ngvishoek – Bladsy 110

Die intensiteit van die geestelike stryd kan uit die volgende afgelei word: in die vorige gedeelte moes die dissipels swaarde koop vir die stryd en in die volgende gedeelte probeer hulle vir Jesus veg met ‘n swaard. Tussenin kry die dissipels twee keer opdrag om te bid en tussen hierdie twee gebedsopdragte, bid Jesus so ernstig dat sy sweet soos bloed op die grond val.

Hoekom is hierdie laaste woorde van Jesus so spesiaal?
• Dit was die laaste keer wat Jesus alleen met sy dissipels gepraat het;
• Jesus se geestelike stryd het te doen met ons geestelike stryd; en
• Jesus se opdrag om te bid geld ook vir ons vandag.

Kom ons maak die sprong na vandag: daar is vandag ook ‘n geestelike stryd wat woed. Hierdie stryd is teen ons geloof in Jesus Christus gerig, dit is teen die kerk van Jesus, dit is teen alles wat van God af is! En ons veg met God aan ons kant in hierdie stryd deur lewende kontak met God te hou. Hierdie kontak hou ons met Hom wanneer ons bid. En wanneer ons bid, word ons meer en meer deel van God se daaglikse stryd teen die booshede van ons dag.

Soos Paulus ons herinner in Efesiërs 6:12, ons stryd is teen die bose magte van hierdie sondige wêreld. En die enigste manier om onsself te beskerm en deel van die wenspan te wees, is vanuit ‘n lewende verhouding met die oorwinnende Jesus wat vir my gekruisig was.

Bron: http://doomcharl.blogspot.com/

En so het ‘n legendariese vriendskap begin – uniek onder die Ou-Testamentiese profete. Die Here het toegelaat dat Elisa uiteindelik vir Elia opgevolg het. Maar die Here het veel meer as dit gedoen. Die Here het nie net vir Elia ‘n opvolger gegee nie, maar ook ‘n ware vriend. Elisa het Elia liefgehad en het genoeg begrip vir hom gehad om hom te kon help en bemoedig.

Soms is jou kosbaarste vriendskap met iemand buite jou ouderdomsgroep. ‘n Vriendskap met iemand baie ouer of jonger as jy kan jou uitkyk op die lewe verbreed. Ouer vriende is dikwels ‘n mentor vir ons, soos Elia vir Elisa was. Tyd wat ons aan ‘n jonger vriend bestee, gee ons ‘n doel vir vandag en hoop vir môre.

Gebed: Hemelse Vader, ons kan U nooit genoeg bedank vir die vriende wat U aan ons gee nie, veral vir diegene wat ons help om te groei, en wat genoeg vir ons omgee om ons in liefde uit te daag en op ons foute te wys. Maak ons sensitief vir mekaar, sodat ons mekaar kan raadgee en lei. Amen

Bron: versndag

Om om te gee beteken tog presies dit: om – te – gee.

En as ek die evangelie reg verstaan, beteken dit nie ten eerste om iets te gee nie, maar om jouself te gee. Om die maaltyd waarmee jy geseën is te deel en nie net die krummels vir die armes te gooi nie.

Ons grootste uitdaging in klowe tussen ryk en arm is nie net om kos te gee aan dié wat in nood is nie, maar om saam kos te maak en saam te eet. Community eerder as charity. Liefde vra meer as net liefdadigheid.

Liefdadigheid is nie uniek aan die kerk nie.

Almal bewys deesdae ’n bietjie liefdadigheid op die kantlyn.

Selfs die rolbalklub onder in die straat gee ’n persentasie van hul inkomste en samel nou en dan ’n bietjie kos en komberse in.

’n Tyd gelede praat ek op “MIV-Sondag” in ’n gemeente.

Die mense is duidelik geraak deur die stories en statistieke van die grootskaalse pyn en dood.

’n Paar tannies pink selfs ’n traan weg.

Tog, toe ek aan die einde van die diens vra wie iemand met MIV/vigs ken, was daar niemand nie. Die stilte was nie ongemaklik genoeg nie.

Dit in Suid-Afrika, die land met die hoogste MIV/vigssterftesyfer ter wêreld en miljoene weeskinders weens die siekte.

Nou en dan bel ’n dominee en vertel dat sy gemeente ’n klomp blikkieskos ingesamel het. Hy wil hoor of ons dalk vir hom armes het aan wie hulle dit kan uitdeel.

Dit is vir hom belangrik dat die mense dit self kom gee sodat hulle kan kontak maak en “’n bietjie voel hoe dit is” (en dalk ’n paar foto’s neem vir die sendingdiens).

Ons kan al die blikkieskos en komberse wat ons kan kry, goed gebruik, so ek probeer maar altyd vriendelik wees, maar laat ek vir ’n slag sê hoe ek regtig voel. Hulle is al hoeveel jaar kerk?! En dit in Suid-Afrika met sy reuse-armoede en werkloosheid. Ná al die jare het hulle steeds geen langtermynverhouding met mense in nood nie?!

Wat doen ’n gemeente wat nie besig is om om te gee nie heeldag?

As omgee na buite bloot die stokperdjie of vakansieprogram van die kerk is, wat is dan die kernbedrywigheid?

Jesus het nooit gesê: Ek was honger en julle het vir my gepreek, dors en julle het vir my gebid, ’n vreemdeling en julle het ’n debat gehou oor vreemdelingehaat nie. (Matt. 25:31-46.)

Shane Claiborne het gesê die probleem is nie soseer dat ons nie omgee vir die armes nie, maar dat ons hulle nie ken nie.

Dit is natuurlik nie verkeerd om komberse en blikkieskos in te samel nie (dit is eintlik baie nodig), maar die langtermyndoelwit van enige gemeente moet tog langtermynverhoudings met mense in nood wees. Dalk sal hulle glo dat God in hulle belangstel as sy liggaam in hulle belangstel?

Dit is jammer dat so min gemeentes dit regkry om die byeenkomste van die kerk te omskep in ontmoetingsplekke waar mense van die uiterstes van ons samelewing mekaar beter kan leer verstaan.

Die kerk het die potensiaal om dié plek van versoening in die gemeenskap te wees.

Nou hoor ek al die dominee sê die probleem is ligging en demografie, ons gemeente is eenvoudig te ver van die nood af. Wel, dominee, dan sal julle moet beweeg! Sendingwetenskap 101: As jy jou liggie wil laat skyn, soek ’n donker plekkie.

God het nie die wêreld na die kerk toe gestuur nie, hy het die kerk na die wêreld toe gestuur.

Die probleem met blote liefdadigheid is dat dit ons op ’n afstand hou. Dit laat ons kyk, maar nie mooi sien nie. ’n Mens kan op ’n afstand jammer wees, maar dit is wanneer jy naby kom dat empatie in jou hart begin groei en jy regtig begin omgee. Dit is wanneer jy agterkom dat jy eintlik ook “arm” is en baie het om te leer.

Die armes het nie net die kerk nodig nie, die kerk het ook die armes nodig.

Dit is nie genoeg dat ons net praat oor wat Jesus gedoen het nie. Ons sal dit moet waag om te doen wat Hy gedoen het. God het nie net vir ons iets gestuur om ons gemors hier onder uit te sorteer nie, Hy het vir ons iemand gestuur om saam met ons te wees.

– Ds. Strydom is direkteur van Echo Jeugontwikkeling in Pretoria en deeltydse predikant in die NG gemeente Villieria.

Bron: beeld.com

Voorverlede week is ’n diens vir leerlinge aan die Hoërskool Bella Vista deur vader Johnathin Pieterse in die St.?Matthews- Anglikaanse kerk gehou.

Gerugte lui dat ’n gewese pastoor glo in die Bella Vista-woonbuurt ’n “kerk vir Satan” wil stig.

Die identiteit van dié “demoon-doom” soos die persoon hier bekend staan, is nog onbekend.

Inwoners vertel kinders dra reeds “tekens van Satan op hul liggame”. Die afgelope twee weke is by twee geleenthede dooie katte gevind – ’n bewys van sataniese rituele, beweer inwoners.

In die kettingbriewe sê skoolhoofde dat laer- en hoërskoolleerlinge reeds by die “duiwelaanbiddersgroep” betrokke is.

In een so ’n brief word ouers verder ingelig dat “Maart en April die offertyd van die satans-kerk” is.

In sy brief skryf mnr. Bennie Leendertz, hoof van die Hoërskool Bella Vista: “Die laaste tyd het daar verskillende gerugte, navrae en bekommernisse na die skool gekom rakende die beoefening van satanisme in die Ceres-omgewing.”

Leendertz sê verder “voorkomende programme” word deur geestelikes aangebied.

Of die sataniste ’n vrugbare teelaarde in die Ceres-vallei sal vind, is ’n ope vraag, het past. Kevin Burden van die Family Worship Centre op Ceres aan Rapport gesê.

Volgens Burden is die “probleem baie ernstig”.

Hy en ’n gebedspan is besig om onderwysers en ouers in die gebied op te lei om die probleem te pak.

“Ek het satanisme in die Transvaal beveg en ek het reeds talle tekens soos die heksagoon, die 666-teken en die ‘alsiende oog’ hier op Ceres gevind.”

Ds. Freddie Swart van die VGK-gemeente op Ceres sê die bedreiging van satanisme is nie groter as die tergende maatskaplik-ekonomiese probleme van tienerswangerskap, armoede, misdaad en drankmisbruik nie.
“Satanisme sal op Ceres binne ons bestaande geestelike aksies gepak word.”

Volgens mnr. Paddy Attwell, woordvoerder van die Wes-Kaapse onderwysdepartement, het die betrokke skole die departement ingelig oor die kwessie.

Sielkundiges en maatskaplike werkers van die kantore van die Kaapse Wynland-onderwysdistrik sal die skole op versoek bystaan.

Ao. November Filander, ’n provinsiale polisiewoordvoerder, sê die polisie is bewus van die bewerings van satanisme in Ceres.

Geen verwante misdade is tot dusver aangemeld nie.

Bron: http://www.rapport.co.za/Suid-Afrika/Nuus/Sataniste-het-dorp-in-rep-en-roer-20120303

Ek kan hieroor ’n baie lang stuk skryf, maar my standpunt is: Hoekom op hierdie aarde moet ’n predikant dit (of soortgelyke uitsprake van Jesus) vir my sê of uitlê? Ek weet (amper) alles wat in die Bybel staan. Van kleins af. Hoekom moet ons kerk toe gaan om dit nog te hoor? Hoekom doen/leef ons dit nie vir ’n slag nie? Hoekom het ons nie ons naaste vir ’n slag lief nie?

Ek ken baie predikante. Hoe meer ek van die meeste van hulle weet hoe minder wíl ek van hulle weet. Die kerklike taal wat hulle selfs in radio-eredienste gebruik soos “Ons is vanoggend hier in God se besondere teenwoordigheid” of “Welkom in die huis van die Here” is heeltemal uitgedien.

God is genoeg. Dag vir dag. Sy Woord is genoeg (en ek hoef nie die Latyn hiervoor te gebruik nie). Dit wat Jesus ons rééds geleer het, is genoeg. Miskien moet ek nou begin leef soos ek glo.

Die Kerk is nie deur Jesus ingestel nie en is nie die antwoord vir ’n verhouding met God nie.

In dieselfde Rapport word 17 vrae gegee oor Bybelkennis en die opmerking dat jong mense nie die Bybel ken nie. My seun van 16 het twee uit die 17 reg, maar hy verseker my hy het die Here lief. Ek weet hy het.

Bron: http://www.rapport.co.za/MyRapport/Briewe/Kerk-nie-alles-jy-moet-dit-uitleef-waarin-jy-glo-20120302

Jesus se opdrag is nog korter en duideliker. “Glo soos ‘n kind,” sê Hy, en dis goed genoeg vir my want ek weet hoe pragtige en suiwer ‘n kind se geloof is. Sy ander groot opdrag is dat ons God bo alles moet liefhê. Ons liefde vir ons medemens moet net so groot wees soos ons liefde vir ons self.

Ongelukkig het van Jesus se volgelinge dit ook goedgedink om uit te brei op hierdie eenvoudige boodskap. Paulus se Damaskus-ervaring het hom na verre lande geneem en hy het gou besef dat die Blye Boodskap soms by kulture moet aanpas. Alle sondes is nie eners nie en veral die Romeine het ‘n paar ekstra rigtingwysers nodig gehad.

Paulus het wetskennis gehad, maar van vrouens het hy eintlik min geweet, veral in die patriargale bestel van die eerste eeue na Christus. Hy het bepaal dat ek my nie na God mog wend sonder ‘n hoed op my kop nie; asof ‘n skietgebed ooit sal kan wag! Jesus se boodskap het die toets van die tyd deurstaan. Paulus s’n, ten spyte van sy allesoorheersende liefde vir Christus, het nie.

Ek lees al vir baie jare die Nuwe Testament, en nêrens vind ek dat Jesus mense veroordeel het nie. Of nee, ekskuus, daar was wel ‘n paar. Hy’t nie veel ooghare gehad vir die Godsdiens-geleerdes nie. En Hy het liggies die spot gedryf met die o, so vrome Sadduseërs en Fariseërs wat “nederig”op straathoeke gestaan en bid het.

Ons weet dat Jesus en priesters ‘n meningsverskil gehad het oor handeldryf in die tempel. Dit was een van die min kere wat Hy kwaad was en mense uit God se huis verdryf het. Snaaks, dié tendens wil maar net nie uit plekke van aanbidding verdwyn nie. Godsdiens is steeds té dikwels ‘n geldmaakfoefie!

Jesus het ombeskaamd die geselskap van mense opgesoek wat deur die gemeenskap verag is. En sonde bo sonde! Soms het sy dissipels selfs geëet sonder om eers hulle hande te was! Toe daar gepoog is om ‘n vrou te stenig omdat sy van egbreuk beskuldig is, het Hy besef dat daar veel meer aan die storie is. Die klipgooiers moes ongemerk hulle klippe laat val toe Hy bedaard opmerk: “Laat dié een van julle wat sonder sonde is die eerste klip gooi.” Dis iets wat ons era se klipgooiers nie sal afskrik nie. Hulle sondes is heeltemal geregverdig, en wee die een wat hulle normes ignoreer.

Jesus het Sy volgelinge sommer in die oop veld of onder ‘n boom geleer van God se genade. Heelwat van hulle is deur die Skrifgeleerdes as onrein beskou en uitgewerp: die siekes, die vreemdes, melaatses… Jesus het egter geweet dat elke siel kosbaar is.

Jesus is deur God na die aarde toe gestuur omdat Hy ons almal se sondes op Hom moes neem. Sy sterwe was ‘n voldonge feit, maar ons weet nou dat politiek ook ‘n oorsaak van Sy kruisdood was.

Die priesters van Israel wou eerder die Romeinse Ryk ter wille wees, al was dit vir groot ongeregtighede verantwoordelik. Judas Iskariot, die Zeloot het gehoop Jesus sou die Romeinse Ryk omverwerp. Twee politieke groepe met uiteenlopende idees het saamgespan om Jesus te kruisig.

Soms herinner hierdie gebeure my aan ons eie geskiedenis. Een groep godsdienstige leiers word steeds verguis omdat hulle nie bereid was om op te staan teen die vergrype van ‘n vorige regering nie. Niemand stel belang in hulle boetedoening nie ‘n Ander groep kerkleiers het hulle aktief beywer vir die val van daardie regering. Hulle word steeds gesien as helde, al was die verskrikkinge wat onder die vaandel van bevryding gepleeg is, ewe onmenslik. Nêrens is daar ‘n teken van Jesus se boodskap in die oorspronklike optrede van beide groepe nie.

Kerk en politiek meng nie. Kerkdogmas en belydenisskrifte dien nie ons Heiland nie. Dit stel nie gewone mense bloot aan die liefdevolle boodskap van Jesus nie. Dit polariseer en verjaag. Jesus het nooit geglo aan verdeling nie en Sy boodskap was een van vergifnis, blydskap en samesyn.

Waarom wil God se dienaars nie leer nie? Is hulle persoonlike agendas dan al wat saak maak? Hoeveel keer moet Jesus nog gekruisig word voordat Sy boodskap uiteindelik verstaan word? Dis eintlik so maklik: GOD IS LIEFDE!

Bron: http://www.rapport.co.za/Opinie/Blogs/Klipsop-Die-God-van-liefde-en-genade-20120215

Die Woord het ’n woord wat ook hier geld: Dra mekaar se laste, en gee op hierdie manier uitvoering aan die wet van Christus (Gal.?6:2). En, dink aan die gevangenes asof julle self ook gevangenes is (Hebr.?13:3).

Jy neem nie ’n ander se las by hom oor nie, maar gaan staan langs hom en help dra; jy gee ondersteuning; jy deel in sy pyn en spanning. En so gee jy inderdaad uitvoering aan – letterlik, vervul jy – die wet van Christus: Jy moet jou naaste liefhê soos jouself.

Empatie – net soos simpatie – los wel nie die probleem op nie, maar maak die pyn soveel draagliker en werk saam aan die verwerking én die oplossing van die probleem.

Simon van Sirene was gedwing om Jesus se las/kruis te dra – ’n ongevraagde voorreg! Jesus se liefde dwing Sy volgelinge om mekaar se las te dra en só Sy hulp en liefde ’n konkrete werklikheid te maak. Sover julle dit aan een (van die geringstes) van my broeders gedoen het, het julle dit aan My gedoen (Matt.?25:40)

Bron: http://www.volksblad.com/Opinie/Hoofartikels/As-kinders-spoor-byster-raak-20120224

Die dood is die straf van God oor die sonde van die mens (Genesis 2:17; Romeine 6:23). Alle mense is sondaars voor God (Prediker 7:20; Ps 14:2,3; 53:3,4; Romeine 3:10-19). ‘n Mens is bestem om net eenmaal te sterwe, en daarna kom die oordeel (Hebreërs 9:27; 1 Korintiërs 15:22). Vir die gelowige het die dood egter ‘n deurgang geword tot die lewe saam met Christus (1 Korintiërs 15:22; vgl. Filippense 1:23). Toe God die Satan toegelaat het om Job te teister, het Hy beveel: ‘Net sy lewe mag jy nie wegneem nie’ (Job 2:6). Die doodsengel kom nie van Satan af nie.

In Genesis 19:1 word vertel van die twee engele wat God gestuur het om Sodom en Gomorra uit te wis oor hulle sonde.

In Eksodus 12:12-13 sê die Here dat Hyself in Egipte elke eersgeborene gaan doodmaak, maar waar die bloed aan die deurkosyne gesmeer is, sal Hy die huis oorslaan.

Volgens Numeri 22:33 sou die Engel van die Here vir Bileam doodgemaak het as die donkie nie telkens uitgedraai het nie.

In 2 Samuel 24:16 stuur die Here pes onder die volk en word 70,000 deur die engel van die Here doodgemaak as straf op Dawid se volkstelling (vgl. 1 Kronieke 21:15,16).

Volgens 2 Kronieke 32:21 stuur die Here ‘n engel om die Assiriërs rondom Jerusalem dood te maak.

In Matteus 13:39-42 sê Jesus dat die Seun van die mens sy engele sal stuur om almal wat die wet van God oortree in die brandende oond te gooi.

In Matteus 25:42 sê Jesus dat die vuur van hel vir die duiwel en sy engele voorberei is (deur God) en vir die mense wat nie vir Jesus volg nie.

In Handelinge 12:23 is dit die engel van die Here wat Herodes tref sodat die wurms hom verteer en hy sterf omdat hy dink hy is God.

Die dood kom na alle mense. Die wat die Here Jesus volg gaan na Hom toe, die wat Hom ongehoorsaam is word veroordeel tot die tweede dood (Openbaring 20:11-15; 21:8; dit is die hel, die plek waar God straf, ook vir die duiwel Openbaring 20:10). Paulus sê: op die oordeelsdag sal God sy regverdige oordeel uitspreek, Hy sal elkeen vergeld volgens sy dade: aan dié wat in goeddoen volhard en op dié manier soek na wat verhewe, eervol en onsterflik is, gee Hy die ewige lewe, maar aan dié wat uit selfsug ongehoorsaam is aan die waarheid en toegee aan die ongeregtigheid, straf Hy in sy toorn (Romeine 2:6-8)

Bron: http://www.bybelkennis.co.za/Algemene-Artikels-Bybelse-Temas-en-Sake/Die-doodsengel.html

NGVishoek: Ds. ( dominee ) Martin Barnard.

Die kinders het my dadelik help soek, maar ons kon niks kry nie. Die vreemdste was dat ek glad nie paniekerig geraak het nie. ’n Absolute vrede van die Heilige Gees het in my hart geheers terwyl ek God gevra het om my deur sy Gees te lei om die sleutel te kry. Ek het skaars klaar gebid toe ek skielik die sleutel ontdek. ’n Gevoel van dankbaarheid het my oorweldig terwyl ek besef het dat God werklik van alles in die skepping weet. Al die eer gaan aan Hom.”

Leser 2, Anele: “Ek is effens doof in my een oor en slaap gewoonlik verskriklik vas.Verlede Maandagoggend het ek egter 03:00 wakker geskrik van ’n hond wat baie benoud buite ons kamervenster huil.

Ek en my man het deur die venster gekyk. Na ’n rukkie het ons ’n swart dingetjie op die grond gesien beweeg. Dit was ’n miniatuur worshondjie. ’n Entjie van hom af het die grootse uil wat ek nog in my lewe gesien het gestaan – reg om hom aan te val. Ons het onmiddellik by die deur uitgehardloop en die uil weggejaag. Dié het opgevlieg en ’n entjie daarvandaan op die grond gaan sit – onwillig om sy prooi wat hy oomblikke vantevore op ons gras afgelewer het, te laat staan! Ek het die hondjie in my arms geneem en in die huis ingeneem – oortuig dat God my wakker gemaak het om die diertjie se lewe te red.

Al was ek voorheen nie geheg aan diere omdat ek nie tyd gehad het om na hulle om te sien nie, is ek en die Worsie totaal en al onafskeidbaar. Dit voel vir my asof God die hondjie vir my gestuur het om hom op te pas.

Hierdie storie het my weer hoop gegee. As God so oor die diere op aarde voel – hoeveel te meer wil Hy nie ook vir ons as sy kinders sorg nie!”

In Job 28:24 lees ons: “Want Hý sien tot by die eindes van die aarde; alles wat onder die hemel is, aanskou Hy” (1953-hersiening). En in Psalm 50:10-11 lees ons dat God van elke dier op aarde weet: “… al die wilde diere van die bos is myne, die vee op berge by duisende. Ek ken al die voëls van die berge, en wat roer op die veld, is van My.”

God wil betrokke wees by die detail in jou lewe – gaan jy Hom nooi om jou te help en te lei? Sterkte.

Vader God, baie dankie vir U oneindige liefde en omgee vir ons elkeen. Lei my asseblief daagliks deur u Heilige Gees in elke situasie waarin ek my ook al bevind. Ek vra dit in die Naam van Jesus Christus. Amen.

Bron: versnfag.co.za

John Stevens Henslow (1796–1861)
Henslow was ’n akademikus met ’n wye belangstelling. Nadat hy in 1818 afstudeer het, het hy geologiese ekspedisies na die Isle of Wight (saam met Adam Sedgwick) en die Isle of Man meegemaak. In 1822 is hy as professor in mineralogie aan die universiteit van Cambridge aangewys – ’n pos waaruit hy bedank het nadat hy in 1825 by dieselfde universiteit aangewys is as professor in plantkunde. Intussen is hy in 1824 as ’n Anglikaanse predikant georden.

As stigter van die universiteit van Cambridge se Botaniese Tuin, het Henslow in 1821 begin om ’n gedroogde plantversameling van die hele Britse planteryk bymekaar te maak.1 Sy doel was om ‘die perke van verandering (aanpassing) binne die ‘geskape’ spesies te ontleed’. Hy het die perke van verandering gebruik om spesies te definieer deur ’n gebruik waarna hy as kollasie verwys het, m.a.w. ’n vergelyking van die veranderde of aangepaste spesie met die oorspronklike. Hierin het hy die standpunt gehandhaaf dat spesies nie evolueer nie, maar wel die vermoë het om binne perke deur verandering aan te pas.

In sy outobiografie het Darwin geskryf dat sy vriendskap met Henslow, meer as enigiets anders, sy hele loopbaan beïnvloed het. Dit het begin toe Darwin ’n voorgraadse student was en een van Henslow se lesings in 1828 bygewoon het. Daarna het hy Henslow se vyf-week-lange plantkunde kursus drie keer bygewoon – in 1829, 1830 en 1831.

As deel van die lesings het Henslow uitstappies in die Cambridge-omgewing gereël. Darwin het so baie tyd hiér deurgebring dat van die ander lektore na hom verwys het as ‘die man wat saam met Henslow wandel’. In sy outobiografie skryf Darwin van Henslow: ‘Hy was diep godsdienstig, en so ortodoks dat hy my eendag vertel het dat hy gegrief sou wees as één woord van die 39 Artikels 2 sou verander’.

Henslow se hipotese
Ten spyte hiervan was Henslow met ’n lang, komplekse geologiese geskiedenis wat nie maklik met Genesis vergelyk kon word nie, versoen – behalwe in ’n algemene, figuurlike sin. In sy enigste publikasie, ‘The Flood’ (1823), het Henslow ’n hipotese vir ’n natuurlike verklaring vir die Vloed ter tafel gelê – ’n katastrofiese komeetbotsing met die aarde.

In 1831 was dit juis Henslow wat sy nuut-afgestudeerde student, Charles Darwin, voorgestel het vir die posisie as naturoloog om kaptein Robert Fitzroy aan boord van die HMS Beagle op die opname-ekspedisie na Suid-Amerika te vergesel. Ter voorbereiding het Henslow egter vir Darwin op ’n geologiese ekskursie na Noord-Wallis saam met prof. Adam Sedgwick gestuur.

Adam Sedgwick (1785–1873)
Sedgwick was nog ’n akademikus wat as Anglikaanse predikant bevestig is (1818) voordat hy tot professor aan die Universiteit van Cambridge as die hoof van geologie verkies is. Gemeet aan vandag se standaarde was hy nie juis ’n evangelis of ’n jong-aarde-skeppingsleerder nie, maar tog ook nie ’n evolusionis nie. Sy geologiese oortuiging was katastrofisties,3 en hy het in ’n reeks bonatuurlike skeppingsaksies oor ’n lang uitgestrekte geskiedenis geglo.

Vandag sou hy bekend staan as ’n progressiewe skeppingsleerder. Interessant genoeg kon hy nie die anomalie van geloof in ’n jong menslike oorsprong, teenoor ’n ou ouderdom vir gesteentes, raaksien nie. Aldus skryf hy: ‘Die geoloog…sien ’n lang opeenvolging van monumente wat elk moontlik ’n duisend eras kon neem om te ontvou’.

Alhoewel Sedgwick ’n ou-aarde-geoloog was, was hy gekant teen enige vorm van biologiese evolusie.

Toe Robert Chalmers in 1844 sy eie teorie oor evolusie (of transmutasie) anoniem publiseer in sy ‘Vestiges of the Natural History of Creation’,4 het Sedwick die werk afgeskiet in ’n brief aan Charles Lyell: “If the book be true, the labours of sober induction5 are in vain; religion is a lie, human law is a mass of folly, and a base injustice; morality is moonshine; our labours for the black people of Africa were works of madmen; and man and woman are only better beasts!”

Sedgwick se siening van Darwin se boek
Sedgwick was net so sarkasties rakende Darwin se ‘Origin of Species’ in 1859. In ’n brief aan Darwin sê hy: “I have read your book with more pain than pleasure. Parts of it I admired greatly, parts I laughed at till my sides were almost sore; other parts I read with absolute sorrow; because I think them utterly false and grievously mischievous. You have deserted…the true method of induction… There is a moral or metaphysical part of nature as well as the physical. A man who denies this is deep in the mire of folly.” In sy oorsig (oor die boek) wat in ‘The Spectator’ van 24 Maart 1860 gepubliseer is, skryf Sedgwick:
“Each series of facts is laced together by a series of assumptions, and repetitions of the one false principle. You cannot make a good rope out of a string of air bubbles. I cannot conclude without expressing my detestation of the theory, because of its unflinching materialism;—because it has deserted the inductive track, the only track that leads to physical truth;—because it utterly repudiates final causes, and thereby indicates a demoralised understanding on the part of its advocates.

Not that I believe that Darwin is an atheist; though I cannot but regard his materialism as atheistical. I think it untrue, because opposed to the obvious course of nature, and the very opposite of inductive truth. And I think it intensely mischievous.”

Wat was Darwin se motivering?
Ons kan dus sien dat die twee hoofmentors in Darwin se akademiese lewe, Henslow en Sedgwick, nie net Christene was nie, maar beide hewig gekant was teen enige vorm van biologiese evolusie. Hoekom het Darwin dan sy rug op hulle lering gekeer en sy eie anti-God, evolusionêre filosofie begin?

Die antwoord is eenvoudig: ten spyte van Henslow en Sedgwick se Christelike getuienis en gesprekke oor Christenskap en die Bybel wat Darwin moontlik met hulle gehad het, of dalk hulle siening oor die spesiale skepping en onveranderlikheid van spesies, is die één ding wat Darwin by hulle (veral Sedgwick) geleer het: die geloof in ou geologiese ouderdomme. So het hulle onwetend God se bonatuurlike handelinge, soos in Genesis beskryf, nietig verklaar en Darwin die tydsraamwerk gegee wat hy nodig gehad het om die evolusie-teorie te ‘laat werk’. Niks anders het saakgemaak nie!

‘Konsep van eenvormigheid’
Boonop was dit Henslow wat voorgestel het dat Darwin die eerste volume van Charles Lyell se ‘Principles of Geology’ (1830) saam met hom op die HMS Beagle neem. Bogenoemde boek het die konsep van eenvormigheid (uniformitarianism), wat aanvoer dat die aarde gevorm het deur die stelselmatige opbou van klein veranderings (huidige aardprosesse teen huidige tempo’s van intensiteit en omvang) oor enorme hoeveelhede tyd, ter tafel gelê.
Ten spyte van Henslow se waarskuwing is dit moeilik om ’n rede in te sien vir die feit dat hy enigsins die boek met sy aanhoudende argumentering oor die konsep van lang tydperke, vir Darwin aanbeveel het, tensy Henslow self die sienings gedeel het.

Interessant genoeg het Lyell die konsep van biologiese evolusie sterk verwerp. “He was ‘ … appalled at the thought of a chimpanzee in the family, of an ape aspiring to ‘the attributes and dignity of man’.” Volume 2 van sy ‘Principles of Geology’ (1832) was ’n boeklange weerlegging’ van Lamarck se idees oor evolusie – … gestapel met slim argumente teen die idee dat lewe geëvolueer het en deur ‘n familieboom voorgestel kan word.’

Darwin het ’n afskrif van hierdie tweede volume deur die pos in Montevideo (Uruguay) ontvang terwyl hy nog op die Beagle-vaart was. Maar weereens het Darwin genoeg van die lang geologiese tydperke ingeneem om evolusie te ‘laat werk’.

Slotsom
Vandag het baie kerke en teologiese skole die idee van lang ouderdomme aanvaar terwyl die Bybel se weergawe van God se skeppingswerk sowat 6 000 jaar gelede, verwerp word. Sommige dink dat dit só makliker gaan wees om ongelowiges tot geloof te bring. Maar dit is onsin.

Soos in Darwin se geval, sal sulke teen-Bybelse idees mense nie na geloof in God lei nie, maar eerder die geloofwaardigheid van God se eie skeppingsverhaal ondermyn ten gunste van die ateïstiese idee van evolusie.

Bron: http://www.juig.co.za/article.php?id=169

Cookie	Duration	Description
cookielawinfo-checkbox-analytics	11 months	This cookie is set by GDPR Cookie Consent plugin. The cookie is used to store the user consent for the cookies in the category "Analytics".
cookielawinfo-checkbox-functional	11 months	The cookie is set by GDPR cookie consent to record the user consent for the cookies in the category "Functional".
cookielawinfo-checkbox-necessary	11 months	This cookie is set by GDPR Cookie Consent plugin. The cookies is used to store the user consent for the cookies in the category "Necessary".
cookielawinfo-checkbox-others	11 months	This cookie is set by GDPR Cookie Consent plugin. The cookie is used to store the user consent for the cookies in the category "Other.
cookielawinfo-checkbox-performance	11 months	This cookie is set by GDPR Cookie Consent plugin. The cookie is used to store the user consent for the cookies in the category "Performance".
viewed_cookie_policy	11 months	The cookie is set by the GDPR Cookie Consent plugin and is used to store whether or not user has consented to the use of cookies. It does not store any personal data.

NG Vishoek

NG Vishoek

Jesus se finale woorde volgens Lukas (3#3)

‘n Vriend wat raadgee en lei

Soek donker plek om lig te laat skyn

‘Sataniste’ het dorp in rep en roer

Kerk nie alles; jy moet dit uitlééf waarin jy glo

Klipsop: Die God van liefde en genade

As kinders spoor byster raak…

Is die doodsengel van Satan of God af?

Getuienisse

Darwin se mentors