Gaan Jy Kerk Toe Vir Jouself?


Ontmoeting met die Here
Terwyl ek eenkeer met vakansie was, het ek alleen kerk toe gegaan en in die tweede laaste ry gesit. Dit was nie ’n lewendige, vriendelike soort kerk nie, maar ek het gehoop dat God my sou aanraak. Die gemeentesang was effentjies en die pastoor se boodskap onverstaanbaar. Net toe ek dink dat dit alles ’n mors van tyd is, het ’n ouerige swart Amerikaanse vrou agter die afgeleefde kerkorrel ingeskuif en begin sing: “It’s me, it’s me, O Lord, standing in the need of prayer.” Sy het so opreg gesing; die Gees het gefluister: “Bill, jy het ’n bietjie gebed nodig. Hoekom gee jy nie daardie las wat jy die hele week al dra vir My nie?” Ek het my kop laat sak en my las aan God oorhandig. Ná die diens het ek ’n veranderde mens daar uitgestap.

Wees bewus van jou houding
Deur die jare heen het ek dit ’n gewoonte gemaak om die verantwoordelikheid op myself te plaas wanneer ek ’n kerk besoek en nie op die leraar nie. As ek bloot terugsit, my arms vou en sê: “Doen jou ding, dominee, jy het ongeveer 18 minute daarvoor; ek het ’n ander afspraak,” ry ek gewoonlik met ’n kritiese gees en ’n onaangeraakte hart daar weg. As ek God egter vra om my aan te raak, antwoord Hy daardie gebed gereeld.
Jou hart benodig weekliks die insig, inspirasie en die uitdaging van ’n begaafde le-raar se preek uit God se Woord. Wees nederig en vra die Here om die leraar te seën en jou te help om ontvanklik te wees.

God werk deur Sy Kerk
Wees versigtig om leraars goedsmoeds te beoordeel of te gradeer – ’n tydverdryf vir sekere Christene. Mense sal soms ná ’n diens sê: “Ek verdra dit nie as dié ou preek nie!” As die leraar hard probeer het om nuwe insigte te bring en die Woord te verhelder, stel ek voor dat jy minder tyd daaraan bestee om hom te kritiseer en meer daaraan om die le-ring ter harte te neem! Hoe meer volwasse jy word, hoe meer behoort jy in staat te wees om van enige leraar te kan ontvang. Jy stel jou fokus inderwaarheid meer op die inhoudelike in as op die persoon wat die boodskap bring. Soms raak God ons deur ’n gesprek vóór of ná die diens aan. Baie jare gelede het ’n boodskap by ’n konferensie my diep geroer. Ek het geweet dat die Here nog nie klaar was met my nie, al het die byeenkoms tot ’n einde gekom. Ek het met ’n geboë hoof gesit en bid. ’n Man het aangebied om saam met my te bid as ek dit nodig het. Daarna het ons saam gaan koffiedrink en ons vriendskap duur nou al langer as twintig jaar. God het hom al talle kere in my lewe gebruik en dit het alles begin met sy vriendelikheid en ’n eenvoudige gesprek ná afloop van ’n diens.

Kyk ons uit na diegene in pyn?
Ek wil van ’n minder positiewe voorval vertel wat ’n goeie vriend ’n paar maande gelede beleef het. Sy vyfjarige kleindogter is aan ’n breingewas oorlede en hy moes kort daarna Hong Kong toe gaan om leiers op te lei. Hy het my vertel dat hy daar tydens ’n kerkdiens onverwags deur smart oorweldig is en hy so eensaam gevoel het soos in geen jare nie.
Een of twee kerkgangers het styf ge-glimlag en hom op die rug geklop terwyl die trane oor sy wange stroom – maar dit was al. Niemand het aangebied om vir hom te bid of hom te troos nie. “Dit behoort nie in enige kerk te gebeur nie,” het ek hom verseker en hom namens hulle om verskoning gevra. Die gesprek het my só ontstem dat ek daardie aand min geslaap het. Diegene met gebroke harte kan selfs te midde van ’n skare mense alleen voel. As hulle nie bevoorreg is om in ’n selgroepie te wees met innige onderlinge verhoudings nie, is die Sondagdiens die enigste plek waar daar vir hulle ’n geleentheid is om ware sorg en liefde te ervaar.

Ons moet ons prioriteite reg instel
Gelowiges met die gawes van bemoedi-ging, herderskap, genade en gasvryheid het dit vir hierdie doel ontvang, maar as mense wat hartseer en gebroke is, week na week opdaag sonder dat iemand hulle laste help dra, is daar iets fout in die gemeente. Ons moet ons weer eens daartoe te verbind om saam met ander gelowiges byeen te kom wanneer die kerk vergader; om nederig te wees en God te vra om ons tydens die diens aan te raak en tot ons te spreek, ongeag van wie die boodskap bring. Die tyd het aangebreek dat ons ons vrees om na vreemdelinge uit te reik oorkom.
“Julle is die uitverkore volk van God wat Hy baie lief het. Daarom moet julle meelewend, goedgesind, nederig, sagmoedig en verdraag-saam wees.” Kol 3:12. God wil mense se le-wens meer aanraak as wat ons wil hê hy moet.

BILL HYBELS is die pastoor van Willow Creek Community Church in Amerika en die voorsitter van Willow Creek Association. Vir meer inligting: www.billhybels.org

Bron: juig.co.za

Lees Meer >>

Wereldwye Tradisies En Gebruike


Argitektoniese meesterstukke
Die katedrale is die indrukwekkendste argitektoniese meesterstukke in die wêreld. Dit het verskeie geslagte lank geduur om die katedrale te bou. Die geslag wat die fondasie gelê het, het selde nog gelewe toe hulle kleinkinders of kleinkinders hierdie argitektoniese hoogtepunte voltooi het.
Die katedrale is in elke opsig voorbeelde van uitmuntendheid: van hulle kruisvormige styl en die altaar wat só geplaas is dat die gemeente na Jerusalem kyk, die pilare wat die hoogte inskiet en hoë gewelwe wat ons oë van die sorge van die alledaagse lewe lig en daartoe lei dat ons geestelike en ewige werklikhede bepeins, tot die loodglasvensters wat Bybelverhale en belangrike gebeure van die geskiedenis luisterryk uitbeeld. Katedrale  vergestalt soveel getuienisse, lesse en insigte waar hulle staan as indrukwekkende monumente vir die vernaamste Mens wat ooit geleef het.

Sonder weerga
Jesus Christus het die wêreld vir ewig verander. Met Sy geboorte het Hy ons meting van tyd verander. Hy het die rivier van die eeue van koers laat verander en het die eras van hulle skarniere gelig. Die geboorte van ons Here Jesus Christus, Sy inkarnasie, het tyd aangeraak en verander. Die hele wêreld meet tyd as voor Christus (v.C.) en Anno Domini – die jaar van ons Heer (n.C.). Jesus Christus is die sentrale figuur van die geskiedenis. Daar is meer boeke oor Jesus Christus geskryf as oor enige ander persoon in die geskiedenis.

Skouspelagtig
Die groot katedrale – vroeg-Goties, hoog-Goties en laat-Goties – is nou die indrukwekkendste kunswerke wat ooit geskep is. Hulle is skouspelagtige werke van klip en glas. Oor die hele Christelike wêreld is groot, indrukwekkende katedrale tot die verheerliking van God opgerig. Die swierige en pragtige katedrale wys na bo, na God. Die oog en die sinne skep behae in hulle. Hulle dra visueel iets oor van God se luisterrykheid en grootsheid, sowel as die onverganklike geloof wat deur ons Here Jesus Christus geïnspireer is.



Inspirerend
Histories het die lewe, lering, dood en opstanding van Jesus Christus die vernaamste kunstenaars en argitekte beïnvloed en geïnspireer. Gotiese argitektuur beliggaam die Christelike geloof. Die katedrale is almal uniek; daar is nie twee wat dieselfde is nie. Elkeen het talle dekades, dikwels langer as ʼn eeu, geneem om te bou.

Die Bybel in klip en glas
Die katedrale is versier met Bybelgebaseerde kuns, standbeelde, fresko’s, graveerwerke en loodglasvensters. Die katedrale is ontwerp om bo alle ander geboue in die dorp of stad uit te troon. Hulle is van ver af reeds sigbaar. Die katedraalklokke het die dorpsaktiwiteite gereguleer en is almal indrukwekkende en inspirerende voorbeelde van uitmuntende vakmanskap.
Die argitekte het verduidelik dat hierdie katedrale ontwerp is om die mens “van die onsienlike en ewige bewus te maak, en dat die Goddelike immanent geword het.” Die katedrale moes “die mens se bewustheid van die Goddelike simboliseer.” Soos ʼn kunshistorikus verklaar het: “Die klip en struktuur word deel van ʼn geestelike ervaring – die steunpilaar is hoog, slank en soepel, die gewelf verdwyn in duiselingwekkende hoogtes, die torings en siertorinkies waaier die hoogte in .”

Ontsagwekkend
Dit is bykans onmoontlik om binne een van hierdie majestueuse bouwerke te staan en nie met ontsag en verwondering gevul te wees nie. Baie mense beskryf die katedrale as “die Bybel in klip en glas.” Die katedrale is ontwerp om ʼn beeld van die Hemel en ʼn deur na die Ewigheid te verteenwoordig.

Wells-katedraal
Toe ek Wells-katedraal besoek het, wat aan die Apostel Andreas opgedra is, het ek gesien hoe dit ontwerp is sodat die standbeelde van die Apostels en evangeliste wat die westelike kant van die katedraal versier, tydens die sonsondergang soos goud geglinster. Dit herinner ons aan die komende Oordeelsdag.

Ligtende geloof in Aksie
Wells-katedraal is ʼn Church of England-gebou van 1175. Dit word as die eerste ware Gotiese struktuur in Europa beskou, nadat daar van die laaste beperkinge van die Romaanse styl weggebreek is. Ek kon nie help om weer eens te wonder hoe onakkuraat dit is om die Middeleeue die onverligte of duister Middeleeue te noem nie, veral wanneer hulle sulke manjifieke katedrale gebou het! Die suilebundels, steunboë en reuse-loodglasvensters, wat uit die 13de eeu dateer, bied ʼn veelseggende  teenargument vir Voltaire se poging om die Kerstening van Europa as die ‘duister Middeleeue’ af te kraak. Voltaire, wat die filosofiese grondslag vir die Franse Rewolusie gelê het, het die heidendom van antieke Rome bo die Christendom van Middeleeuse Europa verkies. Ongelukkig het baie Christene in onwetendheid sy term, ‘duister Middeleeue’, aangeneem om na hierdie wonderlike era te verwys, toe katedrale gebou is, manjifieke kuns geskep is, biblioteke oor die hele Europa gevestig is en evangelisasiewerk en dissipelskap op die vasteland plaasgevind het.

Glastonbury
By Glastonbury in Somerset het ek die ruïnes van een van die grootste kloosters op die Britse Eilande verken. Die groot Glastonbury-kerk was 67 m lank en 13,7 m wyd. Die koorgedeelte alleen was 47,2 m lank en die dwarsvleuel ʼn verdere 48,7 m lank. Die St. John-kapel was 33,5 m lank en 7,3 m wyd. Die Lady-kapel, was 30,4 m lank en 7,3 m wyd was, is bo-oor die oorspronklike kerk van Josef van Arimatea uit die eerste eeu gebou. Al hierdie geboue was onderling verbind en was die bestemming van baie pelgrimstogte. Die ruïnes is so ontsagwekkend dat ʼn mens jou skaars kan voorstel watter impak die oorspronklike geboue moes gehad het!

Kragtige getuienisse
Die indrukwekkendste argitektoniese voorbeelde getuig steeds van die belangrikste Boek wat ooit geskryf is en die vernaamste Mens wat ooit geleef het. Toe Jesus Christus Jerusalem op Sy triomftog binnegegaan het, het die priesters en die Fariseërs Hom beveel om Sy dissipels te berispe omdat hulle “Hosanna! Geseënd is Hy wat kom in die Naam van die Here!” uitgeroep het. Ons Heer se antwoord was dat as hulle stilbly, die klippe self sou uitroep.

Jesus Christus is die Heer
Vandag roep die klippe van talle katedrale steeds die heerlikheid van God uit. Jesus Christus is Heer. Hy het uit die dood opgestaan. Hy het na die Hemel opgevaar en Hy kom weer om die lewendes en die dooies te oordeel!

PETER HAMMOND is ʼn sendeling, Bybelleraar en outeur. Skakel: 021 689 4480; mission@frontline.org.za; www.frontline.org.za

Bron:  juig.co.za

Lees Meer >>

Paadjies wat toegroei

Dwarsdeur die Bybel lees ons van ware vriendskappe en die waarde wat hulle in mekaar se lewens gehad het — kyk na Dawid en Jonathan, Daniël en sy drie vriende wat by hom gestaan het.

Ons as vriendinne moet elke geleentheid gebruik wat die Here vir ons gee in vriendskappe. Pak jou skaal vol vrienskapsdade uit dankbaarheid dat Hy dit vir jou kan balanseer sodat daar nie van jou gesê kan word dat jy te lig bevind is nie… Dis die een plek in die lewe waar jy maar met vrymoedigheid oorgewig kan wees.

Spreuke 27:9 sê — “Reukolie en wierook is iets om te geniet, maar die genot van vriendskap lê in die raad wat jy kry.”

Paadjies wat toegroei in vriendskappe is wanneer die vriendskappe toksies raak, m.a.w. die vriendskap is eensydig, nie ondersteunend of onbevredigend. Vriendskappe is nie ’n eenrigtingpad nie. Albei partye moet sinvolle beleggings maak.

Talle vrouens gaan deur die lewe sonder vriendinne. Dit opsig self is ’n groot jammerte. Vriende en nie kennisse, is so ’n noodsaaklike deel van die lewe. Deur die eeue, ook in Bybelse tye, was vriendskap een van die hartare van die menslike lewe. Vir die Grieke en die Romeine was dit ’n uitsonderlike ideaal.

Vriendskap vra tyd en as jy daardie keuse gemaak het, moet jy dit egter ook so uitleef. CJ Langenhoven het ’n baie waar opmerking gemaak — “Die ware vriendskap, nou, is nie te koop nie, want vriendskap vind nie sy lus in neem nie, maar in gee.”

Vir ’n Christen is vriendskap nie iets wat jou toevallig oorkom nie, skryf CS Lewis in sy boek Die Vier Liefdes. Hy beskou vriendskap as ’n geskenk van God en verteenwoordig die daadwerklike genade van God op aarde. Vriendskap is nie die beloning van ons skerpsinnigheid en goeie smaak in die vind van mekaar nie. Dit is die manier waarop God aan elkeen die skoonheid van die ander wys: deur vriendskap open God ons oë.

My gebed vir 2015 is dat ons vriendskappe sal groei en ontwikkel en dat ons nie vreemdelinge vir mekaar sal word nie. Enigiets, veral op die gebied van die verhoudingslewe, moet in stand gehou word as dit enigsins wil bly voort bestaan. Is daar dalk in jou lewe ’n paadjie wat toegegroei het?

Bron:ekerk.org

NGVishoek: Ds. ( dominee ) Martin Barnard.

Lees Meer >>

Wees eg en opreg

Die bekende skrywer Bob Goff vertel ’n vehaal van ’n baie duur skildery wat hy gekoop het. Die “painting” was so duur die kunsgallery noem dit nie ’n “painting” nie, maar ’n “piece”. Ja, dis ’n duursame meesterstuk. Toe hy dit uiteindelik koop, na maande se spaar, gee hulle vir hom twee van die skildery: die ware meesterstuk, enig in sy soort en ’n “fake” een om op te hang. Bob was baie ontsteld oor die feit dat hulle verwag hy moet die oorspronklike meesterstuk toesluit en die vals een ophang vir almal om te sien.

Hy het die oorspronklike meesterstuk opgehang en elke dag daarna gekyk. Dit het hom baie plesier gegee. Daar het eendag ’n rekkie tydens ’n rekkie–geveg met sy kinders die meesterstuk getref en ’n merkie gemaak. Bob was eers ontsteld, maar later ervaar die meesterstuk met die skade/merk is sommer nou nog meer werd vir hom. Uit dit alles leer ons dat God wil hê ons moet ons ware self wys en teen die “muur ophang”. Ja, jy gaan houe vat en jy gaan soms seerkry, maar dit verhoog jou waarde. Soveel mense is vals en leef “fake”. Die lewe word vir soveel ’n toneelspel en soveel leef skynheilig.

Lees gerus Matteus 23 waar Jesus in geen onduidelike taal die Fariseërs aanspreek oor hulle valsheid. Jesus spreek hulle aan as “huigelaars” en “blinde leiers”. Hy is prontuit kwaai met hulle en vermaan hulle omdat hulle so “fake” is.

God het jou ’n meesterstuk gemaak. Hy het jou duur gekoop deur die bloed van Jesus. Hy kom maak jou ’n nuwe mens en gee jou ’n nuwe identiteit. Jy het geen rede vir valsheid of skynheiligheid nie.

Al vat jy so nou en dan houe, wees en wys die ware jy. Dis wat God van jou vra.

Bron:  ekerk.org

NGVishoek: Ds. ( dominee ) Martin Barnard.

Lees Meer >>

Leer leef

Tog is Jesus se roeping aan alle gelowiges presies dieselfde. Sy roeping is tegnies net twee woorde lank: “Volg My!” Jesus nooi ons almal uit tot voltydse navolging van Hom. Hy roep ons eerstens tot ’n 24/7 verhouding met Hom, nie tot om allerlei take of opdragte vir Hom uit te voer nie.

Dit volg later.

Roeping gebeur altyd verhoudingsmatig. Ons word geroep om so naby aan Jesus te loop dat ons die lewe slegs deur sy oë sal bekyk en deur sy ore sal aanhoor. Dan eers sal ons weet wat ons vir Hom moet doen. Vanuit ons navolging van Jesus leer ons hoe om te leef

Bron:  ekerk.org
NGVishoek: Ds. ( dominee ) Martin Barnard.

Lees Meer >>

Waarom is God versteek?


‘VERSTEEKTE GOD’
Die 17de Eeuse Franse wiskundige, Blaise Pascal, het geskryf dat wat op aarde sigbaar is, nie die totale afwesigheid of teenwoordigheid van God aantoon nie, maar veel eer­der die teenwoordigheid van ‘n versteekte God weerspieël. “Enigiets is rein vir die wie se harte rein is. Maar niks is rein vir hulle wat korrup en ongelowig is nie, want hulle gedagtes en gewetens is besoedel.” Tit 1:15.

Vir die wat willens en wetens blind is, mag dit voorkom of God afwesig is, of erger nog, dat, indien Hy daar is, Hy besonder wreedaardig is. Maar vir diegene wie se oë reeds geopen is, is daar ‘n oormag bewyse dat God in die Skepping, in ons gewetes en in Jesus Christus teenwoordig is. Daar is nie ‘n enkele plek in die ganse heelal of hier op aarde waar Sy vingerafdrukke nie gesien kan word nie. Ons word egter deesdae met ‘n baie venyniger en aggressiewer vorm van ateïsme gekonfronteer. Tog ironies dat militante ateïste so baie tyd daaraan spandeer om te bewys dat God, aan wie hulle in elk geval nie glo nie, nie bestaan nie.

KONFRONTEER ATEÏSTE
Indien jy al die vele verskriklike aanvalle deur ateïste op God gelees het, sal jy dadelik agterkom hoe geneig hulle is om die onderskeid tussen die Christendom en Islam te verwar. Hulle noem verskriklike gruwels wat in die naam van godsdiens gepleeg is en kom dan met die argument dat dit God se skuld is! Dit is in die eerste plek onregverdig om die slagoffers te blameer vir dit wat deur hul vervolgers gedoen is. Tweedens is hierdie ateïste ook geneig om die talle erger gruweldade wat deur ateïste gepleeg is, te ignoreer. Sekulêre, humanistiese, ateïstiese en politiese staatbestelle het veroorsaak dat die 20ste Eeu een van die bloedigste in die hele geskiedenis was.

Die dodetal wat deur sekulêre, huma­nistiese en ateïstiese diktators soos Vladimir Lenin, Joseph Stalin, Mao Tse Tung, Pol Pot, Haile Mariam Mengistu, Samora Machel, Agestino Neto, Fidel Castro en ander kommuniste agtergelaat is, is meer as 160 000 000 slagoffers. En dit is nie soldate wat op die slagveld gesterf het nie, maar burgerlikes wat in vredestyd, deur die hand van hul eie regerings, gesterf het. En dit alles in die naam van wetenskaplike sosialisme.

IRRASIONELE REDENASIE
Ons wil beslis nie hê dat elke ateïs die skuldgevoel oor die slagting aan die hand van sommige van die wreedaardiges moet deel nie. Dit sal ook nie regverdig of rasioneel wees indien ateïste Protestante Christene blameer vir die onverdraagsames en ekstremiste wat wandade teen hul voorva­ders gepleeg het nie. Die feit van die saak is: daar is ‘n God.

Hy het ons gemaak. Hy het Sy stan­daarde van reg en verkeerd in die Tien Gebooie bekendgemaak en ons is aan Hom verantwoording verskuldig. God is beslis nie versteek nie. Hy het Sy krag, majesteit en waarheid op vele maniere bekendgemaak en dit is baie duidelik in Sy Skepping te sien. Hy het ook deur Sy profete gepraat en deur Sy Seun, Jesus Christus.

GOD SE HANDEWERK
Indien jy al ooit die Drakensberge besoek het; dan het jy een van die groot waterskeidings van ons kontinent gesien. Jy kan jouself die reëndruppels indink wat van ‘n wolk kom, op die piek val en dan wegvloei na die Oranjerivier en uiteindelik in die Atlantiese Oseaan beland. ‘n Ander druppel vloei weg na die Tugelarivier en vloei na die Indiese Oseaan. Op een enkele punt is hierdie druppels water slegs ‘n meter geskei, dan honderde kilometer om dan uiteindelik duisende kilometer van mekaar geskei te wees. Dit neem een enkele druppel water meer as vier maande om die volle lengte van die Nylrivier te vloei tot in die Middellandse See. In Amerika is die Rockies die kontinentale skeiding en in Suid-Amerika is dit die Andesgebergte. Asië het die Himalajas en Europa weer die Alpe.

WATERSKEIDINGSVRAAGSTUK
Hierdie waterskeidings is baie belangrik in Geografie. Een ‘waterskeiding’ wat baie belangrik in Teologie is, en een van die ‘sleutelgeloofsoortuigings’ is, is die vraag: ‘Is daar ‘n God, of nie?’ Die Bybel begin immers met: “In die begin het God die ganse heelal gemaak, die hemel daarbo en die aarde hieronder.” Gen 1:1. Ateïsme is gebaseer op die veronderstelling dat daar geen God is nie. Jy glo òf die wêreld het homself geskep, òf jy glo in ‘n selfgenoegsame Opperwese wat altyd was, is en sal wees. Met ander woorde, die vraag is eintlik: Is God selfgenoegsaam en ewig? Of is die heelal selfgenoegsaam en selfonderhoudend? Die punt waar jy begin, is waar jy sal eindig. “Net die dwase sê vir hulleself: ‘Daar is geen God nie.’ ” Ps 14:1.

DIE GOD WAT ÍS
Elke stam en kultuur het ‘n idee oor God en ‘n naam vir God. Almal weet God bestaan, maar sommiges probeer die feit wegre­deneer. Die hele rigting van die mens se bestaan word geaffekteer deur sy oortuiging dat hyself die opperwese van die heelal is, of hy erken die bestaan van ‘n Opperwese wat hy kan liefhê, vrees en as dié mag sien wat getart kan word, of as ‘n Heer wat gehoorsaam moet word. Die belangrikste is dat dít wat jy oor God glo, die verskil sal maak aan jou gedagtes, jou lewe en jou ewige eindbestemming.

FONDASIES VERKRUMMEL
Een van die redes waarom ons deesdae so ‘n militante en aggressiewe aanslag van ate­ïste ervaar, is juis omdat al die pilare van ate­ïsme besig is om te verkrummel. Eerstens omdat daar reuse vordering gemaak is om die Evangelie te verkondig en miljoene mense jaarliks tot die Christendom bekeer word en tweedens word daar al hoe meer op die hoogste intellektuele vlakke deur al hoe meer wetenskaplikes besef dat ateïsme onverdedigbaar is.

FEITE IS HARDKOPPIG
In ‘God, the Atom and the Universe’ het die wetenskaplike, Dr. James Reid, verklaar: “Science is preparing a surprise for mankind. At least it will be a surprise for those who have doubts about the Bible and its God. It will also come as a surprise for those who are labouring under the misapprehension that science undermines the Bible. It may even shock some scientists, who may be startled to find that their newly uncovered facts, or accepted theory, provide still another link in the chain of evidence that is showing that the facts of the universe support the Bible’s statements – including Creation.”

DOEL IN ONTWERP
Brandon Carter, hoogs gerespekteerde astro-fisikus van Oxford Universiteit het die hele akademiese wêreld verstom toe hy in 1973 uitgewys het dat Fisika en Astronomie albei aandui dat die heelal gekonstrueer is en onderhou word vir ‘n spesifieke doel. Die onderhouding daarvan kan nét wees vir die volhoubaarheid van intelligente lewe op hierdie planeet.

Professor Carter het dinge soos die konsekwente simmetrie van wiskundige vergelykings vir swaartekrag en die feit dat indien die massa van die proton ‘n fraksie groter of kleiner was, die ganse sonnestelsel ineen sou stort, as bewys genoem. Die heelal is ‘n bewys dat dit vir die mens ontwerp is. Dit noem hy die Antropiese Beginsel. Vir evolusioniste is ‘doel’ een van die mees weersinwekkende woorde wat daar is. Om te erken dat daar ‘n ‘doel’ met die Skepping is, is om te erken dat daar ‘n Skepper is.

DIE BEVOORREGTE PLANEET
Indien die aarde enigsins nader aan die son was, sou temperature te hoog vir enige vorm van lewe gewees het. Indien ons verder van die son sou wees, sou dit weer te laag vir enige vorm van lewe wees. Die atmosfeer om ons planeet is uniek om mens en dier te onderhou. So baie ander wetenskaplikes het soortgelyke ontdekkings en waarnemings gemaak dat ‘n mens dit met sneeuballe kan vergelyk wat in ‘n sneeu­storting ontaard het wat die pilare van evolusie wegvee.

WISKUNDIGE GENIE
Een van die grootste sterrekundiges van alle tye, Sir James Jeans, het opgemerk dat hoe meer hy die heelal bestudeer, hoe meer blyk dit asof die heelal ‘n reusagtige idee van ‘n grootse wiskundige is. Wetenskaplikes wat die Intelligente Ontwerp van Lewe aanvaar, wys op vele sulke voorbeelde, soos bv. die maan. Indien daar geen maan was nie, sou daar geen lewe op aarde aarde wees nie.

Sonder die getye en sonder die maan, sou ons strande en baaie gevul wees met tonne en tonne gemors en oorblyfsels van een of ander aard. Die maan is verantwoordelik vir die vermenging van die atmosfeer.

Net soos wat swaartekrag van die maan die getye van die see beïnvloed, veroorsaak dit ook dat die regte hoeveelheid suurstof in die water teenwoordig is as golwe teen die rotse breek. Die gasgevulde water bepaal die lewe van plankton in die see en dit vorm weer die basis van die hele voedselketting en waarsonder ons almal sou sterf.

UITSPRAAK GEREGVERDIG
Vir iemand wat in evolusie glo, is dit onver­klaarbaar dat die maan ‘bloot toevallig’ daar is en ‘bloot toevallig’ die regte grootte en afstand van die aarde is om al hierdie dinge só te laat plaasvind dat lewe op aarde volhoubaar is. Dink maar aan die stikstof in die atmosfeer – dit bestaan uit 78% stikstof, 21% suurstof en 1% ander komponente. Indien stikstof met feitlik enigiets anders vermeng word, word dit uiters giftig. Tog is dit nie die geval met die atmosfeer nie. Wat is dus die doel van stikstof in die atmosfeer? Daarsonder sou daar geen plante gewees het nie. Hoe het God dit bewerkstellig dat stikstof met die grond meng sodat plante kan groei, maar nie dat dit met die lug wat ons inasem, meng en veroorsaak dat ons sterf nie?

LEWENSBALANS
Wetenskaplikes is dit eens dat die honderde duisende weerligstrale daagliks regoor die wêreld noodsaaklik is om die molekulêre atmosferiese stikstof te verander in samestellings soos ammoniak en nitrate wat deur reën versprei word. Die stelsel produseer 100 000 000 ton stikstofplantvoedsel elke jaar en onderhou die wêreld. Telkens as ons donderweer hoor en weerlig sien, behoort ons stil te staan en net daaraan te dink dat indien dit nie vir die weerlig was nie, sou volhoubare lewe op aarde geensins moontlik gewees het nie.

DIE SKEPPING IS BEWYS VAN DIE ONTWERP DEUR ‘N SKEPPER
Wetenskaplikes wys ook op die intelligente ontwerp van stof. Vir so baie mense is stof bloot net onaangenaam, maar intelligente ontwerp wys egter daarop dat ons God baie dankbaar moet wees daarvoor. Een van die voordele daarvan is bloot kosmeties. Die lug is nie werklik blou nie, dit kom slegs so voor a.g.v. die effek van stof op lig. Indien jy 40 km reguit in die atmosfeer sou opgaan waar daar geen stof is nie, lyk die lug pikswart. Dink hier maar net aan die foto’s wat vanaf die maan geneem is en waar die lug pikswart vertoon.

DIE KOMPLEKSITEIT EN WONDER VAN GOD SE SKEPPING
Ons word ook deur kundiges ingelig dat stof iets baie belangriks doen: elke druppel reën bevat ongeveer agt miljoen druppeltjies wat om ‘n spikkeltjie stof gevorm is. Indien dit nie vir stof was nie, sou dit nooit gereën het nie en sonder reën sou die hele wêreld in iets soos die Sahara-woestyn ver­ander en sou ons almal sterf. Alles spreek duidelik van ontwerp.

Indien ons die kompleksiteit en wonder van God se Skepping bedink, word dit baie duidelik dat Hy beslis nie ‘versteek’ is soos van die skeptici beweer nie. “Die hemele verkondig die heerlikheid van God. Die uitspansel getuig van die werk van Sy hande.” Ps 19:1.

Bron:  juig.co.za

Lees Meer >>

‘n Christelike Leefstyl


Duidelike standpunte
’n Christen het ’n duidelike standpunt teen die misbruik van drank, voorhuwelikse seks, pornografie, sekere tydskrifte en Sondagkoerante gehad. Om op die Christelike ‘Sabbat’ so iets te lees, was so verkeerd soos werk op Sondag. 

Sondag is geheilig
Hier in die Vrystaat was daar nie op Sondae klubkrieket gespeel nie. Die stem van die kerk is gehoor én eerbiedig. Die Curriebeker vir krieket is oor die eerste ses dae van die week beslis. Op die sewende dag is daar gerus. Groot rugby was op ’n Saterdag. Die stilte van ’n Sondagoggend was ’n geestelike lafenis.


Voorlesing van die Wet
In ons kerke was dit geensins ’n vraag of die wet van die Here uit Eksodus 20 of Deuteronomium 5 voorgelees moes word nie. Dit is eenvoudig gedoen. Jy kon die woorde later voor die leraar uit sê: “Toe het die Here God al hierdie woorde gespreek en gesê…” Ons was gerat vir ’n mini-moraal van diens aan God. 

Vaste beginsels
Met die verklaring van die Tien Gebooie uit die Heidelbergse Kategismus het ons egter ontdek dat hierdie gebruike op vaste beginsels gegrond is; dat jou onderskeid tussen reg en verkeerd steeds op die toepassing van hierdie beginsels berus het, en in elke nuwe era daarmee rekening gehou het. Vandag se gees van ’n relativerende postmodernisme was nog nie eers op die horison nie.

Gehoorsaamheid, liefde en respek
Ons kon insien dat die eerste vier gebooie daaroor handel dat jy God eer. As jy die Here regtig liefhet en respekteer, sal jy afgode soos geld en genot vermy; gebruik jy Sy Naam nie ydellik nie; eerbiedig jy die Sabbat. 
Uit Romeine 13 het ons ook geleer dat eerbied vir gesag, die huwelik, nie steel of moor nie – nie eers met gedagtes of woorde nie – die gebruik van betroubare, opbouende woorde in jou kommunikasie en die regte begeertes in alles, alles op naasteliefde en respek neerkom.

Tien Gebooie bepaal jou lewe
As jy die Here liefhet én glo dat elke mens na die Beeld van God geskape is, is ’n Godgedrewe naasteliefde en respek ’n uitvloeisel daarvan; bepaal die Tien Gebooie, as vaste vertrekpunte of beginsels, jou lewe. Hierdie gebooie, wat volgens Deuteronomium 6:4 met hart en siel en al jou kragte uitgeleef moet word omdat die Here jou God is, is die Gebooie wat aandui dat jy die Here liefhet omdat Hy jou liefhet. 

Eietydse toepassing van waarhede
Maar, net soos die kerklied of Bybelvertaling eietyds en verstaanbaar moet wees, net so is kleredrag vir kerk toe gaan en houdings van eer-bied vir God, ’n eietydse uitdrukking van respek vir die Here. Preke en openbare gebede wat van respek en dankbaarheid vir die Here getuig, moet ook afgestem wees op die huidige leefwêreld van diegene wat dit aanhoor. Die Woord van die Here met sy ewige waarhede moet in enige situasie of tydperk ontvang kan word.


Gehoorsaam uit dankbaarheid
Die gebooie van die Here is steeds van toepassing, dit is nie gekanselleer nie. Om die belang van hierdie kwessies uit te lig, het dit nodig geword om die beginsels rondom die Tien Gebooie as lering aan te bied. 
In die eerste plek is die bevrydende woorde “Ek is die Here jou God wat jou uit Egipte, uit die plek van slawerny bevry het…” deel van die Tien Gebooie. Die Here kondig eers Sy liefde en bevryding vir Sy kinders aan voordat Hy hulle vra om hulle hele lewe vir Hom te leef. Ons kan Hom en mekaar met dade van gehoorsaamheid liefhê omdat Hy ons eerste liefgehad het. Ons kan Sy gebooie uit dankbaarheid gehoorsaam. Hy sê: “Ek het julle bevry deur my Seun[…]in julle plek met Sy lewe vir julle skuld betaal het en weer opgewek is. Dieselfde krag wat Hom opgewek het, kan julle opwek om ewig gehoorsaam te leef.”

Nie ons wil nie
In die tweede plek bestaan opregte dankbaarheid nie uit wat ons wil nie, maar wat die Here wil. Met ons dank wil ons Hom bly maak. Daarom gaan dit oor gehoorsaamheid aan Sy wil en gebooie, en nie oor ons eie, mensgerigte, verdraaide begeertes nie. Die Here is ons Bevryder en gehoorsaamheid aan Sy gebooie ’n praktiese manier om ons hele lewe bevry te leef. “Ek is die Here jou God wat jou totaal, in alles wat jy doen, wil bevry…” Die Here stop nie by die siel van die mens nie. Sy bevryding sien niks in my lewe oor nie.

Bron:  juig.co.za

NGVishoek: Ds. ( dominee ) Martin Barnard.

Lees Meer >>

Psalm 94 – U wat onreg straf, verskyn tog!


BELYDENIS: ”U wat onreg straf, verskyn tog!” – vers 1–7

 

Die Psalm begin met die belydenis oor en appèl op God: “Here, God wat onreg straf, U wat onreg straf, verskyn tog!”  (vers 1).  Daarin lê die boodskap en krag van die Psalm.  Die 2014 vertaling vertaal “wat onreg straf” met “wat vergeld” wat heel korrek op die omkeer van die situasie dui, wat dié wat onreg pleeg hulle “verdiende loon” gee.

“Kom, Regter Van die aarde, reken af met die mense wat hulle teen U verhef.” (vers 2).  Die Psalmis gebruik hier ’n baie belangrike titel vir God wat sy reg oor almal op die aarde beskryf: “Regter van die aarde.”  Dit is omdat God die reg oor die hele aarde het as Skepper, dat Hy vir die handhawing van die reg oor die hele aarde gevra kan word.  Dié gebed maak dus staat op die uitvoering van God se regsheerskappy oor alles wat leef en beef.

Die Psalm is daarom ook gemik téén dié mense wat God se reg dwarsboom, dié wat hulle teen Hom verhef (vers 2 – “hoogmoediges” – 2014 vertaling), dié wat hulle verlustig in die leed van ander mense (vers 3), dié wat oorkook van vermetelheid (“woorde onbeskaamd laat uitborrel” vertaal die 2014 vertaling!) deurdat hulle spog met die onreg wat hulle begaan (vers 4).  En dan lys die Psalmis die mense wat daardeur getref word: die weduwees, vreemdelinge, en weeskinders (vers 6).

Let op dat dit die weerloses in die gemeenskap is wat genoem word, dié wat óf hulle versorgingsisteem verloor het – weduwees en weeskinders – óf dié wat inkommers is en sukkel om deel van die gemeenskap te word – vreemdelinge (weens politieke of ekonomiese redes – lees wat Lev. 19:34 daaroor te sê het).  Let ook op die solidariteit na beide kante toe.  Dié weerloses skaar hulle by die volk van God en die Psalmis reken hulle as deel van die volk van God, hulle is deel van God se “erfdeel” (2014 se vertaling van “wat aan U behoort”).  Belangrik!

“Dan sê hulle nog: ‘Die Here sien dit nie, die God van Jakob merk dit nie op nie.’” (vers 7 – 2014 vertaling).

APPÈL: “Sien dit tog in, julle onverstandiges onder die volk!” – vers 8–11

Hier sien ons dat die goddeloses en onverstandiges deel van die Godsvolk is.  Daarom kan dié Psalm ook aan hulle gerig word.  Hulle word as onverstandig en dwaas uitgekryt, omdat hulle twee goed van God nie verstaan nie.

  1. God het hulle gemaak – ore, oë, gedagtes.  Hy weet aan die eenkant daarom op intieme wyse presies hoe hulle is en wat hulle hoor, sien en dink.  In ’n sekere sin beteken dié gedagtes nie veel nie, want die Here weet “dat dit nietigheid is” (vers 11 – 2014 vertaling – 1983 het: “dit beteken niks” wat miskien ‘n bietjie oordadig is!).  Maar, dit beteken aan die ander kant ook dat God kan sien, hoor en dink, asof dit nodig is om dit te onderstreep!
  2. God is die hele tyd betrokke by mense, regoor die wêreld, in elke nasie.  Hoe?  Om mense op te voed, te onderrig en kennis mee te deel, sê Psalm 94.  Ons hoor hier iets van Psalm 19 se onderrig wat vanuit die Skepping uitgaan.  Ek het vroeër hieroor geskryf: Psalm 19 – God bestaan en God praat met ons.

BEMOEDIGING: “Hoe gelukkig is die mens vir wie U teregwys, Here” – vers 12–15

Die Psalmis rig hom vervolgens op diegene wat bereid is om te luister na wat hy te sê het, dié wat hulle deur God wil laat opvoed (“teregwys” – 2014 vertaling). Dié onderrig kom uit die “woord” (“wet” in die oorspronklike teks), waarin die ander deel van Psalm 19 in herinnering geroep word.  Sulke mense sal nie net gelukkig wees nie, maar ook rus kry na tye van teëspoed (onheilsdae – 2014 vertaling) as die Here optree teen dié wat goddeloos opgetree het.

’n Wonderlike belofte van die Here om aan vas te hou in tye van teëspoed!  Die Here sal sy volk nie in die steek laat nie, daarop kan die volk vertrou.  “Sy erfdeel sal Hy nie laat vaar nie.” (vers 14 – 2014 vertaling). Die regspraak sal weer regverdig wees en “almal met opregte harte sal dit steun” (vers 15 – 2014 vertaling).

GEBED: Die Here ons God sal korrupte regters vernietig – vers 16–23

Ná die interne aanspreek van die onverstandiges en die bemoediging van die opregtes, wend die Psalmis hom teen dié plek waar onreg die meeste gedy, die korrupsie van dié wat verantwoordelik is vir die regspraak, die regters.  Hy noem dit “die setel van vernietiging” (2014 vertaling – vgl. vers 15 waar dit reeds aangeraak is), mense wat God se duidelike uitsprake in sy wet skade aandoen.

Hy vra dus die retoriese vraag: “Wie sal vir my opstaan teen kwaaddoeners?” (vers 16 – 2014 vertaling).  En antwoord dit met die getuienis dat dit uiteindelik net God self is wat kan en sal help.  Anders was die stilte van die graf immers lankal reeds sy tuiste.  Dit was juis toe hy gedink het dat sy voete gly (“gaan swik” – 2014 vertaling) dat die Here se troue liefde hom ondersteun het.  Selfs wanneer hy baie onrus in sy binneste ervaar, ontstellende gedagtes  wat vermeerder en hom sy rus ontneem, is dit God se ondersteunende vertroosting wat hom tot bedaring bring.

Laat my dink aan wat Paulus veel later sou skryf in Filippense 4:6–7.  Ek het daaroor die volgende geskryf:

“Met hierdie gedagtes oor God se nabyheid as begronding vir hulle vreugde en inskiklikheid, is dit geen wonder dat Paulus daarvandaan beweeg na die gemeente se behoeftes en besorgdhede nie.  Omdat God naby is, kan hulle oor alles en in alle omstandighede na Hom toe gaan in gebed.

Letterlik staan daar in vers 6: “maak in alles (alle situasies) julle versoeke (aitema) bekend aan God deur gebede (proseuche) en versoeke/petisies (deesis) met danksegging (eucharistie).”

Die verskillende woorde vir gebed in die vers moenie te veel onderskei word nie, omdat dit eintlik as sinonieme gelees kan word.  Die punt van die vers is eintlik net om duidelik te sê: angstigheid oor allerlei word deur voortdurende veelvuldige versoeke verlig!

Die aanmoediging tot gebed word opgevolg met een van die mees ongelooflike beloftes wat Paulus gee, letterlik vertaal: “gevolglik sal die vrede (eirene) van God, wat alle begrip/denke (nous) te bowe gaan, oor julle harte en gedagtes die wag hou in Christus Jesus”.

Dit is die enigste plek in die NT waar só van “die vrede van God” gepraat word.  Paulus bedoel hier nie die vrede met God nie, maar die vrede van God, die vrede wat Hy self het, die vrede wat Hy self is, die vermoë wat Hy het om nie angstig te raak oor allerlei nie, maar in beheer en veral getrou aan Homself te bly.

Dít is wat die harte en gedagtes van die gemeente sal bewaar.  En dié vrede gaan alle denke te bowe – dit bedoel letterlik dat dit iets is wat beter is as die beste beplanning!  Ons gedagtes en emosies is soos ‘n oorlogsterrein wat God sal beskerm teen angstigheid en chaos.”

Lees meer hier by my bydrae: Filippense 4:2-23 – Om saam in die Here te wees, bid en leef.

Terug by die Psalm – die Here duld nie korrupsie in die regspraak nie; Hy wil nie hê dat enigiemand ellende aangedoen word nie.  Daarom is Hy self ’n toevlugsoord, ’n veilige vesting, ’n rots by wie gelowiges kan skuiling soek en vind.  Hy is die een die onregverdiges sal laat boet vir hulle onregverdige dade, wat hulle sal verdelg oor hulle boosheid. Trouens: “met hulle kwaad sal Hy hulle vernietig,” (vers 23b – 2014 vertaling), d.w.s. hulle sal val deur hulle eie toedoen.

Die boodskap van die Psalm

Die Psalm bring groot rus in my gemoed.  Net soos God die reg in die heelal handhaaf, só doen Hy dit op aarde.  Ons mag dus die gebed in die Ons Vader bid: “Laat u wil geskied, soos in die hemel, so ook op die aarde.” (Matt. 6:10b).  En ons mag God vertrou dat Hy dit in spesifieke sake sal doen, bv. in hoe regspraak uitgeoefen word.

Selfs as dinge op die korttermyn nie uitwerk nie, bly Hyself vir ons ’n toevlug – Fil. 4:6–7 bring my tot rus! – en gee Hy rus van die ontstellende gedagtes wat in ons binneste vermenigvuldig (vers 19), en beur ons op deur sy vertroosting, NT gesproke deur Die Vertrooster, die Heilige Gees.  Die vrede van God sal oor ons gevoelens en gedagtes die wag hou, belowe Paulus ons.

Ek neem dié vers met my mee vandag: “Wanneer ontstellende gedagtes meer word in my binneste, dan beur u vertroosting my op.” (vers 19 – 2014 vertaling).

Bron: http://bybelskool.com/psalm-94-u-wat-onreg-straf-verskyn-tog/

NGVishoek: Ds. ( dominee ) Martin Barnard.

Lees Meer >>

Die lewensreis


Net tot ek moet terugry. En so maak ons met die lewe. Haat elke oomblik van die rit. Die probleem is net, aards gesproke is daar nie ‘n bestemming nie. Want die lewe IS die rit. Ons leef nou maar eenmaal asof die lewe daar vêr voor ons lê. En ons sal dit geniet, as ….. Daar moet net eers ‘n paar struikelblokke uit die pad kom. Jy weet, wanneer dit en dat nog eers gebeur, sal ek vreugde in die lewe ondervind. Ons hang vir onsself ‘n wortel voor die neus, en stap agter dit aan. Intussen geniet ons bitter min van die rit. Ek en vroulief het in die ou dae gereeld op staptoere gegaan, en was dan erg gefrustreerd met mense wat die pad so kon afjaag. Altyd gesê hierdie mense sien alles in ‘n “blur”. Stap 12 km in twee ure, net om die res van die dag by ‘n ongemaklike hut deur te bring. Niks van die genot van die stap nie.

 

“Life is ‘n journey, enjoy the ride”. Wat maak dat ons die genietinge van die lewe mis?

1. Die verlede. Ons hunker terug na die goeie ou dae. Pred 7 : 10 “Moenie sê in die oudae was dit beter as nou nie. Dis nie uit wysheid dat ‘n mens so sê nie.” Snaaks dat ons ook nie toe gelukkig was nie. Jy sien, die verlede is vir die mens bekend, en die toekoms nie. Wat wel waar is, is dat die mens die slegte dinge van die verlede redelik goed uitwis. 
2. Die toekoms. So asof gelukkig wees en vreugde hê net om die draai lê. As dit of dat nog net sal gebeur, sal ek gelukkig kan wees.

As ek net eers getroud kom, of ….. geskei. As hierdie transaksie nog net afkom. As ek nog so 10 kg afgegooi het. As my kinders net nog so bietjie groter word. As manlief of vroulief hom of haar net so bietjie regruk. As ek net so ‘n klein verhoging kry. (Almal kort mos net so 10% of meer – ryk of arm), as die baas bedank, ek bevordering kry, misdaad in die land ophou, skoonma-hulle Spanje toe trek. Ai tog, as, as, as!

Haai weet jy, dalk sal een of twee van hierdie goeters waar word, maar nooit alles nie. En intussen bly ons nou maar smart vrate. En lei ons verskriklik om deur hierdie lewe te kom. Tot iemand netnou vir jou vra …. “Hoe gaan dit?” Dan is dit “kan nie beter nie”, “voorspoed verveel my”, “bitter goed”, “punt in die wind”, ens.

Geluk lê nie iewers aan die einde van die pad nie. Geluk is die pad.

‘n Spreekwoord sê “Die lewe begin op 40”. Surprise, surprise ……

Ons sit mos maar almal met hierdie “idols” wat ons onbewustelik najaag.

Hier is vir jou ’n toetsie: Noem die:- 
1. Vyf rykste mense op aarde. 
2. Die laaste vyf mej Wêrelde. 
3. Laaste vyf Nobel-pryswenners. 
4. Laaste vyf Oscar-wenners vir beste akteur/aktrise.

Kan jy? Sukkel jy? Moenie sleg voel nie, hulle is la-a-a-ankal vergete. Hoekom? Want hulle het nie veel verskil gemaak aan jou en my nie.

Nog ‘n ander toets: Noem:- 
1. Vyf onderwysers wat jou lewe goed be-invloed het. 
2. Vyf vriende wat jou gedra het in tye van nood. 
3. Noem ‘n paar mense wat jou spesiaal laat voel het. 
4. Lekker tye saam met iemand.

Makliker? Of hoe? Want dis die dinge wat saak maak. Wat die lewe waarde gee!

Daar word vertel dat daar eenmaal in die  Seattle Olimpiese spele vir gestremdes 9 atlete deelgeneem wat almal op die een of ander manier fisies en of verstandelik gestrem was. Toe die skoot klap het almal begin hardloop. Een van die atlete het geval en begin huil. Die res het almal het gestop en omgedraai. ‘n Meisie met Down sindroom het by hom gaan sit en gevra of hy nou beter voel. Toe hy opstaan, het almal saam met hom gestap na die eindpunt toe. Vir hierdie nege het dit oor verhoudinge gegaan.

Hoe lank gaan ons nog wag voor ons die lewe begin geniet? Dit lê nie oral rond nie, ons moet dit gaan haal, gaan soek. Die mooiste skulpies op die strand lê nie oop en bloot nie. Ons moet dit gaan soek in die poeletjies tussen die rotse, soms half begrawe in die sand.

Hoe kry ons dan lewensvreugde?

1. Tel jou seëninge. Jitte tog, is Suid-Afrika so sleg? Wil jy eerder in Zimbabwe bly? Of Indië, of China, elders in Afrika? Misdaad is sleg, maar ons is nie in ‘n oorlog nie. Het jy al ‘n oorlog sirene gehoor? 
2. Besluit om positief te wees. Lees Ps 23 – met ‘n nuwe perspektief! Ons lees dit as ‘n Psalm wat ons uit ‘n donker gat moet haal. Luister net met ‘n positiewe gesindheid. Kan ons nog negatief wees as die Here vir ons hierdie belofte gee? 
3. Pak iets lekkers aan. Iets wat jou aandag van die werk aftrek. 
4. Gaan doen daai ding wat jy nog altyd wou. Bungy, diepsee duik, versamel seëls, skilder. 
5. Doen lekker goed saam met die gesin. 
6. As jy val, staan weer op. Steek net jou hand uit, God sal dit vat. 
7. Stap in die oggend, begin ‘n nuwe roetine, los die dieët vir ‘n week, of sommer vir altyd. 
8. Gaan bedien ander wat swaarkry. Neem ‘n ouma in die ouetehuis aan, of gaan kuier liewer vir jou eie ouma, of ma en pa. 
9. Gee so bietjie van jou geld weg. 
10. Gaan bederf jouself so bietjie met iets lekker. Nou nie ‘n nuwe BMW nie! 
11. Vind jou vreugde in die Here.

Besluit om vandag te geniet. Beteken iets vir ander, jouself en die Here. Geniet die reis.

Bron: heuning.co.za NGVishoek: Ds. ( dominee ) Martin Barnard.

Lees Meer >>