“Bybellesers sal aanstoot neem aan die sadistiese dade van moord en geweld, asook die seksuele ondertoon, in dié uitbeelding van lewe op die ark tydens die sondvloed,” skryf Smith.
“Dit bevat seksuele detail wat waarskynlik uitgelaat kon word.”
So byvoorbeeld word ’n gelaaide seksuele atmosfeer geskets tussen Noag se seun Gam en Re Jana, ’n tiener wat Gam op die Ark ingesmokkel het.
Bedags bad die 14-jarige meisie hom en sy broers, Sem en Jafet.
Lesbiese verhoudings en tienerswangerskap duik ook in die storie op.
Daar is ’n moontlikheid dat die boek in Suid-Afrikaanse hoërskole voorgeskryf kan word, sê Protea Boekhuis, die uitgewer van die Afrikaanse weergawe.
By navraag het mnr. Nicol Stassen, uitvoerende hoof van Protea Boekhuis, gesê Provoost is een van die suksesvolste jeugboekskrywers van die Lae Lande.
“Een van haar ander boeke, Vallen, is selfs in nege tale vertaal. ’n Suksesvolle rolprent is daarvan gemaak.”
Volgens mnr. Izak de Vries, Protea se bemarkingshoof, is die roman van groot literêre waarde. “Dit is vir oud en jonk. Ek bemark dit beslis aan volwassenes. Dink aan tekste soos Die uurwerk kantel en Toorberg. Nie een was ‘tienerboeke’ nie, maar albei het derduisende in die skolemark verkoop.
“In Suid-Afrika is daar sogenaamde ‘voorgeskrewe boeke’ en dan het jy boeke wat ‘goedgekeur’ word vir biblioteke. Ons lê wel boeke aan die onderwysdepartemente voor. Ek sal Die arkvaarders ook voorlê.”
Stassen sê “daar is niks in die boek wat die jonger lesers nie reeds ’n paar keer daagliks op TV of in flieks sien nie. Iemand wat verras sou wees deur temas of gebeure in die boek, het nie die afgelope 20 jaar ’n jeugboek, selfs énige boek, gelees nie.
“Dis dalk goed dat van die kerkvaders die boek – of selfs net die Bybel – lees. Dis my ervaring dat die klakouse nie eintlik ander boeke lees nie en ook nie bereid is om na ander se standpunte te luister nie.
“Die Bybel het besonder baie geweld en seks. Daar’s niks in Arkvaarders wat nie ook in die Bybel is nie.”
Daarenteen het dr. Isak Burger, president van die AGS, gekla die boek “ontheilig die heilige boek van die Christene. Dis onverantwoordelik om so ’n boek aan skoolkinders voor te skryf.
“Dis verregaande, selfs al is dit fiksie. Daar is géén aanduidings in die Bybel of ander bron wat sulke snert regverdig nie.
“Trouens, die omgekeerde word geïmpliseer. Dit was juis immoraliteit en seksuele vergrype wat daartoe bygedra het dat God die toentertydse wêreld deur water vernietig het.
“Juis omdat die gelowige, regverdige Noag en sy gesin nog nie deur dié bose, perverse lewenswyse besmet was nie, het God hulle begenadig.”
Bron: http://www.rapport.co.za/Suid-Afrika/Nuus/Christene-kriewel-oor-Noag-boek-20120303