Vergifnis: Om die turksvy af te skil
- Vergifnis beteken nie goedkeuring nie, maar ‘n bereidheid tot begrip. Augsberger vertel van die alkoholis se vrou wat gemeen het “my vergifnis en liefde is dalk sy enigste band met God”. Dit het God baie gekos om te vergewe — ek moenie verbaas wees dat dit my ook iets kos nie.
- Ja, dit klink nie regverdig om iemand skotvry daarvan te laat afkom nie. Maar:“Genade is nie fair nie!”
- Iemand het dit so mooi saamgevat:
“People are often
unreasonable and self centered.
Forgive them anyway
…
For you see, in the end,
it is between you and God.
It never was between you and them anyway.”
Om te blameer los nie probleme op nie.
Verbasend dikwels is dit nodig om soos Evelyn Christenson te bid: “Here, verander my!”
- wanneer daardie krimpvarkie-tiener alweer ‘n rug vol stekels op my gedraai het,
- wanneer my man vir die soveelste keer sy klere op die badkamervloer laat lê het,
- of wanneer my vrou alwéér oorspandeer het op ons kredietkaart.
- Ek kan kies om nie in sondige selfbeskerming te ontplof óf te inplof nie. Om met ‘n eiegeregtige veeleisende houding aan te dring op verandering gaan selde iets vermag — ek kan niemand so effektief verander as wat die Gees van God dit kan doen nie. Daarná kom die saamwerk aan ‘n oplossing.
Maar hoe gemaak as ek onthou?
- Sophie* het gekies om nie die ‘ander vrou’ te sien as oorsaak van haar pyn nie, maar as ‘n herinnering aan God se genesende liefde.
- Dawie* moes kies om die herinneringe aan sy eie huweliksontrou te omskep in ‘n loflied oor die bereidwilligheid van Jesus om ook hiervoor te betaal — ten volle! So kon vergifnis teenoor homself ook ‘n werklikheid word.
Is sulke vergifnis nie tog onmoontlik nie?
1 Johannes 5:14-15 belowe dat God ons gebede verhoor as ons enigiets volgens Sy wil vra. Daarom kan ek met vertroue vra dat Hy my die krag sal gee om met die proses van vergifnis te begin en aan te hou. Hy sal vir my die arendsvlerke gee waarvan in Jesaja 40:31 gepraat word: maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie.
Nou is ek toegerus om te begin werk aan onvoorwaardelike liefde — liefde ten spyte van, nie as gevolg van nie.
Sien volgende keer.
* Hierdie is werklike gevalle, maar name is verander om die betrokkenes te beskerm.
Bron: ekerk.co.za
NGVishoek: Ds. ( dominee ) Martin Barnard.