Een Kleur Van Waarheid


‘Wie is ons om te oordeel’ – die slagspreuk van ons tyd
Die titel van die fliek kondig reeds die waarheid aan – grys – die kleur van kompromie.  Dit laat my dink aan wat die Woord ons oor  louheid leer – iets wat God uitspuug.  Die verstommendste was die mense se aggressiewe kommentaar: “Wie is jy om my te oordeel?”
Enige gesprek oor reg en verkeerd, sonde of nie, hetsy die geselsie by die werk, tussen vriende, of op sosiale media, bevat die woorde: Wie is ons om te oordeel…Elke mens maak sy eie keuses…Jy kan nie vir my besluit wat reg en verkeerd is nie.

Die Woord soos dit ons pas
Het ons as Christene in ons eiewaan van menseregte, dalk die punt bereik dat nóg mense nóg God ons mag oordeel?  Lees ons God se Woord soos dit ons pas?  Is daar iets in ons diepste wese wat voel: Wie is die Heilige Gees om ons te oordeel?  Wat wil redeneer dat elke mens God se Woord tog lees en interpreteer soos hy wil, of hoe?
Die hartseer saak is dat as iemand op sonde in sy lewe gewys word, almal na God se Woord gryp wat sê dat nie eers Jesus die prostituut veroordeel het nie; dat die een sonder sonde die eerste klip moet gooi – ’n lekker wegkruipvers om in sonde aan te karring.  Miskien moet ons onthou dat Jesus die prostituut vergewe het sonder oordeel, maar dat Hy haar ook gemaan het om dit nie weer te doen nie.

Die engel van die lig
As ons nie toelaat dat God se Woord ons gees, ons denke, keuses en leefstyl aanspreek en verander nie, sal die satan altyd tot ons manier van dink en leef toegang hê. 2 Tim 2:26 praat van die strik waarin ons trap – vir die satan om dan met ons te maak soos hy wil.  Hy kom in die gedaante van ’n liefdesverhaal van die onskuldige meisie wat weggevoer word deur ’n man in beheer.
Die sterk intrige verblind ons vir al die boosheid van die BDSM (Bondage Discipline Sadomasochism) wat plek-plek plaasvind en die buitehuwelikse seks, om maar ’n paar te noem. As Christene moet ons so geoefen wees in die Waarheid dat die leuen homself ontbloot.
As ons egter bereid is om so ’n bietjie van die leuen te verdra ter wille van die mooi storielyn, beweeg ons op die terrein waar die strik lê en wag.

Die spreekwoordelike padda in die warm water
Dit verg nie ’n Einstein om te sien hoe die wêreld die grense van wat reg en verkeerd is kort-kort verskuif nie.  Ons word omring deur sagte pornografie en kom dit nie eers meer agter nie.
Homoseksuele verhoudinge word in elke tweede sepie en rolprent aangeblaas.  Buite-egtelike seks is die norm en saambly voordat ons trou, word nie meer veroordeel nie.  Is ons so gekondisioneer dat ons al in kookwater swem?

Sondige leefstyl geregverdig
Is die ligte vermaak van BDSM in die boek en fliek die begin van gewelddadige seks wat geregverdig word en eersdaags deur meer paartjies getoets gaan word in ’n soeke na iets nuuts vir die slaapkamer? Ons het reeds bekendes in ons land wat openlik in koerante en tydskrifte van hulle BDSM-leefstyl praat.

Een kleur van waarheid teenoor skakerings van sonde
My hart huil oor ons verslapte grense, ons louheid, ons selfregverdiging.  Bowenal huil my hart oor die gees van wellus wat ons kinders verteer – ’n gees waarvoor ons as volwassenes die deur oopmaak in die naam van avontuur en romanse.  Here, help ons!  Gee ons ’n gees van onderskeiding.  Gee vir ons die moed om U Woord te volg, ’n soeke na reinheid wat U Woord sal toelaat om ons te louter en te vorm, ons te weeg en ons te laat weet as ons te lou of te grys is.  As kind van die Here kies ek nie enige van die 50 skakerings van leuens, sedeloosheid of rebelsheid nie. Ek kies een kleur van Waarheid!

GRETHA WIID is ’n verhoudingskenner, gasspreker en skrywer.  Volg haar op facebook of twitter

Bron:juig.co.za

Lees Meer >>

Skadu’s van godsdienstige irrelevansie



Hoe meer die kerk teen dinge is wat die publieke oog vang, hoe groter aandag kry dit. Dit het die media lankal agtergekom; kerkmense nog nie. Daarom dat rockgroepe en sangers wat pervers is of na die duiwel in hulle musiek verwys soveel gratis blootstelling kry onder miljoene mense wat andersins nie ’n oog sou knip hieroor nie. Net dalk gebeur dit weer in hierdie dae. Sekere flieks en politici se manewales trek orals aandag. Op facebook; in preke, op die radio vaar Christene verwoed uit hierteen.

Moet ons stilbly as dinge verkeerd loop? Nee, maar om bloot net teen die top tien sondes van die dag te wees en daarteen te praat en preek help nie. Deur al die eeue het die kerk dit gedoen, en niks gegroei waar dit gebeur het nie. Dit wys navorsing oor en oor aan ons. Trouens, soos wat ons hierbo gesien het, sodanige protes aksies van die kant van godsdienstiges pas juis die media.

Die roete? Wel, net dalk moet ons ophou om bloot net “op te staan” vir die Here deur teen alles en almal te wees en te doen wat 1 Petrus 2:15 sê. En dit is om goed te doen in God se Naam en so ’n einde te bring aan die dwaashede wat mense doen en kwytraak. So sê die Here. Nee, nie protesoptogte en boikot aksies nie, maar goeddoen en regdoen. Bekers koue water en omgee – dit maak die kerk magneties.

Ook moet ons mense se aandag verskuif. Om heeltyd net op sondes of probleme te fokus, soos een of ander ongewensde fliek of optrede, hou daardie einste dinge in die voorgrond. Ons word geroep om ons gedagtes op Christus te hou, soos wat Kolossense 3:2 ons leer. Ons word geroep om mense se aandag te verskuif; nie om dit nogmaals op die probleme van die dag te hou en net daarteen te wees as ons enigste alternatief nie.

Bron:   ekerk.org

Lees Meer >>

Bemoediging In n Gevalle Wereld


Godsdiensvooroordeel
In Engeland het die BBC toegegee dat hulle die Christelike geloof anders behandel as hoe hulle ander gelowe sou benader. In ’n blog, ‘biased BBC’, is daar die volgende aanhaling:‘Die hoof van die BBC, Mark Thompson, het erken dat die uitsaaier die profeet Mohammed nooit sal bespot soos dit Jesus bespot nie. Hy het hierdie verbasende erkenning van gods-diensvooroordeel geregverdig deur te suggereer dat om Mohammed te bespot dieselfde ‘emosionele krag as groteske kinderpornografie’ mag inhou. Maar om Jesus te bespot is geoorloof, sê hy, omdat die Christendom breë skouers het en minder met etnisiteit verbind word.’

Bemoedigende woorde
Jesus Christus het Sy dissipels met hierdie woorde bemoedig: “In hierdie wêreld sal julle dit moeilik hê; maar hou moed: Ek het die wêreld klaar oorwin.” Johannes 16:33. Die Apostel Paulus herinner gelowiges in Rome, waar dit net so gevaarlik en moeilik was om ’n Christen te wees soos vir baie Christene deesdae, dat God vir hulle is. Die feit dat Hy vír hulle is, kan gesien word in ’n paar groot en objektiewe waarhede waaraan gelowiges moet vashou en waarvolgens hulle hulle le-wens kan oriënteer.

God se beloftes is onveranderlik
Ek woon in Somerset-Wes in die Helderbergkom. Die dorp word aan die een kant deur Valsbaai begrens en manjifieke berge wat aan die anderkant uittroon. Wanneer die Kaapse winter posvat, is daar dae wanneer ons die berge nie kan sien nie. Hulle is toe onder die wolke. Maar ons almal weet dat hulle nie weg is nie. Wanneer die wolke lig, is hulle daar, so mooi soos altyd.
Wanneer die donderwolke van die realiteite, teenkanting, vervolging en dood-gewone wreedheid van die lewe dreig om die gelowige te ontmoedig, moet ons onthou dat die waarheid van God se beloftes nie verander het nie. Hulle is steeds daar, onveran-derlik, selfs wanneer die storm woed.
Romeine 8 herinner ons aan ’n aantal van hierdie onveranderlike waarhede:

Daar is die wonder van ons Verlossing
Romeine 8:1: “Daar is dus nou geen veroordeling vir dié wat in Christus Jesus is nie.” In ’n tipiese Bybelse onderbeklemtoning word ’n diepgaande waarheid gevier. ’n Entjie verder in die teks gaan Paulus voort deur te sê, om sondaars soos ons te red, het God “Sy eie Seun nie gespaar nie.” Romeine 8:32a.
Verlossing is nie ’n onbenullige gebeurtenissie nie, maar ’n ongelooflik liefdevolle onderneming deur die God van die heelal. Hy gryp by die mens se verlorenheid in en Hy hou niks terug nie, nie eers Sy Seun nie.
As God nie vir ons was nie, sou ons steeds in sonde vasgevang wees, steeds onder Sy gramskap, steeds sonder hoop. Maar, in die volheid van ons Vader se wil en tydsbereke-ning het Jesus in ons plek gesterf en soos die gesangeskrywer dit stel: “ ‘God looks at Him and pardons me.’ ”
In ’n wêreld wat toenemend teen ons is, herinner die wonder van ons verlossing ons daaraan dat God vir ons is.

Daar is die belofte van ons behoud
Miljoene van God se kinders lewe in ondraaglike situasies. Hulle besit niks, het alles verloor en het geen vooruitsig dat dinge sal verbeter nie.
Wanneer ek die beelde op die televisie sien van daardie reusagtige vlugtelingskampe waar mense doodeenvoudig probeer om elke dag te oorleef, is ek dankbaar vir alles wat ek het.
Tog spreek God se Woord tot selfs daardie gelowiges wat hulle in sulke uiterste situasies bevind. Die belofte is dat niks ons van Sy liefde kan skei nie. Hy sal ons behou en Hy gee ons ’n hoop en ’n toekoms. Gelowiges in moeilike omstandighede getuig deur die eeue heen van die wonderwerkende voorsiening van God.

Meer as oorwinnaars
In Romeine 8 raak Paulus al die hoofpunte aan
• Daar is diegene wat beskuldigings en aanklagtes teen God se kinders sal bring. Tog herinner hy ons daaraan dat dit God is wat regverdig maak (v 33)
• Daar sal diegene wees wat oordeel en veroordeel. Aan die regterhand van die Vader is Jesus wat vir ons intree (v 34)
• Wat van teenspoed en moeilikhede? Jy kan verseker weet dat dit sal kom, maar die belofte is dat ons meer as oorwinnaars is (v 36-37)
• Geïnspireerd vra Paulus, wat van gevalle engele en demone en magte en owerhede? Wat van die dood self? Is daar enigiets in die skepping wat ons van God se liefde kan skei?

Kyk na Sy verstommende antwoord:
Romeine 8:38-39: “Hiervan is ek oortuig: geen dood of lewe of engele of bose magte of teenswoordige of toekomstige dinge of kragte of hoogte of diepte of enigiets anders in die skepping kan ons van die liefde van God skei nie, die liefde wat daar is in Christus Jesus ons Here.”
God is vir ons en Hy sal ons nie verlaat nie, selfs wanneer ons die lewe se pynlike raaisels in die gesig staar en die ergste van menslike boosheid verduur. Hy is met sy kinders en niks kan ons van Sy liefde skei nie.

Daar is die versekering dat Hy vir ons intree
Romeine 8:34: “Wie is dit wat veroordeel? Christus is dit wat gesterf het, ja meer nog, wat ook opgewek is, wat ook aan die regterhand van God is, wat ook vir ons intree.”
Wanneer gevra word: “Wie sal ons veroordeel?” is die antwoord: “Baie”. Op ’n persoonlike vlak moet ons erken dat daar in ons almal se lewens nie ’n tekort aan bewyse is om ons voor ’n heilige God skuldig te bevind nie. Die vyand is daarop uit om ons te veroordeel.
Die wêreld veroordeel ons dikwels. Deur die eeue heen het Christene oordeel en veroordeling verduur. In plekke van onderdrukking en vervolging word onskuldige mense dikwels vir geen ander rede veroordeel as dat hulle volgelinge van Christus is nie. Op daardie plek van outoriteit, daar waar dit saak maak; waar die finale oordeel is en gemaak sal word, dáár sit Jesus ons Verlosser en Hy doen voorspraak namens ons. Selfs as die hele wêreld dus teen ons is, is ons verseker dat God vir ons is en op die lange duur, is dit wat saak maak.
Ons het ’n baie beperkte perspektief en verstaan maar min van die werklikhede wat ons omring, maar die Here van here sien alles en Hy doen vir ons voorspraak. Hy doen dit omdat Hy vir ons is, en nie teen ons nie.

Daar is die werklikheid van ons verheerliking
Romeine 8:16-18: “Die Gees self getuig saam met ons gees dat ons kinders van God is; en as ons kinders is, dan ook erfgename, erfgename van God en mede-erfgename van Christus, as ons naamlik saam met Hom ly, sodat ons ook saam met Hom verheerlik kan word. Want ek reken dat die lyding van die teenwoordige tyd nie opweeg teen die heerlikheid wat aan ons geopenbaar sal word nie.”
Die vroeë gelowiges het mekaar met hierdie waarheid deur hulle beproewinge en teen-spoed bemoedig – “Hy kom binnekort.”
Die Apostel Paulus parafraseer die profeet Jesaja wanneer hy die Korintiërs met hierdie woorde bemoedig: “Wat die oog nie gesien en die oor nie gehoor het nie, en wat in die hart van die mens nie opgekom het nie, dit het God gereed gemaak vir dié wat Hom liefhet.” 1 Kor 2:9.
Moeilikhede, teenspoed, vervolging, siekte en selfs die dood is nooit die laaste woord nie. Jesus het ’n plek vir ons voorberei en die Skrif se belofte is dat ons nie eens kan begin om ons die wonder en heerlikheid daarvan voor te stel nie. Geen teenkanting en vervolging, bespotting en verwerping kan hierdie werklikheid verander nie. Ons sal in Sy teenwoordigheid wees, die wonder van Sy heerlikheid sien, Sy kosbare stem hoor sê: “Mooi so, goeie en getroue dienskneg…gaan in in die vreugde van jou Heer.”
Hierdie wonderlike waarhede is die gelowige se anker en gee hom hoop binne ’n wêreld wat geheel en al onverskillig teenoor God staan.
“God is vir ons wie kan teen ons wees?” Wat Paulus wesenlik sê, is dat as God vir ons is, ons dit in gedagte moet hou wanneer ons na die res kyk. ’n Vriend het my onlangs van die wiskundige vergelyking vertel – ‘neig na nul’. Dit beteken dat iets gewigtig mag lyk, maar wanneer dit met ander groter werklikhede vergelyk word, ‘neig dit na nul’. Dit is wat die Apostel sê. Daar is situasies en werklikhede wat te kragtig en gewigtig in die oomblik en tydens die moeilike seisoen mag lyk, maar wanneer dit in die perspektief van die Ewigheid gestel word, ‘neig dit na nul’.
Dit is nie om die werklikhede van mense se lewens gering te ag, of om die lyding van miljoene Christene ligtelik af te maak nie. Maar dit herinner ons daaraan dat God vir ons is. Dít is ons langtermyn hoop.

Bron:  juig.co.za

Lees Meer >>

Drie danspassies vir families

Dallas Willard skryf dat,

“Die doel van God in die geskiedenis van die mens is die ontwikkeling van ’n inklusiewe gemeenskap van liefdevolle mense, met God ingesluit in hierdie gemeenskap as die hoofbron en mees roemryke inwoner.”

God dans ’n nuwe gemeenskap van liefde los en die gesin is die eerste groep. Soms strompel ons in ons gesin se dans en val ons oor mekaar se voete.

Hier is drie dans passies wat ons kan help om in ritme met mekaar en ons dansende God te kom:

Sê vandag vir die mense in jou lewe “Ek is lief vir jou” — doen dit terwyl jy jou geliefdes in die oë kyk. Victor Hugo het iets beetgehad toe hy gesê het, “To love another person is to see the face of God.”

Maak seker jy sê jammer wanneer jy op die mense in jou lewe se tone trap. Ouers, maak seker jy bely wanneer jy oorreageer of jou frustrasies op die kinders in jou lewe uithaal. ’n Hartlike jammer verenig ons weer in die dans van die lewe.

Wanneer iemand jammer sê vergewe. Henri Nouwen beskryf dit só mooi,

“Forgiveness is the name of love practiced among people who love poorly. The hard truth is that all people love poorly. We need to forgive and be forgiven every day, every hour increasingly. That is the great work of love among the fellowship of the weak that is the human family.”

Hierdie is drie danspassies wat ons kan help om ’n gemeenskap van liefdevolle mense te word wat deel in God se liefdesdans. Watter ander danspassies kan jy en jou familie nog aanleer?

Bron:  ekerk.org

Lees Meer >>

Jy net beter

In die vier Nuwe Testamentiese evangelies (Matteus, Markus, Lukas, Johannes) handel een uit elke tien verse direk oor geld en Jesus se gesprekke het hoofsaaklik oor die koninkryk, geld en besittings gegaan. Jesus het in sestien van die agt–en–dertig gelykenisse wat opgeteken is, oor die hantering van geld en besittings gesels.

 


Die Bybel praat eintlik baie positief oor geld en die materiële wêreld. Die skeppingsverhaal (Gen 1, 2) herhaal ongeveer 7 keer dat God alles goed gemaak het. In die Ou Testament (Genesis, Numeri, Deuteronomium) is dit ook duidelik dat God Sy volke met voorspoed en materiële besittings seën sodat hulle weer ander kan seën. In ’n boek soos Spreuke word geld en besittings beskou as ’n beloning vir harde werk. Daar was selfs Christene wat ryk was en rondreisende predikers finansieel ondersteun het. Die Christelike gemeenskap is geken aan hulle mededeelsaamheid wanneer dit oor hulle geld en besittings gegaan het (2 Kor 8, Hand 4). God word in die Bybel erken as die Gewer van alle goeie dinge (geld en besittings ingesluit).

2. Dit is hoekom geld jou gemeen kan maak…

Wanneer mense te geheg aan geld raak kan die lewe onsmaaklik word. Met ander woorde wanneer die begeerte na geld alles–oorheersend word dan is daar nare gevolge:

 

  • Mense ignoreer God,

  • Mense begin mekaar as objekte sien wat hulle help of verhoed om meer geld te maak of te kry, en

  • Die armes en verwaarloosdes word vermy.


Ek neem aan dit is waarom daar verskeie Ou Testamentiese wette is wat daarop dui dat mense net ’n sekere hoeveelheid besittings mag hê. So byvoorbeeld is die Sabbatsjaar en jubeljaar ’n manier om mense daaraan te herinner dat hulle nie so geheg aan geld hoef te raak nie aangesien God die voorsiener daarvan is. Hieruit kan ons aflei dat die ingesteldheid teenoor geld baie belangrik is. Iets soos geldgierigheid is ’n ingesteldheid wat ’n stuk metaal of papier in ’n afgod genaamd Mammon kan verander. 1 Tim 6:10–11 verwoord bogenoemde soos volg: Om agter geld aan te hardloop laat jou in die kloue van allerhande slegte dinge inhardloop. Daar is party mense wat eers aan die kerk behoort het, maar toe so agter geld begin aanloop het dat hulle vandag nie eens meer ’n lid van die kerk is nie. Ons weet hoe sleg dit nou met hulle gaan. Hulle het die een probleem op die ander. Timoteus, jy is God s’n. Bly weg van al hierdie slegte dinge af. Doen eerder jou bes om so te leef dat God met jou tevrede voel. Hou aan om op God te vertrou en om oor te loop van liefde vir ander. Moenie moed verloor nie en hanteer ander mense altyd mooi sodat hulle goed voel om by jou te wees.

3&4. Hoe jy eintlik met geld moet werk en hartsverandering

Die fondasie van enige handeling met geld het eintlik te make met die erkenning of ontkenning van die feit dat alles aan die Here behoort (Ps 24, Kol 1:15–17). Hiervolgens is mense slegs rentmeesters of anders gestel, mense bestuur God se besittings.

Om rentmeester te wees is allermins ’n vergeesteliking van die materiële maar eerder ’n toewyding, van my hele lewe en alles wat ek besit, aan God. Hierdie toewyding sal jou nuwe vrae oor geld laat vra wat kan lei tot ’n vars hantering daarvan. Die volgende vrae en die antwoorde daarop mag jou dalk verras:

  • Hoeveel is genoeg om van te leef?

  • Watter gunsteling besitting gebruik ek glad vir die afgelope twee jaar nie? Wie sal dit beter as ek kan gebruik?

  • Watter nood kan ek aanspreek met dit wat ek het?

  • Wat moet ek verander in my houding teenoor geld wat tot gevolg sal hê dat ek my besittings meer geniet?


Deur hierdie vrae eerlik te antwoord en dit uit te leef kan jy dalk die persoon wees wat Richard Rohr ’n ander belewenis van Christene kon gee.

“It is my experience after forty years as a priest that we could say the same about many well–intentioned Christians and clergy. Their religion has never touched them or healed them or healed them at the unconscious level where all of the real motivation, hurts, unforgiveness, anger, wounds, and illusions are stored, hiding — and often fully operative. They never went to the “inner room” where Jesus invited us, and where things hid “secretly” (Matthew 6:6). Christians are usually well–intentioned people until you get to real issues of ego, control, power, money, pleasure, and security. Then they tend to be pretty much like anybody else.” — Richard Rohr

Dr Johan Beukes, CEO van In Harmonie

Bron: ekerk.org

Lees Meer >>

Uitdagings Van Ledigheid En Plesier


’n Seën of ’n vloek?
Ek het die onderwys verlaat en ’n beroep in die sakewêreld begin volg. In plaas van R120 000 per jaar, het ek nou R240 000 per jaar verdien – met ’n maatskappymotor! Terselfdertyd het my vrou gegradueer en voltyds begin werk. Binne die bestek van ’n kort tydjie het die Pearson-gesin se inkomste met 150% gegroei.

Om in ‘yuppie’-hemel te leef
Net soos dit dikwels gebeur met individue en gesinne wat in die valstrik van materia-lisme trap, het daar saam met die ekstra inkomste ’n innerlike dringendheid ontwikkel om die geld te spandeer. Ek het myself ‘bederf’ met ’n splinternuwe motorkar. Die vermoë om dit te kon koop, het kragtige gevoelens van eiewaarde en bewustheid van stygende status in my ontketen.
Ek het die motor elke dag gewas en een keer ’n week gepolitoer. Wanneer ek agter die stuur is, het ek gevoel hoe ek ons vroeëre ‘raapskraap-lewe’ al verder agterlaat.
Ek was in ‘yuppie’-hemel, maar sonder dat ek dit besef het, was my geestelike lewe besig om te sink. My toewyding aan Christus – my brandende geesdrif om Sy getroue dissipel te wees, het afgekoel.
Ek het steeds dieselfde leerstellings geglo, maar my daaglikse lewe het ’n ander leerstelling weerspieël – ’n leerstelling van welvaart, eiegeregtigheid en materialisme. Die dinge van hierdie wêreld het belangriker geword as die dinge van God. Die tevredenheid van vroeër is deur ’n voortdurende begeerte na meer en beter vervang. Ek het ’n swak Christelike lewe geleef en my dieper en dieper in die groef van begeerte en meer besittings ingegrawe.

Nederige berou
Genadig is ek deur die werkende krag van die Heilige Gees tot nederigheid gebring en wesenlik uitgedaag toe ek ’n paar maande aan ’n mannegroep behoort het en uit hulle voorbeeld geleer het hoe om ’n godvrugtige, voorspoedige lewe te leef – en nie deur besittings beheer word nie. Slegs ’n paar jaar te vore, het ek gevoel ek weet alles, maar nou was ek berouvol oor waar ek my bevind het.

Jou geld of jou lewe
Een van die wanopvattings wat dikwels oor geld en besittings uitgespreek word, is dat dit boos is en verwerp en verag moet word. As God jou met ’n groot aandeel in hierdie wêreld se goedere geseën het, beteken dit nie noodwendig dat jy ’n slagoffer van materialisme is nie. Wanneer jy jou rykdom en besittings belangriker as die dinge van God ag, word die perke egter oorskry.
“Niemand kan vir twee base tegelyk werk nie. Hy sal óf die een minder ag en die ander een hoër, óf vir die een meer oorhê en en die ander een afskeep. Julle kan nie God én Mammon dien nie.” Matt 6:24. Volgens Jesus sal een van die twee dus aan die kortste ent trek. Jy gaan óf jou toewyding aan God inboet deur aan jou begeerte vir die mooi besittings voorrang te gee, óf jy sal jou toewyding aan materialisme afskaal deur God met jou hele hart te volg – en dit behels opoffering, om eenvoudig te lewe, om te gee en om te dien.

Waar jou skat is…
Hoeveel van ons het snags al wakker gelê en planne beraam hoe om daardie nuwe stel gholfstokke of daardie nuwe Lexus te bekom. Hoeveel van ons het al gesê: “Die lewe sou volmaak wees as ek net …gehad het.”
Hoeveel van ons het ons al bevind waar ons ’n fyn etiese balans probeer handhaaf, reikend na iets wat buite ons bereik sal bly, tensy ons daardie grens oortree? Vir die Christen in die besigheidswêreld is materialisme ’n subtiele gevaar. Materialisme is nie so voor die hand liggend gevaarlik soos om te steel of om rond te slaap nie, maar dit is geensins minder dodelik vir jou emosionele en geestelike welsyn nie.

Rentmeesterskap of eienaarskap
Dit maak nie saak hoe min of hoe baie jy besit nie, God besit alles. Om te verhoed dat materialisme wortelskiet, moet jy besef dat jy ’n rentmeester van God se eiendom is.
As jy probeer om die waarde van jou lewe te bepaal volgens wat jy besit, het jy reeds misluk, omdat die hele idee van eie-naarskap op ’n fondasie van sand gebou is. Jy besit nie werklik enigiets nie. Alles wat jy besit, behoort aan God.
Wanneer ons vasklou aan ’n ingesteldheid van eienaarskap en eiegeregtigheid, beïnvloed dit ons perspektief oor ‘teruggee’ aan God. Soms dink Christene omdat God die eerste 10% besit (tiende), die ander 90% aan hulle behoort. Die doel van die tiende is nie om ’n winsdelingskema met God te deel nie.
God stel daarin belang hoe jy alles bestuur wat Hy jou skenk. Ons kan hierdie mynveld van materialisme vermy as ons onsself as rentmeesters beskou van alles wat ons besit, in plaas van om eienaars daarvan te wees. “Die aarde en alles wat daarop is, die wêreld en dié wat daar woon, alles behoort aan die Here.” Ps 24:1.

Moenie bo jou vermoëns leef nie
Om op krediet te leef en dan nóg geld te leen om meer besittings aan te skaf, is die verskriklike valstrik van materialisme.
Toe kredietkaartmaatskappye besef dat mense op materiële vlak met mekaar meeding en tot sukses gemotiveer word deur die jaloesie van hulle bure, het sommige van hierdie maatskappye advertensies bedink wat hierdie drang uitbuit en aanmoedig.
As Christene moet ons ons prioriteite in plek stel en skatte in die Hemel opgaar en nie op aarde nie. God waarsku teen skuld; let wel, ek sê nie God verbied dit nie, maar skuld sal jou aan ander gebonde hou. Jy sal nie vry wees om die wil van God te doen nie.

Beskikbaarheid versus onbeskikbaarheid
Mense wat finansieel oorbelas is en ten opsigte van hulle be-roep en vryetydsbesteding oorlaai is, sal hulleself nie sommer beskikbaar stel vir diens aan God nie. Hoe sou jy Jesus se woord in Lukas 14:16-4 interpreteer as jy rentmeesterskap, tevredenheid, beskikbaarheid, eienaarskap en krediet in gedagte hou?
Die uitgenooide gaste wat in die gelykenis genoem word, was meer in ander belange geïnteresseerd as om die fees by te woon. Deur hulle toegewyde verbintenis met hulle eie agendas het hulle hulleself onbeskikbaar vir die fees gestel. Stel teenoor hierdie onbeskikbaarheid God se uitdaging in 2 Kronieke 16:9: “Die Here het Sy oë oral op die aarde sodat Hy dié kan help wat met hulle hele hart op Hom vertrou.” As ons harte verteer word deur materialisme of om ’n groter bankbalans te bekom, kan God ons nie vir Sy doel gebruik en versterk nie.
Deur Sy genade skenk God jou soveel dinge in hierdie lewe en Hy verwag van jou om daarna om te sien sonder om daaraan verknog te raak. In die woorde van Joe Stowell, “The real point of materialism is not how much we have, but what has us.”

JAMES M. PEARSON is die outeur van die boek, ‘Minefields in the Marketplace’.

Bron: http://doomcharl.blogspot.com/

Lees Meer >>

Genade slegs vir soekers

Ek weet nie wat is jou grootste stryd of mees intense krisis of wakker-lê-in-die-nag-bekommernis nie, ja, jou “doring in die vlees”! Dit kan enige iets wees wat jou moedeloos, magteloos, broos, gefrustreerd, swak, hooploos, kragteloos, onseker, of hoe ook al laat voel. Dis verseker iets in jou lewe wat jy nie self kan verander nie. Dit is waarskynlik iets waarvoor jy nie gekies het nie. Dit kan ook iets wees wat niemand anders van weet nie, of wat niemand anders sal verstaan nie.

Jy het al alles onder die son probeer om uit of deur of oor hierdie “DING” in jou lewe te kom. Jou planne is op, ander se raad is uitgeput, jy is in ‘n doodloopstraat, daar is geen lig in die tonnel nie. Moontlik is daar mense wat hier lees en redeneer dat dit nie vir hulle geld nie – sal ons sê, gelukkige hulle, of oneerlike hulle dalk? Verseker is daar baie wat ‘n “DING” het wat hulle mee loop, dag en nag.

Die harde werklikheid vir diegene wat wel ‘n “DING” het, dit staan lynreg en radikaal teenstrydig teenoor God se genade! Die botsende kontras is onverstaanbaar en onverklaarbaar. Die “DING” en genade bots so erg, dat ons slegs tot een gevolgtrekking kan kom: ons verstaan glad nie. In ander woorde sou ons kan sê, Jesus-mense behoort nie ‘n “doring in die vlees” te hê nie.

Tog is Jesus-mense die enigstes wie se “doring in die vlees” vir hulle hanteer word. Dis so eg deel van God se genadeplan vir ons op pad na volmaaktheid. Hoe meer ons ons eie magteloosheid besef, hoe beter is ons kans om genade raak te leef. Juis waar God se genade my enigste uitkoms is, waar ek totaal gestroop is van my eie bydrae om daaroor te kom, dan gebeur die onvoorspelbare en grenslose ingrype van God. Maar let wel, hierdie ingrype van God is op sy manier en tyd, ter wille van sy doel: Hy is met my op pad na volmaaktheid.

Bron: http://doomcharl.blogspot.com/

Lees Meer >>

Die avontuur van lewensmaats


Ons nooi Jesus binne ons vriendskap in. ’n Wyse oom het vir ons geleer dat ’n huwelik soos ’n driehoek is waar Jesus aan die boonste punt is, huweliksmaats is aan die twee kante van die driehoek. Soos ons nader aan Jesus beweeg, groei ons ook nader aan mekaar. Een manier om dit te doen is om saam na Jesus te luister. Hier is ’n vraag wat julle kan bespreek: “Hoe kan ons as vriende nader aan ons vriend Jesus groei?”

Ons kan ook opnuut die lewe saam geniet as mekaar se “lovers”. Ons doen dit deur iets te doen wat ons albei geniet. Albei. Dalk is dit om by ’n gunsteling restaurant te gaan eet of saam ’n fliek te gaan kyk. Miskien is dit om op ’n romantiese uitstappie te gaan. Dalk is dit om mekaar te verras met iets spesiaal. Hier is nog ’n vraag wat julle kan bespreek, “Hoe sal dit lyk om iets saam te doen as “lovers”?”

O, en as jy gewonder het waar daardie Hooglied vers is, nooi ek julle uit om die boek hardop vir mekaar te lees … dalk help dit om mekaar te herontdek as “lover” en “friend” 🙂

Bron:  ekerk.org

Lees Meer >>

Gevare Van Die Sosiale-Media-Kultuur



Lewe in ’n vals wêreld
My man het gelag, wetend dat ek ’n grap gemaak het, maar ook dat daar tog waarheid in my opmerking steek. Hierdie videospeletjie-, sosiale-media-verslaafde-kultuur is tevrede met namaaksels sonder dat hulle selfs daarvan bewus is. Seuns sit tuis voor hul rekenaarskerm en voel asof hulle oorwinnaars, beskermers, kampioene, vegters, beroemde sportmanne en selfs musikante is sonder om eens ’n druppeltjie te sweet of om aan ’n ware rugbybal of musiekinstrument te raak.
Mans sit voor die rekenaarskerm terwyl vroue met wie hulle nog nooit gepraat, uitgegaan het of mee getroud is nie, hulle seksueel prikkel. Meisies sit voor skerms waar hulle boodskappe en twiets skryf, of foto’s van hulleself oplaai vir sogenaamde vriende wat hulle nog nooit in lewende lywe ontmoet het nie.

Word ons kultuur ’n nabootsing van die werklikheid?
Om die wêreld te verower beteken dat jy van die rusbank af opstaan, by die deur uitloop, die son op jou gesig voel terwyl jy letterlik iets doen om die wêreld te verower. Jy kan ook nie die wêreld verower sonder om met ander mense in die wêreld in kontak te kom en betrokke te raak nie.
Om ’n vrou naak te sien, behoort te vereis dat jy haar in lewende lywe ontmoet het, dat jy haar leer ken, haar uitneem, ’n roomys vir haar koop, haar familie ontmoet, opofferings vir haar maak, jouself kwesbaar maak vir haar, haar vra om met jou te trou en om in die huwelik te tree. Julle gedeelde naaktheid behoort sonder skaamte, geheimhouding of bedrog te wees omdat jy jouself tot hierdie vrou, en haar alleen, verbind het om haar ten volle getrou lief te hê.

Ware vriendskap
Eweneens behoort om vriende te hê ’n werklike ontmoeting van aangesig tot aangesig in te sluit, of ten minste ’n stem-tot-stem-gesprek wat meer inspanning verg as om slegs 140 letters te tik of ’n kort boodskappie te stuur. Vriendskap moet die toets van die tyd kan deurstaan wat betroubaarheid en eerlikheid vereis.
Vriendskap vereis die toewyding om verontrief te word: soos wanneer ’n vriend in die middel van die nag die behoefte het om met jou te praat en jou uit die slaap waarna jy smag, wakker maak en jy die oproep steeds neem; of wanneer ’n vriend iets verkeerds doen en jy ’n ongemaklike waarheid aan hom/haar moet tuisbring, in die hoop dat dit in die regte lig aanvaar sal word en die vriendskap sal versterk. Vriendskap is nie kort, niksseggende sinnetjies en om net te sê wat iemand wil hoor nie. Vriendskap behels intimiteit.
Ons hartsbegeerte is om met ander te kommunikeer en in verbintenis te wees – maar hoe meer ‘vooruitgang’ ons maak, hoe minder ken ons mekaar.

Vals verhoudings, vals gevoelens
Die jeug wat op hierdie manier grootword, is mislei. Hulle ervaar nie ware verhoudings en ware emosies nie. Ek sien deurentyd die uitwerking van hierdie gebrokenheid wanneer ek met hulle praat.
Die beste plek om verandering teweeg te bring, is in jou eie huis. ’n Sesjarige maatjie van my seun het my onlangs aan die mou gepluk en gevra: “ Tannie, het Michael ’n ADSL of ’n Wii? Watter rekenaarspeletjies het hy? Brady weet nie watter speletjies julle in julle huis het nie.”
Hierdie oulike seuntjie het dronkgeslaan na my opgekyk en gewonder hoekom my seuntjie nie weet wat die name van sy rekenaarspeletjies is nie.
“Ons het ’n Wii,” het ek geantwoord, “maar ons speel rekenaarspeletjies net as ’n gesin saam, net soos ons bordspeletjies speel, en die enigste een wat ons tans het, is ’n sportspeletjie en ’n avontuurspeletjie.” Toe kyk hierdie seuntjie my nog meer verbysterd aan en sê: “Ek het die hele naweek lank op my eie rekenaarspeletjies in my kamer gespeel.”

Kinders bestee te veel tyd alleen
Is ek besorgd oor daardie kind, wat op sesjarige ouderdom alleen in sy kamer voor ’n skerm sit en ’n speletjie speel wat nie die werklikheid is nie? Nie noodwendig nie. Ek bedoel, die meeste kinderspel behels nie die werklikheid nie. Wat my wel bekommer is die tiener of die volwassene waarin hy kan ontaard as hy toegelaat word om tydens sy ontwikkelingsjare maar tevrede te wees met die namaaksel. Ek is bekommerd daaroor dat hy leer dat dit aanvaarbaar is om geïsoleerd van jou gesin, in jou eie kamer voor ’n rekenaarskerm te sit, waar niemand kan sien wat aangaan nie. Ek is bekommerd dat hy soveel bevrediging uit die emosies sal put wat hy ervaar wanneer hy hierdie speletjies speel, dat hy nie die nodige energie sal aanwend om ware ontmoetings en verhoudings te bou nie.
Ek is bekommerd (gegewe dat die gemiddelde ouderdom wanneer kinders vir die eerste keer pornografie sien, ongeveer 8-9 jaar oud is) dat hy eendag hierdie gedrag, om opwinding voor ’n rekenaarskerm op te soek, sal verplaas na die kyk van pornografie op daardie selfde skerm – in die geheimhouding en privaatheid van sy eie slaapkamer terwyl sy ouers aanneem dat hy maar net rekenaarspeletjies speel.

Bestee tyd saam
Daar is ’n paar dinge wat ons kan doen om ons kinders te help om volwassenes te word wat die ware Jakob wil ervaar en wat ware verhou-dings bou. Ons speel selde rekenaarspeletjies in ons huis. Wanneer ons dit egter wel doen, speel ons as ’n gesin saam.
Ons speel, praat, bemoedig, kompe-teer, leer goeie sportmanskap en groei in verhoudings terwyl ons rekenaarspeletjies speel, net soos wanneer ons bordspeletjies speel. Ons het een televisiestel waarna ons almal saam kyk.

Bestee tyd saam as ’n gesin
Ons het nie draagbare toestelle wat die kinders na hulle kamers mag neem en hulleself mee kan isoleer nie. Soms, as ’n spesiale vergunning, laat ek die kinders toe om ’n speletjie te speel of iets op die IPad te kyk terwyl ek in dieselfde vertrek doenig is.
Ons nooi dikwels ons kinders se vriende oor, om hulle ruim geleentheid te gun om te speel en met ander in ’n ware verhouding te kommunikeer; waar hulle moet leer hoe om met ander oor die weg te kom en waar hulle die voordeel van verbeelding en kreatiwiteit kan geniet.
Ek glo nie dat die ouer se rol is om gedurig hulle kinders te probeer vermaak en te verseker dat die kinders se dag volgepak is sodat hulle nie verveeld raak nie. Ek wil hê dat my kinders verveeld wees – want dit is wanneer hulle hulle eie tyd moet verwyl. Waarmee hulle vorendag kom om te doen, is beter as enige rolprent of rekenaarspeletjie.
Hulle word skeppers van kreatiewe en verbeeldingryke kunswerke, musiek en spel, in plaas van blote verbruikers van iets wat iemand anders uitgedink het in ’n rekenaarspeletjie of rolprent.

Kom in verbinding met die skoonheid van die lewe
Eenvoudig gestel, ons maak ’n doelbewuste keuse om toestelle af te skakel sodat ons met die werklikheid, liefde en mense in verbinding kan wees. Die opoffering is uitdagend wanneer ’n mens in hierdie tegnologiese ‘vooruitstrewende’ tye leef.
Ja, dit is vir ons die moeite werd, met die wete dat wat ons poog om te vermag, ons kinders sal help om ware verhoudinge met mense te vorm, dat hulle die lewe voluit sal leef deur werklik aan sport deel te neem en musiek te maak – en self die wonder van hierdie wêreld ontdek.

Bron:  juig.co.za

Lees Meer >>

Jesus — ’n Vriend van vroue


Hy, die Koningskind, word uit ’n vróú gebore. Ja, God kies om sy Seun in die wêreld te laat kom deur die wonderliggaam van ’n vrou en bring daarmee die eerste vorm van eer aan vroue. Wanneer die vrou wat aan bloedvloeiing ly, dit waag om aan sy soom te raak, genees Hy haar met dié deernis-woorde: “Dogter, jou geloof het jou gered. Gaan in vrede.“ As die Fariseërs die ontugtige vrou wil stenig, red Jesus haar met ’n teenaanval-vraag wat hulle in hul spore laat omdraai. Toe ’n vrou vol bewondering ’n potjie duur nardus-parfuum op Jesus uitgooi en die ander haar vir haar oordaad veroordeel, antwoord Jesus: “Los haar! Waarom kraak julle haar so af? Wat sy vir My gedoen het, beteken vir My baie. Dit is so ’n mooi gebaar. (Markus 14:6b)

Dwarsdeur die verloop van sy lewe beskerm en eer Jesus elke vrou wat sy pad kruis. Meer as dit: Hy beskou hulle as sy vriende! Sy gelyke! Dié mense by wie Hy graag wil wees! Daarom onderrig Hy ’n Samaritaanse vrou, kuier Hy as Vriend by Marta en Maria en verskyn Hy, na sy dood, die eerste keer aan Maria Magdalena — een van sy getrouste vriendinne uit wie Hy vroeër duiwels uitgedryf het.

Maak dit jou nie opgewonde nie? Jesus beskou my en jou as sy kosbare vriendinne: Dié mense vir wie Hy spesiaal omgee, wat Hy só goed verstaan en vir wie Hy net sy heel beste wil gee. Word vir ’n oomblik stil en hoor hoe God met jou praat … asof jy sy beste vriendin is … Wanneer bekommernis, siekte, ouderdom, onsekerheid, vrees …wanneer die wêreld se lawaai jou doof maak, word vir ’n oomblik stil en weet jy’t ’n hemelse en ewig getroue Vriend: Jy het dié beste. Jy’t Christus.

Solly Ozrovech skryf: ’n Vriend is iemand wat jy graag by jou wil hê so lank as wat jy leef, en wat jy ook by jou sou wou hê wanneer jy moet sterf. So ’n Vriend is Jesus, die lewende Christus.

Here Jesus, ek’s so bevoorreg om U te ken en om te weet dat U my beter as ekself verstaan en liefhet. Gee dat ek u kosbare vriendskap waardig sal wees en dat ek sal dink, lyk en optree soos ’n waardige Jesus-vriendin.

Uit: Siel van ʼn Vrou, CUM

Bron: ekerk.org

Lees Meer >>