Yolandi Hewetson van die prokureursfirma Hewetson Ingelyf het ’n brief namens die skool aan die munisipaliteit geskryf waarin sy aanvoer dat die teater se optrede “totaal ongrondwetlik is en dat dit onafdwingbaar is”.

Luidens paragraaf 12 van die kontrak wat die skool met die teater aangegaan het, mag ingevolge standaard-teaterregulasies geen godsdiens of politiek in die teater verkondig word nie. “As dit gedoen word, het die verhuurder die reg om alle verrigtinge te stop.”

Hewetson sê sy twyfel of die munisipaliteit dit gaan kondoneer dat diskriminasie teen godsdiensvryheid in sy naam gepleeg word.

In haar brief aan die munisipaliteit sê sy die vertoning van die skool het ’n Christelike karakter. “Die gehoor en die kunstenaar wat gaan optree, gaan Christus se geboorte vier. “Om dié byeenkoms met Skriflesing en gebed te open, waar die kunstenaar Christelike liedere gaan sing, is net logies.”

Die skool het reeds ’n kontrak met ’n baie bekende kunstenaar aangegaan om in November op hul Kerssangdiens op te tree. Hewetson sê dit sal teleurstellend wees as dit gekanselleer moet word omdat godsdiens in die teater verbied word.

Modise Mahlatsane, woordvoerder van Matjhabeng, sal Donderdag kommentaar lewer.
Bron: Volksblad