Koffie saam met Jesus

 

Dalk voel jy ook soos ek oor mense. Miskien voel jy ewe skuldig as ekke omdat party mense jou suurstof steel as hulle in die omgewing is. Dalk wil jy spontaan vensters begin oopmaak om die koolsuurgas uit te kry as sommiges in een of ander vertrek opdaag. Wel, dan is dit tyd vir ’n goeie koffie…

Koffie gee mens perspektief. Die regte soort koffie, bedoel ek. Nooi die Heer as spesiale Gas en Gasheer uit. En praat dan sommer padlangs met Hom oor al daardie klippies in jou skoen. O ja, en oor al daardie mense wat rotse in jou pad rol. Vra Hom om jou die genade te gee om dit nooit teen hulle te hou, of oor hulle klippe te val nie.

Jesus het oorgenoeg tyd om saam met sy mense tot rus te kom. As dit moet, dan maak Hy selfs ekstra tyd. Hy wil hoor wat op jou hart is. O ja, en Hy wil jou laste namens jou dra. Hy wil jou leer om na ander mense deur Sy oë te kyk. Hy wil jou vrymaak.

Wanneer jy die slag saam met Jesus koffie gedrink het, verander alles. Doen dit gereeld. Onthou tog net dat dit nie plêstiek koffie moet wees nie.

 Bron:  ekerk

NGVishoek: Ds. ( dominee ) Martin Barnard.