word die eerste diakens in die kerk gekies om te help met spesifieke take in die gemeente. Nêrens is daar sprake daarvan dat die een se werk in die gemeente belangriker as ‘n ander se werk is nie. Saam neem almal gelyke verantwoordelikheid vir die gemeente.

Vandag is dit steeds ons uitdaging dat almal gelyke verantwoordelikheid neem in die gemeente. Niemand is belangriker as ‘n ander nie. Selfs die aanspreekvorm en titel “dominee” skep ‘n probleem omdat dit eintlik “domineer, baasspeel, oorheers” beteken. Soos Janson skrywe: “… die predikant al man is wat van die dinge genoeg weet en word hy as vanselfsprekend op die verhoog bokant die ander geplaas. Die begaafdheid van die predikant gee in die gemeente deurslag: is hy inskiklik en welsprekend en gaaf en geliefd genoeg, en het hy oral organisatoriese vermoë, dan slaag hy daarin om die mense te paai en bymekaar te hou.”
Ware kerk-wees en deel wees van enige geloofsgemeenskap, sal dus beteken dat almal op gelyke voet met mekaar is. Waar hierdie Bybelse beginsel geld, neem Jesus-mense verantwoordelikheid vir elke geleentheid vir Koninkrykswerk volgens elkeen se spesifieke gawes. Kritiek oor mekaar se werk, word baie versigtig en liefdevol hanteer. Elkeen wat opreg en selfloos betrokke is, word raakgesien en erken – tog word niemand bo ander verhef nie. Die fokus en doel is goeie en gesonde verhoudings waarin die liefde van Jesus in ons, sigbaar en eerlik geleef word.
Die vraag vir jou vandag: wat is jou spesiale plekkie in God se werk?

Bron:  http://doomcharl.blogspot.com/

Lees Meer >>

Xenofobia


Dieselfde opdrag word in Levitikus 19:33-34 herhaal. Trouens, sulke mense moet behandel word asof hulle gebore Israeliete is. Die rede: Israel was ook eens op ’n tyd vreemdelinge in ’n vreemde land. Hulle behoort dus te weet hoe dit voel. Daarom verwag God dat hulle anders moet optree teenoor vreemdelinge in hulle midde as hoe hulle die Egiptenare hulle behandel het toe hulle slawe in daardie land was. In gewone taal gesê, hulle moet deernis met sulke mense hê.

 

Volgens Levitikus 25:35 is vreemdelinge geregtig op hulp van die kant van Israeliete. Op dieselfde manier as wat God se volk hulle oor ander Israeliete moet ontferm in tye van nood, moet hulle dit ook vir vreemdelinge doen. Ook deel vreemdelinge in bepaalde godsdiens voorregte van Israeliete (Lev 25:6). Israel se godsdienstige voorskrifte bied immers beskerming vir vreemdelinge (Eks 22:21). In dieselfde asem moet vreemdelinge darem ook respek hê vir die gebruike en geloof van hulle nuwe land (Eks 12:43-47). Maar in beginsel lê die verantwoordelikheid by die gasheer-land en hulle mense om vreemdelinge in hulle midde met die nodige respek en naasteliefde te hanteer. ’n Teks soos Esegiël 47:22 gaan selfs uit van die beginsel van gelyke regte vir beide Israeliete en vreemdelinge. Buitelanders wat reeds tussen Israeliete woon moet met ander woorde op dieselfde manier deel in die grondverdeling waarvan hier sprake is.

Al is die spesifieke gebruike van Israel waarna bogenoemde tekste verwys nie meer direk toepasbaar op ons eie situasie nie, is hierdie beginsels steeds geldig En dit is dat alle mense kosbaar is vir God. Hy trek nie bepaalde volke voor nie. Ons moet sy voorbeeld volg deur almal, of dit volksgenote is of nie, met eerbied en respek te hanteer. Wanneer hulle verdruk word, moet ons opstaan vir hulle regte. As hulle nie stemme het nie, moet ons hulle stemme word wat namens hulle pleit vir hulle regte. Ons kan nie maar net toekyk hoedat vreemdelinge vertrap word nie. Dan breek God se hart oor ons en oor hulle.

Bron:  ekerk.org

Lees Meer >>

Om voor te gee is uitputtend!


Maar, om voor te gee is uitputtend. En dit is ook ’n leuen.

As ek myself met ander mense vergelyk en myself aan hulle standaarde meet, gaan ek altyd te kort skiet. Daar gaan altyd iemand wees wat ouliker en meer suksesvol is as ek. Ek is egter nie die somtotaal van my omstandighede, suksesse of mislukkings nie. Of die kar wat ek ry of die woonbuurt waarin ek bly nie. Ek word nie gedefinieer deur wat ander van my sê, die etikette wat hulle om my nek hang óf deur my gevoelens nie.

Dis baie meer waardevol om my identiteit in Christus te ontdek deur ’n studie te gaan maak van wat die Bybel oor my sê – en dit begin glo.

Ek is vir God so belangrik dat Hy sy Seun gegee het om vir my sonde te sterf, my vry te koop van die mag van sonde – sodat ek die ewige lewe kan hê. Wanneer ek Hom aanneem, gee Hy my sy Gees, wat soos strome lewende water uit my binneste sal vloei. Sy Gees leer my om te bid, lei my in die volle waarheid en vul my met krag en liefde en selfbeheersing. In Hom het ek alles wat nodig is om Sy wil te doen. Hy gee vir my wysheid en insig – selfs méér as wat geleerde mense het.

Wanneer ek weer in ’n geselskap is waar ek voel ek is nie goed genoeg nie, hoef ek God nie so ’n bietjie te help om my goed te laat lyk nie – ek kan met vertroue my plek in die samelewing inneem, want ek is ’n kind van die Koning van die konings.

“This “identity issue” is an important part of living the abundant life. Jesus was able to face the incredible demands of his mission because he knew exactly who he was. He knew that he mattered to God, and that gave him confidence to move purposefully in faith.” — Rick Warren

bron: ekerk.org

Lees Meer >>

Pak jou kaste reg

 

Eintlik is dit dieselfde in ons Geestelike lewens. Ek kan dink aan ‘n paar goed wat oud raak en plek opneem, waar ons denke vassteek en afgestomp word, of ons weier om nuut te dink, en ons hou vas aan ideologieë en konsepte en ons sê net eenvoudig: “Dis hoe my pa my geleer het en basta!” Maar ek het besef ons moet dalk ons Geestelike kaste ook so bietjie reg pak en dalk aanbeweeg. Jy sien, as jy ‘n kas reg pak, weet jy weer waar alles is, dinge word nuut ge-orden. ’n Paar ou goed word uitgegooi en daar is weer plek vir nuwe goed. Soms moet mens aanbeweeg in dinge waaraan jy vroeër vasgehou het, maar soms moet jy dalk weer terugkeer na wat werklik goed en waar en reg is.

Die kern van die Evangelie, die dinge wat gaan oor ons redding, sal altyd vas staan. Jesus se maagdelike geboorte, Sy kruisdood, Sy opstanding en Sy hemelvaart, ons redding deur geloof, staan altyd sentraal en vas. Maar ons Godsdiens beoefening is ‘n ander storie, want godsdiens kan nogal gevaarlik wees. En dis daardie kas wat ons dalk soms moet reg pak.

Rom.  12:2 Julle moenie aan hierdie sondige wêreld gelyk word nie, maar laat God julle verander deur julle denke te vernuwe. Dan sal julle ook kan onderskei wat die wil van God is, wat vir Hom goed en aanneemlik en volmaak is.

Inderdaad ‘n hele mondvol! Jy sien, met tyd – dink ek – het die mens meer en meer van genade begin verstaan, die feit dat Jesus gesterf het vir ons sondes, juis omdat ons nie die vermoë het om om skoon te leef nie. Genade wat so onbeskryflik groot is, dat niks ons uit God se hand kan ruk nie, en dat die duiwel finaal oorwin en verslaan is. Dis natuurlik waar, 100% waar, maar dis nie al wat waar is nie. As ons hierdie kas van Rom. 12 bietjie uitpak en reg pak, sal ons agterkom dat genade nie God se wil vir ons vir ‘n skoon lewe oorskadu nie. In die eerste plek wil die Here steeds hê dat ons nie aan die sondige wêreld gelyk sal word nie, maar dat ons Hom sal toelaat om ons denke te vernuwe, sodat ons kan onderskei wat die wil van God is en dat ons sal doen wat vir Hom goed en aanneemlik en volmaak is.  In ons jong dae het ons ‘n dominee daar in die Moot gehad wat net verdoemenis gepreek het, en in die proses het hy dikwels die kansel kaalhand probeer vermorsel. Dit het in vandag se tyd plek gemaak van ‘n kansel wat drup van die stroop van genade. Punt is, albei kante is reg. Genade is verniet, maar verseker nie “cheap” nie!

Kom ons pak die kaste verder reg. Weet jy wat gebeur nog in ons Geestelike kaste? Ons laat toe dat ander mense goed in ons kaste kom inpak. Soms heeltemal ongevraag, soms word ons gestoomroller, soms heeltemal oordonder, en dan juis met woorde soos: “Dit staan alles in die Bybel!” Hierdie mense kom hamer op skuldgevoelens en vrees, en pak jou kaste vol goed wat jy nie daarin wil hê nie en gooi in die proses goeie goed uit. Dit sit ondraaglike laste op mense, saai verwarring en bring skeuring en konflik tussen mense.

Daar is bv. ‘n beweging wat sê jy mag nie ‘n kruis in jou huis of in jou kerk hê nie, want die kruis is ‘n vloekhout. Toe sien ek ‘n video op YouTube van Neville Norden (vir wie ek baie respek het) met die naam “Die duiwel in jou huis” en hy slaan hierdie ideologie summier plat in die grond in. Jy sien, ek besluit self wie goed in my Geestelike kas kom pak, ek vra vir die Here vir leiding daaroor, ek lees wat die Woord sê (in konteks natuurlik!) voordat ek net op ‘n wa spring. En ja, ek luister verseker na mentors, en ek maak graag vir my goeie mentors bymekaar, maar dis mentors wat ‘n lang en intieme verhouding met God het, wat vol wysheid en insig is en wat ‘n groot verskil in die wêreld gemaak het. Hulle kan maar kom pak en krap in my kaste. Maar nie sommer enigiemand wat kwansuis ‘n “nuwe” openbaring het wat g’n ander mens nog ooit van gehoor het nie. Ek hoor jy mag deesdae ook nie meer ‘n hartjie in jou huis hê nie. Goeiste!

Soos wat ek ouer geword het, het die impak wat my ouers op my lewe gehad het net meer en meer en dieper op my lewe ingewerk. As jy self ‘n ouer is, verstaan jy ook jou ouers se motiewe beter en wat hulle waardestelsel en geloofswortels gevorm het, en ook hoe hulle hulle godsdiens beoefen het. Met tyd moes ek egter ook van daardie goed uit my Geestelike kas pak en my gedagtes daaroor heroorweeg, daaroor besin en nuut daaroor dink. Eers toe ek sonder skuldgevoelens daaroor kon dink, het ek vrede gekry en kon ek met nuwe oë na alles kyk en aanbeweeg. Verandering en vernuwende denke kon dus plaasvind sonder om van die basiese fondasie af weg te beweeg. En my kinders? Hulle is klaar nie meer in dieselfde boksie as ek nie en hulle dink ook weer nuut en vars, want hulle hou nie noodwendig van die manier wat my Geestelike kas gepak is nie.

Ek het besef dat dit wat ek in my Geestelike kas toelaat, nie dieselfde is as ander nie, en dan begin ek mense veroordeel, beoordeel en sommer verdoem in die proses. Ek moes nuut leer dink oor baie dinge, soos die doop, die skeppings verhaal, watter Bybel vertaling die regte een is, hoe die Sabbat onderhou moet word, kerkbywoning en ‘n rits ander goed.

Maar, die basis van my geloof in Jesus Christus staan vas en dis nie debatteerbaar nie. Kom ons pak bietjie ons Geestelike kaste weer ‘n slag reg en aanvaar dat almal nie hulle kaste op dieselfde manier pak nie. Solank daardie kas net van kruishout gemaak is. Dis DIE belangrikste!

Bron:  heuning.co.za

Lees Meer >>

Gestroopte mens


Sara en Abraham het vir meer as 25 jaar ook wintertye beleef: Tye toe hulle vergeefs moes wag dat God se belofte van ’n nageslagkind sou waar word. En hoe langer hulle op nuwe lewe gewag het, hoe skraler het die kans geword dat daar léwe geskep kon word. Wie kan immers op negentigjarige ouderdom ’n kind in die wêreld bring. En tóg, juis toe dit heeltemal te laat was … tóé laat God die onmoontlike wonder gebeur: Isak word gebore!

God se trou is nie afhanklik van uiterlike omstandighede en menslike volharding nie. God se trou is ’n wesenskenmerk van Gód — dis iets veel groters as wat ons menseverstand ooit kan verstaan. Daarom kan God jaar na jaar weer lewe blaas in die dooie takke van die natuur. En dáárom kan enige verlore situasie radikaal verander en ’n uitsiglose wêreld in ’n lewe van hoop verander.

God is altyd getrou. Ook in die wintertye van jou lewe wanneer ’n deel van jou dood en leweloos voel. Ja, ook dán kan Hy met sy grootheid en genade weer nuwe lewe skep wat met oorgawe kan groei en blom. Lewe daarom — ongeag jou omstandighede — met moed. Moed wat soms bang is, maar steeds voortgaan. Moed wat onseker is, maar nogtans die uitdagings aanpak en moed wat soms nie kan sien nie, maar nietemin positief vorentoe beur. Tagore het gesê: Maar nou vind ek uit dat u wil geen eindes in my ken nie. Wanneer ou woorde op die tong begin sterf, ontspring nuwe melodieë in die hart. En waar ou gebaande weë verdwyn, ontvou ’n nuwe landskap met al sy wonders voor ons oë.

Wees moedig en dapper — ook in die blaarlose tye van jou lewe. Doen jy maar net elke dag wat jy moet doen, glo en vertrou en leef in die wete dat jy die res in sy hande kan laat. Dié hande wat lewe gee.

Dankie dat ek U onder alle omstandighede 100% kan vertrou in dié wete dat U — die God van lewe — enige iets kan verander, enige iets kan laat gebeur en selfs uit die droogste takke léwe kan skep!


Uit: Siel van ’n Vrou, CUM

Bron:  ekerk.org

Lees Meer >>

Vind Geestelike Rus


Ons almal ervaar die druk van die sogenaam-de ‘rat race’. Net wanneer jy dink dat jy besig is om te wen, kom daar vinniger ‘rotte’ verby, maar onthou, die een wat die ‘rat race’ wen, bly steeds ’n rot!
Ons moet leer hoe om rus te ervaar. As ons fisieke rus nodig het, kan ons ’n uiltjie knip. As ons emosionele rus nodig het, kan ons met vakansie gaan. Waar vind ons egter geestelike rus? Hoe kan ons verligting kry vir die moeilikste lewenskwessies wat ons in die diepste deel van ons hart kwel?

Jy moet na Hom toe kom
God moedig ons herhaaldelik aan om na Hom toe te kom. Dit is sekerlik een van die Here se gunstelingwoorde.
Dit word ongeveer 1 825 in die New King James Version van die Bybel gebruik.
• “Kom nou en laat ons die saak uitmaak, sê die Here…” Jes 1:18
• “Kom, almal wat dors is, kom na die water toe, selfs ook dié wat nie geld het nie, kom koop en eet;” Jes 55:1
• “Kom julle alleen saam na ’n stil plek toe en rus ’n bietjie.” Mark 6:31
• “Elkeen wat die Vader vir My gee, sal na My toe kom; en Ek sal hom wat na My toe kom, nooit verwerp nie.” Joh 6:37
• “Die Gees en die bruid sê: “Kom!” En elkeen wat dit hoor, moet sê: “Kom!” En elkeen wat dors het, moet kom; elkeen wat die water van die lewe wil hê, moet dit kom kry, verniet!” Op 22:17

Die belangrikste uitnodiging
Jesus het mense gereeld genooi om met hulle behoeftes na Hom toe te kom. Christenskap begin met ’n persoonlike ontmoe-ting met Christus. Om in McDonalds te sit maak jou nie ’n hamburger nie. Om in ’n motorhuis te wees maak jou nie ’n motor nie. Om kerk toe te gaan maak jou nie ’n Christen nie – jy moet Christus ontmoet. Om inligting oor Jesus te bekom maak jou nie ’n Christen nie. Om by ’n Christen-groep aan te sluit maak jou nie ’n gelowige nie. Om Christen-ouers te hê maak jou nie ’n Christen nie. Jy word ’n Christen op daardie oomblik wanneer jy kies om op Sy uitnodiging te reageer om van jou eie weg af te sien en na Hom toe te kom.
Jy sal ontdek dat Hy die hele tyd vir jou gewag het. Het jy al gekies? Kan jy na ’n oomblik verwys toe jy besluit het om Sy uitnodiging te aanvaar?
Jy sê: “My lewe is in ’n gemors, ek dink nie ek is gereed om na Hom toe te kom nie.” Sy uitnodiging is dat jy moet kom, net soos jy is!
As jy honger is, Hy is die Brood van die lewe. As jy dors is, kom en drink uit die Fontein van die lewe. As jy vir ewig wil lewe, Hy belowe jou ’n lewe in oorvloed, wat nooit tot ’n einde sal kom nie.

Jesus is die grootste geskenk
Die soeke om jou behoeftes op jou eie te bevredig, lei na vele doodloopstrate. Die vermoeiende soeke van die siel…dit is waarna Jesus verwys. Hy het die beste gawe om te gee. Daar is rus vir diegene wat swoeg; daar is soveel mense wat deur eie inspanning en goeie werke probeer om God te vrede te stel. Hulle is opregte, pligsgetroue mense wat probeer om die weegskaal van goeie werke teenoor slegte dade in ewewig te hou in ’n poging om deur God aanvaar te word.

Jy sal rus vind by die Kruis
Menslike inspanning voldoen nie aan die vereiste standaard van God nie. Die Kruis is die plek waar omruiling plaasvind – waar wat ek is, op Hom geplaas word en wat Hy is, aan my geskenk word. My slegte dade word verwyder en op Hom geplaas. Ek rus in Sy volmaakte dade wat op my rekening gekrediteer is.
Daar is rus vir diegene wat swaar laste dra vir diegene wat onder die swaar las van sonde steier. Die rus is ook beskikbaar vir diegene wat vir besittings, prominensie en plesier leef.

Vind vrede met God
In Jesus Christus is die volle skuld reeds vereffen. Jy kan ’n nuwe lewe begin; ’n nuwe blaadjie omslaan. God het Jesus nie ge-stuur om ons sonde in te vryf nie, maar om dit uit te vee. Hy het die skuld gedra en die prys betaal, daar is niks meer oor wat betaal moet word nie! Kom en rus in wat Jesus vir jou gedoen het.
Die verligting van die las is ’n werklikheid vir almal wat na Christus toe kom. Die Bybel noem dit “vrede met God”. Jy kan nou dadelik na Hom toe kom, deur geloof!

Moenie alleen worstel nie
In die Evangelie van Matteus nooi Jesus ons: “Neem My juk op julle en leer van My…want My juk is sag.” ’n Beter vertaling van die Grieks sou wees ‘dit pas goed’. Jesus was ’n timmerman. Hy het geweet wat dit was om die os se nek te meet sodat die juk presies pas en nie die os se nek sal skaaf nie. Wanneer Jesus Sy juk op jou plaas, pas dit presies by jou omstandighede. Sy juk pas goed en sy las is ligter as die las wat ons alleen gedra het.
’n Juk is ’n tipe harnas wat ’n paar osse met mekaar verbind. Jukke word vir twee gemaak, nie een nie. Die bedoeling was nooit dat ons sonder God deur die lewe gaan nie. Ons behoort nie op ons eie deur ons probleme te worstel nie. Hy sê dat Hy ons nooit in die steek laat of verlaat nie.
Die idee van ’n juk beeld die voorwaartse beweging uit van twee wat aan mekaar verbind is. Jy kan nie in dieselfde juk met Jesus trek en jou eie pad loop nie. Ons volg Hom en Sy leiding vir ons lewe. Sy juk is sag in vergelyking met mensgemaakte godsdiens-tige jukke. Sy las is lig in vergelyking met die las van menslike inspanning en goeie werke.

Verlossing is gratis
In Handelinge 15 waarsku die Apostel Petrus die leiers van die kerk in Jerusalem teen die gevaarlike juk van die volg van reëls en godsdienstige stelsels om deur God aanvaar te word.
Dit is die hoe die meeste mense ’n verhouding met God beskou – deur reëls en godsdienstigheid. Dít is nie die juk waarvan Jesus praat nie. Onder watter juk is jy? Die juk van Jesus of die mens?
Reëls en godsdienstigheid kan ’n persoonlike verhouding nie vervang nie. Daar is talle godsdienste in die wêreld en hulle almal moedig hulle volgelinge aan om hulle eie verlossing te bewerk. Slegs in die Evangelie word ’n weg tot verlossing uitgewys wat nie op die mense se eie inspanning gebaseer is nie. Die Apostel Paulus verduidelik dit só: “Julle is inderdaad uit genade gered, deur geloof. Hierdie redding kom nie uit julleself nie; dit is ’n gawe van God. Dit kom nie deur julle eie verdienste nie, en daarom het niemand enige rede om op homself trots te wees nie.” Ef 2:8-9.
Hou op om jou verlossing te probeer verdien. Jy sal nooit vrede en geestelike rus in reëls en godsdiens vind nie, maar net in ’n persoonlike verhouding met God wat gebaseer is op die voltooide werk van Jesus.

Die Here se uitnodiging aan jou
Daar is ’n staande uitnodiging vir jou om te kom. Kom met jou swaar laste en probleme. Gee dit vir Hom. Hou op om met jou eie pogings teen die oneindige leer van goeie werke na die Hemel te klim. Rus in Hom en vind volmaakte vrede – dié vrede wat jou verstand te bowe gaan.
As jy nog nooit op die uitnodiging van Jesus gereageer het nie en jy is nie seker of jy ’n kind van God is nie; dat jou sonde vergewe is; en dat jy die Ewige lewe het nie, nooi ons jou om ons te kontak. e-pos ons by: info@juig.co.za en ons sal jou help om daardie versekering te bekom.

NICO BOUGAS is die internasionale koördineerder van Hellenic Ministries. Vir meer inligting e-pos: nico@bougas.info ofwww.hellenicministries.com

Bron:  Juig.co.za

Lees Meer >>