Ek dink ons laat God soms ’n toets skryf. Ons besluit hoe ons dink God moet wees en wat God moet kan doen en hoe Hy dit moet kan doen. Ons berei vir God ’n vraestel voor. God moet altyd al my gebede beantwoord deur vir my te gee wat ek vra. As Hy dit nie doen nie, dan beteken dit dat ek nie vir God iets kan vra nie.
God is ’n God van liefde wat nie nie wil hê dat mense moet ly of swaarkry nie. As mense dan wel swaarkry, dan beteken dit dat God nie regtig ’n God van liefde is nie.
God maak mense se lewens nuut. As God se kinders dan foute maak of selfs sonde doen, dan beteken dit dat Hy nie regtig ’n verskil in mense se lewens maak nie.
So sou ons kon aangaan en al die argumente van ongelowiges en onverskilliges aanhaal. Die punt is, as God een vraag van die vraestel wat ek opgestel het verkeerd “antwoord” dan druip God die hele toes van God-wees.
Ek maak twee gevolgtrekkings: As mens eers vir jouself uitwerk hoe God moet wees en dan gaan kyk of God is soos jy gedink het Hy is, kon jy net sowel ’n goue kalf gebou het en dit aanbid het. Jy het jou eie God geskep en die het nie aan jou verwagting voldoen nie. Daardie God is egter nie die God van wie ons in die Bybel leer nie.
Die tweede opmerking in hierdie verband is dat iemand wat so dink se lewe en gedagtes nie oop is om deur God verras te word nie. Met ander woorde, die kanse dat ek ’n nuwe of meer volledige perspektief op God kan kry deur die Woord beter te bestudeer ens. is uitgeskakel. Ek het klaar besluit hoe God is en jy gaan my nie anders oortuig nie.
Jy mag die Here jou God nie ’n toets laat skryf nie.