Jy kan ’n verskil maak
Rifkatu Ephraim Maso, van Nigerie is maar net een vervolgde gelowige wat deur briewe van mede-gelowiges regoor die wêreld vertroos is. Sy het haar man, eerw. Ephraim Masok tydens die Jos-bloedbad van November 2009 verloor. Minder as ’n jaar en ’n half later is pyn en vrees tot vreugde en dankbaarheid herstel. Toe daar vir haar gevra is wat die rede vir haar positiewe ingesteldheid was, het sy geantwoord: “Hierdie kaartjies wat jy sien, is beter as kos of geld. Deur een te lees, kry ek weer moed om aan die gang te bly.”
Deur gereeld die gebede te lees, het haar gemoed positief gebly. Geopende Deure sal die briewe wat jy skryf aan gelowiges wat ter wille van hulle geloof opgesluit is, wegkruip, rou of ly, besorg.
Bring hoop aan Jum
Christene regoor die wêreld word genooi om kaartjies of briewe van bemoediging aan die 39-jarige Jum Acidre, weduwee van die Filippynse leke-prediker, pastoor Mario Acidre, te skryf. Ongeveer nege maande gelede het ’n ongeïdentifiseerde skut Mario ses keer by sy huis in die Suide van Filippyne geskiet. Jum was langs hom toe dit gebeur het. Hy het ’n paar uur lank in die hospitaal om sy lewe geveg voordat hy oorlede is.
Hoop aan die verwondes
Gedurende die polisie-ondersoek wat gevolg het, het Jum genoem dat twee mans probeer het om enkele ure voordat hy geskiet is, gelukbringers aan hom te verkoop. Sy het gehoor hoe hulle aan Mario genoem het dat die gelukbringers hom teen ‘koeëls’ sou beskerm. Enkele dae voordat hy geskiet is, het Mario oor sy geloof teenoor Moslem-ouers by ’n skool getuig. Na sy dood het verskeie Christen-werkers in Jolo moorddreigemente ontvang. Tot op hede is niemand nog in verband met Mario se dood in hegtenis geneem nie. Jum het onlangs ’n seminaar bygewoon wat deur Geopende Deure vir 21 enkelma’s, sommige deur hulle Moslem-mans in die steek gelaat omdat hulle Christene geword het, gereël is.
“Ek mis Mario,” het Jum aan Geopende Deure gesê. “Ek mis dit hoe hy vir my water gaan haal het, die wasgoed gedoen het as ek moeg was…en as ek siek was, het hy my versorg. Hy was ’n baie goeie man en eggenoot.” Sy het ook bely dat sy nie meer die Bybel kon lees nie omdat dit haar te veel aan Mario herinner. Hy het gereeld uit die Bybel aan haar voorgelees. Elke keer wanneer sy die Bybel wou lees, het sy in trane uitgebars. ’n Rukkie gelede het sy besluit om Jolo te verlaat en by haar suster in Zamboanga te gaan woon nadat sy opgelet het dat sommige agterdogwekkende mans by haar woonplek rondhang. “Daar was nagte wat ek koue rillings in my bed gekry het. Soms kon ek nie slaap nie omdat ek gevoel het dat mense om my huis rondloop,” het Jum vertel.
Julle briewe beteken so baie
Met die hulp van Geopende Deure het Jum ’n onderneming begin wat houtskool verkoop. Haar 26-jarige dogter, Misha Almidi, ’n weduwee met twee jong kindertjies, help haar. Hulle beplan om saam in ’n permanente woonplek in te trek. Jum wil graag deel van Geopende Deure se leierskapsopleidingspan wees, in kerkbediening betrokke raak en na haar familie wat nie Christene is nie, uitreik.
Deur die hand op papier te sit, kan jy ’n tasbare bevestiging aan Jum gee dat haar broers en susters in die geloof aan haar dink, vir haar omgee en bid. Jou woorde en gebede beteken veel meer vir ’n vervolgde as wat jy ooit sal besef.
Bid asseblief vir:
• God om Jum se geloof te versterk, selfs al is sy in pyn na haar man se dood
• Jum se sake-onderneming: dat dit sal floreer en in haar behoeftes voorsien
• Geleenthede waar Jum die Evangelie aan haar familie kan bring
Skryfriglyne
• Moet asseblief nie Geopende Deure in die brief noem nie
• Groetekaarte, kinderkuns en poskaarte werk die beste (stuur poskaarte in ’n koevert en moenie Geopende Deure se adres iewers aandui nie)
• Gebruik drukskrif en skryf slegs in eenvoudige Engels
• Wees bemoedigend, kort en kragtig
• Sluit gerus Bybelverse in
• Wees asseblief sensitief waaroor jy skryf. Moet bv. nie op die omstandighede fokus of hoe lekker die lewe in SA is nie
• Jy mag jou naam, maar nie jou volledige adres nie, insluit
• Moet asseblief geen geld saamstuur of enige geldelike steun beloof nie
Bron: juig.co.za