Maar godsdiens is ’n moeilike ding om oor te skryf. As jy nie versigtig is nie, dink ek, dan staan jy maklik die kans om jou leser te irriteer. Dit is een ding om jou leser uit te daag. Eintlik is dit wonderlik. Ek self is mal daaroor om stukke te lees wat my eie perspektiewe uitdaag. Wat my leer hoe ander mense dinge sien. Wat my die ander storie vertel. Maar om jou leser te irriteer is ’n heel ander saak.

Hierdie betrokke stuk van Dana kan mens net so maklik omdraai. Jy kan dit skryf vanuit die ‘ateïs’ se oogpunt. Jy kan sê nou maar vir ‘Fanie’ vervang met ‘Piet’. Dan vertel hoe hooghartig die Christene is. Jy kan skryf oor hoe lelik Piet is as ander mense dit durf waag om te sê dat daar nooit iemand soos ‘Adam en Eva’ was nie. Jy kan vertel hoe Piet, wat voorheen ’n gawe, vredeliewende mens was, nou skielik diskrimineer en beledigend raak teenoor homoseksuele mense – want hy is nou ’n “Christen”.

En so kan jy aan en aan en aangaan. Al in die rondte. Die punt is, daar is ongure Christene en daar is ongure ongelowiges/ateïste. Die een is nie erger as die ander nie. Albei is ewe erg.

En dan moet ons onthou dat daar eintlik ’n verskil tussen ateïste en ongelowiges is. Ons sukkel baie met definisies in Suid-Afrika (eintlik maar oral ter wêreld), en ateïs/ongelowig is een van hierdie dinge waarmee ons sukkel (ons sukkel ook ekstra baie met terme soos ‘rassisme’ en ‘apartheid’ omdat ons nie altyd dieselfde dinge onder dié terme verstaan nie). Alle ateïste is ongelowig, maar nie alle ongelowiges is ateïste nie. Die kerk byvoorbeeld het baie ongelowiges. Ek was self vir lank ’n ongelowige, en daar is steeds baie dae wat ek twyfel. Dit is geen skande om te twyfel nie. Dit is eintlik heel menslik (Matteus 28:17). Mense oordeel te maklik. Gelowiges sowel as ongelowiges oordeel te maklik. Ons as Christene is baie lief vir die bekende teksvers Johannes 3:16. Dis so gewild dit word soms sommer net aangedui as 3:16. Maar ons kan gerus net die volgende vers meer dikwels lees, en ek haal aan:

“God het NIE* sy Seun na die wêreld toe gestuur om die wêreld TE VEROORDEEL NIE*, maar sodat die wêreld deur Hom gered kan word.” (Johannes 3:17)

’n Ateïs is iemand wat gekant is teen godsdiens, en dít is alle ongelowige mense beslis nie. Toe ek self nog ongelowig was, het ek vrede gehad met andere se oortuigings. Om a-iets te wees is gewoonlik om téén daai ding te wees, byvoorbeeld asosiaal (jy hóú dus nie van sosiaal verkeer nie). En selfs dán, selfs wanneer iemand téén iets is, byvoorbeeld teïsme, beteken dit geensins dat daardie mens nie andere se besluite uiteindelik sal respekteer nie.

Ja, maar die Bybel vertel eintlik vir ons dat die Here nie mense WIL VEROORDEEL nie. Maar ons Christene dink dikwels ons is net so goed of selfs beter as die Here self en dan wil ons net links en regs oordeel en slegsê. Daar was juis die naweek so ’n lang stuk in die koerant oor Christene wat kwaad is vir ander Christene omdat hulle dit durf waag om hul eie kinders onvoorwaardelik lief te hê. Maar die troos vir ons almal, ook vir die onverdraagsame mense onder ons, is dat die kerk juis daar is vir stukkende mense.

Ek behoort aan geen politieke party nie. Ek probeer geen bepaalde orde bevorder of nie bevorder nie. Maar ek glo dat God vir my ook die Grondwet gee om meer sin te maak van die wêreld rondom my. As iemand ’n Christen is sê dit nie vir my outomaties dat dié persoon elke sekonde van elke dag in die gees van Jesus leef nie. Christene is nie perfek nie. ’n Christen is bloot iemand wat soek na die wil van die Een wat ons (as Christene) glo God is. Maar wanneer ek weet dat iemand in die gees van ons Grondwet probeer leef, dan weet ek dié persoon probeer ook iets van die gees van Jesus van Nasaret najaag, of hy nou Christen of Jood of Moslem of ongelowig, of Wiccan of ateïs of wat ook al is.

Kyk net wat staan in ons Grondwet

Artikel 9 (3) van die Grondwet lui:

Die staat mag nie regstreeks of onregstreeks onbillik teen iemand diskrimineer op een of meer gronde nie, met inbegrip van ras, geslagtelikheid, geslag, swangerskap, huwelikstaat, etniese of sosiale herkoms, kleur, seksuele georiënteerdheid, ouderdom, gestremdheid, GODSDIENS, GEWETE, OORTUIGING, KULTUUR*, taal en geboorte*

Die gees van die Grondwet is een van vergewe en aanvaar. Net soos die boodskap van Jesus. Net soos die Belydenis van Belhar.

Met dit als in gedagte gaan ek die fenomenale Dana Snyman vandag probeer na-aap, maar as die antitese van sy skrywe. Vervolgens dus ’n herskrywing van die laaste paragraaf of wat van sý stuk, maar die keer vanuit die teenoorgestelde hoek, net om te wys hoe maklik dit kan wees om ook vir die ander kant aanstoot te gee.

*

Dit is asof alle ongelowiges vir Piet ateïste is. Jy kan hom probeer vertel dat jy as ongelowige geen beswaar teen sy geloof in God het nie, en dat jy alle mense se keuses en gelowe respekteer selfs al verskil jou interpretasie van die Bybel (of dan die Qur’an of wat ook al) van hulle s’n. Jy kan vir Piet probeer sê daar is iets mensliks aan twyfel. Maar hy stel nie daarin belang nie.

Hy is mos nou ’n Christen (of Moslem ens. ens.).

* Die hoofletters is my eie kursivering.

Bron:  http://blogs.nuus24.com/vdmbj/jesus-is-in-die-grondwet