Die Wonderwerk Van Sy Oorwinning


Voordat ons voortgaan, is daar twee kwessies wat aangeraak moet word.
Eerstens, opsie een en twee hier bo is natuurlik van aard (slegs verduidelikings van die opstanding) en dus verskil die definisie van ’n wonderwerk in hulle geval (’n hoogs onwaarskynlike, maar steeds natuurlike gebeurtenis) met die definisie daarvan in die derde opsie – waar die Bybelse definisie toepaslik is.
Tweedens, dit is belangrik om te onthou dat geen historiese geleerde, Christen, of ongelowige die kernfeite rondom die opstanding betwyfel nie.
Dit is:
• Jesus is gekruisig en begrawe
• Drie dae na Sy dood het Sy Liggaam verdwyn
• Daar was verslae van verskynings van Jesus aan gelowiges en ongelowiges tydens die verloop van 40 dae
• Die verskynings het die individue ver-ander en hulle het begin om Christus
se opstanding te verkondig, selfs al moes hulle ’n marteldood vir hulle getuienis sterf

Hierdie is die kernfeite van Jesus se opstanding en word nie deur enige ingeligte historikus, hetsy sekulêr of godsdienstig, betwis nie. As dit dan die geval is, kom ons ondersoek elk van die moontlike verduidelikings vir die opstanding.

Die opstanding van Jesus – ’n biologiese wonderwerk
Die opsie van ’n biologiese wonderwerk beweer dat Jesus nie werklik gesterf het nie, maar dat diegene wat Sy teregstelling uitgevoer het, slegs geglo het dat Hy dood is. Later, nadat Hy in die graf geplaas is, en teen alle biologiese en mediese waarskynlikheid in, het Hy weer bygekom, uitgekom, en asof Hy uit die dood opgestaan het, aan Sy dissipels verskyn.
Skeptici stel selde, indien ooit, hierdie opsie as ’n alternatief tot die Bybelse opstandingsverhaal voor. Om die waarheid te sê, ’n paar dekades gelede het ’n artikel in die ‘Journal of the American Medical Association gesê: “Gevolglik blyk verkla-rings wat op die aanname gebaseer is dat Jesus nie aan die kruis gesterf het nie, nie te strook met moderne mediese kennis nie.”
Die gebrek aan entoesiasme vir hierdie teorie is te wyte aan ’n paar sterk argumente daarteen.
• Die Nuwe Testament vermeld spesifiek dat Jesus voor Sy kruisiging geslaan en gegésel is. Geskiedenis wys dat géseling die dood van baie van die veroordeeldes veroorsaak het voordat hulle nog hulle aangewese kruis gehaal het. Die historiese Evangelies vermeld ook dat Jesus so verswak was weens Sy géseling dat Hy nie Sy kruis na Golgota kon dra nie (Matt 27:32); ’n duidelike aanduiding dat Sy kragte ingegee het
• Die Romeine was deskundiges van kruisigings. Hulle het geweet hoe om dood te maak; inderdaad, as ’n slagoffer wat tot die dood veroordeel is, oorleef het, is die soldate vir hulle agtelosigheid verantwoordelik gehou
• Johannes 19:34 sê dat ’n soldaat ’n spies in Jesus se sy gesteek het om seker te maak dat Hy dood is. Die beskrywing van bloed en water dui duidelik aan dat die pericardium(hartsak) geskeur het. Onmiddellike dood sou die gevolg gewees het as Jesus nie reeds weens die kruisiging gesterf het nie
• Jesus se dood is vlakby deur ooggetui-es, vriend sowel as vyand, waargeneem
• Nadat Hy van die kruis afgehaal is, is Jesus met skerp speserye afgespoel en in doeke toegedraai deur liefdevolle vriende wat sekerlik sou opmerk as Hy nog gelewe het
• Om hierdie oëverblindery uit te voer, sou Jesus in die graf moes bykom,
’n massiewe klip wegrol, die Romeinse wagte oorrompel (Matt 27:62-66) en dan aan Sy volgelinge en skeptici
verskyn
• Die dissipels se reaksie op ’n verminkte Jesus, vol skeurwonde ná Sy kruisiging, sou baie anders gewees het as wat die vier Evangelies vermeld. Niemand is ontbied om noodmediese behandeling te gee nie; in plaas daarvan het hulle Hom as die Here aanbid
Laastens, die opsie van ’n biologiese wonderwerk skep ’n baie ongunstige prentjie van Jesus se morele karakter. Dit beteken dat Jesus nie net ’n leuenaar was nie, maar veel erger.
As hy nie werklik gesterf en opgestaan het nie, moes Jesus Sy dissipels doelbewus mislei en jare lank weggekruip het, terwyl Sy dissipels aangehou, gemartel en vermoor is omdat hulle Sy vals opstanding verkondig het.
Om hierdie redes en ander, is die opsie van ’n biologiese wonderwerk ’n hoogs onwaarskynlike verduideliking vir die opstanding van Jesus.

Die opstanding van Jesus – ’n sielkundige wonderwerk
Die gewildste argument onder skeptici, soos Richard Carrier, is dat Jesus se volgelinge ’n sielkundige wonderwerk beleef het. Carrier skryf: “Ek glo dat die beste verduideliking, verenigbaar met beide wetenskaplike bevindinge en die oorblywende bewyse, is dat die eerste Christene hallusinasies van die opgestane Christus in die een of ander vorm beleef het. In die antieke wêreld was ervarings van ’n bonatuurlike aard, soos om geeste, gode en wonders te sien, nie alleen aanvaar nie, maar ook aangemoedig.”
Wanneer ’n mens egter die opsie van ’n sielkundige wonderwerk van naderby ondersoek, verkrummel dit onder die gewig van talle strydige argumente:
• Om enige geloofwaardigheid te hê, vereis die sielkundige wonderwerk ’n leë graf. En, as die dissipels hallusinasies beleef het en bloot mislei is om te glo dat Christus leef, wie het dan die liggaam gesteel? Sekerlik sou Jesus se vyande dit nie gesteel het nie. Wie bly dus dan oor? Wie sou so ’n risiko neem om die lyk te steel?
• Die opsie van die sielkundige wonderwerk bly ook in gebreke om verantwoording te doen vir die feite agter Jesus se verskynings ná Sy opstan-
ding. Is hallusinasies ’n geloofwaardige verduideliking? Jesus het nie net een keer nie, maar talle kere verskyn; nie net aan een persoon nie, maar verskillende persone; nie net aan individue nie, maar ook aan groepe; nie net op een plek nie, maar op verskeie plekke; nie net onder een omstandigheid nie, maar onder verskeie omstandighede; nie net aan gelowiges nie, maar ook aan ongelowiges, skeptici en selfs vyande
• Die Evangelie se verslae beklemtoon die feit dat die dissipels geensins verwag het dat Jesus uit die dood gaan opstaan nie; trouens die dissipels het gedink dat hulle Jesus nooit weer sou sien nie. Hulle het nie enige oortuiging gekoester dat hulle vermoorde leier lewend aan hulle sou verskyn nie. Daar word duidelik uitgebeeld dat die dissipels nie Jesus se voorspellings oor Sy opstanding begryp het nie. (Lukas 18:31-34). Hulle was self skepties. Hierdie mentaliteit is veelseggend omdat dit daarop dui dat hulle hulleself nie tot ’n mistiese toestand opgesweep het nie
• Die Joodse geloof het uitgesien na ’n opstanding aan die einde van die wêreld, maar niemand het nog ’n ewige opstand voor daardie aangewese tyd verkondig nie (Daniel 12:2 en Johannes 11:24). Hierdie feit versterk verder die argument dat die dissipels nie die
opstanding van Jesus enigsins verwag het nie
• Dit is die moeite werd om uit te wys dat skeptici en vyande van Jesus, insluitend ongelowige lede van sy eie familie, daarop aanspraak gemaak het dat hulle hom ná Sy kruisiging in lewende lywe gesien het. Vanuit ’n sielkundige oogpunt beskou, het hierdie mense geen rede gehad om ’n verskyning te versin van iemand waarin hulle in die eerste plek nie geglo het nie

Laastens, skeptici bied ook kognitiewe dissonansie as ’n verweer aan vir die sielkundige wonderwerkopsie. Kognitiewe dissonansie impliseer dat mense gemotiveerd is om die psigiese ‘spanning’ tussen die werklikheid, en wat hulle wil hê die werklikheid moet wees, te verminder. Hulle verander dus hulle houding, oortuiging en optrede sodat hulle kan ‘kry wat hulle wil hê’. Byvoorbeeld, die jakkals in die fabel wil druiwe hê, maar die werklikheid is dat hy die druiwe nie in die hande kan kry nie, daarom verander hy sy houding: die druiwe is suur en nie die moeite werd nie. Dié wat sinies is, sê dat die dissipels so graag wou hê dat Jesus hulle Messias moes wees dat, toe hulle met die realiteit van sy teregstelling gekonfronteer is, hulle psigiese aanpas-sings gemaak het om vir hulle verdriet te vergoed. Skielik het Jesus uit die dood teruggekeer – of so het die dissipels hulleself wysgemaak.
Enige argument wat op kognitiewe dissonansie gebaseer is, misluk daarin om twee kernfeite van die opstanding te verduidelik: die liggaam wat verdwyn het en die verskyning van Jesus aan Sy vyande en diegene wat getwyfel het. Bowendien kan ’n argument aangevoer word dat dit die skeptici van die opstanding is wat aan kognitiewe dissonansie ly. Hulle wil so graag hê dat Jesus dood moet wees, dat hulle die psigiese aanpassings maak wat nodig is om die bewyse te ignoreer of verkeerd uit te lê.
Hoewel gewild, het die opsie van die sielkundige wonderwerk baie gebreke en kan dit nie ernstig oorweeg word as ’n verduideliking vir die opstanding nie.

Die opstanding van Jesus – ’n teologiese wonderwerk
Die opsie van die teologiese wonderwerk beweer dat God Jesus uit die dood opgewek het. In teenstelling met die eerste twee opsies, wat suiwer natura-listiese verduidelikings is, sluit die teo-logiese wonderwerk nie die bonatuurlike uit nie. Dit betrek ’n ‘bo’-natuurlike Skepper en outomaties laat dit dus ware wonderwerke toe. Die outeur, C.S. Lewis sê: “As ons God erken, moet ons wonderwerke erken? Inderdaad, inderdaad, jy het geen verweer daarteen nie. Dit is die ooreenkoms.”
Die opsie van die teologiese wonderwerk maak aanspraak daarop dat die Nuwe Testament betroubaar van Jesus se opstanding verslag lewer. Dit bevestig ook die geskrifte van die vroeë kerkvaders aangaande die opstanding, soos hierdie aanhaling van Polikarp (’n dissipel van Johannes): “Want hulle het nie die teenswoordige eeu liefgehad nie, maar Hóm wat tot ons voordeel gesterf het en ter wille van ons deur God opgewek is.”
Die hoofrede waarom kritici hierdie opsie verwerp, is dat hulle, in navolging van hulle anti-bonatuurlike vooroordeel, God as ’n moontlikheid reeds vooraf uitgeskakel het. Dit is nie ’n oorsig van die bewyse nie, maar ’n verbintenis tot naturalisme wat veroorsaak dat skeptici die opstanding, die teologiese wonderwerk, as ’n moontlikheid uitsluit.
Wanneer ’n denkende persoon egter die universeelaanvaarde historiografiese (geskiedskryfkundige) maatstawwe nagaan wat gebruik word om enige geskied-
kundige verslag te ondersoek (bv. verklarende gesag, verklarende omvang, aanneembaarheid, en sy teenteorieë ver verbysteek), verskyn die opsie van die teologiese wonderwerk as die beste moontlike verduideliking vir Jesus se opstanding.
As dit die geval is, kan die rasionele persoon beswaarlik beskuldig word as hy/sy, op grond van die bewyse en ’n toewyding tot onbevooroordeelde histiografiese ondersoek, tot die gevolg-trekking kom dat ’n Goddelike wonderwerk daardie eerste Paasoggend geskied het.
In opsomming van hierdie standpunt, het dr. Thomas Arnold, die voormalige voorsitter van moderne geskie-denis aan Oxford en outeur van die gerespekteerde drie volumes ‘History of Rome’ gesê: “Ek is daaraan gewoond om baie jare lank al die geskiedenis van ander tydperke te bestudeer en om die bewyse van diegene wat daaroor geskryf het te ondersoek en op te weeg. Ek is nie bewus van enige gebeurtenis in die geskiedenis van die mensdom wat deur vollediger bewyse van enige aard bevestig word, as die Godgegewe teken – dat Christus gesterf het en weer uit die dood opgestaan het nie.

bron:  juig.co.za NGVishoek: Ds. ( dominee ) Martin Barnard.

Lees Meer >>

Gelowiges moet spesialis spoorsnyers word


Dink maar aan Johannes 10 waar Jesus in beelde of metafore met sy gehoor praat. Jesus sê dat hy die goeie herder is, en die ingang van die kraal. Niemand kan na die Vader gaan as dit nie in en deur Jesus gebeur nie.Tog staan daar in die teks dat al het Jesus in beelde en metafore met hulle gepraat, het die wat na hom geluister het nie verstaan nie. Hulle kon nie die spoor lees nie. Hulle het nie die semiotiek of tekens van die tyd reg gelees nie. Dieselfde gebeur met Thomas in Johannes 20. Nadat Jesus uit die dood opgestaan het, het Jesus aan ʼn paar van sy volgelinge verskyn. Hulle het vir die res vertel dat hulle vir Jesus gesien het. Thomas het nie geglo nie. Hy het gesê dat hy definitief nie sal glo nie, alvorens hy fisies sy hande in Jesus se wonde steek. Ongelowige Thomas kon aanvanklik nie die geestelike spore sny nie. Hy kon nie die boodskap kodeer nie. Dieselfde gebeur met die Emmaus-gangers. Hulle wandel saam met Jesus op die pad, maar kon nie die geestelike spore sny nie. Die ryk jongman slaag ook nie daarin om die spoor te sny of die tekens van die tyd reg te lees of raak te sien nie.

 

Tog is dit telkens die blindes en die onrein siekes wat wel raaksien en die tekens reg lees. In Johannes 10 is daar ʼn duidelike boodskap. Die wat die stem van die Herder hoor en die tekens reg lees, is die wat na groen weivelde geneem word en lewe in oorvloed kan beleef (Joh 10:10). Diegene wat by die hek ingaan, is die wat geslaag het om reg te onderskei.

Nelus Niemandt vertel van die bekende Karl Barth wat eendag in ʼn tram in Basel ry. Langs hom was daar ʼn student. Barth het die student vriendelik gegroet en agter gekom dat die persoon ʼn besoeker in Basel was. Barth vra toe vir hom wat hy in Basel doen. Die jong man sê toe dat hy en sy vriendin die bekende Karl Barth se Universiteit wil besoek. “Ken u vir Karl Barth?”, vra die student. “Ja”, sê Barth, “Ek het vanoggend sy hare geskeer en gekam”, sê Barth. By die busstop by die Universiteit klim hulle uit, en die jong student se vriendin wag toe ook by die busstop. Die jong man stel toe sy vriendin voor aan die ouer man wat hy pas ontmoet het. “Jy sal nie glo wie dit is nie!” Hierdie man is Karl Barth se barbier!”.

Dit is die gevaar as mens die tekens van die tyd of die semiotiek verkeerd lees. My en jou uitdaging is dat ons opgeskerp moet word om die geestelike tekens van die tyd reg te lees en die semiotiek te dekodeer.

bron:  bybelkennis.co.za NGVishoek: Ds. ( dominee ) Martin Barnard.

Lees Meer >>

Fiksheid

 

Die Bybel het ook raad wanneer dit by fiksheid kom:

1 Tim 4:7: “Maar van onheilige en sinlose verdigsels moet jy wegbly. Oefen jou liewer om in toewyding aan God te lewe. Om jou liggaam te oefen, het wel ‘n bietjie waarde, maar om in toewyding aan God te lewe, het in alle opsigte groot waarde, want dit bevat ‘n belofte van lewe, vir nou en die toekoms.”

Net soos met fisieke fiksheid is daar ook oefeninge en gewoontes wat ons kan help om ’n geestelike lewe te ontwikkel wat ons al nader aan God se Vaderhart sal bring. Net soos met enige fiksheidsprogram is dit nooit te laat om te begin nie en is daar verskeie maniere om geestelik fiks te word. Soek een wat by jou persoonlikheid en omstandighede pas en wat werkbaar is.

’n Paar voorstelle vir ’n geestelike oefenprogram is o a.:

1. Spandeer tyd in die Woord:

Begin met net 5 minute in die oggend of aand. Wat ookal by jou leefstyl inpas. Vermeerder die tyd soos jy fikser word.

2. Word sommer net stil in God se teenwoordigheid

Stilword is ’n baie goeie geestelike oefening en iets wat ons gejaagde Westerlinge baie moeilik vind.

3. Bid en oordink Sy Woord

Joshua 1:8: “Jy moet hierdie wetboek van vroeg tot laat lees. Dink dag en nag daaroor na en maak seker dat jy alles doen wat daarin geskryf staan. Dan sal dit met jou goed gaan. Dan sal jy sukses behaal.” (Die Boodskap)

4. Vernuwe jou manier van dink

Romeine 12:2: ”Moenie tuis raak in hierdie wereld met al sy boosheid nie. Nee, laat God julle van binne af nuutmaak. Laat Hy julle manier van dink verander sodat julle kan weet wat Hy van julle verwag. Dan sal julle ook weet wat sy wil is en hoe julle julle hele lewe elke dag aan Hom moet oorgee.”

5. Dien ander met jou tyd en liefde

Matteus 20:28: “So is dit ook met die Seun van die mens: Hy het nie gekom om gedien te word nie maar om te dien en sy lewe te gee as losprys vir baie mense.”

Om die lewe deur God se oë te sien is deursettingsvermoë en stamina nodig in jou oefenprogram, maar as jy aanhou met jou program kan verseker wees dat jy geestelike fiksheid sal bereik.

“There is a difference between interest and commitment. When you’re interested in something, you do it only when it’s convenient. When you’re committed to something, you accept no excuses, only results.” — Kenneth H. Blanchard.

Bron:  ekerk.org

NGVishoek: Ds. ( dominee ) Martin Barnard.

Lees Meer >>

Druk op die jeug

 

Oortuig van sonde
Ek het die winkel in gehaas met my kop omlaag sodat niemand my van die straat af kon herken nie. Toe ek die grafiese foto’s op die tydskrifte op die rakke sien, het ek amper flou geword van ’n kombinasie van adrenalien, vrees, naarheid en skuldgevoelens. Ek het ’n dun, goedkoop tydskriffie gekoop en letterlik by die plek uitgehardloop.
Toe ek uitkom, het my oog op ’n bufferplakker geval wat ek ’n paar maande gelede op my motor geplak het, ná besluite wat ek tydens ’n Baptiste-jeugvergadering geneem het. Dit het gelui: “Die verskil in my is Jesus.” Skielik het ek nog sieker op die krop van my maag gevoel. Ek was reeds van my seksuele sonde oortuig; nou het ek besef ek is ’n huigelaar. Ek wou net van daardie plek af wegkom. Voordat die dag verby was, was die tydskrif wat ek gekoop het, in die vullisdrom. Ek het ellendig gevoel.
’n Paar dae later, terwyl ek op ’n warm dag besig was om die gras te sny, het ek oor ’n Bybelvers nagedink wat ek al baie keer in die kerk gehoor het. Ek het nie die verwysing geken nie, maar ek kon die vers in my kop parafraseer. “Gaan deur die nou poort in. Die poort wat na die verderf lei, is wyd en die pad daarheen breed, en dié wat daardeur ingaan, is baie. Maar die poort wat na die lewe lei, is nou en die pad daarheen smal, en dié wat dit kry, is min.” Matt 7:13-14.

Die breë en die smal weg
Ek het nog nooit tevore ’n visioen beleef nie, maar op daardie oomblik kon ek ’n vurk in die pad voor my sien. Ek het geweet dat ek ’n kruispad nader. Ek kon óf ’n toegewyde Christen wees, óf ek kon kies om ’n lewe van kompromie te leef. God was besig om my te wys dat ek die smal weg moet kies voordat ek verder enige tree in die verkeerde rigting neem. Ek is deur ’n skrikwekkende besef van die vrees van die Here oorweldig, maar ek het dit ook as Sy be-skermende liefde ervaar. Binne ’n paar dae het ek my lewe aan die heerskappy van Christus oorgegee. 
Ek het hierdie verhaal met ’n groep studente gedeel wat ek by ’n Christelike kollege toegespreek het. Ek het geweet dat baie van hulle ook voor ’n geestelike kruispad staan. Ek het ook geweet dat hulle in die hedendaagse kubersekswêreld nie meer na volwasse boekwinkels hoef te gaan om pornografie in die hande te kry nie. Die stem wat my in 1976 na die middestad van Atlanta gelok het, het nou selfs skaamteloos en aanvallend geword, deur pornografie 24/7 op die web, TV en selfs selfone beskikbaar te stel.

Bid vir die Millenniumgenerasie
Die jongmense van vandag (11-29) – die sogenaamde Millenniumgenerasie* is voortdurend onder aanslag van versoekings wat kinders in die 1970’s glad nie mee te doen gekry het nie. Die stryd om ’n generasie vir Christus te behou, is hewig. Gesinne is in ’n gemors. Baie kinders is vaderloos. Die media het ons sedelike waardes binne ’n paar jaar geheel en al herskryf. Onverskillige en geleentheidseks word as ’n ‘normale’ tydverdryf onder 14-jariges beskou. Baie tieners het geen blootstelling aan die Evangelie nie; dus is die kanse maar skraal dat hulle ’n Bybelversie uit hulle kinderdae sal onthou of die prik van ’n skuldige gewete sal voel, soos ek jare gelede ervaar het.
Dit is hoekom ek my lewe aan gebed wy vir ’n geestelike herlewing onder die jonger generasie. Die duiwel het vandag se jeug opgeëis, maar dieselfde God wat onheil in my lewe afgeweer het, kan dit ook in hulle lewens doen.

*Millenniumgenerasie: word gedefinieer as die kinders van die ‘Baby Boomers’, gebore ná 1980 – 2000. Hulle is neo-liberaal in hulle politieke en godsdienstige beskouings, en is tegnologies kundig. 

J. LEE GRADY het vir 11 jaar lank as redakteur van Charisma Magazine gedien en is tans ’n medewerker by die tydskrif. Jy kan hom op Twitter vind by: leegrady.

Bron:  juig.co.za

NGVishoek: Ds. ( dominee ) Martin Barnard.

Lees Meer >>

Erg ‘onbybelse’ Noag


“Ons glo nie die rolprent is die geld of tyd werd om te sien nie.”
His People sê die rolprent is glad nie op die Bybel gegrond nie en gebruik eerder die esoteriese Kabbala as inspirasie. Daarby mislei Ster-Kinekor en Nu Metro glo mense as hulle na die rolprent as ’n “Bybelse epos” verwys. Die kerk sê as ’n mens meer oor Noag wil weet, moet jy liewer die Bybel lees.

Ook die Moslem Juridiese Raad (MJR) het hom teen die fliek uitgespreek.

Sheikh Riad Fataar, adjunk- president, het gister gesê enige uitbeelding van ’n Moslem-profeet of -boodskapper is onaanvaarbaar.

“Dit ondermyn hul heiligheid en alle gelowiges moet dit vermy,” het hy gesê.

Hy sê mense moet aangemoedig word om nie die fliek te gaan kyk nie “sodat rolprente soos dié nie geld maak nie”.

Noah het groot opslae onder konserwatiewe Christene in Amerika gemaak, veral nadat die regisseur, Darren Aronofsky, dit as die “mins Bybelse Bybelse fliek nóg” bestempel het. Aronofsky meen Noag was die wêreld se eerste omgewingsaktivis.

Alle Christene stem egter nie met His People saam nie.

Ds. Jannie Pelser, die charismatiese NG predikant van Krugersdorp wat daarom bekend is dat hy nie veel ooghare vir die “goddelose” Hollywood het nie, sê hy het die fliek geniet.

“ ’n Mens moet met ’n oop gemoed gaan en nie ’n geestelike ervaring verwag nie,” het Pelser gesê nadat hy Vrydag die fliek gesien het.

Hy beskryf Noah as “tipies Hollywood: skouspelagtig en ontstellend”.

Maar hy sal dit beslis nie wil boikot nie.

’n Christen-egpaar, Leo en Antoinette van der Meer, wat die prent by die Cresta-winkelsentrum in Johannesburg gesien het, sê hulle het albei daarvan gehou.

“Dis ’n goeie fliek. Dit laat jou terugdink na waar die mens begin het,” het Leo van der Meer gesê.

In Kaapstad se V&A Waterfront het fliekgangers gister gemengde gevoelens oor die prent gehad.

Noah is reeds in Maleisië, Katar, Bahrein, Egipte, Indonesië en die Verenigde Arabiese Emirate verbied.

bron:rapport.co.za NGVishoek: Ds. ( dominee ) Martin Barnard.

Lees Meer >>

Is Facebook en Twitter slegs die uithangplek vir digitale straatvegters en self-verliefdes?

 

Ongetwyfeld vind selfverliefdheid op doelbewuste en subtiele maniere uitdrukking op Facebook of Twitter. Facebook word veels te maklik ’n sosiale spieël waar selfies en ander selfverheerlikende fotos en stories bydra tot sekere mense se beeld-poets oefeninge. Twitter weer kan maklik ’n sosiale megafoon verander waar eie standpunte gedurig gepromoveer word. Hoe meer volgelinge sekere Twitter persona’s het, hoe groter word party mense se internet ego’s. Hulle gebruik selfs kunsmatige soek-enjins en allerlei trefwoorde om volgelinge te “werf.”

Waar laat hierdie selfie-sugtigheid op verskillende sosiale media platforms ons? Wel, dit is nie wys om die baba en die badwater saam uit te gooi nie. Ons skuld onsself en ander ’n beter digitale teenwoordigheid. Dit beteken onder andere:

  • Ons plaas nie slegs fotos of verhale oor al ons suksesse nie. Daar is ook wel ruimte hiervoor, maar ons wil nie net aan al ons uiterlike en meetbare prestasies geken word nie. Mense moet ons ook ken aan ons humor, vrae, worstelinge en alledaagse vreugdes.

  • Ons skep nie ’n digitale persona wat nie getrou is aan wie ons regtig is nie.

  • Ons skinder nie in ander se afwesigheid op Twitter of Facebook oor wat hulle elders in die lewe sou gesê of gedoen het nie.

  • Ons misbruik nie ander se Facebook of Twitter platforms deur ongenooid ons eie stories daar af te pak nie. As ons nie iets konstruktief of relevant kan bydra tot wat iemand gepost of getweet het nie, dan hoef ons dit nie te sê nie. As iemand iets konstruktief gesê of gedeel het, waardeer ons dit net (“Like” op Facebook en “Favorite” op Twitter). Dis meer as genoeg.

  • Ons hoef nie ’n opinie oor alles en te hê wat mense “post” of “tweet” nie.

  • Ons hoef nie elke slag ’n vroom preek af te steek of “diep geestelik” te probeer wees om ’n keurige getuie vir die Here te wees in digitale ruimtes nie.

Bron:  ekerk.org NGVishoek: Ds. ( dominee ) Martin Barnard.

Lees Meer >>

Die Bybel: die mees verstommende boek ooit


Die Bybel is deurlopend onder hewige aanvalle en selfs op die hoogste vlakke word die inhoud verwerp en verdraai, omdat mense dit eenvoudig nie meer glo nie. Hoogleraars by Universiteite (ja, in Suid Afrika) en selfs dienende predikante van alle denominasies verwerp die kernwaarhede van die Bybel. Die maagdelike geboorte, wonderwerke, opstanding, hemelvaart en Jesus se Godheid word openlik verwerp. Daar is baie groeperinge wat die Bybel slegs as ‘n “goeie boek” beskryf, omdat hulle glo dat die Bybel se waardes ten minste goed is, maar van verlossing en sondevergifnis is daar geen sprake nie. Nie eers te praat van die Heilige Gees nie. Groepe soos die Nuwe Hervormers aanvaar bykans niks meer nie, maar talle van daardie mense maak steeds hulle brood en botter met die Bybel, terwyl hulle die inhoud verwerp.

 

Hoe goed ken jy die Bybel? Nie net die inhoud nie, maar ook die geskiedenis van die samestelling van die Bybel? Indien jy so ‘n paar van hierdie feite begin verstaan, sal jy waarskynlik saamstem dat dit inderdaad ‘n Boek is om mee rekening te hou.

Kyk hoeveel van hierdie basiese vrae kan jy reg antwoord

Waar kom die Bybel vandaan?
Hoeveel mense het daaraan geskryf?
Oor hoeveel jare is die Bybel geskryf?
Het Jesus (en Paulus) die ou Testament in sy huidige vorm gehad?
Het Paulus ooit vir Jesus een tot een ontmoet?
Hoeveel boeke is daar in die Bybel?
Waar is die Bybel geskryf?
In watter tale is dit geskryf?
Wie het die boek Hebreërs geskryf?
Hoeveel boeke het Paulus geskryf?
Hoeveel van die Evangelies vertel van Jesus se geboorte?
Was Matteus, Markus, Lukas en Johannes almal dissipels?
Hoeveel van die dissipels se name ken jy?
Hoe lank gelede is die Bybel in sy huidige vorm saamgestel? 
Is daar ‘n boek met die naam Judas?
Wat was eerste geskryf. Die Bybel of die Koran van die Moslems?

Ek is oortuig daarvan dat ‘n klompie van hierdie vrae vir jou duister is. Soos dit ook vir my was. Soos wat ek egter meer oor hierdie dinge opgelees het, het my geloof toegeneem. Hierdie is nie eers vrae oor die inhoud nie, slegs die totstandkoming van die Bybel.

Algemene opmerkings

Die  Bybel is die mees verstommende boek ooit, waarvan meer kopieë as enige ander boek ooit verskyn het. Die Bybel het ook meer mense se lewens verander as die totaal van al die boeke  saam wat ooit in die hele wêreld gepubliseer is. Mense ken soveel dele van die Bybel uit die kop uit, dat jy die hele Bybel sal kan oorskryf as jy hierdie klomp mense bymekaar sou bring. Dit is ook op elke denkbare media beskikbaar.

Die belangrikste van alles, na duisende jare van die bestaan daarvan, weet teoloë dat absoluut niks moet verander nie. Dit IS die onfeilbare Woord van God.

Antwoorde

Waar kom die Bybel vandaan?

Deur God geinspireer

Hoeveel mense het daaraan geskryf?

Meer as 40

Oor hoeveel jare is die Bybel geskryf?

Ongeveer 1600 jaar

Het Jesus (en Paulus) die ou Testament in sy huidige vorm gehad?

Nee, net gedeeltes

Het Paulus ooit vir Jesus een tot een ontmoet?

Nie sover ons weet nie. Nie opgeteken.

Hoeveel boeke is daar in die Bybel?

39 Ou Testament en 27 Nuwe Testament. Totaal van 66 boeke

Waar is die Bybel geskryf?

Noord-Afrika, Asië en Europa

In watter tale is dit geskryf?

Grieks, Hebreeus en Aramees

Wie het die boek Hebreërs geskryf?

Onbekend

Hoeveel boeke het Paulus geskryf?

13 van die 27 (bykans die helfte)

Hoeveel van die Evangelies vertel van Jesus se geboorte?

Net Mattheus en Lukas

Was Matteus, Markus, Lukas en Johannes almal dissipels?

Nee, net Matteus en Johannes

Hoeveel van die dissipels se name ken jy?

Lees in Markus 3:16

Hoe lank gelede is die Bybel in sy huidige vorm saamgestel?

397 na Christus, dus ongeveer 1600 jaar gelede

Is daar ‘n boek met die naam Judas?

Ja, net voor Openbaring. Nie Judas Iskariot.


‘n Paar bewyse wat die betroubaarheid van die Bybel steun

Opgrawings bring geweldig baie kennis mee. Oor baie jare het baie mense probeer om die Bybel verkeerd te bewys deur inligting deur argeologie te versamel, maar steeds is nie een enkele feit uit die Bybel verkeerd bewys nie. Profesieë uit die Ou Testament kom tot vervulling in die Nuwe Testament, terwyl daar dikwels duisende jare tussenin verloop het. Baie baie mense kom tot bekering deur net die Bybel te lees, en verstaan die kernaangeleenthede presies dieselfde.

Verskillende agtergronde van die skrywers

Baie min van die skrywers het mekaar geken en hulle het ook in verskillende tye geleef, maar tog is die goue draad wat regdeur die Bybel loop baie prominent. God is lief vir die mens, wil nie dat sonde die mens oorheers nie, en het Saligheid vir die mens in gedagte. Hierdie basiese feite loop regdeur die Bybel en is geskryf deur mense wat mekaar meesal nie geken het nie, en ook  meesal nie mekaar se geskrifte gehad het nie.

Moses

Goed opgevoede politieke leier

Josua

Militaris

Salomo

Koning

Dawid

Koning

Daniël

Eerste Minister

Nehemia

Skinker

Amos

Skaapboer

Matteus

Tollenaar

Lukas

Dokter

Petrus

Visserman

Paulus

Fariseër / Rabbi / Tentmaker. Paulus was ‘n geleerde man, en het onder Gamaliël studeer. Hy het die wet baie, baie goed geken en was so fanaties dat hy Christene links en regs vervolg het, totdat Jesus sy lewensrigting dramaties verander het.

Profesie

Daar is meer as 5000 profesieë in die Ou Testament opgeteken, waarvan die meeste reeds waar gekom het, maar nog nie een enkele een is sover verkeerd bewys nie.
Omtrent 330 profesie oor Jesus is in die ou testament opgeteken, sommige met verstommende akkuraatheid!
Jesaja 53 is natuurlik alombekend vir die Messiaanse profesieë wat opgeteken is.

Hier volg net enkele belangrikes:-

PROFESIE

OU TESTAMENT

VERVULLING IN NUWE TESTAMENT

Gebore uit ‘n maagd

Jes 7:14

Matt 1:18, 23 -25

Gebore in Bethlehem

Miga 5:1

Matt 2:1

Prys van verraad

Sag 11:12-13

Matt 27:7-10

Lot oor sy kleed

Ps 22:18

Joh 19:23-24

Opgewek uit die dood

Ps 16:10

Hand 2:25-32


Opgrawings bewys die waarheid van die Bybel

Dr Flinders Petrie en William Ramsey was bekende argeoloë wat probeer het om die Bybel verkeerd bewys. Ramsey het dit sy lewenstaak gemaak om as deel van sy werk die Bybel verkeerd te bewys. Hy was nes sy pa ‘n ateïs en hulle was welgesteld. Hy het baie boeke oor sy werk geskryf oor ‘n lang tydperk. Sy laaste boek het egter gehandel oor sy bekering! Hy kon nie een enkele feit uit die Bybel verkeerd bewys nie. Inteendeel…

In 1947 – 1952 word die Dooie see rolle langs die Dooie see ontdek in 11 grotte. Weens die voggehalte in die grotte bly hierdie rolle (scrolls) merkwaardig behoue. Van hierdie rolle is die oudste wat die mens ooit ontdek het, en van onskatbare waarde. Van bykans elke boek in die Bybel word kopieë ontdek.

Daar bestaan vandag geen enkele oorspronklike geskrif of brief van die Bybel nie, omdat dit met tyd vergaan het. Daar het net eenvoudig nie materiaal bestaan wat eindeloos kon hou nie en daarom het alles net met tyd vergaan. Bybelkopiëring was egter ‘n baie belangrike kunsvorm en is baie noukeurig en akkuraat gedoen.

Wanneer is die Bybel saamgestel?

Die Bybel is oor ‘n tydperk van ongeveer 1600 jaar geskryf tot ongeveer 100 jaar na Christus. In die eerste paar eeue na Christus verskyn daar talle geskrifte oor die gebeure van die Bybel. Die gebeure van daardie tyd het mense so aangegryp dat baie mense begin het om daaroor te skryf. Alles was egter nie outentiek nie, maar mense het dit slaafs begin glo. Vandag ken ons van hierdie geskrifte as die apokriewe boeke en sommiges bevat wel baie feite van die gebeure. In die laat 300’s begin die vroeë kerkvaders egter besin oor watter boeke dan as waar en korrek beskou moet word en wat nie. Teen die jaar 397 word die Bybel egter in sy huidige vorm aanvaar in terme van die boeke, sowel as die volgorde daarvan.  Alles in die Bybel is egter nie kronologies opgeteken nie.

Die Koran

Die vraag word dikwels gevra waar die Koran dan in die prentjie pas en waar dit vandaan kom.

Die Koran word deur die Moslems as die heilige woord van Allah beskou en glo dis ook die finale woord van hulle god (klein letters). Hulle glo ook dat die Koran totaal wegdoen met die Bybel.

In die jaar 610 begin Mohammed (‘n militaris en politieke leier) die Koran skryf tot en met sy dood 23 jaar later. Die Koran bestaan nie uit testamente nie, maar hoofstukke. Bykans al die karakters in die Ou Testament word genoem, maar bykans geen van die Nuwe Testament nie.

Adam, Eva, die tuin, die slang, sondeval, skepping, Noag en die ark, Job, Lot, Abraham, die Konings en talle ander word genoem, maar nie in die volgorde soos in die Bybel nie. In die Afrikaanse vertaling van die Koran staan:- “Abram was ‘n regverdige, ‘n goeie Moesliem”.

Van die Nuwe Testament lees ons net van Jesus (wat nogal die Messias genoem word) en sy moeder, Maria. Daar staan egter:- “Jesus was geen god nie, hy en sy ma het voedsel geneem”. Dit beteken dat Jesus moes eet soos ‘n mens om aan die lewe te bly en dus nie God kon wees nie.

Nou bly die vraag, watter een van die twee geskrifte dra die meeste gewig?

Wel die Bybel was reeds saamgestel soos ons dit vandag ken, meer as 200 jaar voor Mohammed begin skryf het aan die Koran! Mohammed het dus die Bybel as bron gebruik. Stem jy saam dat die oudste geskrifte meer gewig moet dra?

Bybel kopiëring

Natuurlik was Xerox fotostaatmasjiene so bietjie te laat om die Bybel te reproduseer. Bybel kopiëring is baie tydsaam met die hand gedoen, deur geletterde mense. Deur die eeue was dit ‘n baie spesiale vakgebied en was uiters akkuraat gedoen. Daar word vertel dat mense wat dit gedoen het hulleself vir ‘n ruk afgesonder het as voorbereiding, en dan onder streng toesig geskryf het. Taal was nie soos ons dit ken nie, en daar was bykans geen spasies tussen letters nie. Voordat Jesus se Naam geskryf is, moes die persoon blykbaar eers sy hande gaan was! Indien ‘n fout gemaak is, was die hele boek verwerp en vernietig.

Kopië van Jesaja wat meer as ‘n duisend jaar uitmekaar gekopieër was is opgegrawe, en slegs enkele leestekens het verskil, verder nie een enkele letter nie. Die geskrifte is gedateer op grond van die materiaal waarop dit geskryf is.

Bybelvertaling

Mense stoei nogal baie oor watter vertalings die akkuraatste is. Daar word verkeerdelik geglo  dat die nuwe vertalings vertaal word uit die vorige vertaling (bv, die 1933/1953 word gebruik om die 1983 te vertaal).  Dit is egter nie waar nie. Wanneer ‘n nuwe vertaling gedoen word, word die oudste geskrifte wat intussen beskikbaar is (dikwels deur opgrawings) gebruik om die vertaling te doen. Neem in ag dat die Dooie See rolle ontdek is nadat die 1933 vertaling gedoen is. Voorts verstaan taalkundiges die antieke tale nou baie beter as jare gelede. Antieke Grieks het maar uit sowat 1000 woorde bestaan. Vandag verstaan ons die taal baie beter en verstaan ons die konteks van die woorde (wat soms verskillende gebruike gehad het) ook beter. Die woord “Yom” wat in Genesis 1 gebruik word vir “dag”, was ook gebruik vir “tydperk”. So is daar hordes woorde wat dubbel betekenis gehad het en vandag beter verstaan word.

Mense glo ook dat daar tekste in die nuwer vertalings uitgelaat is wat in die ouer vertalings opgeteken is. Dit is ook nie korrek nie. In die 1933/1953 vertalings was daar inderdaad tekste wat opgeneem is en later weggelaat is, maar dit was kant aantekeninge wat op die oorspronklike kopieë aangebring was, en nie deel was van die grondteks nie. Dit is dus korrek dat dit weggelaat moet word.

Die vraag wat mens egter moet vra is:- deur watter vertaling sal die Here die beste met jou en my praat? Die antwoord is eenvoudig. Die Here sal met jou praat deur dit wat jy lees. En as jy seker wil maak, kry vir jou E-Sword en lees ‘n teks uit al die vertalings.

Die Bybel verander baie mense se lewens

Baie, baie mense het tot bekering gekom deur net die Bybel te lees.

Alle ware Christene word verander deur die Bybel en groei in hulle geloof.

Die Bybel bly absoluut relevant vir vandag, asof dit gister geskryf is.

Die Nuwe Testament hef nie die Ou Testament op nie! Baie waarhede in die Ou testament is nog net so van toepassing as toe dit geskryf is. Die Nuwe Testament kan ook beskou word as die vervulling van die Ou Testament.

‘n Paar punte om in ‘n moeilike gesprek te gebruik.

As iemand nie glo in die Bybel nie, vra:-

·         Wat verstaan jy nie van die Bybel nie?

·         Waar weerspreek die Bybel homself?

·         Het jy al die Bybel gelees?

·         Hoe kan jy ‘n uitspraak maak as jy dit nie gelees het nie?

As die persoon ander geskrifte voorhou, vra of hy dit gelees het. Die antwoord sal gewoonlik “nee” wees, vra dan waarop hy sy Saligheid berus.

Die Bybel is ‘n ongelooflike boek. Lees vandag ‘n teks en oor ‘n paar dae dieselfde teks, dan spring daar dikwels iets nuuts uit daardie teks, so asof jy dit nog nooit gelees het nie.

Glo maar gerus die Bybel, dit het baie indrukwekkend tot stand gekom! Dit IS die Woord van God.

“Men do not reject the Bible because it contradicts itself, but because it contradicts them” – E. Paul Hovey

“Scriptures are shallow enough for a babe to come and drink without fear of drowning and deep enough for theologians to swim in without ever touching the bottom” – Walter Henrichsen

Bron:  heuning.co.za NGVishoek: Ds. ( dominee ) Martin Barnard.

Lees Meer >>

Die Godstad: waar Hy alles gee en oor alles tevrede is

Wel, vir inwoners van die Godstad, is alles in die lewe volkome in plek! En wel om die volgende redes en op die volgende wyse:
·         God se volmaakte teenwoordigheid is in plek in elke Jesus-mens. Deur “die sewe Geeste voor sy troon” (Openbaring 1:4) is Hy volledig die Een wat altyd by ons is, al gebeur wat ook al.
·         En omdat Hy nooit weggaan of verdwyn, al loop dinge hoe erg verkeerd in ons lewens, is Hy self die Antwoord en die Voorsiening in alles in ons lewens.
·         Daar is nie meer seisoene in die Godstad nie: “… die boom van die lewe. Hy dra twaalf keer per jaar vrugte …” (Openbaring 22:2) Die betekenis vir ons is dat die Een op die troon van ons lewe, oorvloedig voorsien.
·         “Die blare van die boom bring genesing vir die nasies.” (Openbaring 22:2) Hy voorsien in elke vorm van fisiese genesing wat Jesus-mense die nodigste het, dit is alle vorme van honger of dors of siekte. Maar Hy voorsien by uitnemendheid in elke vorm van geestelike genesing, dit is die voortdurende herstel en opbou van ons intieme verhouding met Hom in ons.
·         Binne die nuut-wordende verhouding wat elke inwoner van die Godstad het, word alle grense wat skade veroorsaak finaal verwyder en alle vooroordele teenoor alle partye betrokke, word verwyder. “Daar sal nie ʼn enkele ding oorbly waarmee God ontevrede is nie.” (Die Boodskap)

Wat is jou grootste honger of siekte in jou geestelike lewe? Waarmee is jy nog ontevrede in jou eie lewe? Of waarmee dink jy is God nog ontevrede met jou? Wat dit ook al mag wees wat die vrug in jou lewe steel, Hy wil dit herstel omdat Hy alles gee en oor alles tevrede is.

Laat ons leef met die volgende in ons harte: “Oorvloed-Gewer, so opreg waardering dat U tevrede is met my!”

Bron:  http://doomcharl.blogspot.com/ NGVishoek: Ds. ( dominee ) Martin Barnard.

Lees Meer >>

A2J Uitreik: Loeriesfontein Deel 1 28-30 Junie 2014

By die koshuis aangekom is dit afpak, kamers kry en die minder goeie nuus – daar is nie warm water nie. Loeriesfontein het streng waterbeperkinge en ons het probeer om al die watertenks reg te kry voor ons kom, maar dit was nog nie heeltemal reg nie.

Die aand kry elkeen sy uitreik top, ‘n serp (vir die koue aande) en ook ‘n pet wat geskenk is. – Handig vir die paar warm dae wat ons sover gehad het.

Sondag

Die oggend is die span na die VGK en die NGK se dienste toe. By die VGK het die band behoorlik gespeel met o.a. ‘n een snaar baskitaar wat self gemaak is!

By die NGK het dit eers vreemd gelyk omdat die kerk so leeg is, maar ons is genooi vir tee en hier het ‘n ander uitreik begin: Loeriesfontein het hulle huise (en storte) vir ons oopgemaak. ‘n Vrou het ‘n lys name gereël wie ons kon bel om te gaan stort, terwyl die hotel en die “pub” ook toegang gegee het vir storte. Elke stort het hand aan hand gegaan met ‘n kuier koffie :-).

* In die paar dae reik die gemeente uit op ‘n besondere, persoonlike manier na ons terwyl ons weer kan kuier en getuig waarom ons gekom het en wat elke dag gebeur. Hulle wil net weet waarmee hulle nog kan help.

Die middag is dit tyd vir ouetehuis. Hier is twee ooms wat vanjaar 100 word en ‘n hele paar mense ouer as 90. Die meeste se gesondheid is egter nog uitstekend. Van A2J (en ekself) vind dit maar vreemd om met die ouer mense te begin gesels. En dan die verrassing dat jy dit geniet, dat mense sê hulle bid vir jou – soos jy nou vir hulle gebid het – en jy weet ons dien dieselfde Here. En ook hoe klein die wêreld is: twee van die tannies se kleinkinders bly in Vishoek of trek binnekort soontoe.

Die aand is ‘n Lofprysingsaand in die VGK se saal waar elkeen ‘n kans kry om weer stil te raak voor die kruis en ook saam met iemand te bid. Verlede week is ‘n kleintjie oorlede aan verstikking en die oupa kom vra dat ons bid vir die gesin en die hartseer. Dwelmmisbruik en tienerswangerskappe krap hier ook gesinne deurmekaar met baie hartseer waarvoor ons gebid het.

* ‘n Stukkie (persoonlike) goeie nuus: in 2007 was Jeffrey in my groepie, so ek het gewonder of hy nog hier is en hoe dit gaan (hy was die stout een 🙂 ). – Hy het kom “hallo” sê, vir “lang Jaco” gesoek wat saam hier was en vertel hoe opgewonde die mense is dat Vishoek hier is. En hy glimlag net!

Maandag

Die eerste “lessies” dag vir die week skop af en A2J nooi kinders by hulle huise om saam te kom speel en in te kleur. A2J word 2-2 ingedeel en bied dan die lessies aan vir 10-25 kinders in hul groepie. Liedjies word gesing – van die “monkey” om die lyfies warm te kry in die oggend tot “One-way – Jesus!”.

Elke kind by die lessies kry deur die week ‘n geskenkpakkie uit die geskenke wat aan ons gegee is. Elke dag is daar ook sop en broodjies. Vir die eerste dag het ongeveer 290 kinders sop gekry. Die laaste 50 het Nick-nacks en koeldrank saam met die broodjie gekry toe die sop op is. So 340 kinders vir die oggend.

Ondertussen het Rohuan, Riki en Evette ‘n bloeddruk en suiker toetskliniek gehou by die VGK saal. Dit is hierdie week elke oggend en 37 mense het die eerste dag gekom. ‘n Stukkie luister en gesels is natuurlik noodsaaklik om die bloeddruk laer te kry.

Die middag is poppekas, “Poof” en “Paff” – ons eie ruimtemannetjies  wat kom kuier en ook sport. Hoola hoop, touspring, rugby, krikiet, netbal – alles word met groot entoesiasme gespeel. Op ‘n stadium het die klein mannetjies rugby besluit om vir lange Stefan te tackle dat hy bloei. – Vandag sal ons eerder sokker speel met hulle :-).

Die aand bied Riki ‘n noodhulpkursus aan vir die gesinne, sodat hulle weet wat om te doen wanneer dinge verkeerd loop tuis (soos met die verstikking). 74 mense kon die aand bywoon en buiten vir ‘n hele paar vrae aan die einde, vra hulle ook vir die aanbieding notas sodat hulle dit weer kan deurgaan.

By die koshuis reël ons badkamer bediening vir die meisies en volwassenis. – Die seuns kon die middag warm storte kry.

Later die aand getuig Gabie van haar eie lewe en “When life doesn’t make sense”. Hoe God die stukkende stukkies in haar lewe aanmekaar sit deur sy Woord en sy Gees en hoe ons deur ons eie hartseer te deel, juis geleentheid skep vir ander mense om ook hulle hartseer te deel.

Los stukkies

Watse tipe kuiergaste is julle wat net stort en dan gaan sonder ‘n koppie koffie? – Callie, Loeriesfontein

‘n Mens kon die muise in die plafon hoor toe ons bid. – terugvoer, VGK diens.

“Haal af jou hoed.” – die kleintjie wat bid vir die sop aan Ds. Martin voor hy begin.

Vanaand is gesinsaand en ons wil met die gesinne ook gesels oor dwelms wat al hoe meer ‘n probleem raak.

Volgende keer nog oor die outehuis bediening en ook die instandhoudingspan wat woes besig is.

Voorbidding

Bid saam met ons –

  1. ‘n Oop gemoed – baie van A2J het ‘n paar uitreike agter die rug en dit is maklik om te doen wat jy “weet” om te doen i.p.v. wat God wil hê ons moet doen.
  2. Dankie vir gesondheid – buiten vir een wat ‘n maaggogga gehad het die eerste twee dae en ‘n bietjie moegheid, is ons werklik geseën met gesondheid.
  3. Dankie vir die goeie samewerking van A2J onder mekaar. Bid ook dat hulle ‘n goeie verhouding met Loeries se kinders sal hê.
  4. Dankie vir die warm weer. Blykbaar is kouer weer om die draai. Bid dat ons sal vertrou en weet dat God sal voorsien, ook in die weer.
  5. Vir elkeen op die uitreik: dat ons verhouding met die Here meer persoonlik sal word en sal aanhou groei.
  6. Vir die “Badkamer” bediening / uitreik. Dat dit geseënd sal wees en ons God en die mense hier op ‘n nuwe manier sal leer ken. Soos iemand noem, daar is ‘n rede hoekom ons nie warm water het nie.
  7. Woensdagaand se Talentaand en Vrydagaand se DVD aand. Dat dit goed sal verloop.

Dankie vir julle gebede, al kom die nuus van ons kant of ook stadig deur. Dit is verbleidend dat God ons in Sy hande hou soos julle ons ook in julle gebede hou.

Groete,

Johann

NGVishoek: Ds. ( dominee ) Martin Barnard.

Lees Meer >>

Geloof maak nie van jou ’n beter mens nie

Geloof in die lewende God gebeur anders. Dit gebeur verhoudingsmatig. Geloof laat jou inderdaad anders leef, maar dit gebeur altyd vanuit jou verhouding met Christus. Geloof in Hom maak jou nooit werklikheidsvreemd of veroordelend nie. Geloof in Hom laat jou afstand doen van jou selfsugtige manier van leef. Jesus se roete is immers dié van nederigheid, opoffering en diens.

Geloof help jou niks as jy bloot net wil beter voel oor jouself nie. Of as jy net so nou en dan kits-hemelse hulp benodig terwyl jy voortgaan met die najaag van jou eie begeertes nie. As jy nie leer om afstand te doen van jou selfsug en jou tydelike behoeftes aan sekuriteit en mag nie, gaan jy teleurgesteld wees met Christus. Geloof wat nie lei tot onselfsugtige navolging van Hom nie, is godsdienstige oëverblindery. Hy het gekom om jou lewe ryk te maak met sy nabyheid en sy vreugde. Moenie Jesus dus verwar met selfverbeteringsprogramme, blink kersgeskenke, en ’n voorspelbare lewe nie. Die doel van jou geloof in Hom is nie om van jou ’n beter mens te maak nie maar om jou tot eer van God en tot seën vir ander te laat leef. Volg Christus op sy terme, dan is die hemele bokant jou oop.

Bron:ekerk.org

Lees Meer >>